1, 2. Wetin mek bɔku pipul dɛn nɔ gɛt bɛtɛ rɛspɛkt fɔ lɔ? Aw wi fɔ fil bɔt Gɔd in lɔ dɛn?

WAN buk we dɛn mek insay 1712 bin tɔk se: “Lɔ na ol we nɔ gɛt bɔtɔm, i . . . de it ɛnitin.” Di pɔsin we rayt di buk bin de kɔndɛm di lɔ sistɛm, we sɔntɛnde kin westɛm wit kes na kɔt fɔ lɔng tɛm, ɛn dat kin mek di wan dɛn we want jɔstis sɔfa. Insay bɔku kɔntri dɛn, bikɔs di lɔ sistɛm kin at fɔ ɔndastand, jɔstis nɔ de, i bayas, ɛn i nɔ kin wok di sem we ɔltɛm, dat dɔn mek pipul dɛn nɔ want fɔ obe lɔ ɔlsay.

² Kɔmpia dis wit wetin dɛn bin dɔn rayt trade trade lɛk 2,700 ia so. Dɛn bin rayt se: “A lɛk yu lɔ dɛn bad bad wan!” (Sam 119:​97) Wetin mek di man we rayt dis sam fil dis kayn we? Na bikɔs nɔto mɔtalman mek di lɔ we i bin de tɔk bɔt, na Jiova Gɔd mek am. As yu de stɔdi Jiova in lɔ dɛn, yusɛf go bigin fil di sem we lɛk aw di man we rayt da sam de bin de fil. Da kayn stɔdi de go mek yu ɔndastand mɔ bɔt di lɔ sistɛm we pas ɔl na di wɔl.

3, 4. Us we dɛn Jiova dɔn sho se in na Pɔsin we de gi lɔ?

³ Di Baybul tɛl wi se: “Na wangren Pɔsin de we de gi lɔ ɛn we de jɔj.” (Jems 4:​12) Fɔ tru, na Jiova nɔmɔ de gi lɔ. “Di lɔ dɛn na ɛvin” na dɛn de kɔntrol di we aw di san, di mun, di sta dɛn, ɛn di ɔda tin dɛn we de ɔp spes de muv. (Job 38:​33) Na Gɔd in lɔ de kɔntrol di bɔku bɔku enjɛl dɛn, dɛn ɔl ɔganayz ɛn gɛt patikyula pozishɔn dɛn, ɛn dɛn de wok as savant dɛn ɔnda Jiova.—Ibruz 1:​7, 14.

⁴ Jiova dɔn gi lɔ dɛn bak to mɔtalman. Wi ɔl gɛt kɔnshɛns, ɛn dat de sho di we aw Jiova rili lɛk jɔstis. Bikɔs di kɔnshɛns tan lɛk lɔ we de insay wi, i de ɛp wi fɔ no wetin  rayt ɛn wetin rɔng. (Romans 2:​14) Adam ɛn Iv bin gɛt pafɛkt kɔnshɛns, so dɛn nɔ bin nid bɔku lɔ dɛn. (Jɛnɛsis 2:​15-17) Bɔt mɔtalman we nɔ pafɛkt nid bɔku lɔ dɛn fɔ gayd dɛn fɔ du wetin Gɔd want. Jiova bin gi lɔ dɛn to fetful man dɛn lɛk Noa, Ebraam, ɛn Jekɔp, ɛn dɛn bin pas dɛn lɔ dɛn ya to dɛn famili dɛn. (Jɛnɛsis 6:​22; 9:​3-6; 18:​19; 26:​4, 5) We Jiova bin gi di Lɔ to Mozis fɔ gi di Izrɛlayt dɛn, da we de i mek insɛf Pɔsin we de gi lɔ di kayn we we I nɔ ɛva bin dɔn du am. Di lɔ dɛn we i bin gi ɛp wi fɔ ɔndastand di we aw Jiova rili lɛk jɔstis.

