1. Suure pirdday geellattiyo wode nuuni waani qohettana danddayiyoo?

ISSI cima amˈˈiyaa cimettada, daro wodiyawu shiishshada dagayido biraappe mela attaasu. Meqettaa iita aayyiyaa ba gacino naˈaa olaasu. Issi bitanee I oottibeenna danobaa gaasuwan qashettiis. Ha hanotaa xeelliyaagan neeyyo aybi siyettii? Ubba hanotatikka nena daganttana danddayoosona; qassi dagammiyoogee bessiyaaba. Asay likkebaanne likke gidennabaa shaakkidi erana danddayees. Suure pirdday geellattiyo wode, nuuni keehi hanqqettoos. Qohettida urawu kaasay qanxxettanaadaaninne qohidaagee qaxxayettanaadan koyoos. Hegaadan hanana xayikko, ‘Haniiddi deˈiyaabaa Xoossay beˈii? Yaatikko I hegaa ayssi giigissennee?’ yaagidi oychchana danddayoos.

2. Naaquwaa xeelliyaagan Imbbaaqoomawu aybi siyettidee, qassi I hegaadan giido gishshawu Yihooway A seeribeennay aybissee?

² Asi deˈido wode ubban, ammanettidi Yihoowawu oottidaageeti hegaa mala oyshata oychchidosona. Leemisuwawu, hananabaa yootiya Imbbaaqoomi Xoossaa hagaadan woossiis: “Ha naaquwaa tana aissi bessai? Mooruwaa xeellaidda neeni aissi co77u gaada danddayai? Bashshainne makkalai ta sinttaana; waretainne ooshshai biitta ubban dariis.” (Imbbaaqooma 1:3) Imbbaaqoomi wozanappe oychchido gishshawu Yihooway A seeribeenna; ayssi giikko, I suure pirddaa eeshshay deˈanaadan oottidi asaa medhdhiis. Ee, Yihooway nuuni amarida hanotan suure pirddaa bessanaadan oottidi nuna medhdhiis.

3. Yihooway suure pirdday geellattiyo wode nuugaappe aaruwaa erees gaana danddayiyoy aybissee?

³ Suure pirdday geellattiyo wode Yihooway erees. Haniiddi deˈiyaabaa I beˈees. Nohe wodiyaa xeelliyaagan Geeshsha Maxaafay  hagaadan gees: “GODAI he wode sa7aa bollan de7iya asaa iitatettai daridoogaanne eti wozanan qoppiyoobai ubbai ubba wodekka iita xalaala gididoogaa be7iis.” (Doomettaabaa 6:5) He qofay woygiyoogaakko beˈa. Nuuni siyido woy nuna gakkida guuttabaa denddo oottidi naaquwaa darotoo akeekoos. Gidoppe attin, Yihooway kumetta saˈan deˈiya naaquwaa erees. I naaqo ubbaa beˈees! Hegaa bolli qassi, I asaa wozanaa koshshaa, hegeekka naaqo oosuwaa oottanaadan denttettiya iita qofaa akeekana danddayees.—Ermmaasa 17:10.

4, 5. (a) Yihooway naaqoy gakkidoogeetussi qarettiyoogaa Geeshsha Maxaafay waati bessii? (b) Naaqoy Yihoowa waani gakkidee?

⁴ SHin Yihooway naaqo oosuwaa akeekiyoogaappe aadhdhiyaabaa oottees. I naaquwan qohettidaageetussi qarettees. Yihooway ba asay morkke deretun meqettaa iita ogiyan oyqettido wode, “huqqunnainne tuggai darin, eti waassiyoogaa siyidi” qarettiis. (Daannata 2:18) Asaa naaqoy gakkiyoogaa keehi beˈida amarida asati, naaquwaa gaasuwan waayettiya asaassi qarettennaagaa neeni akeekennan waaya aggana. Naaqettidaageeta beˈidi Yihooway qarettees! I, 6,000 gidiya layttawu naaquwaa keehi beˈidaba gidikkonne, hegaa ixxiyoogaa aggibeenna. Yihooway “worddotiya inxxarssaa, ashkke asata woriya kushiyaa,” “wordduwaa bolli wordduwaa gujji gujjidi odiya worddo markkaa” shenetiyoogaa Geeshsha Maxaafay yootees.—Leemiso 6:16-19.

