1. Ko e hā ʻa e tauhele fakapulipuli ʻoku tōngofua ai ʻa e faʻahinga taʻehaohaoa ʻo e tangatá?

 “ʻOKU ʻikai ʻaupito ha mālohi ʻe taʻetoi mai ai ha tauhele kākā.” ʻOku hanga ʻe he ngaahi lea ko ia ʻa ha tokotaha faʻu-maau ʻo e senituli hono 19 ʻo fakahanga ʻa e tokangá ki ha fakatuʻutāmaki fakapulipuli: ko e ngāuehalaʻaki ʻo e mālohí. Ko e meʻa fakamamahí, ko e faʻahinga taʻehaohaoa ʻo e tangatá ʻoku nau fuʻu tōngofua kotoa ki he tauhele ko ʻení. Ko e moʻoni, ʻi he kotoa ʻo e hisitōliá “oku bule ae tagata e toko taha ki he toko taha ka e kovi ai ia.” (Koheleti 8:9, PM) Ko hono ngāueʻaki ʻo e mālohí ʻo ʻikai ha ʻofá kuo iku ai ki he faingataʻaʻia taʻefaʻalaua ʻa e tangatá.

2, 3. (a) Ko e hā ʻoku taau ke fakatokangaʻi fekauʻaki mo hono ngāueʻaki ʻe Sihova ʻa e mālohí? (e) Ko e hā nai ʻoku kau ki hotau mālohí, pea ʻoku totonu ke fēfē ʻetau ngāueʻaki ʻa e kotoa ʻo e mālohi peheé?

² Neongo ia, ʻikai ʻoku taau ke fakatokangaʻi, ko Sihova ko e ʻOtuá, ʻa ia ʻokú ne maʻu ʻa e mālohi taʻefakangatangatá, kuo ʻikai ʻaupito te ne ngāuehalaʻaki ʻa e mālohi ko iá? Hangē ko ia kuo tau fakatokangaʻi ʻi he ngaahi vahe ki muʻá, ʻokú ne ngāueʻaki maʻu pē hono mālohí​—tatau ai pē pe ko e mālohi fakaefakatupú, fakaefakaʻauhá, fakaemaluʻí, pe ke toe fakafoki maí​—ʻi he fehoanaki mo ʻene ngaahi taumuʻa ʻofá. ʻI heʻetau fakakaukauloto atu ki he founga ʻokú ne ngāueʻaki ai hono mālohí, ʻoku ueʻi ai kitautolu ke tau ʻunuʻunu ofi kiate ia. ʻA ia, ʻi he tafaʻaki ʻe tahá, ʻoku malava ke ueʻi ai kitautolu ke ‘hoko ko e kau faʻifaʻitaki ki he ʻOtuá’ ʻi heʻetau ngāueʻaki ʻe kitautolu tonu ʻa e mālohí. (Efeso 4:32e [5:1, PM]) Kae fēfē ʻa e mālohi ʻoku tau maʻu ʻe kitautolu faʻahinga vaivai ʻo e tangatá?

³ Manatuʻi naʻe fakatupu ʻa e tangatá “ʻi he imisi ʻo e ʻOtua” mo hono tataú. (Sēnesi 1:26, 27) Ko ia ai, ko kitautolu foki ʻoku tau maʻu ʻa e mālohi​—ko hono moʻoní, ko ha konga ʻo ia. Ko hotau mālohí ʻoku kau nai ki ai ʻa e malava ke fakahoko ha ngaahi meʻa, ke ngāue; ko hono puleʻi pe maʻu ha mafai ki ha niʻihi kehe; ko e malava ke tākiekina ha niʻihi kehe, tautefito ki he faʻahinga ʻoku  nau ʻofa ʻiate kitautolú; mālohi fakasino (ivi mālohi); pe ngaahi koloa fakamatelie. ʻI he fekauʻaki mo Sihová, naʻe pehē ʻe he tokotaha-tohi-sāmé: “Ko e matavai ʻo e moʻui ʻoku ʻi he ʻAfiona.” (Sāme 36:9) Ko ia ai, ko e ʻOtuá ʻa e Matavai ʻo ha faʻahinga mālohi totonu pē ʻoku tau maʻu nai fakahangatonu pe taʻefakahangatonu. ʻOku fiemaʻu ai ke tau ngāueʻaki ia ʻi he ngaahi founga ʻoku fakahōifua kiate iá. ʻE lava fēfē ke tau fai pehē?

