1, 2. Aisiraeli maarĩ ũgwati-inĩ ũrĩkũ rĩrĩa maaingĩraga gĩcigo-inĩ gĩa Sinai kĩambĩrĩria-inĩ kĩa mwaka wa 1513 M.M.M., na Jehova aamomĩrĩirie atĩa?

 AISIRAELI maarĩ ũgwati-inĩ rĩrĩa maaingĩraga gĩcigo-inĩ gĩa Sinai kĩambĩrĩria-inĩ kĩa mwaka wa 1513 Mbere ya Mahinda Maitũ (M.M.M.). Nĩ maarĩ na rũgendo rũnene mbere yao, rũrĩa mangĩagereire “werũ-inĩ mũnene na wa kũmakania, [warĩ] na nyoka irĩ thumu na tũngʼaurũ.” (Gũcokerithia Maathani 8:15) Ningĩ no maarĩ ũgwati-inĩ wa gũtharĩkĩrũo nĩ mabũrũri mangĩ. Jehova nĩwe watũmĩte andũ ake makinye hau. Arĩ we Ngai wao-rĩ, hihi nĩ angĩahotire kũmagitĩra?

² Ciugo ici cia Jehova ciarĩ cia kũũmĩrĩria mũno: “Nĩ mweyoneire ũrĩa ndekire Amisiri. Na ũrĩa ndamũkuuire ta nderi ĩkuuĩte tũcui twayo na mathagu ngĩmũrehe kũrĩ niĩ.” (Thama 19:4) Jehova aaririkanirie andũ ake atĩ aamakũũrire kuuma Misiri ta ũrĩa nderi ingĩmoya imakuue. No nĩ harĩ itũmi ingĩ cia gũtũma tũringithanie ũrĩa Ngai aamagitĩrire na “mathagu ma nderi”.

3. Nĩkĩ ũgitĩri wa Ngai no ũringithanio na “mathagu ma nderi”?

³ Nderi ndĩhũthagĩra mathagu mayo o ĩkĩũmbũka tu. Hĩndĩ ĩrĩa kũrĩ na riũa ihiũ, nderi ĩigaga mathagu mayo ta iburi nĩguo ĩgitĩre tũcui twayo tũtikahĩe. Mathagu macio no makinyie mita ta igĩrĩ matambũrũkĩtio. Ningĩ mahinda mangĩ, nĩ ĩkũnjaga mathagu mayo nĩguo ĩgitĩre tũcui tũtikaigue heho. O ta ũrĩa nderi ĩgitagĩra tũcui twayo, noguo Jehova aagitagĩra Aisiraeli, rũrĩrĩ rwake rũtaarĩ na ũmenyeru. Marĩ kũu werũ-inĩ, no mangĩathiire na mbere gũikara rungu rwa ũgitĩri wa mathagu ma Jehova ma mũhaano, mangĩatũũririe wĩhokeku wao. (Gũcokerithia Maathani 32: 9-11; Thaburi 36:7) No hihi ũmũthĩ no twĩrĩgĩrĩre ũgitĩri kuuma kũrĩ Ngai?

4, 5. Nĩkĩ no tũkorũo na ma biũ na kĩĩranĩro kĩa Ngai gĩa gũtũgitĩra?

⁴ Hatirĩ nganja Jehova nĩ arĩ ũhoti wa kũgitĩra ndungata ciake. Nĩwe “Ngai Mwene-Hinya-Wothe,” ũndũ ũrĩa wonanagia atĩ akoragwo na hinya ũtangĩhooteka. (Kĩambĩrĩria 17:1) O ta makũmbĩ ma iria, hinya wa Jehova ndũngĩgirĩrĩrio. Tondũ nĩ arĩ ũhoti wa gwĩka ũndũ o wothe angĩenda, no twĩyũrie, ‘Hihi nĩ wendi wa Jehova kũhũthĩra hinya wake nĩguo atũgitĩre?’

