1, 2. O ā mea sa lamatia ai le fanauga a Isaraelu a o ulu atu i le laufanua o Sinai i le 1513 T.L.M., ma na faapefea ona faalaeiauina i latou e Ieova?

 SA MATUĀ lamatia le fanauga a Isaraelu a o ulu atu i le laufanua o Sinai i le amatamataga o le 1513 T.L.M. O se faigāmalaga fitā sa tatau ona latou faia, auā e ao ona latou ui atu i se “vao e tele ma le mataʻutia, e i ai gata uogo ma akarava.” (Teuteronome 8:15) Sa mafai foʻi ona osofaʻia i latou e nuu tetee. Na aumaia e Ieova lona nuu i lenei tulaga. I lona avea ma o latou Atua, po o le a mafai ai ea ona ia puipuia i latou?

² Sa matuā faalaeiauina i latou i fetalaiga a Ieova e faapea: “Na outou vaai atu i mea na ou faia i Aikupito, na ou avaʻe iā te outou i luga o apaʻau o aeto, na ou au mai foʻi iā te outou iā te aʻu nei.” (Esoto 19:4) Na faamanatu e Ieova i ona tagata lona laveaʻia o i latou mai ʻautau a Aikupito, lea na peiseaʻī na faaaogāina ai ni aeto. Peitaʻi e iai foʻi isi māfuaaga ua talafeagai lelei ai le faaaogāina o “apaʻau o aeto” e faataʻitaʻia mai ai le puipuiga a le Atua.

3. Aiseā ua talafeagai ai ona faaaogāina “apaʻau o aeto” e faataʻitaʻia ai le puipuiga a le Atua?

³ E tele isi mea e faaaogā i ai e le aeto ona apaʻau lautetele ma le malolosi na i lo le na ona lele maualuga aʻe ai i le vanimonimo. I se aso vevela, e tatala faaofuofu ai e le aeto tinā ona apaʻau—lea e ono oo atu i le silia i le fitu futu (2 mita) le uumi—ina ia avea o se faapaologa, e puipuia ai lana toloaʻi mai le aasa o le lā. I isi taimi, e na te aofaʻi mai ai lana toloaʻi i totonu o ona apaʻau ina ia puipuia i latou mai le savili mālūlū. E pei lava ona puipuimalu le aeto i lana toloaʻi, sa faapena foʻi ona faamalumalu ma puipuimalu e Ieova le nuu o Isaraelu i le taimi na faatoʻā amata ai. I le faigāmalaga i le vaomatua, o le a maua ai pea e lona nuu se mapusaga, mai faamalumaluga a  ona apaʻau malolosi pe afai latou te tumau pea i le faamaoni. (Teuteronome 32:9-11; Salamo 36:7) Ae pe mafai ea ona tatou faatalitalia ma le tonu i aso nei le puipuiga mai le Atua?

4, 5. Aiseā e mafai ai ona tatou faatuatua i le folafolaga a le Atua mo le puipuiga?

⁴ E mautinoa le mafai e Ieova ona puipuia ana auauna. O ia o le “Atua e [ona] le malosi uma lava”—o se taʻu e faamaonia ai o loo iā te ia le mana e lē mafai e se tasi ona manumalo mai ai. (Kenese 17:1) I le pei o le tai e lē mafai ona taofi, ua faapena foʻi ona leai se mea e mafai ona taofia gaoioiga a le mana o Ieova. Talu ai e mafai ona ia faia so o se mea ua ia faatonuina, tatou te ono fesili la, ʻPo o le finagalo ea o Ieova ia faaaogā lona mana e puipuia ai ona tagata?’

⁵ O le tali i ai, o le ioe! Ua faamautinoa mai e Ieova iā i tatou lona puipuia o ona tagata. I le Salamo 46:1 ua faapea mai: “O le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” Talu ai e “lē mafai ona tala pepelo” le Atua, e mafai foʻi la ona tatou matuā faatuatua i lana folafolaga mo le puipuiga. (Tito 1:2) Seʻi o tatou talanoa i nisi o tala faatusa mananaia o loo faaaogā e Ieova e faamatala mai ai lana puipuiga.

