1, 2. Mwakukoliyana ndi vo Bayibolu likamba, kumbi ndi masuzgu wuli ngo ŵanthu akumana nangu, nanga ndi nthowa yimoza niyi yakumalisiya masuzgu ngenanga?

 “CHILENGEDU chosi chilutirizga kutamanthiya limoza.” (Aroma 8:22) Pakukamba mazu ngenanga, wakutumika Paulo wakonkhoskanga masuzgu ngo tosi tikumana nangu. Ŵanthu angawona kuti palivi nthowa yinyaki yeyosi yakumalisiya masuzgu, ubudi kweniso nyifwa. Kweni mwakupambana ndi ŵanthu, Yehova wangafiska kuchita chechosi. (Numeri 23:19) Iyu ndi Chiuta waurunji ndipu wakunozga nthowa yakumalisiya masuzgu ngo tikumana nangu. Nthowa yeniyi yidanika kuti sembi yakuwombole.

² Sembi yakuwombole ndi mphasu yapade ukongwa yo Yehova wakupaska ŵanthu. Sembi yeniyi yichitiska kuti tifwatuliki ku ubudi ndi nyifwa. (Aefeso 1:7) Ndipu chifukwa cha sembi yeniyi, te ndi chilindizga chakuzija ndi umoyu kwamuyaya, kwali kuchanya pamwenga mu paradayisu pacharu chapasi. (Luka 23:43; Yohane 3:16; 1 Peturo 1:4) Kweni kumbi sembi yakuwombole ntchinthu wuli? Nanga yititisambizganji vakukwaskana ndi urunji wapade ukongwa waku Yehova?

3. (a) Ntchifukwa wuli pakhumbikanga sembi yakuwombole? (b) Ntchifukwa wuli Chiuta wanguleka waka kuzomereza kuti ŵana aku Adamu alutirizgi kuja ndi umoyu kwamuyaya?

³ Pakhumbikanga sembi yakuwombole chifukwa cha ubudi waku Adamu. Chifukwa chakuti wangumuvwiya cha Chiuta, Adamu wanguchitiska kuti ŵana ŵaki atamengi, ajengi ndi chitima, avwengi vakupweteka kweniso kuti afwengi. (Genezesi 2:17; Aroma 8:20) Chiuta watingi waŵalekengi ŵaka cha kwambula kuŵapaska chilangu cha nyifwa cho wangukamba kuti alondiyengi. Tikamba venivi chifukwa asani wanguchita viyo, ndikuti watingi waswengi dangu laki lo wangukamba lakuti: “Malipiru nga ubudi ndi nyifwa.” (Aroma 6: 23) Ndipu asani Yehova wanguleka kulondo fundu zaki zaurunji, mu chilengedu chosi mwatingi muŵengi waka chimtimbaheka kweniso angelu ndipuso ŵanthu atingi awonengi kuti palivi chifukwa cha kuvwiya marangu!

4, 5. (a) Kumbi Satana wangumunyoza wuli Chiuta, nanga ntchifukwa wuli Yehova wanguwona kuti mphakwenere kuti wamalisi nkhani zenizi? (b) Kumbi ndi boza wuli lo Satana wangukamba lakukwaskana ndi ateŵeti akugomezgeka aku Chiuta?

⁴ Nge mo tingusambiriya mu Mutu 12, vo Satana, Adamu kweniso Heva anguchita pakugarukiya ulamuliru waku Yehova vingwambisa nkhani yinyaki yakukhumbika ukongwa. Satana wanguchitiska kuti zina lakupaturika laku Chiuta lifipiskiki. Ndipu iyu wangukamba kuti Yehova ngwaboza, ngwakulamuliya wankhaza kweniso watiŵapaska cha wanangwa ŵanthu ŵaki. (Genezesi 3:1-5) Vo Satana wanguchita pakuchitiska Adamu ndi Heva kuleka kuvwiya Chiuta, vinguwoneka nge kuti watondekesa khumbu laku Chiuta lakuti charu chapasi chizazi ndi ŵanthu arunji. (Genezesi 1:28; Yesaya 55:10, 11) Asani Yehova wanguleka kuchitapu kanthu kuti walongo kuti Satana ngwaboza, ŵanthu kweniso angelu atingi ayambengi kukayikiya asani iyu ngwakulamuliya wamampha nadi.

