1, 2. Ftit wara li kienu ħarbu mill-​Eġizzjani fil-​Baħar l-​Aħmar, l-​Iżraelin f’liema periklu kienu jinsabu huma u deħlin fir-​reġjun tas-​Sinaj, u Jehovah kif qawwielhom qalbhom?

 KMIENI fis-​sena 1513 Q.E.K., l-​Iżraelin kienu jinsabu fil-​periklu huma u deħlin fir-​reġjun tas-​Sinaj. Quddiemhom kellhom vjaġġ tal-​biżaʼ, għax riedu jgħaddu minn “deżert kbir u jwaħħax, mimli sriep velenużi u skorpjuni.” (Dewteronomju 8:15) Kien hemm ukoll il-​biżaʼ li jiġu attakkati minn ġnus għedewwa. Jehovah kien ġab lill-​poplu tiegħu f’din is-​sitwazzjoni. Bħala Alla tagħhom, kien se jkun kapaċi jipproteġihom?

² Jehovah qawwielhom qalbhom b’dan il-​kliem: “Rajtu intom x’għamilt lill-​Eġizzjani, u kif lilkom ġarrejtkom fuq il-​ġwienaħ taʼ l-​ajkli u ressaqtkom lejja.” (Eżodu 19:4) Jehovah fakkar lin-​nies tiegħu li hu kien ħelishom minn idejn l-​Eġizzjani, billi bħallikieku uża l-​ajkli biex jiħodhom xi mkien protett. Imma hemm raġunijiet oħra għala “l-​ġwienaħ taʼ l-​ajkli” huma tixbiha xierqa tal-​protezzjoni divina.

3. “Il-​ġwienaħ taʼ l-​ajkli” għala huma tixbiha xierqa tal-​protezzjoni divina?

³ L-​ajkla ma tużax biss il-​ġwienaħ kbar u b’saħħithom tagħha biex tittajjar fl-​għoli. Fl-​eqqel tal-​ġurnata, l-​ajkla omm tiftaħ ġwinħajha—li jistgħu jilħqu ż-​żewġ metri minn naħa s’oħra—biex tifforma umbrella protettiva, u b’hekk tgħatti liż-​żgħar tagħha mix-​xemx tikwi. Drabi oħra, hi ddawwar ġwinħajha madwar iż-​żgħar tagħha biex tipproteġihom mir-​riħ kiesaħ. L-​istess bħalma l-​ajkla tipproteġi liż-​żgħar tagħha, hekk ukoll Jehovah kien għatta u pproteġa lill-​ġens taʼ Iżrael li kien għadu ġdid u mingħajr esperjenza.  Issa li kienu jinsabu fid-​deżert, in-​nies tiegħu setgħu jkomplu jistkennu fid-​dell taʼ ġwinħajh b’saħħithom ladarba jibqgħu leali. (Dewteronomju 32:9-​11; Salm 36:8 [36:7, NW]) Imma nistgħu aħna llum bix-​xieraq nistennew li Alla jipproteġina?

4, 5. Għala jistaʼ jkollna fiduċja assoluta fil-​wegħda t’Alla li se jipproteġina?

⁴ Jehovah ċertament li kapaċi jipproteġi lill-​qaddejja tiegħu. Hu ‘Alla li jistaʼ kollox’—titlu li jindika li hu jippossiedi qawwa li xejn u ħadd ma jiflaħ għaliha. (Ġenesi 17:1, Saydon) Bħal mewġa kbira tal-​baħar li ħadd ma jistaʼ jrażżan, Jehovah ħadd ma jistaʼ jwaqqfu meta juża l-​qawwa tiegħu. Ladarba jistaʼ jagħmel dak kollu li titlob ir-​rieda tiegħu, għandna mnejn nistaqsu, ‘Hija r-​rieda taʼ Jehovah li juża l-​qawwa tiegħu biex jipproteġi lin-​nies tiegħu?’

⁵ It-​tweġiba, f’kelma waħda, hija iva! Jehovah jiżgurana li hu se jipproteġi lill-​poplu tiegħu. “Kenn u qawwa hu Alla għalina, għajnuna kbira sibnieh fid-​dwejjaq,” jgħid Salm 46:2 (46:1, NW). Ladarba Alla “ma jigdibx,” jistaʼ jkollna fiduċja assoluta fil-​wegħda tiegħu li se jipproteġina. (Titu 1:2) Ejja nikkunsidraw xi ftit mit-​tixbihat ħajjin li Jehovah juża biex jiddeskrivi l-​ħarsien protettiv tiegħu.

