1. Den ki trampa sutil hende imperfecto ta cai facilmente?

“NO TIN poder sin un trampa scondi.” E palabranan ei di un poeta di siglo 19 ta hala atencion na un peliger sutil: mal uzo di poder. Lamentablemente, hende imperfecto ta cai facilmente den e trampa aki. En berdad, atrabes di historia ‘hende a eherce autoridad riba otro hende pa su daño.’ (Eclesiastes 8:9) Uzo di poder sin amor a resulta den hopi sufrimento humano.

2, 3. (a) Kico ta remarcabel tocante e manera cu Yehova ta uza su poder? (b) Den ki sentido nos por tin poder, y con nos mester uza e poder ei semper?

² Pero no ta remarcabel cu Yehova Dios, kende tin poder sin limite, nunca ta haci mal uzo di e poder ei? Manera nos a nota den e capitulonan anterior, semper e ta uza su poder—sea pa crea, pa destrui, pa proteha of pa restaura—na harmonia cu su propositonan amoroso. Ora nos medita riba con e ta eherce su poder, nos ta sinti nos impulsa pa hala serca dje. Esei, na su turno, por motiva nos pa ‘bira imitado di Dios’ den e manera cu nos ta haci uzo di poder. (Efesionan 5:1) Pero ki poder nos como ser humano insignificante ta posee?

³ Corda cu hende a ser crea den e “imagen” y semehansa di Dios. (Genesis 1:26, 27) Pesei, te na cierto grado, nos tambe tin poder. Nos tin poder den sentido cu nos ta capas pa traha, of pa logra cierto cosnan; cu nos por ta den un posicion di control of autoridad riba otro hende; cu nos por influencia otro hende, specialmente esnan cu ta stima nos; cu nos tin forsa fisico of recurso material. E salmista a bisa encuanto Yehova: “Serca bo e fuente di bida ta.” (Salmo 36:9) Pesei, sea directamente of indirectamente, Dios ta e fuente  di cualkier poder legitimo cu nos tin. Pesei nos kier uz’e den un manera cu ta agrad’e. Con nos por haci esei?

4, 5. (a) Kico ta e clave pa uza poder na un manera corecto, y con e ehempel di Dios mes ta demostra esaki? (b) Con amor lo yuda nos uza poder na un manera corecto?

⁴ E clave pa uza poder na un manera corecto ta amor. E ehempel di Dios mes no ta demostra esaki? Corda e analisis di Capitulo 1 di Dios su cualidadnan principal, esta, poder, husticia, sabiduria y amor. Cua di e cuater cualidadnan aki ta predomina? Amor, pasobra 1 Huan 4:8 ta bisa cu “Dios ta amor.” Si, e esencia mes di Yehova ta amor; amor ta influencia tur loke e ta haci. Pues tur demostracion di su poder ta motiva pa amor, y na final di cuenta, e ta pa beneficio di esnan cu ta stim’e.

⁵ Amor lo yuda nos tambe uza nos poder na un manera corecto. Al fin y al cabo, Bijbel ta bisa nos cu amor ta “cariñoso” y “no ta busca su propio interes.” (1 Corintionan 13:4, 5) Pesei, amor lo no duna nos espacio pa actua na un manera bruto of cruel cu esnan riba ken nos tin cierto autoridad. En bes di esei, nos lo trata otro hende cu dignidad y pone nan necesidadnan y sintimentonan prome cu esnan di nos.—Filipensenan 2:3, 4.

6, 7. (a) Kico ta temor di Dios, y pakico e cualidad aki lo yuda nos evita di haci mal uzo di poder? (b) Ilustra e conexion entre amor pa Dios y temor di desagrad’e.

⁶ Amor ta liga cu un otro cualidad cu por yuda nos evita di abusa di poder: temor di Dios. Kico ta e balor di e cualidad aki? “Pa medio di e temor di SEÑOR hende ta keda leu for di maldad”, segun Proverbionan 16:6. Mal uzo di poder sigur ta un di e maldadnan for di cua nos tin cu keda leu. Temor di Dios lo preveni cu nos ta abusa di esnan riba ken nos tin autoridad. Pakico? Pasobra, entre otro, nos ta conciente cu nos ta responsabel na Dios pa e manera cu nos ta trata otro hende. (Nehemias 5:1-7, 15) Pero temor di Dios  ta encera mas cu esei. E palabranan di e idioma original pa “temor” hopi bes ta referi na un respet profundo di Dios. Bijbel ta relaciona temor cu amor pa Dios. (Deuteronomio 10:12, 13) E respet profundo aki ta encera un temor saludabel di desagrada Dios—no djis pasobra nos tin miedo di e consecuencianan sino pasobra nos ta stim’e di curason.

