1, 2. Bible udi umvuija nsombelu udi nende bukua bantu mushindu kayi? Ntshintu kayi tshimuepele tshidi mua kubapatulamu?

MUPOSTOLO Paulo wakumvuija nsombelu mukuate luse utudi lelu wamba ne: “Bifukibua bionso bidi bitungunuka ne kutua mikemu popamue ne kukenga popamue too ne mpindieu.” (Lomo 8:22) Bua dimona dia bantu, mbienze anu bu ne: kakuena tshikuabu tshia kuenza bua makenga, bua bubi ne bua lufu to. Kadi Yehowa yeye kena bu bantu badi kabayi ne bukole bua kujikija malu aa to. (Nomba 23:19) Nzambi wa buakane mmutulongoluele mushindu wa kutupatula mu makenga. Badi babikila mushindu au ne: tshia kupikula natshi bantu.

² Tshia kupikula natshi bantu ndipa ditambe bunene didi Yehowa mupeshe bantu. Tshiotshi ke tshidi mua kutupikula ku bubi ne ku lufu. (Efeso 1:7) Tshiotshi ke nshindamenu wa ditekemena dia muoyo wa kashidi mu diulu anyi mu Mparadizu pa buloba. (Luka 23:43; Yone 3:16; 1 Petelo 1:4) Kadi tshia kupikula natshi bantu ntshinyi? Tshidi tshitulongesha tshinyi bua buakane butambe bunene bua Yehowa?

3. a) Bua tshinyi bivua bikengela bua bafile tshia kupikula natshi bantu? b) Bua tshinyi Nzambi kavuaku mua kutekeshila bana ba Adama tshibawu tshivuaye mukose?

³ Bubi bua Adama ke buvua buenze bua bafile tshia kupikula natshi bantu. Pavua Adama mutombokele Nzambi, wakashiya ndelanganyi yende ku bupika bua masama, bua makenga, bua tunyinganyinga ne bua lufu. (Genese 2:17; Lomo 8:20) Nzambi kavua mua kulonda kudilakana kua bantu bua kubatekeshila tshibawu tshivuaye mubakosele tshia lufu to, bualu kuenza nanku kuvua mua kubengangana ne dîyi diende dia ne: “Difutu dia bubi ndufu.” (Lomo 6:23) Bu Yehowa mushipe mikenji yende yeye muine ya buakane, nunku kuvua mua kuikala malu makondakane ne dishipa dia mikenji mu diulu ne pa buloba kakuyi mushindu to.

4, 5. a) Mmunyi muvua Satana mushiminyine Nzambi malu? Bua tshinyi Yehowa kavua mua kushala muvunge maboko mu buluishi abu? b) Mbualu kayi buvua Satana mushiminyine bantu ba Yehowa?

 ⁴ Anu mutuvua bamone mu Nshapita wa 12, buntomboji bua mu Edene buvua bujule kabidi bilumbu bibupite ne buobu buine. Satana wakanyangila Nzambi lumu, kuambaye mudiye muena mafi ne mukokeshi muena luonji utu utuminangana dîyi ne uvua mupale bifukibua biende budikadidi. (Genese 3:1-5) Pavua Satana mudimone bu uvua mupangishe Yehowa disua diende dia kuwuja buloba ne bantu bakane, wakamuangata kabidi bu ne: uvua mupangile bualu. (Genese 1:28; Yeshaya 55:10, 11) Bu Yehowa mushale muvunge anu maboko mu buluishi buonso ebu, nunku bifukibua biende bia bungi bia lungenyi kabivua kabidi mua kutamba kuangata nkokeshilu wende ne mushinga to.

⁵ Satana wakashiminyina kabidi bantu ba Nzambi malu, ubamba muvuabu benzela Nzambi mudimu anu bua kupetabu bintu, kabidi ne: bobu badidinge bapete anu makenga, kakuvua uvua mua kushala mumulamate to. (Yobo 1:9-11) Malu aa avua ne mushinga wa bungi kupita ntatu idi nayi bukua bantu. Yehowa wakadimona muenzejibue bua kutuisha mashimi a Satana ku ndekelu. Kadi mmunyi muvua Nzambi mua kujikija bilumbu ebi ne kusungila kabidi bukua bantu?

