1, 2. Nkusweekelwa kuli buti ikubapenzya bantu mazuba aano, alimwi ino eezyi mbuti mbozyitujatikizya?

 MWANA umwi wasweekelwa naa wanyonyookelwa cidooli cakusobanya mpoonya watalika kulila. Ikulila kwakwe kwakucwema kuleetezya cini-cini! Pele sena mwakabona kale mwana mbwakkomana eelyo muzyali nacijana eeco cakasweekede naa nicibambululwa? Kumuzyali, cilakonzya kacili cintu cuuba-uba ikujana cidooli cakusobanya naa kucibambulula. Eelyo mwana ulakkomana kapati alimwi akugambwa. Eeco icali kulibonya kuti calobela limwi naa kunyonyookelalyo capilusyigwa!

² Jehova, Imuzyali wiinda boonse, ulijisi nguzu zyakubukulusya zintu eezyo bana bakwe baanyika nzyobabona kuti tazicikonzyeki abuniini. Aawa tatwaambi zidooli pe. “Ziindi zikatazya ncobeni” ezino, kuli kusweekelwa kupati ikutucitikila kwiinda kusweekelwa buyo kantu katayi akoomoonga. (2 Timoteyo 3:1-5) Ibunji bwazintu nzyobakkomanina bantu zilibonya kuti zili muntenda lyoonse​—ŋanda, imbono, milimo yakumubili nobuba buumi. Alimwi tulakonzya kuzyingwa notutelaika kunyonyooka kwamasena motukkede alimwi akusweekelwa kucitika kwiinda mukuloba kwamisyobo minji yazintu zipona. Pele kunyina cintu cimbi citucisa kapati mbuli kufwidwa muyandwa wesu. Ikusweekelwa alimwi akutyompwa kucitika kulakonzya kutuzunda.​—2 Samuele 18:33.

3. Mbulangizi buli buti buumbulizya ibwaambwa kubbuku lya Milimo 3:21, alimwi ino ncinzi Jehova ncayoobelesya kutegwa abuzuzikizye?

 ³ Cilaumbulizya kapati kaka ikwiiya makani aajatikizya nguzu zya Jehova zyakubukulusya! Mbubwenya mbotutiibone, kuli zintu zinji zigambya eezyo Leza nzyakonzya alimwi nzyayoobukulusyila bana bakwe baanyika. Mubwini, Ibbaibbele litondezya kuti Jehova ulikanzide “kubukulusya zintu zyoonse.” (Milimo 3:21) Ikutegwa aucite mulimo ooyu, Jehova uyoobelesya Bwami bwabu Mesiya ibweendelezyegwa a Mwanaakwe, Jesu Kristo. Ibumboni butondezya kuti Bwami oobu bwakatalika kweendelezya kujulu mumwaka wa 1914. a (Matayo 24:3-14) Ino nzintu nzi iziyoobukulusyigwa? Atulange-lange imwi akati kamilimo mipati ya Jehova yakubukulusya. Umwi akati kayeeyi tulakonzya kuubona kale kauli mukucitika. Iimbi iyoocitika munzila mpati kumbele.

4, 5. Ncinzi cakacitika kubantu ba Leza mumwaka wa 607 B.C.E., alimwi ino mbulangizi nzi Jehova mbwaakabapa?

⁴ Icintu cimwi Jehova ncaabukulusya kale mbukombi busalala. Ikutegwa tuciteelele kabotu ncocaamba eeci, mubufwaafwi atulange-lange makani aakaindi aajatikizya bwami bwa Juda. Ikucita boobo, kulatugwasya kuteelelesya makani aakondelezya kujatikizya mbwaali kuzibelesya  Jehova nguzu zyakwe zyakubukulusya.​—Baroma 15:4.

⁵ Amweezeezye mbobakalimvwa ba Juda basyomeka mumwaka wa 607 B.C.E. eelyo Jerusalemu naakanyonyoonwa. Imunzi wabo ngobakali kuyandisisya wakanyonyoonwa, imalambo aanguwo akakolomonwa. Alimwi kwiinda waawo, itempele lyeebeka kapati ndyaakayakide Solomoni, ibusena bulikke bwabukombi bwa Jehova busalala munyika yoonse lyakaba zitantaala buyo. (Intembauzyo 79:1) Ibakafwutuka bakatolwa mubuzike ku Babuloni, bakasiya busena bwabo kabuli tongo licelela banyama bamusyokwe. (Jeremiya 9:11) Kumuntunsi, zintu zyoonse zyakalilobede, kwakacinyina bulangizi buli boonse. (Intembauzyo 137:1) Pele Jehova iwakasinsimide lunyonyooko oolu wakapa bulangizi bwakuti ciindi cakubukulusya cakali kulangilwa kumbele.