⁵ Na njĩra nguhĩ, macokio nĩ ĩĩ! Jehova nĩ atũũmĩrĩirie atĩ nĩ arĩgitagĩra andũ ake. Thaburi 46:1 yugaga ũũ: “Ngai nĩ rĩũrĩro ritũ na hinya witũ, ũteithio wonekaga na ihenya hĩndĩ ya mĩtangĩko.” Na tondũ Ngai ‘ndangĩheenania,’ no tũkorũo na ma na kĩĩranĩro gĩake gĩa gũtũgitĩra. (Tito 1:2) Reke tũthuthurie ngerekano imwe iria Jehova ahũthĩrĩte nĩguo onanie ũgitĩri wake.

6, 7. (a) Arĩithi a mahinda ma Bibilia maagitagĩra ngʼondu ciao atĩa? (b) Bibilia ĩtũheaga ngerekano ĩrĩkũ ya gũtuonia ũrĩa Jehova endete kũgitĩra na kũrũmbũiya ngʼondu ciake?

⁶ Jehova nĩ Mũrĩithi witũ, na “tũrĩ andũ ake, o ithuĩ ngʼondu iria arĩithagia.” (Thaburi 23:1; 100:3) Ngʼondu itihotaga kwĩgitĩra ta nyamũ iria ingĩ. Mahinda-inĩ ma Bibilia, arĩithi nĩ maabataraga gũkorũo na ũcamba nĩguo magitĩre ngʼondu ciao kuumana na mĩrũthi, njũi, nduba, o na nginya aici. (1 Samueli 17:34, 35; Johana 10:12, 13) No nĩ kũrĩ hĩndĩ ngʼondu ciabataraga kũgitĩrũo na njĩra ya wororo. Ngʼondu ĩngĩaciarĩire kũraihu na kiugũ, mũrĩithi nĩ aamĩgitagĩra hĩndĩ ĩo ĩtarĩ na hinya na agakuua kori agagatwara kiugũ.

 ⁷ Rĩrĩa Jehova eringithania na mũrĩithi, atũheaga ũũma wa atĩ nĩ endaga mũno gũtũgitĩra. (Ezekieli 34:11-16) Ririkana ciugo ici cia Isaia 40:11 iria itaaragĩria ũrĩa Jehova ahaana, na ciarĩrĩirio thĩinĩ wa Gĩcunjĩ gĩa kerĩ kĩa ibuku rĩrĩ: “O ta mũrĩithi, nĩ akaarũmbũiya rũũru rwake. Natuo tũgondu atũcokanĩrĩrie na guoko gwake, na atũkuue gĩthũri-inĩ gĩake.” Kori gakinyaga “gĩthũri-inĩ” kĩa mũrĩithi atĩa? No gathiĩ harĩ mũrĩithi na kamũhutahutie magũrũ. O na kũrĩ ũguo, mũrĩithi no mũhaka ainamĩrĩre, akoe, na akaige wega gĩthũri-inĩ gĩake. Na githĩ ĩyo ti mbica njega ya gũtuonia ũrĩa Mũrĩithi witũ Mũnene endaga gũtũgitĩra arĩ na wendo!

8. (a) Nĩ a makenagĩra ũgitĩri wa Ngai, na ũndũ ũcio wonanĩtio atĩa nĩ Thimo 18:10? (b) Mũndũ arabatara gwĩka atĩa nĩguo one ũgitĩri rĩĩtwa-inĩ rĩa Ngai?