5. Fɔ se di Lɔ we Gɔd Bin Gi Mozis bin at fɔ obe bikɔs i bin at fɔ ɔndastand? Wetin mek yu se so?

⁵ Bɔku pipul dɛn de tink se di Lɔ we Gɔd Bin Gi Mozis bin at fɔ obe, bikɔs i bin at fɔ ɔndastand. Da tinkin de nɔ kɔrɛkt atɔl. I pas 600 lɔ dɛn we Gɔd bin gi Mozis. Dɛn luk bɔku, bɔt jɔs tink bɔt dis: Arawnd di ia 2000, i pas 150,000 pej dɛn we dɛn yuz fɔ rayt di lɔ dɛn we Amɛrika gɛt. Afta ɛvri tu ia, dɛn kin ad lɛk 600 mɔ lɔ dɛn! So if na fɔ sayz, wi go se mɔtalman lɔ dɛn bɔku fa fawe pas di Lɔ we Gɔd Bin Gi Mozis. Bɔt Gɔd in Lɔ bin de ɛp di Izrɛlayt dɛn pan tin dɛn we di lɔ dɛn we de naw nɔ de ivin tɔk bɔt. Lɛ wi tɔk bɔt sɔm pan dɛn.

6, 7. (a) Aw di Lɔ we Gɔd Bin Gi Mozis difrɛn frɔm ɛni ɔda lɔ? Wetin na di lɔ we impɔtant pas ɔl di ɔda lɔ dɛn we Gɔd bin gi Mozis? (b) Aw di Izrɛlayt dɛn go sho se dɛn gri se na Gɔd gɛt rayt fɔ rul?

⁶ Di Lɔ bin de mek ɔlman no se na Jiova gɛt rayt fɔ rul. So wi nɔ go kɔmpia di Lɔ we Gɔd Bin Gi Mozis to ɛni ɔda lɔ. Di lɔ we pas ɔl di ɔda lɔ dɛn we Gɔd bin gi Mozis na di wan we se: “Na PAPA GƆD [“Jiova,” NWT] waŋren na dɛn GƆD. Dɛn fɔ lɛk PAPA GƆD [“Jiova,” NWT] wit ɔl dɛn at, wit ɔl dɛn sol ɛn wit ɔl dɛn trɛnk.” Aw Gɔd in pipul dɛn fɔ  sho se dɛn lɛk am? Dɛn fɔ sav am bay we dɛn put dɛnsɛf ɔnda in rul.—Ditarɔnɔmi 6:​4, 5; 11:​13.

⁷ Ɔl di Izrɛlayt dɛn fɔ sho se na Jiova gɛt di rayt fɔ rul bay we dɛn de put dɛnsɛf ɔnda di wan dɛn we i put oba dɛn. Mama ɛn papa dɛn, edman dɛn, jɔj dɛn, prist dɛn, ɛn ivin di kiŋ dɛn ɔl bin tinap fɔ Gɔd in rul. If pɔsin nɔ obe dɛn wan dɛn de, Jiova bin de si am lɛk se na in di pɔsin nɔ obe. Bɔt di wan dɛn we bin de oba di pipul dɛn go mek Jiova vɛks if dɛn nɔ trit di pipul dɛn fayn ɔ dɛn ash wit dɛn. (Ɛksodɔs 20:​12; 22:​28; Ditarɔnɔmi 1:​16, 17; 17:​8-20; 19:​16, 17) Di wan dɛn we de oba di pipul dɛn ɛn di pipul dɛn ɔl bin nid fɔ sɔpɔt Gɔd in rayt fɔ rul.