6, 7. (a) O le ā le puipuiga sa saunia e se leoleo mamoe i aso anamua mo ana mamoe? (e) Ua faapefea e le Tusi Paia ona faataʻitaʻia maia le faanaunauga moni o Ieova ina ia puipuia ma tausia ana mamoe?

⁶ O Ieova o lo tatou Leoleo Mamoe, ma “o lona nuu i tatou, o le lafu mamoe ua ia fagaina.” (Salamo 23:1; 100:3) O mamoe o ni manu e manaʻomia tele le tausiga ma le puipuiga. Sa tatau i se leoleo mamoe i aso anamua ona lototele e puipuia ana mamoe mai leona, luko, ma urosa, faapea foʻi mai tagata gāoi. (1 Samuelu 17:34, 35; Ioane 10:12, 13) Peitaʻi sa iai taimi na manaʻomia ai se uiga agaalofa i le tausiga o mamoe. Pe a fanau se mamoe i se vaipanoa e mamao ese mai le lafu, sa masani  ona leoleoina e le leoleo mamoe alofa le mamoe tinā i ona taimi e vaivai ai, ona ia sii aʻe lea i luga o le tamaʻi mamoe e leʻi malosi lelei ma avatu i le mea sa iai le lafu.

⁷ I le faatusatusaina e Ieova o ia i se leoleo mamoe, ua ia faamautinoa mai ai lona faanaunauga moni e puipuia i tatou. (Esekielu 34:11-16) Seʻi toe mafaufau i le faamatalaina o Ieova lea o loo taʻua i le Isaia 40:11, e pei ona talanoaina i le Mataupu e 2 o lenei tusi: “Na te leoleoina lona lafu e pei o le leoleo mamoe; na te sapaia tamaʻi mamoe i ona lima, ma tauave i latou i lona fatafata.” Na mafai faapefea ona oo le tamaʻi mamoe i le “fatafata” o le leoleo mamoe—le gauga loloto o le pito o lona ofu a luga? Atonu na sōsō ane le tamaʻi mamoe i le leoleo mamoe, pe na paʻipaʻi ane i lona vae. Peitaʻi, e ao i le leoleo mamoe lava ia ona punou ifo, sii i luga le tamaʻi mamoe, ma tuu ma le alofa le tamaʻi mamoe i se tulaga e saogalemu ai i lona fatafata. Maʻeu se ata matagofie o le naunautaʻi o lo tatou Leoleo Mamoe Sili e faamalumalu mai ma puipuia i tatou!

8. (a) O ai o loo faasafua mai i ai le folafolaga a le Atua mo se puipuiga, ma ua faapefea ona faaalia lenei manatu i le Faataoto 18:10? (e) O le ā e aofia ai i le mauaina o se sulufaʻiga i le suafa o le Atua?

⁸ E iai ni mea e ao ona faia ina ia maua lana puipuiga auā e na o i latou o loo faalatalata atu iā te ia o le a mauaina. Ua taʻua i le Faataoto 18:10 e faapea: “O le suafa o Ieova, o le ʻolo malosi lea; e sola atu i ai lē amiotonu, ona sao ai lea o ia.” I aso anamua, sa fausia ai i nisi taimi ʻolo i le vaomatua e fai ma nofoaga malu e sulufaʻi atu i ai. Peitaʻi o le avega tauave lea a lē o loo lamatia ina ia sola atu i se ʻolo faapena mo lona saogalemu. E tali tutusa lenā ma le sulufaʻi atu i le suafa o le Atua. E tele atu mea e aofia ai na i lo le tau ina taʻutaʻu le suafa o le Atua, auā o le suafa tauatua ua lē o se mea e faavavega ona maua ai se manuia. Na i lo lea, e manaʻomia ona tatou iloa ma faatuatua i Lē e Ana lenā suafa ma ola e ōgatusa ma ana tulafono amiotonu. Maʻeu lava se agalelei o Ieova i lona faamautinoa mai iā i tatou faapea, pe afai tatou te faatuatua iā te ia, o le a avea o ia ma ʻolo malosi e puipuia ai i tatou!

