ບົດທີ 12
“ພະເຈົ້າບໍ່ຍຸຕິທຳບໍ?”
1. ເຮົາຮູ້ສຶກແນວໃດຕອນທີ່ຄົນອື່ນເຈິເລື່ອງທີ່ບໍ່ຍຸຕິທຳ?
ແມ່ໝ້າຍທີ່ສູງອາຍຸຖືກຕົ້ມເອົາເງິນໄປຈົນໝົດເຊິ່ງເປັນເງິນທີ່ລາວທ້ອນໄວ້ຕະຫຼອດຊີວິດ. ແອນ້ອຍທີ່ຊ່ວຍເຫຼືອໂຕເອງບໍ່ໄດ້ຖືກແມ່ທີ່ໃຈດຳເອົາໄປຖິ້ມ. ຜູ້ຊາຍຄົນໜຶ່ງຖືກຈັບໄປຂັງຄຸກທັງໆທີ່ບໍ່ໄດ້ເຮັດຫຍັງຜິດ. ເຈົ້າຮູ້ສຶກແນວໃດຕໍ່ເລື່ອງເຫຼົ່ານີ້? ເຈົ້າຄືຊິບໍ່ມັກ ແລະກໍເຂົ້າໃຈໄດ້ທີ່ເຈົ້າຮູ້ສຶກແບບນັ້ນ. ຄົນເຮົາມີຈິດສຳນຶກໃນເລື່ອງຖືກເລື່ອງຜິດ. ເມື່ອເຫັນບາງຄົນເຮັດຫຍັງແບບບໍ່ຍຸຕິທຳ ເຮົາກໍຮູ້ສຶກເຈັບໃຈ. ເຮົາຢາກໃຫ້ຜູ້ທີ່ຕົກເປັນເຫຍື່ອໄດ້ຮັບການຊ່ວຍເຫຼືອ ແລະໃຫ້ຜູ້ເຮັດຜິດໄດ້ຮັບໂທດ. ແຕ່ຖ້າບໍ່ເປັນແນວນັ້ນ ເຮົາກໍອາດສົງໄສວ່າ ‘ພະເຈົ້າເຫັນສິ່ງທີ່ກຳລັງເກີດຂຶ້ນບໍ? ເປັນຫຍັງເພິ່ນບໍ່ຈັດການ?’
2. ຫາບາກຸກຮູ້ສຶກແນວໃດໃນເລື່ອງຄວາມບໍ່ຍຸຕິທຳ ແລະເປັນຫຍັງພະເຢໂຫວາບໍ່ໄດ້ໃຈຮ້າຍໃຫ້ລາວໃນເລື່ອງນີ້?
2 ຕະຫຼອດປະຫວັດສາດ ຜູ້ຮັບໃຊ້ທີ່ສັດຊື່ຂອງພະເຢໂຫວາໄດ້ຕັ້ງຄຳຖາມທີ່ຄ້າຍຄືກັນ. ຕົວຢ່າງເຊັ່ນ ຜູ້ພະຍາກອນຫາບາກຸກໄດ້ອະທິດຖານເຖິງພະເຈົ້າວ່າ: “ເປັນຫຍັງພະອົງຈຶ່ງໃຫ້ລູກເຫັນຄົນເຮັດຊົ່ວ? ເປັນຫຍັງພະອົງຈຶ່ງປ່ອຍໃຫ້ຄົນຂົ່ມເຫງກັນ? ເປັນຫຍັງພະອົງຈຶ່ງໃຫ້ລູກເຫັນຄວາມຈິບຫາຍແລະຄວາມຮຸນແຮງ? ແລະເປັນຫຍັງຈຶ່ງມີຄວາມຂັດແຍ່ງແລະການຜິດຖຽງກັນ?” (ຮາບາກຸກ 1:3) ພະເຢໂຫວາບໍ່ໄດ້ໃຈຮ້າຍໃຫ້ຮາບາກຸກທີ່ຖາມແບບນັ້ນ. ຍ້ອນຫຍັງ? ຍ້ອນເພິ່ນສ້າງມະນຸດໃຫ້ມີຄວາມຍຸຕິທຳ. ພະເຢໂຫວາໃຫ້ເຮົາສາມາດສະທ້ອນຄວາມຮູ້ສຶກຂອງພະເຈົ້າໃນເລື່ອງທີ່ວ່າອັນໃດຖືກອັນໃດຜິດໃນລະດັບໜຶ່ງ.
ພະເຢໂຫວາຊັງຄວາມບໍ່ຍຸຕິທຳ
3. ເປັນຫຍັງຈຶ່ງເວົ້າໄດ້ວ່າພະເຢໂຫວາເຫັນຄວາມບໍ່ຍຸຕິທຳທີ່ເກີດຂຶ້ນຫຼາຍກວ່າເຮົາ?
