1, 2. Ba-Isiraele ba be ba le kotsing efe ge ba be ba tsena tikologong ya Sinai ka 1513 B.C.E., gomme Jehofa o ile a ba kgothatša bjang?

BA-ISIRAELE ba be ba le kotsing ge ba be ba tsena tikologong ya Sinai mathomong a 1513 B.C.E. Leeto le le boifišago le be le letše ka pele ga bona, e lego leeto la go phatša “lešokeng le lexolo le le šiišaxo, mo xo lexo dinôxa le diphepheng [tše di nago le mpholo, The New English Bible].” (Doiteronomio 8:15) Le gona, ba ile ba lebeletšana le tšhošetšo ya go ka hlaselwa ke ditšhaba tša manaba. Jehofa e be e le yena a tlišitšego setšhaba sa gagwe boemong bjo. E le Modimo wa bona, na o be a tla kgona go ba šireletša?

² Mantšu a Jehofa e be e le a kgothatšago kudu: “Le di bone ka nnoši tše ke di dirilexo Ba-Egipita; ’me lena ka Le kuka ka ’phêxo tša ’nong, ka Le tliša xo Nna.” (Ekisodo 19:4) Jehofa o ile a gopotša batho ba gagwe gore o ba phološitše go ba-Egipita bjalo ka ge eka o be a diriša manong go ba iša lefelong la tšhireletšego. Eupša go na le mabaka a mangwe ao ka ona “’phêxo tša ’nong” di swantšhetšago ka mo go swanetšego tšhireletšo ya Modimo.

3. Ke ka baka la’ng “’phêxo tša ’nong” di swantšhetša ka mo go swanetšego tšhireletšo ya Modimo?

³ Lenong le diriša diphego tša lona tše di pharaletšego le tše di tiilego e sego feela bakeng sa go fofela godimo-dimo. Mosegare ge go fiša, lenong la tshadi le phurolla diphego tša lona—tšeo di ka phurologelago bokgoleng bja go feta dimithara tše pedi—bakeng sa go direla mafotwana a lona moriti woo o a šireletšago letšatšing leo le fišago tšhiritšhiri. Ka dinako tše dingwe, le apeša mafotwana a lona ka diphego tša lona bakeng sa go a šireletša phefong e tonyago. Go fo etša ge lenong le šireletša mafotwana a lona, ka mo go swanago Jehofa o ile a šireletša setšhaba se sefsa sa Isiraele. Bjale ge se le lešokeng, setšhaba sa gagwe se be se tla tšwela pele se hwetša botšhabelo moriting wa  diphego tša gagwe tše matla ge feela se be se ka dula se botega. (Doiteronomio 32:9-11; Psalme 36:7) Eupša na rena lehono re ka letela ka mo go swanetšego tšhireletšo ya Modimo?

4, 5. Ke ka baka la’ng re ka bota ka mo go feletšego kholofetšo ya Modimo ya tšhireletšo?

⁴ Jehofa o tloga a kgona go šireletša bahlanka ba gagwe. Ke “Modimo Ra-matla-ohle”—e lego sereto se se bontšhago gore o na le matla ao a sa thibelwego. (Genesi 17:1) Go etša lephoto leo le sa thibelegego, matla a Jehofa a dirišwago a ka se ke a thibelwa. Ka ge a kgona go dira selo se sengwe le se sengwe seo thato ya gagwe e laelago gore se dirwe, mo gongwe re ka botšiša gore, ‘Na thato ya Jehofa ke go diriša matla a gagwe go šireletša batho ba gagwe?’

⁵ Ka lentšu le tee karabo ke ee! Jehofa o re kgonthišetša gore o tla šireletša batho ba gagwe. Psalme 46:1 (46:2, PK) e re: “Modimo ke setšhabelo sa rena, ke matla a rena; o bonwe gobane ke tlhakodišo e kgolo ditlalelong.” Ka ge Modimo e le “yo a ka se kego a aketša,” re ka bota ka mo go feletšego kholofetšo ya gagwe ya tšhireletšo. (Tito 1:2, NW) Anke re eleng hloko tše dingwe tša diswantšho tša mantšu tše di bonagalago gabotse tšeo Jehofa a di dirišago go hlalosa tlhokomelo ya gagwe e šireletšago.