9. Na faapefea ona faia e Ieova nisi mea e sili atu na i lo le tau ina folafola mai o lana puipuiga?

⁹ E tele isi mea ua faia e Ieova na i lo le na ona folafola mai o lana puipuiga. I tuā i taimi o le Tusi Paia, na ia faia ai ni vavega e faamaonia ai e mafai ona ia puipuia ona tagata. I le talafaasolopito o Isaraelu, sa masani lava ona taofia ai e le ʻaao’ malosi o Ieova ona fili malolosi. (Esoto 7:4) Ae peitaʻi, sa faaaogā foʻi e Ieova lona mana e puipuia ai mo se lelei o tagata taʻitoʻatasi.

10, 11. O ā faaaʻoaʻoga a le Tusi Paia o loo faaalia maia le auala na faaaogā ai e Ieova lona mana e puipuia ai nisi tagata?

¹⁰ Ina ua lē ifo atu i le tupua auro a le tupu o Nepukanesa talavou Eperu e toʻatolu—Sataraka, Mesako, ma Apeteniko—na faafefe i latou e le tupu toʻatamaʻi e faapea, o le a lafoina i latou i se afi aasa. Na taufaifai mai Nepukanesa, o le tupu sili ona malosi i le lalolagi i lenā vaitaimi e faapea: “O ai foʻi se Atua na te laveaʻiina outou ai laʻu pule?” (Tanielu 3:15) Sa matuā faatuatua atu nei talavou e toʻatolu i le mana o lo latou Atua e puipuia i latou, e ui latou te leʻi faatalitalia e faapea e tatau lava ona ia faia lenā tulaga. O lea na latou tali atu ai: “Afai o lea, ua mafai lo matou Atua, matou te auauna i ai, ona laveaʻi mai iā te i matou.” (Tanielu 3:17) O le mea moni lava, e ui ina faafitu ona sili atu le aasa o lenā afi na i lo le tulaga masani ai, ae sa pei o se mea noa i lo latou Atua o lē e ona le malosi uma. Na ia puipuia i latou, ma iʻu ai ina taʻutino atu e le tupu: “E leai se isi atua na te mafaia ona laveaʻiina faapena.”—Tanielu 3:29.

¹¹ Sa faia foʻi e Ieova se faaaliga mataʻina o lona mana e puipuia ai mea, ina ua ia aumaia le soifua o lona Alo pele e toʻatasi ma tuuina i le manava o le taupou Iutaia o Maria. Na taʻu atu e se agelu iā Maria e faapea “o le a tō [ia], ma . . . fanauina se tama tane.” Na faamatala ane e le agelu: “E afio ifo le Agaga Paia i luga iā te oe, e faamalumalu ifo foʻi iā te oe le mana o le Silisili ese.” (Luka 1:31, 35) Na faatoʻā oo lava lea o le Alo o le Atua i se tulaga sa ono matuā lamatia ai lona soifua. Pe aafia ea le pepe lea ua afuafua aʻe, i le agasala ma le lē lelei atoatoa o lona tinā faaletagata? Pe mafai ea e Satani ona faamanuʻalia pe fasiotia  lenā Alo a o leʻi fanau mai? E matuā lē mafai lava! Sa peiseaʻī na faia e Ieova se pa e puipuia ai Maria, ina ia lē mafai e le tulaga lē lelei atoatoa, se malosi taufaaleaga, se tagata fia fasioti tagata, po o se temoni foʻi, ona faaleagaina le tuputupu aʻe o le pepe lea ua faatoʻā afuafua mai. Sa faaauau pea ona puipuia e Ieova Iesu a o tuputupu aʻe o ia e avea o se talavou. (Mataio 2:1-15) A o leʻi oo i le taimi na atofaina e le Atua e maliu ai lona Alo pele, e leai se mea leaga na mafai ona oo iā te ia.

12. Aiseā na puipuia faavavega ai e Ieova nisi tagata i taimi anamua?

¹² Aiseā na puipuia ai e Ieova nisi tagata i ni auala faavavega? I le tele o tulaga, na puipuia ai e Ieova nisi tagata ina ia mafai ona puipuia se mea e sili atu ona tāua: le faataunuuina o lona finagalo. Mo se faataʻitaʻiga, sa manaʻomia le faasaoina o le pepe o Iesu mo le faataunuuina o le fuafuaga a le Atua, lea o le a manuia ai tagata uma. O le tele o faaaliga o lea mana, o loo tusia i le Tusi Paia lea sa maua mai i le agaga paia, ma ʻna tusia e aʻoaʻo mai ai iā i tatou, ina ia tatou maua le faamoemoe e tupu mai i le onosai, ma le faamāfanafana mai o Tusi.’ (Roma 15:4) Ioe, o nei faaaʻoaʻoga e faamalosia ai lo tatou faatuatua i lo tatou Atua e ona le malosi uma lava. Ae o le ā le puipuiga e mafai ona tatou faatalitalia mai le Atua i aso nei?