3 ພະເຢໂຫວາເຫັນຄວາມບໍ່ຍຸຕິທຳທຸກຢ່າງທີ່ເກີດຂຶ້ນ. ຄຳພີໄບເບິນບອກກ່ຽວກັບສະໄໝຂອງໂນອາວ່າ: “ພະເຢໂຫວາເຫັນວ່າມະນຸດຢູ່ເທິງໂລກຊົ່ວ ຫຼາຍ ແລະໃນໃຈເຂົາຄິດແຕ່ແນວຊົ່ວໆທຸກເວລາ.” (ປະຖົມມະການ 6:5) ເຮົາໄດ້ຍິນເລື່ອງທີ່ບໍ່ຍຸຕິທຳເລື້ອຍໆ ຫຼືເຮົາອາດຈະເຈິເລື່ອງນີ້ດ້ວຍໂຕເອງ. ແຕ່ພະເຢໂຫວາເຫັນເລື່ອງທີ່ບໍ່ຍຸຕິທຳທີ່ເກີດຂຶ້ນນັ້ນຫຼາຍກວ່າເຮົາຫຼາຍ. ເພິ່ນເຫັນຄວາມບໍ່ຍຸຕິທຳທຸກຢ່າງທີ່ເກີດຂຶ້ນທົ່ວໂລກ! ນອກຈາກນັ້ນ ເພິ່ນຍັງຮູ້ວ່າຄົນເຮົາມີຄວາມຄິດທີ່ຜິດໆເຊິ່ງເຮັດໃຫ້ລາວເຮັດສິ່ງທີ່ບໍ່ຍຸຕິທຳ.—ເຢເຣມີຢາ 17:10
4, 5. (ກ) ຄຳພີໄບເບິນສະແດງໃຫ້ເຫັນແນວໃດວ່າພະເຢໂຫວາສົນໃຈຜູ້ທີ່ຖືກປະຕິບັດແບບບໍ່ຍຸຕິທຳ? (ຂ) ພະເຢໂຫວາເອງໄດ້ເຈິກັບຄວາມບໍ່ຍຸຕິທຳຫຍັງແດ່?
4 ພະເຢໂຫວາບໍ່ພຽງແຕ່ເຫັນຄວາມບໍ່ຍຸຕິທຳ ແຕ່ເພິ່ນຍັງສົນໃຈຜູ້ທີ່ຕົກເປັນເຫຍື່ອຂອງຄວາມບໍ່ຍຸຕິທຳນຳອີກ. ເມື່ອສັດຕູເຮັດຕໍ່ປະຊາຊົນຂອງເພິ່ນຢ່າງໂຫດຮ້າຍ ພະເຢໂຫວາຮູ້ສຶກອີ່ຕົນທີ່ “ເຂົາເຈົ້າຮ້ອງຄາງຍ້ອນຜູ້ອື່ນກົດຂີ່ແລະເຮັດກັບເຂົາເຈົ້າແບບໂຫດຮ້າຍ.” (ພວກຜູ້ຕັດສິນ 2:18) ເຈົ້າອາດສັງເກດວ່າເມື່ອບາງຄົນເຫັນຄວາມບໍ່ຍຸຕິທຳຫຼາຍສ່ຳໃດ ເຂົາເຈົ້າກໍແຮ່ງຈະລຶ້ງກັບເລື່ອງນັ້ນແລະບໍ່ໄດ້ເຫັນອົກເຫັນໃຈຄົນທີ່ບໍ່ໄດ້ຮັບຄວາມຍຸຕິທຳ. ແຕ່ພະເຢໂຫວາບໍ່ໄດ້ເປັນແບບນັ້ນ! ເຖິງວ່າເພິ່ນເຫັນຄວາມບໍ່ຍຸຕິທຳທຸກຮູບແບບມາຫຼາຍກວ່າ 6.000 ປີແລ້ວ ເພິ່ນກໍຍັງຊັງຄວາມບໍ່ຍຸຕິທຳຢູ່. ຄຳພີໄບເບິນບອກວ່າ ເພິ່ນຊັງ “ລີ້ນທີ່ເວົ້າຕົວະ” “ມືທີ່ເປື້ອນເລືອດຂອງຄົນທີ່ບໍ່ມີຄວາມຜິດ” ແລະ “ຄົນທີ່ເປັນພະຍານຕົວະ.”—ສຸພາສິດ 6:16-19
5 ຕອນທີ່ພະເຢໂຫວາຕຳໜິພວກຜູ້ນຳອິດສະຣາເອນແຮງໆ ເຮົາຮູ້ເລີຍວ່າເພິ່ນຊັງຄວາມບໍ່ຍຸຕິທຳຫຼາຍສ່ຳໃດ. ເພິ່ນດົນໃຈຜູ້ພະຍາກອນຂອງເພິ່ນໃຫ້ເວົ້າກັບເຂົາເຈົ້າວ່າ: “ພວກເຈົ້າຄວນຮູ້ວ່າຄວາມຍຸຕິທຳແມ່ນຫຍັງບໍ່ແມ່ນບໍ?” ຫຼັງຈາກທີ່ເພິ່ນເວົ້າໃຫ້ເຂົາເຈົ້າເຫັນພາບກ່ຽວກັບການໃຊ້ອຳນາດແບບຜິດໆ ເພິ່ນກໍບອກເຖິງຜົນທີ່ຈະເກີດຂຶ້ນກັບເຂົາເຈົ້າວ່າ: “ເມື່ອພວກເຈົ້າຮ້ອງຂໍໃຫ້ພະເຢໂຫວາຊ່ວຍ ເພິ່ນຈະບໍ່ຊ່ວຍ. ເພິ່ນຈະປິ່ນໜ້າໜີຈາກພວກເຈົ້າ ຍ້ອນພວກເຈົ້າເຮັດຊົ່ວ.” (ມີກາ 3:1-4) ເຫັນໄດ້ແຈ້ງເລີຍວ່າພະເຢໂຫວາຊັງຄວາມບໍ່ຍຸຕິທຳຫຼາຍ ເພິ່ນເອງກໍເຄີຍເຈິກັບຄວາມບໍ່ຍຸຕິທຳ. ຊາຕານໄດ້ເຍາະເຍີ້ຍເພິ່ນແບບບໍ່ຍຸຕິທຳມາຫຼາຍພັນປີແລ້ວ. (ສຸພາສິດ 27:11) ພະເຢໂຫວາເຈິເລື່ອງທີ່ບໍ່ຍຸຕິທຳຫຼາຍທີ່ສຸດແມ່ນຕອນທີ່ລູກຊາຍຂອງເພິ່ນ ຜູ້ທີ່ “ບໍ່ເຄີຍເຮັດຫຍັງຜິດ” ຖືກຂ້າຄືກັບເປັນຜູ້ທີ່ເຮັດຜິດຮ້າຍແຮງ. (1 ເປໂຕ 2:22; ເອຊາຢາ 53:9) ເຮົາໝັ້ນໃຈໄດ້ແທ້ໆວ່າພະເຢໂຫວາເຫັນທຸກຄົນທີ່ເຈັບປວດຍ້ອນຖືກປະຕິບັດແບບບໍ່ຍຸຕິທຳ ແລະເພິ່ນກໍສົນໃຈເຂົາເຈົ້າຫຼາຍແທ້ໆ.
