1, 2. An mga Israelita nakada ha ano nga peligro ha pagsulod nira ha tuna han Sinai han 1513 B.C.E., ngan paonan-o ginpasarig hira ni Jehova?

 AN MGA Israelita nameligro ha pagsulod nira ha tuna han Sinai temprano han 1513 B.C.E. Inatubang hira ha makaharadlok nga pagbiyahe, ha “haluag ngan makaharadlok nga kamingawan nga damu an malara nga mga halas ngan mga iskorpyon.” (Deuteronomio 8:15, The New English Bible) Inatubang liwat hira ha tarhog han pag-atake han madarahog nga mga nasud. Gindara ni Jehova an iya katawohan ngada hini nga kahimtang. Sugad nga ira Dios, mapapanalipdan ba niya hira?

² An mga pulong ni Jehova nagpapasarig gud: “Iyo mismo nakita an akon ginbuhat ha mga Ehiptohanon. Ginbuhat ko ini basi dad-on kamo pinaagi hin mga pako han mga agila ngan igkadi kamo ha akon.” (Exodo 19:4) Ginpahinumdom ni Jehova an iya katawohan nga iya ginluwas hira tikang ha mga Ehiptohanon, ginagamit an mga agila, sugad nga simbolo, ha pagdara ha ira ha katalwasan. Kondi may-ada iba pa nga mga hinungdan kon kay ano nga an “mga pako han mga agila” angayan nga nag-iilustrar han panalipod han Dios.

3. Kay ano nga angayan an “mga pako han mga agila” ha pag-ilustrar han panalipod han Dios?

³ Ginagamit han agila an iya daku, makusog nga mga pako labaw pa ha paglupad la ha kahitas-an. Ha kapaso han adlaw, an iroy nga agila nagbubuklad han iya mga pako sugad hin arko—nga bangin sobra duha ka metros an kahilapad— basi magin panalipod nga landong, nga sinisirongan han iya mga piso tikang ha nakakapaso nga adlaw. Ha iba nga mga panahon, iya iginsasalipod an iya mga pako ha iya mga piso basi panalipdan hira tikang ha matugnaw nga hangin. Sugad la han agila nga nagpapanalipod han iya mga piso, sugad hito nagdepensa ngan nagpanalipod hi Jehova ha bag-o nga nasud han Israel. Yana ha kamingawan, an iya katawohan magpapadayon ha pakabiling hin arayopan ha landong han iya simboliko nga gamhanan nga mga pako tubtob nga nagpapabilin hira nga matinumanon. (Deuteronomio 32:9-11; Salmo 36:7) Kondi husto ba nga makakalaom kita yana han panalipod han Dios?

4, 5. Kay ano nga bug-os nga makakasarig kita ha saad nga panalipod han Dios?

⁴ Hi Jehova sigurado nga makakahimo ha pagpanalipod ha iya mga surugoon. Hiya an “Dios nga Makagarahum-ha-ngatanan”—usa nga titulo nga nagpapasabot nga may-ada hiya diri-mapugngan nga gahum. (Genesis 17:1) Pariho han diri-mapugngan nga pagtaob, an ginagamit nga gahum ni Jehova diri mapupugngan. Tungod kay mahihimo niya an bisan ano nga karuyag han iya kaburut-on, mahimo kita magpakiana, ‘Kaburut-on ba ni Jehova nga gamiton an iya gahum ha pagpanalipod ha iya katawohan?’

⁵ An baton, usa la nga pulong, oo! Ginpapasarig kita ni Jehova nga papanalipdan niya an iya katawohan. “An Dios amo an aton arayopan ngan kusog, andam pirme bumulig ha mga panahon han kasakitan,” siring han Salmo 46:1. Tungod kay an Dios “diri makakagbuwa,” bug-os nga makakasarig kita ha iya saad nga panalipod. (Tito 1:2) Aton paghisgotan an pipira han matin-aw nga mga ilustrasyon nga ginagamit ni Jehova ha pagsaysay han iya nagpapanalipod nga pagmangno.

