1. O le ā le mailei iloagatā lea ua faigofie tele ona lolo atu i ai tagata lē lelei atoatoa?

 “AFAI ua e maua le pule, ua e maua fo‘i la se mailei iloagatā.” O upu na a se fatusolo o le lona 19 senituri, ua faamanatu mai ai se lamatiaga iloagatā o loo iai: le faaaogāsesēina o le pule. E faanoanoa lava, talu ai ua faigofie tele ona lolo atu tagata lē lelei atoatoa i lenei mailei. E mautinoa i le faagasologa mai o le talafaasolopito, ‘ua pule ai le tasi tagata i le tasi, ma ua leaga ai o ia lava.’ (Failauga 8:9) O le faaaogāina o le pule e aunoa ma se alofa ua i‘u ai i le tele o puapuaga o tagata.

2, 3. (a) O le ā le mea mata‘ina e faatatau i le faaaogāina e Ieova o le pule? (e) O le ā atonu e aofia i la tatou pule, ma e tatau faapefea ona tatou faaaogāina lenā pule?

² Ae po ua lē o se mea ea e ofo ai, ona o Ieova le Atua, e lē muta mai lona mana po o lana pule, ae lē taitai ona ia faaaogāsesēina lenā pule? E pei ona ta‘ua i mataupu ua mavae atu, e na te faaaogāina lona mana, e ōgatusa ma ana fuafuaga alofa—i le foafoaina o mea, le faaumatiaina o mea, le puipuia o mea, pe i le toe faafo‘isia mai o mea. Pe a tatou manatunatu i le auala o loo ia faaaogā ai lona mana po o lana pule, ona atili ai lea ona uuna‘ia i tatou e faalatalata atu iā te ia. O le i‘uga, e mafai ai ona uuna‘ia i tatou e ‘faaa‘oa‘o i le Atua,’ i le auala tatou te faaaogāina ai fo‘i le pule. (Efeso 5:1) Ae o le ā le pule ua iā i tatou o ni tagata faatauvaa?

³ Ia manatua sa foafoaina le tagata i “le faatusa o le Atua” ma foliga iā te ia. (Kenese 1:26, 27) O lea la, ua iā i tatou fo‘i le pule—po o sina vaega o le pule. Atonu e aofia i la tatou pule le tomai e faataunuu ai mea, e galue ai; le pule po o le aiā e faatonutonu pe pulea ai isi; le tomai e taa‘ina ai isi, aemaise i latou e alolofa iā i tatou; le malosi faaletino; po o alāmanuia faaletino. Na faapea mai le faisalamo e faatatau iā Ieova: “O loo iā te oe le puna o le ola.” (Salamo 36:9) O lea la, i se tulaga  tuusa‘o pe lē tuusa‘o fo‘i, ua avea ai le Atua ma Puna o so o se pule lelei o loo iā i tatou. O lea tatou te manana‘o ai e faaaogāina lenā pule i auala o le a finagalo malie mai i ai o ia. E mafai faapefea ona tatou faia lenā mea?

4, 5. (a) O le ā le vala e sili ona tāua i le faaaogāina tatau o le pule, ma ua faapefea ona faamaonia mai lenei manatu i le faaa‘oa‘oga a le Atua lava ia? (e) O le a faapefea ona fesoasoani mai le alofa iā i tatou ina ia faaaogā tatau ai la tatou pule?

⁴ O le vala e sili ona tāua i le faaaogāina sa‘o o le pule, o le alofa lea. Po ua lē faamaonia mai ea lenei manatu i le faaa‘oa‘oga a le Atua lava ia? Toe manatu i le Mataupu 1 lea sa talanoaina ai uiga autū e fā o le Atua—lona mana, lana faamasinotonu, lona atamai, ma lona alofa. O lē fea uiga o loo silisili i na uiga uma e fā? O le alofa. I le 1 Ioane 4:8, ua ta‘ua ai “le Atua, o le alofa lava ia.” Ioe, o Ieova lava ia o le alofa; e pulea e le alofa mea uma lava na te faia. O faaaliga uma lava la o lona mana po o lana pule ua uuna‘ia mai e lona alofa ma ua faasilisili lava mo se lelei o i latou e alolofa iā te ia.