6. ເຮົາອາດຮູ້ສຶກແນວໃດຕອນທີ່ເຈິເລື່ອງທີ່ບໍ່ຍຸຕິທຳ ແລະຍ້ອນຫຍັງ?
6 ແຕ່ຕອນທີ່ເຮົາເຫັນຄວາມບໍ່ຍຸຕິທຳຫຼືຕອນທີ່ເຮົາເຈິເລື່ອງທີ່ບໍ່ຍຸຕິທຳ ເຮົາອາດຈະຮູ້ສຶກໃຈຮ້າຍແລະຮັບບໍ່ໄດ້. ຄວາມຮູ້ສຶກແບບນີ້ເປັນເລື່ອງປົກກະຕິຍ້ອນພະເຈົ້າສ້າງເຮົາໃຫ້ຄ້າຍຄືກັບເພິ່ນ ແລະພະເຢໂຫວາພະເຈົ້າກໍເປັນພະເຈົ້າທີ່ຍຸຕິທຳ. (ປະຖົມມະການ 1:27) ຖ້າຈັ່ງຊັ້ນ ເປັນຫຍັງພະເຢໂຫວາຈຶ່ງຍອມໃຫ້ຄວາມບໍ່ຍຸຕິທຳເກີດຂຶ້ນ?
ຄຳຖາມທີ່ສຳຄັນ
7. ໃນສວນເອເດັນຊາຕານບອກແນວໃດກ່ຽວກັບພະເຢໂຫວາ?
7 ເຮົາຈະຮູ້ໄດ້ວ່າເປັນຫຍັງພະເຈົ້າຍອມໃຫ້ມີຄວາມບໍ່ຍຸຕິທຳກໍໂດຍຮຽນຮູ້ຈາກເລື່ອງທີ່ເກີດຂຶ້ນໃນສວນເອເດັນ. ດັ່ງທີ່ເຮົາໄດ້ເຂົ້າໃຈແລ້ວວ່າຜູ້ສ້າງມີສິດທີ່ຈະປົກຄອງໂລກແລະມະນຸດທຸກຄົນ. (ເພງສັນລະເສີນ 24:1; ພະນິມິດ 4:11) ແຕ່ບໍ່ດົນຫຼັງຈາກພະເຢໂຫວາສ້າງມະນຸດກໍມີການເຮັດໃຫ້ຊື່ຂອງເພິ່ນຖືກໝິ່ນປະໝາດ ແລະເພິ່ນຍັງຖືກກ່າວຫາວ່າເປັນຜູ້ປົກຄອງທີ່ບໍ່ດີ. ເລື່ອງນີ້ເກີດຂຶ້ນແນວໃດ? ພະເຢໂຫວາສັ່ງອາດາມມະນຸດຄົນທຳອິດບໍ່ໃຫ້ກິນໝາກໄມ້ຈາກຕົ້ນໄມ້ຕົ້ນໜຶ່ງໃນສວນເອເດັນ ແລະບອກນຳວ່າຜົນຈະເປັນແນວໃດຖ້າລາວບໍ່ເຊື່ອຟັງ? ພະເຈົ້າບອກລາວວ່າ: “ເຈົ້າກໍຈະຕາຍມື້ນັ້ນ.” (ປະຖົມມະການ 2:17) ຄຳສັ່ງຂອງເພິ່ນບໍ່ໄດ້ຍາກໂພດສຳລັບອາດາມກັບເອວາ. ແຕ່ຊາຕານເຮັດໃຫ້ເອວາຄິດວ່າພະເຈົ້າເຂັ້ມງວດໂພດ ແລະຍັງບອກວ່າລາວຈະໄດ້ຮັບຜົນແນວໃດຖ້າລາວກິນໝາກໄມ້ຈາກຕົ້ນນັ້ນ? ຊາຕານບອກເອວາວ່າ: “ພວກເຈົ້າຊິບໍ່ຕາຍດອກ. ພະເຈົ້າຮູ້ຢູ່ແລ້ວວ່າ ຖ້າພວກເຈົ້າກິນໝາກໄມ້ຈາກຕົ້ນນັ້ນ ພວກເຈົ້າກໍຈະສະຫຼາດຂຶ້ນ. ພວກເຈົ້າຈະເປັນຄືກັບພະເຈົ້າ ຮູ້ຈັກດີແລະຊົ່ວ.”—ປະຖົມມະການ 3:1-5
8. (ກ) ຊາຕານຢາກໃຫ້ເອວາເຊື່ອວ່າພະເຢໂຫວາເປັນພະເຈົ້າແບບໃດ? (ຂ) ມັນເຮັດໃຫ້ພະເຈົ້າເສຍຊື່ສຽງແລະໂຈມຕີອຳນາດການປົກຄອງສູງສຸດຂອງເພິ່ນແນວໃດ?