6, 7. (a) Modiši wa mehleng ya Beibele o be a nea dinku tša gagwe tšhireletšo efe? (b) Beibele e bontšha bjang kganyogo ya Jehofa e tšwago pelong ya go šireletša le go hlokomela dinku tša gagwe?

⁶ Jehofa ke Modiši, gomme “re sethšaba s’axwe; re mohlape wa mafulô ’axwe.” (Psalme 23:1; 100:3) Ke diphoofolo tše sego kae tše di sa kgonego go itšhireletša go swana le dinku tšeo di ruilwego. Modiši wa mehleng ya Beibele o be a swanetše go ba le sebete ka mo go lekanego gore a šireletše dinku tša gagwe go ditau, diphiri le dibere gotee le go di šireletša go mahodu. (1 Samuele 17:34, 35; Johane 10:12, 13) Eupša go be go e-ba le dinako tšeo ka tšona go šireletša dinku go bego go nyaka boleta. Ge nku e be e tswaletše kgole le mohlape, modiši yo a hlokomelago o be a tla e diša dinakong tša ge e nyaka thušo ke moka a  kuke kwana yeo e sa kgonego go itšhireletša gomme a e iše mohlapeng.

⁷ Ka go itshwantšha le modiši, Jehofa o re kgonthišetša ka kganyogo ya gagwe e tšwago pelong ya go re šireletša. (Hesekiele 34:11-16) Gopola tlhaloso ya Jehofa yeo e hwetšwago go Jesaya 40:11 (PK), yeo e ahla-ahlilwego go Kgaolo 2 ya puku ye: “O tlo diša mohlape wa gagwe bjalo ka modiši, o tlo goboka dikwanyana ka mabogo a gagwe, a di kuke ka sehuba sa gagwe.” Go tla bjang gore kwana e be ‘sehubeng’ sa modiši—lemenong la seaparo sa gagwe sa ka godimo? Kwana e ka ya go modiši, ke moka ya ikgohla gabonolo ka leoto la gagwe. Lega go le bjalo, modiši ke yena a swanetšego go inama, a kuke kwana gomme a e tsenye ka bonolo tšhireletšegong ya sehuba sa gagwe. A seswantšho se se rategago gakaakang sa go ikemišetša ga Modiši wa rena yo Mogolo go re šireletša!

8. (a) Kholofetšo ya Modimo ya tšhireletšo e newa bomang, gomme e bontšhwa bjang go Diema 18:10? (b) Go hwetša botšhabelo leineng la Modimo go akaretša’ng?

⁸ Kholofetšo ya Modimo ya go re šireletša e ithekgile ka maemo—e hwetšwa feela ke bao ba batamelago kgaufsi le yena. Diema 18:10 e re: “’Ina la Morêna ké sebô se sethata; moloki ó thšabêla xôna a pholoxa.” Mehleng ya Beibele, dibo ka dinako tše dingwe di be di agwa lešokeng e le mafelo a šireletšegilego a botšhabelo. Eupša go be go ithekgile ka motho yo a lego kotsing gore a tšhabele sebong se se bjalo gore a hwetše tšhireletšo. Go bjalo le ka go hwetša botšhabelo leineng la Modimo. Se se akaretša se se fetago go fo bitša leina la Modimo leboelela; leina la Modimo ka bolona ga se pheko ya maleatlana. Go e na le moo, re swanetše go tseba le go bota Mong wa leina leo gomme re phele ka go dumelelana le ditekanyetšo tša gagwe tša go loka. Jehofa o bontšhitše botho gakaakang ka go re kgonthišetša gore ge e ba re retologela go yena ka tumelo, e tla ba sebo sa tšhireletšo go rena!

