1-3. (a) Wetin mek wi o Jiova wi layf? (b) Wetin di Pɔsin we sev wi tɛl wi fɔ du?

IMAJIN se yu de insay bot we de sink. Dɔn, jɔs di tɛm we yu de tink se op nɔ de igen, sɔmbɔdi kam ɛn pul yu de. Yu go mɔs dɔn fil fayn as di pɔsin de kɛr yu go na sef say ɛn tɛl yu se: “Yu sef naw!” Yu nɔ tink se yu o da pɔsin de? Fɔ tru, yu o da pɔsin de yu layf.

² Dis na fayn ɛgzampul we de sho wetin Jiova dɔn du fɔ wi. Fɔ tru, wi rili o am. Wi shɔ bɔt dat bikɔs i dɔn gi di ransɔm, we dɔn mek am pɔsibul fɔ mek wi fri frɔm sin ɛn day. Wi gɛt kɔnfidɛns se wans wi kɔntinyu fɔ du tin dɛn we de sho se wi gɛt fet pan da wɔndaful sakrifays de, Gɔd go fɔgiv wi sin dɛn, ɛn wi go gɛt layf we go de sote go tumara bambay. (1 Jɔn 1:​7; 4:​9) As wi lan na Chapta 14, di ransɔm na di bɛst we we Jiova dɔn sho in lɔv ɛn jɔstis. Wetin wi fɔ du bɔt dat?

³ I fayn fɔ lɛ wi tink bɔt wetin di Pɔsin we sev wi tɛl wi fɔ du. Jiova bin yuz di prɔfɛt Mayka fɔ tɛl wi se: “I [“Jiova,” NWT] dɔn sho una wetin gud ɛn wetin i want. Dat na fɔ lɛ una trit una kɔmpin fia wan, ɛn lɛk fɔ du gud, gɛt lɔv we nɔ de ɛva chenj ɛn put unasɛf dɔŋ fɔ du wetin PAPA GƆD want una fɔ du.” (Mayka 6:​8) Notis se wan pan di tin dɛn we Jiova de aks wi fɔ du na fɔ “trit [wi] kɔmpin dɛn fia wan.” Aw wi go du dat?

4. Aw wi no se Jiova ɛkspɛkt wi fɔ liv akɔdin to wetin i se rayt?

⁴ Jiova de ɛkspɛkt wi fɔ liv bay wetin i se rayt ɛn rɔng.  Bikɔs di tin dɛn we i se wi fɔ du na tin dɛn we rayt, wi de sho se wi de tray tranga wan fɔ du wetin rayt bay we wi de liv wi layf akɔdin to dɛn tin dɛn de. Ayzaya 1:​17 tɔk se: “Una lan fɔ du gud; trit ɔlman di sem.” Gɔd in Wɔd tɛl wi se “ɔl udat de du wetin PAPA GƆD want fɔ kɔntinyu fɔ du so.” (Zɛfinaya 2:​3) I ɛnkɔrej wi bak fɔ “gɛt di nyu abit dɛn we Gɔd mek akɔdin to wetin i want, ɛn dɛn nyu abit ya na tin dɛn we rili rayt.” (Ɛfishians 4:​24) Tin dɛn we rili rayt ɔ tru tru jɔstis, nɔ gɛt natin fɔ du wit fɛt-fɛt, dɔti layf, ɛn mami ɛn dadi biznɛs di we aw Gɔd nɔ want, bikɔs dɛn de agens wetin oli.—Sam 11:​5, NWT; Ɛfishians 5:​3-5.

5, 6. (a) Wetin mek i nɔ at fɔ liv wi layf akɔdin to aw Jiova want? (b) Aw di Baybul sho se fɔ du di rayt tin na sɔntin we fɔ de apin ɔltɛm?

⁵ Yu tink se i at fɔ liv akɔdin to wetin Jiova se rayt? Nɔ. Pɔsin we lɛk Jiova nɔ de si di tin dɛn we Jiova de tɛl wi fɔ du as tin dɛn we at fɔ du. Bikɔs wi lɛk wi Gɔd ɛn di kayn pɔsin we i bi, wi want fɔ liv wi layf di we we go mek i gladi. (1 Jɔn 5:​3) Mɛmba se Jiova lɛk fɔ “du tin tret wan.” (Sam 11:​7) If wi rili want fɔ falamakata Gɔd in jɔstis, ɔ di we aw i de du tin di rayt we, wi fɔ lɛk wetin i lɛk ɛn fɔ et wetin i et.—Sam 97:​10.