6, 7. (a) Ir-​ragħaj fi żminijiet Bibliċi liema protezzjoni kien jipprovdi lin-​nagħaġ tiegħu? (b) Il-​Bibbja kif tispjega b’tixbiha x-​xewqa mill-​qalb li għandu Jehovah biex jipproteġi u jħares lin-​nagħaġ tiegħu?

⁶ Jehovah hu Ragħaj, u “aħna l-​poplu tiegħu u n-​nagħaġ tal-​mergħa tiegħu.” (Salm 23:1; 100:3) Ftit hemm annimali li huma bla difiża daqskemm huma n-​nagħaġ domestiċi. Ir-​ragħaj fi żminijiet Bibliċi kellu jkun kuraġġuż biex jipproteġi lin-​nagħaġ tiegħu minn iljuni, ilpup, u orsijiet, kif ukoll minn ħallelin. (1 Samwel 17:34, 35; Ġwanni 10:12, 13)  Imma xi drabi kien ikun hemm bżonn it-​tenerezza biex jipproteġi lin-​nagħaġ. Meta xi nagħġa kienet tiled ’il bogħod mill-​maqjel, ir-​ragħaj bi mħabba kien joqgħod għassa ma’ l-​omm fil-​mumenti li tkun bla difiża u mbagħad jiġbor il-​ħaruf dgħajjef u jġorru lejn il-​maqjel.

⁷ Billi jxebbah lilu nnifsu ma’ ragħaj, Jehovah jiżgurana li hu jixtieq minn qalbu jipproteġina. (Eżekjel 34:11-​16) Ftakar fid-​deskrizzjoni taʼ Jehovah f’​Isaija 40:11, diskussa f’Kapitlu 2 taʼ dan il-​ktieb: “Bħal ragħaj li jirgħa l-​merħla tiegħu; bi driegħu jiġmagħha, u l-​ħrief fi ħdanu jerfagħhom.” Il-​ħaruf ċkejken kif jispiċċa fi ‘ħdan’ ir-​ragħaj—fid-​drapp wiesa’ tal-​libsa taʼ fuq tiegħu? Forsi l-​ħaruf jersaq ħdejn ir-​ragħaj, u anki jmisslu kemm kemm riġlejh biex jurih li qiegħed hemm. Madankollu, huwa r-​ragħaj li jrid jitbaxxa, jerfaʼ lill-​ħaruf, u b’ġentilezza jgeddsu fi ħdanu. Xi stampa ħelwa hija din taʼ kemm ir-​Ragħaj il-​Kbir tagħna huwa lest li jagħtina kenn u jipproteġina!

8. (a) Għal min hija miftuħa l-​wegħda t’Alla taʼ protezzjoni, u dan kif inhu indikat fi Proverbji 18:10? (b) X’inhu involut f’li nsibu kenn fl-​isem t’Alla?

⁸ Il-​wegħda t’Alla taʼ protezzjoni sseħħ b’kundizzjoni—dawk biss li jersqu qrib lejh jesperjenzawha. Proverbji 18:10 (KŻ) jgħid: “Isem il-​Mulej hu torri qawwi; il-​ġust jidħol jiġri fih, u hemm isib il-​kenn tiegħu.” Fi żminijiet Bibliċi, xi drabi kienu jinbnew torrijiet fid-​deżert bħala postijiet taʼ kenn u protezzjoni. Imma min kien ikun jinsab fil-​periklu kellu r-​responsabbiltà li jidħol jiġri għall-​protezzjoni f’wieħed minn dawn it-​torrijiet. Huwa simili għal meta niġu biex insibu kenn fl-​isem t’Alla. Jinvolvi ħafna iktar milli sempliċement nirrepetu l-​isem t’Alla; l-​isem divin innifsu m’għandux xi qawwa maġika. Minflok, hemm bżonn li nkunu nafu u nafdaw lill-​Wieħed li jġorr dan l-​isem u ngħixu fi qbil mal-​livelli ġusti tiegħu. X’qalb tajba għandu Jehovah li jiżgurana illi jekk induru lejh bil-​fidi, hu se jkun torri taʼ protezzjoni għalina!