⁵ Satana wangupusikiziya so ateŵeti aku Yehova kuti atimuteŵete chifukwa cha vinthu vamampha vo watiŵapaska, kweni asani angakumana ndi masuzgu angaleka kuja akugomezgeka kwaku Chiuta. (Yobu 1:9-11) Nkhani zenizi zenga zakukhumbika ukongwa kuphara kutaska ŵaka ŵanthu ku masuzgu ngo akumana nangu. Mwaviyo, Yehova wanguwona kuti penga pakwenere kuti wasaniyi nthowa yakumukiya vo Satana wangukamba. Kweni kumbi Chiuta watingi wazimalisengi wuli nkhani zenizi, kweniso pa nyengu yeniyo pe, kusaniya nthowa yakutaskiya ŵanthu?

6. Kumbi ndi mazu nanga ngo ngagwiriskikiya ntchitu mu Bayibolu pakukonkhoska nthowa yo Yehova wangusankha yakutaskiya ŵanthu?

⁶ Nthowa yo Yehova wangusankha kumalisiya nkhani yeniyi yenga yalisungu kweniso ya urunji, ndipu palivi munthu weyosi yo waŵananiyangaku kuti yingamala munthowa yipusu viyo. Mu Bayibolu nthowa yeniyi yidanika so kuti kugula, kuwombo, kuyanjanisa, kubenekere, ndipuso kupepese maubudi. (Salimo 49:8, mazu ngamumphata;  Daniyeli 9:24; Agalatiya 3:13; Akolose 1:20; Aheberi 2:17) Kweni mazu ngo Yesu wangukamba ndingu ngakonkhoska umampha nkhani yosi. Iyu wangukamba kuti: “Mwana wa munthu wakuza kuti ŵanthu amuteŵete cha, kweni wakuza kuziteŵete ndi kupereka umoyu waki sembi yakuwombole ŵanthu anandi.”—Mateyu 20:28.

7, 8. (a) Kumbi mu Bayibolu mazu ngakuti “sembi yakuwombole” ngang’anamuwanji? (b) Kumbi ntchinthu wuli cho chilongo kuti mazu ngakuti sembi yakuwombole ngakamba va chinthu chakuyanana ndi chinyaki?

⁷ Kumbi sembi yakuwombole ntchinthu wuli? Mazu Ngachigiriki ngo akungagwiriskiya ntchitu pa lemba ili, ngakutuliya ku mazu ngo ngang’anamuwa “kufwatuwa.” Mazu ngenanga angagwiriskiyanga ntchitu pakukamba va ndalama zo aperekanga kuti awombo akayidi wo akoleka ku nkhondu. Mwaviyo, tingakamba kuti sembi yakuwombole ndi ndalama pamwenga chinthu chinyaki cho munthu wapereka kuti wawombo munthu pamwenga chinthu chinyaki. Mumalemba Ngachiheberi, mazu ngo akungafwatuliya kuti “sembi yakuwombole” (koʹpher) ngakutuliya ku mazu ngo ngang’anamuwa “kubenekere.” Mwakuyeruzgiyapu, Chiuta wangukambiya Nowa kuti chombu ‘wachipaki phula’ (Muchiheberi “kubenekere”). (Genezesi 6:14) Venivi vititiwovya kuvwisa fundu yakuti kupereka sembi kung’anamuwa so kubenekere maubudi.—Salimo 65:3.