6-8. (a) Mutwe wamakani uuli wiindulukwa-indulukwa mumalembe aabasinsimi iba Chihebrayo, alimwi mbuti businsimi oobo mbobwakazuzikizigwa kumatalikilo? (b) Mazuba aano, mbuti bantu ba Leza mbobalibonena kuzuzikizyigwa kwabusinsimi bunji bwakubukulusya?

⁶ Mubwini, imakani aakubukulusya akali ngomutwe wakali kwiindulukwa-indulukwa kapati mumalembe aabasinsimi iba Chihebrayo. b Kwiinda muli mbabo, Jehova wakasyomezya nyika iibukulusyidwe, iikkedwe bantu alimwi iili aambolezi, iikwabilidwe kubanyama bamusyokwe alimwi akuli basinkondo. Wakapandulula kuti nyika eeyo yakali kuyooba paradaiso wini-wini! (Isaya 65:25; Ezekieli 34:25; 36:35) Kwiinda waawo, ibukombi busalala bwakali kuyootalisyigwa alimwi, atempele lyakali kuyooyakululwa. (Mika 4:1-5) Ibusinsimi oobu bwakabapa  bulangizi iba Juda ibakali mubuzike, bwakabagwasya kuliyumya mumyaka yabuzike iili makumi aali ciloba ku Babuloni.

⁷ Kumamanino, iciindi cakubukulusya cakasika. Nebakaangululwa kuzwa ku Babuloni, iba Juda bakapiluka ku Jerusalemu akuyakulula itempele lya Jehova. (Ezara 1:1, 2) Nobakakakatila kubukombi busalala, Jehova wakabalongezya akupa kuti nyika yabo ibe aambolezi kapati. Wakabakwabilila kuli basinkondonyina alimwi akubanyama bamusyokwe ibakali kukkala munyika yabo eeyo kwamakumi aamyaka. Beelede kuti bakakondwa kapati kaka kubona nguzu zya Jehova zyakubukulusya! Pele izintu eezyo zyakali kwiiminina buyo kuzuzikizyigwa kutaanzi kwaciindi buyo cisyoonto kwabusinsimi bwakubukulusya. Ikuzuzikizyigwa kupati kwakali kuyoocitika “kumamanino aamazuba aayo,” imazuba aano ngotupona eelyo ooyo Simulyazina wa Mwami Davida wakasyomezyedwe naakali kuzyoobikkwa acuuno cabweendelezi.​—Isaya 2:2-4; 9:6, 7.

⁸ Kwiinde buyo ciindi cisyoonto kuzwa ciindi Jesu naakabikkwa acuuno cabweendelezi bwa Bwami mumwaka wa 1914, wakalanganya ziyandika zyakumuuya zyabantu ba Leza basyomeka anyika. Mbubwenya sikuzunda waku Persia wazina lya Koresi mbwaakaangulula bakasyeede akati kaba Juda kuzwa ku Babuloni mumwaka wa 537 B.C.E., Jesu awalo wakaangulula basyeede akati kaba Juda bakumuuya​—basikumutobela​—kuzwa kubweendelezi bwa “Babuloni Mupati,” ibulelo bwanyika yoonse bwabukombi bwakubeja. (Ciyubunuzyo 18:1-5; Baroma 2:29) Kutalikila mumwaka wa 1919, ibukombi busalala bwabukulusyigwa muciimo cabo ceelede ku Banakristo beni-beni. (Malaki 3:1-5) Kuzwa ciindi eeco, bantu ba Jehova bali kumukomba mutempele lyakwe lyakumuuya lisalazyidwe​—ibubambe bwa Leza bwabukombi busalala.  Ino nkaambo nzi eeci ncocili cintu ciyandika kulindiswe sunu?

9. Nocakainda ciindi cabaapostolo, ncinzi zikombelo zya Bunakristo Bwanyika ncozyakacita kubukombi bwa Leza, pele ino ncinzi Jehova ncaacita mazuba aano?