9. Jehovah kif għamel iktar milli sempliċement wiegħed protezzjoni?

⁹ Jehovah għamel iktar milli sempliċement wiegħed protezzjoni. Fi żminijiet Bibliċi, hu wera b’modi mirakolużi li kapaċi jipproteġi lill-​poplu tiegħu. Matul l-​istorja taʼ Iżrael, l-​‘id’ setgħana taʼ Jehovah spiss żammet f’kontroll lil għedewwa qawwija. (Eżodu 7:4) Madankollu, Jehovah uża wkoll il-​qawwa protettiva tiegħu għall-​benefiċċju taʼ nies individwali.

10, 11. Liema eżempji Bibliċi juru li Jehovah uża l-​qawwa protettiva tiegħu għall-​benefiċċju taʼ nies individwali?

¹⁰ Meta tliet Ebrej żgħażagħ—Sidrak, Mesak, u Għabednegu—irrifjutaw li jmilu quddiem ix-​xbieha tad-​deheb tas-​Sultan Nabukodonosor, is-​sultan mgħaddab hedded li jitfagħhom f’forn jaħraq ħafna iktar mis-​soltu. “Liema hu dak alla li se jeħliskom minn idejja?” qal biex jinkihom Nabukodonosor, l-​iktar monarka qawwi fuq l-​art. (Danjel 3:15) It-​tliet żgħażagħ kellhom fiduċja sħiħa fil-​qawwa t’Alla tagħhom biex jipproteġihom, imma huma m’għamluhiex fatta li se jagħmel hekk. Għaldaqstant wieġbu: “Jekk inhu tassew hekk, Alla tagħna, li aħna nqimu, jistaʼ jeħlisna.” (Danjel 3:17) Tabilħaqq, dak il-​forn taʼ nar iħeġġeġ, anki meta ssaħħan seba’ darbiet iktar mis-​soltu, ma ppreżenta l-​ebda sfida għall-​Alla tagħhom li jistaʼ kollox. Hu pproteġiehom, u s-​sultan kellu jammetti: “Ma hemmx alla ieħor li għandu ħila jagħti ħelsien bħal dan.”—Danjel 3:96 (3:29, NW).

¹¹ Jehovah ipprovda wkoll turija tassew impressjonanti tal-​qawwa protettiva tiegħu meta ttrasferixxa l-​ħajja taʼ Ibnu l-​uniġenitu fil-​ġuf tal-​verġni Lhudija Marija. Anġlu qal lil Marija li hi kellha ‘tnissel fil-​ġuf u jkollha iben.’ L-​anġlu spjega: “L-​Ispirtu s-​Santu jiġi fuqek, u l-​qawwa taʼ l-​Għoli tixħet id-​dell tagħha fuqek.” (Luqa 1:31, 35) Mid-​dehra, l-​Iben t’Alla qatt ma kien sab ruħu f’sitwazzjoni daqshekk perikoluża. Kienu d-​dnub u l-​imperfezzjoni taʼ l-​omm umana se jtebbgħu lit-​tarbija fil-​ġuf? Kien Satana se jirnexxilu jagħmel  ħsara jew joqtol lil dak l-​Iben qabel ma Hu jitwieled? Impossibbli! Fil-​fatt, Jehovah ifforma ħajt protettiv madwar Marija ħalli xejn—la l-​imperfezzjoni, la xi forza taʼ ħsara, la bniedem qattiel, u lanqas xi demonju—ma jkun jistaʼ jagħmel ħsara lit-​tarbija hi u tikber fil-​ġuf, minn x’ħin tnisslet ’il quddiem. Jehovah kompla jipproteġi lil Ġesù matul żgħożitu. (Mattew 2:1-​15) Sakemm wasal iż-​żmien stabbilit minn Alla, xejn u ħadd ma setaʼ jagħmel ħsara lil Ibnu l-​għażiż.

