1, 2. Pakico hopi hende no tin respet pa lei, pero ki sintimento nos por desaroya pa e leinan di Dios?

“LEI ta un buraco sin bom, e . . . ta devora tur cos.” E declaracion ei a aparece den un buki publica na 1712. E autor a condena un aparato di husticia den cua casonan di corte ta dura hopi aña, loke ta pone esnan cu ta busca husticia cai den pobresa. Den hopi pais e sistema legal y hudicial ta sumamente complica, yen di inhusticia, prehuicio y inconsistencia. Door di esei hopi hende ta sinti un desprecio pa lei.

² Na contraste cu esei, considera e palabranan skirbi rond di 2.700 aña pasa: “Cuanto mi ta stima bo lei!” (Salmo 119:97) Pakico e salmista tawatin un amor asina fuerte? Esei ta pasobra e lei cu el a alaba no a origina cu ningun gobierno di e mundo aki, sino cu Yehova Dios. Segun cu bo ta studia e leinan di Yehova, pocopoco pero sigur lo bo bin haya e mesun sintimento cu e salmista. Un estudio asina lo yuda bo compronde miho con e Hues y Legislador di mas grandi di universo ta pensa.

3, 4. Con Yehova a bira un Legislador of dunador di lei?

³ “Tin solamente un dunador di lei y hues”, segun Bijbel. (Santiago 4:12) En berdad, Yehova ta e unico berdadero Legislador of “dunador di lei.” Asta e movecion di cuerponan celestial ta wordo dirigi door di su “leinan cu ta goberna shelo.” (Job 38:33, BPK) Mescos tambe, e miyones y miyones di angelnan santo di Yehova ta wordo dirigi door di lei dibino, pasobra nan ta organisa den rangonan fiho y ta rindi sirbishi como minister di Yehova bou di su mandato.—Hebreonan 1:7, 14.

 ⁴ Yehova a duna lei na hende tambe. Nos tur tin un consenshi, locual ta un refleho di Yehova su sentido di husticia. Nos consenshi ta manera un lei interno cu por yuda nos distingui entre bon y malo. (Romanonan 2:14) Nos prome mayornan a ser bendiciona cu un consenshi perfecto; pesei ta un par di lei so nan tawatin mester. (Genesis 2:15-17) Sinembargo, hende imperfecto si tin mester di mas lei cu por mustra nan con pa cumpli cu e boluntad di Dios. Patriarcanan manera Noe, Abraham y Yacob a ricibi leinan for di Yehova Dios y a pasa esakinan na nan famianan. (Genesis 6:22; 9:3-6; 18:19; 26:4, 5) Yehova a haci su mes bira Legislador den un manera sin precedente ora el a duna e nacion di Israel un codigo di Lei pa medio di Moises. E codigo di lei aki ta yuda nos compronde Yehova su sentido di husticia hopi a fondo.

5. E Lei di Moises tawata un lista largo di lei complica, y pakico bo ta contesta asina?

⁵ Aparentemente hopi hende ta pensa cu e Lei di Moises tawata un lista largo di lei sumamente complica. Pero esei ta un concepto robes. Henter e codigo ta contene algo mas cu 600 lei. Esei por zona bastante, pero djis pensa riba esaki: Na fin di siglo 20, e leinan federal di Merca tawata cubri un total di 150.000 pagina. Cada dos aña, mas o menos 600 lei ta bin acerca! Pues pa loke ta cantidad, e Lei di Moises ta casi nada na comparacion cu e monton di leinan humano. Apesar di esei, e leinan di Dios a trata algun aspecto di bida di e Israelitanan cu lei moderno no ta ni yega serca. Laga nos considera nan den liñanan general.

6, 7. (a) Kico ta distingui e Lei di Moises for di cualkier otro codigo di lei, y kico ta e mandamento di mas grandi di e Lei ei? (b) Con e Israelitanan por a mustra cu nan a acepta e soberania di Yehova?

⁶ E Lei a halsa e soberania di Yehova. Riba e punto aki, ningun otro codigo di lei por para banda di e Lei di Moises. E lei di mas grandi tawata esaki: “Tende, o Israel! SEÑOR ta nos Dios, SEÑOR ta un! Y stima SEÑOR bo Dios cu henter bo  curason, cu henter bo alma y cu tur bo forsa.” Con e pueblo di Dios mester a demostra nan amor na dje? Esei tawata door di sirbie y somete nan na su soberania.—Deuteronomio 6:4, 5; 11:13.