⁶ I nɔ izi fɔ mɔtalman we nɔ pafɛkt fɔ du tin di rayt we. Wi fɔ lɛf fɔ fala wi ol abit ɛn ɔl di bad bad tin dɛn we wi de du ɛn tray fɔ gɛt di nyu abit. Di Baybul se wi “go de gɛt” di nyu abit dɛn bay we wi no di kɔrɛkt tin bɔt Gɔd. (Koloshians 3:​9, 10) Di orijinal langwej wɔd we dɛn yuz fɔ translet “go de gɛt” min se wi fɔ kɔntinyu fɔ tray tranga wan fɔ mek wi gɛt di nyu abit. Ilɛk aw wi tray tranga wan fɔ du di rayt tin, tɛm dɛn kin de we sin kin mek i izi fɔ wi fɔ mek mistek pan di we aw wi de tink, tɔk, ɛn du tin.—Romans 7:​14-20; Jems 3:​2.

7. Aw wi fɔ si di mistek dɛn we wi kin mek pan ɔl we wi de tray tranga wan fɔ du wetin rayt?

⁷ Aw wi fɔ si di mistek dɛn we wi kin mek pan ɔl we wi  de tray tranga wan fɔ du wetin rayt? Fɔ tru, wi nɔ want fɔ de tek sin as tin we nɔ siriɔs. Bɔt dat nɔ fɔ mek wi giv-ɔp bikɔs wi fil se wi sin dɛn go mek wi nɔ fit fɔ sav Jiova. Wi gud Gɔd dɔn mek we fɔ mek di wan dɛn we de ripɛnt frɔm dɛn sin fɔ gɛt tayt padi biznɛs wit am bak. Tink bɔt di fayn wɔd dɛn we di apɔsul Jɔn bin tɔk we i se: “A de rayt to una dɛn tin ya so dat una nɔ go sin. Bɔt stil, if ɛnibɔdi sin [bikɔs i nɔ pafɛkt], wi gɛt pɔsin we de ɛp wi, we na Jizɔs Krays, we de wit di Papa.” (1 Jɔn 2:​1) Fɔ tru, Jiova dɔn gi Jizɔs as sakrifays so dat wi go sav Am di we aw I want pan ɔl we wi na sina. Yu nɔ tink se dat fɔ mek wi want du wi bɛst fɔ du wetin go mek Jiova gladi?

8, 9. Aw di prichin wok de sho Jiova in jɔstis?

⁸ Wi go du tin tret wan ɔ falamakata Gɔd in jɔstis, bay we wi de du ɔl wetin wi ebul fɔ prich di gud nyuz bɔt Gɔd in Kiŋdɔm to ɔda pipul dɛn. Wetin Jiova in jɔstis gɛt fɔ du wit di gud nyuz?

⁹ Bifo Jiova dɔnawe wit dis wɔl, di fɔs tin we i go du na dat i go gi wɔnin. We Jizɔs bin de tɔk bɔt di tin dɛn we go apin insay di tɛm we di wɔl go want dɔn, i bin tɔk se: “Dɛn go prich di gud nyuz na ɔl di neshɔn dɛn fɔs.” (Mak 13:​10; Matyu 24:​3) We dis vas yuz di wɔd “fɔs,” i min se ɔda tin dɛn go apin afta dɛn dɔn prich di gud nyuz ɔlsay na di wɔl. Dɛn ɔda tin ya go bi di big big trɔbul, we go mek Gɔd dɔnawe wit di wikɛd wan dɛn ɛn mek we fɔ lɛ di nyu wɔl kam usay ɔlman go de du wetin rayt. (Matyu 24:​14, 21, 22) Fɔ tru, nɔbɔdi nɔ go gɛt rayt fɔ blem Jiova fɔ se i nɔ trit di wikɛd wan dɛn fia wan. We Jiova de gi wɔnin, i de gi di wikɛd wan dɛn chans fɔ chenj frɔm di bad tin dɛn we dɛn de du so dat dɛn go sev.—Jona 3:​1-10.