13. Pe tatau lava iā Ieova ona ia faia i taimi uma ni vavega mo so tatou lelei? Faamatala mai.

¹³ O le folafolaga i le puipuiga a le Atua e lē o faauiga atu faapea e tatau lava iā Ieova ona ia faatinoina ni vavega mo i tatou. E lē o faamautinoa maia e le Atua iā i tatou se olaga o le a matuā aunoa ma ni faafitauli i lenei faiga o mea. E toʻatele auauna faamaoni a Ieova o loo oo i ai mala mataʻutia, e pei o oge, taua, maʻi, ma le oti. Na manino ona taʻu atu e Iesu i ona soo, e mafai ona oo iā i latou le oti ona o lo latou faatuatua. O le pogai lenā na faamamafa ai e Iesu le ao ona tumau seʻia oo i le iʻuga. (Mataio 24:9, 13) Pe ana fai e faaaogā e Ieova lona mana e faia ai se laveaʻiga faavavega i taimi uma, e mautinoa lava la e taufaifai Satani iā Ieova ma fesiligia le moni o la tatou tapuaʻiga i lo tatou Atua.—Iopu 1:9, 10.

14. O ā faaaʻoaʻoga e faaalia ai e lē puipuia e Ieova i taimi uma ana auauna taʻitoʻatasi i ni auala e tutusapau?

 ¹⁴ E oo lava i taimi o le Tusi Paia, e leʻi faaaogāina e Ieova lona mana tau puipuiga, ina ia faamalumalu mai ai ana auauna uma mai se oti faafuaseʻi. Mo se faaaʻoaʻoga, sa fasiotia le aposetolo o Iakopo e Herota i le tusa o le 44 T.A.; peitaʻi, e leʻi leva ona mavae lenā mea, ae faasaoina loa Peteru “ai le lima o Herota.” (Galuega 12:1-11) E lē gata i lea, sa sili atu ona umi le soifuaga o Ioane, le uso o Iakopo, na i lo Peteru ma Iakopo. E manino la, e lē mafai ona tatou faatalitalia lo tatou Atua, e na te puipuia ana auauna taʻitoʻatasi i ni auala e tutusapau. Aemaise ai, “o le tausaga ma le mea e tupu ai” e oo iā i tatou uma. (Failauga 9:11) E faapefea la ona puipuia i tatou e Ieova i aso nei?

15, 16. (a) O ā mea e faamaonia ai ua puipuia e Ieova ona tagata tapuaʻi o se faapotopotoga o tagata? (e) Aiseā e mafai ai ona tatou talitonu o le a puipuia e Ieova ana auauna i le taimi nei, faapea foʻi i “le puapuaga tele”?

¹⁵ Seʻi talanoa muamua i le puipuiga faaletino. Ona o i tatou o ni tagata tapuaʻi a Ieova, e mafai ona tatou faatalitalia ai lenā puipuiga o se faapotopotoga o tagata. A aunoa ma lea, o le a faigofie ona tatou paʻūʻū atu i mailei a Satani. Seʻi manatu i le mea lenei: O Satani, “le alii o lenei lalolagi,” o lona manaʻo o le tineia lea o le tapuaʻiga moni. (Ioane 12:31; Faaaliga 12:17) E iai nisi malo malolosi o le lalolagi ua latou faasāina la tatou galuega talaʻi ma ua taumafai e matuā tafiesea atoatoa i tatou. Peitaʻi, o loo tumau pea ona maumauaʻi tagata o Ieova ma faaauau ona latou talaʻi atu e aunoa ma le faavaivai! Aiseā ua lē mafai ai e malo malolosi ona taofia le galuega a lenei faapotopotoga toʻaitiiti o Kerisiano, o ē o loo foliga mai foʻi e lē o malupuipuia i latou? Talu ai ua puipuia i tatou e Ieova i ona apaʻau malolosi!—Salamo 17:7, 8.