12. Jehovah għala pproteġa b’mod mirakoluż lil ċerti individwi fi żminijiet Bibliċi?

¹² Jehovah għala pproteġa lil ċerti individwi b’modi tant mirakolużi? F’ħafna każijiet Jehovah ipproteġa lil individwi sabiex jipproteġi xi ħaġa bil-​wisq iktar importanti: it-​twettiq taʼ l-​iskop tiegħu. Per eżempju, is-​sopravivenza taʼ Ġesù bħala tarbija kienet essenzjali sabiex jitwettaq l-​iskop t’Alla, li fl-​aħħar mill-​aħħar se jkun taʼ benefiċċju għall-​bnedmin kollha. Ir-​rakkonti tal-​ħafna turijiet taʼ qawwa protettiva huma parti mill-​Iskrittura mnebbħa, li ‘nkitbet għat-​tagħlim tagħna, biex bis-​sabar u bil-​faraġ li tagħtina l-​Iskrittura, aħna jkollna t-​tama.’ (Rumani 15:4) Iva, dawn l-​eżempji jsaħħulna l-​fidi fl-​Alla tagħna li jistaʼ kollox. Imma liema protezzjoni nistgħu nistennew mingħand Alla llum?

13. Huwa Jehovah obbligat iwettaq mirakli għan-​nom tagħna? Spjega.

¹³ Il-​wegħda taʼ protezzjoni divina ma tfissirx li Jehovah hu obbligat iwettaq mirakli għan-​nom tagħna. Le, Alla tagħna ma jiggarantilniex ħajja mingħajr problemi f’din is-​sistema qadima. Ħafna qaddejja leali taʼ Jehovah jiffaċċjaw għawġ kbir, inkluż faqar, gwerer, mard, u mewt. Ġesù qal ċar u tond lid-​dixxipli tiegħu li bħala individwi huma setgħu jingħataw il-​mewt minħabba l-​fidi tagħhom. Kien għalhekk li Ġesù enfasizza l-​bżonn li nissaportu sat-​tmiem. (Mattew 24:9, 13) Li kieku Jehovah kellu juża l-​qawwa tiegħu biex joffri  ħelsien mirakoluż f’kull każ, Satana setaʼ jkollu bażi għalxiex jittanta lil Jehovah u jqajjem dubju dwar kemm hija ġenwina d-​devozzjoni tagħna lejn Alla tagħna.—Ġob 1:9, 10.

14. Liema eżempji juru li Jehovah mhux dejjem jipproteġi lill-​qaddejja kollha tiegħu bl-​istess mod?

¹⁴ Anki fi żminijiet Bibliċi, Jehovah m’użax il-​qawwa protettiva tiegħu biex jipproteġi lil kull wieħed mill-​qaddejja tiegħu minn mewta qabel il-​waqt. Per eżempju, l-​appostlu Ġakbu nqatel minn Erodi madwar is-​sena 44 E.K.; u madankollu, ftit żmien wara, Pietru ġie meħlus “minn id Erodi.” (Atti 12:1-​11) U Ġwanni, ħu Ġakbu, għex iktar minn Pietru u Ġakbu. B’mod ċar, ma nistgħux nistennew li Alla tagħna jipproteġi lill-​qaddejja kollha tiegħu bl-​istess mod. Barra minn hekk, aħna lkoll effettwati miż-​“żmien u ċ-​ċirkustanzi.” (Koħèlet 9:11) Allura, Jehovah kif jipproteġina llum?

15, 16. (a) X’evidenza hemm li Jehovah ipprovda protezzjoni fiżika għall-​aduraturi tiegħu bħala grupp? (b) Għala nistgħu nkunu fiduċjużi li Jehovah se jipproteġi lill-​qaddejja tiegħu issa u matul it-​tribulazzjoni l-​kbira?

¹⁵ Ikkunsidra, l-​ewwel, il-​kwistjoni tal-​protezzjoni fiżika. Bħala aduraturi taʼ Jehovah, nistgħu nistennew protezzjoni bħal din bħala grupp. Inkella, inkunu priża faċli għal Satana. Aħseb dwar dan: Satana, “il-​Prinċep taʼ din id-​dinja,” jixtieq ħafna li jeqred il-​qima vera. (Ġwanni 12:31; Apokalissi 12:17) Xi wħud mill-​iktar gvernijiet qawwijin fuq l-​art għamlu projbizzjoni fuq ix-​xogħol tagħna taʼ l-​ippridkar u pprovaw jeqirduna għalkollox. Madankollu, il-​poplu taʼ Jehovah baqaʼ jżomm sod u kompla jippriedka bla waqfien! Ġnus qawwijin għala ma rnexxilhomx iwaqqfu l-​attività taʼ dan il-​grupp taʼ Kristjani relattivament żgħir u li jidher bla difiża? Għax Jehovah ipproteġiena bi ġwinħajh tant b’saħħithom!—Salm 17:7, 8.