6. Mmiaku kayi idi mu Bible idi yumvuija mushindu udi Nzambi usungila nawu bantu?

⁶ Mushindu wa kujikija bilumbu ebi uvua Yehowa musungule mbualu bua luse lua bungi menemene ne bua buakane bua dikema buvua muntu nansha umue kayi mua kuelela meji to. Tshidibi, mushindu au uvua muimpe mupepele wa katshia! Batu bawukudimuna kabidi ne: dipikula, dilengejibua, disumba, dilengejangana, dibuikidilangana. (Musambu 49:8; Danyele 9:24; Galatiya 3:13; Kolosayi 1:20; Ebelu 2:17) Muaku udi mua kutamba kumvuija bimpe bualu ebu nguvua Yezu mutele pakambaye ne: “Muana wa muntu kavua mulue bua bamuenzele mudimu to, kadi wakalua bua kuenzela bakuabu mudimu ne kufila muoyo  wende bu tshia kupikula natshi [mu Greke: lytron] bantu ba bungi.”​—Matayi 20:28.

7, 8. a) Mu Bible, “tshia kupikula natshi” bantu tshidi tshiumvuija tshinyi? b) Mmu mushindu kayi mudi tshia kupikula natshi tshikale ne lungenyi lua diakanangana?

⁷ Tshia kupikula natshi bantu ntshinyi? Muaku wa mu tshiena Greke udibu bangate muaba eu mmufumine ku muaku wa pa muanda udi umvuija “kusulula, kulekelela.” Bavua batela muaku eu bua kuakula bua makuta avuabu bafuta bua kulekelelabu bantu bavuabu bakuate mu mvita. Nunku, mu kabujima, badi mua kumvuija tshia kupikula natshi bantu bu tshintu tshidibu bafuta bua kukula tshintu tshikuabu. Mu mikanda ivuabu bafunde mu tshiena Ebelu, muaku udibu bakudimune ne: “tshia kupikula natshi” (kopher) mmufumine ku muaku wa pa muanda udi umvuija “kubuikila.” Bualu ebu budi butuambuluisha bua kumvua ne: kupikula kudi kumvuija kabidi kubuikila mibi.​—Musambu 65:3.

⁸ Ke bualu kayi nkonga miaku kampanda udi uleja ne: muaku eu (kopher) “utu umvuija misangu yonso tshintu tshidi tshiakanangane ne,” anyi tshikumbanangane. (Theological Dictionary of the New Testament) Tshilejilu, tshibuikidiji tshia mushete wa tshipungidi tshivua tshikumbanangane nawu, tshiwubuikila wonso bimpe. Bia muomumue, bua kupikula bantu anyi kubabuikidila bubi, bidi bikengela bua tshidibu bafuta tshikale ne mushinga mukumbanangane ne malu onso adi bubi bukebeshe anyi uabuikila bimpe menemene. Ke bualu kayi mukenji uvua Nzambi muelele bena Isalele uvua wamba ne: “Nebafile muoyo ku muoyo, disu ku disu, dinu ku dinu, tshianza ku tshianza, dikasa ku dikasa.”​—Dutelonome 19:21.

9. Bua tshinyi bena lulamatu bavua balambula milambu ya nyama? Yehowa uvua uyimona bishi?

⁹ Bena lulamatu ba kubangila ku Abele bavua balambula Nzambi milambu ya nyama. Nunku, bavua baleja muvuabu badimanye muvuabu bena mibi ne muvuabu dijinga ne dipikudibua, baleja kabidi muvuabu bitabuja mulayi wa Nzambi wa dipikudibua ku diambuluisha dia “muana” anyi kankanunuina. (Genese 3:15;  4:1-4; Lewitiki 17:11; Ebelu 11:4) Yehowa wakanyisha milambu eyi ne kuanyishaye kabidi batendeledi bende abu. Tshidibi, milambu ya nyama ivua ne tshivuayi ileja. Nyama kayena mua kubuikila bubi bua muntu to, bualu muntu mmuyipite. (Musambu 8:4-8) Ke padi Bible wamba ne: “Mashi a ngombe ne a mbuji ya mpumbu kaena mua kumbusha mibi nansha kakese.” (Ebelu 10:1-4) Milambu ayi ivua anu tshimfuanyi patupu tshia mulambu mulelela wa kupikula nawu bantu utshivua kumpala.

10. a) Mupikudianganyi uvua ne bua kukumbanangana ne nganyi? Bua tshinyi? b) Bua tshinyi bivua bikengela anu mulambu wa muntu umuepele?