6, 7. (a) An paraataman han mga karnero ha mga panahon han Biblia naghatag hin ano nga panalipod para ha iya mga karnero? (b) Paonan-o igin-iilustrar han Biblia an kinasingkasing nga hingyap ni Jehova ha pagpanalipod ngan pagmangno ha iya mga karnero?

 ⁶ Hi Jehova an aton Paraataman, ngan “kita an iya katawohan ngan an mga karnero ha iya panabsaban.” (Salmo 23:1; 100:3) Gutiay la nga mga hayop an sugad kaluya han maanad nga mga karnero. An paraataman han mga karnero ha mga panahon han Biblia kinahanglan magin maisugon ha pagpanalipod ha iya mga karnero tikang ha mga leon, mga lobo, ngan mga oso, sugad man kontra ha mga kawatan. (1 Samuel 17:34, 35; Juan 10:12, 13) Kondi may-ada mga panahon nga an pagpanalipod ha mga karnero nagkinahanglan hin mahumok nga pagmangno. Kon an usa nga karnero nanganak nga hirayo ha toril, an mapinairon nga paraataman nagbabantay ha iroy ha panahon nga hiya maluya ngan katapos, pupuruton an waray mahihimo nga nati nga karnero ngan dadad-on ito ngadto ha toril.

⁷ Pinaagi han pagtanding han iya kalugaringon ha usa nga paraataman han mga karnero, ginpapasarig kita ni Jehova han iya kinasingkasing nga hingyap ha pagpanalipod ha aton. (Ezekiel 34:11-16) Hinumdumi an paghulagway mahitungod kan Jehova ha Isaias 40:11, nga ginhisgotan ha Kapitulo 2 hini nga libro: “Pariho hin paraataman hin panon iya mamangnoan an iya panon. Pinaagi han iya butkon titirukon niya an nati nga mga karnero, ngan iya ito kukuguson dida ha iya dughan.” Paonan-o an gutiay nga nati nga karnero nahingangada ha “dughan” han paraataman—ha mga pilo han iya uroigbaw nga panapton? An nati nga karnero bangin dumaop ha paraataman, nahidhid pa ngani ha iya bitiis. Kondi, an paraataman an kinahanglan dumuko, basi puruton an nati nga karnero, ngan mahumok nga kuguson ito ha iya dughan. Mahigugmaon gud ito nga ilustrasyon han pagkadisidido han aton Harangdon nga Paraataman ha pagdepensa ngan pagpanalipod ha aton!

8. (a) An saad nga panalipod han Dios iginhahatag kan kanay, ngan paonan-o ipinapakita ini ha Proberbios 18:10? (b) Ano an nahiuupod ha pakabiling hin arayopan ha ngaran han Dios?

 ⁸ May kondisyon an saad nga panalipod han Dios—maieksperyensyahan la ito hadton naduok ha iya. An Proberbios 18:10 nasiring: “An ngaran ni Jehova marig-on nga torre. An matadong nga tawo nadangop dida hito ngan napuproteksyonan.” Ha mga panahon han Biblia, usahay gintutukod an mga torre ha kamingawan sugad nga talwas nga mga lugar nga arayopan. Kondi responsabilidad han usa nga aada ha peligro an pag-ayop ngadto hito nga torre basi matalwas. Pariho ito han pakabiling hin arayopan ha ngaran han Dios. Nag-uupod ini hin labaw pa ha pauroutro la nga paggamit han ngaran han Dios; an ngaran han Dios mismo diri anting-anting. Lugod, kinahanglan makilala naton ngan sarigan an Usa nga may-ada hito nga ngaran ngan magkinabuhi uyon han iya matadong nga mga suruklan. Maloloy-on gud hi Jehova ha pagpasarig ha aton nga kon umayop kita ha iya nga may pagtoo, hiya magigin usa nga torre nga magpapanalipod ha aton!

9. Paonan-o nagbubuhat hi Jehova hin labaw pa kay han pagsaad la hin panalipod?

⁹ Hi Jehova nagbubuhat hin labaw pa kay han pagsaad la hin panalipod. Ha mga panahon han Biblia, iya ipinakita ha milagroso nga mga paagi nga hiya nakakapanalipod ha iya katawohan. Durante han kasaysayan han Israel, an gamhanan nga “kamot” ni Jehova agsob nga nagpupugong han mga pag-atake han gamhanan nga mga kaaway. (Exodo 7:4) Kondi, ginamit liwat ni Jehova an iya gahum ha pagpanalipod ha mga indibiduwal.