8. Aw di Lɔ bin de sɔpɔt Jiova in olinɛs?

⁸ Di Lɔ bin de sɔpɔt Jiova in olinɛs. Di wɔd “oli” ɛn “olinɛs” de pas 280 tɛm na di Lɔ we Gɔd Bin Gi Mozis. Di Lɔ bin ɛp Gɔd in pipul dɛn fɔ no di difrɛns bitwin di tin dɛn we klin ɛn di tin dɛn we nɔ klin, di tin dɛn we piɔ ɛn di tin dɛn we nɔ piɔ, ɛn i bin tɔk bɔt 70 tin dɛn we go mek ɛni Izrɛlayt nɔ klin na In yay. Dɛn lɔ dɛn ya bin tɔk bɔt aw dɛn fɔ klin dɛn bɔdi, di tin dɛn we dɛn gɛt, ɛn di say we dɛn de; di tin dɛn we dɛn fɔ it; ɛn ivin we dɛn want fɔ tɔylɛt. Dɛn lɔ dɛn de bin de rili bɛnifit dɛn wɛlbɔdi wan. * Bɔt dɛn bin gɛt ɔda impɔtant rizin, dat na fɔ mek Jiova in pipul dɛn sɛpret frɔm di ɔda neshɔn dɛn we bin de du bad bad tin dɛn. Lɛ wi tɔk bɔt wan ɛgzampul.

9, 10. Us lɔ dɛn di Lɔ agrimɛnt bin gɛt bɔt mami ɛn dadi biznɛs ɛn fɔ bɔn pikin? Us bɛnifit dɛn lɔ dɛn ya bin gɛt?

⁹ Di lɔ dɛn we bin de na di Lɔ agrimɛnt bin se mami ɛn dadi biznɛs ɛn fɔ bɔn pikin bin de mek pɔsin nɔ klin,  ilɛksɛf i mared. (Lɛvitikɔs 12:​2-4; 15:​16-18) Dɛn lɔ dɛn ya nɔ bin de mek dɛn gift dɛn ya we Gɔd gi nɔ impɔtant. (Jɛnɛsis 1:​28; 2:​18-25) Bifo dat, dɛn bin de sɔpɔt Jiova in olinɛs, we de mek di wan dɛn we de wɔship am nɔ dɔti. I impɔtant fɔ no se di neshɔn dɛn we bin de arawnd di Izrɛlayt dɛn bin de miks dɛn wɔship wit sɛrimoni dɛn we gɛt fɔ du wit mami ɛn dadi biznɛs ɛn fɔ bɔn pikin. Insay di Kenanayt dɛn rilijɔn, dɛn bin gɛt man ɛn uman dɛn we bin de liv rare layf. Dɔti layf bin bɔku ɛn i bin de ɔlsay. Bɔt di Lɔ we Gɔd Bin Gi Mozis bin se fɔ wɔship Jiova fɔ sɛpret frɔm tin dɛn we gɛt fɔ du wit mami ɛn dadi biznɛs. * Ɔda bɛnifit dɛn bak bin de.

¹⁰ Dɛn lɔ dɛn de bin de tich wan impɔtant tin. * Afta ɔl, aw Adam in sin bin transfa frɔm wan jɛnɛreshɔn to di ɔda wan? Nɔto tru mami ɛn dadi biznɛs ɛn fɔ bɔn pikin? (Romans 5:​12) Fɔ tru, Gɔd in Lɔ bin de mɛmba in pipul dɛn se dɛn ɔl na sina dɛn. Infakt, wi ɔl bɔn wit sin. (Sam 51:​5) Wi nid fɔgivnɛs ɛn pɔsin fɔ sev wi so dat wi go ebul kam nia wi oli Gɔd.

11, 12. (a) Us impɔtant tin bɔt jɔstis di Lɔ bin de sɔpɔt? (b) Aw di Lɔ bin de agens pɔsin we want fɔ twis jɔstis?