⁹ Amulange-lange makani aakaindi. Banakristo bamumwaanda wamyaka wakusaanguna bakalongezyegwa kapati munzila yakumuuya. Pele Jesu abaapostolo bakasinsima kuti bukombi bwini-bwini bwakali kuyoosofwaazyigwa akuzimaazigwa. (Matayo 13:24-30; Milimo 20:29, 30) Nocakainda ciindi cabaapostolo, kwakabuka Bunakristo Bwanyika. Basololi bazikombelo bakatalika kutobela njiisyo amicito yabantu batakombi Leza. Alimwi bakatondezya kuti kupaila kuli Leza ncintu catakali kukonzyeka pe, Leza bakamupandulula kuti uli Mubutatu butakonzyi kuteelelwa alimwi bakayiisya bantu kuti beelede kulyaambilila zibi zyabo kubafwundisi alimwi akukomba Mariya “abasaante” banji muciindi cakukomba Jehova. Lino, kakwiindide myaanda yamyaka minji yakuzanduka kuzintu ziluzi kuli boobo, ncinzi Jehova ncaacita? Munyika yamazuba aano​—inyika iizwide bukombi bwakubeja alimwi iisofwaazyidwe amicito iitali yabunaleza​—wabweza ntaamu alimwi yakubukulusya bukombi busalala. Kakunyina kuciindizya, tulakonzya kwaamba kuti ooku kubukulusyigwa ncintu cimwi akati kazintu ziyandika kapati zyacitika mazuba aano.

10, 11. (a) Nimbazu nzi zyobile izibikkilizyidwe kujatikizya paradaiso yakumuuya, alimwi ino mbuti mbomujatikizyidwe? (b) Mbantu bali buti Jehova mbaayobolola kuba muparadaiso yakumuuya, alimwi ino bayooba acoolwe cakulibonena nzi?

¹⁰ Aboobo, Banakristo beni-beni mazuba aano bali muparadaiso yakumuuya iyaabubota alimwi iyaabukomena.  Ino eeyi paradaiso ibikkilizya nzi? Ikapati ibikkilizya mbazu zyobile. Yakusaanguna mbukombi busalala bwa Leza mwini-mwini, Jehova. Wakatuleleka anzila yabukombi iinyina bubeji abumpelenge. Wakatupa azyakulya zyakumuuya zinji. Eeci citugwasya kwiiya zinji kujatikizya Taateesu wakujulu, ikucita nzyayanda alimwi akuba acilongwe anguwe. (Johane 4:24) Ilubazu lwabili kujatikizya paradaiso yakumuuya lubikkilizya bantu. Jehova wabayiisya bakombi bakwe inzila zyaluumuno mbubwenya Isaya mbwaakasinsima kuti uyoocita oobo “kumamanino aamazuba aayo.” Wamanizya nkondo akati kesu. Nokuba kuti tulalubizya munzila zinji akaambo kakutalondoka, ulatugwasya kusama “buntu bupya.” Ulatugwasya mukusoleka nkotucita kwiinda mukubelesya muuya wakwe uusalala, uupa kuti tube aabube bubotu. (Baefeso 4:22-24; Bagalatiya 5:22, 23) Nomucita zintu kweelana abusolozi bwamuuya wa Leza uusalala, masimpe muli cibeela caparadaiso yakumuuya.

¹¹ Jehova wayobolola bantu mbayanda ikuba muparadaiso eeyi yakumuuya​—ibantu bamuyanda, ibayanda luumuno alimwi “bazyi kuti bayandika kusololelwa a Leza.” (Matayo 5:3) Aabo mbabantu ibayooba acoolwe citaliboteli cakulibonena kubukulusyigwa akumbi kugambya kapati​—ikwabantu alimwi akwanyika yoonse mbwiizulwa.

12, 13. (a) Nkaambo nzi businsimi bwakubukulusyigwa ncobweelede kuzuzikizyigwa munzila ayimbi? (b) Ino Jehova ujisi makanze nzi kujatikizya nyika kweelana ambokwakaambwa mu Edeni, alimwi ino nkaambo nzi eeci ncocitupa bulangizi bwakumbele?