⁷ Pa ilustra esaki, pensa riba e relacion sano entre un mucha chikito cu su tata. E chikitin ta sinti cu su tata tin un interes caloroso y amoroso den dje. Pero e ta conciente tambe di loke su tata ta exigi di dje, y e sa cu su tata lo disiplin’e si e comporta su mes malo. Ma e mucha no ta biba spanta di su tata. Al contrario, e stima su tata hopi y ta gusta haci loke ta agrada su tata. Mescos ta conta pa nos temor di Dios. Door cu nos stima Yehova, nos Tata celestial, nos tin miedo di haci cualkier cos cu lo haci ‘su curason tristo.’ (Genesis 6:6) Mas bien, nos tin gana di alegra su curason. (Proverbionan 27:11) Pesei nos kier uza nos poder na un manera corecto. Laga nos analisa mas aleu con nos por haci esaki.

8. (a) Ki autoridad e esposo tin den famia, y con e mester eherc’e e autoridad aki? (b) Con un esposo por demostra cu e ta honra su casa?

⁸ Pensa na prome luga riba e circulo familiar. Efesionan 5:23 ta bisa cu “e esposo ta cabes di e esposa.” Con e esposo mester eherce e autoridad cu Dios a dun’e? Bijbel ta bisa e esposo pa e duna su casa “honor” y pa biba cu ne “cu comprension, manera cu un vaso mas delicado.” (1 Pedro 3:7) E sustantivo Griego traduci “honor” ta nifica “prijs, balor, . . . respet.” Den algun caso a traduci e palabra aki como “regalo” y “precioso.” (Echonan 28:10, BPK; 1 Pedro 2:7) Un esposo cu ta honra su casa hamas lo maltrat’e fisicamente; ni lo e no humiy’e, ridiculis’e y lag’e sinti su mes indigno. Al contrario, e ta reconoce su balor y ta trat’e cu respet. E ta demostra cu echo y palabra—den priva y  den publico—cu e ta precioso den su bista. (Proverbionan 31:28) Di e forma ei e esposo ta gana no solamente e amor y respet di su esposa sino, mas importante ainda, Dios su aprobacion.

9. (a) Ki poder e esposa tin den famia? (b) Kico por yuda un esposa uza su habilidadnan pa apoya su casa, y cu ki resultado?

⁹ E esposa tambe tin cierto poder den famia. Bijbel ta papia di mohenan deboto cu, sin bai contra e autoridad di nan casa, a tuma iniciativa pa eherce un bon influencia riba nan casa of pa yuda nan evita di faya den huicio. (Genesis 21:9-12; 27:46–28:2) Kisas e esposa ta mas inteligente cu su casa, of kisas e tin otro cualidadnan cu e homber no tin. Toch, e mester “respeta” su esposo y “sea sumiso” na dje “manera na Señor.” (Efesionan 5:22, 33) Ora e esposa tin e meta di agrada Dios, esei por yud’e uza su habilidadnan pa apoya su casa en bes di rebah’e of purba domin’e. Un “mohe sabi” asina ta coopera estrechamente cu su esposo pa edifica e famia. Asina lo e mantene pas cu Dios.—Proverbionan 14:1.

10. (a) Ki autoridad Dios a duna mayornan? (b) Kico e palabra “disiplina” ta nifica, y con mester duna disiplina? (Mira tambe nota na pia di pagina.)

¹⁰ Tambe Dios a duna mayornan autoridad. Bijbel ta spierta: “Tatanan, no proboca boso yiunan na rabia, ma lanta nan den e disiplina y instruccion di Señor.” (Efesionan 6:4) Den Bijbel, e palabra “disiplina” por nifica “educacion, formacion y instruccion.” Yiu tin mester di disiplina; ora nan haya guia, restriccion y limitenan bon cla, nan ta desaroya bon. Bijbel ta relaciona tal disiplina, of instruccion, cu amor. (Proverbionan 13:24) Pesei, e “bara” di disiplina nunca mag hiba na maltrato fisico of emocional. * (Proverbionan  22:15; 29:15) Un mayor cu ta disiplina su yiu na un manera rigido of cruel, sin sentido di amor, ta abusando di su autoridad como mayor, y esei por kibra e animo di e mucha. (Colosensenan 3:21) En cambio, un disiplina balansa cu ser duna corectamente ta yuda e yiu compronde cu su mayornan ta stim’e y cu nan tin interes den e clase di persona cu e ta birando.

