10-تاراۋ
كۇشتەرىڭدى قولدانعاندا «قۇدايدان ۇلگى الىڭدار»
1. كەمەلسىز ادامداردىڭ قانداي تۇزاققا ٴتۇسىپ قالۋى وپ-وڭاي؟
«بيلىككە جەتكەن تۇزاققا تۇسەر». بۇل سوزدەردى ٴحىح عاسىردىڭ ٴبىر اقىنى جازعان. ول بۇنىسىمەن ٵربىر بيلىك يەسى ٷشىن ونى بۇرىس قولدانۋ قاۋپى بار ەكەنىنە كوڭىل اۋدارعان. وكىنىشكە وراي، كەمەلسىز ادامداردىڭ ٴبارىنىڭ وسى تۇزاققا ٴتۇسىپ قالۋى وپ-وڭاي. ٴيا، ادامزات تاريحى بويى ادام ‹ادامعا زيان كەلتىرە وتىرىپ، ٵمىر جۇرگىزىپ› كەلەدى (ەككلەسياست 8:9). سۇيىسپەنشىلىكتەن ادا بيلىك ادام بالاسىن ايتىپ بولمايتىن قاسىرەتكە ۇشىراتقان.
2، 3. ا) ەحوبانىڭ كۇشىن قولدانۋىندا نە نارسە كەرەمەت؟ ٵ) ٴبىزدىڭ قانداي كۇشىمىز بار جانە ونى قالاي قولدانۋىمىز كەرەك؟
2 ەحوبا قۇداي شەكسىز كۇش پەن بيلىكتىڭ يەسى بولا تۇرا، مۇنى ەشقاشان تەرىس قولدانبايتىنى كەرەمەت ەمەس پە؟! الدىڭعى تاراۋلاردان بايقاعانىمىزداي، ول ٶز كۇشىن — جاسامپاز، جويۋشى، قورعايتىن جانە قايتا قالپىنا كەلتىرەتىن كۇشىن — ارقاشان سۇيىسپەنشىلىككە تولى نيەتىنە ساي قولدانادى. ەحوبانىڭ ٶز كۇشىن قالاي قولداناتىنى تۋرالى وي جۇگىرتكەندە، وعان جاقىنداۋعا دەگەن ىقىلاس پايدا بولادى. ال بۇل، ٶز كەزەگىندە، كۇشىمىزدى قولدانعاندا ‹قۇدايدان ۇلگى الۋعا› تالپىندىرادى (ەفەستىكتەرگە 5:1). ٴبىراق جۇمىر باستى پەندەدە قانداي كۇش بار؟
3 ادام بالاسىنىڭ قۇدايعا «رۋحاني جاعىنان ۇقساس» ەتىپ جاراتىلعانىن ەسىڭە الشى (جاراتىلىس 1:26، 27). سوندىقتان ٴبىزدىڭ دە ازدى-كوپتى كۇشىمىز بار. ول ٴبىزدىڭ قانداي دا ٴبىر ٸستى اتقارۋ قابىلەتىمىزدەن؛ وزگەلەرگە جۇرگىزەتىن بيلىگىمىز نە ىقپالىمىزدان؛ وزگە ادامدارعا، اسىرەسە ٶزىمىزدى سۇيەتىن ادامدارعا، اسەر ەتە الاتىندىعىمىزدان؛ سونداي-اق قاجىر-قايراتىمىز بەن قولداعى مال-مۇلكىمىزدەن كورىنەدى. ەحوباعا قاتىستى ٴزابۋر جىرشىسى: «ٶمىردىڭ قاينار كوزى سەندە»،— دەگەن (ٴزابۋر 36:9 [35:10]). دەمەك، ٴبىزدىڭ كۇشىمىز، تىكەلەي نە جاناما تۇردە، قۇدايدان كەلەدى. سوندىقتان ونى قۇدايعا ۇنايتىنداي ەتىپ قولدانۋدى قالايمىز. ول ٷشىن نە ىستەۋ كەرەك؟
ەڭ باستىسى — سۇيىسپەنشىلىك
4، 5. ا) كۇشتى دۇرىس قولدانۋدىڭ كوزى نەدە جانە قۇدايدىڭ ٶز ۇلگىسىنەن بۇل قالاي كورىنەدى؟ ٵ) قالاي سۇيىسپەنشىلىك كۇشىمىزدى دۇرىس قولدانۋعا كومەكتەسەدى؟
4 كۇشتى دۇرىس قولدانۋدىڭ كىلتى — سۇيىسپەنشىلىك. قۇدايدىڭ ٶز ۇلگىسىنەن وسىنى كورمەيمىز بە؟ ٴبىرىنشى تاراۋدا قۇدايدىڭ باستى ٴتورت قاسيەتىن — كۇشىن، ادىلدىگىن، دانالىعى مەن سۇيىسپەنشىلىگىن — تالقىلاعانىمىزدى ەسىڭە الشى. وسىلاردىڭ ەڭ ماڭىزدىسى قايسىسى؟ سۇيىسپەنشىلىك. جوحاننىڭ 1-حاتىنىڭ 4:8-تارماعىندا: «قۇداي — سۇيىسپەنشىلىك»،— دەلىنگەن. ٴيا، ەحوبا — سۇيىسپەنشىلىكتىڭ ناق بەينەسى. ونىڭ بارلىق ىستەرىنە سۇيىسپەنشىلىك قوزعاۋ سالادى. سوندىقتان ونىڭ سۇيىسپەنشىلىگى كۇشىن قولدانۋعا دا تۇرتكى بولىپ، اقىرىندا بۇل ٶزىن سۇيەتىندەردىڭ يگىلىگىنە اسادى.