¹² Ibusinsimi bunji bujatikizya kubukulusyigwa buboneka kuti nzinji nzyobwaamba kunze buyo lyakubukulusyigwa  kwakumuuya. Mucikozyanyo, Isaya wakalemba zyaciindi eelyo baciswa, balemene, boofwu alimwi abasinke matwi nobayooponesyegwa alimwi aleelyo noluba lufwu lwini noluyoomenenwa limwi. (Isaya 25:8; 35:1-7) Ibusinsimi buli boobo kunyina nobwakacitika ncobeni munzila eeyo mu Israyeli yansiku. Alimwi nokuba kuti twalibonena kuzuzikizyigwa kwakumuuya kwabusinsimi oobu kuciindi cesu, kuli twaambo tusinizyide ncotweelede kusyoma kuti kumbele, kuyooba kuzuzikizyigwa kwini-kwini alimwi kumaninide. Ino tuzyi buti kuti eeci ncamasimpe?

¹³ Mu Edeni, Jehova wakaasalazya makanze aakwe kujatikizya nyika kuti: Yakeelede kukkalwa abantu bakkomene, ibataciswi alimwi bakamantene. Mwaalumi amwanakazi bakeelede kwiilanganya nyika alimwi abanyama boonse balimumo, ikusandula nyika yoonse mbwiizulwa kuba paradaiso. (Matalikilo 1:28) Eeci ciliimpene kapati ambozibede lino zintu. Pele tulakonzya kusinizya kuti makanze aa Jehova kunyina naacinca pe. (Isaya 55:10, 11) Jesu mbwali ngo Mwami wabu Mesiya iwakabikkwa a Jehova, uyoobona kwaamba kuti nyika yoonse eeyi yaba Paradaiso ncobeni.​—Luka 23:43.

14, 15. (a) Mbuti Jehova ‘mbwayoolengulula zintu zyoonse kuti zibe zipya’? (b) Ino buumi bunooli buti mu Paradaiso, alimwi ino ndubazu nzi ndomulombozya kapati nywebo?

¹⁴ Amweezeezye kubona nyika yoonse kaisandukide kuba Paradaiso! Kujatikizya ciindi eeco, Jehova waamba kuti: “Amubone! Ndilengulula zintu zyoonse kuti zibe zipya.” (Ciyubunuzyo 21:5) Amulange-lange ncociyooamba eeco. Jehova aakumanizya kubelesya nguzu zyakwe zyakunyonyoona bweende bwazintu oobu bubyaabi, kuyoocaala buyo “majulu mapya anyika mpya.” Eeci caamba kuti kuyooba mfwulumende mpya iiyooyendelezya kuzwa kujulu, ikweendelezya ciinga  cabantu cipya aanyika calo cinoojisi buyo bantu bamuyanda Jehova alimwi ibacita kuyanda kwakwe. (2 Petro 3:13) Saatani antoomwe amadaimona aakwe bayakwaangwa. (Ciyubunuzyo 20:3) Kwazyuulu-zyuulu zyamyaka kwaciindi cakusaanguna, ibantu bayakwaangununwa kubweendelezi oobu bubyaabi, ibwalunya alimwi bunyonyoona. Cakutadooneka ikukatalukwa ikuyoobako kunooli kupati.

¹⁵ Kuciindi eeco tuyookonzya kulanganya nyika eeyi iitaliboteli mbubwenya mbuli mbotwakeelede kucita kuzwa kumatalikilo. Inyika ilijisi nguzu zyacilengwaleza zyakulibukulusya yini. Lwizi alimwi amilonga iisofwaazyidwe zilakonzya kulisalazya zini ikuti zintu eezyo zisofwaazya zyanyonyoonwa; imasena aakanyonyoonwa akaambo kankondo ayoolibukulusya ikuti nkondo zyamana. Eelo kaka cinookondelezya kubeleka cakweendelana amilawo yacilengwaleza alimwi abweende bwazintu zyamunyika, ikugwasya kwiisandula kuba muunda weebeka, muunda wa Edeni wanyika yoonse uuzwide misyobo iiteeli yamisamu abanyama! Muciindi cakunyonyoona misyobo yamisamu abanyama munzila yalunya, bantu bayookkala caluumuno azilenge zyoonse zyaanyika. Nobaba bana tabanoobayoowi banyama bamusyokwe.​—Isaya 9:6, 7; 11:1-9.