⁵ O le a fesoasoani fo‘i le alofa iā i tatou e faaaogā tatau ai la tatou pule. Aemaise ai, ua ta‘u mai e le Tusi Paia e faapea, o le alofa e “agamalu” ma “e lē sa‘ilia e ia ana lava mea.” (1 Korinito 13:4, 5) O lona uiga, o le a lē faatagaina e le alofa i tatou e gaoioi i se uiga lē alofa ma le sauā, i tagata o loo iai sina a tatou pule iā i latou. Na i lo lea, o le a tatou faaaloalo i isi, ma faamuamuaina pea o latou mana‘oga ma faalogona.—Filipi 2:3, 4.

6, 7. (a) O le ā le mata‘u i le Atua, ma aiseā o le a fesoasoani ai lenei uiga ina ia tatou lē faaaogāsesēina la tatou pule? (e) Faata‘ita‘i mai le sootaga i le va o le mata‘u e lē mana‘o e faatigā i le finagalo o le Atua, ma le alofa mo le Atua.

⁶ E fetaui lelei atu le alofa i se isi fo‘i uiga, lea e mafai ai ona tatou ‘alofia le faaaogāsesēina o le pule: o le mata‘u lea i le Atua. O le ā le tāua o lenei uiga? Ua faapea mai le Faataoto 16:6: “O le mata‘u fo‘i iā Ieova, ua ‘alo ese ai tagata i le leaga.” E mautinoa lava, e aofia le faaaogāsesēina o le pule i auala leaga e tatau ona tatou ‘aloese ai. O lo tatou matata‘u i  le Atua o le a tatou fai lelei ai i latou o loo tatou pule ai. Aiseā? O se tasi o māfuaaga, auā e faamasinoina e le Atua i tatou i le auala o loo tatou feutaga‘i ai ma isi. (Neemia 5:1-7, 15) Peita‘i e lē na o le pau lenā o le mea e aofia ai i le mata‘u i le Atua. O upu i le ulua‘i gagana o loo faaaogāina mo le “mata‘u” e masani ona faasino atu i se faaaloalo tatau ma le migao i le Atua. O le pogai lea ua faafesoota‘i atu ai e le Tusi Paia le mata‘u ma le alofa iā te Ia. (Teuteronome 10:12, 13) O lenei faaaloalo ma le migao e faasino atu i se mata‘u lelei, e lē mana‘o e faatigā i le finagalo o le Atua—e lē māfua ona o le matata‘u i āuga e i‘u i ai, ae ona tatou te alolofa moni iā te ia.

⁷ Se‘i faata‘ita‘i: Se‘i manatu i le faiā tāua a se tamaitiiti ma lona tamā. E lagona e le tamaitiiti le māfana ma le alofa tele o lona tamā iā te ia. Ae ua iloa lelei fo‘i e le tamaitiiti mea o loo mana‘omia e lona tamā mai iā te ia, ma ua ia iloa o le a a‘oa‘ia o ia e lona tamā pe a lē lelei lana amio. E lē ola fefe le tamaitiiti i lona tamā, ae e alofa faapelepele i ai. E mana‘o lenei tamaitiiti e fai mea o le a fiafia ma malie ai le loto o lona tamā. E faapena fo‘i le mata‘u i le Atua. Talu ai tatou te alolofa iā Ieova, lo tatou Tamā faalelagi, e tatou te matata‘u ai e faia se mea e ono tigā ai lona finagalo. (Kenese 6:6) Na i lo lea, e tatou te faanaunau e faafiafia lona finagalo. (Faataoto 27:11) O le pogai lenā tatou te manana‘o ai e faaaogā tatau la tatou pule. Se‘i o tatou iloiloina auala e mafai ona faia ai faapea.

8. (a) O le ā le pule ua iai i tane i totonu o le aiga, ma e tatau faapefea ona faaaogāina? (e) E mafai faapefea e se tane ona faaalia lona ava i lana avā?