4, 5. (a) Ko e hā ʻa e kī ki hono ngāuetotonuʻaki ʻa e mālohí, pea ʻoku anga-fēfē hono fakahāhaaʻi mai ʻeni ʻe he faʻifaʻitakiʻanga ʻa e ʻOtuá tonu? (e) ʻE anga-fēfē hono tokoniʻi kitautolu ʻe he ʻofá ke tau ngāuetotonuʻaki hotau mālohí?

⁴ Ko e kī ki hono ngāuetotonuʻaki ʻa e mālohí ko e ʻofá. ʻIkai ʻoku fakahāhaaʻi mai ʻeni ʻe he faʻifaʻitakiʻanga ʻa e ʻOtuá tonu? Manatuʻi ʻa e lāulea fekauʻaki mo e ngaahi ʻulungaanga tefito ʻe fā ʻo e ʻOtuá​—ʻa e mālohí, fakamaau totonú, potó, mo e ʻofá​—ʻi he Vahe 1. Mei he ngaahi anga ko ʻeni ʻe faá, ko fē ai ʻoku tuʻu-ki-muʻa tahá? Ko e ʻofá. “Ko e ʻOtua ko e ʻOfa,” ko e lau ia ʻa e 1 Sione 4:8. ʻIo, ko e natula ia ʻo Sihová ko e ʻofa; ʻokú ne tākiekina ʻa e meʻa kotoa ʻokú ne faí. Ko ia, ko e fakahāhā kotoa pē ʻo hono mālohí ʻoku ueʻi ia ʻe he ʻofá pea ʻoku iku ia ki he lelei maʻá e faʻahinga ko ia ʻoku nau ʻofa ʻiate iá.

⁵ ʻE toe tokoniʻi kitautolu ʻe he ʻofá ke tau ngāuetotonuʻaki hotau mālohí. He ko ē, ʻoku tala mai ʻe he Tohitapú kiate kitautolu ko e ʻofá ʻoku “angalelei” pea “ʻoku ʻikai te ne kumi ʻene lelei aʻana.” (1 Kolinitō 13:4, 5) Ko ia ai, ʻe ʻikai fakaʻatā kitautolu ʻe he ʻofá ke tau ngāue ʻi ha founga fefeka pe fakamamahi ki he faʻahinga ko ia ʻoku tau maʻu ha mafai ki aí. ʻI hono kehé, te tau feangai ki he niʻihi kehé ʻaki ʻa e ngeia pea fakamuʻomuʻa ʻenau ngaahi fiemaʻú mo e ngaahi ongoʻí ʻi haʻatautolú.​—Filipai 2:3, 4.

6, 7. (a) Ko e hā ʻa e manavahē ʻOtuá, pea ko e hā ʻe tokoniʻi ai kitautolu ʻe he anga ko ʻení ke tau fakaʻehiʻehi mei hono ngāuehalaʻaki ʻa e mālohí? (e) Fakatātaaʻi ʻa e fehokotaki ʻi he vahaʻa ʻo e manavahē ki hano taʻefakahōifuaʻi ʻa e ʻOtuá pea mo e ʻofa ki he ʻOtuá.

⁶ ʻOku fekauʻaki ʻa e ʻofá mo e toe anga ʻe taha ʻoku malava ke ne tokoniʻi kitautolu ke tau fakaʻehiʻehi mei hono ngāuehalaʻaki ʻa e mālohí: ko e manavahē ʻOtuá. Ko e hā ʻa e mahuʻinga ʻo e anga ko ʻení? “Koe mea i he manavahe kia Jihova oku tafoki ai ae tagata mei he kovi,” ko e lau ia ʻa e Palōveepi 16:6 (PM). Ko e ngāuehalaʻaki ʻo e mālohí ʻoku kau moʻoni ia ʻi he ngaahi founga kovi ʻa ia  ʻoku totonu ke tau tafoki mei aí. Ko e manavahē ki he ʻOtuá te ne taʻofi kitautolu mei hono ngaohikoviʻi ʻa e faʻahinga ko ia ʻoku tau pule ki aí. Ko e hā hono ʻuhingá? Ko e meʻa ʻe tahá, ʻoku tau ʻiloʻi te tau fai ha fakamatala ki he ʻOtuá ki he founga ʻo ʻetau fakafeangai ki he faʻahinga peheé. (Nehemaia 5:1-7, 15) Ka ʻoku kau ki he manavahē ʻOtuá ia ʻa e meʻa lahi ange. Ko e ngaahi foʻi lea naʻe ngāueʻaki ʻi he muʻaki leá ki he ‘manavaheé’ ʻoku faʻa ʻuhinga ia ki ha ʻapasia loloto mo e māluʻia ki he ʻOtuá. Ko ia ai, ʻoku fakafekauʻaki ʻe he Tohitapú ʻa e manavaheé mo e ʻofa ki he ʻOtuá. (Teutalōnome 10:12, 13) Ko e māluʻia anga-ʻapasia ko ʻení ʻoku kau ki ai ha manavahē totonu ki hano taʻefakahōifuaʻi ʻa e ʻOtuá​—ʻo ʻikai koeʻuhi pē ʻoku tau manavahē ki he ngaahi nunuʻá ka koeʻuhí ʻoku tau ʻofa moʻoni ʻiate ia.

