1, 2. Den ki peliger e Israelitanan a haya nan ora nan a drenta e region di Sinai na aña 1513 prome cu nos era, y con Yehova a trankilisa nan?

ORA e Israelitanan a drenta e region di Sinai na cuminsamento di aña 1513 prome cu nos era, nan a haya nan den un situacion di peliger. Nan mester a cuminsa un biahe dificil door di un “desierto grandi y teribel, cu su colebranan venenoso y scorpionnan.” (Deuteronomio 8:15) Tambe nan a enfrenta e menasa di wordo ataca pa nacionnan enemigo. Ta Yehova a trece su pueblo den e situacion aki. Como nan Dios, lo e por a proteha nan?

² Yehova a trankilisa nan hopi cu e siguiente palabranan: “Boso mes a mira kico mi a haci cu e Egipcionan, y con mi a carga boso riba hala di aguila hiba boso serca mi.” (Exodo 19:4) Yehova a recorda su pueblo cu el a libra nan for di e Egipcionan, uzando aguila, na moda di papia, pa hiba nan na un luga sigur. Pero tin mas motibo pakico “hala di aguila” ta un bon ilustracion di proteccion dibino.

3. Pakico “hala di aguila” ta un bon ilustracion di proteccion dibino?

³ No ta pa zweef na halto so un aguila ta uza su halanan fuerte y grandi. Ora ta haci calor den dia, e aguila mama ta habri su halanan—cu por yega te dos meter—y forma un capa pa proteha su puitonan for di e solo cayente. Otro ora e ta proteha su yiunan cu su halanan contra biento friu. Mescos cu un aguila ta proteha su crionan, asina Yehova a proteha e nacion hoben di Israel. Awor cu su pueblo tawata den desierto, nan lo a sigui haya refugio den e sombra di su halanan poderoso tanten cu nan a keda fiel na dje.  (Deuteronomio 32:9-11; Salmo 36:7) Pero nos tin motibo pa spera cu Dios lo proteha nos awe?

4, 5. Pakico nos por tin pleno confiansa den e promesa di Dios pa duna proteccion?

⁴ Yehova sigur ta capas pa proteha su sirbidonan. E ta “Dios Todopoderoso”, un titulo cu ta indica cu e ta posee un poder iresistibel. (Genesis 17:1) Mescos cu un coriente di awa imparabel, no tin nada cu por para den caminda di Yehova su poder den accion. En bista cu e ta capas pa haci tur loke ta su boluntad, nos por puntra nos mes: ‘Yehova tin e boluntad di uza su poder pa proteha su pueblo?’

⁵ Den un solo palabra, e contesta ta si! Yehova ta sigura nos cu lo e proteha su pueblo. Salmo 46:1 ta bisa: “Dios ta nos refugio y fortalesa, un pronto ausilio den tempo di angustia.” Ya cu Dios “no por gaña”, nos por tin pleno confiansa den su promesa di proteha nos. (Tito 1:2) Laga nos analisa algun di e ilustracionnan bibo cu Yehova ta uza pa describi e cuido y proteccion cu e ta duna.

6, 7. (a) Con e wardado di carne den tempo biblico tawata proteha su carnenan? (b) Con Bijbel ta ilustra Yehova su deseo sinsero pa proteha y cuida su carnenan?

⁶ Yehova ta un Wardador, y “nos ta su pueblo, . . . e carnenan cu e ta pastorea.” (Salmo 23:1; 100:3) Carne di cas ta un di e animalnan di mas indefenso. E wardado di carne den tempo biblico mester tawatin curashi pa proteha su carnenan contra leon, lobo y oso, y tambe contra ladron. (1 Samuel 17:34, 35; Huan 10:12, 13) Pero tawatin bes cu e trabou di proteha carne a exigi hopi ternura. Por ehempel, ora un carne a werp leu for di e tou, e bon wardado tawata keda cu e mama durante e momentonan dificil ei y despues tawata cohe e lamchi indefenso y carg’e hiba na e tou.

 ⁷ Door di compara su mes cu un wardado di carne, Yehova ta garantisa nos di su deseo sinsero pa proteha nos. (Ezekiel 34:11-16) Corda e descripcion di Yehova na Isaias 40:11, cu nos a considera den Capitulo 2 di e buki aki: “Manera un wardado di carne e lo cuida su tou, e lo cohe e lamchinan den su brasa, y tene nan serca di su curason.” Con e lamchi chikito ta haci yega na haltura di e “curason” of pecho di e wardado di carne? Talbes e lamchi ta acerca e wardado di carne y asta mishi cu su pia. Sinembargo, ta e wardado di carne tin cu sak abou, coi e lamchi y pon’e suavemente na haltura di su curason. Ki un descripcion tierno di e deseo di nos Gran Wardador pa proteha nos!