¹¹ Di Lɔ bin de sɔpɔt Jiova in pafɛkt jɔstis. Di Lɔ we Gɔd Bin Gi Mozis bin de sɔpɔt se ɔlman fɔ gɛt di sem rayt we i kam to jɔstis. Na dat mek di Lɔ bin se: “I fɔ bi layf fɔ layf, yay fɔ yay, tit fɔ tit, an fɔ an ɛn fut fɔ fut.” (Ditarɔnɔmi 19:​21) So we pɔsin kɔmit kraym, di pɔnishmɛnt we i fɔ gɛt fɔ ikwal  to di kraym we i kɔmit. Dis na bin gayd fɔ ɔl di lɔ dɛn, ɛn ivin naw, dat na impɔtant tin we go ɛp wi fɔ ɔndastand di day we Krays Jizɔs day fɔ fri wi frɔm sin ɛn day. Wi go lan bɔt dat na Chapta 14.—1 Timoti 2:​5, 6.

¹² Apat frɔm dat, di Lɔ bin de agens ɛnibɔdi we bin want fɔ twis jɔstis. Fɔ ɛgzampul, dɛn bin nid lɛk tu witnɛs dɛn so fɔ pruv se sɔmbɔdi du bad tin. Di pɔnishmɛnt we pɔsin go gɛt bikɔs i lay afta i dɔn tek oth go rili siriɔs. (Ditarɔnɔmi 19:​15, 18, 19) Di Lɔ bin rili de agens kɔrɔpshɔn ɛn brayb. (Ɛksodɔs 23:​8; Ditarɔnɔmi 27:​25) Ivin we Gɔd in pipul dɛn de du biznɛs, dɛn go nid fɔ sɔpɔt Jiova in jɔstis. (Lɛvitikɔs 19:​35, 36; Ditarɔnɔmi 23:​19, 20) Dɛn impɔtant lɔ dɛn ya we bin de sho jɔstis na bin big big blɛsin to Izrɛl!

13, 14. Aw di Lɔ bin fia we i kam pan aw fɔ trit tifman ɛn di pɔsin we i tif?

¹³ Fɔ se di Lɔ we Gɔd Bin Gi Mozis na lɔ dɛn we strikt ɛn nɔ de sho wan sɔri-at? Nɔto so i bin de atɔl! Gɔd bin mek Kiŋ Devid rayt se: “Jiova in lɔ pafɛkt.” (Sam 19:​7, NWT) Devid bin rili no se di Lɔ bin de sho sɔri-at ɛn trit pipul dɛn fia wan. Aw di Lɔ bin de du dat?

¹⁴ I kin tan lɛk se di lɔ dɛn na sɔm kɔntri dɛn kin sɔri fɔ di kriminal dɛn pas di we aw dɛn fɔ bisin bɔt di wan dɛn we dɛn du bad to. Fɔ ɛgzampul, dɛn kin put tifman dɛn na jel. Da sem tɛm de, di pipul dɛn we dɛn tif nɔ go gɛt di tin dɛn we dɛn tif na dɛn an, bɔt dɛn go stil de pe taks we di gɔvmɛnt go yuz fɔ kia fɔ di prizin ɛn fid di kriminal dɛn. Trade na Izrɛl, dɛn nɔ bin gɛt prizin dɛn lɛk di wan dɛn we wi gɛt naw. Di Lɔ bin de sho strikt wan di we aw dɛn fɔ pɔnish pɔsin ɛn di kayn pɔnishmɛnt we i fɔ gɛt. (Ditarɔnɔmi 25:​1-3) Di tifman fɔ pe di pɔsin we i tif  wetin ikwal to di tin we i tif. Apat frɔm dat, di tifman fɔ pe ɔda tin bak. Ɔmɔs i fɔ pe? Patikyula amawnt nɔ de. Bɔt di jɔj dɛn gɛt difrɛn tin dɛn we dɛn go tink bɔt, lɛk if di pɔsin we sin rɛdi fɔ ripɛnt. Na dat mek wetin Lɛvitikɔs 6:​1-7 tɔk se pɔsin we tif fɔ pe nɔ rich wetin de na Ɛksodɔs 22:​7.

