1, 2. Den ki peliger e israelitanan a haña nan ora nan a drenta e region di Sínai na aña 1513 promé ku nos era, i kon Yehova a trankilisá nan?

ORA e israelitanan a drenta e region di Sínai na kuminsamentu di aña 1513 promé ku nos era, nan a haña nan den un situashon di peliger. Nan mester a kuminsá un biahe difísil dor di un “desierto grandi i teribel, ku su kolebranan venenoso i skòrpionnan.” (Deuteronomio 8:15) Tambe nan a enfrentá e menasa di wòrdu ataká pa nashonnan enemigu. Ta Yehova a trese su pueblo den e situashon aki. Komo nan Dios, lo e por a protehá nan?

² Yehova a trankilisá nan hopi ku e siguiente palabranan: “Boso mes a mira kiko mi a hasi ku e egipsionan, i kon mi a karga boso riba ala di águila hiba boso serka mi.” (Eksodo 19:4) Yehova a rekordá su pueblo ku el a libra nan for di e egipsionan, usando águila, na moda di papia, pa hiba nan na un lugá sigur. Pero tin mas motibu pakiko “ala di águila” ta un bon ilustrashon di protekshon divino.

3. Pakiko “ala di águila” ta un bon ilustrashon di protekshon divino?

³ No ta pa zueif na haltu so un águila ta usa su alanan fuerte i grandi. Ora ta hasi kalor den dia, e águila mama ta span su alanan—ku por yega te dos meter—i forma un kapa pa protehá su yunan tierno for di e higra di solo. Otro ora e ta protehá su yunan ku su alanan kontra bientu friu. Meskos ku un águila ta protehá su krionan, asina Yehova a protehá e nashon hóben di Israel. Awor ku su pueblo tabata den desierto, nan lo a sigui haña refugio den e sombra di su alanan poderoso tanten ku nan a keda fiel na dje.  (Deuteronomio 32:9-11; Salmo 36:7) Pero nos tin motibu pa ferwagt ku Dios lo protehá nos awe?

4, 5. Pakiko nos por tin pleno konfiansa den e promesa di Dios pa duna protekshon?

⁴ Yehova sigur ta kapas pa protehá su sirbidónan. E ta “Dios Todopoderoso,” un título ku ta indiká ku e ta poseé un poder iresistibel. (Génesis 17:1) Meskos ku un koriente di awa imparabel, no tin nada ku por para den kaminda di Yehova su poder den akshon. En bista ku e ta kapas pa hasi tur loke ta su boluntat, nos por puntra nos mes: ‘Yehova tin e boluntat di usa su poder pa protehá su pueblo?’

⁵ Den un solo palabra, e kontesta ta sí! Yehova ta sigurá nos ku lo e protehá su pueblo. Salmo 46:1 ta bisa: “Dios ta nos refugio i fortalesa, un pronto ousilio den tempu di angustia.” Ya ku Dios “no por gaña,” nos por tin pleno konfiansa den su promesa di protehá nos. (Tito 1:2) Laga nos analisá algun di e ilustrashonnan bibu ku Yehova ta usa pa deskribí e kuido i protekshon ku e ta duna.

6, 7. (a) Kon e wardadó di karné den tempu bíbliko tabata protehá su karnénan? (b) Kon Beibel ta ilustrá Yehova su deseo sinsero pa protehá i kuida su karnénan?

⁶ Yehova ta un Wardadó, i “nos ta su pueblo, . . . e karnénan ku e ta pastoriá.” (Salmo 23:1; 100:3) Karné di kas ta un dje animalnan di mas indefenso. E wardadó di karné den tempu bíbliko mester tabatin kurashi pa protehá su karnénan kontra leon, lobo i oso, i tambe kontra ladron. (1 Samuel 17:34, 35; Juan 10:12, 13) Pero tabatin bes ku e trabou di protehá karné a eksigí hopi ternura. Por ehèmpel, ora un karné a wèrp leu for di e tou, e bon wardadó tabata keda ku e mama durante e momentunan difísil ei i despues tabata kohe e lamchi indefenso i karg’é hiba n’e tou.

 ⁷ Dor di kompará su mes ku un wardadó di karné, Yehova ta garantisá nos di su deseo sinsero pa protehá nos. (Ezekiel 34:11-16) Kòrda e deskripshon di Yehova na Isaias 40:11, ku nos a konsiderá den Kapítulo 2 di e buki aki: “Manera un wardadó di karné e lo kuida su tou, e lo kohe e lamchinan den su brasa, i tene nan serka di su kurason.” Kon e lamchi chikitu ta hasi yega na haltura di e “kurason” òf pechu di e wardadó di karné? Tal bes e lamchi ta aserká e wardadó di karné i asta mishi ku su pia. Sin embargo, ta e wardadó di karné tin ku sak abou, kohe e lamchi i pon’é suavemente na haltura di su kurason. Ki un deskripshon tierno di e deseo di nos Gran Wardadó pa protehá nos!