8. (a) Na ken Dios ta priminti su proteccion, y con Proverbionan 18:10 ta indica esaki? (b) Kico ta nifica haya refugio den e nomber di Dios?

⁸ Dios ta priminti proteccion unicamente na esnan cu ta hala serca dje. Proverbionan 18:10 ta declara: “E nomber di SEÑOR ta un toren fuerte; e husto ta core drenta den dje y ta sigur.” Den tempo biblico, hende tawata traha toren den desierto como luga di refugio. Pero ta esun cu tawata den peliger mester a hui bai na un toren asina y busca caminda di sconde. Mescos ta conta tambe si nos kier haya refugio den e nomber di Dios. Djis ripiti e nomber di Dios so no ta basta; e nomber dibino mes no tin ningun poder magico. Mas bien, nos tin cu conoce y confia Esun cu ta carga e nomber ei y biba na harmonia cu su normanan husto. Ki un bondad di parti di Yehova pa sigura nos cu si nos acudi na dje den fe, lo e ta un toren di proteccion pa nos!

9. Ademas di priminti proteccion, kico Yehova a demostra?

⁹ Yehova a haci mas cu djis priminti proteccion. Den tempo biblico, el a demostra den maneranan milagroso cu e ta capas pa proteha su pueblo. Durante e historia di Israel, na  varios ocasion Yehova su “man” fuerte a contene enemigonan poderoso. (Exodo 7:4) Pero tambe Yehova a uza su poder pa proteha na fabor di cierto personanan individual.

10, 11. Ki ehempelnan di Bijbel ta mustra con Yehova a uza su poder pa proteha na fabor di cierto personanan individual?

¹⁰ Ora e tres hobennan Hebreo—Sadrak, Mesak y Abednego—a nenga di buig pa e imagen di oro di Rei Nabucodonosor, e Rei furioso a menasa di tira nan den un forno cayente cayente. Nabucodonosor, e monarca mas poderoso riba tera, a reta nan bisando: “Ki dios tin cu por libra boso for di mi man?” (Daniel 3:15) E tres hobennan tawatin pleno confiansa den e poder di nan Dios pa proteha nan, pero nan no a asumi cu automaticamente e lo a haci esei. Pesei nan a contesta: “Ma si ta asina, nos Dios, kende nos ta sirbi, por libra nos.” (Daniel 3:17) En berdad, aunke nan a haci e forno ei shete bes mas cayente cu normal, esei no tawata ningun problema pa nan Dios todopoderoso. El a proteha nan, y e Rei no por a haci nada otro sino reconoce cu “no tin otro dios cu por libra di e manera aki.”—Daniel 3:29.

¹¹ Tambe Yehova a duna un demostracion berdaderamente extraordinario di su poder pa proteha ora el a transferi e bida di su Yiu unigenito den e matris di e birgen Hudiu Maria. Un angel a bisa Maria cu lo e “consebi den [su] matris y duna lus na un yiu homber.” E angel a splica: “Spirito santo lo bini riba bo, y e poder di e Haltisimo lo sombra bo.” (Lucas 1:31, 35) Aparentemente, nunca e Yiu di Dios a yega di haya su mes den un situacion asina vulnerable. E pica y imperfeccion di e mama humano lo a contamina e embryo? Satanas lo a logra haci e Yiu daño of asta mat’e prome cu E nace? Di ningun manera! Yehova a forma manera un muraya di proteccion rond di Maria di manera cu nada—ni imperfeccion, ni forsa dañino, ni asesino humano, ni ningun demoño—lo por a causa daño na e embryo, for di momento di concepcion en adelante. Yehova a sigui  proteha Hesus durante su hubentud. (Mateo 2:1-15) Te na e momento fiha pa Dios, ningun hende no por a haci su Yiu stima nada.

12. Pakico Yehova a proteha cierto personanan milagrosamente den tempo biblico?

¹² Pakico Yehova a proteha cierto personanan den un manera asina milagroso? Den hopi caso esei tawata pa Yehova proteha algo mucho mas importante: e realisacion di su proposito. Por ehempel, e sobrevivencia di e criatura Hesus tawata esencial pa e proposito di Dios cumpli, locual finalmente lo bin beneficia henter humanidad. E relatonan di e tantisimo manifestacionnan di poder pa proteha ta forma parti di e Scritura inspira, cu “a wordo skirbi pa nos instruccion, pa door di perseverancia y e encurashamento di Scrituranan nos por tin speransa.” (Romanonan 15:4) Si, e ehempelnan aki ta fortalece nos fe den nos Dios todopoderoso. Pero ki proteccion nos por spera di Dios awe?