10, 11. We wi prich di gud nyuz, aw dat de sho se wi de falamakata Gɔd in jɔstis?

 ¹⁰ Aw di prich we wi de prich di gud nyuz de sho se wi de falamakata Gɔd in jɔstis? Di fɔs tin we rayt we wi fɔ du na fɔ ɛp ɔda pipul dɛn fɔ sev. Tink bak bɔt di bot we de sink. We yu de sef wan na ɔda bot, yu go mɔs want fɔ ɛp di wan dɛn we stil de na di wata. Dis wikɛd wɔl tan lɛk wata usay pipul dɛn de drawn, ɛn wi nid fɔ du sɔntin fɔ sev dɛn pipul dɛn de. Fɔ tru, bɔku pipul dɛn nɔ de gri fɔ lisin to wi mɛsej. Bɔt wans Jiova kɔntinyu fɔ peshɛnt, wi gɛt di wok fɔ gi dɛn di chans fɔ “ripɛnt” so dat dɛn go sev.—2 Pita 3:​9.

¹¹ Bay we wi prich di gud nyuz to ɔl di pipul dɛn we wi de mit, wi de sho jɔstis wan ɔda impɔtant we. Wi de sho se wi nɔ de tek wan pɔsin bɛtɛ pas ɔda pɔsin. Mɛmba se “Gɔd nɔ de tek wan pɔsin bɛtɛ pas ɔda pɔsin, bɔt na ɛni neshɔn, di man we de fred Gɔd ɛn du wetin rayt, na in Gɔd de tek as in yon.” (Akt 10:​34, 35) If wi want fɔ falamakata Jiova in jɔstis, wi nɔ fɔ kwik fɔ jɔj ɔda pipul dɛn. Bifo dat, wi fɔ prich di gud nyuz to dɛn ilɛk us kɔlɔ dɛn gɛt, uskayn pɔsin dɛn bi, ɔ if dɛn po ɔ jɛntri. Bay da we de, wi de gi ɔlman we lisin di chans fɔ yɛri di gud nyuz ɛn du wetin dɛn de lan.—Romans 10:​11-13.

12, 13. (a) Wetin mek wi nɔ fɔ kwik fɔ jɔj ɔda pipul dɛn? (b) Wetin Jizɔs bin min we i se “una lɛf fɔ jɔj” ɛn “una lɛf fɔ kɔndɛm”? (Luk bak di futnot.)

¹² Wi kin du tin tret wan bak bay we wi trit ɔda pipul dɛn lɛk aw Jiova de trit wi. I kin rili izi fɔ jɔj ɔda pipul dɛn, fɔ tɔk bad bɔt dɛn mistek dɛn, ɛn fɔ dawt di rizin we mek dɛn du sɔntin. Bɔt udat pan wi go want lɛ Jiova chɛk di rizin dɛn we de mek wi du sɔntin ɛn wi mistek di we we nɔ de sho sɔri-at? Nɔto da we de Jiova de trit wi. Wan pan di  man dɛn we rayt di sam buk tɔk se: “PAPA GƆD [“Jiova,” NWT], if yu bin de kɔnt ɔl di bad we wi de du, PAPA GƆD, udat fit fɔ tinap bifo yu?” (Sam 130:​3) Yu nɔ tink se wi fɔ gladi we wi Gɔd we de du tin tret ɛn we gɛt sɔri-at, kin disayd nɔ fɔ pe atɛnshɔn pan wi mistek dɛn? (Sam 103:​8-10) So aw wi fɔ trit ɔda pipul dɛn?

¹³ If wi gladi fɔ di kayn we aw Gɔd de sho sɔri-at we i de du tin tret, wi nɔ go kwik fɔ jɔj ɔda pipul dɛn pan tin dɛn we nɔto wi biznɛs ɔ we nɔ rili impɔtant. We Jizɔs bin de tich pipul dɛn ɔp wan mawntin, i bin wɔn se: “Una lɛf fɔ jɔj pipul dɛn so dat Gɔd nɔ go jɔj una.” (Matyu 7:​1) Akɔdin to wetin Lyuk rayt, Jizɔs bin tɔk bak se: “Una lɛf fɔ kɔndɛm, ɛn Gɔd nɔ go kɔndɛm una.” * (Lyuk 6:​37) Jizɔs bin sho se i no se mɔtalman we nɔ pafɛkt kin want fɔ jɔj ɔda pipul dɛn. So ɛnibɔdi we bin de lisin to am we bin gɛt di abit fɔ de jɔj ɔda pipul dɛn fɔ stɔp fɔ du dat.