⁸ Dikishonale yinyaki yakukonkhoska mazu nga mu Bayibolu yikamba kuti mazu Ngachiheberi ngo ngakamba va sembi yakuwombole, “nyengu zosi ngakamba va chinthu chinyaki cho chiyanana ndi chinyaki.” (Theological Dictionary of the New Testament) Mwaviyo, kuti sembi yakuwombole yiperekeki pamwenga kuti maubudi ngabenekereki, pakhumbikanga kuperekeka mtengu wakuyanana ndi vo vingunangika chifukwa cha ubudi. Ndichu chifukwa chaku Dangu lo Chiuta wangupereka kwa Ayisirayeli lakambanga kuti: “Umoyu kulipa umoyu, jisu kulipa jisu, jinu kulipa jinu, janja kulipa janja, kweniso phazi kulipa phazi.”—Dotoronome 19:21.

9. Ntchifukwa wuli ŵanthu akugomezgeka aperekanga sembi zanyama, nanga kumbi Yehova waziwonanga wuli sembi zawu?

⁹ Kwambiya paku Abelu, ŵanthu akugomezgeka aperekanga sembi zanyama kwaku Chiuta. Venivi valongonga kuti yiwu aziŵanga kuti ŵenga akubuda ndipu akhumbikanga kuwomboleka. Ndipu angulongo so kuti agomezganga layizgu laku Chiuta lakuti wazamuwombo  ŵanthu mwakugwiriskiya ntchitu “mphapu” yo Chiuta wangukambiya limu. (Genezesi 3:15; 4:1-4; Levitiko 17:11; Aheberi 11:4) Yehova wakondwanga ndi sembi zo ŵanthu ŵenaŵa aperekanga ndipu waŵawonanga kuti mbateŵeti ŵaki akugomezgeka. Kweni, sembi zanyama zo aperekanga zabenekeriyanga limu cha maubudi ngawu, chifukwa nyama zakuzirwa ukongwa cha pakuyeruzgiya ndi munthu. (Salimo 8:4-8) Ndichu chifukwa chaki Bayibolu likamba kuti: “Chifukwa ndopa za ng’ombi zinthulumi kweniso za mbuzi zingatuzgapu cha maubudi.” (Aheberi 10:1-4) Mwaviyo, sembi zenizi zamiyanga ŵaka sembi yakuwombole chayiyu yo yenga pafupi kuperekeka.

10. (a) Kumbi munthu yo wangupereka sembi yakuwombole wakhumbikanga kuja wakuyanana ndi yani, nanga ntchifukwa wuli? (b) Ntchifukwa wuli pakhumbikanga waka munthu yumoza kuti wapereki sembi?

¹⁰ Wakutumika Paulo wangukamba kuti: “Mwaku Adamu ŵanthu wosi atufwa.” (1 Akorinto 15:22) Venivi vilongo kuti pakhumbikanga munthu wakufikapu nge mo Adamu wenge, kuti wapereki umoyu waki nge sembi yakuwombole. (Aroma 5:14) Pengavi chakulengeka chechosi cho chatingi chiperekekengi kuti chifiski fundu zaurunji zaku Yehova. Ndi munthu wakufikapu pe yija, mweniyo so ubudi waku Adamu utimukwaska cha, yo watingi waperekengi “sembi yakuwombole yakuyanana, chifukwa cha ŵanthu wosi.” (1 Timote 2:6) Kuti venivi vifiskiki, ving’anamuwa cha kuti pakhumbikanga ŵanthu anandi kuti apereki sembi maumoyu ngawu kuti awombo mphapu yeyosi yaku Adamu. Wakutumika Paulo wangukamba kuti: ‘Ubudi ukusere mucharu kuziya mwa munthu yumoza, ndi nyifwa chifukwa cha ubudi.’ (Aroma 5:12) Ndipu “pakuti nyifwa yikuza kuporote mu munthu,” Chiuta wangunozga kuti ŵanthu awomboleki “kuporote mu munthu.” (1 Akorinto 15:21) Kumbi Yehova wanguchita wuli venivi?