8. (a) Na ken Dios ta primintí su protekshon, i kon Proverbionan 18:10 ta indiká esaki? (b) Kiko ta nifiká haña refugio den e nòmber di Dios?

⁸ Dios ta primintí protekshon únikamente na esnan ku ta hala serka dje. Proverbionan 18:10 ta deklará: “E nòmber di SEÑOR ta un toren fuerte; e hustu ta kore drenta den dje i ta sigur.” Den tempu bíbliko, hende tabata traha toren den desierto komo lugá di refugio. Pero ta esun ku tabata den peliger mester a hui bai na un toren asina i buska kaminda di skonde. Meskos ta konta tambe si nos kier haña refugio den e nòmber di Dios. Djis ripití e nòmber di Dios so no ta basta; e nòmber divino mes no tin niun poder mágiko. Mas bien, nos tin ku konosé i konfia Esun ku ta karga e nòmber ei i biba na armonia ku su normanan hustu. Ki un bondat di parti di Yehova pa sigurá nos ku si nos akudí na dje den fe, lo e ta un toren di protekshon pa nos!

9. Ademas di primintí protekshon, kiko Yehova a demostrá?

⁹ Yehova a hasi mas ku djis primintí protekshon. Den tempu bíbliko, el a demostrá den maneranan milagroso ku e ta kapas pa protehá su pueblo. Durante e historia di Israel, na  vários okashon Yehova su “man” fuerte a kontené enemigunan poderoso. (Eksodo 7:4) Pero tambe Yehova a usa su poder pa protehá na fabor di sierto personanan individual.

10, 11. Ki ehèmpelnan di Beibel ta mustra kon Yehova a usa su poder pa protehá na fabor di sierto personanan individual?

¹⁰ Ora e tres hóbennan hebreo—Sadrak, Mesak i Abed-nego—a nenga di bùig p’e imágen di oro di Rei Nabukodonosor, e rei furioso a menasá di tira nan den un fòrnu kayente-kayente. Nabukodonosor, e monarka mas poderoso riba tera, a reta nan bisando: “Ki dios tin ku por libra boso for di mi man?” (Daniel 3:15) E tres hóbennan tabatin pleno konfiansa den e poder di nan Dios pa protehá nan, pero nan no a asumí sin mas ku lo el a hasi esei. P’esei nan a kontestá: “Ma si ta asina, nos Dios, kende nos ta sirbi, por libra nos.” (Daniel 3:17) En bèrdat, ounke nan a hasi e fòrnu ei shete bes mas kayente ku normal, esei no tabata niun problema pa nan Dios todopoderoso. El a protehá nan, i e rei no por a hasi nada otro sino rekonosé ku “no tin otro dios ku por libra di e manera aki.”—Daniel 3:29.

¹¹ Tambe Yehova a duna un demostrashon berdaderamente ekstraordinario di su poder pa protehá ora el a transferí e bida di su Yu unigénito den e matris di e bírgen hudiu Maria. Un angel a bisa Maria ku lo e “konsebí den [su] matris i duna lus na un yu hòmber.” E angel a splika: “Spiritu santu lo bin riba bo, i e poder di e Haltísimo lo sombra bo.” (Lukas 1:31, 35) Aparentemente, nunka e Yu di Dios a yega di haña su mes den un situashon asina vulnerabel. E piká i imperfekshon di e mama humano lo a kontaminá e èmbrio? Satanas lo a logra hasi e Yu daño òf asta mat’é promé ku E nase? Di ningun manera! Yehova a forma manera un muraya di protekshon rònt di Maria di manera ku nada—ni imperfekshon, ni forsa dañino, ni asesino humano, ni niun demoño—lo por a kousa daño n’e èmbrio, for di momentu di konsepshon en adelante. Yehova a sigui  protehá Hesus durante su hubentut. (Mateo 2:1-15) Te n’e momentu fihá pa Dios, niun hende no por a hasi su Yu stimá nada.

12. Pakiko Yehova a protehá sierto personanan milagrosamente den tempu bíbliko?

¹² Pakiko Yehova a protehá sierto personanan den un manera asina milagroso? Den hopi kaso esei tabata pa Yehova protehá algu muchu mas importante: e realisashon di su propósito. Por ehèmpel, e sobrebibensia di e kriatura Hesus tabata esensial p’e propósito di Dios kumpli, lokual finalmente lo bin benefisiá henter humanidat. E relatonan di e hopi manifestashonnan di poder pa protehá ta forma parti di e Skritura inspirá, ku “a wòrdu skirbí pa nos instrukshon, pa dor di perseveransia i e enkurashamentu di Skrituranan nos por tin speransa.” (Romanonan 15:4) Sí, e ehèmpelnan aki ta fortalesé nos fe den nos Dios todopoderoso. Pero ki protekshon nos por ferwagt di Dios awe?