¹⁰ Mupostolo Paulo wakamba ne: “Bantu bonso [badi] bafua mu Adama.” (1 Kolinto 15:22) Nunku, tshia kupikula natshi bantu tshivua tshilomba bua muntu mupuangane anu muvua Adama afue. (Lomo 5:14) Kakuvua tshifukibua tshikuabu tshivua mua kukumbanangana ne buakane bua Nzambi to. Anu muntu mupuangane uvua kayi mupie tshibawu tshia lufu lua mu Adama ke uvua mua kufila “tshia kupikula natshi tshidi tshikumbanangane,” mmumue ne: tshiakanangane menemene ne Adama. (1 Timote 2:6) Kabivua anu bikengela bua bantu miliyo bungi bumue ne bua ndelanganyi yonso ya Adama bafue bua kushisha kuyipikula to. Mupostolo Paulo wakumvuija ne: ‘Bubi buakalua pa buloba bua muntu umue [Adama], ne lufu kulua bua bubi abu.’ (Lomo 5:12) “Bu muvua lufu lufume kudi muntu umue,” Nzambi wakalongolola bua bukua bantu bupikudibue “kudi muntu umue.” (1 Kolinto 15:21) Mushindu kayi nanku?

11. a) Mmunyi muvua mupikudianganyi mua ‘kulabuila muntu yonso lufu’? b) Bua tshinyi tshia kupikula natshi bantu katshivua mua kupikula Adama ne Eva? (Tangila mêyi adi kuinshi kua dibeji.)

¹¹ Yehowa wakalongolola bua muntu mupuangane kampanda kulambula muoyo wende ku budisuile. Bilondeshile Lomo 6:23, “difutu dia bubi ndufu.” Pavua mupikudianganyi ulambula muoyo wende, uvua ‘ulabuila muntu yonso lufu.’ Mu mêyi makuabu, uvua ufuta difutu dia bubi bua Adama. (Ebelu 2:9; 2 Kolinto 5:21; 1 Petelo 2:24) Bilondeshile mikenji, bualu ebu buvua mua kushintuluisha malu dikema. Pavua tshia kupikula natshi bantu tshiumbushila  ndelanganyi ya Adama idi ne butumike tshibawu tshia lufu, tshivua tshijomuena bukole bua bubi anu ku miji yabu. *​—Lomo 5:16.

12. Fila tshilejilu tshia mudi kufuta dibanza dimuepele mua kuambuluisha bantu ba bungi.

¹² Fuanyikijabi ne: udi musombele mu tshimenga mudi bantu ba bungi benza mudimu mu tshiapu kampanda tshinene. Badi banufuta nabu bimpe, banulame bimpe, mmumue ne: too ne padi tshiapu tshikanga midimu yatshi. Bualu buditshi tshikangila midimu yatshi mbua ne: mulombodi watshi mmutshituishe panshi bua muvuaye wiba makuta. Diakamue, wewe ne bena mudimu nenu kubanga kutata, kanuyi mua kufuta nzubu ne mabanza makuabu. Balume, bakaji, bana ne bavuabu bangate mabanza badi babanga kukenga pabu anu bua buivi bua muntu umue au. Kudiku mushindu wa kubambuluisha anyi? Eyowa! Mubanji mukuabu wa muoyo muimpe udi ulaya bua kubambuluisha. Mmumanye mushinga udi nawu tshiapu atshi. Udi kabidi umvuila bena mudimu ba bungi badimu luse ne mêku abu. Ke yeye kulongolola bua kufuta dibanza didi tshiapu atshi nadi bua midimu kutuadijilula. Difuta dia dibanza dimue adi didi diambuluisha bena mudimu ba bungi ne mêku abu ne bena mabanza avuabu bangate. Bia muomumue, difuta dia dibanza dia Adama didi padi diambuluisha bantu miliyo bungi kabuyi kubala.

13, 14. a) Leja muvua Yehowa mufile tshia kupikula natshi bukua bantu. b) Nnganyi udibu bafuta tshia kupikula natshi bantu? Bua tshinyi bivua bikengela anu kutshifuta?

¹³ Anu Yehowa nkayende ke uvua mua kufila “Muana wa mukoko . . . udi umbusha mibi ya ba pa buloba.” (Yone 1:29) Kadi Nzambi kavua musungule muanjelu kayi yonso bua kusungila  bantu to. Kadi wakatuma uvua mua kujikija malu a dishima avua Satana mushiminyine bantu ba Nzambi, kuajikija kashidi. Bushuwa, Yehowa wakadikengesha bikole pakatumaye Muanende mulela umuepele ‘uvuaye umona umvua disanka.’ (Nsumuinu 8:30, MMV) Muana wa Nzambi “wakadivuija tshianana” bu muntu wa pa buloba ku budisuile. (Filipoyi 2:7) Yehowa wakenza tshishima, kuelaye muoyo wa Muanende muan’abute wa mu diulu mu difu dia Mariya, nsongakaji muena Yuda utshivua kamama. (Luka 1:27, 35) Pavuaye uledibua, bavua mua kumubikila ne: Yezu. Kadi bilondeshile mikenji, uvua ne bua kubikidibua ne: Adama muibidi, bualu uvua mupuangane anu bu Adama. (1 Kolinto 15:45, 47) Nunku, Yezu uvua mua kudifila yeye muine bu mulambu wa kupikula nawu bantu balela mu bubi.