5 سۇيىسپەنشىلىك بىزگە دە كۇشىمىزدى دۇرىس قولدانۋعا كومەكتەسەدى. كيەلى كىتاپتا سۇيىسپەنشىلىكتىڭ «مەيىرىمدى» ٵرى «ٶزىمشىل» ەمەس ەكەنى ايتىلعان عوي (قورىنتتىقتارعا 1-حات 13:4، 5). سوندىقتان بىرەۋگە بيلىگىمىز جۇرەتىن بولسا، سۇيىسپەنشىلىك ولارعا دورەكىلىك جاساپ، مەيىرىمسىزدىك كورسەتۋدەن اۋلاق ەتەدى. ونىڭ ورنىنا، ٴبىز وزگەلەردى سيلاپ، ولاردىڭ قاجەتتىلىكتەرى مەن سەزىمدەرىن وزىمىزدىكىنەن جوعارى قويامىز (فىلىپىلىكتەرگە 2:3، 4).
6، 7. ا) قۇدايدان قورقۋ دەگەن نە جانە نەگە بۇل قاسيەت كۇشىمىزدى تەرىس قولدانۋدان اۋلاق بولۋىمىزعا كومەكتەسەدى؟ ٵ) قۇدايعا ۇنامسىز بولۋدان قورقۋ مەن وعان دەگەن سۇيىسپەنشىلىكتىڭ بايلانىسىن مىسال ارقىلى ٴتۇسىندىر.
6 سۇيىسپەنشىلىكتىڭ كۇشىمىزدى تەرىس قولدانۋدان اۋلاق بولۋىمىزعا كومەكتەسەتىن تاعى ٴبىر قاسيەتپەن بايلانىسى بار. بۇل — قۇدايدان قورقۋ. ٴبىز ٷشىن ول قانشالىقتى ماڭىزدى؟ ناقىل سوزدەر 8:13 تە: «جاراتقاندى قاستەرلەپ، مويىنسۇنۋ، [«ەحوبادان قورقۋ»، جد]، بۇل — جاماندىق اتاۋلىنى جەك كورۋ»،— دەلىنگەن. كۇشتى تەرىس قولدانۋ ٴبىز جەك كورۋگە ٴتيىس جاماندىق اتاۋلىعا جاتاتىنى ٴسوزسىز. قۇدايدان قورقۋ بيلىگىمىز جۇرەتىن ادامدارعا وكتەمدىك ەتۋدەن اۋلاق ەتەدى. نەگە بۇلاي دەيمىز؟ ەڭ باستى جايت، ٴبىز مۇنداي ادامدارعا قاتىستى قالاي ارەكەت ەتكەنىمىز ٷشىن، قۇداي الدىندا ەسەپ بەرەتىنىمىزدى بىلەمىز (نەحەميا 5:1—7، 15). ٴبىراق قۇدايدان قورقۋدىڭ باسقا دا قىرى بار. ٴتۇپنۇسقا تىلىنەن «قورقۋ» دەپ اۋدارىلعان ٴسوز ٴجيى قۇدايدى ايرىقشا قۇرمەتتەۋ نەمەسە تەرەڭ قاستەرلەۋ دەگەن ويعا نۇسقايدى. سوندىقتان كيەلى كىتاپتا قورقىنىش پەن قۇدايعا دەگەن سۇيىسپەنشىلىكتىڭ اراسىندا بايلانىس بار ەكەنى كورسەتىلەدى (زاڭدى قايتالاۋ 10:12، 13). ايرىقشا قۇرمەتتەۋ قۇدايعا ۇنامسىز بولۋدان قورقۋدى بىلدىرەدى. مۇنداي قورقىنىش جازادان شوشىنعاندىقتان ەمەس، ونى شىنىمەن سۇيگەندىكتەن تۋادى.