8 ຊາຕານຕົວະເອວາແລະຢາກໃຫ້ລາວເຊື່ອວ່າພະເຢໂຫວາປິດບັງສິ່ງທີ່ລາວສົມຄວນຮູ້. ຊາຕານເຮັດໃຫ້ເອວາສົງໄສວ່າພະເຢໂຫວາເປັນພະເຈົ້າທີ່ດີແທ້ໆບໍ. ມັນເຮັດໃຫ້ພະເຈົ້າເສຍຊື່ສຽງແລະໂຈມຕີອຳນາດການປົກຄອງສູງສຸດຫຼືວິທີປົກຄອງຂອງເພິ່ນ. ຊາຕານບໍ່ໄດ້ເວົ້າວ່າພະເຢໂຫວາບໍ່ແມ່ນຜູ້ປົກຄອງສູງສຸດ ແຕ່ມັນເວົ້າໃນທຳນອງວ່າເພິ່ນບໍ່ມີສິດປົກຄອງ ບໍ່ສົມຄວນຈະໄດ້ຮັບຄວາມນັບຖື ເປັນຜູ້ປົກຄອງທີ່ບໍ່ດີ ແລະບໍ່ໄດ້ສົນໃຈຜົນປະໂຫຍດປະຊາຊົນຂອງເພິ່ນ.
9. (ກ) ຜົນເປັນແນວໃດເມື່ອອາດາມກັບເອວາບໍ່ເຊື່ອຟັງພະເຈົ້າ ແລະນີ້ເຮັດໃຫ້ເກີດຄຳຖາມທີ່ສຳຄັນຫຍັງ? (ຂ) ເປັນຫຍັງພະເຢໂຫວາບໍ່ທຳລາຍເຂົາເຈົ້າທັນທີ?
9 ໃນທີ່ສຸດ ອາດາມກັບເອວາກໍບໍ່ເຊື່ອຟັງພະເຢໂຫວາໂດຍກິນໝາກໄມ້ຈາກຕົ້ນທີ່ເພິ່ນຫ້າມບໍ່ໃຫ້ກິນ. ຍ້ອນບໍ່ເຊື່ອຟັງ ເຂົາເຈົ້າຈຶ່ງຖືກລົງໂທດໃຫ້ຕາຍຄືກັບທີ່ພະເຈົ້າບອກໄວ້. ຄຳຕົວະຂອງຊາຕານເຮັດໃຫ້ເກີດຄຳຖາມສຳຄັນບາງຢ່າງ ເຊັ່ນ ພະເຢໂຫວາມີສິດປົກຄອງມະນຸດແທ້ໆບໍຫຼືມະນຸດຄວນຈະປົກຄອງກັນເອງ? ພະເຢໂຫວາເປັນຜູ້ປົກຄອງທີ່ດີທີ່ສຸດບໍ? ພະເຢໂຫວາສາມາດໃຊ້ລິດເດດທີ່ຍິ່ງໃຫຍ່ຂອງເພິ່ນທຳລາຍອາດາມກັບເອວາແລະຊາຕານທັນທີກໍໄດ້. ຊາຕານບໍ່ໄດ້ສົງໄສກ່ຽວກັບລິດເດດຂອງພະເຈົ້າ ແຕ່ມັນທ້າທາຍຊື່ສຽງແລະວິທີທີ່ເພິ່ນປົກຄອງ. ຖ້າເພິ່ນທຳລາຍເຂົາເຈົ້າທັນທີກໍຈະບໍ່ມີການພິສູດວ່າເພິ່ນເປັນຜູ້ປົກຄອງທີ່ຍຸຕິທຳ. ການເຮັດແນວນັ້ນມີແຕ່ຈະເຮັດໃຫ້ຂໍ້ກ່າວຫາຂອງຊາຕານເບິ່ງຄືວ່າເປັນຄວາມຈິງ. ດັ່ງນັ້ນ ເພື່ອຈະຮູ້ວ່າມະນຸດປົກຄອງກັນເອງຢ່າງມີຄວາມສຸກໂດຍບໍ່ເພິ່ງພະເຈົ້າໄດ້ແທ້ໆບໍ ເພິ່ນກໍຕ້ອງໃຫ້ເວລາເຂົາເຈົ້າໄດ້ພິສູດໂຕເອງ.
10. ປະຫວັດສາດເຮັດໃຫ້ເຮົາເຫັນຫຍັງກ່ຽວກັບການປົກຄອງຂອງມະນຸດ?
10 ຕະຫຼອດຫຼາຍພັນປີ ມະນຸດພະຍາຍາມປົກຄອງກັນມາຫຼາຍຮູບແບບແລ້ວມີທັງລະບອບຜະເດັດການ ປະຊາທິປະໄຕ ສັງຄົມນິຍົມ ແລະຄອມມູນິດ. ຜົນຈາກການປົກຄອງທັງໝົດນີ້ກົງກັບຄຳພີໄບເບິນບອກໄວ້ວ່າ: “ມະນຸດປົກຄອງມະນຸດແລະຄົນທີ່ຢູ່ໃຕ້ການປົກຄອງກໍຕ້ອງທົນທຸກລຳບາກ.” (ປັນຍາຈານ 8:9) ນອກຈາກນັ້ນ ຜູ້ພະຍາກອນເຢເຣມີຢາຍັງບອກນຳວ່າ: “ພະເຢໂຫວາເອີ້ຍ ລູກຮູ້ດີວ່າມະນຸດບໍ່ສາມາດກຳນົດແນວທາງຊີວິດຂອງໂຕເອງໄດ້. ແມ່ນແຕ່ບາດກ້າວຂອງໂຕເອງ ເຂົາເຈົ້າກໍຍັງກຳນົດບໍ່ໄດ້ຊ້ຳ.”—ເຢເຣມີຢາ 10:23
11. ເປັນຫຍັງພະເຢໂຫວາຍອມໃຫ້ມະນຸດເຈິຄວາມທຸກ?