⁸ Se‘i talanoa muamua i le aiga. Ua ta‘ua e le Efeso 5:23 e faapea: “O le tane o le ulu ia o le avā.” E tatau faapefea i se tane ona ia faatinoina lenei pule mai le Atua? Ua faatonuina e le Tusi Paia tane ina ia nonofo faatasi ma a latou avā “ma le poto, ia ava i le avā, auā o le ipu ia ua sili ona vaivai.” (1 Peteru 3:7) O le nauna Eleni ua faasino atu i le “ava” e faauiga i “le tau, le tāua, . . . faaaloalo.” O isi mea ua faaliliuina i ai lenei upu, o le  “mea lelei” ma le “mamalu.” (Galuega 28:10; 1 Peteru 2:7) O se tane e ava i lana avā o le a ia lē fasia o ia; e na te lē faamasiasia fo‘i pe ula iā te ia, ma faapogai i lana avā ni lagona e leai sona aogā. Na i lo lea, e na te faatāuaina le aogā o lana avā ma faaaloalo i ai. I upu ma gaoioiga a le tane—pe a na o i la‘ua pe i luma fo‘i o isi—na te faaalia atu ai e tāua lana avā iā te ia. (Faataoto 31:28) O se tane faapena e lē gata ina alofa ma faaaloalo i ai lana avā, ae sili ona tāua, o le a finagalo malie mai i ai le Atua.

9. (a) O le ā sina pule ua iai i avā i totonu o le aiga? (e) O le ā e mafai ai e se avā ona faaaogā ona tomai e lagolagosua atu ai i lana tane, ma o ā i‘uga e oo i ai?

⁹ Ua iai fo‘i i avā sina pule i totonu o le aiga. O loo ta‘ua e le Tusi Paia fafine amio Atua, sa taulamua e taa‘ina a latou tane i ni auala lelei, pe fesoasoani fo‘i ina ia lē faia e tane ni faai‘uga sesē. O nei gaoioiga uma sa faia e nei fafine e aunoa ma lo latou solia ai o le tulaga ulu. (Kenese 21:9-12; 27:46–28:2) Atonu pe sili atu le atamai o se avā na i lo lana tane, pe o loo iā te ia fo‘i ni tomai e lē o iai i lana tane. Peita‘i, e tatau lava ona “ava” pe faaaloalo loloto atu o ia i lana tane ma ‘usiusitai i ai faapei ona usiusitai i le Alii.’ (Efeso 5:22, 33) O le mafaufau o se avā i le faafiafiaina o le finagalo o le Atua, o le a mafai ai ona ia faaaogā ona tomai e lagolagosua atu ai i lana tane, na i lo le faamasiasi pe taumafai fo‘i e fia pule i lana tane. O se ‘fafine poto’ faapena o le a matuā felagolagoma‘i ma lana tane i le faaleleia atili o lo la aiga. Ona faatumauina ai lea o lona filemu ma le Atua.—Faataoto 14:1.

10. (a) O le ā le pule ua tuuina mai e le Atua i mātua? (e) O le ā le uiga o le upu “a‘oa‘iga,” ma e tatau faapefea ona tuuina atu na a‘oa‘iga? (Taga‘i fo‘i i le faaopoopoga.)

¹⁰ O loo iai fo‘i i mātua le pule mai le Atua. O le tima‘iga lenei a le Tusi Paia: “O outou tamā fo‘i, aua ne‘i tou faaonoono atu i a outou fanau, a ia tausi atu i ai i a‘oa‘iga ma apoapoa‘iga a [Ieova].” (Efeso 6:4) I le Tusi Paia o le upu “a‘oa‘iga” e mafai ona faauiga atu i le “tausiga, toleniga, [ma] faatonuga.” E mana‘omia e fanau ni a‘oa‘iga. Latou te ola fiafia pe afai e manino ta‘iala, aiāiga, ma tuutuuga e avatu i ai. O loo faafesoota‘i  atu e le Tusi Paia na a‘oa‘iga, po o faatonuga, i le alofa. (Faataoto 13:24) O lea la, e lē tatau lava ona faaaogāina “le sasa e a‘oa‘i ai” i se auala e faaleagaina ai—faalogona po o le tino. a (Faataoto 22:15; 29:15) O a‘oa‘iga e pulepuletutū pe faia ma le sauā e aunoa ma se alofa, o le faaaogāsesēina lenā o le pule faamātua, ma e mafai ona nutimomoia ai le loto taumafai o le tamaitiiti. (Kolose 3:21) Peita‘i o a‘oa‘iga lelei e avatu i se tulaga talafeagai, e mafai ona lagona ai e le fanau e alolofa o latou mātua iā i latou, ma o loo manatu mamafa i le ituaiga o tagata e i ai i latou.