11. (a) Kumbi munthu yo wangupereka sembi yakuwombole ‘wangulaŵa nyifwa chifukwa cha munthu weyosi’ mu nthowa wuli? (b) Ntchifukwa wuli Adamu ndi Heva ayanduwaku cha ndi sembi yakuwombole? (Wonani mazu ngamumphata.)

¹¹ Yehova wangunozga kuti munthu yumoza wakufikapu wapereki umoyu waki kuja sembi mwakukhumba yija. Mwakukoliyana ndi Aroma 6:23, “malipiru nga ubudi ndi nyifwa.” Venivi ving’anamuwa kuti munthu yo wakhumbisiskanga kupereka umoyu kuja sembi yakuwombole, wakhumbikanga kuti “walaŵi nyifwa chifukwa cha munthu  weyosi.” Tingakamba so kuti, iyu wakhumbikanga kupereka malipiru nga ubudi waku Adamu. (Aheberi 2:9; 2 Akorinto 5:21; 1 Peturo 2:24) Venivi ndivu vinguchitika nadi ndipu vinguwovya ŵanthu wosi. Sembi yakuwombole yikuwovya kuti ŵana akuvwiya aku Adamu azileki kulonde chilangu cha nyifwa. Mwaviyo, ubudi ndi nyifwa vazamuja so ndi nthazi cha paku yiwu. a—Aroma 5:16.

12. Konkhoskani mo kuweza ngongoli ya munthu yumoza kungawovye ŵanthu anandi.

¹² Tiyeruzgiyi kuti muja mutawuni yo ŵanthu anandi agwira ntchitu pa fakitale yinyaki yikulu ukongwa. Yimwi kweniso maneba nginu mugwiraku ntchitu pa fakitale yeniyi, ndipu mulonde ndalama zinandi ndipuso muja umoyu wamampha ukongwa. Kweni mwamabuchibuchi mbwenu ajala fakitale. Chifukwa wuli? Chifukwa chakuti bwana wa pafakitale yeniyi wangwamba kuba ndalama zakwendese fakitale mwakuti yatondeka kuweza ngongoli zosi. Chifukwa cha venivi, yimwi kweniso maneba nginu, ntchitu yakumaliyani mwakuti namwi mutondeka kusaniya ndalama zakuguliya vinthu vakukhumbika pa banja pinu. Mabanja, ŵana, kweniso ŵanthu wo fakitale yakhumbikanga kuŵapaska ndalama zawu ayamba kusuzgika chifukwa cha vo munthu yumoza wakuchita. Kumbi walipu yo wangawovya ŵanthu ŵenaŵa kweniso fakitale kuti yiyambi so kugwira ntchitu? Hinya! Munthu munyaki wakukhupuka ukongwa wajipereka kuti wawovyi. Iyu waziŵa kukhumbika kwa fakitale yo ndipuso walenge lisungu ŵanthu wo agwiranga ntchitu pa fakitale yeniyi kweniso mabanja ngawu. Mwaviyo wanozga kuti walipiri ngongoli zosi zo fakitale yeniyi yenga nazu ndipu watiyijula kuti yiyambi so kugwira ntchitu. Kulipira ngongoli yeniyi kutovya ŵanthu anandi wo agwiranga ntchitu, mabanja ngawu ndipuso ŵanthu anyaki wo fakitale yo yakhumbikanga kuŵapaska ndalama zawu. Mwakuyanana ŵaka, vo Yesu wanguchita pakuweza ngongoli yaku Adamu vitovya ŵanthu mamiliyoni nganandi.

13, 14. (a) Kumbi Yehova wanguchita wuli kuti sembi yakuwombole yiperekeki? (b) Kumbi sembi yikuperekeka kwaku yani, nanga kumbi venivi vitisambizganji vakukwaskana ndi Yehova?

