1-3. 1) ¿Kuna jan walinsa israelitanakajj uñjasipjjäna? 2) ¿Kunjamsa Jehová Diosajj markap layku nuwasïna?

 ISRAELITANAKAJJ janiw egipcionakat kunjam escapañsa puedipkänti, jupanakajj jachʼa qollunakampi ukhamarak Mar Rojo sat qotamp jarkʼantataw uñjasipjjäna. Jupanakan qhepapjja, egipcio soldadonakaw jiwarayañatak arktapjjarakïna. a Ukampis jan sustjasipjjañapatakiw Moisesajj markar chʼamañchtʼäna, akham sarakïnwa: “Jehová Diosaw jumanak laykojj nuwasini” sasa (Éxodo 14:14).

² Amuyatajja, Moisesajj uka qhepat Diosaruw yanaptʼa mayïna, Diosasti juparojj akham sänwa: “¿Kunatsa jumajj nayar artʼasinkakista? [...] Amparamankki uka vara Mar Rojo qota toqer aytam, ukatjja payar jaljtayam” sasa (Éxodo 14:15, 16). Kunas ukjjar pasäna uk amuytʼañäni. Jehová Diosajj jankʼakiw markaparojj angelap toqe yanaptʼäna, uka angelajj israelitanakan qhepäjjaparuw columnar uñtasit saytʼäna, ukhamatwa mä perqäkaspas ukham egipcionakat jarkʼaqäna (Éxodo 14:19, 20; Salmo 105:39). Ukatjja Moisesajj Mar Rojo qota toqeruw amparap loqtäna, ukatsti wali chʼamani thayaw qotarojj payar jaljtayäna. Umajj jachʼa perqanakjamaw “mä pachpanak” purap ladon saytʼäna, uka qota taypinjja wali jachʼa thakiw utjäna, ukhamat taqeni uknam makatapjjañapataki (Éxodo 14:21; 15:8).

 ³ Taqe ukanak uñjasajja, faraonajj soldadonakapampejj kuttʼjjapjjañapänwa. Ukampis janiw uk lurapkänti, antisas faraonajj arktasipkakiñapatakiw mä orden soldadonakapar churäna (Éxodo 14:23). Egipcionakajj israelitanak qhepap arktasipkäna ukhajja, akatjamatwa carronakapan llantanakapajj jalartapjjäna, ukhamatwa avanzañ jan puedjjapjjänti. Kunapachatï israelitanakajj khurkatar purjjapjjäna ukhajja, Jehová Diosajj Moisesar akham sänwa: “Mar Rojo qota toqer amparam loqtam, ukhamat egipcionakasa, guerran nuwasiñatak carronakapasa, caballonakat sarir jaqenakapas qota taypin chhaqtayatäpjjañapataki” sasa. Uka qhepatjja, perqanakjam saytʼatäkäna uka umajj kutjjatasaw faraonampiru soldadonakapampir qʼal jiwarayäna (Éxodo 14:24-28; Salmo 136:15).

4. 1) ¿Kunjam Diosätapsa Mar Rojo qotan Jehová Diosajj uñachtʼayäna? 2) Jehová Diosajj jan wali jaqenakar tukjañatak chʼamanïtap yatisajj ¿kunsa yaqhep jaqenakajj amuyapjje?

⁴ Jehová Diosajj kunjamsa israelitanakar Mar Rojo qotan salväna ukajja, jupajj “guerran nuwasiri wali chʼaman” Diosätapwa uñachtʼayistu (Éxodo 15:3). Ukhamajj ¿kunjamakis guerran nuwasiri Diosätap yatisajj jikjjatastanjja? Cheqansa, guerranakas nuwasiñanakas jaqenakarojj jan waltʼayiwa, wali tʼaqesiñanakwa utjayaraki. Ukatwa walja jaqenakajj Jehová Diosar jakʼachasiñ ajjsarayasipjje, kuna laykutejj jupajj jan wali jaqenakarojj chʼamapampiw awisajj tukji.

5, 6. 1) ¿Kunatsa Diosarojj ejercitonakan Jehová Diosapa sasin saspacha? 2) ¿Diosan guerranakapampi jaqenakan guerranakapampejj kunansa jan igualäki?