13. Yehova ta obligá pa hasi milager na nos fabor? Splika.

¹³ E promesa di protekshon divino no ta nifiká ku Yehova ta obligá pa hasi milager na nos fabor. Nò, nos Dios no ta garantisá nos un bida liber di problema den e mundu bieu aki. Hopi fiel sirbidó di Yehova ta haña nan ku difikultatnan serio, manera pobresa, guera, enfermedat i morto. Hesus a bisa su disipelnan frankamente ku algun di nan lo por wòrdu matá pa motibu di nan fe. P’esei mes Hesus a enfatisá e nesesidat di perseverá te na fin. (Mateo 24:9, 13) Si den kada kaso ku presentá Yehova usa su poder pa reskatá hende milagrosamente, esei lo por duna Satanas motibu pa reta Yehova i kuestioná e sinseridat di nos deboshon na Dios.—Jòb 1:9, 10.

14. Ki ehèmpelnan ta mustra ku no ta semper Yehova ta protehá tur su sirbidónan n’e mesun manera?

¹⁴ Ni den tempu bíbliko Yehova no a usa su poder pa protehá  kada un di su sirbidónan di un morto prematuro. Por ehèmpel, rònt di aña 44 di nos era Herodes a ehekutá apòstel Santiago; tòg, no muchu tempu despues, Pedro a ser ‘reskatá for di man di Herodes.’ (Echonan 12:1-11) Di otro banda, Juan, ruman di Santiago, a biba mas largu ku tantu Pedro komo Santiago. Ta bon kla anto ku nos no por ferwagt ku Dios ta bai protehá tur su sirbidónan n’e mesun manera. Ademas “tempu i suerte [“suseso imprevisto,” NW]” ta bini riba nos tur. (Eklesiastés 9:11) Kon anto Yehova ta protehá nos awe?

15, 16. (a) Ki evidensia tin ku Yehova a protehá su adoradónan físikamente komo grupo? (b) Pakiko nos por tin e konfiansa ku Yehova lo protehá su sirbidónan awor i durante “e gran tribulashon”?

¹⁵ Analisá na promé lugá e asuntu di protekshon físiko. Komo adoradó di Yehova, nos por spera e protekshon ei komo grupo. Si no tabata asina, nos lo a bira un proi fásil pa Satanas. Pensa riba e punto aki: Satanas, “e prens di e mundu aki,” lo tin masha gana di eliminá adorashon berdadero. (Juan 12:31; Revelashon 12:17) Algun di e gobièrnunan mas poderoso riba tera a prohibí nos trabou di prediká i a purba eliminá nos kompletamente. Sin embargo, e pueblo di Yehova a keda firme i a sigui prediká ku e mesun intensidat! Pakiko nashonnan poderoso no por a pone un paro n’e aktividat di e grupo di kristiannan relativamente chikitu i aparentemente indefenso aki? Esei ta pasobra Yehova a protehá nos bou di su alanan poderoso!—Salmo 17:7, 8.

¹⁶ Kiko di protekshon físiko durante e binidero “gran tribulashon”? Nos no tin nodi tene miedu di e sentensianan di Dios. Al fin i al kabo, “Señor sa tambe kon pa reskatá e santunan for di tentashon, i kon pa tene e inhustunan bou di kastigu pa e dia di huisio.” (Revelashon 7:14; 2 Pedro 2:9) Miéntras tantu, semper nos por ta sigur di dos kos.  Di promé, hamas Yehova lo permití pa su sirbidónan leal wòrdu eksterminá for di riba tera. Di dos, lo e rekompensá personanan ku ta íntegro na dje, dunando nan bida eterno den su hustu mundu nobo—si ta nesesario, pa medio di un resurekshon. Esnan ku muri no por ta den un lugá mas sigur ku e memoria di Dios.—Juan 5:28, 29.

17. Kon Yehova ta protehá nos pa medio di su Palabra?

¹⁷ Awor aki mes, Yehova ta protehá nos mediante su “palabra” bibu, ku tin e forsa motivador pa sana kurason i kambia bida di hende. (Hebreonan 4:12) Dor di apliká su prinsipionan, den algun sentido nos por haña protekshon for di daño físiko. Isaias 48:17 ta bisa: “SEÑOR . . . ta siña bo, pa bo prosperá.” Sin duda, biba na armonia ku e Palabra di Dios por mehorá nos salú i alargá nos bida. Por ehèmpel, dor ku nos ta apliká konseho di Beibel pa apstené di fornikashon i purifiká nos mes di kontaminashon, nos ta evitá práktikanan impuru i kustumbernan perhudisial ku ta trese problema grandi den bida di hopi hende malbado. (Echonan 15:29; 2 Korintionan 7:1) Nos ta hopi gradisidu p’e protekshon ku e Palabra di Dios ta duna nos!

