1, 2. Asawu ha wodiyan aybi xayana danddayii, qassi hegee nuna waati qohii?

ISSI naˈi I kaaˈiyo dosiyoobay xayiyo wode woy meqqiyo wode azzanidi yeekkees. A yeehoy keehi azzanttees! SHin, aayyiyaa woy aaway xayidabaa immiyo wode, naˈi ay keena ufayttiyaakko beˈa eray? Kaˈiyoobay xayidaagaa demmiyoogee woy moorettidabaa giigissiyoogee aawaassi woy aayeessi metennaba. SHin, naˈay keehi ufaytteesinne keehi garamettees. Mule xayidaba woy moorettidaba milatiyaabay giigiis!

² Ooppenne aadhdhiya Aawa gidida Yihoowawu saˈan deˈiya A naati mule xayidaba gi qoppiyoobaa zaarettidi demmanaadan oottiyo wolqqay deˈees. Nuuni hegaa kaaˈiyoobaara geeddarssennaagee qoncce. Genccanawu ‘wayssiya ha wodiyan,’ nuuni keehi gitabaa xayiyoogee attenna. (2 Ximootiyoosa 3:1-5) Keettaa, aquwaa, oosuwaanne payyatettaa mala asay xoqqu ootti xeelliyo darobay awudenne xayana danddayees. Qassi meretay daafabaa gattiyo wode hegaa heeran gakkiya qohuwaanne hegaa gaasuwan paxa deˈiyaabatuppe muleera xayida daro sheeshshata qoppiyo wode nuuni yashshan keehi maashana danddayoos. Gidoppe attin, nuuni siiqiyo uri hayqqin qohettiyoogaa keena nuna aybinne qohana danddayenna. He wode siyettiyaabay keehi wolqqaamanne kayyoyiyaaba gidana danddayees.—2 Sameela 18:33.

3. Oosuwaa 3:21n qonccida minttettiya hidootay aybee, qassi Yihooway hegaa aybaa baggaara polanee?

³ SHin, Yihooway kase sohuwawu zaaranawu goˈettiyo wolqqaabaa tamaariyoogee keehi minttettiyaaba! Nuuni beˈanaagaadan, saˈan deˈiya ba naatuyyo Xoossay kase sohuwawu zaarana danddayiyoobaynne yaatana maalaaliya darobay deˈees. Yihooway ‘ubbabaa ooraxissanawu’ woy kase sohuwawu zaaranawu halchchidoogaa Geeshsha Maxaafay yootees. (Oosuwaa 3:21) Hegaa polanawu, Yihooway ba Naˈay Yesuus Kiristtoosi haariyo Mase Kawotettaa goˈettana. He Kawotettay saluwan 1914n haaruwaa  doommidoogaa naqaashay bessees. * (Maatiyoosa 24:3-14) Aybi ooraxxanee? Yihooway kase sohuwawu zaariyo keehi gita oosotuppe amaridaageeta ane beˈoos. Hegeetuppe issoy ha wodiyan polettiis. Qassi harati sinttappe aahuwan polettana.

4, 5. Xoossaa asaa 607 K.K. aybi gakkidee, qassi Yihooway etawu ayba hidootaa yootidee?

⁴ Yihooway kase sohuwawu zaarido issibay geeshsha goynuwaa. Hegee woygiyoogaakko akeekanawu, Yihudaa kawotettaa taarikiyaa qanttan ane pilggoos. Yaatiyoogee Yihooway kase sohuwawu zaaranawu goˈettiyo ba wolqqaa waati goˈettiiddi takkidaakko loytti akeekanaadan nuna maaddana.—Roome 15:4.

⁵ Yerusalaame katamay 607 K.K. xayido wode, ammanettida Ayhudatuyyo aybi siyettidaakko qoppa. Eti dosiyo katamay xayiis, A gimbbeti qolettidosona. Hegaappe iitabay, saˈan Yihoowawu geeshsha goynuwaa goynniyo soho gidida, Solomoni keexxido bonchcho beeta maqidasee laalettidoogaa. (Mazamure 79:1) Paxa attidaageeti omooddettidi Baabiloone biidosona; eta biittay doˈay geessiyo ona soho gidiis. (Ermmaasa 9:11) Asa xeelan, ubbabay xayidaba milatiis. (Mazamure 137:1) SHin, he bashshay gakkanaagaa kasetidi odida Yihooway kase sohuwawu zaariyo wodee yaanaagaa hidootan naaganaadan yootiis.