⁵ “Ejercitonakan Jehová Diosapa” sasin traducitäki uka  arojja, 260 jila kutiw Hebreo Arut Qellqatanakan uñsti ukat pä kutirakiw Griego Arut Qellqatanakan uñstaraki (1 Samuel 1:11). Taqe Kunjjar Munañani Jehová Diosajja, mä jachʼa ejército angelanakaruw pʼeqtʼi (Josué 5:13-15; 1 Reyes 22:19). Uka angelanakajja nuwasiñatakejj wali chʼamanïpjjewa (Isaías 37:36). Cheqansa, jaqenakar jiwir uñjañajj wali llakkañawa. Ukampis akwa amtañasa: Jehová Diosajj guerranakan nuwasiwayki ukajja, janiw jaqenakajj kuna amtampitï guerranakan nuwasipki ukhamäkiti. Kuna laykutejj politiconakasa ejercitonakasa jupanakan askip thaqasakiw guerranak utjayapjje, janirakiw mayninakats llakisipkiti.

⁶ Ukampis Jehová Diosajj janiw munañapamp apayasisakejj nuwaskiti, ni jan amuytʼasisakis kuns lurkiti. Uka toqetjja Deuteronomio 32:4 textojj akham siwa: “Diosajj jiwasan Qarqasawa, luratanakapajj perfectowa, kuna laykutejj taqe thakinakapaw cheqapajja. Jupajj jan jaytjasir Diosawa, janipuniw kunatï jan cheqapäki uk lurkaspati, jupajj cheqapa ukhamarak cheqa Diosawa” sasa. Cheqas jan sinttʼasis kun lurañasa, nuwasiñasa, coleramp atipayasiñas janiw walïkiti sasaw Bibliajj qhanañchi (Génesis 49:7; Salmo 11:5). Ukampis Jehová Diosajj wakiski ukhakiw nuwasi, mä arunjja janipun mä kunas askichañjamäjje ukhakiw nuwasi. Uka toqet parlkasajja, Jehová Diosajj Ezequiel profetap toqejj akham sänwa: “¿Jan wali jaqen jiwatapajj nayar kusisiyituti? ¿Janit nayajj jan wali thakinakap apanukusin jakaskakiñap munktjja?” sasa (Ezequiel 18:23).

7, 8. 1) Jan walinakan uñjasisajj ¿kunsa Job chachajj Jehová Diosat amuyäna? 2) ¿Kunjamsa Elihú waynajj Job chachar yanaptʼäna? 3) ¿Kunsa Job chachan sarnaqäwipat yateqsna?

⁷ Ukampis ¿kunatsa Jehová Diosajj jan wali jaqenakar awisajj tukjpacha? Janïr uka jisktʼar qhanañchkasajja, kunas Job chachamp pasäna uka toqet parltʼañäni. Supayajj  Diosar kutkatasajj akham sänwa: ‘Jaqenakarutï yantʼasispa ukhajja, jupanakajj jumat jitheqtjjapjjaspawa’ sasa. Ukatwa Jehová Diosajj Job chachar yantʼañapatak Supayar jaytäna. Supayasti Job chachar qʼal usuntayäna, utjirinakapsa apaqarakïnwa, wawanakaparus jiwarayarakïnwa (Job 1:1-2:8). Job chachajj kunatsa tʼaqesiskäna uk janiw yatkänti, ukatwa Diosas castigkaspa ukham amuyäna. “¿Kunatsa jumajj ajanum imantasta? ¿Kunatsa nayarojj enemigomarjam uñjista?” sasaw sarakïna (Job 7:20; 13:24).