7 اكەسىمەن جاقسى قارىم-قاتىناستاعى كىشكەنتاي بالاقاي جايلى ويلاپ كورشى. بالا اكەسىنىڭ وزىنە دەگەن مەيىرىمى مەن سۇيىسپەنشىلىكپەن قامىن ويلايتىنىن سەزەدى. سويتە تۇرا، ول اكەسىنىڭ نە تالاپ ەتەتىنىن، سونداي-اق بۇزىقتىق جاساسا، جونگە سالاتىنىن دا بىلەدى. ٴبىراق بالا اكەسىنەن جان ۇشىرا قورىقپايدى. قايتا، ونى بار كوڭىلىمەن جاقسى كورەدى. ارەكەتى اكەسىنىڭ كوڭىلىنەن شىقسا، ٴبۇلدىرشىن ٴماز-مەيرام بولادى. قۇدايدان قورقۋ جونىندە دە وسىلاي دەۋگە بولادى. ٴبىز كوكتەگى اكەمىز ەحوبانى جاقسى كورگەندىكتەن، ونىڭ كوڭىلىن تۇسىرەتىن كەز كەلگەن ارەكەتتەن شوشىنامىز (جاراتىلىس 6:6). مۇنداي ارەكەتتىڭ ورنىنا، قايتا، ونى قۋانتۋعا ىنتىق بولامىز (ناقىل سوزدەر 27:11). مىنە، وسىنداي سەبەپتەرمەن كۇشىمىزدى دۇرىس قولدانعىمىز كەلەدى. مۇنى قالاي ىستەۋگە بولاتىندىعىنىڭ جولدارىن قاراستىرىپ كورەيىك.
وتباسىندا
8. ا) وتاعاسىنىڭ قانداي بيلىگى بار جانە ول ونى قالاي قولدانادى؟ ٵ) كۇيەۋى ايەلىن قۇرمەتتەيتىنىن قالاي كورسەتەدى؟
8 الدىمەن، وتباسىنا كوڭىل بولەيىك. ەفەستىكتەرگە 5:23 تە ‹ەركەك ايەلدىڭ «باسى»› ەكەندىگى ايتىلعان. وتاعالارى قۇداي بەرگەن بيلىگىن قالاي قولدانادى؟ كيەلى كىتاپتا كۇيەۋلەردىڭ ٶز ايەلدەرىن ‹العان بىلىمدەرىنە سايكەس نازىك ىدىستاي قۇرمەتتەۋلەرى› كەرەك ەكەنى ايتىلعان (پەتىردىڭ 1-حاتى 3:7، جد). مۇنداعى «قۇرمەتتەۋ» دەپ اۋدارىلعان گرەك ٴسوزى «ماداقتاۋ، باعالاۋ... سيلاۋ» دەگەندى بىلدىرەدى. بۇل ٴسوز بىردە ‹ەرەكشە قىمبات «تاس»› دەپ تە اۋدارىلعان (پەتىردىڭ 1-حاتى 2:7). ايەلىن قۇرمەتتەيتىن كىسى ەشقاشان وعان قول كوتەرمەيدى، سونداي-اق كەمسىتىپ نە قورلاپ مىسىن باسپايدى. قايتا، جارىن باعالاپ، سيلايدى. ول سوزىمەن دە، ىسىمەن دە، مەيلى، وڭاشادا نە جۇرتتىڭ كوزىنشە بولسىن، ايەلىنىڭ ٶزى ٷشىن قىمبات ەكەنىن كورسەتەدى (ناقىل سوزدەر 31:28). مۇنداي كۇيەۋ ايەلىنىڭ سۇيىسپەنشىلىگى مەن قۇرمەتىنە يە بولىپ قانا قويمايدى، ودان دا ماڭىزدىسى، ول قۇدايعا ۇنامدى بولادى.