11 ພະເຢໂຫວາຮູ້ຕັ້ງແຕ່ຕອນທຳອິດແລ້ວວ່າຖ້າມະນຸດປົກຄອງກັນເອງໂດຍບໍ່ໄດ້ເພິ່ງເພິ່ນ ເຂົາເຈົ້າກໍຈະເຈິບັນຫາຫຼາຍຢ່າງ. ຖ້າເປັນແນວນັ້ນ ຍຸຕິທຳບໍທີ່ພະເຈົ້າຍອມໃຫ້ເຂົາເຈົ້າເຈິກັບບັນຫາຫຼາຍຢ່າງ. ເພື່ອເປັນຕົວຢ່າງ ສົມມຸດວ່າລູກຂອງເຈົ້າເຈັບປ່ວຍໜັກແລະຕ້ອງໄດ້ຜ່າຕັດ. ເຈົ້າຮູ້ວ່າການຜ່າຕັດຈະເຮັດໃຫ້ລູກເຈັບປວດຫຼາຍ ແລະເລື່ອງນີ້ກໍເຮັດໃຫ້ເຈົ້າທຸກໃຈ. ແຕ່ເຈົ້າຮູ້ວ່າການຜ່າຕັດຈະເຮັດໃຫ້ລູກມີສຸຂະພາບດີຂຶ້ນ. ຄ້າຍຄືກັນ ພະເຈົ້າຮູ້ແລະບອກລ່ວງໜ້າໄວ້ວ່າການທີ່ເພິ່ນຍອມໃຫ້ມະນຸດປົກຄອງກັນເອງຈະເຮັດໃຫ້ເຂົາເຈົ້າເຈັບປວດແລະມີຄວາມທຸກ. (ປະຖົມມະການ 3:16-19) ເພິ່ນຍັງຮູ້ວ່າເພື່ອຄວາມເຈັບປວດແລະຄວາມທຸກຈະໝົດໄປເລີຍ ເພິ່ນຕ້ອງຍອມໃຫ້ເຂົາເຈົ້າເຫັນຜົນເສຍຫາຍທີ່ເກີດຈາກການທີ່ເຂົາເຈົ້າປົກຄອງກັນເອງໂດຍບໍ່ເພິ່ງເພິ່ນ. ໂດຍວິທີນີ້ປະເດັນເລື່ອງສິດການປົກຄອງຂອງພະເຈົ້າຈະໄດ້ຮັບການພິສູດວ່າຖືກຕ້ອງຕະຫຼອດໄປ.
ປະເດັນເລື່ອງຄວາມຊື່ສັດຂອງມະນຸດ
12. ຕົວຢ່າງຂອງໂຢບສະແດງໃຫ້ເຫັນວ່າຊາຕານກ່າວຫາມະນຸດໃນເລື່ອງໃດ?
12 ຕອນທີ່ຊາຕານທ້າທາຍສິດແລະວິທີປົກຄອງຂອງພະເຈົ້າ ມັນບໍ່ພຽງແຕ່ສົງໄສວ່າພະເຢໂຫວາເປັນພະເຈົ້າທີ່ບໍ່ດີແລະເປັນຜູ້ປົກຄອງທີ່ບໍ່ດີເທົ່ານັ້ນ ແຕ່ມັນຍັງສົງໄສກ່ຽວກັບຜູ້ຮັບໃຊ້ຂອງພະເຈົ້າແລະເຫດຜົນທີ່ເຂົາເຈົ້າຮັບໃຊ້ເພິ່ນນຳ ເຊັ່ນ ຊາຕານເວົ້າກັບພະເຢໂຫວາກ່ຽວກັບໂຢບຜູ້ສັດຊື່ວ່າ: “ພະອົງເຮັດຮົ້ວປົກປ້ອງລາວກັບຄອບຄົວ ແລະທຸກສິ່ງທຸກຢ່າງຂອງລາວບໍ່ແມ່ນບໍ? ພະອົງອວຍພອນສິ່ງທີ່ລາວເຮັດ ແລະອວຍພອນໃຫ້ຝູງສັດຂອງລາວອອກ ແມ່ແພ່ລູກບັກຫຼາຍໆ. ແຕ່ລອງໃຫ້ພະອົງຈັດການລາວເບິ່ງແລະເອົາທຸກສິ່ງທີ່ລາວມີໄປຈົນໝົດ ລາວກໍຈະສາບແຊ່ງພະອົງໂລດ.”—ໂຢບ 1:10, 11
13. ຊາຕານອ້າງວ່າອັນໃດເປັນເຫດຜົນທີ່ໂຢບຮັບໃຊ້ພະເຈົ້າ ແລະເລື່ອງນີ້ກ່ຽວຂ້ອງກັບມະນຸດທຸກຄົນແນວໃດ?