⁸ Jan ukhamätapjja, Elihú sat mä waynaw Job chachar amuytʼayäna. “¿Jumajj razonanïtamat jan payachasisajj ‘Diosat sipans jukʼamp cheqapätwa’ sasat sasma?” sasaw sarakïna (Job 35:2). Cheqansa, Jehová Diosat sipans jiwasas jukʼamp yatiñanïksna, jan ukajj jupajj janis cheqaparjam lurkaspa ukham amuyañajj janipuniw akchʼas walïkaspati. Ukatwa Elihú waynajj akham säna: “¡Janipuniw kunäkipansa cheqpach Diosajj kunatï jan walïki uk lurkaspati! ¡Janipuniw kunäkipansa Taqe Chʼamani Diosajj kunatï jan cheqapäki uk lurkaspati!” sasa. Uka qhepatjja akham saskakïnwa: “Janiw jiwasanakajj Taqe Chʼamani Diosat amuytʼksnati, jupajj wali chʼamaniwa, janipuniw kunatï jupatak cheqapäki uka contrajj juzgkaspati” sasa (Job 34:10; 36:22, 23; 37:23). Cheqas Jehová Diosajj guerran nuwasiñatakejja, walja suma razonanakaniwa. Jichhajja, sumankañ utjayir Diosajj kuna razonanakatsa awisajj guerran nuwasi ukanakwa yatjjatañäni (1 Corintios 14:33).

9. ¿Kunatsa sumankañ utjayir Diosajj nuwaspacha?

⁹ “Guerran nuwasiri wali chʼaman” Diosar jachʼañchasajja, Moisesajj akham sänwa: “Jehová Dios Tata, ¡janiw  jumjam yaqha diosanakajj utjkiti! ¡Janirakiw jumjam wali santo Diosajj utjkiti!” sasa (Éxodo 15:11). Habacuc profetajj niya ukham arunakwa qellqarakïna, jupajj akham sänwa: “Kunanakatï jan walïki uk uñjañatakejja nayranakamajj wali qʼomawa, kunatï jan walïki ukjja janiw ukhamak uñchʼukirïktati” sasa (Habacuc 1:13). Jehová Diosajj munasir Diosäkchisa, santo ukat cheqapar uñjir Diosarakiwa, ukatwa awisajj chʼamap toqejj jan walinak chhaqtayi (Isaías 59:15-19; Lucas 18:7). Ukhamajj Jehová Diosajj santo Diosätap laykuw guerranakan nuwasi (Éxodo 39:30).

10. 1) Génesis 3:15 texton qellqatäki uka profeciarjamajja, ¿kunjamsa Edén jardinan jan walejj utjkäna ukajj askichasiñapäna? 2) ¿Kuna bendicionanaksa Diosar istʼir jaqenakajj jutïrin katoqapjjani?

¹⁰ Adanampi Evampejj Dios contra saytʼapkäna ukhajja, kunas pasäna uka toqet jichhajj amuytʼarakiñäni (Génesis 3:1-6). Kunatï paskäna uk Jehová Diosajj ukhamak jaytaspäna ukhajja, janis Taqe Kunjjar Munañanïkaspa ukhamwa uñachtʼayaspäna. Ukampis niyakejjay jupajj cheqapar uñjir Diosächejja, Adanampir Evampir castigañatakejj derechonïnwa (Romanos 6:23). Ukatwa Diosajj mä profecía arsüna, uka profeciarjamajja jupan servirinakapampi ukat Supayan arkirinakapampejj enemigoruw tukupjjañapäna (Génesis 3:15; Apocalipsis 12:9). Ukhamarus uka jan walejj Supayar takjjatasakiwa, mä arunjja Supayar jiwayasakiw askichasiñapäna (Romanos 16:20). Ukhamatwa Diosar istʼir jaqenakajj jutïrin walja bendicionanak katoqapjjani. Supayajj janirakiw jaqenakar engañjañ puedjjaniti, aka oraqes mä suma paraisor tukuyatäjjarakiniwa (Mateo 19:28). Ukampis uka uru janïr purinkipanjja, Supayan arkirinakapajj Jehová Diosan servirinakaparuw arknaqapjjañapäna, jiwayañwa munapjjañaparakïna. Taqe ukanakatwa Jehová Diosajj markapar chʼamap toqe jarkʼaqañapäna.

11. ¿Kunatsa Jehová Diosajj Uma Juicio apayanïna?

¹¹ Noé chachan urunakapanjja, jan wali jaqenakar Uma Juiciompi tukjasaw Diosajj servirinakap laykojj nuwasïna. Génesis 6:11, 12 textojj akham siwa: “Oraqejj cheqpach Diosan nayraqatapanjja jan walipunïnwa, kunayman jan wali lurañanakampi phoqantatarakïnwa. Jïsa, oraqejj jan walipunïtapwa Diosajj uñjäna. Taqe jaqenakaw kunayman jan walinak lurasipkäna” sasa. Ukham jan wali jaqenakan utjatap laykojja, suma jaqenakajj chhaqtirjamänwa, ukampis Jehová Diosajj janiw ukhamak uñchʼukkänti. Jupajj Uma Juicio apayanisaw jan sinttʼasiri ukat nuwasir jaqenakarusa, qʼañu jucha lurir jaqenakarus tukjäna.