11. Con yiunan por uza nan poder na un manera corecto?

¹¹ Kico di e yiunan? Con nan por uza nan poder na un manera corecto? “Gloria di hende jong ta nan forsa”, segun Proverbionan 20:29. Sin duda, e miho manera cu hobennan por uza nan energia y vigor ta den sirbishi di nos “Creador.” (Eclesiastes 12:1) Hobennan mester corda cu nan accionnan por afecta e sintimento di nan mayornan. (Proverbionan 23:24, 25) Ora yiunan obedece nan mayornan temeroso di Dios y sigui un caminda recto, esei ta alegra curason di nan mayornan. (Efesionan 6:1) Un conducta asina ta “agradabel na Señor.”—Colosensenan 3:20.

12, 13. (a) Con ancianonan mester mira nan autoridad den e congregacion? (b) Ilustra pakico ancianonan mester trata e tou cu ternura.

¹² Yehova a percura superintendentenan pa hiba delantera den e congregacion cristian. (Hebreonan 13:17) E hombernan capasita aki mester uza e autoridad cu Dios a duna nan pa yuda nan rumannan y pa contribui na e bienestar di e tou. E posicion cu ancianonan tin ta duna nan derecho di domina nan rumannan? Di ningun manera! Ancianonan mester tin un punto di bista balansa y humilde di nan papel den e congregacion. (1 Pedro 5:2, 3) Bijbel ta bisa superintendentenan pa “pastorea e congregacion di Dios, cua el a cumpra cu e sanger di su propio Yiu.” (Echonan 20:28, NW) Esaki ta un motibo di peso pa trata cada miembro di e tou cu ternura.

 ¹³ Nos por ilustr’e den e siguiente manera. Un bon amigo ta pidi bo cuida un cos di hopi balor p’e. Bo sa cu bo amigo a paga un prijs halto pa e articulo. Lo bo no trat’e cu delicadesa y cu hopi cuidou? Mescos tambe Dios a encarga e ancianonan cu e responsabilidad di cuida un pocesion di hopi balor p’e: e congregacion, kende su miembronan ta manera carne. (Huan 21:16, 17) Yehova tin asina tanto cariño pa su carnenan cu el a cumpra nan cu e sanger precioso di su Yiu unigenito, Hesucristo. Yehova a paga e prijs di mas halto pa su carnenan. Ancianonan humilde ta tene esei na mente y ta trata Yehova su carnenan di acuerdo cu esei.

14. Ki poder lenga tin?

¹⁴ “Morto y bida ta den e poder di lenga”, segun Bijbel. (Proverbionan 18:21) En berdad, lenga por causa hopi daño. Cua di nos no a yega di sinti e dolor fuerte di un comentario sin consideracion of asta di menosprecio? Pero lenga tin poder di cura tambe. “Lenga di hende sabi ta trece curamento”, segun Proverbionan 12:18. Si, palabranan positivo y alentador por ta manera balsamo calmante y curativo pa curason. Laga nos wak un par di ehempel.

15, 16. Den ki maneranan nos por uza nos lenga pa stimula nos rumannan?

¹⁵ Prome Tesalonicensenan 5:14 ta anima nos fuertemente pa “curasha esnan cu ta falta animo.” Si, tin biaha asta fiel sirbido di Yehova por haya nan ta lucha cu depresion. Con nos por yuda e rumannan aki? Elogia nan di curason pa e bon cosnan cu nan ta haci; esei lo laga nan mira cuanto balor nan tin den bista di Yehova. Comparti cu nan e palabranan poderoso di textonan di Bijbel cu ta mustra e gran amor y interes profundo cu Yehova tin den esnan cu ta di “curason kibra” y “di spirito abati.”  (Salmo 34:18) Ora nos ta uza e poder di nos lenga pa curasha y consola otro hende, nos ta mustra cu nos ta imitando e Dios di compasion “kende ta consola esnan abati.”—2 Corintionan 7:6.

¹⁶ Tambe nos por uza e poder di nos lenga pa duna e estimulo cu otronan tin tanto mester di dje. Un ruman a perde un ser keri den morto? Palabranan di condolencia cu ta expresa nos interes y atencion por consola un curason tristo. Un ruman di edad ta sinti cu ya e no ta conta mas? Palabranan bon scohi por garantisa rumannan di edad cu nan ta util y tin hopi balor. Un ruman ta luchando cu un enfermedad cronico? Palabranan amabel sea via telefon of personalmente por contribui hopi pa lanta e animo di esnan cu ta malo. Esta contento nos Creador lo keda ora nos uza e poder di abla pa expresa palabranan cu ta “bon pa edificacion.”—Efesionan 4:29.

