1-3. (a) Fu san ede wi de na paiman na Yehovah? (b) San a lobi-ati Frulusuman fu wi e aksi fu wi?

KON meki wi taki dati yu fasi na ini wan sipi di e sungu. Na a momenti di yu e prakseri taki yu o dede now, dan wan man e hari yu puru fu kibri yu libi. Yu ati sidon te a sma di kon puru yu na ini a nowtu e tyari yu go na wan presi pe ogri no kan miti yu, aladi a e taki: „No frede, yu bun dyaso”! Yu ben o firi leki yu de na paiman na so wan sma, a no so? Te yu luku en bun, dan na a sma dati meki taki yu de na libi ete.

² Na difrenti fasi a tori disi e agersi san Yehovah du gi wi. A no de fu taki dati wi de na paiman na en. Iya, na en ben sorgu gi a lusu-paiman di meki taki wi kan kon fri fu a makti fu sondu nanga dede. Wi e firi bun fu di wi sabi taki wi e kisi pardon fu wi sondu èn taki wi sa kisi kibri fu têgo efu wi tan poti bribi na ini a tumusi warti ofrandi dati (1 Yohanes 1:7; 4:9). Soleki fa wi si na ini kapitel 14, dan a lusu-paiman na a moro prenspari fasi fa Yehovah sori lobi nanga retidu. San wi musu du fu dati ede?

³ A fiti fu luku san a lobi-ati Frulusuman fu wi e aksi fu wi. Nanga yepi fu a profeiti Mika, Yehovah e taki: „A fruteri yu san bun, o sma fu grontapu. Ma san Yehovah e aksi fu yu baka, leki fu du san reti èn fu lobi switifasi èn fu sori sakafasi te yu e waka nanga yu Gado?” (Mika 6:8) Luku taki wan fu den sani di Yehovah e aksi fu wi na fu „du san reti”. Fa wi kan du dati?

4. Fa wi du sabi taki Yehovah e fruwakti fu wi taki wi e libi akruderi den regtfardiki markitiki fu en?

⁴ Yehovah e fruwakti taki wi e gebroiki den markitiki di a poti gi wi fu luku san bun noso fowtu. Den markitiki fu en de reti èn regtfardiki. Sobun te wi e libi akruderi den markitiki dati, dan wi e sori taki wi e tan suku retidu nanga regtfardikifasi. „Leri fu  du bun, suku retidu”, na so Yesaya 1:17 e taki. A Wortu fu Gado e gi wi a deki-ati fu „suku regtfardikifasi” (Sefanya 2:3). A e gi wi deki-ati tu fu „tron wan nyun sma, so taki [wi] kan kon de soleki fa Gado wani, akruderi trutru regtfardikifasi” (Efeisesma 4:24). Wan sma di e sori tru regtfardikifasi, noso tru retidu, e koti pasi gi ogridu, gi sani di no krin, èn gi hurudu, fu di den sani disi no de santa.​—Psalm 11:5; Efeisesma 5:3-5.

5, 6. (a) Fu san ede a no de wan hebi gi wi fu libi akruderi den markitiki fu Yehovah? (b) Fa Bijbel e sori taki a suku di wi e suku regtfardikifasi na wan sani di wi musu tan du?

⁵ Wi e si en leki wan hebi fu libi akruderi den regtfardiki markitiki fu Yehovah? Nôno. Te wi ati e pusu wi fu dini Yehovah, dan wi no sa si den markitiki fu en leki wan hebi. Fu di wi lobi a Gado fu wi èn fu di wi lobi a fasi fa a de, meki wi wani libi na wan fasi di e plisi en (1 Yohanes 5:3). Memre taki Yehovah „lobi te sma e du sani na wan regtfardiki fasi” (Psalm 11:7). Efu wi wani sori a retidu noso regtfardikifasi fu Gado trutru, dan wi musu leri fu lobi den sani di Yehovah lobi, èn fu abi bita-ati gi den sani di Yehovah no lobi kwetikweti.​—Psalm 97:10.

⁶ A no makriki gi sondu libisma fu suku regtfardikifasi. Wi musu puru na owru fasi fa wi ben de nanga den sondu di wi ben gwenti du èn wi musu tron wan nyun sma. Bijbel e taki dati a fasi fa wi de „e meki kon nyun” nanga yepi fu soifri sabi (Kolosesma 3:9, 10). Den wortu „e meki kon nyun” e sori taki wi musu tan du muiti fu tron nyun sma èn dati na wan sani di wi musu du doronomo. Awinsi o furu muiti wi e du fu du san reti, toku a e pasa son tron taki den sondu firi fu wi e meki taki wi e denki, taki, noso du sani di no bun.​—Romesma 7:14-20; Yakobus 3:2.

7. Fa wi musu si wisrefi te wi e misi fu tan suku regtfardikifasi?

⁷ Fa wi musu si wisrefi te wi e misi fu tan suku regtfardikifasi? A no de fu taki dati wi no wani du leki den sondu fu wi no de so seryusu. Na a srefi ten wi no musu gi abra noiti fu di wi e prakseri kande taki den fowtu fu wi e meki taki wi no fiti fu dini Yehovah moro. A Gado fu wi di abi so furu bun-ati ben seti sani fu meki sma di abi berow trutru, kon bun baka nanga en. Prakseri  den wortu fu Yohanes di e trowstu wi: „Mi e skrifi unu den sani disi, so taki unu no du wan sondu.” Ma dan a e taki fa sani de trutru: „Ma toku, efu wan sma e du wan sondu [fu di wi kisi sondu fu wi afo], dan wi abi wan yepiman na a Tata, dati na Yesus Krestes” (1 Yohanes 2:1). Iya, Yehovah ben gi wi a lusu-paiman fu Yesus, so taki wi kan dini En na wan fasi di fiti, awinsi wi na sondu sma. A no de fu taki dati a sani disi e pusu wi fu du muiti fu plisi Yehovah, a no so?