¹⁶ Ae faapefea le puipuiga faaletino pe a oo mai le “puapuaga tele”? E lē manaʻomia ona tatou matataʻu pe a faaooina mai faamasinoga a le Atua. Auā foʻi, “ua silafia e [Ieova] se mea e laveaʻi mai ai i ē amio Atua ai le tofotofoga, a e taofi i ē amio  leaga e oo i le aso faamasino ina ia faasalaina i latou.” (Faaaliga 7:14; 2 Peteru 2:9) I le taimi nei, e mafai pea ona tatou talitonu i manatu e lua. Muamua, o le a lē taitai ona faatagaina e Ieova le tafiesea o ana auauna faamaoni mai le lalolagi. Lona lua, o le a ia tauia i latou o loo tumau i le faamaoni, i le foaʻi mai i ai o le ola e faavavau i lana lalolagi fou amiotonu—e ala i le toetū pe afai e manaʻomia. Mo ē ua maliliu, e mautinoa lava le manatuaina o i latou e le Atua.—Ioane 5:28, 29.

17. Ua faapefea ona puipuimalu e Ieova i tatou e ala mai i lana Afioga?

¹⁷ E oo lava i le taimi nei, ua puipuimalu e Ieova i tatou e ala mai i lana “afioga” ola, lea o loo iai le mana e faamālōlōina ai loto ma suia ai olaga. (Eperu 4:12) E ala i le faatatauina o ona mataupu silisili, e mafai ai i nisi auala ona puipuia i tatou mai ni tulaga e ono faaleagaina ai o tatou tino. Ua taʻua i le Isaia 48:17 e faapea: “O aʻu o Ieova, . . . o loo aʻoaʻo iā te oe i mea e aogā.” E mautinoa lava, o le ola e ōgatusa ma le Afioga a le Atua e mafai ona faaleleia ai lo tatou soifua mālōlōina ma faafualoaina o tatou olaga. Mo se faaaʻoaʻoga, ona o lo tatou faatatauina o le poloaʻiga a le Tusi Paia ina ia taumamao mai i amioga lē mamā taufeusuaʻiga ma faamamā i tatou mai mea uma e leaga ai, ua mafai ai ona tatou ʻalofia amioga lē mamā ma masaniga leaga o loo faataugāina ai ola o le toʻatele o tagata faalēmataʻu. (Galuega 15:29; 2 Korinito 7:1) Maʻeu so tatou agaga faafetai mo le puipuiga ua mafai ona tatou maua i le usiusitai i le Afioga a le Atua!

18. O le ā le puipuiga faaleagaga ua saunia mai e Ieova mo i tatou?

¹⁸ O le itu e sili ona tāua, o le saunia mai lea e Ieova o lo tatou puipuiga faaleagaga. O loo puipuia i tatou e lo tatou Atua alofa mai tulaga e faaleagaina ai lo tatou itu faaleagaga, e ala i lona faaauupegaina o i tatou i mea e tatou te manaʻomia ina ia onosaia ai puapuaga ma puipuimalu la tatou faiā ma ia. Ua gaoioi la Ieova e faasaoina o tatou ola, e lē mo na o ni nai tausaga, ae e faavavau. Seʻi manatu i nisi o sauniuniga a le Atua e mafai ona puipuia ai lo tatou tulaga faaleagaga.

19. E faapefea e le agaga o Ieova ona mafai ai ona tatou manumalo mai i so o se puapuaga tatou te ono fetaiaʻi?

 ¹⁹ O Ieova o “Le faafofoga tatalo.” (Salamo 65:2) Pe a foliga ua saputu mai omiga o le olaga, o le sasaa atu o o tatou loto iā te ia e matuā telē lava se mapusaga tatou te maua mai ai. (Filipi 4:6, 7) Atonu na te lē aveesea faavavega o tatou puapuaga, ae i le tali mai i a tatou tatalo faamaoni, e mafai ai ona ia foaʻi mai iā i tatou le atamai ina ia tatou faafetaiaʻia nei puapuaga. (Iakopo 1:5, 6) E lē gata i lea, e foaʻi mai e Ieova le agaga paia iā i latou e ole atu iā te ia. (Luka 11:13) E mafai e lenā mana malosi ona tatou manumalo ai mai so o se puapuaga po o se faafitauli tatou te ono fetaiaʻi. E mafai ona foaʻi mai iā i tatou le “matuā tele o le mana” ina ia tutumau ai seʻia oo ina aveesea e Ieova faafitauli uma i le lalolagi fou ua lata tele mai.—2 Korinito 4:7.