10, 11. Ano nga mga ehemplo ha Biblia an nagpapakita kon paonan-o ginamit ni Jehova an iya gahum ha pagpanalipod ha mga indibiduwal?

¹⁰ Han an tulo nga mga batan-on nga Hebreo—nga kilala nga hira Sadrac, Mesac, ngan Abednego—nagdumiri ha  pagyukbo ha imahen nga bulawan ni Hadi Nabucodonosor, an nasisina gud nga hadi nagtarhog nga ilabog hira ha mapaso hinduro nga hudno. “Hin-o an dios nga makakatalwas ha iyo tikang ha akon mga kamot?” nangayat hi Nabucodonosor, an pinakagamhanan nga magmarando ha tuna. (Daniel 3:15) An tulo nga batan-on nga kalalakin-an may-ada bug-os nga pagsarig ha gahum han ira Dios ha pagpanalipod ha ira, kondi waray hira maglaom nga bubuhaton niya ito. Salit, hira binaton: “Kon ito gud man an mahitatabo, an amon Dios nga amon gin-aalagaran makakatalwas ha amon.” (Daniel 3:17) Oo, diri problema para han ira Dios nga gamhanan-ha-ngatanan iton naglalaga nga hudno, bisan kon pito ka beses nga ginpaso ito kay ha normal. Iya ginpanalipdan gud hira, ngan an hadi napiritan ha pagkilala: “Waray iba nga dios nga makakatalwas pariho ha iya.”—Daniel 3:29.

¹¹ Hi Jehova naghatag liwat hin makatirigamnan gud nga pagpakita han iya gahum ha pagpanalipod han iginbalhin niya an kinabuhi han iya bugtong nga Anak ngadto ha tagoangkan han Judio nga birhen nga hi Maria. An anghel nagsumat kan Maria nga hiya ‘magbuburod ngan mag-aanak hin lalaki.’ An anghel nagsaysay: “An baraan nga espiritu makada ha imo, ngan an gahum han Gihitaasi maglalambong ha imo.” (Lucas 1:31, 35) An Anak han Dios baga in waray pa gud mahingada ha sugad kapeligroso gud nga kahimtang. An sala ba ngan pagkadiri-hingpit han tawhanon nga iroy makakahugaw ha binhi? Mahihimo ba ni Satanas nga dauton o patayon iton nga Anak antes hiya matawo? Imposible! Hi Jehova sugad hin naghimo hin nagpapanalipod nga kuta ha palibot ni Maria basi waray bisan ano—waray pagkadiri-hingpit, waray nakakadaot nga puwersa, waray parapamatay nga tawo, ngan waray bisan ano nga demonyo—nga makakadaot ha nagtutubo nga binhi, tikang ha panahon han pagpanamkon padayon. Hi Jehova nagpadayon ha pagpanalipod kan Jesus durante han iya pagkabatan-on. (Mateo 2:1-15) Tubtob ha itinanda nga panahon han Dios, waray gud nakadaot ha iya hinigugma nga Anak.

12. Kay ano nga milagroso nga ginpanalipdan ni Jehova an pipira nga mga indibiduwal ha mga panahon han Biblia?

 ¹² Kay ano nga ginpanalipdan ni Jehova an pipira nga mga indibiduwal ha sugad milagroso nga mga paagi? Ha damu nga kahimtang ginpanalipdan ni Jehova an mga indibiduwal basi panalipdan an usa nga butang nga mas importante pa gud: an katumanan han iya katuyoan. Pananglitan, kinahanglanon an kaluwasan han minasus-an nga hi Jesus ha katumanan han katuyoan han Dios, nga ha kataposan pahihimulsan han ngatanan nga katawohan. An rekord han damu nga pagpakita han gahum ha pagpanalipod bahin han inspirado nga Kasuratan, nga “iginsurat ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.” (Roma 15:4) Oo, ini nga mga ehemplo nagpaparig-on han aton pagtoo ha aton Dios nga gamhanan-ha-ngatanan. Kondi ano nga panalipod an malalaoman naton tikang ha Dios yana?