13 ຊາຕານອ້າງວ່າພະເຢໂຫວາໃຊ້ລິດເດດຂອງເພິ່ນປົກປ້ອງໂຢບເພື່ອເຮັດໃຫ້ລາວຮັກແລະຮັບໃຊ້ເພິ່ນ. ມັນກຳລັງບອກວ່າທີ່ໂຢບຮັບໃຊ້ພະເຈົ້າກໍຍ້ອນເພິ່ນໃຫ້ສິ່ງດີໆກັບລາວ. ເຖິງວ່າລາວຈະເປັນຄົນດີຫຼາຍສ່ຳໃດ ແຕ່ຖ້າລາວບໍ່ເຫຼືອຫຍັງເລີຍ ລາວກໍຈະເຊົາຮັບໃຊ້ພະເຈົ້າໂລດ. ຊາຕານຮູ້ວ່າໂຢບ “ເຮັດສິ່ງທີ່ຖືກຕ້ອງແລະສັດຊື່ໃນທຸກເລື່ອງ. ລາວນັບຖືພະເຈົ້າຫຼາຍແລະບໍ່ເຮັດສິ່ງຊົ່ວ.” a ລອງຄິດເບິ່ງແມ້ ຖ້າຊາຕານເຮັດໃຫ້ໂຢບຜູ້ສັດຊື່ເຊົາຮັບໃຊ້ພະເຢໂຫວາໄດ້ ແລ້ວມະນຸດຄົນອື່ນໆເດ້ຈະເປັນແນວໃດ? ທີ່ຈິງ ຊາຕານບອກວ່າມະນຸດຮັບໃຊ້ພະເຈົ້າຍ້ອນເຫັນແກ່ຜົນປະໂຫຍດ. ເຮົາເຫັນເລື່ອງນີ້ແຈ້ງຈາກສິ່ງທີ່ຊາຕານເວົ້າກັບພະເຢໂຫວາວ່າ: “ມະນຸດສົນໃຈແຕ່ໂຕເອງ ຄົນໆໜຶ່ງຈະຍອມເສຍທຸກສິ່ງທຸກຢ່າງເພື່ອແລກກັບຊີວິດຂອງໂຕເອງ.”—ໂຢບ 1:8; 2:4
14. ປະຫວັດສາດສະແດງໃຫ້ເຫັນຫຍັງກ່ຽວກັບຂໍ້ກ່າວຫາຂອງຊາຕານຕໍ່ມະນຸດ?
14 ປະຫວັດສາດສະແດງໃຫ້ເຫັນວ່າມີຫຼາຍຄົນເປັນຄືກັບໂຢບ. ເຖິງວ່າຈະເຈິການທົດສອບ ແຕ່ເຂົາເຈົ້າກໍຍັງສັດຊື່ຕໍ່ພະເຢໂຫວາເຊິ່ງບໍ່ຄືກັບທີ່ຊາຕານກ່າວຫາ. ເຂົາເຈົ້າເຮັດໃຫ້ພະເຢໂຫວາດີໃຈ ແລະເຮັດໃຫ້ເພິ່ນຕອບຄຳເຍາະເຍີ້ຍຂອງຊາຕານໄດ້ໃນເລື່ອງທີ່ມັນບອກວ່າມະນຸດຈະເຊົາຮັບໃຊ້ພະເຈົ້າຖ້າເຂົາເຈົ້າເຈິຄວາມຍາກລຳບາກ. (ເຮັບເຣີ 11:4-38) ຄົນທີ່ຮັກພະເຢໂຫວາບໍ່ໄດ້ເຊົາຮັບໃຊ້ເພິ່ນ. ເຖິງວ່າເຂົາເຈົ້າເຈິກັບບັນຫາທີ່ໜັກໆ ແຕ່ເຂົາເຈົ້າຍັງໝັ້ນໃຈຢ່າງເຕັມທີວ່າພະເຢໂຫວາຈະໃຫ້ກຳລັງກັບເຂົາເຈົ້າເພື່ອຈະອົດທົນໄດ້.—2 ໂກຣິນໂທ 4:7-10
15. ອາດມີຄຳຖາມຫຍັງກ່ຽວກັບການຕັດສິນຂອງພະເຈົ້າທັງໃນອະດີດແລະໃນອະນາຄົດ?
15 ແຕ່ການສະແດງຄວາມຍຸຕິທຳຂອງພະເຢໂຫວາບໍ່ໄດ້ກ່ຽວຂ້ອງກັບເລື່ອງອຳນາດໃນການປົກຄອງສູງສຸດຂອງເພິ່ນແລະຄວາມສັດຊື່ຂອງມະນຸດເທົ່ານັ້ນ. ຄຳພີໄບເບິນບອກໃຫ້ເຮົາຮູ້ວ່າພະເຢໂຫວາເຄີຍຕັດສິນຄົນແລະຊາດຕ່າງໆໃນອະດີດແນວໃດ ແລະຍັງບອກລ່ວງໜ້າເລື່ອງການຕັດສິນທີ່ເພິ່ນຈະເຮັດໃນອະນາຄົດນຳ. ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢໂຫວາເຄີຍຕັດສິນຢ່າງຍຸຕິທຳແລະເພິ່ນຈະເຮັດແບບນັ້ນໃນອະນາຄົດຄືກັນ?
ພະເຢໂຫວາຍຸຕິທຳສະເໝີ
ພະເຢໂຫວາຈະບໍ່ “ທຳລາຍຄົນດີພ້ອມກັບຄົນຊົ່ວ”
16, 17. ມີຕົວຢ່າງຫຍັງແດ່ທີ່ສະແດງວ່າມະນຸດບໍ່ສາມາດຕັດສິນໃຈໄດ້ຢ່າງຖືກຕ້ອງສະເໝີ?