⁵ Israaˈeela biittan kaalettiya meqettaa iitata Yihooway seeranawu yootidobaa qoppa. I kiittin hananabaa yootiyaageeti, “Intte suure pirddaa eranau intteyyo bessenneeyye?” yaagidi kaalettiyaageeta oychchanaadan ayyaanan denttettiis. Bantta maataa bessenna ogiyan goˈettiyaageetuyyo qoncce ogiyan yooti simmidi, Yihooway eta oosuwaa gaasuwan eta gakkanabaa kasetidi hagaadan yootiis: “Eti GODAAKKO waassana, shin i etau zaarenna; i ba sinttaa he wode etappe qottana; aissi giikko, eti iita oosuwaa oottidosona.” (Mikiyaasa 3:1-4) Hegee Yihooway naaquwaa keehi ixxiyoogaa bessiyaaba! Naaqoy Yihoowakka gakkiis. SHaˈan qoodettiya layttawu Seexaanay bessenna ogiyan A boriiddi takkiis. (Leemiso 27:11) Qassi, ‘nagara  oottibeenna’ ba Naˈay danobaa oottida uradan hayqqido wode gakkida aybippenne aadhdhiya naaquwan Yihooway keehi azzaniis. (1 PHeexiroosa 2:22; Isiyaasa 53:9) Naaquwaa gaasuwan waayettiyaageetu hanotaa Yihooway akeekiyoogeenne etawu qarettiyoogee qoncce.

6. Nuna naaqoy gakkiyo wode nuuyyo aybi siyettana danddayii, qassi aybissi?

⁶ SHin, hara asaa naaqoy gakkiyoogaa nuuni beˈiyo wode woy hara asi nuna bessenna ogiyan oyqqiyo wode nuuni hanqqettiyoogee wottin deˈiyaaba. Nuuni Xoossaa leemisuwan merettida, qassi suure pirddaa geellayiyoogee Yihoowa eeshshatuppe keehi dummatiyaaba. (Doomettaabaa 1:27) Yaatin suure pirddaa geellayanaadan Xoossay aybissi paqqadidee?

7. Yihooway ubbabaa haariyo maataa xeelliyaagan oyshay waani denddidaakko qonccissa.

⁷ Ha oyshaa zaaroy Xoossay ubbabaa haariyo maataa xeelliyaagan denddida allaalliyaara gayttidaba. Nuuni beˈidoogaadan, saˈaanne an deˈiya ubbabaa haariyo maatay Medhdhidaagawu deˈees. (Mazamure 24:1; Ajjuutaa 4:11) SHin, asay deˈiyoogaa doommido wode Yihooway ubbabaa haariyo maataa xeelliyaagan oyshay denddiis. Hegee awude hanidee? Gannatiyan deˈiya issi mittaa teeraappe meennaadan Yihooway koyro bitaniyaa Addaama azaziis. I azazettana xayikko, aybi hananee? Neeni “tumu haiqqana” yaagidi Xoossay yootiis. (Doomettaabaa 2:17) Xoossaa azazoy Addaama woy A machchiyo Hewaano wayssiyaaba gidenna. Gidoppe attin, Xoossay laˈatettaa diggees giidi Seexaanay Hewaano ammanttiis. A he mittaa teeraappe miikko aybi hananee? Seexaanay Hewaaniyyo hagaadan giis: “CHii, intte ainnekka haiqqekketa; Xoossai hegaa giidoogee, he mittaa teeraa intte miikko, intte aifee dooyettin, lo77uwaanne iitaa Xoossaadan intte eranaagaa i eriyo gishshaassa.”—Doomettaabaa 3:1-5.

8. (a) Seexaanay Hewaaniyyo yootidobay ay qonccissii? (b) Xoossay ubbabaa haariyo maataa xeelliyaagan Seexaanay denttido oyshay aybee?

 ⁸ Seexaanay hegaadan giyoogan, Yihooway Hewaano keehi koshshiyaabaa diggidobay deˈees giidi yootiyoogaa xalla gidennan, iyyo worddotiis giidikka qonccissiis. Seexaanay Xoossay ubbabaa haarana danddayenna giidi oyshaa denttibeenna. SHin, Seexaanay Xoossay ubbabaa haariyo maatay suure, bessiyaagaanne xillo gidiyoogaa xeelliyaagan oyshaa denttiis. Qassi, Yihooway ubbabaa haariyo ba maataa xillo ogiyaaninne haarettiyaageeta maaddiya ogiyan goˈettibeenna giidi Seexaanay yootiis.

9. (a) Addaameenne Hewaana azazettennan ixxidoogee ay kaalettidee, qassi hegee ayba oyshata oychchanaadan oottii? (b) Yihooway makkalanchchata xayssibeennay aybissee?