ىزگى حاباردى تاراتۋ — كۇشىمىزدى قولدانۋدىڭ ەڭ كەرەمەت جولى
9. ا) وتباسىندا ايەلدىڭ قانداي ىقپالى بار؟ ٵ) ايەلدىڭ ٶز قابىلەتتەرىن كۇيەۋىن قولداۋ ٷشىن پايدالانۋىنا نە كومەكتەسەدى جانە مۇنىڭ ناتيجەسى قانداي بولادى؟
9 ايەلدىڭ دە وتباسىندا بەلگىلى ٴبىر ىقپالى بار. كيەلى كىتاپتا باسشىلىق ٴپرينسيپىن بۇزباي، ٴبىرىنشى بولىپ ارەكەت ەتىپ، كۇيەۋلەرىنە جاقسى جاعىنان اسەر ەتكەن نەمەسە ولارعا تەرىس كوزقاراستان اۋلاق بولۋعا كومەكتەسكەن قۇدايعا ۇنامدى ايەلدەر جونىندە اڭگىمەلەنەدى (جاراتىلىس 21:9—12؛ 27:46—28:2). ايەلىنىڭ كۇيەۋىنە قاراعاندا زەردەسى جۇيرىك بولۋى مۇمكىن نەمەسە بويىندا كۇيەۋىنەن تابىلمايتىن قابىلەتتەر بار شىعار. سويتسە دە ول كۇيەۋىن بارىنشا «كۇرمەتتەپ»، وعان «يەمىزگە مويىنسۇنعانداي» بويسۇنادى (ەفەستىكتەرگە 5:22، 33). ايەلدىڭ قۇدايعا ۇنامدى بولۋدى جادىندا ۇستاعانى كۇيەۋىنىڭ بەدەلىن ٴتۇسىرۋدىڭ نەمەسە وعان وكتەمدىك ەتۋگە تىرىسۋدىڭ ورنىنا، ٶز قابىلەتتەرىن جۇبايىن قولداۋ ٷشىن پايدالانۋىنا كومەكتەسەدى. وسىلايشا كۇيەۋىمەن بىرلەسە ارەكەت ەتەتىن ناعىز اقىلدى ايەل وتباسىن وركەندەتەدى. ال بۇل، ٶز كەزەگىندە، قۇدايمەن تاتۋ بولۋىنا ىقپال ەتەدى (ناقىل سوزدەر 14:1).
10. ا) قۇداي اتا-انالارعا قانداي بيلىك بەرگەن؟ ٵ) «نۇسقاۋ بەرۋ» دەگەن نەنى بىلدىرەدى جانە بالاعا قالاي نۇسقاۋ بەرۋگە بولادى؟ (سىلتەمەگە دە قارا)
10 سونىمەن قاتار قۇداي اتا-انالارعا دا بيلىك بەرگەن. كيەلى كىتاپ مىناعان شاقىرادى: «اكەلەر، بالالارىڭا شاماسى كەلمەيتىن تالاپ قويىپ، اشۋلاندىرماي، يەمىزدىڭ تالىمىمەن نۇسقاۋىن بەرىپ، تاربيەلەڭدەر!» (ەفەستىكتەرگە 6:4، سىلتەمەنى قارا) كيەلى كىتاپتاعى «نۇسقاۋ بەرۋ» دەگەن ٴسوز «ٴتالىم بەرۋ، ٴجون سىلتەۋ، تاربيەلەۋدى» ٴبىلدىرۋى مۇمكىن. بالا وسىعان مۇقتاج، ول انىق نۇسقاۋلار بەرىلىپ، ناقتى شەكتەۋلەر قويىلىپ وتىرعاندا عانا باقىتتى ٵرى كەلەشەگىنە سەنىمدى بولادى. كيەلى كىتاپتا وسىلاي نۇسقاۋ بەرۋ، نەمەسە تاربيەلەۋ، سۇيىسپەنشىلىكپەن جۇزەگە اسىرىلۋ كەرەكتىگى ايتىلعان (ناقىل سوزدەر 13:24). سوندىقتان «جونگە سالاتىن شىبىق» بالاعا ەشقاشان ەموسيالىق نە تاندىك جاعىنان زيان كەلتىرمەۋ كەرەك a (ناقىل سوزدەر 22:15، جد؛ 29:15). سۇيىسپەنشىلىكتەن ادا قاتاڭ نە دورەكى تاربيە — اتا-انانىڭ ٶز بيلىگىن تەرىس قولداناتىندىعىنىڭ بەلگىسى، ٵرى بالانىڭ جىگەرىن جاسىتۋى مۇمكىن (قولوستىقتارعا 3:21). ال ورنىمەن جازالاپ، بايىپپەن تاربيەلەۋ بالانىڭ اتا-اناسى ونى جاقسى كورەتىندىگىنە جانە ەرتەڭگى كۇنى قانداي ادام بولاتىنىن ويلايتىندارىنا كوزىن جەتكىزەدى.
