7-تاراۋ
ٴبىزدىڭ پانامىز قۇدايدىڭ قورعايتىن كۇشى
1، 2. ب. ز. ب. 1513-جىلى يسرايل حالقى سيناي ولكەسىنە اياق باسقاندا، ولارعا قانداي قاۋىپ ٴتوندى جانە ەحوبا ولاردى قالاي نىعايتتى؟
ب. ز. ب. 1513-جىلدىڭ باسىندا سيناي وڭىرىنە اياق باسقان يسرايل حالقى قاۋىپتى جاعدايعا تاپ بولدى. ولار قورقىنىشتى جولمەن، ۋلى ‹جىلاندار، ۇيەلمەندى كەسىرتكەلەر، شاياندار ٶرىپ جۇرگەن الاپات، ٵرى اسا قاۋىپتى قۇم ىشىمەن›، ساپار شەگۋ كەرەك-ٴتىن (زاڭدى قايتالاۋ 8:15). سونداي-اق ولارعا قاسكوي حالىقتاردىڭ تاراپىنان شاپقىنشىلىق جاساۋ قاۋپى ٴتونىپ تۇردى. ەحوبا حالقىن وسىنداي جەرگە ٶزى اكەلگەن ەدى. ال ەندى قۇدايلارى رەتىندە ولاردى قورعاي الار ما ەكەن؟
2 ەحوبانىڭ: «سەندەر مەنىڭ مىسىرلىقتارعا نە ىستەگەنىمدى، ٵرى وزدەرىڭدى بالاپاندارىن قاناتتارىمەن تاسىعان قىران ىسپەتتى وسى جەرگە امان-ەسەن الىپ كەلگەنىمدى كوردىڭدەر»،— دەگەن سوزدەرى ولاردى قاتتى نىعايتقان (مىسىردان شىعۋ 19:4). ەحوبا حالقىن مىسىر قۇلدىعىنان ازات ەتكەنىن، بەينەلەپ ايتقاندا، قىران ىسپەتتى كوتەرىپ الىپ، قاۋىپسىز جەرگە جەتكىزگەنىن ەستەرىنە سالدى. ٴبىراق قىران قاناتتارى قۇدايدىڭ قورعايتىنىنا نۇسقايتىن لايىقتى بەينە ەكەنىن كورسەتەتىن باسقا دا سەبەپتەر بار.
3. نەگە قىران قاناتتارى قۇدايدىڭ قورعايتىنىن كورسەتەتىن لايىقتى بەينە بولىپ تابىلادى؟
3 قىران ۇلكەن ٵرى قۋاتتى قاناتتارىن قالىقتاپ ۇشۋ ٷشىن عانا قولدانبايدى. كۇن اپتاپ ىستىق بولىپ تۇرعاندا، انا قىران ەكى قۇلاشتاي بولۋى مۇمكىن قاناتتارىن كەڭ جايىپ، نازىك بالاپاندارىن كۇننەن قالقالاپ، قورعايدى. ال كەيدە بالاپاندارىن سۋىق جەلدەن قورعاۋ ٷشىن قاناتىمەن جاۋىپ الادى. جاس بالاپاندارىن قورعاشتاعان قىران ىسپەتتى ەحوبا دا جاڭا پايدا بولعان يسرايل حالقىن قالقالاپ، قورعاعان. ەندى ونىڭ حالقى سول ٴشول دالادا دا ٵرى قاراي ونىڭ زور قاناتىنىڭ استىنان پانا ىزدەپ، ادالدىقتارىن ساقتاي بەرۋ كەرەك ەدى (زاڭدى قايتالاۋ 32:9—11؛ ٴزابۋر 36:8 [35:8]). ال بۇگىن شە، قۇداي ٴبىزدى دە قورعايدى دەپ كۇتۋىمىز كەرەك پە؟
قۇداي قورعاۋدى ۋادە ەتكەن
4، 5. قۇدايدىڭ قورعايمىن دەگەن ۋادەسىنە نەگە تولىقتاي سەنىمدى بولا الامىز؟