¹³ Ndi Yehova pe yo wangapereka “Mwanawambereri . . . yo watuzgapu ubudi wa charu.” (Yohane 1:29) Kweni Chiuta wangutumiza ŵaka mungelu weyosi cha kuti wazitaski ŵanthu. Mumalu mwaki, wangutumiza Munthu mweniyo wenga wakwenere nadi kumuka maboza ngo Satana wangukamba ngakukwaskana ndi ateŵeti aku Yehova. Kukamba uneneska, Yehova wangujipereka ukongwa pakutumiza Mwana waki wapade mweniyo ‘wamuyanjanga ukongwa.’ (Nthanthi 8:30) Mwakukhumbisiska, Mwana waku Chiuta “wangujikhutuwa” ndipu wanguja nge munthu. (Afilipi 2:7) Ndipu mwakuziziswa, Yehova wangusamuska umoyu wa Mwana waki wakwamba wakuchanya ndi kuuŵika mumoyu mwa mwali munyaki Wachiyuda, zina laki Mariya. (Luka 1:27, 35) Wati wawaku nge munthu, wangudanika kuti Yesu. Kweni Bayibolu litimukamba so kuti Adamu wakumaliya, chifukwa chakuti wenga wakufikapu nge mo Adamu wakwamba wenge. (1 Akorinto 15:45, 47) Mwaviyo, Yesu wangupereka umoyu waki kuti uje sembi yakuwombole ŵanthu akubuda.

¹⁴ Kumbi sembi yakuwombole yakhumbikanga kuperekeka kwaku yani? Lemba la Salimo 49:7 likamba kuti “kwaku Chiuta.” Kweni asi ndi Yehova, mweniyo wangunozga kuti paje sembi yakuwombole? Hinya. Nanga kumbi venivi viyanana cha ndi kutuzga ndalama muthumba linyaki ndi kuziŵika munthumba linyaki kwambula chifukwa chakuvwika? Awa! Titenere kukumbuka kuti sembi yakuwombole yititisambiza fundu yinyaki yakukhumbika ukongwa yakukwaskana ndi urunji waku Yehova. Fundu yaki njakuti, pakupereka Mwana waki wakwanjiwa nge sembi yakutiwombole, Yehova wangulongo kuti nyengu zosi walondo fundu zaki zakufikapu za urunji, chinanga kuti kuchita venivi kungachitisa kuti wavwi kupweteka mumtima.—Genezesi 22:7, 8, 11-13; Aheberi 11:17; Yakobe 1:17.

15. Ntchifukwa wuli penga pakwenere kuti Yesu wasuzgiki kweniso kufwa?

¹⁵ Kukwambiriya kwa chaka cha 33 C.E., Yesu Khristu mwakukhumbisiska wanguzomereza kuti wasuzgiki ukongwa ndi chilatu chakuti wapereki sembi. Iyu wanguzomereza kumangika pa mlandu waboza, wanguyeruzgika kuti ngwakunanga kweniso wangukhomeka pachimiti chakutombozgekiyapu. Kweni kumbi penga pakwenere kuti Yesu wasuzgiki viyo? Hinya, chifukwa nkhani yakukwaskana ndi kugomezgeka  kwa ateŵeti aku Yehova yakhumbikanga kumala. Vakukondwesa kuziŵa kuti Chiuta wanguzomereza cha kuti Yesu weche bonda wabayiki ndi Herodi. (Mateyu 2:13-18) Kweni Yesu wati wakuwa, wangufiska kukunthiyapu mayeseru ngosi ngaku Satana ndipu waziziŵanga umampha nkhani zo Satana wangwambisa. b Yesu wangulutirizga kuja ‘wakugomezgeka, wambula kafukwa, wambula kufipiskika, wakupambana ndi ŵanthu akubuda,’chinanga kuti angumutombozga mwankhaza ukongwa. Vo Yesu wanguchita vingupereka ukaboni wakuvwika umampha wakuti, Yehova we ndi ateŵeti ŵaki wo aja akugomezgeka mbwenu chinanga kuti akumana ndi mayeseru. (Aheberi 7:26) Ndichu chifukwa chaki wati waja kamanavi kuti wafwi, Yesu wanguliya mwakudaniriza kuti: “Vafiskika!”—Yohane 19:30.