12. 1) ¿Kamsänsa Jehová Diosajj Abrahán chachat jutir wawanakapatjja? 2) ¿Kunatsa Diosajj amorreonakar tukjañ amtpachäna?

¹² Cananeonakar Jehová Diosajj tukjañ amtkäna ukhajj ukhamarakiw pasäna. Diosajj Abrahán chacharojj akham sänwa: ‘Nayajj mä jachʼa markaruw jumar tukuyäma, aka oraqenkir taqe familianakas jumat jutir wawam toqew bendisitäpjjani’ sasa. Uka arsutap phoqañatakejja, Diosajj Canaán oraq Abrahanan wawanakapar churañwa amtäna. Ukampis uka oraqenjja amorreonakaw jakasipkäna, ukhamasti jupanakar alisnukuñaw wakisïna, ¿kunatsa? Jehová Diosajj arskäna uka profeciarjamajja, amorreonakan juchanakapajj jukʼamp jiljjattañapäkäna ukhaw markapat alisnukut uñjasipjjañapäna (Génesis 12:1-3; 13:14, 15; 15:13, 16; 22:18). b Mä 400 maranakanjja, Canaán oraqejj marat maratjamaw jukʼamp jan walinakamp phoqantatäjjäna. Mä arunjja, markpachajj idolonakamp phoqantatänwa, ukan jakirinakas jan sinttʼasisaw jaqe masipar jiwayapjjäna, ukatjja qʼañu jucha lurañanakamp  phoqantatarakïnwa (Éxodo 23:24; 34:12, 13; Números 33:52). Ukhamarusa, uka markankirinakajj pachpa wawanakaparuw sacrificiot churasajj ninamp phichantapjjerïna. Ukham jan wali jaqenak taypin jakapjjañapatakejja, Diosajj janipuniw markapar jaytkaspänti. Antisas jupajj akham sänwa: “Ukatwa jupanakan oraqenakapajj qʼañuchatajja, uka oraqen jakirinakarojja juchanakapatwa nayajj castigäjja, oraqes jupanakar waqʼaqsuniwa” sasa (Levítico 18:21-25). Ukampis Jehová Diosajj janiw taqenir jiwaraykänti, jan ukasti suma chuymanïpjjatap uñachtʼayapkäna uka cananeonakarojj perdonänwa, Rahab warmisa ukat gabaonitanakasa janiw jiwapkänti (Josué 6:25; 9:3-27).

13, 14. 1) ¿Kunatsa Jehová Diosajj sutip qʼomachañapäna? 2) ¿Kunjamsa Diosajj israelitanakar salvasajj sutip qʼomachäna?

¹³ Jehová Diosasa sutipas santowa (Levítico 22:32). Jesusajj arkirinakapar orasiñ toqet yatichkasajja, akham sänwa: “Sutimajj jachʼañchatäpan” sasa (Mateo 6:9). Supayajj Edén jardinan Diosar kʼarintkäna, Diosajj janis suma apnaqerïkaspa ukham parlkäna, Adanampir Evampirus Dios contra saytʼaykäna ukhajja, Jehová Diosan sutipwa qʼañuchäna. Ukampis Diosajj uka kutkatasirinakarojj janiw ukhamak uñchʼukkänti, jan ukasti sutip qʼomachañwa amtäna (Isaías 48:11).

¹⁴ Israelitanakat parltʼaskakiñäni. Kunapachatï jupanakajj Egipton esclavot servipkäna ukhajja, ‘Diosajj kuntï Abrahanar arsuwayki uka promesjja janiw phoqkaniti, janirakiw oraqpachankir familianakas Abrahanat jutir wawap toqejj bendisitäkaniti’ sasaw amuyapjjpachäna. Ukampis Jehová Diosajj israelitanakar Egipto markat salvasaw sutip qʼomachäna, markaparuw tukuyarakïna. Ukanak amtasaw  Daniel profetajj Diosar akham sasin orasïna: “Nanakan Jehová Diosaja, jumaw Egipto oraqet chʼamani amparamampi markamar irpsuntajja, ukhamatwa jumajj jichhürkamas sutim wali sum uñtʼayastajja” sasa (Daniel 9:15).