13. Obligado ba hi Jehova ha paghimo hin mga milagro para ha aton? Isaysay.

¹³ An saad nga panalipod han Dios diri nagpapasabot nga obligado hi Jehova ha paghimo hin mga milagro para ha aton. Diri, an aton Dios diri naggagarantiya ha aton hin kinabuhi nga waray problema dida hinin daan nga sistema. Damu nga matinumanon nga mga surugoon ni Jehova an naatubang hin duro nga mga kakurian, upod na an kakablas, girra, sakit, ngan kamatayon. Hi Jesus matin-aw nga nagsumat ha iya mga disipulo nga sugad nga mga indibiduwal bangin patayon hira tungod han ira pagtoo. Salit pinabug-atan ni Jesus an panginahanglan nga magpailob tubtob ha kataposan. (Mateo 24:9, 13) Kon gagamiton ni Jehova an iya gahum para han milagroso nga kaluwasan ha ngatanan nga kahimtang, sigurado nga tatamayon ni Satanas hi  Jehova ngan pagruruhaduhaan an pagkatotoo han aton debosyon ha aton Dios.—Job 1:9, 10.

14. Ano nga mga ehemplo an nagpapakita nga hi Jehova diri pirme nagpapanalipod ha ngatanan nga iya mga surugoon ha pariho nga mga paagi?

¹⁴ Bisan ha mga panahon han Biblia, waray gamita ni Jehova an iya gahum ha pagpanalipod basi depensahan an kada usa han iya mga surugoon tikang ha diri-napapanahon nga kamatayon. Pananglitan, hi apostol Santiago ginpatay ni Herodes han mga 44 C.E.; kondi, waray pag-iha katapos hito, hi Pedro ginluwas “tikang ha kamot ni Herodes.” (Buhat 12:1-11) Ngan hi Juan, nga bugto ni Santiago, nabuhi hin mas maiha kay ha kan Pedro ngan Santiago. Matin-aw, diri kita makakalaom nga magpapanalipod an aton Dios ha ngatanan nga iya mga surugoon ha pariho nga mga paagi. Gawas pa, “an panahon ngan diri ginlalaoman nga mga hitabo” naabot ha aton ngatanan. (Eclesiastes 9:11) Paonan-o, kon sugad, nagpapanalipod hi Jehova ha aton yana?

15, 16. (a) Ano an ebidensya nga hi Jehova nagpapanalipod ha pisikal ha iya mga magsiringba sugad nga grupo? (b) Kay ano nga makakasarig kita nga hi Jehova magpapanalipod ha iya mga surugoon yana ngan durante han “daku nga kasakitan”?

¹⁵ Tagda, siyahan, an mahitungod han panalipod ha pisikal. Sugad nga mga magsiringba ni Jehova, makakalaom kita hito nga panalipod sugad nga grupo. Kon diri, masayon kita mabiktima ni Satanas. Hunahunaa ini: Karuyag gud ni Satanas, “an magmarando hini nga kalibotan,” nga mawara an totoo nga pagsingba. (Juan 12:31; Pahayag 12:17) Igindidiri han iba han gamhanan gud nga mga gobyerno ha tuna an aton pagsangyaw nga buruhaton ngan nangangalimbasog ha pagpoo ha aton ngatanan. Kondi, an katawohan ni Jehova nagpapabilin nga marig-on ngan nagpapadayon ha pagsangyaw nga diri naundang! Kay ano nga an gamhanan nga mga nasud waray makapugong han buruhaton hinin gutiay ngan baga in waray-depensa nga grupo han mga Kristiano?  Tungod kay hi Jehova nagpapanalipod ha aton pinaagi han iya simboliko gamhanan nga mga pako!—Salmo 17:7, 8.