13. Yehova ta obliga pa haci milager na nos fabor? Splica.

¹³ E promesa di proteccion dibino no ta nifica cu Yehova ta obliga pa haci milager na nos fabor. No, nos Dios no ta garantisa nos un bida liber di problema den e mundo bieu aki. Hopi fiel sirbido di Yehova ta haya nan cu dificultadnan serio, manera pobresa, guera, enfermedad y morto. Hesus a bisa su disipelnan francamente cu algun di nan lo por wordo mata pa motibo di nan fe. Pesei mes Hesus a enfatisa e necesidad di persevera te na fin. (Mateo 24:9, 13) Si den cada caso cu presenta Yehova uza su poder pa rescata hende milagrosamente, esei lo por duna Satanas motibo pa reta Yehova y cuestiona e sinseridad di nos debocion na Dios.—Job 1:9, 10.

14. Ki ehempelnan ta mustra cu no ta semper Yehova ta proteha tur su sirbidonan na e mesun manera?

¹⁴ Ni den tempo biblico Yehova no a uza su poder pa  proteha cada un di su sirbidonan di un morto prematuro. Por ehempel, rond di aña 44 di nos era Herodes a ehecuta apostel Santiago; toch, no mucho tempo despues, Pedro a ser ‘rescata for di man di Herodes.’ (Echonan 12:1-11) Di otro banda, Huan, ruman di Santiago, a biba mas largo cu tanto Pedro como Santiago. Ta bisto anto cu nos no por spera cu Dios ta bai proteha tur su sirbidonan na e mesun manera. Ademas “tempo y suerte [“suseso imprevisto”, NW]” ta bini riba nos tur. (Eclesiastes 9:11) Con anto Yehova ta proteha nos awe?

15, 16. (a) Ki evidencia tin cu Yehova a proteha su adoradonan fisicamente como grupo? (b) Pakico nos por tin e confiansa cu Yehova lo proteha su sirbidonan awor y durante “e gran tribulacion”?

¹⁵ Analisa na prome luga e asunto di proteccion fisico. Como adorado di Yehova, nos por spera e proteccion ei como grupo. Si no tawata asina, nos lo a bira un victima facil pa Satanas. Pensa riba e punto aki: Satanas, “e prins di e mundo aki”, lo tin masha gana di elimina adoracion berdadero. (Huan 12:31; Revelacion 12:17) Algun di e gobiernonan mas poderoso riba tera a prohibi nos trabou di predica y a purba elimina nos completamente. Sinembargo, e pueblo di Yehova a keda firme y a sigui predica cu e mesun intensidad! Pakico nacionnan poderoso no por a pone un paro na e actividad di e grupo di cristiannan relativamente chikito y aparentemente indefenso aki? Esei ta pasobra Yehova a proteha nos bou di su halanan poderoso!—Salmo 17:7, 8.

¹⁶ Kico di proteccion fisico durante e benidero “gran tribulacion”? Nos no tin nodi tene miedo di e sentencianan di Dios. Al fin y al cabo, “Señor sa tambe con pa rescata e santonan for di tentacion, y con pa tene e inhustonan bou di castigo pa e dia di huicio.” (Revelacion 7:14; 2 Pedro 2:9) Mientrastanto, semper nos por ta sigur di dos cos.  Di prome, hamas Yehova lo permiti pa su sirbidonan leal wordo extermina for di riba tera. Di dos, lo e recompensa personanan cu ta integro na dje, dunando nan bida eterno den su husto mundo nobo—si ta necesario, pa medio di un resureccion. Esnan cu muri no por ta den un luga mas sigur cu e memoria di Dios.—Huan 5:28, 29.

17. Con Yehova ta proteha nos pa medio di su Palabra?

¹⁷ Aworaki mes, Yehova ta proteha nos mediante su “palabra” bibo, cu tin e forsa motivador pa sanea curason y cambia bida di hende. (Hebreonan 4:12) Door di aplica su principionan, den algun sentido nos por haya proteccion for di daño fisico. Isaias 48:17 ta bisa: “SEÑOR . . . ta siña bo, pa bo prospera.” Sin duda, biba na harmonia cu e Palabra di Dios por mehora nos salu y alarga nos bida. Por ehempel, door cu nos ta aplica conseho di Bijbel pa abstene di fornicacion y purifica nos mes di contaminacion, nos ta evita practicanan impuro y custumbernan perhudicial cu ta trece problema grandi den bida di hopi hende malbado. (Echonan 15:29; 2 Corintionan 7:1) Nos ta hopi gradicido pa e proteccion cu e Palabra di Dios ta duna nos!