16 ຄຳພີໄບເບິນເວົ້າເຖິງພະເຢໂຫວາຢ່າງຖືກຕ້ອງວ່າ: “ແນວທາງຂອງເພິ່ນຍຸຕິທຳ.” (ພະບັນຍັດ 32:4) ແຕ່ເຮົາຄືຊິເວົ້າເຖິງໂຕເອງແບບນັ້ນບໍ່ໄດ້ຍ້ອນເຮົາບໍ່ຮູ້ຂໍ້ມູນທັງໝົດ ແລະເຮົາກໍຕັດສິນຜິດພາດເລື້ອຍໆ. ຕົວຢ່າງເຊັ່ນ ອັບຣາຮາມຂໍຮ້ອງພະເຢໂຫວາບໍ່ໃຫ້ທຳລາຍເມືອງໂຊໂດມທັງໆທີ່ຄົນໃນເມືອງນັ້ນຊົ່ວຫຼາຍ. ລາວຖາມພະເຢໂຫວາວ່າ: “ພະອົງຈະທຳລາຍຄົນດີພ້ອມກັບຄົນຊົ່ວແທ້ໆບໍ?” (ປະຖົມມະການ 18:23-33) ພະເຢໂຫວາບໍ່ມີທາງເຮັດແບບນັ້ນດອກ. ເຮົາຮູ້ວ່າ ຫຼັງຈາກທີ່ໂລດຜູ້ສັດຊື່ກັບລູກສາວ 2 ຄົນມາຮອດເມືອງໂຊອາຢ່າງປອດໄພແລ້ວ ພະເຢໂຫວາຈຶ່ງ “ໃຫ້ມາດແລະໄຟຕົກລົງມາໃສ່ເມືອງໂຊໂດມ.” (ປະຖົມມະການ 19:22-24) ກົງກັນຂ້າມ ໂຢນາພັດບໍ່ໄດ້ຮູ້ສຶກອີ່ຕົນຄົນໃນເມືອງນີເນເວ. ຕອນນັ້ນ ລາວໄດ້ປະກາດແລ້ວວ່າຄົນໃນເມືອງນີເນເວຈະຖືກທຳລາຍຍ້ອນເຂົາເຈົ້າຊົ່ວຫຼາຍ ແຕ່ເມື່ອເຫັນເຂົາເຈົ້າກັບໃຈ ພະເຢໂຫວາກໍເມດຕາເຂົາເຈົ້າ ໂຢນາຈຶ່ງ “ໃຈຮ້າຍແຮງ.”—ໂຢນາ 3:10–4:1
17 ພະເຢໂຫວາຮັບຮອງກັບອັບຣາຮາມວ່າເພິ່ນເຮັດສິ່ງທີ່ຖືກຕ້ອງສະເໝີ. ເມື່ອເພິ່ນທຳລາຍຄົນຊົ່ວ ເພິ່ນກໍປົກປ້ອງຄົນທີ່ສັດຊື່ໄປນຳ. ແຕ່ໂຢນາຕ້ອງຮຽນຮູ້ວ່າພະເຢໂຫວາເມດຕາມະນຸດຫຼາຍ. ຖ້າຄົນຊົ່ວເຊົາເຮັດຊົ່ວ ເພິ່ນກໍ “ພ້ອມທີ່ຈະໃຫ້ອະໄພ.” (ເພງສັນລະເສີນ 86:5) ບາງຄົນເຮັດກັບຄົນອື່ນແບບໂຫດຮ້າຍກໍເພື່ອຈະອວດວ່າໂຕເອງມີອຳນາດ ຫຼືຖ້າຈະສະແດງ ຄວາມເມດຕາກໍຢ້ານຄົນອື່ນເບິ່ງວ່າໂຕເອງເປັນຄົນອ່ອນແອ. ແຕ່ພະເຢໂຫວາບໍ່ໄດ້ເປັນແບບນັ້ນ ເພິ່ນສະແດງຄວາມເມດຕາສະເໝີເມື່ອມີເຫດຜົນທີ່ຈະເຮັດແບບນັ້ນ.—ເອຊາຢາ 55:7; ເອເຊກຽນ 18:23
18. ຄຳພີໄບເບິນສະແດງໃຫ້ເຫັນແນວໃດວ່າພະເຢໂຫວາບໍ່ໄດ້ເບິ່ງຂ້າມຄວາມຜິດ?