6-8. (a) Hananabaa yootiya Ibraaweti xaafido xuufetun zaari zaaridi odettidabay aybee, qassi he hiraagati koyro waani polettidonaa? (b) Kase sohuwawu zaariyoogaa xeelliyaagan odettida daro hiraagati ha wodiyan Xoossaa asaa bolli waani polettidonaa?

⁶ Hananabaa yootiya Ibraaweti xaafido xuufetun kase sohuwawu  zaaridoogaabaa darotoo yootidosona. * Aradda, qassi doˈaynne morkketi qohennaadan naagettiya kase sohuwawu zaarido, zaarettidi asi deˈiyo biittaa Yihooway immanaagaa hananabaa yootiyaageetu baggaara qaalaa geliis. Eta biittay zaarettidi gannate mala gidanaagaa I yootiis! (Isiyaasa 65:25; Hizqqeela 34:25; 36:35) Ubbaappe aaruwan, geeshsha goynoy zaarettidi eqqana, qassi beeta maqidasee haranttuwaa keexettana. (Mikiyaasa 4:1-5) He hiraagati Baabiloonen 70 layttawu omooddettidi deˈiya Ayhudati genccanaadan maaddiyoogan, etawu hidootay deˈanaadan oottidosona.

⁷ Wurssettan, ooraxissiyo wode gakkiis. Ayhudati Baabiloone aylletettaappe laˈa kiyidi Yerusalaame simmidi, Yihoowa beeta maqidasiyaa yan zaarettidi keexxidosona. (Izira 1:1, 2) Eti geeshsha goynuwaa minttidi kaallido wode ubban, Yihooway eta anjjiis, qassi eta biittay araddanaadaaninne ayfanaadan oottiis. I eta morkketuppenne daro layttawu eta biittan geessida doˈatuppe naagiis. Eti Yihooway kase sohuwawu zaaranawu goˈettiyo wolqqan ay keena ufayttidonaashsha! Gidoppe attin, he hanotati kasetidi odettida kase sohuwawu zaariyoogee koyro amarida oge xallan polettidoogaa bessoosona. Kawuwaa Daawita laattiyo maatay deˈiyo, daro wodiyawu hidootan naagidoogee kawo gidiyo “wurssetta gallassatun,” hegeekka ha wodiyan, hegaappe aadhdhiya ogiyan polettana.—Isiyaasa 2:2-4; 9:6, 7.

⁸ Yesuusi 1914n saluwaa Kawotettan kawo gididi araatan utti simmidi daro takkennan, saˈan ammanettidi deˈiya Xoossaa asawu ayyaanaaban koshshiyaabaa kunttiis. Attida Ayhudata Baabiloone aylletettaappe Parsse Kawoy Qiiroosi 537 K.K. laˈa kessidoogaadan, Yesuusi bana kaalliya ayyaanaabaa Ayhudata, worddo haymaanoote ubbaa xaaxa waaxiya, ha wodiyaa Baabilooni qohuwaappe laˈa kessiis. (Roome 2:29; Ajjuutaa 18:1-5) Tumu Kiristtaaneti 1919⁠ppe doommidi geeshsha goynuwaa zaarettidi essidosona. (Milkkiyaasa 3:1-5) He wodeppe doommidi, Yihoowa asay geeshsha gidida ayyaanaa beeta maqidasiyan hegeekka, Xoossay geeshsha goynuwawu giigissido giigissuwan ayyo  goynnees. Hegee ha wodiyan nuuyyo keehi koshshiyoy aybissee?

9. Kiitettidaageeti hayqqi simmin, banttana Kiristtaane giyaageetu woosa keettati Xoossawu goynniyoogaara gayttidaagan ay oottidonaa, shin Yihooway ha wodiyan ay oottidee?