⁸ Ũgitĩri wa Ngai ti wa andũ othe, tondũ ũkenagĩrũo no arĩa tu mamũkuhagĩrĩria. Thimo 18:10 yugaga ũũ: “Rĩĩtwa rĩa Jehova nĩ nyũmba ndaya na igũrũ na nũmu. Mũndũ mũthingu atengʼeraga akaingĩra thĩinĩ wayo akona ũgitĩri.” Mahinda-inĩ ma Bibilia, nĩ gwaakagwo nyũmba ndaya na igũrũ werũ-inĩ, iria andũ mangĩorĩire mone ũgitĩri. No mũndũ ũrĩa warĩ ũgwati-inĩ nĩwe waagĩrĩire kuoya ikinya rĩa kũũrĩra kuo nĩguo one ũgitĩri. Ũguo noguo kũrĩ harĩ gwetha ũgitĩri rĩĩtwa-inĩ rĩa Ngai. Na gwĩka ũguo nĩ makĩria ma kũgwetagweta rĩĩtwa rĩa Ngai, tondũ rĩĩtwa rĩu ti gĩthiitũ. Handũ ha ũguo, twagĩrĩirũo nĩ kũmenya na kwĩhoka Mwene rĩĩtwa rĩu na gũtũũra kũringana na ithimi ciake cia ũthingu. Githĩ ti ũndũ wa wendo kuona atĩ Jehova nĩ atũhete ũũma wa atĩ tũngĩmwĩhoka no atuĩke nyũmba ĩrĩ na hinya ya gũtũgitĩra!

9. Jehova ekĩte atĩa makĩria ma kwĩranĩra ũgitĩri?

⁹ Harĩ ũndũ ũngĩ Jehova ekaga, makĩria ma gũtwĩrĩra ũgitĩri. Mahinda-inĩ ma Bibilia, nĩ oonanirie na njĩra ya ciama atĩ no ahote kũgitĩra andũ ake. Ũtũũro-inĩ wothe wa Aisiraeli,  “guoko” kwa Jehova kũrĩa kũrĩ hinya nĩ kwamagitagĩra kuumana na thũ ciao. (Thama 7:4) O na kũrĩ ũguo, Jehova ningĩ nĩ aahũthagĩra hinya wake wa kũgitĩra harĩ mũndũ ũmwe ũmwe.

10, 11. Nĩ ngerekano irĩkũ irĩ thĩinĩ wa Bibilia cionanagia ũrĩa Jehova aahũthĩrire hinya wake wa ũgitĩri harĩ andũ matiganĩte?

¹⁰ Rĩrĩa anake atatũ Ahibirania arĩa meetagwo Shadraka, Meshaki, na Abedinego maaregire kũinamĩrĩra mũhianano wa thahabu wa Mũthamaki Nebukadineza, aameerire arĩ na mangʼũrĩ atĩ nĩ ekũmaikia mwaki-inĩ warĩ mũnene mũno. Arĩ we Mũthamaki ũrĩa warĩ na hinya mũno thĩinĩ wa thĩ hĩndĩ ĩyo, aamanyũrũririe akĩmeera: “Nĩ ngai ũrĩkũ ũngĩhota kũmũhonokia kuuma moko-inĩ makwa?” (Danieli 3:15) Anake acio atatũ maarĩ na ũũma atĩ Ngai aarĩ na hinya wa kũmagitĩra, o na gũtuĩka matieciragia atĩ no mũhaka eke ũguo. Nĩkĩo mooigire ũũ: “Angĩkorũo no mũhaka gũthiĩ ũguo wee mũthamaki, Ngai witũ ũrĩa tũtungatagĩra no ahote gũtũhonokia.” (Danieli 3:17) Ma nĩ atĩ, mwaki ũcio mũnene o na wakanĩtio maita mũgwanja ma ũrĩa wakoragwo, ndwarĩ kĩndũ harĩ Ngai wao Mwene-Hinya-Wothe. Nĩ aamagitĩrire nginya mũthamaki akiuga ũũ: “Gũtirĩ ngai ũngĩ ũngĩhota kũhonokania ta ũcio.”—Danieli 3:29.