4 ەحوبانىڭ ٶز قىزمەتشىلەرىن قورعاي الاتىندىعىندا ٴسوز جوق. ول — قۇدىرەتى شەكسىز قۇداي. بۇل لاۋازىم قۇدايدىڭ ەشكىم دە، ەش نارسە دە توسقاۋىل بولا المايتىن كۇش يەسى ەكەندىگىنە نۇسقايدى (جاراتىلىس 17:1). تەڭىز سۋىنىڭ تولۋىنا ەشكىم بوگەت بولا المايتىنى سياقتى، ەحوبانىڭ كۇشىنىڭ اسەرىنە دە ەشكىم كەدەرگى بولا المايدى. ول ٶز ەركىنە ساي كەز كەلگەن نارسەنى ىستەي الاتىن بولعاندىقتان، بىزدە مىناداي سۇراق تۋۋى مۇمكىن: «ەحوبانىڭ ەركىنە كۇشىن ٶز حالقىن قورعاۋ ٷشىن قولدانۋ دا كىرە مە؟»
5 بۇل سۇراقتىڭ جاۋابى: «ٴيا، كىرەدى!» ەحوبا ٶز حالقىن قورعاۋدى ۋادە ەتەدى. ٴزابۋر 46:1 [45:2] دە: «قۇداي — ٴبىزدىڭ پانامىز دا كۇشىمىز، قيىن كەزدە سەنىمدى كومەكشىمىز»،— دەلىنگەن. قۇداي ‹جالعان سويلەي› المايتىندىقتان، ونىڭ قورعايمىن دەگەن ۋادەسىنە تولىقتاي سەنىمدى بولا الامىز (تيتكە 1:2). ەحوبانىڭ قامقورلاپ قورعايتىنى قانداي ايقىن مىسالدار ارقىلى سۋرەتتەلگەنىن كورسەتەتىن كەيبىر مىسالداردى قاراستىرىپ كورەيىك.
6، 7. ا) ەرتە زامانداعى باقتاشى قويىن قالاي قورعايتىن؟ ٵ) ەحوبانىڭ ٶز قويلارىن قورعاۋدى جانە قامقورلاۋدى شىن جۇرەكتەن قالايتىنى كيەلى كىتاپتا قالاي سۋرەتتەلگەن؟
6 ەحوبا — باعۋشىمىز، نەمەسە باقتاشىمىز، ال ٴبىز «مەنشىكتى حالقىمىز، ٵرى قامقورىنداعى وتارى سياقتىمىز» (ٴزابۋر 23:1 [22:1]؛ 100:3 [94:7]). استە، قوي سياقتى دارمەنسىز ٷي جانۋارى جوق شىعار. ەرتە زامانداعى باقتاشى قويدى ارىستاننان، قاسقىر مەن ايۋدان، ۇرىلاردان قورعاۋ ٷشىن باتىل بولۋ كەرەك بولعان (پاتشالىقتار 1-جازبا 17:34، 35؛ جوحان 10:12، 13). ٴبىراق قويدى ايالاپ قورعاۋ كەرەك كەزدەر دە بولاتىن. قوي وتاردان الىس جەردە تولدەپ قالسا، قامقور باقتاشى سونداي دارمەنسىز كەزىندە تولدەگەن قويدى قاراۋىلداۋى، ال، سوسىن، قورعانسىز قوزىنى قولىنا الىپ، وتارعا اكەلۋ كەرەك ەدى.
‹قوزىلارىن كەۋدەسىنە باسىپ، كوتەرىپ جۇرەدى›
7 ەحوبا ٶزىن باقتاشىعا تەڭەي وتىرىپ، ٴبىزدى قورعاۋدى شىن جۇرەكتەن قالايتىنىنا سەندىرەدى (ەزەكيەل 34:11—16). ەكىنشى تاراۋدا تالقىلاعانىمىزداي، يشايا 40:11 دە ەحوبانىڭ قالاي سۋرەتتەلگەنىن ەسىڭە ٴتۇسىرشى: ‹ولاردى ىزگى شوپانداي باعادى: «قوزىلارىن» قولىنا الىپ، كەۋدەسىنە باسىپ كوتەرىپ جۇرەدى›. قالايشا تيتتەي قوشاقان باقتاشىنىڭ ‹كەۋدەسىنەن›، شاپانىنىڭ كەۋدە تۇسىنداعى قاتپارلارىنان، تابىلدى؟ قوشاقان تۇمسىعىمەن باقتاشىنىڭ اياعىن ٵلسىز عانا تۇرتەتىن شىعار. ٴبىراق ەڭكەيىپ، قوشاقاندى قولىنا الىپ، ايالاپ كەۋدەسىنە باسىپ قورعانىش بولۋ — باقتاشىنىڭ تاراپىنان جاسالاتىن ارەكەت. ٴبىزدى قالقالاپ قورعايتىن ۇلى باقتاشىنى بەينەلەيتىن نەتكەن جۇرەككە جىلى تيەتىن مىسال!