14. Us rizin dɛn wi gɛt fɔ “lɛf fɔ jɔj” ɔda pipul dɛn?

¹⁴ Wetin mek wi fɔ “lɛf fɔ jɔj” ɔda pipul dɛn? Wan rizin na dat wi nɔ gɛt di pawa fɔ du ɔltin. Di disaypul Jems bin mɛmba wi se: “Na wangren Pɔsin de we de gi lɔ ɛn we de jɔj.” Da pɔsin de na Jiova. So Jems bin aks se: “Udat na yu fɔ de jɔj yu neba?” (Jems 4:​12; Romans 14:​1-4) Dɔn bak, bikɔs wi nɔ pafɛkt, i kin izi fɔ lɛ wi nɔ jɔj fia wan. Bɔku abit dɛn ɛn rizin dɛn we kin mek pipul dɛn du sɔntin kin ambɔg di we aw wi de si wi kɔmpin mɔtalman. Sɔm pan dɛn abit ɔ rizin dɛn ya na fɔ tek wan pɔsin bɛtɛ pas di ɔda pɔsin, fɔ fil bad bikɔs dɛn nɔ trit wi fia wan, fɔ jɛlɔs, ɛn fɔ tink se na wi nɔmɔ de du wetin rayt. Ɔda tin dɛn de we wi nɔ ebul fɔ du, ɛn we wi tink bɔt dat, i fɔ mek wi nɔ kwik  fɔ fɛn fɔlt pan ɔda pipul dɛn. Wi nɔ ebul fɔ no wetin de na ɔda pipul dɛn at, ɛn wi nɔ no ɔl wetin de apin to ɔda pipul dɛn. So udat na wi fɔ jɔj di rizin we mek wi brɔda ɛn sista dɛn du sɔntin ɔ fɔ fɛn fɔlt pan wetin dɛn de du we dɛn de sav Gɔd? I go fayn fɔ falamakata Jiova bay we wi de luk fɔ di gud abit dɛn we wi brɔda ɛn sista dɛn gɛt pas fɔ de tink bɔt dɛn mistek dɛn!

15. Wetin di wan dɛn we de wɔship Gɔd nɔ fɔ du to dɛn kɔmpin dɛn? Wetin mek?

¹⁵ Yu tink se i fayn fɔ jɔj wi fambul dɛn? I sɔri fɔ no se na insay di famili usay wi de fil se na de pis fɔ de, na de dɛn de jɔj pipul dɛn pas ɛni ɔdasay. I kɔmɔn fɔ yɛri bɔt maredman dɛn, mareduman dɛn, ɔ mama ɛn papa dɛn we de tɔk bad tin to pipul dɛn na dɛn famili ɔ trit dɛn bad  ɔltɛm. Bɔt di wan dɛn we de wɔship Jiova nɔ fɔ yuz bad wɔd dɛn, baktɔk, ɔ trit dɛn kɔmpin dɛn bad. (Ɛfishians 4:​29, 31; 5:​33; 6:​4) Wi fɔ fala Jizɔs in advays fɔ “lɛf fɔ jɔj” ɛn fɔ “lɛf fɔ kɔndɛm” ivin we wi de na os. Mɛmba se fɔ trit ɔda pipul dɛn lɛk aw Jiova de trit wi na wan we fɔ sho jɔstis. Ɛn wi Gɔd nɔ ash ɔ wikɛd we i kam to aw i de trit wi. Bifo dat, i “rili lɛk” di wan dɛn we lɛk am. (Jems 5:​11) Dat na wɔndaful ɛgzampul fɔ wi fɔ falamakata!

16, 17. (a) Wetin Jiova de ɛkspɛkt di ɛlda dɛn fɔ du? (b) Wetin di ɛlda dɛn go du if pɔsin we sin nɔ sho se i dɔn ripɛnt? Wetin mek?