¹¹ Jehova ningĩ nĩ oonanirie hinya wake wa ũgitĩri na njĩra nene, rĩrĩa aathamirie muoyo wa Mũrũ wake wa mũmwe kuuma igũrũ o nginya nda ya mũirĩtu Mũyahudi warĩ gathirange wetagwo Mariamu. Mũraika eerire Mariamu ũũ: “Nĩ ũkũgĩa nda na ũciare mwana wa kahĩĩ.” Agĩcoka akĩmũtaarĩria ũũ: “Roho mũtheru nĩ ũgũka igũrũ rĩaku, na hinya wa Ũrĩa ũrĩ Igũrũ Mũno nĩ ũgũkũhumbĩra.” (Luka 1:31, 35) Nĩ kũngĩonekire ta Mũrũ ũcio wa Ngai aarĩ ũgwati-inĩ wa kwaga ũgitĩri. Hihi mehia na kwaga gũkinyanĩra kwa nyina nĩ kũngĩamũthũkirie arĩ thĩinĩ wa nda? Hihi Shaitani nĩ angĩahotire kũmũguraria kana kũmũũraga atanaciarũo? Aca o na hanini! Kwoguo nĩ ta Jehova aahumbĩrire  Mariamu kuuma rĩrĩa oohire nda nĩguo kaana kau gatigathũkio nĩ kĩndũ o gĩothe kana mũndũ o wothe. Jehova nĩ aathiire na mbere kũgitĩra Jesu o na arĩ mũndũ mwĩthĩ. (Mathayo 2:1-15) Jehova nĩ aagitĩrire Mũrũ wake biũ, o nginya rĩrĩa aabatarire kũruta muoyo wake.

12. Jehova aagitĩrire andũ amwe na njĩra ya kĩama mahinda-inĩ ma Bibilia nĩkĩ?

¹² Jehova aagitĩrire andũ amwe na njĩra ta ĩyo ya kĩama nĩkĩ? Maita maingĩ Jehova aagitagĩra andũ amwe nĩguo agitĩre ũndũ ũrĩa wa bata makĩria, na ũndũ ũcio nĩ kũhinga kwa muoroto wake. Kwa ngerekano, kũgitĩrũo kwa Jesu nĩ kwarĩ na bata harĩ kũhingia muoroto wa Ngai ũrĩa ũkaaguna andũ othe na njĩra nene. Ũhoro wĩgiĩ ũrĩa Ngai onanagia hinya wake wa ũgitĩri, nĩ gĩcunjĩ kĩa Maandĩko matongoretio nĩ roho marĩa “maandĩkirũo marĩ ma gũtũruta, nĩgetha kũgerera ũkirĩrĩria witũ na kũgerera kũũmĩrĩrio nĩ Maandĩko tũgĩe na kĩĩrĩgĩrĩro.” (Aroma 15:4) Hatarĩ nganja, ngerekano icio nĩ ciakaga wĩtĩkio witũ harĩ Ngai Mwene-Hinya-Wothe. No hihi nĩ ũgitĩri ũrĩkũ ithuĩ tũngĩĩrĩgĩrĩra kuuma kũrĩ Ngai?

13. Hihi nĩ twagĩrĩirũo kwĩrĩgĩrĩra Jehova atũgitĩre na njĩra ya kĩama? Taarĩria.

¹³ Gũkorũo atĩ Jehova nĩ eranĩire ũgitĩri ti kuuga atĩ no mũhaka aringe kĩama nĩguo atũgitĩre. Ngai witũ ndatwĩragĩra mũtũũrĩre ũtarĩ na mathĩna thĩinĩ wa mũtabarĩre ũyũ. Ndungata nyingĩ njĩhokeku cia Jehova nĩ icemanagia na moritũ ta ũthĩni, mbaara, mĩrimũ, na gĩkuũ. Jesu eerire arutwo ake cara-rũkũ atĩ amwe ao nĩ mangĩoragirũo nĩ ũndũ wa wĩtĩkio wao. Na nĩkĩo aatĩtĩrithirie bata wa gũkirĩrĩria nginya mũthia. (Mathayo 24:9, 13) Korũo Jehova ahũthagĩra hinya wake kũgitĩra andũ na njĩra ya kĩama hingo ciothe, hatarĩ nganja Shaitani no anyũrũrie Jehova na ekĩrĩre nganja gĩtũmi gitũ gĩa gũtungatĩra Jehova.—Ayubu 1:9, 10.