15. Aw di Lɔ mek shɔ se dɛn sho sɔri-at ɛn jɔstis to pɔsin we mistek kil in kɔmpin?

¹⁵ Di Lɔ bin de sho sɔri-at bay we i de sho se nɔto ɔl bad tin we pɔsin du na bay wilful. Fɔ ɛgzampul, we pɔsin mistek kil in kɔmpin, i nɔ bin nid fɔ pe layf fɔ layf if i du di rayt tin bay we i rɔn go na wan pan di siti dɛn na Izrɛl usay pɔsin fɔ rɔn go if i mistek kil. Afta di jɔj dɛn go dɔn sidɔm pan in kes, i go nid fɔ de na di siti te di ay prist day. Afta dat, i fri fɔ de ɛnisay we i want. Bay da we de, i go bɛnifit frɔm di sɔri-at we Gɔd gɛt. Dɔn bak, di Lɔ bin de sho se mɔtalman layf rili valyu.—Di Nɔmba Dɛm 15:​30, 31; 35:​12-25.

16. Aw di Lɔ bin de protɛkt pɔsin in rayt?

¹⁶ Di Lɔ bin de protɛkt pɔsin in rayt. Tink bɔt di we dɛn aw i bin de protɛkt di wan dɛn we gɛt dɛt. Di Lɔ bin se nɔbɔdi nɔ gɛt rayt fɔ go insay pɔsin we gɛt dɛt in os fɔ siz in prɔpati as garanti fɔ wetin i go dɔn lɛnt. Bifo dat, di wan we gi di dɛt fɔ wet na do ɛn alaw di wan we trɔs to am fɔ briŋ di garanti na do. Bay da we de, pɔsin nɔ go jɔs go insay di wan we trɔs, in os jɔs lɛk dat. If di pɔsin we trɔs in kɔmpin tek in kɔmpin in klos as garanti, i go nid fɔ gi am bak bifo nɛt kam, bikɔs di pɔsin we i trɔs go nid in klos na nɛt so dat i nɔ go fil kol.—Ditarɔnɔmi 24:​10-14.

17, 18. Aw di Izrɛlayt dɛn difrɛn frɔm ɔda neshɔn dɛn we i kam pan wɔ? Wetin mek?

¹⁷ Di Lɔ bin ivin sho dɛn aw fɔ fɛt wɔ. Gɔd in pipul dɛn nɔ bin de fɛt wɔ jɔs bikɔs dɛn want pawa ɔ dɛn want fɔ win, bɔt na dɛn Jiova bin de yuz fɔ fɛt in wɔ dɛn. (Di Nɔmba Dɛm 21:​14) Bɔku tɛm, di Izrɛlayt dɛn go gi dɛn ɛnimi dɛn chans fɔ sɔrɛnda fɔs. If di siti nɔ gri fɔ sɔrɛnda, di Izrɛlayt  dɛn go sɔrawnd dɛn, bɔt na akɔdin to aw Gɔd tɛl dɛn. Di Lɔ bin se di sojaman dɛn na Izrɛl nɔ fɔ rep uman dɛn ɔ kil pipul dɛn jɔs lɛk dat, lɛk aw ɔda sojaman dɛn kin du. Dɛn fɔ ivin rɛspɛkt di ples we dɛn de fɛt, dɛn nɔ fɔ ib dɛn ɛnimi dɛn tik dɛn we de bia frut. * Ɔda sojaman dɛn nɔ gɛt dɛn kayn lɔ dɛn de.—Ditarɔnɔmi 20:​10-15, 19, 20; 21:​10-13.