15. ¿Kunatsa babilonionakamp katuntat judionakar Diosajj salväna?

¹⁵ Jehová Diosajj judionakar salvasin sutip qʼomachkäna ukhajja, kuntï oracionapan arskäna uka arunakwa qhepat Danielajj arsurakïna. Uka urunakanjja, judionakajj Diosar jan istʼapjjatap laykuw babilonionakamp katuntat uñjasipjjäna, Diosan markapan capitalapäkäna uka Jerusalenas qʼala tʼunjataw uñjasirakïna. Ukampis Danielajj ak sum yatïna: Jehová Diosatï judionakar markapar kuttʼañatak yanaptʼaspäna ukhajja, Diosan sutipajj jachʼañchataw uñjasispäna. Ukatwa akham sasin Diosar ruwtʼasïna: “Jehová Dios Tata, perdonapjjeta. ¡Jehová Dios Tata, istʼapjjakitaya, yanaptʼapjjakitaya! Nanakan Diosaja, sutim laykojj jan qheptʼamti, markamasa markamankirinakasa sutim apapjjatap layku” sasa (Daniel 9:18, 19).

16. ¿Diosajj sutip qʼomachasajj jupa pachpatak llakisitapti uñachtʼayi?

¹⁶ Jehová Diosajj sutip arjjatasasa qʼomachasasa, jan jupa pachpat llakisitapwa uñachtʼayistu. Cheqansa, sutip arjjatasajj santötapa cheqaparjam uñjirïtapwa uñachtʼayi, markapar jarkʼaqerïtapsa uñachtʼayarakiwa. Amuytʼañataki, Génesis capítulo 14 ukanjja, kunjamsa pusi reyinakajj Abrahán chachan Lot sobrinoparusa, familiaparusa katuntasin apasipjjäna uka toqetwa parli. Ukampis Diosan yanaptʼapampejja, wali chʼamani enemigonakaparuw Abrahanajj atipjäna. Amuyatajja, uka sarnaqäwiw “Jehová Diosan Guerranakapat parlir” libron nayraqat qellqasiwayi. Uka librojja Biblian jan qellqatäki uka guerranakatwa  qhanañchi (Números 21:14). Uka qhepatjja, Diosajj markapar arjjatasajj jukʼamp guerranakanwa atipjawayi.

17. ¿Kunjamsa Canaán oraqen Jehová Diosajj markap laykojj nuwasïna?

¹⁷ Israelitanakajj Canaán oraqer niya mantañampïsipkäna ukhajja, Moisesajj jupanakar akham sänwa: “Jumanakan Jehová Diosamaw jumanak nayra sarani, jumanak laykuw nuwasirakini, kunjamtï jumanakan uñjkatajj Egipto oraqen lurkäna ukhama” sasa (Deuteronomio 1:30; 20:1). Josué chachajj jakkäna uka tiemponsa, juezanakajj jakapkäna uka tiemponsa, Judá marka apnaqeri Diosar taqe chuyma servir reyinak tiemponsa, Jehová Diosajj markap laykuw nuwasïna, enemigonakapar atipjapjjañapatakis yanaptʼarakïnwa (Josué 10:1-14; Jueces 4:12-17; 2 Samuel 5:17-21).

18. 1) ¿Kunatsa Jehová Diosan pachpakïskatapat wal kusistanjja? 2) Génesis 3:15 texton qellqatäki uka arunakajj ¿kunjamas phoqasini?

¹⁸ Jehová Diosajj pachpakïskiwa, aka oraqsa cheqpachapuniw jutïrin mä suma paraisor tukuyani (Génesis 1:27, 28). Jupajj jan walinakarojj uñisiskakiwa, markaparus wal munasi ukat niyaw servirinakaparojj jan wali jaqenakat arjjatarakini (Salmo 11:7). Akat mä jukʼarojja, Génesis 3:15 texton qellqatäki uka arunakaw phoqasini, ukarjamajja Diosan markap contrajj kunayman jan walinakwa Supayan arkirinakapajj lurapjjani. Ukampis Jehová Diosajj ‘guerran nuwasirïtap’ mayampiw uñachtʼayani, ukhamatwa sutip qʼomachani, servirinakaparus arjjatarakini (Zacarías 14:3; Apocalipsis 16:14, 16).