8. ا) ەحوبا كىمدەردى قورعايدى جانە بۇل ناقىل سوزدەر 18:10 نان قالاي كورىنەدى؟ ٵ) قۇدايدىڭ ەسىمىنەن پانا ىزدەۋ دەگەن نەنى بىلدىرەدى؟
8 قۇداي شارتتى تۇردە قورعايدى، ياعني تەك وزىنە جاقىندايتىنداردى عانا قورعايدى. ناقىل سوزدەر 18:10 دا: «جاراتقان يەنىڭ ەسىمى — مىقتى مۇنارا، باس ساۋعالار ادىلگە قاۋىپسىز پانا»،— دەلىنگەن. ەرتەدە قامالدار كەيدە قورعان رەتىندە ٴشول دالادا سوعىلاتىن. ٴبىراق امان قالۋ ٷشىن باسىنا قاۋىپ تونگەن ادامنىڭ ٶزى سوندا بارىپ جاسىرىنۋ كەرەك ەدى. قۇدايدىڭ ەسىمىنەن پانا ىزدەۋ دە تاپ سولاي. بۇل ونىڭ ەسىمىن قايتالاي بەرۋدى عانا بىلدىرمەيدى. قۇداي ەسىمىنىڭ سيقىرلى كۇشى جوق. ٴبىز سول ەسىمنىڭ يەسىمەن تانىسىپ، وعان سەنىم ارتىپ، ونىڭ ٵدىل تالاپتارىنا ساي ٶمىر سۇرۋگە ٴتيىسپىز. ەگەر سەنىممەن بەت بۇرار بولساق، ٴبىز ٷشىن قورعايتىن پانا بولاتىنىنا سەندىرىپ وتىرعان ەحوبا قانداي مەيىرىمدى!
«قۇدايىمىزدىڭ... ٴبىزدى ساقتاۋعا قۇدىرەتى جەتەدى»
9. نەگە ەحوبا قورعايمىن دەپ ۋادە ەتىپ قانا قويعان جوق دەي الامىز؟
9 ەحوبا قورعايمىن دەپ ۋادە ەتىپ قانا قويعان جوق. ٶز قىزمەتشىلەرىن قۇتقارا الاتىنىن ەرتە زاماندا تاڭعاجايىپ تۇردە پاش ەتكەن. يسرايل حالقىنىڭ تاريحى بويى ەحوبا ‹قولىنىڭ قۇدىرەتىمەن› كۇشتى جاۋلارىن تىرپ ەتكىزبەي وتىرعان (مىسىردان شىعۋ 7:4). الايدا ەحوبا قورعايتىن كۇشىن جەكە قىزمەتشىلەرىنىڭ مۇددەسى ٷشىن دە قولداناتىن.
10، 11. ەحوبا قورعايتىن كۇشىن جەكە قىزمەتشىلەرىنە قاتىستى قالاي قولداناتىنى كيەلى كىتاپتاعى قانداي مىسالداردان كورىنەدى؟
10 شيدراق، ميشاق، ابدەناگو دەپ اتالىپ كەتكەن ٷش ەۆرەي جىگىتى نابۋحودونوسور پاتشا جاساعان التىن مۇسىنگە تابىنۋدان باس تارتقاندا، ٶر كوكىرەك پاتشا ولاردى ەرەكشە قاتتى قىزىپ تۇرعان پەشكە تاستاتامىن دەپ قورقىتادى. سول زاماننىڭ ەڭ كۇشتى بيلەۋشىسى نابۋحودونوسور: «سەندەردى مەنىڭ قولىمنان قانداي قۇداي قۇتقارىپ قالار ەكەن؟»— دەپ مىسقىلدايدى (دانيال 3:15). ٷش جىگىت قۇدايلارىنىڭ قۇتقارىپ قالۋعا كۇشى جەتەتىنىنە بەرىك سەنىمدى بولدى، ٴبىراق ٴدال ٶز جاعدايلارىندا ەحوبا قۇتقارادى دەپ كۇتپەگەن ەدى. سوندىقتان: «قۇلشىلىق ەتەتىن قۇدايىمىزدىڭ... ٴبىزدى ساقتاۋعا قۇدىرەتى جەتەدى»،— دەپ جاۋاپ بەردى (دانيال 3:17). راسىندا دا، شەكسىز كۇش يەسى بولىپ تابىلاتىن قۇدايلارى ٷشىن ولاردى قىزىپ تۇرعان پەشتەن، مەيلى ادەتتەگىدەن جەتى ەسە ىستىق بولسىن، امان الىپ قالۋ تۇككە دە تۇرعان جوق. ەحوبا ولاردى قورعاپ قالدى، ال پاتشانىڭ: «ٴدال وسىلايشا جەلەپ-جەبەيتىن باسقا قۇداي جوق»،— دەپ مويىنداۋىنا تۋرا كەلدى (دانيال 3:29).