¹⁶ Kumusta man an panalipod ha pisikal durante han tiarabot nga “daku nga kasakitan”? Kinahanglan diri kita mahadlok ha pagpadapat han mga paghukom han Dios. Aw, “maaram hi Jehova kon paonan-o tatalwason an katawohan nga may debosyon ha Dios tikang ha pagsari, ngan iglalain an diri matadong nga katawohan para bungkagon ha adlaw han paghukom.” (Pahayag 7:14; 2 Pedro 2:9) Samtang yana, makakasiguro kita pirme han duha nga butang. Siyahan, diri gud tutugotan ni Jehova an iya maunungon nga mga surugoon nga mawara tikang ha tuna. Ikaduha, babalosan niya an mga magtiripig han integridad hin kinabuhi nga waray kataposan ha iya matadong bag-o nga kalibotan—kon kinahanglanon, pinaagi han pagkabanhaw. Para hadton nagkakamatay, waray mas talwas nga lugar kay han hingada ha hinumdoman han Dios.—Juan 5:28, 29.

17. Paonan-o kita ginbabantayan ni Jehova pinaagi han iya Pulong?

¹⁷ Bisan yana, ginbabantayan kita ni Jehova pinaagi han iya buhi nga “pulong,” nga may-ada gahum nga nagpapagios ha mga tawo basi matambal an ira mga kasingkasing ngan mabag-o an ira mga kinabuhi. (Hebreo 4:12) Pinaagi han pag-aplikar han mga prinsipyo hito, ha pipira nga paagi mapapanalipdan kita tikang ha kadaot ha pisikal. “Ako, hi Jehova, . . . an nagtututdo ha imo basi magpahimulos ka,” siring han Isaias 48:17. Sigurado, an pagkinabuhi uyon ha Pulong han Dios makakapaopay han aton kahimsog ngan makakapahilawig han aton kinabuhi. Pananglitan, tungod kay inaaplikar naton an sagdon han Biblia nga maglikay tikang ha seksuwal nga imoralidad ngan limpyuhon an aton kalugaringon tikang ha kahugaw, linilikyan naton an mahugaw nga mga buhat ngan nakakasakit nga mga batasan nga hinungdan han kadaot ha mga kinabuhi han damu nga mga tawo nga diri-diosnon. (Buhat 15:29; 2 Corinto 7:1) Mapasalamaton gud kita ha pagpanalipod ha aton han Pulong han Dios!

18. Ano nga panalipod ha espirituwal an iginhahatag ha aton ni Jehova?

¹⁸ Pinakaimportante, hi Jehova nagpapanalipod ha aton ha espirituwal. An aton mahigugmaon nga Dios nagpapanalipod ha aton tikang ha kadaot ha espirituwal pinaagi han pagsangkap ha aton han ginkikinahanglan naton basi makailob han mga kakurian ngan basi mapanalipdan an aton relasyon ha iya. Salit hi Jehova nagios ha pagtipig han aton kinabuhi, diri la ha pipira halipot nga mga tuig kondi ha kadayonan. Tagda an pipira han mga kahikayan ngan mga regalo han Dios nga makakapanalipod ha aton ha espirituwal.

19. Paonan-o an espiritu ni Jehova makakabulig ha aton nga malamposan an bisan ano nga pagsari nga bangin atubangon naton?

¹⁹ Hi Jehova an “Parapamati han pag-ampo.” (Salmo 65:2) Kon an mga pag-ipit han kinabuhi baga in makuri hinduro, an pagpahibaro ha iya han aada ha aton kasingkasing makakahatag ha aton hin daku nga katalwasan. (Filipos 4:6, 7) Bangin diri milagroso nga kuhaon niya an aton mga kakurian, kondi ha pagbaton ha aton kinasingkasing nga mga pag-ampo, mahimo kita tagan niya han kinaadman ha paglampos hito. (Santiago 1:5, 6) Labaw pa hito, hi Jehova naghahatag han baraan nga espiritu ngada hadton nangangaro ha iya. (Lucas 11:13) Iton gamhanan nga espiritu makakabulig ha aton nga malamposan an anoman nga pagsari o problema nga bangin atubangon naton. Makakahatag ito ha aton hin “diri ordinaryo nga gahum” basi makailob tubtob nga kuhaon na ni Jehova an ngatanan nga makuri nga mga problema ha bag-o nga kalibotan nga hirani na gud.—2 Corinto 4:7.