19. 1) ¿Kunatsa Diosan chʼamanïtap yatiñajj jupar jukʼamp jakʼachasiñatak yanaptʼistu? Uk mä uñachtʼäwimp qhanañchtʼam. 2) Jehová Diosajj jiwas layku nuwasiñatak chʼamanïtap yatisajj ¿kunjamakis jikjjatastanjja?

¹⁹ Mä chachan familiaparojj ajjsarkañ mä animalas manqʼantañ munkaspa ukham amuytʼañäni, ukham pasipan  janiw uka chachajj ukhamak uñchʼukkaspati, jan ukasti familiapar arjjatasajj uka animalarojj jiwayaspawa. Uka chachan ukham luratapatjja, esposapasa wawanakapasa jukʼampiw jupar jakʼachasipjjaspa, jupanakar munasitap layku arjjatatapatsa wal yuspärapjjarakispa. Jehová Diosajj ukhamarakiw chʼamapampejj jan wali jaqenakar jiwarayasajj arjjatistani, uk yatisajj jukʼampiw jupar jakʼachasiñäni, jiwasar jarkʼaqañ layku nuwasitapatsa jukʼampiw munasirakiñäni. Diosajj jiwas layku nuwasiñatakejj qhawqha chʼamanisa uk yatiñajja, jupar jukʼamp respetañataki, ajjsartʼañataki ukat kunjamtï jupajj munki ukham serviñatakiw yanaptʼistu (Hebreos 12:28).

20. Diosajj kunatsa mä kuns lurawayi uk jan sum amuykañäni ukhajj ¿kunsa lurañasa, ukat kunatsa?

²⁰ Jehová Diosajj kunatsa guerranakan nuwasi ukajja, janiw Biblian taqpachapun qellqatäkiti. Ukampis jupajj cheqaparjamapuniw chʼamap apnaqe, janipuniw jan  sinttʼasisajj kuns lurkaspati. Mä sarnaqäwi liytʼkasin sum amuyañatakejja, taqe kuns sumwa yatjjatañasa, jukʼampi yatichäwinakwa uka toqet thaqtañasaraki (Proverbios 18:13). Awisajj kunatsa Jehová Diosajj mä kuns lurawayi uk amuytʼañajj chʼamakïspawa, ukampis ukhaman uñjasiñäni ukhajja jupat yatjjataskakiñasawa, kunja suma Diosasa uka toqetsa lupʼiskakiñasawa. Ukhamtï lurañänejja, Jehová Diosar confiyañatakejj walja razonanakaw utjistani (Job 34:12).

21. Jehová Diosajj “guerran nuwasiri wali chʼaman” Diosäkchisa, ¿kunjam chuymanisa?

²¹ Kunjamtï yatjjatawayktanjja, Jehová Diosajj wakiski ukhajj “guerran nuwasiri wali chʼaman” Diosjamaw nuwasi, ukampis ukham sasajj guerran nuwasiñas Diosar wal gustkaspa ukham janiw sañ munktanti. Ezequielajj alajjpachankir Diosan carrop mä visionan uñjkäna ukajja, Jehová Diosajj enemigonakap contra nuwasiñatak listokïtapwa uñachtʼayistu. Ukatjja Ezequielan visionaparjamajja, Diosajj mä kurmimp muytatänwa, ukhamätapajj sumankañ utjayir Diosätapwa amtayistu (Génesis 9:13; Ezequiel 1:28; Apocalipsis 4:3). Ukhamajja, Jehová Diosajj wali humilde chuymaniwa, sumankañ munirirakiwa. Ukat apóstol Juanan qellqataparjamajja, “Diosajj munasiñawa” (1 Juan 4:8). Jehová Diosajj mä kuns luri ukhajja, jupajj kunjam chuymanïkitï ukanak taqpachwa uñachtʼayi. ¡Ukham Diosar jakʼachasiñajj wali askipuniwa!