16, 17. (a) Kumbi Yesu wangumaliza wuli ntchitu yaki yakuwombo? (b) Ntchifukwa wuli penga pakwenere kuti Yesu “wakawoneke pamasu paku Chiuta mumalu mwaku isi”?

¹⁶ Yesu wakhumbikanga kumaliza ntchitu yaki yakuwombo ŵanthu. Ndipu pa zuŵa lachitatu kutuliya po wangufwiya, Yehova wangumuyuska kwa akufwa. (Machitidu 3:15; 10:40) Vo Yesu wanguchita vambula kuluwika, mwakuti Yehova wakumupaska mphotu chifukwa chakumuteŵete ŵaka mwakugomezgeka pe cha, kweni wakumupaska so mwaŵi wakuti wamalizi ntchitu yaki yakuwombo ŵanthu nge Wasembi Mura waku Chiuta. (Aroma 1:4; 1 Akorinto 15:3-8) Wakutumika Paulo wangukamba kuti: “Khristu wati waza nge wasembi mura . . . , wangusere mumalu ngakupaturika ndi ndopa za mbuzi cha pamwenga za matholi nganthulumi, kweni ndi ndopa zaki. Wanguseremu kamoza pe mbwenu mpaka muyaya, ndipu wakutisaniriya utaski wamuyaya. Pakuti Khristu wakusere mumalu ngakupaturika ngakupangika ndi manja cha, ngo ntchakuwoniyapu ŵaka cha malu  chayingu. Kweni iyu wakusere kuchanya chayiku ndipu sonu wawoneke pa masu paku Chiuta mumalu mwaku isi.”—Aheberi 9:11, 12, 24.

¹⁷ Khristu watingi watongi ndopa zaki chayizu cha kuluta nazu kuchanya. (1 Akorinto 15:50) Mumalu mwaki, iyu wanguto cho chamiyanga ndopa zo. Ndopa zo zamiyanga wanangwa wakuja ndi umoyu pacharu chapasi nge munthu wakufikapu, ndipu Yesu wangujinora wanangwa wenuwu. Pavuli paki wanguchiwoneke pamasu paku Chiuta kuti wakapereki mtengu wakuzirwa wa umoyu wo iyu wangupereka nge sembi yakuwombole. Kumbi Yehova wangulonde sembi yeniyi? Hinya, ndipu venivi vinguwoneke pa Pentekositi mu 33 C.E., po wangupunguliya mzimu waki wakupaturika kwa akusambira akukwana 120 ku Yerusalemu. (Machitidu 2:1-4) Chinanga kuti venivi venga vakukondwesa ukongwa, kweni kwenga kwamba ŵaka kwa vinthu vamampha ukongwa vo ŵanthu aku Chiuta alonde chifukwa cha sembi.

18, 19. (a) Kumbi ndi magulu ngaŵi nanga nga ŵanthu ngo ngayanduwa chifukwa cha kuyanjaniskika ko kuchitika chifukwa cha ndopa zaku Khristu? (b) Kumbi “amzinda ukulu,” alonde vitumbiku wuli pasonu panu, nanga kunthazi azamulonde vitumbiku wuli chifukwa cha sembi?