⁷ Cada Israelita por a mustra cu el a acepta e soberania di Yehova door di somete su mes na e personanan cu Yehova a pone como autoridad riba dje. Esnan cu a representa Dios su autoridad tawata entre otro mayornan, hefenan, huesnan, sacerdotenan y, cu tempo, reinan. Yehova a considera cualkier rebelion contra personanan cu tin autoridad como rebelion contra e mes. Di otro banda, esnan cu tawatin autoridad a core e riesgo di haya e rabia di Yehova si nan a trata su pueblo na un manera inhusto y arogante. (Exodo 20:12; 22:28; Deuteronomio 1:16, 17; 17:8-20; 19:16, 17) Pues ambos banda tawatin e obligacion di respeta e soberania di Dios.

8. Con e Lei a respalda e norma di santidad di Yehova?

⁸ E Lei a respalda e norma di santidad di Yehova. E palabranan Hebreo traduci como “santo” y “santidad” ta aparece mas cu 280 biaha den e Lei di Moises. E Lei a yuda e pueblo di Dios distingui entre loke tawata limpi y sushi, entre puro y impuro, ya cu el a menciona rond di 70 diferente cos cu por a haci un Israelita ceremonialmente impuro. E leinan aki a toca higiena fisico, dieta y asta con pa deshaci di sushi. Nan a trece hopi beneficio di salu. * Pero nan tawatin un proposito mas eleva: nan a mantene e pueblo den e fabor di Yehova, separa for di e custumbernan pecaminoso di e nacionnan corumpi rond di nan. Laga nos wak un ehempel.

9, 10. Ki decretonan en conexion cu relacion sexual y hayamento di yiu e pacto di Lei a contene, y ki beneficio e leinan ei a trece?

⁹ Segun decretonan di e pacto di Lei, relacion sexual y hayamento  di yiu—asta entre hende casa—a ocasiona un periodo di impuresa. (Levitico 12:2-4; 15:16-18) E decretonan ei no a rebaha e donnan limpi ei cu Dios a duna hende. (Genesis 1:28; 2:18-25) Al contrario, e leinan ei a respalda e santidad di Yehova door di mantene hende cu ta ador’e liber di contaminacion. Ta bon pa remarca cu e nacionnan rond di Israel tawatin custumber di mescla adoracion cu ritonan sexual y di fertilidad. Den e religion di e Cananeonan tawatin prostitucion di tanto homber como mohe. Esei a hiba na un degeneracion extremo, anto na gran escala. Na contraste, e Lei a tene e adoracion di Yehova completamente separa for di asuntonan sexual. * Pero tawatin otro beneficionan tambe.

¹⁰ E leinan ei a sirbi pa siña un berdad vital. * Al fin y al cabo, ta con e mancha di pica di Adam ta pasa di un generacion pa otro? No ta door di relacion sexual y hayamento di yiu? (Romanonan 5:12) Si, e Lei di Dios a recorda su pueblo di nan pica; un realidad cu nan no mester a perde for di bista. Al fin y al cabo, nos tur a nace den pica. (Salmo 51:5) Nos mester di pordon y liberacion pa por hala serca nos Dios santo.

11, 12. (a) Pa ki principio vital di husticia e Lei a boga? (b) Ki proteccion contra trocemento di husticia e Lei a inclui?

¹¹ E Lei a respalda e husticia perfecto di Yehova. E Lei di Moises a boga pa e principio di ekivalencia, of balansa, den asuntonan di husticia. Pues, e Lei a declara: “Bida pa bida, wowo pa wowo, djente pa djente, man pa man, pia pa pia.” (Deuteronomio 19:21) Pesei, den casonan criminal, e castigo mester a coresponde cu e gravedad di e crimen. E aspecto aki di  husticia dibino a keda manifesta den henter e Lei y te na e dia djawe e ta esencial pa compronde e sacrificio di rescate di Hesucristo, manera Capitulo 14 lo mustra.—1 Timoteo 2:5, 6.

¹² Tambe e Lei a brinda proteccion contra trocemento di husticia. Por ehempel, por lo menos dos testigo tawata necesario pa un acusacion bira valido. E castigo pa perhurio (gaña bou di huramento) tawata severo. (Deuteronomio 19:15, 18, 19) Ademas, corupcion y soborno tawata strictamente prohibi. (Exodo 23:8; Deuteronomio 27:25) Asta den practicanan di negoshi, e pueblo di Dios tawatin cu tene nan mes na Yehova su norma eleva di husticia. (Levitico 19:35, 36; Deuteronomio 23:19, 20) E codigo legal noble y imparcial ei tawata un gran bendicion pa Israel!

13, 14. Con e Lei a promove e trato husto di un ladron y su victima?