11. E mafai faapefea ona faaaogā tatau e fanau lo latou malosi?

¹¹ Ae faapefea le fanau? E mafai faapefea ona latou faaaogā tatau lo latou malosi? Ua faapea mai le Faataoto 20:29: “O le matagofie o taulele‘a, o lo latou malosi lea.” E mautinoa e leai se isi auala e sili atu ona lelei mo talavou e faaaogā lelei ai le malosi ma le malaulau o lo latou talavou, na i lo o le auauna atu ai i “Lē e Sili na Foafoaina” i tatou. (Failauga 12:1, NWT) E lelei i talavou ona latou manatua o a latou gaoioiga e mafai ona aafia ai faalogona o o latou mātua. (Faataoto 23:24, 25) Pe a usiusitai le fanau i o latou mātua o ē tapua‘i i le Atua ma tumau i le ala sa‘o, o le a latou faafiafiaina fo‘i loto o o latou mātua. (Efeso 6:1) O amioga faapena o se “mea mālie lea i le Alii.”—Kolose 3:20.

12, 13. (a) O le ā le vaaiga e tatau ona manatu ai toeaina i la latou pule i totonu o le faapotopotoga? (e) Faata‘ita‘i mai le pogai e tatau ai i toeaina ona latou tausia ma le alofa le lafumamoe.

¹² Ua saunia mai e Ieova ovasia e ta‘imua i totonu o le faapotopotoga Kerisiano. (Eperu 13:17) E tatau i nei tane agavaa ona faaaogā la latou pule mai le Atua ina ia saunia ai le fesoasoani mana‘omia ma maua ai le manuia o le lafumamoe. Po o  tofiga ea ua iai i toeaina ua latou maua ai le aiā e aliita‘i ai i o latou uso talitonu? E matuā leai lava! E tatau i toeaina ona iā i latou se vaaiga paleni ma le lotomaulalo i la latou matafaioi i le faapotopotoga. (1 Peteru 5:2, 3) Ua ta‘u mai e le Tusi Paia i ovasia e faapea: “Ia leoleo atu i le ekalesia a le Atua, ua faatauina e ia mona i [“le toto o lona lava Alo,” NWT].” (Galuega 20:28) O inei o loo ta‘ua ai se māfuaaga malosi mo le tausia ma le alofa o mamoe ta‘itasi i le lafumamoe.

¹³ E mafai ona tatou faia se faata‘ita‘iga faapenei. Ua talosaga atu sau uō māfana pe mafai ona e tausia sana meatotino e tāua iā te ia. E te iloa e matuā taugatā se tau na faatau ai e lau uō lea meatotino. Po o le a e lē tausia lelei ea lenā mea, ia mautinoa e lē faaleagaina? Ua faapena fo‘i ona tuuina mai e le Atua i toeaina le tiute tauave e latou te tausia ai se meatotino e matuā tāua lava: le faapotopotoga lea ua pei ai ona tagata o ni mamoe. (Ioane 21:16, 17) E matuā pele iā Ieova ana mamoe, o le ala lea na ia faatauina mai ai i latou i le toto tāua o lona Alo e to‘atasi, o Iesu Keriso. Sa totogia e Ieova se tau e sili ona taugatā mo ana mamoe. O toeaina la e lotomaulalo, e teu mau i o latou mafaufau lenā mea, ma tausia ai fo‘i i se tulaga talafeagai mamoe a Ieova.

14. O le ā le pule ua iai i le laulaufaiva?

¹⁴ Ua faapea mai le Tusi Paia: “O le oti ma le ola, o loo i le pule a le laulaufaiva.” (Faataoto 18:21) Ioe, e telē se leaga e mafai ona faia e le laulaufaiva. O ai se tasi o i tatou e na te le‘i lagonaina le tigā o se faamatalaga lē magafagafa ma le lē faaaloalo? Peita‘i ua iai fo‘i i le laulaufaiva le pule e faamālōlōina ai. Ua faapea mai le Faataoto 12:18: “O le laulaufaiva o ē popoto e mālōlō ai.” Ioe, o faamatalaga faalaeiau ma aogā e mafai ona pei o se suāuu mālū e mālōlō ai le loto. Se‘i manatu i ni faaa‘oa‘oga.