9. Jehofa o dirile bjang se se fetago go fo holofetša tšhireletšo?

⁹ Jehofa o dirile se se fetago go fo holofetša tšhireletšo. Mehleng  ya Beibele, o ile a bontšha ka ditsela tša mohlolo gore o kgona go šireletša batho ba gagwe. Mehleng ya histori ya Isiraele, “seatla” sa Jehofa se matla gantši se be se dula se hlapeditše manaba a matla. (Ekisodo 7:4) Lega go le bjalo, Jehofa o ile a ba a diriša matla a gagwe a šireletšago legatong la batho.

10, 11. Ke mehlala efe ya Beibele e bontšhago kamoo Jehofa a ilego a diriša matla a gagwe a šireletšago legatong la batho?

¹⁰ Nakong ya ge bafsa ba bararo ba ba-Hebere—Sadirake, Mesake le Abedinego—ba be ba gana go khunamela seswantšho sa gauta sa Kgoši Nebukadinetsara, kgoši e galefilego e ile ya ba tšhošetša ka gore e tla ba lahlela leubeng la mollo o fišago. Nebukadinetsara yo e bego e le mmuša-noši yo matla ka go fetišiša mo lefaseng, o ile a kwera ka gore: “Ke ofe modimo o tlog’o le phološa seatleng sa-ka”? (Daniele 3:15, PK) Masogana a mararo a be a botile matla a Modimo wa bona ka mo go feletšego gore a tla ba šireletša, eupša ba be ba sa nagane gore o tla dira bjalo. Ka gona, ba ile ba araba ka gore: “Xe xo ka dirwa ka mokxwa woo, xôna Modimo wa rena o na le matla a xo re pholosa.” (Daniele 3:17) Ka kgonthe, leuba leo la mollo o fišago, gaešita le ge le ile la kgohleletšwa gore le fiše ka makga a šupago go feta ka mo go tlwaelegilego, ga se la ka la hlohla Modimo wa bona yo matla ohle. O ile a ba šireletša, gomme kgoši e ile ya gapeletšega go dumela gore: “Xa xo modimo o mongwê o kxônaxo xo phološa, xe e se Yêna.”—Daniele 3:29.

¹¹ Le gona Jehofa o ile a nea pontšho ya kgonthe e lemogegago ya matla a gagwe a šireletšago ge a be a fetišetša bophelo bja Morwa wa gagwe yo a tswetšwego a nnoši popelong ya kgarebe ya mo-Juda e lego Maria. Morongwa o ile a botša Maria gore o be a tla ‘ima mmeleng wa gagwe, a tlo belega morwa.’ Morongwa o hlalositše gore: “Môya-mokxêthwa ó tlo theoxêla xo wene ’me matla a Yo-xodimo-dimo a tlo Xo okamêla wa moriti.” (Luka 1:31, 35) Go bonala Morwa wa Modimo a se a ka a ba boemong bjo bo mmeago kotsing ka tsela ye. Na sebe le go se phethagale ga mma wa motho di be di tla šilafatša lesea? Na Sathane o be a tla kgona go gobatša goba go bolaya Morwa yoo pele A ka belegwa? Ga go kgonege! Ge e le gabotse,  Jehofa o ile a aga lerako la tšhireletšo go dikologa Maria e le gore go se be le selo—e ka ba e le go se phethagale, matla a gobatšago, mmolai goba motemona le ge e le ofe—seo se ka senyago lesea leo le golago, go tloga nakong ya go ingwa go ya pele. Jehofa o ile a tšwela pele a šireleditše Jesu bofseng bja gagwe. (Mateo 2:1-15) Go fihlela nakong ya Modimo e beilwego, Morwa wa gagwe yo a rategago o be a sa hlaselege.

12. Ke ka baka la’ng Jehofa a ile a šireletša batho ba bangwe ka tsela ya mohlolo mehleng ya Beibele?

¹² Ke ka baka la’ng Jehofa a ile a šireletša batho ba itšego ka ditsela tše bjalo tša mohlolo? Mabakeng a mantši Jehofa o ile a šireletša batho e le gore a šireletše selo seo e lego sa bohlokwa bjo bogolo kudu: go phethagatšwa ga morero wa gagwe. Ka mohlala, go phologa ga lesea Jesu go be go le bohlokwa bakeng sa go phethagatšwa ga morero wa Modimo, moo go tlago go feleletša go hotše batho ka moka. Pego ya diponagatšo tše dintši tša matla a šireletšago ke karolo ya Mangwalo a buduletšwego, ao ‘a ngwaletšwego go re ruta, gore re hwetše kholofelo ka go tiišwa le ka go homotšwa ka ona mangwalo.’ (Ba-Roma 15:4) Ee, mehlala ye e tiiša tumelo ya rena go Modimo wa rena yo matla-ohle. Eupša ke tšhireletšo efe yeo re ka e letelago go Modimo lehono?