⁹ Ane Kiristtaanetu taarikiyaa beˈa. Koyro xeetu layttan deˈida Kiristtaaneti ayyaanaaban daro anjjuwaa demmidosona. SHin, Yesuusinne I kiittidoogeeti geeshsha goynoy moorettanaagaanne kamettanaagaa kasetidi yootidosona. (Maatiyoosa 13:24-30; Oosuwaa 20:29, 30) Kiitettidaageeti hayqqi simmin, banttana Kiristtaane giyaageeti denddidosona. Eta qeeseti worddo timirttetanne meezeta ehiidosona. Eti Xoossay akeekanawu danddayettenna Sillaasee gi yootiyoogan, qassi asay Yihoowa woossiyoogaa aggidi Mayraamonne “geeshsha” giyo darota woossanaadaaninne qeesetuyyo paaxanaadan asaa tamaarissiyoogan Xoossaakko mule shiiqennaadan oottidosona. Geeshsha goynuwaappe asay daro xeetu layttawu haakki simmin, Yihooway ay oottidee? Worddo haymaanootiyan muleera kumidanne Xoossaa ufayssenna oosotun moorettida ha alamiyan Yihooway kelttiyaa gelidi geeshsha goynuwaa kase sohuwawu zaariis! Odoy gujoy baynnan, kase sohuwawu zaarido he hanotay ha wodiyan hanida aybippenne aadhdhiyaaba gaana danddayoos.

10, 11. (a) Ayyaana gannatiyan deˈiya naaˈˈu waannabati aybee? (b) Yihooway ayyaana gannatiyan ay mala asata shiishshidee, qassi eti ay beˈiyo maataa demmanee?

¹⁰ Yaatiyo gishshawu, tumu Kiristtaaneti ha wodiyan ayyaana gannatiyan deˈoosona. He gannatiyan aybi deˈii? Naaˈˈu waannabati deˈoosona. Koyroogee, tumanchcha Xoossaa Yihoowa geeshsha goynuwaa. Nuuni wordduwaappenne bala gidida timirttetuppe laˈa kiyidi geeshsha goynuwaa goynnanaadan oottiyoogan I nuna anjjiis. I nuussi ayyaanaa qumaa immiyoogankka nuna anjjiis. Hegee nuuni saluwan deˈiya nu Aawaabaa tamaaranaadan, A ufayssanaadaaninne akko shiiqanaadan oottees. (Yohaannisa  4:24) Ayyaana gannatiyaa macara gidida naaˈˈanttoogee asaara gayttidaba. Isiyaasi kasetidi yootidoogaadan, “wurssetta gallassatun,” Yihooway baayyo goynniyaageeta sarotettaa ogiyaa tamaarissiis. I nu giddoppe olaa muleera xayssiis. Nuuni nagaranchcha gidikkonne, “ooratta asatettaa” maayanaadan I nuna maaddees. Nuuni loˈˈo eeshshati deˈiyoogeeta gidanaadan maaddiya, ba geeshsha ayyaanaa immiyoogan I nu baaxetiyo baaxiyaa anjjees. (Efisoona 4:22-24; Galaatiyaa 5:22, 23) Neeni Xoossaa ayyaanaara maayettiya ogiyan oottiyo wode, ayyaana gannatiyaa bagga gidaasa.

¹¹ Yihooway ba ayyaana gannatiyan I siiqiyo asata shiishshees; eti A siiqiyaageeta, sarotettaa siiqiyaageetanne ‘bantta ayyaanan hiyyeesa gididoogaa eriyaageeta.’ (Maatiyoosa 5:3) Asaanne kumetta saˈaa kase sohuwawu zaariyoogaara gayttidaagan keehi maalaalissiyaabaa he asati beˈana.

12, 13. (a) Kase sohuwawu zaariyoogaa xeelliyaagan odettida hiraagati haranttuwaa polettana bessiyoy aybissee? (b) Yihooway Edenen yootidoogaadan saˈawu ay halchchidee, qassi hegee nuuni sinttanaa wodiyaa hidootan naaganaadan oottiyoy aybissee?