15, 16. O ā auala e mafai ona tatou faaaogāina ai le laulaufaiva mo le faalaeiauina o isi?

¹⁵ Ua augani mai le 1 Tesalonia 5:14 e faapea: “Ia faamāfanafana i ē loto iti.” Ioe, e oo lava i auauna faamaoni a Ieova e  iai taimi e tauivi ai ma mafatiaga. E faapefea ona tatou fesoasoani atu i na tagata? Avatu i ai se faamālō e patino ma faamaoni, ina ia mafai ai ona latou iloa e tāua i latou i le silafaga a Ieova. Ia tufa atu iā i latou upu mamana o mau o le Tusi Paia na o loo faaalia ai, e tausi moni mai lava Ieova ma alofa mai iā i latou ua “loto momomo” ma “e ua loto nutimomoia.” (Salamo 34:18) Pe a tatou faaaogāina le pule a le laulaufaiva e faamatalaloto atu ai i isi, o inā e faaalia ai o loo tatou faata‘ita‘i atu i le Atua alofa mutimutivale, “o lē e faamāfanafanaloto i ē mafatia.”—2 Korinito 7:6, New American Standard Bible.

¹⁶ E mafai fo‘i ona tatou faaaogāina le pule a le laulaufaiva e avatu ai i isi ni faalaeiauga o loo latou matuā mana‘omia. Po ua motusia ea i le oti le mafutaga a se uso talitonu ma sē na pele iā te ia? O upu tigā alofa o loo faaalia ai lo tatou alofa ma le manatu mamafa, e mafai ona faamāfanafanaloto i se loto lea ua faavauvau. Po o iai i se uso po o se tuafafine matua se lagona ua lē o aogā o ia? O ni upu magafagafa e mafai ona toe faamautinoa atu ai iā i latou, o loo tāua pea i latou ma o loo talisapaia fo‘i. Po o iai se tasi o feagai ma se ma‘i faaumiumi? E tele ni aogā o ni upu agalelei pe a telefoni atu, faia se tusi po o le talanoa sa‘o atu, i le faatoʻafilemuina o lagona mafatia o le tagata ma‘i. Ma‘eu se  faamalieina o Lē na Foafoaina i tatou, pe a tatou faaaogāina le pule a a tatou upu e faaleo atu ai faaupuga e “lelei e ati a‘e ai”!—Efeso 4:29.

17. O le ā le auala tāua e mafai ona faaaogā ai o tatou laulaufaiva mo le lelei o isi, ma aiseā e tatau ai ona tatou faia faapea?

¹⁷ O le auala e sili ona tāua e faaaogā i ai le pule a le laulaufaiva, o le tala‘i atu ai lea i isi le tala lelei o le Malo o le Atua. Ua faapea mai le Faataoto 3:27: “Aua ne‘i e faafiti se mea lelei i ē ua tatau i ai, pe a ua e mafai ona faia.” O la tatou tiute tauave le tala‘i atu i isi o le tala lelei faasaoola. E lē o se mea talafeagai lo tatou taofiofi mamau i le fe‘au faanatinati lea ua foa‘i mai ma le agalelei e Ieova iā i tatou. (1 Korinito 9:16, 22) Ae o le ā le tele o so tatou sao i lenei galuega, o loo faatalitalia i tatou e Ieova e faia?

18. O le ā o loo faatalitalia e Ieova mai iā i tatou?

¹⁸ O lo tatou alofa mo Ieova e tatou te manana‘o ai e matuā galulue i le faiva faa-Kerisiano. O le ā o loo faatalitalia e Ieova mai iā i tatou i lenei tulaga? O se mea e mafai e i tatou uma ona fai, e tusa lava po o ā o tatou tulaga i le olaga: “O mea uma lava tou te faia, ia faia ma le loto, peisea‘ī ua faia [iā Ieova], ae lē o tagata.” (Kolose 3:23) Na fetalai Iesu e uiga i le poloa‘iga silisili, e faapea: “Ia e alofa fo‘i i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.” (Mareko 12:30) Ioe, o loo faatalitalia e Ieova i tatou ta‘ito‘atasi ina ia alolofa ma auauna atu iā te ia i le lotoatoa.