⁷ Ke fakatātaaʻi: Fakakaukau atu fekauʻaki mo e vahaʻangatae totonu ʻi he vahaʻa ʻo ha kiʻi tamasiʻi mo ʻene tamaí. ʻOku ongoʻi ʻe he kiʻi tamasiʻí ʻa e mahuʻingaʻia māfana mo e ʻofa ʻa ʻene tamaí ʻiate iá. Ka ʻoku toe lāuʻilo ʻa e kiʻi tamasiʻí ki he meʻa ʻoku fiemaʻu ʻe heʻene tamaí meiate iá, pea ʻokú ne ʻiloʻi ʻe akonakiʻi ia ʻe heʻene tamaí kapau te ne anga-kovi. ʻOku ʻikai ke nofo ʻa e kiʻi tamasiʻí ʻo mate manavahē ki heʻene tamaí. ʻI hono kehé, ʻokú ne ʻofa lahi ʻi heʻene tamaí. ʻOku fiefia ʻa e kiʻi tamasiʻí ʻi hono fai ʻa e meʻa te ne maʻu ʻa e leleiʻia ʻa ʻene tamaí. ʻOku pehē pē mo e manavahē ʻOtuá. Koeʻuhi ʻoku tau ʻofa ʻia Sihova, ko ʻetau Tamai fakahēvaní, ʻoku tau tailiili ki hano fai ha faʻahinga meʻa ʻe ʻai ai ia ke ne ongoʻi “mamahi ai a hono finagalo.” (Sēnesi 6:6, PM) Kae kehe, ʻoku tau fakaʻamu ke ʻai hono lotó ke fiefia. (Palōveepi 27:11) Ko e ʻuhinga ia ʻoku fiemaʻu ai ke tau ngāuetotonuʻaki hotau mafaí. Tau vakai angé ke toe ofi ange ki he founga te tau fai nai ai iá.

8. (a) Ko e hā ʻa e mafai ʻoku maʻu ʻe he ngaahi husepānití ʻi he fāmilí, pea ʻe anga-fēfē hono ngāueʻaki iá? (e) ʻE malava fēfē ʻe ha husepāniti ke ne fakahāhā ʻokú ne fakaʻapaʻapaʻi hono uaifí?

⁸ ʻUluaki fakakaukau angé ki he siakale fakafāmilí. “Ko e husepaniti ko e ʻulu ʻo e uaifi,” ko e lau ia ʻa e ʻEfesō 5:23. ʻE fēfē hano ngāueʻaki ʻe ha husepāniti ʻa e mafai ko ʻeni ʻoku foaki mai mei he ʻOtuá? ʻOku tala ʻe he Tohitapú ki he ngaahi husepānití ke nau nofo mo honau ngaahi uaifí “o fakatatau ki he ilo, o fakaabaaba ki he unoho, o tāu moe ibu vaivai.” (1 Pita 3:7, PM) Ko e foʻi nauna faka-Kalisi naʻe liliu ko e ‘fakaabaabá’ ʻoku ʻuhingá ki he  “totongi, mahuʻinga, . . . tokaʻi.” Ko e ngaahi faʻunga ʻo e foʻi leá ni ʻoku liliu ko e “gaahi foaki” mo e “mahuʻinga.” (Ngāue 28:10, PM; 1 Pita 2:7) Ko ha husepāniti ʻokú ne fakaʻapaʻapaʻi hono uaifí heʻikai ʻaupito te ne ngaohikoviʻi fakasino ia; ʻe ʻikai ʻaupito te ne fakamaaʻi pe tuku hifo ia, ʻo ʻai ia ke ne ongoʻi ʻoku ʻikai hano mahuʻinga. ʻI hono kehé, ʻokú ne lāuʻilo ki hono mahuʻingá pea fakafeangai anga-fakaʻapaʻapa kiate ia. ʻOkú ne fakahāhaaʻi ʻi heʻene ngaahi leá mo e ngaahi ngāué​—ʻi he fakaekinauá pea ʻi he kakaí​—ʻokú ne mātuʻaki mahuʻinga kiate ia. (Palōveepi 31:28) ʻOku maʻu ʻe ha husepāniti pehē ʻo ʻikai ngata pē ʻi he ʻofa mo e tokaʻi ʻa hono uaifí, ka ko e meʻa ʻoku toe mahuʻinga angé, ko e hōifua ʻa e ʻOtuá.