17. Den ki manera importante nos por uza nos lenga pa beneficio di otro hende, y pakico nos mester haci esei?

¹⁷ E manera mas importante cu nos por uza e poder di  lenga ta door di comparti e bon nobo di e Reino di Dios cu otro hende. “No laga di haci bon na esnan cu merece esaki, si ta den bo poder pa hacie”, segun Proverbionan 3:27. Nos tin e obligacion di comparti e bon nobo cu nan, ya cu esaki por salba nan bida. Lo no ta corecto pa tene pa nos mes e mensahe urgente cu Yehova a duna nos generosamente. (1 Corintionan 9:16, 22) Pero te na ki grado Yehova ta spera pa nos participa den e obra aki?

18. Kico Yehova ta spera di nos?

¹⁸ Amor pa Yehova ta impulsa nos pa participa plenamente  den e ministerio cristian. Kico Yehova ta spera di nos den esaki? Algo cu nos tur, sin importa nos circunstancianan di bida, por duna: “Tur loke boso haci, haci boso trabou di curason, como pa SEÑOR y no pa hende.” (Colosensenan 3:23) Ora Hesus a duna e mandamento di mas grandi, el a bisa: “Stima SEÑOR bo Dios cu henter bo curason, y cu henter bo alma, y cu henter bo mente, y cu tur bo forsa.” (Marco 12:30) Si, Yehova ta spera pa cada un di nos stim’e y sirbie cu henter nos alma.

19, 20. (a) Siendo cu alma ta encera e curason, mente y forsa, pakico Marco 12:30 ta menciona e otro facultadnan aki riba nan mes? (b) Kico ta nifica sirbi Yehova di henter alma?

¹⁹ Kico kiermen sirbi Dios di henter alma? Alma ta referi na e persona completo, cu tur su habilidadnan fisico y mental. Ya cu alma ta encera e curason, mente y forsa, pakico Marco 12:30 ta menciona cada un di e otro facultadnan aki riba nan mes? Pensa riba e siguiente ilustracion. Den tempo di Bijbel, un persona por a bende su mes (su alma) como esclabo. Pero kisas e esclabo no tawata sirbi su doño di henter curason; talbes e no tawata uza tur su forsa of tur su capasidad mental pa sirbi e interesnan di su doño. (Colosensenan 3:22) Pesei, evidentemente Hesus a menciona e otro facultadnan aki pa enfatisa cu nos no mester tene nada atras den nos sirbishi na Dios. Sirbi Dios cu henter nos alma ta nifica duna di nos mes, uzando e maximo capasidad di nos forsa y energia den su sirbishi.

²⁰ Sirbi di henter alma ta nifica cu nos tur mester dedica e mesun cantidad di tempo y energia den sirbishi? Esei sigur no ta posibel, pasobra cada ken su circunstancianan y habilidadnan ta diferente. Por ehempel, un hoben cu bon salu y resistencia fisico lo por dedica mas tempo den e trabou di predica cu un ruman cu debi na su edad no tin dje  tanto energia ei. Un ruman soltero cu no tin obligacion di famia lo por haci mas cu un otro cu tin cu percura pa su famia. Si nos tin e forsa y circunstancianan cu ta permiti nos haci hopi den sirbishi, nos mester ta masha gradicido! Claro cu nos lo no kier tin un spirito critico y cuminsa compara nos mes cu otro rumannan den e asunto aki. (Romanonan 14:10-12) Mas bien, nos kier uza nos forsa pa anima otro rumannan.

21. Kico ta e manera mas miho y mas importante pa uza bo poder?

²¹ Yehova a pone e ehempel perfecto den uza poder na un manera corecto. Nos kier imit’e te caminda nos imperfeccion humano ta permiti nos. Nos por uza nos poder na un manera corecto door di trata esnan riba ken nos tin cierto autoridad cu dignidad. Ademas, nos kier traha di henter alma den e obra di predica e mensahe cu Yehova a encarga nos cu ne, y cu por scapa bida di hende. (Romanonan 10:13, 14) Corda cu Yehova ta keda contento ora bo duna tur loke abo—bo alma—por duna. Bo curason no ta impulsa bo pa bo haci tur loke ta na bo alcanse pa sirbi un Dios asina comprensivo y amoroso? No tin un manera mas miho of mas importante pa uza bo poder.