11. قالاي بالالار كۇشتەرىن دۇرىس قولدانا الادى؟
11 ال بالالار جونىندە نە دەۋگە بولادى؟ ولار دا ٶز كۇشتەرىن دۇرىس قولدانا الا ما؟ ناقىل سوزدەر 20:29 دا: «جاستاردىڭ ماقتانارى — كۇش-قۋاتى»،— دەلىنگەن. راسىندا دا، جاستارعا بار قاجىر-قايراتى مەن كۇش-جىگەرىن جاراتۋشىمىزعا قىزمەت ەتۋ ٷشىن قولدانۋدان ارتىق ٶمىر جولى جوق (ەككلەسياست 12:1). جاستار ٸس-ارەكەتتەرى اتا-انالارىنىڭ سەزىمدەرىنە اسەر ەتەتىنىن ەستە ۇستاۋلارى كەرەك (ناقىل سوزدەر 23:24، 25). بالالار قۇدايدان قورقاتىن اتا-انالارىنا بويسۇنىپ، دۇرىس باعىتتان اۋىتقىمايتىن بولسا، ولاردىڭ جۇرەكتەرىن قۋانىشقا بولەيدى (ەفەستىكتەرگە 6:1). ولاردىڭ وسىلاي ەتكەندەرى ‹يەمىزگە ۇنايدى› (قولوستىقتارعا 3:20).
قاۋىمدا
12، 13. ا) اقساقالدار قاۋىمداعى بيلىكتەرىنە قاتىستى قانداي كوزقاراستا بولۋلارى كەرەك؟ ٵ) اقساقالدار ٵربىر باۋىرلاستى نە سەبەپتى ايالاپ كۇتۋ كەرەكتىگىن مىسالمەن ٴتۇسىندىر.
12 ەحوبا ماسىحشىلەر قاۋىمىندا باسشىلىقتى قولدارىنا الاتىن باقىلاۋشىلار بولۋ ٷشىن قام جاساعان (ەۆرەيلەرگە 13:17). وسى رۋحاني تولىسقان ەر كىسىلەر قۇداي بەرگەن بيلىكتەرىن قاۋىمعا قولعابىس ەتۋ ٷشىن جانە وتاردىڭ يگىلىگى ٷشىن قولدانۋلارى كەرەك. ولاردىڭ بيلىگى باۋىرلاستارىنا وكتەمدىك ەتۋگە قۇقىق بەرە مە؟ ارينە، جوق! اقساقالدار قاۋىمدا الاتىن ورىندارىنا بايسالدى ٵرى كىشىپەيىلدىلىكپەن قاراۋلارى كەرەك (پەتىردىڭ 1-حاتى 5:2، 3). كيەلى كىتاپتا باقىلاۋشىلارعا: «قۇداي ٶز ۇلىنىڭ قانىمەن مەنشىگىنە العان قاۋىمىنا باقتاشى بولىپ جۇرگەيسىڭدەر!»— دەلىنگەن (ەلشىلەردىڭ ىستەرى 20:28، سىلتەمەنى قارا). بۇل — ٵربىر باۋىرلاستى ايالاپ كۇتۋدىڭ كەلەلى سەبەبى.
13 مىسالى، جاقىن دوسىڭ ٶزى ەرەكشە باعالايتىن ٴبىر زاتىن ساعان اماناتتاپ كەتتى دەلىك. سەن دوسىڭنىڭ ونى وتە قىمبات باعاعا العانىن دا بىلەسىڭ. ولاي بولسا، ٴبۇلدىرىپ الماۋ ٷشىن ونى ەرەكشە كۇتىپ ۇستايدى ەمەسسىڭ بە؟ تاپ سول سياقتى قۇداي ٶزى شىنىمەن باعالايتىن مەنشىگىن، قويعا تەڭەلەتىن حالقىنان تۇراتىن قاۋىمدى، اقساقالداردىڭ جاۋاپكەرشىلىگىنە تاپسىردى (جوحان 21:16، 17). ەحوبا ٶز قويلارىن وتە باعالايدى. ولاردى باعالاعانى سونشالىق — جالعىز ۇلى يسا ٴماسىحتىڭ قۇندى قانىمەن ساتىپ العان. ەحوبا قويلارىنا بۇدان جوعارى قۇن تولەي الار ما ەدى!؟ كىشىپەيىل اقساقالدار وسىنى ەستەرىندە ۇستاي وتىرىپ، سوعان ساي ارەكەت ەتەدى.