18. Kon Yehova ta protehá nos spiritualmente?

¹⁸ Mas importante ainda, Yehova ta duna nos protekshon spiritual. Nos Dios amoroso ta protehá nos for di daño spiritual dor di duna nos tur loke nos tin mester pa por soportá prueba i salbaguardiá nos relashon kuné. Den e manera ei Yehova ta aktua pa konserbá nos bida, no djis pa un par di aña kòrtiku sino pa eternidat. Laga nos analisá algun di e kosnan ku Dios a perkurá ku por protehá nos spiritualmente.

19. Kon e spiritu di Yehova por yuda nos enfrentá kualkier prueba ku nos por haña nos kuné?

¹⁹ Yehova ta e ‘Skuchadó di orashon.’ (Salmo 65:2) Ora e  preshonnan di bida ta parse di aplastá nos, nos por haña un gran alivio si nos deshogá nos kurason serka dje. (Filipensenan 4:6, 7) Tal bes e no ta bai kita nos pruebanan milagrosamente, pero sí e ta kontestá nos orashonnan sinsero dor di duna nos e sabiduria pa trata ku nan. (Santiago 1:5, 6) Mas ku esei, Yehova ta duna spiritu santu na esnan ku ta pidié. (Lukas 11:13) E spiritu poderoso ei por yuda nos enfrentá kualkier prueba òf difikultat ku nos por haña nos kuné. E por duna nos “e poder mas ayá di loke ta normal” pa perseverá te ora Yehova kaba ku tur problema doloroso den e mundu nobo ku lo bini pronto.—2 Korintionan 4:7, NW.

20. Kon Yehova por ekspresá su poder pa protehá pa medio di nos rumannan?

²⁰ Tin biaha Yehova ta usa su poder di protekshon na nos fabor pa medio di nos kompañeronan di fe. El a uni su pueblo den un asosiashon mundial di “rumannan.” (1 Pedro 2:17; Juan 6:44) E kalor di e hermandat ei ta un testimonio bibu di e influensia sano ku e poder di Dios su spiritu por kousa den bida di hende. E spiritu ei ta produsí su fruta den nos—kualidatnan bunita i presioso manera amor, kariño i  bondat. (Galationan 5:22, 23) P’esei, ora nos ta den un angustia i un ruman ta sinti su mes impulsá pa duna nos bon konseho òf palabranan di animashon ku nos tin asina tantu mester di dje, nos por gradisí Yehova p’e ekspreshonnan ei di su kuido i protekshon.

21. (a) Ki alimento spiritual oportuno Yehova ta perkurá pa medio di “e esklabo fiel i prudente”? (b) Kon abo personalmente a benefisiá for di loke Yehova ta perkurá pa nos protekshon spiritual?

²¹ Yehova ta duna nos algu mas pa nos protekshon: alimento spiritual n’e tempu oportuno. Pa yuda nos haña forsa for di su Palabra, Yehova a nombra “e esklabo fiel i prudente” pa perkurá alimento spiritual. E esklabo fiel ei ta usa publikashonnan manera e revistanan Toren di Vigilansia i Spièrta!, i tambe reunionnan, asambleanan i kongresonan pa duna nos “kuminda na su debido tempu”—loke nos mester, i n’e ora ku nos tin mester di dje. (Mateo 24:45) Bo a yega di tende algu na un reunion kristian—den un komentario, den un diskurso òf asta den un orashon—ku a duna bo nèt e forsa i animashon ku bo tabatin mester? Bo a yega di sinti ku un artíkulo en partikular den un di nos revistanan a toka bo? Kòrda, Yehova ta perkurá tur e medionan ei pa nos protekshon spiritual.

22. Den ki manera Yehova ta usa su poder semper, i pakiko esei ta benefisiá nos?

²² Yehova sigur ta un eskudo “pa tur esnan ku ta tuma refugio den dje.” (Salmo 18:30) Nos ta komprondé ku e no ta usa su poder pa protehá nos for di tur kalamidat aktual. Pero loke sí e ta hasi semper ta usa su poder di protehá pa garantisá e realisashon di su propósito. A lo largu, esei lo benefisiá su pueblo. Si nos hala serka dje i keda den su amor, Yehova lo duna nos bida perfekto pa eternidat. Ku e perspektiva ei, en bèrdat nos por mira kualkier sufrimentu den e mundu aki komo ‘leve i pa un momentu so.’—2 Korintionan 4:17.