9. (a) Ko e hā ʻa e tākiekina ʻoku maʻu ʻe he ngaahi uaifí ʻi he fāmilí? (e) Ko e hā ʻoku malava ke ne tokoniʻi ha uaifi ke ne ngāueʻaki ʻene ngaahi malavá ke poupou ki hono husepānití, pea ko e hā hono olá?

⁹ ʻOku toe maʻu foki ʻe he ngaahi uaifí ha tākiekina ʻi he fāmilí. ʻOku fakamatala ʻa e Tohitapú fekauʻaki mo ha ongo fafine anga-fakaʻotua, ʻa ia ʻi loto ʻi he faʻunga ʻo e tuʻunga-ʻulu totonú, naʻá na tomuʻa fai ʻa hono tākiekina hona ongo husepānití ʻi ha founga totonu, pe ko e tokoni kiate kinaua ke na fakaʻehiʻehi mei ha ngaahi hala ʻi he fai ʻo e fakamāú. (Sēnesi 21:9-12; 27:46–28:2) ʻOku ʻatamai māsila ange nai ha uaifi ia ʻi hono husepānití, pe ʻokú ne maʻu nai ʻe ia ha ngaahi malava kehe ʻoku ʻikai ke maʻu ia ʻe he husepānití. Neongo ia, ko iá ke ne “fakaʻapaʻapa loloto” ki hono husepānití pea ke “anganofo” kiate ia ʻo hangē pē ko ʻene “anganofo ki he ʻEikí.” (Efeso 5:22, 33, NW) Ko e fakakaukau atu fakataha mo e taumuʻa ke fakahōifuaʻi ʻa e ʻOtuá ʻoku malava ke tokoniʻi ai ha uaifi ke ngāueʻaki ʻene ngaahi malavá ke poupou ki hono husepānití kae ʻikai ko hono tuku hifo ia pe feinga ke puleʻi ia. Ko e “poto ha fefine” pehē ʻokú ne ngāue fakataha vāofi ai mo hono husepānití ke langa hake ʻa e fāmilí. ʻOkú ne tauhi maʻu ai ʻa e melino mo e ʻOtuá.​—Palovepi 14:1.

10. (a) Ko e hā ʻa e mafai kuo ʻoange ʻe he ʻOtuá ki he ngaahi mātuʻá? (e) Ko e hā ʻa e ʻuhinga ʻo e foʻi lea “akonaki,” pea ʻoku totonu ke fakahoko fēfē ia? (Sio foki ki he fakamatala ʻi laló.)

¹⁰ ʻOku toe maʻu ʻe he ngaahi mātuʻá ʻa e mafai kuo ʻoange kiate kinautolu ʻe he ʻOtuá. ʻOku naʻinaʻi mai ʻa e Tohitapú: “Ko e ngaahi tamaí, ʻoua ʻe fakaʻitaʻi hoʻomou fānaú, kae hokohoko atu hono ʻohake kinautolú ʻi he akonaki mo e enginaki ʻa Sihová.” (Efeso 6:4, NW) ʻI he Tohitapú, ko e foʻi lea “akonaki” ʻoku malava ke ʻuhinga ia ki he “tauhi hake, akoʻi, fakahinohino.” ʻOku  fiemaʻu ki he fānaú ʻa e akonakí; ʻoku nau fiefia ʻi he malumalu ʻo e ngaahi tataki, ngaahi ngataʻanga, mo e ngaahi fakangatangata mahinó. ʻOku fakafekauʻaki ʻe he Tohitapú ʻa e akonaki pe fakahinohino peheé mo e ʻofá. (Palōveepi 13:24) Ko ia ai, “ko e ʻakau ako[nakí]” ʻoku totonu ke ʻoua ʻaupito naʻa hoko ko e ngaohikoviʻi​—fakaeongo pe fakaesino. a (Palōveepi 22:15; 29:15) Ko e akonaki ko ia ʻoku ʻikai ngaofengofua pe fefeka ʻo ʻikai ha ongoʻi ʻo e ʻofá ko ha ngāuekoviʻaki ia ʻo e mafai fakaemātuʻá pea ʻoku malava ke ne fesiʻi ʻa e laumālie ʻo ha kiʻi tama. (Kolose 3:21) ʻI he tafaʻaki ʻe tahá, ko e akonaki mafamafatatau ʻoku fakahoko totonú ʻokú ne fakahā ki he fānaú ʻoku ʻofa mo tokanga ʻa ʻenau ongo mātuʻá ʻo fekauʻaki mo e faʻahinga tokotaha te nau hoko ki aí.