¹³ E Lei di Moises tawata un coleccion di regla rigido y sin misericordia? Di ningun manera! Rei David a skirbi bou di inspiracion: “E lei di SEÑOR ta perfecto.” (Salmo 19:7) E tawata bon na haltura cu e Lei a promove misericordia y un trato husto. Den ki manera?

¹⁴ Den algun pais awe, ta parce cu lei ta mustra mas compasion y fabor na e criminalnan cu na e victimanan. Por ehempel, kisas un ladron ta wordo encarsela pa un cierto tempo. Mientrastanto e victima, cu a keda priva di su cosnan horta, si tin cu sigui paga belasting for di cua gobierno ta cubri e gastonan di alohamento y alimento pa e criminal. Den Israel di antiguedad no tawatin prizon manera nos conoce awe. Tawatin limitenan stricto pa loke ta severidad di castigo. (Deuteronomio 25:1-3) Un ladron tawatin cu compensa e victima pa loke el a horta y, hunto cu esei, dun’e un pago adicional. Cuanto e mester a paga? Esei tawata varia. Aparentemente e huesnan tawatin cierto libertad pa evalua varios factor, manera e repentimento di e pecado. Esei kisas ta splica pakico e  compensacion cu a ser rekeri di un ladron segun Levitico 6:1-7 tawata hopi menos cu esun stipula na Exodo 22:7.

15. Con e Lei a garantisa tanto misericordia como husticia den caso di un hende cu a mata un persona accidentalmente?

¹⁵ E Lei a refleha misericordia door di reconoce cu no ta tur malecho ta ser cometi deliberadamente. Por ehempel, ora un hende a mata un persona accidentalmente, e no tawatin cu paga alma pa alma si el a tuma e accion corecto di hui bai na un di e stadnan di refugio cu tawatin rond Israel. Despues cu huesnan competente a studia su caso, e tawatin cu keda biba den e stad di refugio te dia e sumo sacerdote muri. E ora ei lo e tawata liber pa bai unda cu e kier. Di e manera ei el a beneficia di e misericordia di Dios. Na mesun tempo, e lei aki a enfatisa e gran balor di bida humano.—Numbernan 15:30, 31; 35:12-25.

16. Con e Lei a salvaguardia cierto derechonan personal?

¹⁶ E Lei a salvaguardia derechonan personal. Tuma por ehempel e maneranan den cua el a proteha hende den debe. E Lei a prohibi un persona di drenta cas di un hende cu tawata deb’e y cohe algo di dje como borg. Mas bien, e persona (acreedor) aki tawatin cu keda para pafo y laga e debedo trece e borg p’e. Pues e no por a invadi cas di e debedo gewoon asina. Si e acreedor a tuma e bisti exterior como borg, e tawatin cu debolb’e esaki prome cu anochi sera, pasobra probablemente e debedo tawatin mester di dje pa tene su mes cayente anochi.—Deuteronomio 24:10-14.

17, 18. Den asuntonan relaciona cu guera, ki diferencia tawatin entre e Israelitanan y otro nacionnan, y pakico?

¹⁷ Asta guera tawata regula bou di e Lei. E pueblo di Dios por a bringa guera, no pa sacia nan sed di poder of conkista, sino pa actua como agente di Dios den “Gueranan di Señor.” (Numbernan 21:14) Den hopi caso, prome cu e Israelitanan a bai mas aleu, nan tawatin cu duna e enemigonan chens di entrega nan mes. Si un stad a rechasa e oferta, e ora ei Israel por a ocup’e—pero segun e reglanan di Dios. Distinto di loke  hopi solda a yega di haci, e hombernan di e ehersito di Israel no tawatin mag di viola hende mohe of mata hende pa loco. Nan mester a respeta asta e medioambiente, y no kap palo di fruta di e enemigonan. * Otro ehersitonan no tawatin e restriccionnan ei.—Deuteronomio 20:10-15, 19, 20; 21:10-13.

¹⁸ Bo no ta haya asco ora bo tende cu den algun pais nan ta entrena mucha como solda? Den Israel di antiguedad, no tawata recluta mucha homber bou di 20 aña di edad pa drenta ehersito. (Numbernan 1:2, 3) Nan tawata haci excepcion asta pa un adulto cu tawatin hopi miedo. Un homber resien casa a haya despensacion pa un aña completo di manera cu prome cu el a bai riba un biahe peligroso, lo e por a mira su heredero nace. Den e manera aki, segun e Lei, e esposo hoben lo por a haci su casa nobo ‘felis.’—Deuteronomio 20:5, 6, 8; 24:5.