11 سونىمەن قاتار ەحوبا جالعىز ۇلىنىڭ ٶمىرىن ياھۋديلىك قىز ٴماريامنىڭ قۇرساعىنا سالعاندا، قورعايتىن كۇشىن ەڭ عاجايىپ تۇردە پاش ەتتى. پەرىشتە كەلىپ، ٴماريامنىڭ ‹قۇرساق كوتەرىپ، ۇل تاباتىنىن› ايتادى. ول: «سەنىڭ ۇستىڭە كيەلى رۋح كەلىپ، قۇداي تاعالانىڭ قۇدىرەتى ساعان كولەڭكەسىن تۇسىرەدى»،— دەپ تۇسىندىرەدى (لۇقا 1:31، 35). بۇعان دەيىن قۇداي ۇلى ەشقاشان مۇنشالىقتى ٵلسىز كۇيدە بولماسا كەرەك. كۇنا جانە اناسىنىڭ كەمەلسىزدىگى ىشتەگى بالاعا كەسىرىن تيگىزۋى مۇمكىن بە؟ بالا تۋىلماس بۇرىن شايتان وعان زياندىق جاساپ نەمەسە قۇرتىپ جىبەرۋى مۇمكىن بە؟ جوق، مۇمكىن ەمەس! ەحوبا دامىپ كەلە جاتقان بالا تۋىلعانشا، وعان ەشتەڭە — كەمەلسىزدىك تە، جويقىن كۇش تە، زالىم ادام دا، ٴتىپتى ەشقانداي جىن دا — زيان كەلتىرە الماۋ ٷشىن، بىلايشا ايتقاندا، ٴماريامدى اينالدىرا قورعان ورناتىپ قويادى. ەحوبا يسانى بالالىق شاعىندا دا قورعاي بەرەدى (ماتاي 2:1—15). وسىلايشا قۇداي تاعايىنداعان ۋاقىت جەتپەيىنشە، ونىڭ سۇيىكتى ۇلىنا ەش زياندىق دارىمادى.
12. نەگە ەحوبا ەرتەدە بەلگىلى ٴبىر قىزمەتشىلەرىن كەرەمەت تۇردە قورعاعان؟
12 نەگە ەحوبا بەلگىلى ٴبىر قىزمەتشىلەرىن وسىنداي كەرەمەت تۇردە قورعاعان؟ كوپ جاعدايدا ەحوبا اناعۇرلىم ماڭىزدىراق نارسە ٷشىن — ٶز نيەتىن جۇزەگە اسىرۋ ٷشىن — وسىلاي ەتەتىن. مىسالى، ەحوبانىڭ يسانى ٴسابي كەزىندە قورعاعانى اقىرىندا بۇكىل ادامزاتتىڭ يگىلىگىنە ىقپال ەتەتىن نيەتىنىڭ ورىندالۋى ٷشىن ماڭىزدى بولعان. ‹بىزگە ٴتالىم بولسىن دەپ باياعىدا جازىلىپ قالدىرىلعان› جازبالاردا قۇدايدىڭ قورعايتىن كۇشىن قالاي قولدانعانى تۋراسىندا كوپتەگەن مىسالدار جازىلعان (ريمدىكتەرگە 15:4). بۇل مىسالدار شەكسىز كۇشتى قۇدايىمىزعا دەگەن سەنىمىمىزدى نىعايتادى. ٴبىراق بۇگىندە ول ٴبىزدى قاي جاعىنان قورعايدى دەپ كۇتۋىمىزگە بولادى؟
قۇدايدىڭ ۋادەسى نەنى بىلدىرمەيدى؟
13. ەحوبا ٴبىزدىڭ مۇددەمىز ٷشىن كەرەمەتتەر جاساۋعا مىندەتتى مە؟ ٴتۇسىندىر.