¹⁸ Yu kin fil bad we yu kin yɛri se na sɔm kɔntri dɛn, dɛn kin tren pikin dɛn fɔ bi sojaman dɛn? Fɔstɛm insay Izrɛl, dɛn nɔ fɔ jɔyn man we nɔ rich 20 ia yet na di ami. (Di Nɔmba Dɛm 1:​2, 3) Ɛn if bigman de fred, dɛn nɔ fɔ alaw am fɔ go fɛt. Man we jɔs mared nɔ fɔ go fɛt wɔ fɔ wan ol ia so dat bifo i go fɛt wɔ, i go si in pikin. Akɔdin to di Lɔ, na da we de di yɔŋ maredman go ebul mek in wɛf in “at swit.”—Ditarɔnɔmi 20:​5, 6, 8; 24:​5.

19. Us gud tin de na di Lɔ we de protɛkt uman dɛn, pikin dɛn, famili dɛn, uman dɛn we dɛn man dɛn dɔn day, ɛn pikin dɛn we nɔ gɛt mama ɛn papa?

¹⁹ Di Lɔ bin de protɛkt uman dɛn, pikin dɛn, ɛn famili dɛn, ɛn ivin kia fɔ dɛn. I kɔmand mama ɛn papa dɛn fɔ pe atɛnshɔn pan dɛn pikin dɛn ɔltɛm ɛn tich dɛn bɔt Gɔd. (Ditarɔnɔmi 6:​6, 7) I bin kɔndɛm pɔsin we du mami ɛn dadi biznɛs wit in fambul; dɛn fɔ ivin kil da pɔsin de. (Lɛvitikɔs, chapta 18) I bin kɔndɛm bak we pɔsin we dɔn mared go du mami ɛn dadi biznɛs wit ɔda pɔsin; bɔku tɛm, dis kin skata famili ɛn mek dɛn nɔ fil sef ɔ ivin nɔ gɛt rɛspɛkt fɔ dɛnsɛf. Di Lɔ bin de protɛkt uman dɛn we dɛn man dɔn day ɛn pikin dɛn we nɔ gɛt mama ɛn papa. I kɔndɛm ɛnibɔdi we go trit dɛn bad ɛn se bad tin go apin to da pɔsin de.—Ɛksodɔs 20:​14; 22:​22-24.

20, 21. (a) Wetin mek di Lɔ we Gɔd Bin Gi Mozis bin alaw man dɛn na Izrɛl fɔ mared pas wan wɛf? (b) We i kam pan dayvɔs, wetin mek di Lɔ bin difrɛn frɔm wetin Jizɔs bin tɔk?

 ²⁰ Bɔt sɔm pipul dɛn go de wɔnda, ‘Wetin mek di Lɔ bin de alaw man dɛn fɔ mared pas wan wɛf?’ (Ditarɔnɔmi 21:​15-17) We wi de tink bɔt dɛn lɔ dɛn de, wi nid fɔ tink bak bɔt di tɛm we dɛn lɔ dɛn de bin de. Di wan dɛn we de yuz di kɔlchɔ naw ɛn wetin de apin naw fɔ jɔj di Lɔ we Gɔd Bin Gi Mozis nɔ go rili ɔndastand am fayn. (Prɔvabs 18:​13) We Jiova mek di fɔs mared na Idɛn, i bin want am fɔ de sote go bitwin wan man ɛn wan wɛf. (Jɛnɛsis 2:​18, 20-24) Bɔt bay di tɛm we Jiova gi di Izrɛlayt dɛn di Lɔ, man dɛn bin dɔn yus fɔ mared pas wan wɛf fɔ lɔng lɔng tɛm. Jiova bin no se in “pipul dɛn we gɛt tranga at” nɔ go obe ivin di smɔl smɔl lɔ dɛn, lɛk di wan we se dɛn nɔ fɔ wɔship aydɔl. (Ɛksodɔs 32:​9) So i mek sɛns we i nɔ yuz dɛn tɛm dɛn de fɔ chenj ɔl di we aw pipul dɛn bin de mared. Mɛmba se nɔto Jiova se man fɔ mared pas wan wɛf. Bɔt i yuz di Lɔ fɔ kɔntrol am ɛn fɔ mek dɛn nɔ du am di rɔng we.