13. Na Jehofa o gapeletšega go dira mehlolo legatong la rena? Hlalosa.

¹³ Kholofetšo ya tšhireletšo ya Modimo ga e bolele gore Jehofa o gapeletšega go re direla mehlolo. Aowa, Modimo wa rena ga a re holofetše bophelo bjo bo se nago mathata tshepedišong ye ya kgale. Bahlanka ba bantši ba Jehofa ba botegago ba lebeletšane le ditlaišego tše šoro go akaretša bodiidi, ntwa, bolwetši le lehu. Jesu o ile a botša barutiwa ba gagwe ka go lebanya gore e le motho ka o tee ka o tee mo gongwe ba ka bolawa ka baka la tumelo ya bona. Ke ka baka leo Jesu a ilego a gatelela go nyakega ga go kgotlelela go fihla bofelong. (Mateo 24:9, 13) Ge nkabe Jehofa a be a ka diriša matla a gagwe bakeng sa go nea tlhakodišo ya mohlolo mabakeng ka moka, Sathane o be a tla ba le lebaka la go kwera Jehofa le go belaela go ba ga  kgonthe ga boineelo bja rena go Modimo wa rena.—Jobo 1:9, 10.

14. Ke mehlala efe e bontšhago gore Jehofa ga se ka mehla a šireletšago bahlanka ba gagwe ka moka ka tsela e swanago?

¹⁴ Gaešita le mehleng ya Beibele, Jehofa o be a sa diriše matla a gagwe a šireletšago bakeng sa go šireletša mohlanka yo mongwe le yo mongwe wa gagwe lehung leo le sa letelwago. Ka mohlala, moapostola Jakobo o ile a bolawa ke Herode mo e ka bago ka 44 C.E.; lega go le bjalo, ka moragonyana ga moo Petro o ile a ‘hlakodišwa letsogong la Herode.’ (Ditiro 12:1-11) Le gona, Johane, e lego ngwanabo Jakobo, o ile a phela nako e telele go feta Petro gotee le Jakobo. Go molaleng gore re ka se ke ra letela gore Modimo a šireletše bahlanka ba gagwe ka moka ka tsela e swanago. Ka ntle le moo, “nako le ditiragalo tše di sa letelwago” di re wela ka moka ga rena. (Mmoledi 9:11, NW) Ka gona, Jehofa o re šireletša bjang lehono?

15, 16. (a) Ke bohlatse bofe bjo bo lego gona bja gore Jehofa o neile tšhireletšo ya mmeleng bakeng sa barapedi ba gagwe e le sehlopha? (b) Ke ka baka la’ng re ka kgodišega gore Jehofa o tla šireletša bahlanka ba gagwe gona bjale le nakong ya ‘masetlapelo a magolo’?

¹⁵ Sa mathomo, nagana ka taba ya tšhireletšo ya mmeleng. Bjalo ka barapedi ba Jehofa, re ka letela tšhireletšo e bjalo re le sehlopha. Ge nkabe go se bjalo, re be re tla ba bahlaselwa ba bonolo ba Sathane. Nagana ka se: Sathane, “mmuši wa lefase lé,” ga go na seo a se nyakago ge e se go fediša borapedi bja therešo. (Johane 12:31; Kutollo 12:17) E mengwe ya mebušo e matla mo lefaseng e ile ya thibela modiro wa rena wa boboledi gomme ya leka go re fsielela ka mo go feletšego. Lega go le bjalo, batho ba Jehofa ba ile ba dula ba tiile gomme ba ile ba tšwela pele go dira boboledi ba sa kgaotše! Ke ka baka la’ng ditšhaba tše matla di paletšwe ke go thibela modiro wa sehlopha se se senyenyane sa Bakriste le seo se bonagalago se sa kgone go itšhireletša? Ka gobane Jehofa o re šireleditše ka diphego tša gagwe tše matla!—Psalme 17:7, 8.