20. Paonan-o mahimo igpahayag an gahum ni Jehova ha pagpanalipod pinaagi han aton mga igkasi-magsiringba?

²⁰ Usahay, an gahum ni Jehova ha pagpanalipod mahimo  igpahayag pinaagi han aton mga igkasi-magsiringba. Gintitirok ni Jehova an iya katawohan ngada ha bug-os-kalibotan nga “pagminagburugto.” (1 Pedro 2:17, footnote; Juan 6:44) Ha mahigugmaon nga pakig-upod hiton nga pagminagburugto, nakikita naton an buhi nga pamatuod han gahum han baraan nga espiritu han Dios ha pag-impluwensya ha mga tawo para ha kaopayan. Iton nga espiritu nagpapatubo ha aton hin bunga—an nakakadani, presyoso nga mga kalidad upod na an gugma, pagkabuotan, ngan pagkamaopay. (Galacia 5:22, 23) Salit, kon aada kita ha kakurian ngan an usa nga igkasi-tumuroo napapagios ha paghatag hin makakabulig nga sagdon o ha paghatag hin ginkikinahanglan gud nga mga pulong nga makaparig-on, makakagpasalamat kita kan Jehova para ha sugad nga mga kapahayagan han iya nagpapanalipod nga pagmangno.

21. (a) Ano nga napapanahon espirituwal nga pagkaon an iginhahatag ni Jehova pinaagi han “matinumanon ngan maaramon nga uripon”? (b) Paonan-o ka personal nga nagpapahimulos tikang ha mga tagana ni Jehova ha pagpanalipod ha aton ha espirituwal?

²¹ Hi Jehova naghahatag hin usa pa nga butang ha pagpanalipod ha aton: an napapanahon nga espirituwal nga pagkaon. Basi mabuligan kita nga makakuha hin kusog tikang ha iya Pulong, gintataporan ni Jehova “an matinumanon ngan maaramon nga uripon” ha paghatag hin espirituwal nga pagkaon. Ginagamit hiton matinumanon nga uripon an inimprinta nga mga publikasyon, upod na an mga magasin nga An Barantayan ngan Pagpamata! sugad man an aton jw.org nga website, an mga katirok, mga asembleya, ngan mga kombensyon ha paghatag ha aton han “pagkaon ha husto nga panahon”—kon ano an ginkikinahanglan naton, ha panahon nga ginkikinahanglan naton ito. (Mateo 24:45) Nakabati ka na ba hin usa ka butang ha Kristiano nga katirok—ha usa nga komento, ha usa nga pahayag, o bisan ha pag-ampo—nga naghatag han ginkinahanglan gud nga kusog ngan pagparig-on? Naapektohan ba an imo kinabuhi  han usa ka espisipiko nga artikulo nga iginpublikar ha usa han aton mga magasin? Hinumdumi, iginhahatag ni Jehova ini ngatanan nga mga tagana basi panalipdan kita ha espirituwal.

22. Ginagamit pirme ni Jehova an iya gahum ha ano nga paagi, ngan kay ano nga an iya pagbuhat hito para han aton kaopayan?

²² Hi Jehova sigurado nga usa nga taming “ha ngatanan nga naayop ha iya.” (Salmo 18:30) Nasasabtan naton nga diri niya ginagamit an iya gahum ha pagpanalipod ha aton tikang ha ngatanan nga kalamidad yana. Kondi, ginagamit niya pirme an iya gahum ha pagpanalipod basi masiguro an katumanan han iya katuyoan. Ha kataposan, an iya pagbuhat hito para ha kaopayan gud han iya katawohan. Kon kita magin duok ha iya ngan magpabilin ha iya gugma, tatagan kita ni Jehova hin hingpit nga kinabuhi ha kadayonan. Samtang ginhuhunahuna iton nga paglaom, hinaot tagdon naton an bisan ano nga pag-antos hini nga sistema sugad nga “temporaryo la ngan magaan.”—2 Corinto 4:17.