ٴتىلدىڭ بيلىگى
14. ٴتىلدىڭ قانداي بيلىگى بار؟
14 كيەلى كىتاپتا: «تىلدە ٶمىر مەن ٶلىمنىڭ بيلىگى بولار»،— دەلىنگەن (ناقىل سوزدەر 18:21). ٴتىل كوپ زيان كەلتىرۋى مۇمكىن. بىرەۋدىڭ ويلانباي ايتقان نە قىرشاڭقى ٴسوزى كىمنىڭ جانىن اۋىرتپاعان دەيسىڭ؟ ٴبىراق ٴتىلدىڭ شيپا بولاتىن دا كۇشى بار. ناقىل سوزدەر 12:18 دە: «دانا تىلىمەن جان جاراسىن ساۋىقتىرار»،— دەلىنگەن. ٴيا، جىگەر بەرەتىن جاقسى سوزدەر جانعا شيپا، دەرتتى جۇرەككە داۋا بولادى. كەيبىر مىسالداردى قاراستىرىپ كورەيىك.
15، 16. قالايشا ٴتىلىمىزدى وزگەلەردى جىگەرلەندىرۋ ٷشىن قولدانۋعا بولادى؟
15 سالونيقالىقتارعا 1-حات 5:14 تە (جد) جازىلعان سوزدەر: «جانى كۇيزەلگەندەردى جۇباتىڭدار»،— دەپ شاقىرادى. ەحوبانىڭ ادال قىزمەتشىلەرى دە كەيدە جان كۇيزەلىسىنە ٴتۇسىپ جاتادى. ولارعا قالاي كومەكتەسۋگە بولادى؟ شىن جۇرەكتەن ماقتاۋ سوزدەر ايتىپ، ەحوبا ٷشىن باعالى ەكەندەرىن سەزىنۋلەرىنە كومەكتەس. ەحوبانىڭ «جۇرەگى جارالى»، ‹ەڭسەسى تۇسكەن› جانداردىڭ كۇيىن ويلايتىنىن ٵرى ولاردى سۇيەتىنىن كورسەتەتىن كيەلى كىتاپتاعى اسەرلى سوزدەردى ەستەرىنە سال (ٴزابۋر 34:18، جد؛ [33:19]). ٴتىلىمىزدىڭ بيلىگىن وزگەلەردى جۇباتۋ ٷشىن قولداناتىن بولساق، «ەڭسەسى تۇسكەندەردى جىگەرلەندىرەتىن» جاناشىر قۇدايىمىزعا ەلىكتەيتىنىمىزدى كورسەتەمىز (قورىنتتىقتارعا 2-حات 7:6).
16 ٴتىلىمىزدىڭ بيلىگىن جىلى سوزگە ٴزارۋ بولىپ جۇرگەندەردى جىگەرلەندىرۋ ٷشىن دە قولدانۋىمىزعا بولادى. قانداي دا ٴبىر باۋىرلاس جاقىنىنان ايىرىلسا، جاناشىرلىقپەن ايتىلعان سوزدەر ونىڭ قامىن ويلايتىنىمىزدى كورسەتىپ، قايعى-مۇڭعا باتقان جۇرەگىنە جۇبانىش بەرەدى. ەگدە باۋىرلاس ٶزىن تۇككە تۇرعىسىز سەزىنىپ جۇرگەن بولسا، كوڭىل ٴبولىپ، جانعا جاعىمدى سوزدەر ايتساق، ٶزىن قاجەتتى دە باعالى سەزىنىپ، كوڭىلى ٶسىپ قالادى. الدەكىم سوزىلمالى اۋرۋدان جاپا شەگىپ جۇرسە، تەلەفون سوعۋ، حات جازۋ ارقىلى نە جەكە كەزدەسكەندە، مەيىرىممەن ايتقان سوزدەرىمىز رۋحىن كوتەرىپ تاستايدى. قىزىل ٴتىلدىڭ كۇشىن باۋىرلاستارىمىزدىڭ ‹سەنىمدەرىن جەتىلدىرۋ› ٷشىن قولدانعانىمىز جاراتۋشىمىزدى بارىنشا قۋانتاتىن بولۋ كەرەك! (ەفەستىكتەرگە 4:29)
17. باسقالاردىڭ يگىلىگى ٷشىن ٴتىلىمىزدى قانداي ماڭىزدى ٸس ٷشىن قولدانۋىمىزعا بولادى جانە نەگە سولاي ەتۋىمىز كەرەك؟