¹⁶ Ɔlman na di kɔngrigeshɔn nid fɔ sho jɔstis, bɔt na di ɛlda dɛn mɔ gɛt di wok fɔ sho jɔstis. Notis wetin Jiova bin yuz Ayzaya fɔ tɔk bɔt “bigman dɛn” ɔ ɛlda dɛn. I se: “A de tɛl una, wan kiŋ go rul we go waka tret na PAPA GƆD in yay, ɛn bigman dɛn go rul wit jɔstis.” (Ayzaya 32:​1) Fɔ tru, Jiova de ɛkspɛkt di ɛlda dɛn fɔ du dɛn wok wit jɔstis. Aw dɛn go du dat?

¹⁷ Dɛn man dɛn ya no se jɔstis, ɔ fɔ du wetin rayt, min se dɛn fɔ mek di kɔngrigeshɔn klin ɔltɛm. Sɔntɛnde, di ɛlda dɛn kin nid fɔ jɔj kes dɛn we gɛt fɔ du wit siriɔs sin. We dɛn de du dat, dɛn de mɛmba se Gɔd in jɔstis fɔ mek dɛn sho sɔri-at ɛnitɛm nid de fɔ du dat. So dɛn de tray fɔ ɛp di pɔsin fɔ ripɛnt. Bɔt wetin dɛn go du if dɛn tray fɔ ɛp di pɔsin we sin bɔt i nɔ gri fɔ sho se i rɛdi fɔ ripɛnt? Bikɔs ɔf pafɛkt jɔstis, Jiova in Wɔd se: “Una pul di pɔsin we wikɛd kɔmɔt midul una.” Dat min se dɛn fɔ pul am kɔmɔt na di kɔngrigeshɔn. (1 Kɔrintians 5:​11-13; 2 Jɔn 9-11) Di ɛlda dɛn at kin pwɛl we dɛn de du dat, bɔt dɛn no se i impɔtant fɔ mek di kɔngrigeshɔn klin. Pan ɔl dat, dɛn kin op se wande wande, di pɔsin we sin go ripɛnt ɛn kam bak na di kɔngrigeshɔn.—Lyuk 15:​17, 18.

18. Wetin ɛlda dɛn fɔ mɛmba we dɛn de yuz di Baybul fɔ gi advays to ɔda pipul dɛn?

 ¹⁸ Fɔ lɛ ɛlda dɛn du dɛn wok wit jɔstis, dɛn go nid bak fɔ yuz di Baybul fɔ gi advays ɛnitɛm we nid de. Ɛlda dɛn nɔ de luk fɔ ɔda pipul dɛn mistek dɛn. Ɛn dɛn nɔ de yuz ɛni chans we dɛn gɛt fɔ kɔrɛkt ɔda pipul dɛn. Bɔt wi kɔmpin Kristian go “go na di rɔng say bifo i no dat.” We ɛlda dɛn mɛmba se Gɔd in jɔstis nɔ wikɛd ɛn i de sho sɔri-at, dat go mek dɛn “tek tɛm tray fɔ ajɔst da kayn pɔsin de.” (Galeshians 6:​1) So ɛlda dɛn nɔ go tɔk pan pɔsin we sin ɔ yuz ash wɔd dɛn pan am. Bifo dat, we dɛn tek tɛm advays di pɔsin wit lɔv, dat go ɛnkɔrej di pɔsin. Ivin we nid de fɔ lɛ di ɛlda dɛn tɛl pɔsin klia wan wetin go apin to am fɔ wetin i du we nɔ fayn, dɛn kin mɛmba se di pɔsin we sin na wan pan Jiova in ship dɛn. * (Lyuk 15:​7) We ɛlda dɛn advays ɔ kɔrɛkt pɔsin wit lɔv, dat go mɔs mek am izi fɔ dɛn fɔ ɛp da pɔsin de.