20. E ono mafai faapefea ona faaalia le mana o Ieova e puipuia ai e ala mai i o tatou uso tapuaʻi?

²⁰ I nisi taimi, e ono faaalia le mana o Ieova e puipuia ai e ala mai i o tatou uso tapuaʻi. Ua taʻitaʻiina atu e Ieova ona tagata i totonu o se “ʻau uso” i le lalolagi aoao. (1 Peteru 2:17; Ioane 6:44) Ona o le māfana o lenā ʻauuso, ua tatou vaaia ai faamaoniga maʻoti i le galue o le agaga paia o le Atua e uunaʻia tagata ina ia faia mea lelei. Ona o lenā agaga, ua mafai ai ona  tatou faaalia uiga matagofie ma le tāua tele e pei o le alofa, le mataalofa, ma le agalelei. (Kalatia 5:22, 23) O lea la, pe a tatou mafatia, ae iai so tatou uso tapuaʻi e ofoina mai ni fautuaga alofa po o ni upu e sili ona faalaeiau ai, e mafai ona tatou faafetai iā Ieova mo le faaali mai o lana puipuiga.

21. (a) O ā taumafa faaleagaga i le taimi tatau ua saunia e Ieova e ala mai i “le pologa faamaoni ma le faautauta”? (e) Ua faapefea ona aogā iā te oe sauniuniga mai iā Ieova e puipuia ai faaleagaga i tatou?

²¹ E iai foʻi se isi mea ua saunia mai e Ieova e puipuia ai i tatou: o taumafa faaleagaga i le taimi tatau. Ina ia tatou mauaina le malosi mai lana Afioga, ua faatonuina ai e Ieova “le pologa faamaoni ma le faautauta” ina ia saunia mai taumafa faaleagaga. O loo faaaogāina e lenā pologa faamaoni lomiga, e aofia ai mekasini o Le Olomatamata ma le Ala Mai! atoa foʻi ma le tatou upega tafaʻilagi o le jw.org, sauniga, fonotaga, ma tauaofiaga, ina ia saunia ai mo i tatou “mea e ʻai i ona itu aso”—o mea e ao ona tatou maua, ma i le taimi e tatau ona tatou maua ai. (Mataio 24:45) Po ua e faalogo ai ea i se sauniga faa-Kerisiano—i se tali, se lauga, pe i se tatalo—ua aumaia tonu ai lava le malosi ma faalaeiauga ia sa e manaʻomia? Po ua pāʻia ea lou olaga i se mataupu patino i se tasi o a tatou mekasini? Ia manatua, ua aumaia e Ieova na sauniuniga uma ina ia mafai ona puipuia ai faaleagaga i tatou.

22. O le ā le auala e masani pea ona faaaogā ai e Ieova lona mana, ma aiseā ua sili ai ona aogā mo i tatou lona faia faapea?

²² E mautinoa lava le avea o Ieova ma talita iā “i latou uma o ē faatuatua iā te ia.” (Salamo 18:30) Ua tatou malamalama e na te lē faaaogāina lona mana e puipuia ai i tatou mai mala uma lava i le taimi nei. Peitaʻi, e masani pea ona ia faaaogāina lona mana e puipuia ai, ina ia faamautinoa le faatinoina o ana fuafuaga. E iʻu atu ai i se lumanaʻi manuia o ana auauna. Pe afai tatou te faalatalata atu iā Ieova, ma tumau i lona alofa, o le a ia foaʻi maia iā i tatou le olaga lelei atoatoa e faavavau. A o mafaufau i lenā faamoemoe, e ao la ona tatou manatu i so o se mafatiaga lava i lenei faiga o mea, ua na o se mea e “māmāsagia ma le vave mavae.”—2 Korinito 4:17.