13 ەحوبانىڭ قورعايمىن دەپ بەرگەن ۋادەسى ٴبىزدىڭ مۇددەمىز ٷشىن كەرەمەتتەر جاساۋعا مىندەتتى دەگەندى بىلدىرمەيدى. قۇداي ٴبىزدىڭ وسى زۇلىم زاماندا ەش قيىنشىلىققا كەزىكپەيتىندىگىمىزگە كەپىلدىك بەرمەيدى. ونىڭ كوپتەگەن ادال قىزمەتشىلەرى كەدەيلىك، سوعىس، اۋرۋ مەن ٶلىم سياقتى اۋىر قيىنشىلىقتارعا كەزىگىپ جاتادى. يسا شاكىرتتەرىنىڭ سەنىمدەرى ٷشىن ولىمگە دە كەسىلۋلەرى مۇمكىن ەكەنىن اشىق ايتقان. مىنە، سول سەبەپتى يسا اقىرىنا دەيىن تاباندىلىق تانىتۋ كەرەك بولاتىنىنا ەرەكشە كوڭىل بولگەن (ماتاي 24:9، 13). ەگەر ەحوبا كەرەمەت تۇردە قورعاۋ ٷشىن ٵر جاعدايدا كۇشىن قولدانا بەرسە، شايتان ونى داتتاۋى جانە ٴبىزدىڭ وعان تازا نيەتپەن قىزمەت ەتەتىنىمىزگە كۇمان كەلتىرۋى ابدەن مۇمكىن ەدى (ٵيۇپ 1:9، 10).
14. ەحوبا ٶز قىزمەتشىلەرىنىڭ ٴبارىن بىردەي قورعاي بەرمەيتىنى قانداي مىسالداردان كورىنەدى؟
14 ەجەلگى زاماننىڭ وزىندە ەحوبا قورعايتىن كۇشىن ٵربىر قىزمەتشىسىن مەزگىلسىز ولىمنەن امان الىپ قالۋ ٷشىن قولدانىپ وتىرماعان. مىسالى، ەلشى جاقىپتى شامامەن ب. ز. 44-جىلدارى نەيرون ٶلىم جازاسىنا كەسكەن. ٴبىراق كوپ ۇزاماي ەحوبا پەتىردى «يرودتىڭ قولىنان» امان الىپ قالعان (ەلشىلەردىڭ ىستەرى 12:1—11). ال جاقىپتىڭ ٸنىسى جوحان پەتىردەن دە، جاقىپتان دا ۇزاق جاساعان. قۇداي ٶز قىزمەتشىلەرىنىڭ ٴبارىن بىردەي قورعاي بەرەدى دەپ كۇتپەۋىمىز كەرەكتىگى انىق. ونىڭ ۇستىنە، بارىمىزگە دە «ۋاقىت پەن جاعدايدىڭ» بيلىگى جۇرەدى (ەككلەسياست 9:11). ولاي بولسا، بۇگىندە ەحوبا ٴبىزدى قورعاي ما؟
ەحوبا تاندىك جاعىنان قورعايدى
15، 16. ا) ەحوبانىڭ ٶز قىزمەتشىلەرىن توپ رەتىندە تاندىك جاعىنان قورعاعانىن نە دالەلدەيدى؟ ٵ) ەحوبانىڭ ٴبىزدى قازىر جانە «اۋىر ازاپ» كەزىندە قورعايتىنىنا نەگە سەنىمدى بولا الامىز؟
15 الدىمەن، ەحوبا تاندىك جاعىنان قالاي قورعايتىنىن قاراستىرايىق. ونىڭ قىزمەتشىلەرى ەحوبا وزدەرىن توپ رەتىندە قورعايدى دەپ كۇتۋلەرىنە بولادى. ولاي بولماعان جاعدايدا، ٴبىز شايتاننىڭ وڭاي ولجاسىنا اينالىپ قالعان بولار ەدىك. كەلەسى جايت جونىندە ويلاپ كورشى: «وسى دۇنيەنىڭ ٵمىرشىسى» شايتاننىڭ كوكەيكەستى ارمانى — شىنايى عيباداتتى جويۋ (جوحان 12:31؛ ايان 12:17). جەر بەتىندەگى ىقپالدى