¹⁶ Go thwe’ng ka tšhireletšo ya mmeleng nakong ya ‘masetlapelo a magolo’ ao a tlago? Ga se ra swanela go boifa go  phethagatšwa ga dikahlolo tša Modimo. Go feta moo, “Modimo, ba ba mmoifaxo ó ba hlakodiša melekong; bakxôpô ó ba bolokêla kôtlô ya ’tšatši la kahlolô.” (Kutollo 7:14; 2 Petro 2:9) Go sa le bjalo, re ka dula re kgodišegile ka dilo tše pedi. Sa pele, Jehofa le ka mohla a ka se ke a dumelela gore bahlanka ba gagwe ba botegago ka go se kwanantšhe ba fsielelwe sa ruri lefaseng. Sa bobedi, o tla putsa babotegi ka bophelo bjo bo sa felego lefaseng la gagwe la go loka—ge e ba go nyakega ka tsogo. Bakeng sa bao ba hwago, ga go na lefelo le le šireletšegilego leo motho a ka bago go lona go feta go ba kgopolong ya Modimo.—Johane 5:28, 29.

17. Jehofa o re šireletša bjang ka Lentšu la gagwe?

¹⁷ Gaešita le gona bjale, Jehofa o re šireletša ka “lentšu” la gagwe le le phelago, leo le nago le matla a tutuetšago a go fodiša dipelo le go fetoša maphelo. (Ba-Hebere 4:12) Ka go diriša melao ya motheo ya lona, mabakeng a mangwe re ka šireletšwa gore re se gobatšwe mmeleng. Jesaya 48:17 e re: “Nna Morêna . . . ke Xo ruta tše di Xo holaxo.” Ka ntle le pelaelo, go phela ka go dumelelana le Lentšu la Modimo go ka kaonefatša bophelo bja rena bjo bobotse bja mmeleng le go telefatša bophelo bja rena. Ka mohlala, ka ge re diriša keletšo ya Beibele ya go ila bootswa le go itlhwekiša ditšhileng, re phema mekgwa e sa hlwekago le mekgwa e gobatšago yeo e bakelago batho ba bantši bao ba sa boifego Modimo tlhakahlakano maphelong a bona. (Ditiro 15:29; 2 Ba-Korinthe 7:1) Re leboga gakaakang tšhireletšo ya Lentšu la Modimo!

18. Ke tšhireletšo efe ya moya yeo Jehofa a re neago yona?

¹⁸ Sa bohlokwa kudu, Jehofa o nea tšhireletšo ya moya. Modimo wa rena yo lerato o re šireletša gore re se gobatšwe moyeng ka go re hlama ka seo re se nyakago bakeng sa gore re kgotlelele diteko le go šireletša tswalano ya rena le yena. Ka go rialo Jehofa o šomela go šireletša bophelo bja rena, e sego feela nywaga e sego kae e mekopana, eupša ka mo go sa felego. Ela hloko tše dingwe tša ditokišetšo tša Modimo tšeo di ka re šireletšago moyeng.

19. Moya wa Jehofa o ka re thuša bjang go lebeletšana le teko le ge e le efe yeo re ka bago re lebane le yona?

 ¹⁹ Jehofa ke “Mokwi wa dithapêlô.” (Psalme 65:2) Ge dikgateletšo tša bophelo di bonala e le tšeo di nolago moko, go mo tšhollela pelo ya rena go ka re tlišetša kimologo e kgolo. (Ba-Filipi 4:6, 7) A ka no se tloše diteko tša rena ka tsela ya mohlolo, eupša a ka re nea bohlale bja go swaragana le tšona e le ge a arabela dithapelo tša rena tšeo di tšwago pelong. (Jakobo 1:5, 6) Go feta moo, Jehofa o nea moya o mokgethwa go bao ba mo kgopelago. (Luka 11:13) Moya woo o matla o ka re thuša gore re lebeletšane le teko le ge e le efe goba bothata bjoo re ka bago re lebane le bjona. O ka re tlatša ka “matla ao a fetišago a tlhago” gore re kgotlelele go fihlela Jehofa a tloša mathata ka moka a bohloko lefaseng le lefsa leo le lego kgaufsi kudu.—2 Ba-Korinthe 4:7, NW.