⁹ Hegaappe simmin, mooppite giido mittaa teeraappe Addaameenne Hewaana miyoogan Yihoowayyo azazettibookkona. Eti azazettennan ixxido gishshawu, Xoossay koyro yootidoogaadan hayquwan qaxxayettidosona. Seexaanaa worddoy amarida oyshata oychchanaadan oottiis. Asaa haariyo maatay Yihoowayyo deˈii, woy asay bana barkka haarana koshshii? Yihooway ubbabaa haariyo ba maataa bessiya ogiyan goˈettii? Yihooway zawi baynna ba wolqqaa goˈettidi he makkalanchchata he wode sohuwaara xayssana danddayees. SHin denddida oyshay Xoossaa wolqqaara gayttidaba gidennan, A haaruwaara gayttidaba. Hegaa gishshawu, Addaama, Hewaanonne Seexaanaa xayssiyoogee Xoossaa haaroy suure gidiyoogaa qonccissiyaaba gidenna. Hegaappe dumma ogiyan, hegee Xoossaa haaruwaa xeelliyaagan hara oyshata oychchanaadan oottees. Asay Xoossaa maadoy baynnan bana barkka haariyoogee etawu injjetanakkonne beˈanaadan, Xoossay daro wodiyaa paqqadiis.

10. Asaa haaruwaa xeelliyaagan taarikee ay qonccissii?

¹⁰ Daro wodee aadhdhidoogee aybi qonccanaadan oottidee? Asay shaˈan qoodettiya layttatun, kawoy haariyo haaruwaa, dimokiraase haaruwaa, sooshaalizimenne koominizime haaruwaa gujjin, daro qommo haaruwaa maliis. Eti ubbay Geeshsha Maxaafay yootiyo kaallidi deˈiyaabay tuma  gidiyoogaa qonccissoosona: “Asi bau de7iya haariyo maataa hara asa qohanau [go7ettees].” (Eranchchaa 8:9) Hananabaa yootiya Ermmaasi hagaadan giis: “Abeet GODAU, asa de7oi he aawussi buzo gidennaagaanne ba hemetaa suurissanaagee aawu shene gidennaagaa taani erais.”—Ermmaasa 10:23.

11. Asay waayettanaadan Yihooway paqqadidoy aybissee?

¹¹ Asay bana barkka haariyoogee daro waaye gakkanaadan oottanaagaa Yihooway koyrokka erees. Yaatin, I hegaa eriiddi paqqadiyoogan suure pirddaa geellayibeennee? Mule geellayibeenna! Leemisuwawu, harggiyaappe paxanawu shuhettana koshshiyo naˈi neeyyo deˈees gaada qoppa. SHuhettiyoogee ne naˈay keehi waayettanaadan oottiyoogaa neeni eraasa; qassi hegee nena keehi azzanttees. SHukkiyoogee ne naˈay paxanaadan oottiyoogaa eraasa. Hegaadan, asaa haaroy daro tuggaanne waayiyaa kaalettanaagaa Xoossay erees; ubba qassi kasetidi hegaa yootiis. (Doomettaabaa 3:16-19) SHin, makkalaa gaasuwan gakkiya iitabaa ubba asay beˈanaadan oottiyoogaa xallay merinawu woppaa demissiyoogaakka I erees. Yaatiyoogan Xoossay ubbabaa haariyo maataa bolli denddida oyshay merinawu zaaruwaa demmanaadan oottees.

12. Iyyooba hanotan qonccidaagaadan, Seexaanay asaa woygidi mootidee?

¹² Ha allaalliyaa xeelliyaagan harabaykka deˈees. Xoossaa haaroy suurenne xillo gidiyoogaa xeelliyaagan Seexaanay oyshaa denttido wode, Yihooway ubbabaa haariyo maataa xeelliyaagan A sunttaa mooriyoogaa xalla gidennan, Xoossawu ammanettidi oottiyaageetu sunttaakka mooriis. Leemisuwawu, Seexaanay xillo bitaniyaa Iyyooba xeelliyaagan Yihoowawu yootidobaa akeeka: “Anne a so asaanne ayyo de7iyaabaa ubbaa neeni dirada naagabeikkii? I oottiyo ooso ubbaa neeni  anjjido gishshau, a mehiyaa wudee biittaa ubbaa bollan dariis. SHin neeni ne kushiyaa yeddada, ayyo de7iya aquwaa ubbaa shociyaakko, i nena tumu ne sinttan qanggana.”—Iyyooba 1:10, 11.