¹⁶ Xi ngħidu dwar protezzjoni fiżika matul it-​tribulazzjoni l-​kbira li ġejja? M’għandniex għalfejn nibżgħu mill-​ġudizzji  li se jesegwixxi Jehovah. Wara kollox, Jehovah jaf kif “jeħles it-​tajbin mit-​tiġrib u jħalli l-​ħżiena biex jieħdu l-​kastig f’jum il-​ġudizzju.” (Apokalissi 7:14; 2 Pietru 2:9) Sadattant, nistgħu dejjem nibqgħu ċerti minn żewġ affarijiet. L-​ewwel, Jehovah qatt ma se jħalli li l-​qaddejja leali tiegħu jgħibu għalkollox minn fuq wiċċ l-​art. It-​tieni, hu se jippremja lil uħud li jżommu l-​integrità b’ħajja taʼ dejjem fid-​dinja l-​ġdida tiegħu mimlija ġustizzja—jekk hemm bżonn, permezz taʼ rxoxt. Dawk li jmutu ma jistgħux ikunu f’post iktar protett milli fil-​memorja t’Alla.—Ġwanni 5:28, 29.

17. Jehovah kif jipproteġina permezz tal-​Kelma tiegħu?

¹⁷ Saħansitra issa, Jehovah jipproteġina permezz tal-​“kelma” ħajja tiegħu, li għandha l-​qawwa li tqanqal lin-​nies sabiex qalbhom tfiq u ħajjithom tinbidel. (Lhud 4:12) Billi napplikaw il-​prinċipji tagħha, aħna nistgħu f’ċerti aspetti niġu protetti minn ħsara fiżika. “Jien hu l-​Mulej, . . . ngħallmek għall-​ġid tiegħek,” jgħid Isaija 48:17. Mingħajr ebda dubju, jekk ngħixu fi qbil mal-​Kelma t’Alla nistgħu ntejbu saħħitna u ntawlu ħajjitna. Per eżempju, għax napplikaw il-​parir tal-​Bibbja biex nitbiegħdu miż-​żína u biex nitnaddfu minn kull tinġis, aħna nevitaw il-​prattiċi maħmuġin u l-​vizzji taʼ ħsara li minħabba fihom ħafna wħud li jiċħdu lil Alla jħarbtu ħajjithom. (Atti 15:29; 2 Korintin 7:1) Kemm aħna grati għall-​protezzjoni li tagħtina l-​Kelma t’Alla!

18. Jehovah liema protezzjoni spiritwali jipprovdilna?

¹⁸ L-​iktar ħaġa importanti hi li Jehovah jipprovdi protezzjoni spiritwali. Alla tagħna li jħobbna jipproteġina minn ħsara spiritwali billi jgħammarna b’dak li neħtieġu sabiex nissaportu l-​provi u nħarsu r-​relazzjoni tagħna miegħu. B’hekk, Jehovah jaġixxi biex jippreserva lil ħajjitna, mhux sempliċement għal ftit snin qosra, imma għall-​eternità. Ikkunsidra xi ftit mill-​provvedimenti t’Alla li jistgħu jipproteġuna spiritwalment.

19. L-​ispirtu taʼ Jehovah kif jistaʼ jgħinna nifilħu kwalunkwe prova li niffaċċjaw?

 ¹⁹ Jehovah huwa Semmiegħ it-​talb. (Salm 65:3 [65:2, NW]) Meta donnu ma nkunux nistgħu nifilħu l-​pressjonijiet tal-​ħajja, nistgħu niksbu ħafna serħan jekk niftħu qalbna miegħu. (Filippin 4:6, 7) Forsi vera ma jneħħilniex il-​provi tagħna b’mod mirakoluż, imma bħala tweġiba għat-​talb sinċier tagħna, hu jistaʼ jagħtina l-​għerf biex niffaċċjawhom b’suċċess. (Ġakbu 1:5, 6) Iktar minn hekk, Jehovah jagħti spirtu qaddis lil dawk li jitolbuh. (Luqa 11:13) Dan l-​ispirtu qawwi jistaʼ jgħinna nifilħu kwalunkwe prova jew problema li niffaċċjaw. Jistaʼ jnissel fina “l-​qawwa iktar min-​normal” ħalli nissaportu sakemm Jehovah ineħħi l-​problemi kollha taʼ wġigħ fid-​dinja l-​ġdida li tant tinsab qrib.—2 Korintin 4:7, NW.