11. ʻE malava fēfē ke ngāuetotonuʻaki ʻe he fānaú honau mālohí?

¹¹ Fēfē ʻa e fānaú? ʻE malava fēfē ke nau ngāuetotonuʻaki honau mālohí? “Koe toulekeleka oe kau talavou a ho nau malohi,” ko e lau ia ʻa e Palōveepi 20:29 (PM). Tā ʻoku ʻikai mo ha toe founga ʻe lelei ange ki he kau talavoú ke ngāueʻaki ai honau mālohingá mo e longomoʻuí ka ko hono tauhi hotau “Tokotaha-Fakatupu Maʻongoʻongá.” (Koheleti 12:1, NW) ʻOku totonu ki he fānaú ke nau manatuʻi ko ʻenau ngaahi ngāué ʻoku malava ke kaunga ia ki he ngaahi ongoʻi ʻa ʻenau ongo mātuʻá. (Palōveepi 23:24, 25) ʻI he taimi ʻoku talangofua ai ʻa e fānaú ki heʻenau ngaahi mātuʻa manavahē ʻOtuá pea piki maʻu ki ha ʻalunga ʻoku totonú, ʻoku nau ʻomai ai ʻa e fiefia ki he loto ʻo ʻenau ongo mātuʻá. (Efeso 6:1) Ko e ʻulungaanga peheé ʻoku “lelei lahi ia ki he Eiki.”​—Kolose 3:20, PM.

12, 13. (a) Ko e hā ʻa e vakai ʻoku totonu ke maʻu ʻe he kau mātuʻá ki honau mafai ʻi he fakatahaʻangá? (e) Fakatātaaʻi ʻa e ʻuhinga ʻoku totonu ke fakafeangai ai ʻa e kau mātuʻá ki he tākangá ʻaki ʻa e fakaalaalá.

¹² Kuo tokonaki mai ʻe Sihova ʻa e kau ʻovasia ke nau takimuʻa ʻi he fakatahaʻanga Kalisitiané. (Hepelū 13:17) Ko e kau tangata taau ko ʻení ʻoku totonu ke nau ngāueʻaki honau mafai kuo foaki mei he ʻOtuá ke tokonaki mai ʻa e tokoni ʻoku fiemaʻú pea ke tokoni ki he tuʻunga lelei ʻo e tākangá. ʻOku ʻuhinga honau tuʻunga  fakanofo ko e kau mātuʻá ke nau fakafieʻeiki ʻaki ki honau ngaahi kaungātuí? ʻIkai ʻaupito! ʻOku fiemaʻu ki he kau mātuʻá ia ke nau maʻu ha vakai mafamafatatau mo anga-fakatōkilalo ki honau ngafa ʻi he fakatahaʻangá. (1 Pita 5:2, 3) ʻOku tala ʻe he Tohitapú ki he kau ʻovasiá: “Tauhi ʻa e fakatahaʻanga ʻa e ʻOtuá, ʻa ia naʻá ne fakatau mai ʻaki ʻa e taʻataʻa ʻo hono ʻAló tonu.” (Ngāue 20:28, NW) Ko ha ʻuhinga mātuʻaki mālohi ʻeni ke fakafeangai ai ki he mēmipa taki taha ʻo e tākangá ʻaki ʻa e fakaalaala.

¹³ ʻE lava ke tau fakatātaaʻi ia ʻi he foungá ni. ʻOku kole atu ha kaumeʻa ofi ke ke tokangaʻi ha koloa mahuʻinga. ʻOkú ke ʻiloʻi naʻe totongi ʻe ho kaumeʻá ha mahuʻinga lahi ki he meʻa ko iá. ʻIkai te ke tauhi ia ʻi ha tuʻunga pelepelengesi, ʻaki ʻa e tokanga lahi? ʻI he tuʻunga meimei tatau, kuo tuku mai ʻe he ʻOtuá ki he kau mātuʻá ʻa e fatongia ke tokanga ki ha koloa mahuʻinga moʻoni: ko e fakatahaʻangá, ʻa ia ʻoku fakatatau hono kau mēmipá ki he fanga sipí. (Sione 21:16, 17) ʻOku mātuʻaki ʻofeina ʻe Sihova ʻene fanga sipí​—ko hono moʻoní, ko ʻenau mātuʻaki ʻofeiná ē naʻá ne fakatau ʻaki ai kinautolu ʻa e taʻataʻa mātuʻaki mahuʻinga ʻo hono ʻAlo tofu-pē-taha-ne-fakatupú, ʻa Sīsū Kalaisi. Ko e mahuʻinga lahi tahá naʻe totongi ʻe Sihova maʻa ʻene fanga sipí. ʻOku tauhi maʻu ia ʻi he fakakaukau ʻa e kau mātuʻa anga-fakatōkilaló pea fakafeangai pehē tofu pē ki he fanga sipi ʻa Sihová.