مەملەكەتتەردىڭ كەيبىرى ۋاعىزداۋ ىسىنە تيىم سالىپ نەمەسە ٴبىزدى مۇلدەم قۇرتىپ جىبەرۋگە تىرىسقان، مۇنداي جايت ٵلى دە ورىن الۋدا. سوعان قاراماستان ەحوبانىڭ حالقى بەرىكتىگىن ساقتاپ، تالماي ۋاعىزداپ كەلەدى! نەگە سونداي كۇشتى حالىقتار سالىستىرمالى تۇردە شاعىن عانا ٵرى قورعانسىز بولىپ كورىنەتىن ماسىحشىلەردىڭ ىستەرىن توقتاتۋعا دارمەنسىز؟ ويتكەنى ەحوبانىڭ ٶزى ٴبىزدى زور قاناتىمەن قالقالاپ جۇرەدى! (ٴزابۋر 17:7، 8 [16:7، 8])
16 «اۋىر ازاپ» كەزىندەگى قورعانىش تۋرالى نە دەۋگە بولادى؟ بىزگە قۇداي سوتىنان قورقۋدىڭ قاجەتى جوق. «جاراتقان يە وزىنە ۇنامدى ٶمىر سۇرەتىندەردى كورىپ جاتقان قۋعىن-سۇرگىننەن قۇتقارىپ، ال ادىلەتسىزدەردى قيامەت سوتى بولاتىن كۇنگە دەيىن ساقتاپ، جازالاۋدى، ارينە، بىلەدى» (ايان 7:14، سىلتەمەگە قارا؛ پەتىردىڭ 2-حاتى 2:9). وعان دەيىن ٴبىز ەكى نارسەگە بەرىك سەنىمدى بولا الامىز. بىرىنشىدەن، ەحوبا ادال قىزمەتشىلەرىنىڭ مۇلدەم قۇرىپ كەتۋلەرىنە ەشقاشان جول بەرمەيدى. ەكىنشىدەن، مىنسىزدىگىن ساقتاعان قىزمەتشىلەرىنە سي رەتىندە، ەگەر قاجەت دەپ تاپسا، ٴتىپتى قايتا ٴتىرىلتۋ ارقىلى بولسىن، ٵدىل جاڭا دۇنيەسىندە ماڭگى ٶمىر ٴسۇرۋ مۇمكىندىگىن بەرەدى. ومىردەن وتكەندەر ٷشىن قۇدايدىڭ جادىندا بولۋدان ارتىق قاۋىپسىز جەر جوق (جوحان 5:28، 29).
17. ٶزىنىڭ ٴسوزى ارقىلى ەحوبا ٴبىزدى قالاي قورعايدى؟
17 قازىردىڭ وزىندە ەحوبا ٴبىزدى جۇرەك جاراسىن جازىپ، ٶمىردى وزگەرتەتىن كۇشى بار ٴسوزى ارقىلى امان ساقتاپ وتىر (ەۆرەيلەرگە 4:12). ونداعى پرينسيپتەردى قولدانۋ ارقىلى ٶمىرىمىزدىڭ بەلگىلى سالالارىندا تاندىك زارداپ شەگۋدەن امان بولا الامىز. يشايا 48:17 دە: ‹مەن، قۇداي يەلەرىڭ، سەندەرگە پايدالىنى ۇيرەتەمىن›،— دەلىنگەن. قۇداي ٴسوزىنىڭ كەڭەستەرىنە ساي ٶمىر ٴسۇرۋ ارقىلى دەنساۋلىعىمىزدى دا جاقسارتىپ، ٶمىرىمىزدى دە ۇزارتا الاتىنىمىزدا كۇمان جوق. مىسالى، ازعىندىقتان جانە ارامدايتىن نارسەلەردىڭ بارىنەن اۋلاق جۇرىڭدەر دەگەن كەڭەسكە قۇلاق اسار بولساق، بۇگىندە قۇدايدى بىلمەيتىن كوپ ادامنىڭ ٶمىرىن بۇزىپ جاتقان جامان قىلىقتار مەن زياندى ادەتتەردەن ارىلامىز (ەلشىلەردىڭ ىستەرى 15:29؛ قورىنتتىقتارعا 2-حات 7:1). قۇداي ٴسوزىنىڭ ٴبىزدى قورعايتىنى نەتكەن قۋانىش!