19. Ki percuracion e Lei a inclui pa proteha hende mohe, mucha, famia, biuda y huerfano?

¹⁹ Tambe e Lei a proteha hende mohe, mucha y famia, y a percura pa nan. El a manda mayornan duna nan yiunan atencion y instruccion spiritual constante. (Deuteronomio 6:6, 7) El a prohibi tur forma di incest; pa e delito ei tawatin pena di morto. (Levitico, capitulo 18) Mescos tambe el a prohibi adulterio, locual hopi bes ta kibra matrimonio y destrui nan siguridad y dignidad. E Lei a percura pa biuda y huerfano, y cu e palabranan mas energico posibel el a prohibi pa maltrata esakinan.—Exodo 20:14; 22:22-24.

20, 21. (a) Pakico e Lei di Moises a permiti poligamia entre e Israelitanan? (b) Den e asunto di diborcio, pakico e Lei tawata diferente for di e norma cu Hesus a reinstitui mas despues?

²⁰ Pero kisas riba e punto aki un hende lo puntra su mes:  ‘Pakico e Lei a permiti poligamia?’ (Deuteronomio 21:15-17) Nos tin cu considera e leinan ei den e contexto di nan tempo. Hende cu ta husga e Lei di Moises for di e punto di bista di tempo y cultura moderno lo malinterpret’e sigur. (Proverbionan 18:13) Yehova a establece su norma for di den Eden; matrimonio lo mester tawata un union duradero entre un esposo y un esposa. (Genesis 2:18, 20-24) Sinembargo, pa tempo cu Yehova a duna Israel e Lei, practicanan manera poligamia tawatin nan raiznan profundo pa hopi siglo caba. Yehova tawata sa mucho bon cu su “pueblo cabesura” lo a desobedece cu frecuencia asta e mandamentonan di mas basico, manera esnan cu ta prohibi idolatria. (Exodo 32:9) Pesei, den su sabiduria, e no a scohe e tempo ei pa reforma tur nan custumbernan relaciona cu matrimonio. Pero, corda cu no ta Yehova a institui poligamia. Loke si el a haci ta uza e Lei di Moises pa regula poligamia entre su pueblo y preveni e abusonan relaciona cu e practica ei.

²¹ Mescos tambe, e Lei di Moises a permiti un homber diborcia di su esposa a base di varios motibo serio. (Deuteronomio 24:1-4) Hesus a yama esaki un concesion cu Dios a haci cu e pueblo Hudiu “pa motibo di e duresa di [nan] curason.” Sinembargo, e concesionnan ei tawata temporal. Hesus a reinstitui Yehova su norma original di matrimonio pa su siguidonan.—Mateo 19:8.

22. Den ki maneranan e Lei di Moises a promove amor y pa ken?

²² Bo por imagina bo un sistema di lei moderno cu ta promove amor? E Lei di Moises a promove amor mas cu tur otro cos. Den e buki di Deuteronomio so caba, e palabra “amor” ta aparece den varios forma mas cu 20 biaha. “Stima bo prohimo manera bo mes”, tawata e di dos mandamento di mas grandi den henter e Lei. (Levitico 19:18; Mateo 22:37-40) E pueblo di Dios mester a mustra e amor ei no solamente na  otro sino tambe na stranheronan cu tawata biba meimei di nan, cordando cu nan mes tambe a yega di biba como stranhero otro caminda. Nan mester a mustra amor pa hende pober y afligi door di yuda nan cu cos material y door di no probecha di nan miseria. E Lei a manda nan trata asta bestia di carga cu bondad y consideracion.—Exodo 23:6; Levitico 19:14, 33, 34; Deuteronomio 22:4, 10; 24:17, 18.

23. Kico e escritor di Salmo 119 a sinti su mes impulsa pa haci, y kico nos tambe por ta determina pa haci?

²³ Cua otro nacion a ser bendiciona cu un codigo di lei asina? Nada straño cu e salmista a skirbi: “Cuanto mi ta stima bo lei!” Su amor, sinembargo, no tawata djis un sintimento. Esei a impuls’e na accion, pasobra el a haci esfuerso pa obedece e lei ei y biba di acuerdo cu ne. Ademas, el a continua: “E ta mi meditacion henter dia.” (Salmo 119:11, 97) Si, e tawata dedica tempo regularmente pa studia e leinan di Yehova. No tin duda cu ora e tawata haci esei, el a haya mas amor pa nan. Na e mesun tempo, su amor pa e Legislador, Yehova Dios, tambe a aumenta. Segun cu bo ta studia e lei dibino aki, bo tambe por hala mas serca Yehova, e Gran Legislador y Dios di husticia.