¹² Kase sohuwawu zaariyoogaa xeelliyaagan odettida daro hiraagati ayyaanaabaa kase sohuwawu zaariyoogaa xallaa yootiyaaba milatokkona. Leemisuwawu, sahettiyaageeti, wobbiyaageeti, qooqetinne tulleti paxiyo, ubba qassi hayqoy merinawu mitettiyo wodiyaabaa Isiyaasi yootiis. (Isiyaasa 25:8; 35:1-7) He hiraagati beni Israaˈeelan sittan polettibookkona. Ha hiraagati nu wodiyan ayyaana hanotan polettidoogaa nuuni beˈidaba gidikkonne, sinttappe kumetta hanotan polettanaagaa ammanettanaadan oottiya daro gaasoy deˈees. Nuuni hegaa waati eriyoo?

¹³ Yihooway saˈawu halchchido ba halchchuwaa beni Edenen qonccissiis: Ufayttiya, payya asay saˈan issippetettan deˈana. Kumetta saˈay gannate gidanaadan, Bitaneenne maccaasiyaa biittaanne A bolli deˈiya ubba meretaa naagana koshshees. (Doomettaabaa 1:28) Ha wodiyan deˈiya hanotay hegaappe keehi dummatees. Gidikkonne, Yihoowa halchchuwaa aybinne teqqennaagaa ammanettana danddayoos. (Isiyaasa 55:10, 11)  Yihooway Mase Kawo oottidi sunttido Yesuusi kumetta saˈay gannate gidanaadan oottana.—Luqaasa 23:43.

14, 15. (a) Yihooway ‘ubbabaa waati ooraxissanee’? (b) Gannatiyan deˈoy ay mala gidanee, qassi nena keehi ufayssiyaagee awugee?

¹⁴ Kumetta saˈay gannate gidiyoogaa beˈiyaabadan qoppa! He wodiyaabaa Yihooway hagaadan gees: “Taani ubbabaa ooraxissais.” (Ajjuutaa 21:5) Hegee woygiyoogaakko ane qoppa. Yihooway xayssanawu goˈettiyo ba wolqqan ha iita alamiyaa xayssiyo wode, attanay “ooratta saluwaanne ooratta sa7aa.” Yihoowa siiqiyaanne A sheniyaa poliya ooratta saˈaa, ooratta kawotettay saluwan uttidi haarees giyoogaa. (2 PHeexiroosa 3:13) Seexaanay ba daydanttatuura issippe muleera xayana. (Ajjuutaa 20:3) Daro shaˈu layttaappe simmin asay Seexaanay gattiyo balibakkuwaappe, ixuwaappenne qohuwaappe laˈa kiyana. Hegee keehi woppu gaanaadan oottiyaaba gidanaagee qoncce.

¹⁵ Wurssettan, ha keehi loˈˈiya saˈaa koyro nuuyyo odettidaagaadan nuuni naagana. Saˈaassi bana barkka kase sohuwawu zaariyo wolqqay deˈees. Hambbalaachchiyaabay xayikko, hambbalaashettida abbatinne shaafati banttarkka geeyana danddayoosona; olay xayikko, olan qohettida biittay kaseegaadan hanees. Meretaa higgiyaaranne biittaa yuushuwan deˈiya hanotaara maayiya ogiyan kumetta saˈay Edene ataakiltte soho mala gidanaadaaninne zawi baynna mokkiyaabaynne mehee doˈay deˈiyo soho gidanaadan oottiyoogee keehi ufayssiyaaba! Asay mehiyaa doˈaanne mokkiyaabaa eriiddi xayssiyoogaa aggidi, saˈan deˈiya ubba meretatuura sarotettan deˈana. Guutta naatikka doˈatuyyo aybanne yayyokkona.—Isiyaasa 9:6, 7; 11:1-9.