20. Il-​qawwa protettiva taʼ Jehovah kif tistaʼ tintwera permezz taʼ sħabna taʼ l-​istess twemmin?

²⁰ Xi drabi, il-​qawwa protettiva taʼ Jehovah tistaʼ tintwera permezz taʼ sħabna taʼ l-​istess twemmin. Jehovah ġibed lill-​poplu tiegħu fi fratellanza madwar id-​dinja. (1 Pietru 2:17; Ġwanni 6:44) Fl-​atmosfera taʼ mħabba li fiha din il-​fratellanza, naraw xiehda ħajja dwar kemm l-​ispirtu qaddis t’Alla għandu qawwa li jinfluwenza lin-​nies għat-​tajjeb. Dan  l-​ispirtu jipproduċi fina frott—kwalitajiet sbieħ u prezzjużi fosthom l-​imħabba, il-​qalb tajba, u t-​tjubija. (Galatin 5:22, 23) Għaldaqstant, meta nkunu għaddejjin minn xi saram u xi ħadd minn sħabna taʼ l-​istess twemmin jitqanqal biex joffri parir siewi jew jgħidilna erba’ kelmiet taʼ inkuraġġiment li tant ikollna bżonnhom, nistgħu rroddu ħajr lil Jehovah għal dawn it-​turijiet tiegħu taʼ ħarsien protettiv.

21. (a) Jehovah liema ikel spiritwali f’waqtu jipprovdi permezz taʼ “l-​ilsir leali u għaqli”? (b) Int kif ibbenefikajt personalment minn dak li jipprovdilna Jehovah sabiex jipproteġina spiritwalment?

²¹ Jehovah jipprovdi xi ħaġa oħra biex jipproteġina: ikel spiritwali f’waqtu. Sabiex jgħinna nieħdu s-​saħħa mill-​Kelma tiegħu, Jehovah qabbad lill-​“ilsir leali u għaqli” biex jipprovdi ikel spiritwali. Dan l-​ilsir leali juża letteratura stampata, fosthom ir-​rivisti It-​Torri taʼ l-​Għassa u Stenbaħ!, kif ukoll laqgħat, assembleat, u konvenzjonijiet biex jipprovdilna “ikel fiż-​żmien xieraq”—dak li jkollna bżonn, x’ħin ikollna bżonnu. (Mattew 24:45, NW) Ġieli smajt xi ħaġa waqt laqgħa Kristjana—f’xi kumment, taħdita, jew anki waqt talba—li tatek eżattament is-​saħħa u l-​inkuraġġiment li kellek bżonn? Ġiet ħajtek effettwata xi darba b’xi artiklu speċifiku pubblikat f’wieħed mir-​rivisti tagħna? Ftakar, Jehovah jipprovdi dawn l-​affarijiet kollha sabiex jipproteġina spiritwalment.

22. Jehovah b’liema mod juża dejjem il-​qawwa tiegħu, u l-​fatt li jagħmel dan għala huwa għall-​ġid tagħna?

²² Jehovah tabilħaqq li hu tarka “għal kull min jistkenn fih.” (Salm 18:31 [18:30, NW]) Aħna nifhmu li hu ma jużax il-​qawwa tiegħu biex jipproteġina mill-​problemi kollha li niffaċċjaw bħalissa. Madankollu, hu dejjem juża l-​qawwa protettiva tiegħu biex jiżgura li l-​iskop tiegħu jitwettaq. Fl-​aħħar mill-​aħħar, il-​fatt li jagħmel dan huwa għall-​ġid tal-​poplu tiegħu. Jekk nersqu qrib lejh u nibqgħu fi mħabbtu, Jehovah se jagħtina eternità taʼ ħajja perfetta. B’dan il-​prospett f’moħħna, nistgħu tabilħaqq inqisu kull sofferenza f’din is-​sistema bħala tal-​mument u ħafifa.—2 Korintin 4:17.