18 ຄວາມເມດຕາຂອງພະເຢໂຫວາບໍ່ໄດ້ເຮັດໃຫ້ເພິ່ນເບິ່ງຂ້າມການເຮັດຜິດ. ເມື່ອພວກອິດສະຣາເອນຍັງນະມັດສະການຮູບບູຊາ ເພິ່ນບອກຢ່າງເດັດຂາດວ່າ: “ເຮົາຈະຕັດສິນພວກເຈົ້າຕາມການກະທຳຂອງພວກເຈົ້າ ແລະພວກເຈົ້າຕ້ອງຮັບຜິດຊອບທີ່ພວກເຈົ້າເຮັດສິ່ງທີ່ເປັນຕາຂີ້ດຽດຫຼາຍຢ່າງ. ເຮົາຈະບໍ່ອີ່ຕົນແລະບໍ່ສົນໃຈພວກເຈົ້າ. ເຮົາຈະໃຫ້ພວກເຈົ້າໄດ້ຮັບຜົນຈາກການກະທຳຂອງພວກເຈົ້າ.” (ເອເຊກຽນ 7:3, 4) ດັ່ງນັ້ນ ຖ້າຄົນທີ່ເຮັດຜິດບໍ່ຍອມປ່ຽນແປງໂຕເອງ ພະເຢໂຫວາກໍຈະລົງໂທດເຂົາເຈົ້າ. ແຕ່ເພິ່ນຈະລົງໂທດເມື່ອມີເຫດຜົນທີ່ຈະເຮັດແບບນັ້ນ. ຕົວຢ່າງເຊັ່ນ ເມື່ອພະເຢໂຫວາໄດ້ຍິນສຽງຮ້ອງຈົ່ມກ່ຽວກັບເມືອງໂຊໂດມແລະເມືອງໂກໂມຣາ ເພິ່ນບອກວ່າ: “ເຮົາຊິລົງໄປເບິ່ງວ່າຊິແມ່ນຄືກັບທີ່ເຂົາເຈົ້າເວົ້າບໍ?” (ປະຖົມມະການ 18:20, 21) ເຮົາຮູ້ສຶກຂອບໃຈແທ້ໆທີ່ພະເຢໂຫວາບໍ່ຄືກັບມະນຸດທີ່ຟ້າວຕັດສິນກ່ອນໄດ້ຟັງຄວາມຈິງທັງໝົດ. ພະເຢໂຫວາເປັນຄືກັບທີ່ຄຳພີໄບເບິນບອກໄວ້ແທ້ໆວ່າ: “ເພິ່ນເປັນຜູ້ທີ່ພວກເຮົາໄວ້ໃຈໄດ້” ຫຼືຍຸຕິທຳສະເໝີ.—ພະບັນຍັດ 32:4
ໝັ້ນໃຈວ່າພະເຢໂຫວາຍຸຕິທຳສະເໝີ
19. ເຮົາຈະເຮັດແນວໃດຖ້າເຮົາບໍ່ເຂົ້າໃຈເຫດຜົນທີ່ພະເຢໂຫວາຕັດສິນລົງໂທດ?
19 ຄຳພີໄບເບິນບໍ່ໄດ້ອະທິບາຍລາຍລະອຽດທຸກຢ່າງທີ່ພະເຢໂຫວາຕັດສິນລົງໂທດໃນແຕ່ລະເທື່ອແລະບໍ່ໄດ້ບອກລະອຽດວ່າເພິ່ນຈະຕັດສິນມະນຸດທຸກຄົນແນວໃດໃນອະນາຄົດ. ຖ້າມີເຫດການຫຼືຄຳພະຍາກອນບາງເລື່ອງໃນຄຳພີໄບເບິນທີ່ເຮົາຍັງບໍ່ເຂົ້າໃຈຍ້ອນບໍ່ມີລາຍລະອຽດຈະແຈ້ງ ຂໍໃຫ້ເຮົາມີຄວາມຄິດຄືກັບຜູ້ພະຍາກອນມີກາທີ່ບອກວ່າ: “ຂ້ອຍຈະອົດທົນລໍຖ້າໃຫ້ພະເຈົ້າຂອງຂ້ອຍມາຊ່ວຍຂ້ອຍໃຫ້ລອດ.”—ມີກາ 7:7
20, 21. ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢໂຫວາຈະເຮັດສິ່ງທີ່ຖືກຕ້ອງສະເໝີ?
20 ເຖິງເຮົາຈະເຫັນວ່າມີຄວາມບໍ່ຍຸຕິທຳຫຼາຍເລື່ອງທີ່ມະນຸດບໍ່ຢາກແກ້ໄຂ ແຕ່ເຮົາໝັ້ນໃຈໄດ້ວ່າພະເຢໂຫວາຈະເຮັດສິ່ງທີ່ຖືກຕ້ອງໃນທຸກສະຖານະການ. ພະເຢໂຫວາສັນຍາວ່າ: “ການແກ້ແຄ້ນເປັນໜ້າທີ່ຂອງເຮົາ ເຮົາຈະເປັນຜູ້ຕອບແທນເອງ.” (ໂຣມ 12:19) ຖ້າເຮົາລໍຖ້າພະເຢໂຫວາຢ່າງອົດທົນ ເຮົາກໍສະແດງໃຫ້ເຫັນວ່າເຮົາໝັ້ນໃຈຄືກັບອັກຄະສາວົກໂປໂລທີ່ບອກວ່າ: “ພະເຈົ້າບໍ່ຍຸຕິທຳບໍ? ບໍ່ແມ່ນ.”—ໂຣມ 9:14
21 ຕອນນີ້ ເຮົາມີຊີວິດຢູ່ໃນ “ໄລຍະທີ່ມີແຕ່ຄວາມຫຍຸ້ງຍາກລຳບາກ.” (2 ຕີໂມທຽວ 3:1) ຫຼາຍຄົນຕ້ອງທຸກລຳບາກຍ້ອນເຈິຄວາມບໍ່ຍຸຕິທຳແລະ “ການກົດຂີ່ຂົ່ມເຫງ.” (ປັນຍາຈານ 4:1) ແຕ່ພະເຢໂຫວາບໍ່ເຄີຍປ່ຽນ. ເພິ່ນຍັງຊັງຄວາມບໍ່ຍຸຕິທຳແລະເປັນຫ່ວງຄົນທີ່ເຈິຄວາມບໍ່ຍຸຕິທຳ. ຖ້າເຮົາພັກດີຕໍ່ພະເຢໂຫວາແລະສະໜັບສະໜູນການປົກຄອງຂອງເພິ່ນສະເໝີ ເພິ່ນຈະຊ່ວຍເຮົາໃຫ້ອົດທົນໄດ້ຈົນເຖິງເວລາທີ່ເພິ່ນຈະເຮັດໃຫ້ຄວາມບໍ່ຍຸຕິທຳທຸກຢ່າງໝົດໄປໂດຍທາງການປົກຄອງຂອງເພິ່ນ.—1 ເປໂຕ 5:6, 7