ەحوبا رۋحاني جاعىنان قورعايدى
18. ەحوبا قالايشا ٴبىزدى رۋحاني جاعىنان قورعايدى؟
18 ٴبىراق، ەڭ ماڭىزدىسى، ەحوبا ٴبىزدى رۋحاني جاعىنان قورعايدى. سۇيىسپەنشىلىككە تولى قۇدايىمىز رۋحاني زيان شەكپەۋىمىز ٷشىن، ٴبىزدى قيىنشىلىقتارعا توتەپ بەرۋگە جانە وزىمەن قارىم-قاتىناسىمىزدى ساقتاۋعا قاجەتتى نارسەلەردىڭ بارىمەن قامتاماسىز ەتۋ ارقىلى قورعاپ وتىر. وسىلايشا ەحوبا ٴبىزدى بىرنەشە جىلعا عانا ەمەس، ماڭگىلىك ٶمىر ٷشىن امان ساقتايدى. ٴبىزدى رۋحاني جاعىنان قورعايتىن قۇداي ۇيىمداستىرعان كەيبىر شارالاردى قاراستىرىپ كورەيىك.
19. ەحوبانىڭ رۋحى باسىمىزعا تۇسكەن قيىنشىلىقتارعا توتەپ بەرۋىمىزگە قالاي كومەكتەسەدى؟
19 ەحوبا دۇعامىزدى ەستيدى (ٴزابۋر 65:2 [64:3]). ٶمىردىڭ قىسىمى توتەپ بەرە الماستاي كورىنگەن شاقتاردا، كوڭىلىمىزدەگىنىڭ ٴبارىن وعان اشىپ ايتار بولساق، ۇلكەن جەڭىلدىك سەزىنەمىز (فىلىپىلىكتەرگە 4:6، 7). قۇداي قيىنشىلىقتارىمىزدى كەرەمەت تۇردە شەشىپ جىبەرمەيتىن دە شىعار، ٴبىراق ول جۇرەكتەن شىققان دۇعالارىمىزعا جاۋاپ رەتىندە دانالىق سيلاي الادى (جاقىپ 1:5، 6). ەحوبا بۇنىمەن شەكتەلىپ قانا قويمايدى، وزىنەن سۇراعاندارعا كيەلى رۋح تا بەرەدى (لۇقا 11:13). بۇل زور رۋح باسىمىزعا تۇسكەن قيىنشىلىقتارعا توتەپ بەرۋىمىزگە كومەكتەسەدى. ەحوبا جاقىندا ورنايتىن جاڭا دۇنيەسىندە جانعا باتاتىن بارلىق قيىنشىلىقتاردى جويمايىنشا، بىزگە ولارعا توتەپ بەرۋىمىز ٷشىن ‹شەكسىز زور قۇدىرەت› بەرە الادى (قورىنتتىقتارعا 2-حات 4:7).
20. ەحوبا قورعايتىن كۇشىن باۋىرلاستار ارقىلى قالاي كورسەتۋى مۇمكىن؟
20 كەيدە ەحوبا قورعايتىن كۇشىن ٴبىر سەنىمدەگىلەر ارقىلى كورسەتۋى مۇمكىن. ول ٶز حالقىن دۇنيەجۇزىلىك باۋىرلاستىق ەتىپ بىرىكتىرگەن (پەتىردىڭ 1-حاتى 2:17؛ جوحان 6:44). ولاردىڭ اراسىنداعى جىلى قارىم-قاتىناس — قۇدايدىڭ كيەلى رۋحىنىڭ يگىلىكتى اسەرىنىڭ كەرەمەت دالەلى. كيەلى رۋح ٴبىزدىڭ بويىمىزدا سۇيىسپەنشىلىك، قايىرىمدىلىق، كەڭپەيىلدىلىك سياقتى تارتىمدى قاسيەتتەردەن تۇراتىن جەمىسىن دامىتادى (عالاتتىقتارعا 5:22، 23). سوندىقتان قامىعىپ جۇرگەنىمىزدە، باۋىرلاستارىمىز قامقورلىقپەن ٴتيىمدى كەڭەس بەرسە نەمەسە وتە قاجەتتى جىگەرلەندىرەتىن سوزدەر ايتسا، ەحوبانىڭ وسىلايشا قامقورلىقپەن قورعاپ جاتقانىنا ريزاشىلىق بىلدىرۋىمىزگە بولادى.