17 ٴتىلدىڭ بيلىگىن قولدانۋدىڭ اناعۇرلىم ماڭىزدى جولى — قۇداي پاتشالىعى تۋرالى ىزگى حاباردى تاراتۋ. ناقىل سوزدەر 3:27 دە: «قولىڭنان كەلىپ تۇرعاندا مۇقتاجدارعا جاقسىلىق كورسەت، سوعان لايىق جاندارعا»،— دەلىنگەن. امان قالۋعا مۇمكىندىك بەرەتىن ىزگى حاباردى وزگەلەرگە جەتكىزۋ — ٴبىزدىڭ مىندەتىمىز. ەحوبا بىزگە كەڭپەيىلدىلىكپەن اشقان جايتتى وزگەلەردەن جاسىرىپ قالعانىمىز دۇرىس بولماس ەدى (قورىنتتىقتارعا 1-حات 9:16، 22). ٴبىراق ول بىزدەن بۇل جۇمىستى قاي شامادا اتقارادى دەپ كۇتەدى؟
ەرلى-زايىپتىلار ٴبىر-ٴبىرىن سيلاپ، ٵرى سۇيىسپەنشىلىكپەن ارەكەت ەتۋ ارقىلى كۇشتەرىن دۇرىس قولدانادى
ەحوباعا ‹بار كۇش-قۋاتىمىزبەن› قىزمەت ەتۋ
18. ەحوبا بىزدەن نە كۇتەدى؟
18 ەحوباعا دەگەن سۇيىسپەنشىلىگىمىز قىزمەتىمىزدى بارىنشا تولىق اتقارۋعا تالپىندىرادى. سوندا ول بىزدەن نە كۇتەدى؟ جاعدايىمىزدىڭ قانداي ەكەنىنە قاراماستان، ٴبارىمىزدىڭ دە قولىمىزدان كەلەتىن ٴبىر نارسە بار. ول — ‹قانداي جۇمىس بولسا دا، ونى ادام بالاسى ٷشىن عانا ەمەس، يەمىز ٷشىن ىستەپ جۇرگەندەي جان-تانىمىزبەن اتقارۋ› (قولوستىقتارعا 3:23). يسا ەڭ باستى وسيەتتەگى سوزدەردى كەلتىرىپ، بىلاي دەگەن: «قۇداي يەڭدى شىن جۇرەكتەن، بۇكىل جان دۇنيەڭمەن، بارلىق اقىل-ويىڭمەن، بار كۇش-قۋاتىڭمەن ٴسۇي!» (مارقا 12:30) ٴيا، ەحوبا ٴارقايسىمىزدان ٶزىن سۇيەدى، ٵرى بۇكىل جان دۇنيەسىمەن قىزمەت ەتەدى دەپ كۇتەدى.
19، 20. ا) جان دەگەن ٴسوزدىڭ ٶزى جۇرەك، اقىل-وي، كۇش-قۋات دەگەندى قامتيتىن بولسا، مارقا 12:30 دا مۇنىڭ بارلىعى نە ٷشىن جەكە-جەكە ايتىلعان؟ ٵ) ەحوباعا جان دۇنيەڭمەن قىزمەت ەتۋ دەگەن نەنى بىلدىرەدى؟
19 قۇدايعا بۇكىل جان دۇنيەڭمەن قىزمەت ەتۋ دەگەن نەنى بىلدىرەدى؟ جان دەگەن ادامنىڭ، بارلىق تاندىك ەرەكشەلىكتەرى مەن وي-ساناسىن قوسا العاندا، تۇتاس بولمىسىن بىلدىرەدى. جان دەگەن ٴسوزدىڭ ٶزى جۇرەك، اقىل-وي، كۇش-قۋات دەگەندى قامتيتىن بولسا، مارقا 12:30 دا مۇنىڭ بارلىعى نە ٷشىن جەكە-جەكە ايتىلعان؟ مىسالى: كيەلى كىتاپ زامانىندا ادام ٶزىن (جانىن) قۇلدىققا ساتىپ جىبەرە الاتىن. ٴبىراق قۇل قوجايىنىنا بار كوڭىلىمەن قىزمەت ەتپەۋى، سونداي-اق ونىڭ مۇددەسى ٷشىن بار كۇشىن نەمەسە بار وي-ساناسىن جۇمساماۋى مۇمكىن ەدى (قولوستىقتارعا 3:22). سوندىقتان يسا ٴبىز قۇدايعا قىزمەت ەتكەندە، بارىمىزدى سارقىپ بەرۋىمىز كەرەكتىگىنە ەرەكشە كوڭىل ٴبولۋ ٷشىن سولاي ەتكەن بولۋ كەرەك. قۇدايعا بۇكىل جان دۇنيەڭمەن قىزمەت ەتۋ دەگەن مۇمكىندىگىنشە بار كۇشىمىز بەن قاجىر-قايراتىمىزدى ەش قالدىقسىز، تولىعىمەن قىزمەتكە ارناۋدى بىلدىرەدى.