19, 20. (a) Afai o lea ua iai lava i le tagata le loto, le mafaufau, ma le malosi, aiseā la e ta‘ua ai isi uiga nei i le Mareko 12:30? (e) O le ā le uiga o le auauna iā Ieova ma le lotoatoa?

¹⁹ O le ā le uiga o le auauna i le Atua i le lotoatoa? O le upu loto i inei o loo faasino atu i le tagata, o loo aofia uma ai ona tomai o le tino ma le mafaufau. Afai o lea ua iai lava i le tagata le loto, le mafaufau, ma le malosi, aiseā la e ta‘ua ai isi uiga nei i le Mareko 12:30? Se‘i manatu i se faata‘ita‘iga. I taimi anamua, atonu e faatau atu ai e se tagata o ia lava e fai ma pologa. Peita‘i, atonu e lē auauna ma le lotoatoa se pologa i lona matai; atonu na te lē faaaogāina lona malosi atoa po o ona tomai uma faalemafaufau e faaleleia atili ai mana‘oga o lona matai. (Kolose 3:22) E foliga mai la, sa ta‘ua e Iesu isi vala nei ina ia faamamafa mai ai le manatu, e lē tatau ona tatou taofiofia se mea mai la tatou auaunaga i le Atua. O le auauna ma le lotoatoa i le Atua o loo faauiga i le tuuina atu o i tatou e fai lana auaunaga, e faaaogā atoatoa ai o tatou malosi ma tomai e tusa ma mea e mafai ai.

²⁰ Po o faauiga ea le auauna ma le lotoatoa e faapea, e tatau iā i tatou uma ona tutusa le tele o le taimi ma le malosi e faaaluina i le faiva? E faigatā ona fai lenā mea, auā e eseese uma tulaga ma tomai o tagata ta‘ito‘atasi. Mo se faaa‘oa‘oga, e mafai e se tagata talavou o loo mālōlōina ma malaulau lona malosi, ona tele se taimi na te faaaluina i le tala‘iga, na i lo le tele e  mafai e se tasi ua lē o toe lava sona malosi ona ua pulapula lāgoto le soifua. O se tagata nofofua e lē o iai ni ona tiute tauave i le aiga, atonu e tele atu ni mea e mafai ona ia faia na i lo le tagata o loo tausia se aiga. Pe afai o loo iā i tatou le malosi ma avanoa e mafai ai ona tele ni mea tatou te faia i le faiva, ma‘eu la so tatou lotofaafetai! O le mea moni, e lē tatau ona tatou manana‘o e iā i tatou se uiga faitio, i le faatusatusa atu o i tatou i isi e tusa ai o lenei vala. (Roma 14:10-12) Na i lo lea, tatou te manana‘o e faaaogā lo tatou malosi e faalaeiau atu ai i isi.

21. O le ā le auala e sili ona lelei ma sili ona tāua e faaaogā ai la tatou pule?

²¹ Ua faataatia e Ieova le faaa‘oa‘oga e atoatoa ona lelei i le faaaogāina tatau o lana pule po o lona mana. Tatou te fia faata‘ita‘i iā te ia i se tulaga sili e oo i ai lo tatou tomai o ni tagata lē lelei atoatoa. E mafai ona tatou faaaogā tatau la tatou pule e ala i le feutaga‘i ma isi o loo tatou vaavaaia, i se uiga mamalu. Tatou te manana‘o fo‘i e faatinoina ma le lotoatoa le galuega tala‘i faasaoola, lea ua foa‘i mai e Ieova e tatou te faataunuuina. (Roma 10:13, 14) Ia manatua, e fiafia le finagalo o Ieova pe a e faia le mea silisili e te mafai. Pe lē o uuna‘ia ea oe e lou loto ina ia e faia mea uma e te mafai e auauna atu ai i lenā Atua, e finagalo malamalama ma alofa? E leai lava se isi auala e sili atu ona tāua, e tatau ona faaaogā ai lau pule.