14. Ko e hā ʻa e mālohi ʻoku ʻi he ʻeleló?

¹⁴ “Ko e maté mo e moʻuí ʻoku ʻi he mālohi ia ʻo e ʻeleló,” ko e lau ia ʻa e Tohitapú. (Palōveepi 18:21, NW) Ko e moʻoni, ʻoku malava ʻe he ʻeleló ke ne fai ha maumau lahi. Ko hai ia ʻiate kitautolu kuo ʻikai ʻaupito te ne ongoʻi mamahi ʻi ha lea taʻefakakaukauʻi pe naʻa mo ha fakamatala tuku hifo? Ka ʻoku toe maʻu pē ʻe he ʻeleló ʻa e mālohi ke fakatonutonu. “Ko e ʻelelo ʻo e poto ko e meʻa faitoʻo,” ko e lau ia ʻa e Palōveepi 12:18. ʻIo, ko e ngaahi foʻi lea fakalototoʻá mo leleí ʻoku malava ke fakatatau ia ki hano ngāueʻaki ʻo e faitoʻo fakafiemālie ki he lotó. Fakakaukau angé ki he ngaahi fakatātā ʻe niʻihi.

15, 16. ʻI he ngaahi founga fē ʻe lava ke tau ngāueʻaki ai ʻa e ʻeleló ke fakalototoʻaʻi ʻa e niʻihi kehé?

¹⁵ “Lea fakanonga ki he faʻahinga ʻoku loto-mafasiá,” ko e naʻinaʻi ia ʻa e 1 Tesalonaika 5:14 (NW). ʻIo, naʻa mo e kau sevāniti loto-tōnunga ʻa Sihová ʻoku nau fāinga nai ʻi he taimi ʻe niʻihi mo e loto-mafasiá. ʻE malava fēfē ke tau tokoniʻi ʻa e faʻahinga peheé?  ʻOatu ha fakaongoongolelei pau mo moʻoni ke tokoniʻi kinautolu ke nau sio ki honau mahuʻinga tonu ʻi he vakai mai ʻa Sihová. Fevahevaheʻaki mo kinautolu ʻa e ngaahi lea mālohi ʻo e ngaahi konga tohi ʻi he Tohitapú ʻoku nau fakahāhaaʻi ʻoku tokanga moʻoni mai ʻa Sihova mo ʻofa mai ki he faʻahinga ko ia ʻoku nau “loto lavea” mo “laumalie mafesi.” (Sāme 34:18) ʻI he taimi ʻoku tau ngāueʻaki ai ʻa e mālohi ʻo hotau ʻeleló ke fakafiemālieʻi ʻa e niʻihi kehé, ʻoku tau fakahāhā ai ʻoku tau faʻifaʻitaki ki hotau ʻOtua manavaʻofá, “ʻa ia ʻokú ne fakafiemālieʻi ʻa e loto-mafasiá.”​—2 Kolinito 7:6, New American Standard Bible.

¹⁶ ʻOku malava ke tau toe ngāueʻaki ʻa e mālohi ʻo hotau ʻeleló ke tokonaki mai ʻa e fakalototoʻa ʻoku fiemaʻu lahi ki he niʻihi kehé. Kuo mole atu mei ha kaungātui ha taha naʻe ʻofa ai ʻi he maté? Ko ʻetau ngaahi lea fiekaungāmamahi ʻokú ne fakahāhaaʻi ʻetau tokangá mo e hohaʻá ʻoku malava ai ke ne fakafiemālie ʻa e loto ʻoku mamahí. ʻOku ʻi ai ha tokoua pe ko ha tuofefine taʻumotuʻa ʻokú ne ongoʻi ʻoku ʻikai fiemaʻu? Ko ha ʻelelo ʻoku lea fakakaukauʻí ʻoku malava ke ne toe fakapapauʻi ki he faʻahinga taʻumotuʻa angé ʻoku fakamahuʻingaʻi mo fakahoungaʻi kinautolu. ʻOku ʻi ai ha taha ʻoku fāinga mo ha mahaki tauhi? Ko e ngaahi foʻi lea ʻofa ʻoku ʻoatu ʻi he telefoní, faitohí pe ʻokú te leaʻaki atú ʻoku malava ke tokoni lahi ki hono langa hake ʻa e laumālie ʻo e tokotaha ʻoku puké. He fiefia lahi ē kuo pau ke maʻu ʻe hotau  Tokotaha-Fakatupú ʻi he taimi ʻoku tau ngāueʻaki ai ʻa e mālohi ʻo e leá ke leaʻaki ʻa e ngaahi lea ko ia ʻoku “lelei o aoga ke laga aki hake”!​—Efeso 4:29, PM.