16. Gannatiyan kase sohuwawu zaarishin ammanettida asa ubbay beˈanaabay aybee?

¹⁶ Zaaretti kase sohuwawu simmiyoogaa nuuni ubbay beˈana. Armmageedoonappe attidaageeti hegaappe simmin, kumetta saˈan maalaalissiya ogiyan pattiyoogaa beˈana. Yesuusi saˈan deˈiyo wode oottidoogaadan, Xoossay ayyo immido wolqqaa qooqeta, duudeta, wobbetanne sahettidaageeta pattanawu goˈettana. (Maatiyoosa 15:30) Cimidaageetussi eta minotettay, payyatettaynne wolqqay ooraxxiyo wode eti ufayttana. (Iyyooba 33:25) Bollay cimidoogaa bessiyaabay xayana, kusheti tohoti minnana, qassi  dibbati ooraxxana. Nagaraa gaasuwan gakkida ubbabay loddan loddan muleera xayiyoogaa ammanettida asa ubbay beˈana. Kase sohuwawu zaaranawu goˈettiyo maalaalissiya A wolqqaa gishshawu Xoossaa Yihoowa nuuni keehi galatana! He kase sohuwawu zaariyo ufayssiya wodiyan hananabaappe issibaa ane beˈoos.

17, 18. (a) Yesuusi Saaduqaaweta hanqqettidoy aybissee? (b) Yihooway hayquwaappe denttanaadan Eelaasi oychchana mala oottidabay aybee?

¹⁷ Koyro xeetu layttaa M.Ln, Saaduqaaweta giyo, haymaanootiyaa kaalettiya amaridaageeti dendduwan ammanokkona. Yesuusi hanqqettidi eta hagaadan giis: “Xoossaa maxaafata woi a wolqqaa intte erenna gishshau baleeta.” (Maatiyoosa 22:29) Ee, Yihooway ba wolqqaa goˈettidi hayqqidaageeta denttana danddayiyoogaa Geeshsha Maxaafay qonccissees. Waatidi?

¹⁸ Eelaasa wode hanidabaa qoppa. Issi amˈˈiyaa ba mexi issi naˈay daafuridaagaa idimma uttaasu. Naˈay hayqqiis. He amˈˈee son amarida wodiyawu shemppida hananabaa yootiya Eelaasi keehi dagammennan waayi aggana. Kase, Eelaasi he naˈaa namisaappe ashshiis. Eelaasi he guutta naˈaa siiqennan waayi aggana. Aayyiyaa keehi kayyottaasu. Hayqqida ba azinaa A hassayanaadan oottiyay he naˈaa xalla. A cimiyo wode ba naˈay bana heemmana gaada hidootan naagennan aggukku. He amˈˈiyaa kase A oottidobaa gaasuwan qaxxayettaydda deˈays gaada yashshan maashaasu. He hanotaa beˈidi Eelaasi seelettiis. Anhaa aayee kiyuwaappe I loddan ekkidi, pude ba deˈiyo kifiliyaa efiis, efiidi Xoossaa Yihooway he naˈaa shemppuwaa woy deˈuwaa zaaranaadan oychchiis.—1 Kawotu Maxaafaa 17:8-21.

19, 20. (a) Hayquwaappe zaaretti denttiyo wolqqay Yihoowawu deˈiyoogaa Abrahaami ammaniyoogaa waati bessidee, qassi I hegaadan ammananaadan gaaso gididabay aybee? (b) Eelaasa ammanuwaa Yihooway waati minttidee?

¹⁹ Dendduwan ammanida koyro asi Eelaasa gidenna. Hayqqidaageeta denttiyo wolqqay Yihoowawu deˈiyoogaa daro xeetu layttappe kase deˈida Abrahaami ammaniis; qassi I ammananaadan oottida gaasoy deˈees. Abrahaamayyo layttay 100 gidido wodenne  Saariyyo 90 gidido wode, yelana danddayenna eti yelanaadan Yihooway oottin, Saara maalaalissiya ogiyan attuma naˈaa yelaasu. (Doomettaabaa 17:17; 21:2, 3) Guyyeppe, he naˈay diccidi gitaa gidido wode, Abrahaami ba naˈaa yarshshanaadan Yihooway oychchiis. Ba dosiyo naˈaa Yisaaqa deˈuwaa hayquwaappe Yihooway denttanaagaa Abrahaami ammaniyoogaa bessiis. (Ibraawe 11:17-19) Abrahaami ba naˈaa yarshshanawu deriyaa kiyanaappe kase inne Yisaaqi issippe simmanaagaa ba ashkkaratussi mintti yootidoy, hegaa mala mino ammanoy deˈiyo gishshataassa gidennan waayi aggana.—Doomettaabaa 22:5.