19. Us tin dɛn ɛlda dɛn kin disayd fɔ du? Wetin dɛn fɔ yuz we dɛn de disayd?

¹⁹ Bɔku tɛm, di ɛlda dɛn go nid fɔ disayd sɔm tin dɛn we go afɛkt dɛn brɔda ɛn sista dɛn. Fɔ ɛgzampul, tɛm dɛn kin de we ɛlda dɛn kin mit fɔ si if ɔda brɔda dɛn na di kɔngrigeshɔn kwalifay fɔ bi ɛlda ɔ ministerial savant. Di ɛlda dɛn no se i impɔtant fɔ lɛ dɛn du tin fia wan. We dɛn want fɔ disayd fɔ no udat fɔ pik, dɛn de fala wetin Gɔd in Wɔd se dɛn fɔ du, dɛn nɔ de du am bikɔs ɔf aw dɛn de fil. Da we de dɛn nɔ go “disayd bifo [dɛn] no di tru ɔ tek wan pɔsin bɛtɛ pas ɔda pɔsin.”—1 Timoti 5:​21.

20, 21. (a) Wetin ɛlda dɛn fɔ tray tranga wan fɔ bi? Wetin mek? (b) Wetin ɛlda dɛn go du fɔ ɛp “di wan dɛn we dɛn at pwɛl”?

 ²⁰ Ɔda we dɛn de bak we ɛlda dɛn kin falamakata Gɔd in jɔstis. Afta we Ayzaya bin tɔk se ɛlda dɛn go du dɛn wok “wit jɔstis,” i kɔntinyu fɔ se: “Ich ɛn ɛvri wan go bi lɛk ples fɔ ayd wɛn briz de blo, ples fɔ ayd we ebi briz de blo, lɛk watasay dɛn we de rɔn na dray ples, lɛk di shed we rɔk de mek usay di land dɔn taya.” (Ayzaya 32:​2) Ɛlda dɛn fɔ tray tranga wan fɔ bi pipul dɛn we de ɛnkɔrej dɛn brɔda ɛn sista dɛn ɛn mek dɛn fil fayn.

²¹ Tide, bɔku pipul dɛn nid ɛnkɔrejmɛnt bikɔs ɔf di prɔblɛm dɛn we de mek dɛn at pwɛl. Ɛlda dɛn, wetin una go du fɔ ɛp “di wan dɛn we dɛn at pwɛl”? (1 Tɛsalonians 5:​14) Una lisin to dɛn; ɛn we una de du dat, una tray fɔ no aw dɛn de fil. (Jems 1:​19) Dɛn go nid fɔ tɛl pɔsin we  dɛn trɔst di tin we de mek dɛn “wɔndrin tumɔs.” (Prɔvabs 12:​25) Mek lɛ dɛn no se Jiova ɛn dɛn brɔda ɛn sista dɛn na di kɔngrigeshɔn lɛk dɛn, valyu dɛn, ɛn want dɛn fɔ de na di kɔngrigeshɔn. (1 Pita 1:​22; 5:​6, 7) Dɔn, yu kin pre wit dɛn ɛn fɔ dɛn. We dɛn kayn pipul dɛn de kin yɛri we ɛlda dɛn de pre fɔ dɛn frɔm dɛn at, dat kin rili ɛnkɔrej dɛn. (Jems 5:​14, 15) Di Gɔd we lɛk jɔstis nɔ go fɔgɛt ɔl wetin una de du fɔ ɛp di wan dɛn we dɛn at pwɛl.

22. Us we dɛn wi go falamakata Jiova in jɔstis? Wetin go apin we wi du dat?

²² Fɔ tru, wi go kɔntinyu fɔ kam nia Jiova mɔ ɛn mɔ bay we wi kɔntinyu fɔ falamakata in jɔstis! Wi de sho se wi de falamakata Gɔd in jɔstis bay we wi liv akɔdin to wetin rayt na in yay, we wi prich to pipul dɛn di gud nyuz we go sev dɛn layf, ɛn we wi pe atɛnshɔn pan di gud tin dɛn we ɔda pipul dɛn de du ɛn nɔ pe atɛnshɔn pan dɛn mistek dɛn. Ɛlda dɛn, una go sho se una de falamakata Jiova in jɔstis bay we una de mek di kɔngrigeshɔn klin, we una yuz di Baybul fɔ gi fayn advays, we una disayd fia wan, ɛn we una ɛnkɔrej di wan dɛn we dɛn at pwɛl. Jiova go mɔs gladi as i de si in pipul dɛn na di wɔl de tray tranga wan fɔ “trit [dɛn] kɔmpin fia wan” as dɛn de sav am!