17. ʻI he founga mahuʻinga fē ʻoku malava ke tau ngāueʻaki ai hotau ʻeleló ke ʻaonga ki he niʻihi kehé, pea ko e hā ʻoku totonu ai ke tau fai peheé?

¹⁷ ʻOku ʻikai mo ha toe founga ʻe mahuʻinga ange ke ngāueʻaki ai ʻa e mālohi ʻo e ʻeleló ka ko ʻetau vahevahe atu ʻa e ongoongo lelei ʻo e Puleʻanga ʻo e ʻOtuá ki he niʻihi kehé. “ʻOua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai,” ko e lau ia ʻa e Palōveepi 3:27. ʻOku tau moʻuaʻaki ki he niʻihi kehé ke vahevahe atu kiate kinautolu ʻa e ongoongo lelei fakahaofi moʻuí. ʻE ʻikai totonu ke tau tauhi pē kiate kitautolu ʻa e pōpoaki fakavavevave ko ia kuo foaki mātuʻaki nima-homo mai ʻe Sihova kiate kitautolú. (1 Kolinitō 9:16, 22) Ka ko e hā hono lahi ʻoku ʻamanekina ai ʻe Sihova kitautolu ke tau kau ai ki he ngāué ni?

18. Ko e hā ʻoku ʻamanekina ʻe Sihova meiate kitautolú?

¹⁸ Ko ʻetau ʻofa kia Sihová ʻokú ne ueʻi kitautolu ke tau kau kakato ki he ngāue fakafaifekau faka-Kalisitiané. Ko e hā ʻoku ʻamanekina ʻe Sihova meiate kitautolu ʻi he meʻá ni? Ko e meʻa ʻoku malava ʻe kitautolu kotoa ke foakí, tatau ai pē pe ko e hā hotau tuʻunga ʻi he moʻuí: “ʻIlonga ha meʻa ʻoku mou fai, ngāue ki ai ʻaki homou kotoá ʻo hangē ko ha fai ia kia Sihova, kae ʻikai ki he tangatá.” (Kolose 3:23, NW) ʻI hono fakahaaʻi ʻa e fekau lahi tahá, naʻe pehē ʻe Sīsū: “Ke ofa kia Jihova ko ho Otua aki ho loto kotoa, bea mo ho laumalie [“moʻuí,” NW] kotoa, mo ho atamai kotoa, mo ho malohi kotoa.” (Maʻake 12:30, PM) ʻIo, ʻoku ʻamanekina ʻe Sihova mei he tokotaha taki taha ʻo kitautolu ke tau ʻofa mo tauhi kiate ia ʻi ha founga ʻaki ʻa e soulú kotoa.

19, 20. (a) Koeʻuhi ʻoku kaunga ʻa e soulú ki he lotó, ko e ʻatamaí, pea mo e mālohí, ko e hā ʻoku lave kehekehe ai ki he ngaahi malavá ni ʻi he Maʻake 12:30? (e) ʻOku ʻuhinga ki he hā ʻa e pehē ke tauhi ʻa Sihova ʻaki ʻa e soulú kotoa?