16. Nkubukulusyigwa kuli buti ikuyoomujatikizya muntu woonse uusyomeka mu Paradaiso?

¹⁶ Aswebo tobeni kutugama tuyoobukulusyigwa. Yaakwiinda Armagedoni, ibantu bayoofwutuka bayoolibonena kuponesyegwa kwamaleele munyika yoonse mbwiizulwa. Mbubwenya mbwaakacita naakacili anyika, Jesu uyoobelesya nguzu nzyapedwe a Leza ikuponya boofwu, basinke matwi alimwi akupa kuti balema babe aamibili iili kabotu. (Matayo 15:30) Ibacembeede bayookkomana kuba anguzu zyabulombe kabataciswi-ciswi. (Jobu  33:25) Ikunyana-nyana kwamibili akaambo kakucembaala kuyoomana, inguzu zyamumaboko amumaulu ziyoopiluka alimwi milambi inoobeleka kabotu-kabotu anguzu zipya. Bantu basyomeka boonse bayoozyiba kuti izintu ziletwa acibi akutalondoka ziyaabumana buce-buce. Eelo kaka tuyoomulumba kapati Jehova Leza akaambo kanguzu zyakwe zitaliboteli zyakubukulusya! Lino atubikkile maanu aalubazu ikwaambisya ilukulwaizya kapati kujatikizya ciindi eeci cikondelezya cakubukulusyigwa.

17, 18. (a) Nkaambo nzi Jesu ncaakabanyemena ba Saduki? (b) Mbukkale buli buti ibwakapa kuti Elija alombe Jehova kuti kube bubuke?

¹⁷ Mumwaanda wamyaka wakusaanguna C.E., ibasololi bazikombelo bamwi ibategwa ba Saduki tiibakali kusyoma mububuke pe. Jesu wakabanyemena amajwi aakuti: “Mulisweekede nkaambo tamwaazyi Magwalo naa nguzu zya Leza.” (Matayo 22:29) Inzya, Magwalo atondezya kuti Jehova ulijisi nguzu zyakubukulusya. Munzila nzi?

¹⁸ Amweezeezye cakacitika kuciindi ca Elija. Mukamufwu umwi wakabukete mwanaakwe wakayuminide iwakali ngomwana alikke ngwaakajisi. Mwana ooyo wakalifwide. Musinsimi Elija walo iwakali mweenzu wamukamufwu kwaciindi cili mbocibede, kulangilwa kuti wakagambwa kapati. Kumatalikilo wakagwasilizya mukuvwuna mwana ooyu kunzala. Kulangilwa kuti Elija wakali kumuyanda kapati mwana ooyo. Banyina bakaile kuba abuumba. Ooyu ngowakali mwana alikke wakacili kupona iwakali kunga wayeezya mukamufwu zyamulumaakwe wakafwide. Kulangilwa kuti wakajisi bulangizi bwakuti mwanaakwe ooyu musankwa wakali kuyoomulela ciindi aakucembaala. Kapengede kapati mumizeezo,  mukamufwu ooyo wakayoowa kuti ambweni wakali kusubulwa akaambo kacibi cimwi ncaakacitide musyule. Cakamuyumina Elija kuliyumya mupenzi eeli lyakacitika boobu. Kumane kabotu-kabotu wakabweza mutumba kuzwa mumaanza aabanyina, wautola muŋanda yakwe, eelyo ooko wakalomba Jehova Leza kuti apilusye buumi bwamwana.​—1 Bami 17:8-21.

19, 20. (a) Mbuti Abrahamu mbwaakatondezya kuti wakali alusyomo munguzu zya Jehova zyakubukulusya, alimwi ino lusyomo oolo lwakayeeme aali? (b) Mbuti Jehova mbwaakalumbula lusyomo lwa Elija?

¹⁹ Elija teensi muntu wakusaanguna iwakasyoma mububuke pe. Imyaanda-myaanda yamyaka yakaindide musyule, Abrahamu wakali kusyoma kuti Jehova ulijisi nguzu zyakubukulusya​—alimwi lusyomo lwakwe lwakayeeme aatwaambo tusinizide. Eelyo Abrahamu naakali aamyaka yakuzyalwa iili 100 a Sara kajisi myaka iili 90, Jehova wakabukulusya nguzu zyabo zyakuzyala izyakamanide; munzila yamaleele wakapa kuti Sara akonzye kuzyala mwana mulombe. (Matalikilo 17:17; 21:2, 3) Kumbele imusankwa ooyo naakakomena, Jehova wakaambila Abrahamu kuti amutuule mwanaakwe. Abrahamu wakatondezya lusyomo, kazyi kuti Jehova wakali kukonzya kubukulusya mwanaakwe Izaka ngwaakali kuyandisya mubuumi bwakwe. (Bahebrayo 11:17-19) Ilusyomo luyumu boobo lulakonzya kupandulula kaambo Abrahamu naatakalina kutanta mulundu kuyootuula mwanaakwe, ncaakasyomezya bazike bakwe kuti walo alimwi a Izaka bakali kuyoopiluka antoomwe.​—Matalikilo 22:5.