20. Matla a Jehofa a šireletšago a ka bonagatšwa bjang ka barapedi-gotee le rena?

²⁰ Ka dinako tše dingwe, matla a Jehofa a šireletšago a ka bonagatšwa ka barapedi-gotee le rena. Jehofa o gogetše batho ba gagwe ‘mokgatlong wa barwarre’ wa lefase ka bophara. (1 Petro 2:17, bapiša le NW; Johane 6:44.) Boruthong bja borwarre bjoo re bona bohlatse bjo bo phelago bja matla a moya wa Modimo o mokgethwa o tutueletšago batho go dira se sebotse. Moya woo  o tšweletša ka go rena dienywa—dika tše di botse tše di rategago tšeo di akaretšago lerato, botho le go loka. (Ba-Galatia 5:22, 23) Ka gona, ge re le tlalelong gomme modumedi-gotee le rena a tutueletšega go nea keletšo e holago goba go abelana le rena mantšu ao a nyakegago kudu a kgothatšo, re ka leboga Jehofa bakeng sa dipontšho tše bjalo tša tlhokomelo ya gagwe e šireletšago.

21. (a) Ke dijo dife tša moya tše di lego nakong tšeo Jehofa a di neago ka “molaki e a bôtêxaxo yo bohlale”? (b) O hotšwe bjang ka noši ke ditokišetšo tšeo Jehofa a di dirago bakeng sa go re šireletša moyeng?

²¹ Jehofa o nea selo se sengwe gape bakeng sa go re šireletša: dijo tša moya tše di lego nakong. Bakeng sa go re thuša gore re hwetše matla Lentšung la gagwe, Jehofa o laetše “molaki e a bôtêxaxo yo bohlale” gore a abe dijo tša moya. Sehlopha seo sa molaki yo bohlale se diriša dipuku tše di gatišitšwego tšeo di akaretšago dimakasine tša Morokami le Phafoga! gotee le diboka, dikopano tše di nyenyane le tše dikgolo bakeng sa go re nea “dijô ka lebaka la xôna”—tšeo re di nyakago le ka nako yeo re di nyakago ka yona. (Mateo 24:45) Na o kile wa kwa selo se itšego sebokeng sa Bokriste—tlhalosong, polelong goba gaešita le thapelong—seo se ilego sa nea matla ao a bego a nyakega le kgothatšo? Na bophelo bja gago bo kile bja kgongwa ke sehlogo se itšego seo se gatišitšwego ka go o mongwe wa dimakasine tša rena? Gopola gore Jehofa o dira ditokišetšo tšeo ka moka bakeng sa go re šireletša moyeng.

22. Ke ka tsela efe Jehofa ka mehla a dirišago matla a gagwe, gomme ke ka baka la’ng go dira ga gagwe bjalo go re hola?

²² Ka kgonthe Jehofa ke kotse “ya bohle ba ba mmotilexo.” (Psalme 18:30) Re kwešiša gore ga a diriše matla a gagwe go re šireletša dikotsing ka moka gona bjale. Lega go le bjalo, ka mehla o diriša matla a gagwe a šireletšago go kgonthišetša gore morero wa gagwe o a phethagala. Mafelelong, go dira ga gagwe bjalo go hola batho ba gagwe. Ge e ba re mmatamela gomme re dula re le leratong la gagwe, Jehofa o tla re nea bophelo bjo bo phethagetšego bja ka mo go sa felego. Re dutše re nagana ka tebelelo yeo, ka kgonthe re ka lebelela tlaišego le ge e le efe tshepedišong ye e le ya ‘lebakanyana le e bohwefo.’—2 Ba-Korinthe 4:17, bapiša le PK.