13. Seexaanay Iyyooba xeelliyaagan mootido mootoy ay bessii, qassi hegee ubba asaara waani gayttii?

¹³ Yihooway naaganawu goˈettiyo ba wolqqaa Iyyoobi bawu goynnanaadan oottanawu goˈettiis giidi Seexaanay Yihoowa mootiis. Qassi, hegee Iyyoobi Xoossawu ammanettidi goynniyoy appe maaduwaa demmiyo gishshataassa giidi Seexaanay yootidoogaa bessiyaaba. Xoossay Iyyooba anjjennaakko I bana Medhdhidaagaa qanggana giidi Seexaanay yootiis. Iyyoobi ‘Xoossawu yayyiya iitabaappekka haakkida, boree baynnanne suure asa’ gidiyoogaa Seexaanay erees. * Hegaa gishshawu, Seexaanay Iyyoobi ammanettidi deˈennaadan oottikko, ubba asay ammanettidi deˈennaadan oottana giyoogaa mala. Yaatiyo gishshawu, Xoossawu oottanawu koyiya ubba asay ammanettiyoogaa xeelliyaagan Seexaanay oyshaa denttidoogee tuma. Yohuwaa aassidi Seexaanay Yihoowawu hagaadan giis: “Asi [Iyyooba xalla gidennan] ba shemppuwaa gishshau, bau de7iyaabaa ubbaa immana.”—Iyyooba 1:8; 2:4.

14. Asaa bolli Seexaanay denttido mootuwaa xeelliyaagan taarikee ay bessii?

¹⁴ Daroti Iyyoobaagaadan metoy gakkishinkka Yihoowawu ammanettidi deˈidoogaa taarikee bessees; qassi hegee Seexaanay yootidobay worddo gidiyoogaa qonccissees. Eti ammanettidi deˈidoogee Yihoowa wozanay ufayttanaadan oottiis; qassi hegee asay metoy gakkiyo wode Xoossawu haggaaziyoogaa aggana giidi Seexaanay otorettidi cayido cashshawu Yihooway zaaruwaa immanaadan oottiis. (Ibraawe 11:4-38) Ee, suure wozanay deˈiyo asati Xoossaassi zokkuwaa zaaribookkona.  Eti keehi unˈˈettanaadan oottiya hanotay eta gakkiyo wodekka, genccanawu etawu Yihooway wolqqaa immanaagaa ammanettoosona.—2 Qoronttoosa 4:7-10.

15. Xoossay kase pirddido pirddaanne sinttappe pirddana pirddaa xeelliyaagan ayba oyshay denddana danddayii?

¹⁵ Gidoppe attin, Yihooway suure pirddaa goˈettiyoy ubbabaa haariyo ba maataaranne asay ammanettiyoogaara gayttidaba xallaana gidenna. Yihooway issi ura bolli, ubba qassi kumetta deriyaa bolli pirddido pirddaa Geeshsha Maxaafay yootees. I sinttappe pirddana pirddabaa yootiya hiraagatikka Geeshsha Maxaafan deˈoosona. Yihooway kase pirddido pirddaynne sinttappe pirddana pirdday xillo gidiyoogaa nuuni ammanettana danddayiyoy aybissee?

16, 17. Tumu pirddaa xeelliyaagan asay kumettabaa erennaagaa bessiya leemisoti awugeetee?

¹⁶ Yihoowa xeelliyaagan hagaadan gaana danddayettees: “A oge ubbaikka suure.” (Zaarettido Wogaa 32:4) Nuuppe ooninne nubaa hegaadan gaana danddayokko; ayssi giikko, suurebaa xeelliyaagan nuuyyo deˈiya akeekay ubbatoo kumetta gidenna. Leemisuwawu, Abrahaamaa hanotaa qoppa. Sadooma kataman iitatettay kumidaba gidikkonne, he katamaa xayssiyoogaa xeelliyaagan I Yihoowa mintti woossiis. I Yihoowa hagaadan oychchiis: “Tumu neeni xillota iitatuura xaissuutee?” (Doomettaabaa 18:23-33) I xayssennaagee qoncce. Yihooway Sadooma kataman ‘tamaanne eexxiya dinniyaa bukissiyo’ wode xillo Looxeenne A macca naati Xooˈaaro geetettiya katamiyo saro gakkidosona. (Doomettaabaa 19:22-24) Hegaappe dummatiyaabay, Xoossay Nanawe asaa maarido wode Yoonaasi “keehi hanqqettiis.” Nanawe asay xayanaagaa Yoonaasi yootido gishshawu, eti bantta nagaraappe wozanappe simmikkonne, eti xayiyoogee A ufayssennan waayi aggana.—Yoonaasa 3:10–4:1.