²⁰ Yisaaqi yarshshettennaadan Yihooway teqqido gishshawu, he saatiyan hayquwaappe denttana koshshibeenna. Gidoppe attin, Eelaasa wode guutta saatiyawu gidikkonne amˈˈee naˈay hayqqiis. Yihooway he naˈaa hayquwaappe denttiyoogan hananabaa yootiyaagaa ammanuwaa minttiis! He wode Eelaasi naˈaa aayeessi immidi, “Be7a, ne na7ai paxiis” yaagidi dogettennabaa haasayiis.—1 Kawotu Maxaafaa 17:22-24.

21, 22. (a) Hayquwaappe denddiyoogaabaa yootiya Geeshsha Maxaafan odettida taariketu halchchoy aybee? (b) Hayquwaappe denttiyoogee Gannatiyan ay keena aaho gidanee, qassi hegaa polanay oonee?

²¹ Yaatiyo gishshawu, hayqqida asa hayquwaappe denttanawu Yihooway ba wolqqaa goˈettidoogaa Geeshsha Maxaafay yootiyo koyro taarikee hagaa. Guyyeppe, Elssaaˈi, Yesuusi, PHawuloosinne PHeexiroosikka hayqqidaageeta denttanaadan Yihooway wolqqaa immiis. He denddidaageeti wurssettan zaarettidi hayqqidosona. Yaatikkonne, hegaa mala Geeshsha Maxaafaa taariketi sinttappe yaanabawu xeera beso.

²² Yesuusi “denddonne de7o” gididi oottiyoobaa Gannatiyan polana. (Yohaannisa 11:25) I miilooniyan qoodettiyaageeta hayquwaappe denttidi, eti saˈan Gannatiyan merinawu deˈanaadan etawu deˈuwaa immana. (Yohaannisa 5:28, 29) Hayqqoosappe daro wodee aadhdhido, siiqiyo laggetinne dabboti zaaretti gayttidi issoy issuwaa qoommidi ufayttanaagaa qoppa! Yihooway kase sohuwawu zaariyo wolqqaa gishshawu asa ubbay A sabbana.

23. Yihooway ba wolqqaa bessido ubbaappe aadhdhiya ogee aybee, qassi hegee nuuni sinttanaa hidootan ammanettanaadan waati oottii?

 ²³ He hidootay polettennan attennaagaa bessiyaabaa Yihooway oottiis. Yihooway ba Naˈaa Yesuusa wolqqaama ayyaana mereta ootti hayquwaappe denttidi baappe kaalliya maataa immiyoogan, ba wolqqaa ubbaappe aadhdhiya ogiyan bessiis. Yesuusi hayquwaappe denddi simmidi xeetan qoodettiya asawu qoncciis. (1 Qoronttoosa 15:5, 6) Dendduwan ammanennaageetussikka, hegee gidiya naqaasha. Zaarettidi deˈuwaa immanawu Yihoowawu wolqqay deˈees.

24. Yihooway hayqqidaageeta denttanaagaa nuuni ammanettana danddayiyoy aybissee, qassi nuuni ufayttanaadan oottiya hidootay aybee?

²⁴ Hayqqidaageeta denttanawu Yihoowawu wolqqay deˈiyoogaa xalla gidennan, hegaa oottanawu koshshaykka deˈees. Yihooway hayqqidaageeta denttanawu laamotiyoogaa ammanettida bitanee Iyyoobi ayyaanay denttettin yootiis. (Iyyooba 14:15) Kase sohuwawu zaaranawu goˈettiyo ba wolqqaa siiqiyoogaa bessiya ogiyan hegaadan goˈettanawu koyiya nu Xoossaakko shiiqanawu koyikkii? SHin, kase sohuwawu zaaranawu Yihooway oottiyo gita oosotuppe denddoy issuwaa xalla gidiyoogaa hassaya. Neeni kaseegaappe aaruwan akko shiiqiyoogan, Yihooway ‘ubbabaa ooraxissaanawu’ gelido qaalay polettiyo wode beˈana danddayiyoogan ubbatoo ufaytta.—Ajjuutaa 21:5.