¹⁸ Mu kalata yo wangulembe Akhristu a ku Kolose, wakutumika Paulo wangukonkhoska kuti kuziya mu sembi yaku Yesu, Chiuta wangukondwa ukongwa kuti ŵanthu aje so pa ubwezi wamampha ndi Iyu. Paulo wakonkhoska so kuti kuyanjaniska kwenuku kusazgapu kuwunganisa pamoza magulu ngaŵi, ngo ngaziŵika kuti, “vinthu vakuchanya” ndi “vinthu vapacharu.” (Akolose 1:19, 20; Aefeso 1:10) Gulu lakwamba le ndi Akhristu 144,000, ŵeniwo akupaskika chilindizga chakuchija asembi kuchanya ndipu azamulamuliya charu chapasi nge mafumu limoza ndi Khristu Yesu. (Chivumbuzi 5:9, 10; 7:4; 14:1-3) Kuziya mu ŵanthu ŵenaŵa, kamana ndi kamana ŵanthu wosi akuvwiya azamulonde vitumbiku chifukwa cha sembi kwa vyaka 1,000.—1 Akorinto 15:24-26; Chivumbuzi 20:6; 21:3, 4.

¹⁹ “Vinthu vapacharu chapasi” mbanthu wosi ŵeniwo ŵe ndi chilindizga chakuzija ndi umoyu wakufikapu mu Paradayisu pacharu chapasi. Pa lemba la Chivumbuzi 7:9-17, ŵanthu ŵenaŵa adanika kuti “mzinda ukulu” wa ŵanthu wo azamupona pa “chisuzgu chikulu.” Kweni sembi yakuwombole yitiŵawovya mbwenu ŵanthu ŵenaŵa chinanga ndi sonu panu. Ve viyo chifukwa yiwu “achapa mikhanju yawu ndi kuyitowesa kuŵa yituŵa mundopa za Mwanawambereri.”  Ndipu chifukwa chakuti ŵe ndi chivwanu mu sembi yaku Yesu, alonde vitumbiku vauzimu vo Yehova watiŵapaska. Mwakuyeruzgiyapu, Yehova watiŵawona kuti mbarunji kweniso ndi mabwezi ngaki. (Yakobe 2:23) Chifukwa cha sembi yaku Yesu, ŵanthu ŵenaŵa afika “kumpandu waufumu wa wezi ukulu ndi wanangwa wakulongoro.” (Aheberi 4:14-16) Asani achita ubudi, Chiuta watiŵagowoke. (Aefeso 1:7) Ndipu chinanga kuti mbambula kufikapu, yiwu aja ndi njuŵi yamampha. (Aheberi 9:9; 10:22; 1 Peturo 3:21) Mwaviyo, ŵanthu akhumbika kulindizga cha kuti aziyanjaniskiki ndi Chiuta kunthazi, mumalu mwaki yiwu ayanjaniskika sonu! (2 Akorinto 5:19, 20) Mu ulamuliru wa vyaka 1,000, kamana ndi kamana ŵanthu ‘azamufwatulika ku ukapolu wa kuvunda’ ndipu pakumaliya paki azamuja ndi “wanangwa waunkhankhu wa ŵana aku Chiuta.”—Aroma 8:21.

20. Kumbi mutuvwa wuli mumtima asani muŵanaŵaniya vakukwaskana ndi sembi yaku Yesu?

²⁰ “Wawongeki Chiuta kuporote mwa Ambuyafwi Yesu Khristu” chifukwa chakutipaska sembi yakutiwombole! (Aroma 7:25) Tizukuma ndi nthowa yambula kusuzga kweniso yamampha ukongwa yo Chiuta wangugwiriskiya ntchitu kuti tiwomboleki. (Aroma 11:33) Ndipu asani tiŵanaŵaniya vakukwaskana ndi sembi yeniyi, tikondwa ukongwa mumtima ndipu vititiwovya kundere kufupi ndi Yehova Chiuta yo ndi murunji. Mwakuyana ndi munthu munyaki yo wangulembaku buku la Salimo, te ndi vifukwa vakuvwika vakuthamikiya Yehova yo ndi Chiuta mweniyo “watanja urunji kweniso cheruzgu chambula kwanjiya.”—Salimo 33:5.