¹⁴ Nnganyi uvuabu bafuta tshia kupikula natshi bantu atshi? Musambu wa 49:7 udi wamba patoke ne: “Nzambi” ke udibu batshifuta. Kadi Yehowa ki nyeye muine uvua mudianjile kulongolola bua kutshifila anyi? Bidi nanku. Kadi bualu ebu kabuena bupepeja mushinga wa tshia kupikula natshi bantu, bienze anu bu mudimu wa tshidimudimu anyi wa tshidingishilu wa kushintakaja bintu patupu, bu padi muntu upatula makuta mu mpaya umue uela mu mukuabu nansha. Tumanye ne: difila dia tshia kupikula natshi bantu ki ndishintakaja dia bintu bidi bimueneka to, kadi nkufutangana kua mu malu a mikenji. Pavua Yehowa ufila tshia kupikula natshi bantu, nansha muvuaye mua kudikengesha bikole, uvua uleja mudiye mulamate ku buakane buende bupuangane mulamatshilamu.​—Genese 22:7, 8, 11-13; Ebelu 11:17; Yakobo 1:17.

15. Bivua bikengela bua Yezu kukenga ne kufua bua tshinyi?

¹⁵ Mu tshidimu tshia 33, Yezu Kristo wakitaba bua kutantamena diteta dibi ditambe diakafikisha ku difuta dia tshia kupikula natshi bantu. Wakitaba bua bamukuate bua malu a mafi avuabu bamubande nawu, ne bamushipele ku mutshi. Bivuaku bikengela menemene bua Yezu kukengaye bibi nunku anyi? Eyowa, bualu bivua bikengela kukosa tshilumbu tshivuabu bajule bua muoyo mutoke wa batendeledi ba Nzambi. Mona ne: Nzambi kavua mulekele bua Helode kushipaye Yezu patshivuaye muana mutoke to. (Matayi 2:13-18) Kadi pakakola Yezu, uvua mukumbane  bua kukandamena buluishi bukole bua Satana muikale mumanye bimpe menemene malu avua mu tshialu. * Pakashala Yezu “ne lulamatu, kayi bualu bubi, kayi munyanguke, mutapuluke ne benji ba bubi” nansha muvuabu bamukengesha bibi bitambe, wakaleja mu mushindu wa dikema bua kashidi ne: Yehowa udi ne bantu batu bashala anu bamulamate padibu mu mateta. (Ebelu 7:26) Ke bualu kayi kumpala kua Yezu kufuaye, wakela dîyi dia katshimu wamba ne: “Bualu buakumbanyi!”​—Yone 19:30.

16, 17. a) Mmunyi muvua Yezu mutungunuke ne mudimu wende wa bupikudi? b) Bivua bimpe bua Yezu kumueneka “kumpala kua Nzambi bua bualu buetu” bua tshinyi?

¹⁶ Yezu uvua kabidi ne bua kujikija mudimu wende wa bupikudi. Dituku disatu Yezu mumane kufua, Yehowa wakamubisha ku lufu. (Bienzedi 3:15; 10:40) Pakenza Yehowa bualu bua dikema ebu, kavua anu mufute Muanende bua muvuaye mumuenzele mudimu ne lulamatu to, kadi wakamupesha mushindu wa kujikija mudimu wende wa bupikudi bu Muakuidi Munene wa Nzambi. (Lomo 1:4; 1 Kolinto 15:3-8) Mupostolo Paulo wakumvuija ne: “Pakalua Kristo bu muakuidi munene . . . kavua mubuele muaba wa tshijila ne mashi a mbuji ya mpumbu ne a bana ba ngombe, kadi wakabuelamu ne mashi ende nkayende musangu umue bua kashidi, kutupetelaye dipikudibua dia tshiendelele. Bualu Kristo kavua mubuele muaba wa tshijila muenza ku bianza udi tshimfuanyi tshia muaba mulelela, kadi uvua mubuele mu diulu muine bua kumueneka mpindieu kumpala kua Nzambi bua bualu buetu.”​—Ebelu 9:11, 12, 24.