21. ا) قالاي ەحوبا «ادال دا اقىلدى قۇل» ارقىلى ۋاقتىلى رۋحاني اس-سۋمەن قامتاماسىز ەتىپ وتىر؟ ٵ) ەحوبانىڭ رۋحاني جاعىنان قورعاۋ ٷشىن جاساپ وتىرعان شارالارىنىڭ قانداي پايداسىن كورىپ ٴجۇرسىڭ؟
21 ەحوبانىڭ ٴبىزدى قورعايتىن تاعى دا ٴبىر جولى بار. بۇل — ۋاقتىلى بەرىلەتىن رۋحاني اس-سۋ. ٶزىنىڭ ٴسوزى ارقىلى نىعايۋىمىزعا كومەكتەسۋ ٷشىن، ەحوبا رۋحاني اس-سۋدى تاراتىپ وتىرۋعا «ادال دا اقىلدى قۇلدى» تاعايىنداعان. قۇل تابى «كۇزەت مۇناراسى» جانە «ويانىڭدار!» سياقتى باسىلىمدار، سونداي-اق jw.org سايتىمىز، قاۋىم كەزدەسۋلەرى، كونگرەستەر ارقىلى نەنى جانە قاشان قاجەت ەتەتىنىمىزدى ٴبىلىپ، ‹اس-سۋىمىزدى ۋاقتىلى بەرىپ› وتىرادى (ماتاي 24:45، جد). ماسىحشىلەردىڭ قاۋىم كەزدەسۋىندە، بىرەۋدىڭ تۇسىنىكتەمەسىنەن، باياندامادان نەمەسە دۇعادا ايتىلعان سوزدەردەن بولسىن، تاپ وزىڭە قاجەتتى كۇش پەن جىگەر العان كەزىڭ بولعان با؟ ٴبىزدىڭ جۋرنالدارىمىزداعى قانداي دا ٴبىر ماقالا قاتتى اسەر ەتىپ، بۇكىل ٶمىرىڭدى وزگەرتكەن بە؟ وسىنىڭ ٴبارىن ەحوبا ٴبىزدى رۋحاني جاعىنان قورعاۋ ٷشىن ىستەپ وتىرعانىن ەسىڭدە ۇستا.
22. ەحوبا قۇتقاراتىن كۇشىن ٵردايىم قالاي قولدانادى جانە نەگە بۇل ٴبىزدىڭ يگىلىگىمىزگە اسادى؟
22 راسىندا دا، ەحوبا — «وزىنەن پانا ىزدەيتىندەردىڭ بارىنە قالقان» (ٴزابۋر 18:30، جد؛ [17:31]). ول ٶزىنىڭ كۇشىن ٴبىزدى بۇگىندەگى باقىتسىزدىق اتاۋلىنىڭ بارىنەن قورعاۋ ٷشىن قولدانبايتىنىن تۇسىنەمىز. الايدا ەحوبا قۇتقاراتىن كۇشىن ٵردايىم ٶز ەركىن جۇزەگە اسىرۋ ٷشىن قولدانادى. ال اقىر سوڭىندا بۇل ونىڭ حالقىنىڭ يگىلىگىنە اسادى. ەگەر وعان جاقىنداپ، ٵرى ونىڭ سۇيىسپەنشىلىگىن قابىلداي بەرەر بولساق، ەحوبا بىزگە كەمەلدى ماڭگىلىك ٶمىر بەرەدى. وسىنى جادىمىزدا ۇستاي وتىرىپ، وسى دۇنيەدە كەزىگىپ جۇرگەن قايعى-قاسىرەتتى ۋاقىتشا ٵرى جەڭىل دەپ قاراستىرامىز (قورىنتتىقتارعا 2-حات 4:17).