²⁰ Jehova wakamuvwuna Izaka kulufwu, aboobo tiikwakali kuyandika bubuke aciindi eeco. Pele kuciindi ca Elija, mwana wamukamufwu wakalifwide kale​—pele tiilyakalampa pe. Jehova wakamulumbula musinsimi kulusyomo  lwakwe kwiinda mukubusya mwana ooyo! Mpoonya Elija wakapa mwana ooyo kuli banyina amajwi aatalubiki aaya aakuti: “Bona, mwanaako wabuka.”​—1 Bami 17:22-24.

21, 22. (a) Ino bubuke bulembedwe mu Magwalo bujisi mulimo nzi? (b) Ino bubuke ibuyoocitwa mu Paradaiso bunooli bupati buti, alimwi ino mbaani ibayoobweendelezya?

²¹ Aboobo eeci nciindi cakusaanguna kubona Jehova kabelesya nguzu zyakwe kubukulusya buumi bwamuntunsi mu Bbaibbele. Kumbele, Jehova alimwi wakapa nguzu Elisha, Jesu, Paulo alimwi a Petro zyakubusya bantu ibakafwide. Masimpe, aabo ibakabusyigwa bakafwa alimwi mukuya kwaciindi. Nokuba boobo, imakani aamu Bbaibbele aali boobo alatugwasya kubona zintu zitaliboteli mboziyooba kumbele.

²² Mu Paradaiso, Jesu uyakuumanizya mulimo wakwe kali “bubuke abuumi.” (Johane 11:25) Uyoobusya tuulunzuma tunji twabantu, uyoobapa coolwe cakupona kukabe kutamani mu Paradaiso anyika. (Johane 5:28, 29) Amweezeezye buyo ikukkomanisya kuyoocitika eelyo balongwe  bakali kuyandana kapati alimwi abasazinyina aabo ibakaandaanizyidwe kwamyaka minji akaambo kalufwu, nobayookumbatilana, kabakkomene citanabwenwe! Bantu boonse bayootembaula Jehova akaambo kanguzu zyakwe zyakubukulusya.

23. Ncitondezyo nzi ciinda zyoonse citondezya nguzu zya Jehova, alimwi ino nkaambo nzi eeci ncocisinizya bulangizi bwesu bwakumbele?

²³ Jehova wapa cisinizyo cisyomeka alimwi citakonzyi kucincwa cakuti ibulangizi buli boobo buyoocitika ncobeni. Muzitondezyo zyanguzu zyakwe zyoonse, iciinda aali zyoonse nciceeco Jehova ncaakacita naakabusya Mwanaakwe Jesu, kali cilenge camuuya canguzu, akumubikka kuba wabili kulinguwe. Jesu iwakabusyigwa wakalibonya kumyaanda-myaanda yabantu bakalibonena ameso. (1 Bakorinto 15:5, 6) Ibumboni oobo bweelede kuti kabuzulide nokuba kulibaabo badooneka. Jehova ulijisi nguzu zyakubukulusya buumi.

24. Nkaambo nzi ncotunga twasyoma kuti Jehova uyoobabusya bantu bafwide, alimwi mbulangizi nzi umwi aumwi wandiswe mbwanga walombozya?

²⁴ Kunze lyakuba anguzu zyakubukulusya bantu bafwide, Jehova alimwi ulayandisisya kucita boobo. Imwaalumi uusyomeka Jobu wakasololelwa amuuya ikwaamba kuti mubwini Jehova ulayandisisya kubusya bafwide. (Jobu 14:15) Sena tacimukulwaizyi kuba acilongwe a Leza wesu ooyo walo uuyandisisya kubelesya nguzu zyakwe zyakubukulusya munzila yaluyando iili boobo? Pele kamuyeeyede kuti, ibubuke ndubazu lomwe buyo lwamulimo mupati wakubukulusya uulangilwa kumbele ngwayoocita Jehova. Mbomuyaabuzumanana kuyumya cilongwe canu anguwe, lyoonse kamubulombozya bulangizi butaliboteli bwakuti mulakonzya kuyoolibonena ameso eelyo Jehova ‘nayoolengulula zintu zyoonse kuti zibe zipya.’​—Ciyubunuzyo 21:5.