²¹ Semweso, di Lɔ we Gɔd Bin Gi Mozis bin alaw man fɔ dayvɔs in wɛf fɔ difrɛn rizin dɛn we siriɔs. (Ditarɔnɔmi 24:​1-4) Jizɔs bin se Gɔd bin alaw di Ju dɛn fɔ du dat “bikɔs ɔf [dɛn] strɔngat.” Bɔt Gɔd nɔ bin alaw dat fɔ kɔntinyu. Jizɔs bin tɛl in disaypul dɛn se dɛn fɔ fala aw Jiova bin want mared fɔ de frɔm di biginin.—Matyu 19:​8.

22. Us we dɛn di Lɔ we Gɔd Bin Gi Mozis de ɛnkɔrej lɔv? To udat dɛn fɔ sho lɔv?

²² Yu ebul tink bɔt ɛni lɔ tide we de ɛnkɔrej lɔv? Di Lɔ we Gɔd Bin Gi Mozis bin de ɛnkɔrej lɔv pas ɛni ɔda tin. Infakt, na Ditarɔnɔmi in wangren, dɛn yuz di wɔd fɔ “lɔv” difrɛn difrɛn we dɛn pas 20 tɛm. Di sɛkɔn lɔ we pas ɔl di ɔda lɔ dɛn se: “Pɔsin . . . fɔ lɛk in kɔmpin lɛk aw i lɛk insɛf.” (Lɛvitikɔs 19:​18; Matyu 22:​37-40) Gɔd in pipul dɛn nɔ bin fɔ jɔs sho  lɔv to dɛn kɔmpin Izrɛlayt dɛn, bɔt dɛn fɔ sho lɔv bak to di strenja dɛn we de liv wit dɛn; dɛn fɔ de mɛmba se tɛm bin dɔn de we dɛnsɛf na bin strenja dɛn. Dɛn fɔ sho lɔv to po pipul dɛn ɛn di wan dɛn we nɔ gɛt pɔsin fɔ ɛp dɛn; dɛn fɔ ɛp dɛn wit wetin dɛn nid, ɛn dɛn nɔ fɔ yuz wetin de apin to dɛn pipul dɛn ya fɔ trit dɛn bad. Di Lɔ bin ivin tɛl dɛn fɔ trit dɛn animal dɛn we de wok fɔ dɛn, fayn.—Ɛksodɔs 23:​6; Lɛvitikɔs 19:​14, 33, 34; Ditarɔnɔmi 22:​4, 10; 24:​17, 18.

23. Wetin di man we rayt Sam 119 bin du? Wetin wisɛf fɔ mekɔp wi maynd fɔ du?

²³ Yu sabi ɛni ɔda neshɔn we gɛt dɛn kayn lɔ dɛn de? No wɔnda we wan pan di man dɛn we rayt di sam buk bin tɔk se: “A lɛk yu lɔ dɛn bad bad wan!” Di lɛk we i tɔk bɔt na ya nɔto jɔs aw i bin de fil. I bin de mek i du sɔntin, bikɔs i bin de tray fɔ obe di lɔ bay aw i de liv. I tɔk bak se: “De ɛn nɛt a de stɔdi [yu lɔ] dɛn.” (Sam 119:​11, 97) Fɔ tru, i bin de spɛn tɛm fɔ stɔdi Jiova in lɔ dɛn ɔltɛm. As i bin de stɔdi dɛn, na so i de lɛk dɛn mɔ ɛn mɔ. Dɔn i bin de lɛk Jiova Gɔd, we gi di Lɔ, mɔ ɛn mɔ. As yu de kɔntinyu fɔ stɔdi Gɔd in lɔ, wi de pre se yu go kɔntinyu fɔ kam nia Jiova, di Wan we sabi gi lɔ ɛn we lɛk jɔstis.