14. Nĩ ngerekano irĩkũ cionanagia atĩ Jehova ndagitagĩra ndungata ciake na njĩra ihaanaine hĩndĩ ciothe?

 ¹⁴ O na mahinda-inĩ ma Bibilia, Jehova ndaahũthĩrire hinya wake kũgitĩra ndungata ciake ciothe kuumana na ikuũ cia na ihenya. Kwa ngerekano, mũtũmwo Jakubu nĩ ooragirũo nĩ Herode mwaka-inĩ wa 44 Mahinda Maitũ (M.M.), no kahinda kanini thutha ũcio Petero nĩ aahonokirio “kuuma moko-inĩ ma Herode.” (Atũmwo 12:1-11) Nake Johana, mũrũ wa nyina na Jakubu, aatũũrire ihinda iraihu gũkĩra Petero na Jakubu. Ũndũ ũcio ũronania atĩ tũtingĩrĩgĩrĩra Ngai agitĩre ndungata ciake ciothe na njĩra ihaanaine. Makĩria ma ũguo, “ihinda na maũndũ materĩgĩrĩirũo” matũkoraga ithuothe. (Kohelethu 9:11) Jehova agĩtũgitagĩra atĩa mahinda-inĩ maya?

15, 16. (a) Nĩ ũira ũrĩkũ wonanagia atĩ Jehova nĩ agitagĩra athathaiya ake marĩ gĩkundi? (b) Nĩkĩ no tũgĩe na ũũma atĩ Jehova nĩ arĩgitagĩra ndungata ciake na nĩ agaacigitĩra hĩndĩ ya ‘thĩna ũrĩa mũnene’?

¹⁵ Wa mbere, ta wĩcirie ũrĩa Jehova agitagĩra muoyo witũ. Tũrĩ ndungata cia Jehova no twĩrĩgĩrĩre ũgitĩri ta ũcio tũrĩ gĩkundi. Kũngĩaga ũguo, tũngĩkorũo tũrĩ ũgwati-inĩ wa gũtharĩkĩrũo nĩ Shaitani. Wĩcirie ũndũ ũyũ: Shaitani arĩ we “mũnene wa thĩ ĩno” no ende mũno kũniina ũthathaiya wa ma. (Johana 12:31; Kũguũrĩrio 12:17) Thirikari imwe iria irĩ hinya mũno thĩinĩ wa thĩ cianagiria wĩra witũ wa kũhunjia na ikageria gũtũniina biũ. O na kũrĩ ũguo, andũ a Jehova mathiĩte na mbere kwĩhanda wega na kũhunjia mategũtigithĩria! Nĩ kĩĩ gĩtũmĩte thirikari icio irĩ na hinya mũingĩ iremwo kũrũgamia wĩra wa gĩkundi gĩkĩ kĩnini kĩa Akristiano kĩrĩa kĩonekaga ta gĩtarĩ na ũgitĩri? Nĩ tondũ Jehova nĩ atũgitĩrĩte na mathagu make marĩ hinya!—Thaburi 17:7, 8.

¹⁶ Hihi Jehova nĩ akaagitĩra muoyo witũ hĩndĩ ya ‘thĩna ũrĩa mũnene’? Tũtiagĩrĩirũo gwĩtigĩra kũhingio kwa itua rĩa Jehova. Bibilia yugaga atĩ “Jehova nĩ oĩ kũhonokia  andũ arĩa makoragwo na wĩrutĩri Ngai kuuma igerio-inĩ, ĩndĩ nĩ oĩ kũiga andũ arĩa matarĩ athingu nĩguo makaaniinwo mũthenya wa ciira.” (Kũguũrĩrio 7:14; 2 Petero 2:9) No ihinda-inĩ rĩrĩ, no tũkorũo na ũũma wa maũndũ merĩ. Wa mbere, Jehova ndangĩreka ndungata ciake njĩhokeku iniinwo biũ thĩinĩ wa thĩ. Wa kerĩ, nĩ akaarathima arĩa ekindĩru amahe muoyo wa tene na tene thĩinĩ wa thĩ njerũ ĩrĩ na ũthingu. Nao arĩa magaakorũo makuĩte nĩ makaariũkio tondũ magaakorũo marĩ kĩririkano-inĩ kĩa Ngai.—Johana 5:28, 29.