18. Con Yehova ta proteha nos spiritualmente?

¹⁸ Mas importante ainda, Yehova ta duna nos proteccion spiritual. Nos Dios amoroso ta proteha nos for di daño spiritual door di duna nos tur loke nos tin mester pa por soporta prueba y salvaguardia nos relacion cu ne. Den e manera ei Yehova ta actua pa conserva nos bida, no djis pa un par di aña cortico sino pa eternidad. Laga nos analisa algun di e cosnan cu Dios a percura cu por proteha nos spiritualmente.

19. Con e spirito di Yehova por yuda nos enfrenta cualkier prueba cu nos por haya nos cu ne?

¹⁹ Yehova ta e ‘Scuchador di oracion.’ (Salmo 65:2) Ora e  presionnan di bida ta parce di aplasta nos, nos por haya un gran alivio si nos desahoga nos curason serca dje. (Filipensenan 4:6, 7) Talbes e no ta bai kita nos pruebanan milagrosamente, pero si e ta contesta nos oracionnan sinsero door di duna nos e sabiduria pa trata cu nan. (Santiago 1:5, 6) Mas cu esei, Yehova ta duna spirito santo na esnan cu ta pidie. (Lucas 11:13) E spirito poderoso ei por yuda nos enfrenta cualkier prueba of dificultad cu nos por haya nos cu ne. E por duna nos “e poder mas aya di loke ta normal” pa persevera te ora Yehova caba cu tur problema doloroso den e mundo nobo cu lo bin pronto.—2 Corintionan 4:7, NW.

20. Con Yehova por expresa su poder pa proteha pa medio di nos rumannan?

²⁰ Tin biaha Yehova ta uza su poder pa proteha na nos fabor pa medio di nos compañeronan di fe. El a uni su pueblo den un asociacion mundial di “rumannan.” (1 Pedro 2:17; Huan 6:44) E calor di e hermandad ei ta un testimonio bibo di e influencia sano cu e poder di Dios su spirito por causa den bida di hende. E spirito ei ta produci su fruta den nos—cualidadnan bunita y precioso manera amor,  cariño y bondad. (Galationan 5:22, 23) Pesei, ora nos ta den un angustia y un ruman ta sinti su mes impulsa pa duna nos bon conseho of palabranan di animacion cu nos tin asina tanto mester di dje, nos por gradici Yehova pa e expresionnan ei di su cuido y proteccion.

21. (a) Ki alimento spiritual oportuno Yehova ta percura pa medio di “e esclabo fiel y prudente”? (b) Con abo personalmente a beneficia for di loke Yehova ta percura pa nos proteccion spiritual?

²¹ Yehova ta duna nos algo mas pa nos proteccion: alimento spiritual na e tempo oportuno. Pa yuda nos haya forsa for di su Palabra, Yehova a nombra “e esclabo fiel y prudente” pa percura alimento spiritual. E esclabo fiel ei ta uza publicacionnan manera e revistanan E Toren di Vigilancia y Spierta!, y tambe reunionnan, asambleanan y congresonan pa duna nos “cuminda na su debido tempo”—loke nos mester, y na e ora cu nos tin mester di dje. (Mateo 24:45) Bo a yega di tende algo na un reunion cristian—den un comentario, den un discurso of asta den un oracion—cu a duna bo net e forsa y animacion cu bo tawatin mester? Bo a yega di sinti cu un articulo en particular den un di nos revistanan a touch bo? Corda, Yehova ta percura tur e medionan ei pa nos proteccion spiritual.

22. Den ki manera Yehova ta uza su poder semper, y pakico esei ta beneficia nos?

²² Yehova sigur ta un escudo “pa tur esnan cu ta tuma refugio den dje.” (Salmo 18:30) Nos ta compronde cu e no ta uza su poder pa proteha nos for di tur calamidad actual. Pero loke si e ta haci semper ta uza su poder di proteha pa garantisa e realisacion di su proposito. A lo largo, esei lo beneficia su pueblo. Si nos hala serca dje y keda den su amor, Yehova lo duna nos bida perfecto pa eternidad. Cu e perspectiva ei, en berdad nos por mira cualkier sufrimento den e mundo aki como ‘leve y pa un momento so.’—2 Corintionan 4:17.