 ¹⁷ Kristo kavua mua kuya ne mashi ende mu diulu to. (1 Kolinto 15:50) Kadi wakaya ne tshivua mashi au aleja: bilondeshile mikenji, mmushinga wa mulambu wa muoyo wende mupuangane wa buntu. Pashishe, pakafikaye kumpala kua Nzambi, wakamuleja mushinga wa muoyo wende au bu tshia kupikula natshi bukua bantu bena mibi. Yehowa wakitaba mulambu au anyi? Eyowa. Wakaleja muvuaye muwitabe mu Pentekoste wa mu tshidimu tshia 33 pavua nyuma muimpe mupuekele bayidi 120 ku Yelushalema. (Bienzedi 2:1-4) Nansha muvua muanda eu wenza disanka, uvua anu ntuadijilu wa malu mimpe a dikema adi tshia kupikula natshi bantu tshibapetesha.

18, 19. a) Mbisumbu kayi bibidi bidi ne diakalenga dia kulengejangana ne Nzambi mu mashi a Kristo? b) Mmasanka kayi adi badi mu “musumba munene wa bantu” bapeta mpindieu ne mu matuku atshilualua?

¹⁸ Mu mukanda uvua mupostolo Paulo mufundile bena Kolosayi, wakamba ne: Nzambi wakanyisha bua kulengejangana ne bintu bikuabu bionso mu Kristo pa kukeba nabi ditalala mu mashi a Yezu avuaye mupuekeshe ku mutshi wa makenga. Paulo udi umvuija kabidi ne: dilengejangana edi didi ditangila bisumbu bibidi bia bantu: tshia “bintu bidi mu diulu” ne tshia “bintu bidi pa buloba.” (Kolosayi 1:19, 20; Efeso 1:10) Tshisumbu tshia kumpala ntshia bena Kristo 144000 badi ne ditekemena dia kuikala bakuidi ne bakalenge mu diulu bakokesha buloba pamue ne Yezu Kristo. (Buakabuluibua 5:9, 10; 7:4; 14:1-3) Nebenze nabu mudimu wa kupetesha bantu bena butumike masanka adi afumina ku tshia kupikula natshi bantu ku kakese ku kakese munkatshi mua bidimu 1000.​—1 Kolinto 15:24-26; Buakabuluibua 20:6; 21:3, 4.

¹⁹ “Bintu bidi pa buloba” mbantu badi bobu ne ditekemena dia kuikala ne muoyo mupuangane mu Mparadizu pa buloba. Buakabuluibua 7:9-17 udi uleja ne: badi “musumba munene wa bantu” bapanduka ku “dikenga dinene” dialua. Kadi kabena anu bindila too ne tshikondo atshi bua kushishabu kupeta masanka adi tshia kupikula natshi bantu tshipetesha to. Bakadi bamane ‘kusukula mizabi yabu, bayitokeshe mu mashi a Muana wa mukoko.’ Bu mudibu bitabuja tshia kubapikula natshi etshi tshifila  ne dinanga, tshidi tshibapetesha masanka nansha mpindieu. Bakadi bamane kubadibua bakane bu balunda ba Nzambi. (Yakobo 2:23) Mulambu wa Yezu mmubambuluishe bua ‘kusemena ku nkuasa wa bukalenge wa ngasa ne dikima dia kuakula.’ (Ebelu 4:14-16) Padibu batupakana benza bibi, badi babafuila luse lulelela. (Efeso 1:7) Nansha mudibu bena mapanga, badi ne kondo ka muoyo kakezuke. (Ebelu 9:9; 10:22; 1 Petelo 3:21) Dilengejangana diabu ne Nzambi ki mbualu butshidibu bindile to, kadi mbualu budi buenda buenzeka! (2 Kolinto 5:19, 20) Mu Bukokeshi bua bidimu 1000, ‘nebapikudibue kabidi ku bupika bua dibola’ ku kakese ku kakese, ne ndekelu wa bionso ‘nebapete budikadidi bua butumbi bua bana ba Nzambi.’​—Lomo 8:21.

20. Wewe welangana meji bua tshia kupikula natshi bantu bidi mua kukuenzela tshinyi?

²⁰ ‘Tudi tuela Nzambi tuasakidila ku butuangaji bua Yezu Kristo’ bua tshia kutupikula natshi etshi! (Lomo 7:25) Ntshipepele bua kutshiumvua, kadi tshikale ne malu male adi atusaka bua kuleja Nzambi kanemu kakole. (Lomo 11:33) Tuetu tuelela tshia kupikula natshi bantu etshi meji ne dianyisha dionso, nebilenge mioyo yetu, ne nebikale anu bitusemeja pabuipi ne Nzambi wa buakane. Anu bu mufundi wa misambu, tudi ne malu majalame adi atusaka bua kutumbisha Yehowa udi “unanga buakane ne kulumbulula kuakane.”​—Musambu 33:5.