17. Jehova atũgitagĩra atĩa kũgerera Kiugo gĩake?

¹⁷ O na ũmũthĩ, Jehova nĩ atũgitagĩra kũgerera “kiugo” gĩake kĩrĩa gĩtwĩkĩraga ngoro na gĩkagarũra mĩtũũrĩre itũ. (Ahibirania 4:12) Tũngĩhũthĩra ũtaaro wakĩo, no tũgitĩrũo maũndũ-inĩ mamwe. Isaia 48:17 yugaga ũũ: “Niĩ Jehova, nĩ niĩ Ngai waku, . . . Ũrĩa ũkũrutaga nĩguo ũgunĩke wee mwene.” Hatarĩ nganja, tũngĩtũũra kũringana na ithimi cia Kiugo kĩa Ngai no twagagĩrie ũgima witũ wa mwĩrĩ na tũtũũre ihinda iraiharaihu. Kwa ngerekano, tondũ nĩ tũhũthagĩra ũtaaro wa Bibilia wa gwĩthema ngomanio itagĩrĩire na maũndũ mothe mangĩthũkia mwĩrĩ, tũtiĩingĩragia maũndũ-inĩ moru marĩa mathũkĩtie mũtũũrĩre wa andũ arĩa matetigĩrĩte Ngai. (Atũmwo 15:29; 2 Akorintho 7:1) Na githĩ tũtikenaga mũno nĩ ũgitĩri ũrĩa Kiugo kĩa Ngai gĩtũheaga!

18. Jehova atũgitagĩra atĩa kĩĩroho?

¹⁸ Ũndũ wa bata makĩria nĩ atĩ Jehova nĩ atũgitagĩra kĩĩroho. Ngai witũ ũtwendete atũgitagĩra kĩĩroho na njĩra ya gũtũhe kĩrĩa tũrabatara nĩguo tũkirĩrĩrie magerio na tũgitĩre ũrata witũ nake. Kwoguo Jehova ndendaga tũtũũre o ihinda inini no nĩ nginya tene na tene. Ta wĩcirie indo imwe Jehova atũheete cia gũtũgitĩra kĩĩroho.

19. Roho wa Jehova ũngĩtũteithia atĩa kũhiũrania na igerio o rĩothe tũngĩcemania narĩo?

 ¹⁹ Jehova nĩwe “Mũigua wa mahoya.” (Thaburi 65:2) Tũngĩmũitũrũrĩra ngoro citũ rĩrĩa twaigua tũgũmĩirũo nĩ mĩtangĩko ya ũtũũro, no tũigue twacokwo nĩ thayũ. (Afilipi 4:6, 7) No age gũtwehereria mĩtangĩko na njĩra ya kĩama, ĩndĩ no acokie mahoya maitũ na njĩra ya gũtũhe ũũgĩ wa kũhiũrania nayo. (Jakubu 1:5, 6) Makĩria ma ũguo, Jehova nĩ aheaga arĩa mamũhoyaga roho wake mũtheru. (Luka 11:13) Roho ũcio nĩ ũrĩ hinya na no ũtũteithie kũhiũrania na igerio kana thĩna o wothe tũngĩcemania naguo. No ũtũhe “hinya ũrĩa ũkĩrĩte wa ndũire” nĩguo tũhote kũũmĩrĩria nginya rĩrĩa Jehova akeheria mathĩna mothe thĩinĩ wa thĩ njerũ ĩrĩa ĩkuhĩrĩirie mũno.—2 Akorintho 4:7.