20 بۇكىل جان دۇنيەڭمەن قىزمەت ەتۋ دەگەن ٴبارىمىز ۋاعىزعا بىردەي ساعات پەن كۇش جۇمساۋىمىز كەرەك دەگەندى بىلدىرە مە؟ بۇلاي ەتۋ مۇمكىن ەمەس، ويتكەنى ٵربىر ادامنىڭ جاعدايى مەن مۇمكىندىگى ٵر ٴتۇرلى. مىسالى، دەنساۋلىعى زور، كۇشى تاسىپ تۇرعان جاستار جاسى ۇلعايىپ، قايراتىنان ايىرىلا باستاعان باۋىرلاستارعا قاراعاندا ۇزاعىنان ۋاعىزداي بەرەتىن شىعار. وتباسى جاۋاپكەرشىلىكتەرى بارلارعا قاراعاندا سالت باستىلار كوبىرەك ٸس اتقارا الاتىن بولار. جاعدايىمىزدىڭ ىڭعايى كەلىپ، ٵرى بويىمىزدا كۇش-قۋات بولىپ، قىزمەتكە كوبىرەك اتسالىسا الاتىن بولساق، سوعان ريزا بولۋىمىز كەرەك ەمەس پە! بۇل ماسەلەدە ٴبىز ٶزىمىزدى وزگەلەرمەن سالىستىرىپ، سىنشىل رۋح تانىتقىمىز كەلمەيدى (ريمدىكتەرگە 14:10—12). قايتا، قاجىر-قايراتىمىزدى باسقالاردى جىگەرلەندىرۋگە ارناۋدى قالايمىز.
21. كۇشىمىزدى قولدانۋدىڭ ەڭ جاقسى ٵرى ماڭىزدى جولى قانداي؟
21 ەحوبا كۇشتى دۇرىس قولدانۋدا كەمەلدى ۇلگى قالدىرعان. كەمەلسىز ادام رەتىندە ٴبىز قولىمىزدان كەلگەنشە ونىڭ ۇلگىسىنە ەلىكتەگىمىز كەلەدى. بىرەۋگە بيلىگىمىز جۇرەتىن بولسا، ولاردى سيلاۋ ارقىلى كۇشىمىزدى دۇرىس قولدانۋىمىزعا بولادى. بۇعان قوسا، ەحوبا تاپسىرعان ۋاعىزداۋ ٸسىن بار جان دۇنيەمىزبەن اتقارۋدى قالايمىز (ريمدىكتەرگە 10:13، 14). ەسىڭدە بولسىن، سەن (ياعني سەنىڭ جانىڭ) قولىڭنان كەلگەنىن بەرىپ جۇرسەڭ، ەحوبا قۋانادى. ٶزىمىزدى تۇسىنەتىن ٵرى سۇيەتىن وسىنداي قۇدايعا قىزمەت ەتكەندە، جۇرەگىمىز ٴبىزدى بارىمىزدى سالۋعا تالپىندىرادى ەمەس پە؟ كۇشىمىزدى قولدانۋدىڭ بۇدان ارتىق نەمەسە ماڭىزدى جولى جوق.
a ەرتەدە «شىبىق» دەگەن ەۆرەي ٴسوزى قويشىنىڭ مالعا باعىت بەرىپ، ايداۋ ٷشىن قولداناتىن تاياعىن بىلدىرەتىن (ٴزابۋر 23:4 [22:4]). سول سياقتى اتا-انانىڭ بيلىك «شىبىعى» دا دورەكى نە مەيىرىمسىزدىكپەن جازالاۋدى ەمەس، سۇيىسپەنشىلىكپەن ٴجون سىلتەۋدى بىلدىرەدى.