¹⁹ ʻOku ʻuhinga ki he hā ke tauhi ki he ʻOtuá ʻaki ʻa e soulú kotoa? ʻOku ʻuhinga ʻa e soulú ki he tokotahá fakakātoa, fakataha mo e kotoa ʻo ʻene ngaahi malava fakasinó mo e fakaʻatamaí. Koeʻuhi ʻoku kaunga ʻa e soulú ki he lotó, ko e ʻatamaí, pea mo e mālohí, ko e hā ʻoku lave kehekehe ai ki he ngaahi malavá ni ʻi he Maʻake 12:30? Fakakaukau ange ki ha fakatātā. ʻI he ngaahi taimi ʻo e Tohitapú, ʻe fakatau atu nai ʻe ha taha ʻa ia tonu (hono soulú) ki he pōpula. Neongo ia, heʻikai nai ke tauhi loto-ʻaufuatō ʻe he pōpulá ia hono ʻeikí; heʻikai nai te ne ngāuekakatoʻaki ʻe ia hono mālohí pe ko ʻene ngaahi malava fakaʻatamaí kotoa ke laka-ki-muʻa ai ʻa e ngaahi meʻa ʻa hono ʻeikí. (Kolose 3:22) Ko ia ai, ʻoku hā mahino naʻe lave kehekehe ʻa Sīsū ki he ngaahi malava kehé ni koeʻuhi ke fakamamafaʻi kuo pau ke ʻoua te tau toe tuku ha meʻa ʻi heʻetau ngāue ki he ʻOtuá. Ko hono tauhi ʻa e ʻOtuá ʻaki ʻa e soulú kotoa ʻoku ʻuhinga iá ke foaki atu kitautolu, ʻo ngāueʻaki hotau mālohí mo e iví ki he kakato taha ʻe ala lavá ʻi heʻene ngāué.

²⁰ ʻOku ʻuhinga ʻa e tauhi ʻaki ʻa e soulú kotoa kuo pau ke tau fakamoleki kotoa ʻa e foʻi taimi mo e ivi lahi tatau pē ʻi he ngāue fakafaifekaú? ʻE ʻikai malava ke hoko pehē ia, he ʻoku kehekehe ʻa e ngaahi tuʻunga mo e ngaahi malava ʻa e tokotaha taki taha. Ko e fakatātaá, ko ha tokotaha kei siʻi ʻoku moʻui lelei mo ivi lahi fakaesino ʻoku malava nai ke ne fakamoleki ʻa e taimi lahi ange  ʻi he malangá ʻi he malava ʻa e taha ʻa ia ko hono mālohí ʻoku fakavaivaiʻi ia ʻe he hoholo ke motuʻá. Ko ha tokotaha teʻeki mali ʻa ia ʻoku ʻataʻatā mei he ngaahi ngafa fakafāmilí ʻoku malava nai ke ne fai ʻe ia ʻa e meʻa lahi ange ʻi ha taha ʻa ia kuo pau ke ne tokangaʻi ha fāmilí. Kapau ʻoku tau maʻu ʻa e mālohi pea mo e ngaahi tuʻunga ʻoku fakamafeia ai kitautolu ke tau fai ʻa e meʻa lahi ʻi he ngāue fakafaifekaú, he fakamālō lahi ē ʻoku totonu ke tau faí! Ko e moʻoni, ʻe ʻikai ʻaupito te tau loto ke maʻu ha laumālie fakaanga, ʻo fakahoa kitautolu ki he niʻihi kehé ʻi he meʻá ni. (Loma 14:10-12) ʻI hono kehé, ʻoku tau loto ke ngāueʻaki hotau mālohí ke fakalototoʻaʻi ʻa e niʻihi kehé.

21. Ko e hā ʻa e founga lelei taha mo mahuʻinga taha ke ngāueʻaki ai hotau mālohí?

²¹ Kuo fokotuʻu ʻe Sihova ʻa e faʻifaʻitakiʻanga haohaoa ʻi hono ngāuetotonuʻaki hono mālohí. ʻOku tau loto ke faʻifaʻitaki kiate ia ʻi he lelei taha ʻo ʻetau malava ʻi he tuʻunga ko e faʻahinga taʻehaohaoa ʻo e tangatá. ʻOku malava ke tau ngāuetotonuʻaki hotau mālohí ʻaki ʻa e fakafeangai anga-fakangeingeia ki he faʻahinga ko ia ʻoku tau maʻu ha mafai ki aí. ʻIkai ngata aí, ʻoku tau loto ke faiʻaki ʻa e soulú kotoa ʻi hono fakahoko ʻa e ngāue fakamalanga fakahaofi moʻui kuo ʻomai ʻe Sihova kiate kitautolu ke tau fakahokó. (Loma 10:13, 14) Manatuʻi, ʻoku fiefia ʻa Sihova ʻi he taimi ʻokú ke ʻoatu ai ʻa e lelei taha te ke lavá​—ho soulú​—ke foakí. ʻIkai ʻoku ueʻi koe ʻe ho lotó ke ke loto ke fai ʻa e meʻa kotoa te ke malavá ʻi hono tauhi ha ʻOtua mahino mo ʻofa pehē? ʻOku ʻikai ha founga ʻe toe lelei ange mo mahuʻinga ange ai ki hono ngāueʻaki ho mālohí.