20. Hinya wa Jehova wa kũgitĩra ũngĩoneka atĩa kũgerera aarĩ na ariũ a Ithe witũ?

²⁰ Rĩmwe na rĩmwe, hinya wa Jehova wa kũgitĩra no woneke kũgerera aarĩ na ariũ a Ithe witũ. Jehova nĩ agucĩrĩirie andũ ake thĩinĩ wa “thiritũ . . . ya ariũ a Ithe witũ” thĩ yothe. (1 Petero 2:17; Johana 6:44) Thĩinĩ wa thiritũ ĩyo, nĩ  tuonaga ũira wa ũrĩa roho wa Ngai ũtindĩkaga andũ gwĩka maũndũ mega. Roho ũcio ũtũmaga tũgĩe na maciaro mega na ma bata ta wendo, ũtugi, na wega. (Agalatia 5:22, 23) Kwoguo, tũngĩkĩrũo ngoro kana tũheo ũtaaro nĩ mũrũ kana mwarĩ wa Ithe witũ rĩrĩa tũrĩ na mĩtangĩko, no tũcokagĩrie Jehova ngatho nĩ ũndũ wa ũgitĩri ũcio.

21. (a) Nĩ irio irĩkũ cia ihinda rĩrĩa rĩagĩrĩire Jehova atũheaga kũgerera “ngombo ĩrĩa njĩhokeku na njũgĩ”? (b) Wee ũgunĩkĩte atĩa nĩ indo iria Jehova atũheete nĩguo atũgitĩre kĩĩroho?

²¹ Jehova nĩ atũheaga kĩndũ kĩngĩ gĩa gũtũgitĩra: irio cia kĩĩroho cia ihinda rĩrĩa rĩagĩrĩire. Jehova nĩ aheete “ngombo ĩrĩa njĩhokeku na njũgĩ” wĩra wa gũtũhe irio cia kĩĩroho nĩguo Kiugo gĩake gĩtwĩkĩre hinya. Ngombo ĩyo njĩhokeku ĩhũthagĩra mabuku na ngathĩti cia Mũrangĩri na Arahũkai!, hamwe na website itũ ya jw.org, mĩcemanio, na igomano, nĩguo ĩtũhe “irio ihinda rĩrĩa rĩagĩrĩire.” (Mathayo 24:45) Hihi ũrĩ waigua kaũndũ gakĩgwetwo mĩcemanio-inĩ ya Gĩkristiano thĩinĩ wa macokio, mĩario, kana mahoya-inĩ, ũkĩigua wekĩrũo ngoro na ũkĩgĩa na hinya? Hihi ũtũũro waku nĩ ũrĩ wahutio nĩ ũndũ mũna wandĩkĩtwo thĩinĩ wa ngathĩti citũ? Ririkana atĩ Jehova atũheete maũndũ macio mothe nĩguo atũgitĩre kĩĩroho.

22. Jehova ahũthagĩra hinya wake na njĩra ĩrĩkũ hingo ciothe, na ũndũ ũcio ũtũgunaga atĩa?

²² Hatarĩ nganja, Jehova akoragwo arĩ ngo “harĩ arĩa othe moragĩra harĩ we.” (Thaburi 18:30) Nĩ tũmenyaga wega atĩ ndahũthagĩra hinya wake gũtũgitĩra kuumana na maũndũ mothe moru. O na kũrĩ ũguo, hingo ciothe nĩ ahũthagĩra hinya wake wa kũgitĩra gũtigĩrĩra atĩ muoroto wake nĩ wahinga. Mũthia-inĩ, gwĩka ũguo nĩ gũkaaguna andũ ake. Tũngĩkuhĩrĩria Jehova na tũikare wendo-inĩ wake, nĩ agaatũhe muoyo mũkinyanĩru wa tene na tene. Tũrĩ na kĩĩrĩgĩrĩro kĩu meciria-inĩ, no tũhote kuona mathĩna o mothe tũragerera mũtabarĩre-inĩ ũyũ marĩ ‘ma ihinda inini na mahũthũ.’—2 Akorintho 4:17.