¹⁷ Yihooway ba suure pirddaa iitata xayssana xallaassa  gidennan, xillota ashshanawukka goˈettiyoogaa Abrahaamawu yootiis. Qassi, Yihooway maariyaagaa gidiyoogaa Yoonaasi tamaarana koshshiis. Iitati bantta ogiyaappe simmikko, Yihooway ‘atto gaanawu’ giigi uttiis. (Mazamure 86:5) Bantta maatawu hirggiya asaadan Yihooway ba wolqqaa bessana xallawu asaa bolli pirddenna; woy qassi I laafadan xeelleettays giidi qarettennan aggibeenna. Maarana bessiyo wode ubban I maarees.—Isiyaasa 55:7; Hizqqeela 18:23.

18. Yihooway pirddiyo wode bawu siyettiyaabaa xallaa kaallennaagaa Geeshsha Maxaafaappe qonccissa.

¹⁸ SHin, Yihooway pirddiyo wode bawu siyettiyaabaa xallaa kaallenna. Ba asay eeqawu goynnido wode Yihooway hagaadan giis: “Taani intte oosuwaadan, intte bolli pirddana; intte tuna hanotaadan, taani inttena qaxxayana. Taani intteyyo qarettikkenne intteppe issuwaanne ashshikke.” (Hizqqeela 7:3, 4) Hegaa gishshawu, asay bantta iita oosuwaa aggennan ixxiyo wode, Yihooway eta oosuwaadan eta bolli pirddees. SHin Yihooway mino naqaashi baynnan pirddenna. Yaatiyo gishshawu, Sadoomanne Gamoora xeelliyaagan ‘waassiyo waasoy keehi daridoogaa’ Yihooway siyido wode hagaadan giis: “Eti oottidobi taakko gakkida waasuwaa keesa iitakkonne be7anau ane taani duge wodhdhais.” (Doomettaabaa 18:20, 21) Ubbabaa siyennan pirddanawu dirbbiya daro asaa mala Yihooway gidenna gishshawu nuuni keehi galatoos! Geeshsha Maxaafay qonccissiyoogaadan Yihooway, ‘ammanettiyaanne iitatettay baynna Xoossaa’ gidiyoogee tuma.—Zaarettido Wogaa 32:4.

19. Yihooway suure pirddiyoogaa xeelliyaagan nuuni akeekenna oyshay deˈikko waatana danddayiyoo?

¹⁹ Yihooway beni wode pirddido pirddaara gayttidaagaadan denddiya ubba oyshaa Geeshsha Maxaafay zaarenna; woy qassi Yihooway asaa huuphiyan huuphiyan woy citan sinttappe waati pirddanaakko ubbabaa yootenna. Hagaa mala taariketa woy Geeshsha Maxaafan deˈiya hiraagata loytti akeekennaagaa  gaasuwan nuuni hirggiyo wode, kaallidi deˈiya qofaa xaafida hananabaa yootiya Mikiyaasadan ammanettana danddayoos: “Tana ashshiya Xoossaa taani naagashshana.”—Mikiyaasa 7:7.

20, 21. Yihooway awudekka likkebaa oottanaagaa nuuni ammanettana danddayiyoy aybissee?

²⁰ Yihooway awudekka likkebaa oottanaagaa ammanettana danddayoos. Suure pirddaa geellayiyoogaa asay xaasayidi xeelliyaaba milatiyo wodekka, Yihooway hagaadan qaalaa geliis: “Taani haluwaa kessana; taani kushiyaa zaarana.” (Roome 12:19) Nuuni danddayan naagikko, kiitettida PHawuloosi yootido kaallidi deˈiyaabaa ammanettana danddayoos: “Xoossay suure pirddaa geellayii? Mule geellayenna!”—Roome 9:14, NW.

²¹ SHin, nuuni ‘wayssiya wodiyan’ deˈoos. (2 Ximootiyoosa 3:1) Suure pirdday geellattiyoogeenne ‘naaqoy’ daro asay waayettanaadan oottiis. (Eranchchaa 4:1) Gidoppe attin, Yihooway laamettibeenna. Suure pirddaa geellayiyoogaa I haˈˈikka ixxees, qassi hegaa gaasuwan qohettidaageetuyyo wozanappe qoppees. Nuuni Yihoowawunne I ubbabaa haariyo maatawu ammanettidi deˈikko, I ba Kawotettaa haaruwan geella pirdda ubbaa xayssanawu keerido wodee gakkanaashin genccanaadan nuussi minotettaa immana.—1 PHeexiroosa 5:6, 7.