8, 9. Fa a preiki di wi e preiki a bun nyunsu e sori a retidu fu Gado?

⁸ Wi kan du san reti. Te yu luku en bun, dan wi kan du muiti fu sori a retidu fu Gado, fu di wi e wroko fayafaya fu preiki a bun nyunsu fu Gado Kownukondre gi tra sma. San a retidu fu Yehovah abi fu du nanga a bun nyunsu?

⁹ Yehovah no sa tyari wan kaba kon na a ogri sistema disi sondro fu warskow sma fosi. Na ini wan profeititori, Yesus ben taki fu sani di ben o pasa na a ten fu a kaba. A ben taki: „Na ini ala kondre a bun nyunsu musu preiki fosi” (Markus 13:10; Mateyus 24:3). Taki Bijbel e gebroiki a wortu „fosi” wani taki dati tra sani o pasa baka te a preikiwroko du na heri grontapu. Wan fu den sani dati na a bigi banawtu di sa tyari pori kon gi den ogriwan, aladi a sa opo a pasi gi wan regtfardiki nyun grontapu (Mateyus 24:14, 21, 22). Fu tru, nowan sma kan taki nanga reti dati a fasi fa Yehovah e handri nanga den ogriwan no de regtfardiki. Fu di Yehovah e sorgu taki a warskow boskopu fu en e meki bekènti, dan a e gi den ogriwan nofo okasi fu kenki den fasi fu den, so taki den no abi fu kisi pori.​—Yona 3:1-10.

10, 11. Fa wi e sori a retidu fu Gado te wi e yepi fu preiki a bun nyunsu?

¹⁰ Fa wi e sori a retidu fu Gado te wi e preiki a bun nyunsu? Na a fosi presi, a fiti fu du san wi man fu yepi trawan fu kisi frulusu. Prakseri na agersitori baka fu a puru di sma puru yu na ini wan sipi di e sungu. Now di sma hari yu poti na ini wan pikin boto, dan a no de fu taki dati yu wani yepi den trawan di de na ini a watra ete, a no so? So a de tu taki wi abi wan frantwortu fu yepi den wan di e feti ete fu komoto na ini den „watra” fu na  ogri grontapu disi. A tru taki furu sma no wani arki a boskopu fu wi. Ma solanga leki Yehovah e tan sori pasensi, wi abi a frantwortu fu gi den na okasi fu sori taki den „abi berow”, so taki den kan kisi frulusu tu.​—2 Petrus 3:9.

¹¹ Te wi e preiki a bun nyunsu gi ala sma di wi e miti, dan wi e sori retidu na wan tra tumusi prenspari fasi: wi e sori taki wi no e teki sma sei. Memre taki „Gado no e teki sma sei, ma na mindri ala pipel a sma di e frede en èn di e du san de regtfardiki, bun na en ai” (Tori fu den Apostel 10:34, 35). Efu wi wani sori retidu neleki En, dan wi no musu krutu sma na fesi. Na presi fu dati, wi musu prati a bun nyunsu nanga ibriwan sma di wi e miti. A no abi trobi efu sma blaka noso weti, sortu posisi den abi na ini grontapu, noso o furu moni den abi. Na a fasi dati wi e gi ala sma di wani arki na okasi fu yere a bun nyunsu èn fu handri akruderi a nyunsu dati.​—Romesma 10:11-13.

12, 13. (a) Fu san ede wi no musu de esi fu krutu tra sma? (b) San Yesus ben wani leri wi di a taigi wi fu „no krutu sma moro” èn fu no „suku fowtu na sma moro”? (Luku a futuwortu sosrefi.)

¹² Wi kan du san reti sosrefi fu di wi e libi nanga trawan soleki fa Yehovah e libi nanga wi. A makriki srefisrefi fu krutu trawan fu di wi e luku den fowtu fu den tumusi fini èn fu di wi e denki takru fu den. Ma suma fu wi ben sa wani taki Yehovah luku wi tumusi fini te wi e du sani gi en, noso te wi e meki fowtu, èn taki a no sori sari-ati gi wi? Dati a no a fasi fa Yehovah e libi nanga wi. A psalm skrifiman ben taki: „Efu na fowtu yu ben musu luku, o Yah, o Yehovah, dan suma ben o man tan tanapu?” (Psalm 130:3) A Gado fu wi e du san reti èn a abi sari-ati. Fu tru, wi breiti taki a no e tan memre den fowtu di wi e meki, a no so? (Psalm 103:8-10) Fa wi musu libi nanga trawan dan?

¹³ Efu wi e frustan taki Gado e sori sari-ati tu te a e du san reti, dan wi no sa de esi fu krutu trawan gi sani di no abi noti fu du nanga wi, noso gi sani di no de so prenspari. Na ini a Bergitaki, Yesus ben warskow: „No krutu sma moro, so taki trawan no krutu unu” (Mateyus 7:1). Soleki fa Lukas e sori, dan Yesus ben taki  moro fara: „No suku fowtu na sma moro, dan sma no sa suku fowtu na unu” (Lukas 6:37). * Yesus ben sori taki a sabi dati sondu libisma abi a gwenti fu krutu trawan. Ibriwan fu den arkiman fu en di ben abi a gwenti fu krutu trawan tumusi hebi ben musu tapu wantewante.

14. Fu san ede wi ’no musu krutu trawan moro’?

¹⁴ Fu san ede wi ’no musu krutu trawan moro’? We, wan sani di wi musu hori na prakseri na taki wi no abi ala makti. A disipel Yakobus e memre wi: „Wán sma nomo de di e meki wet èn wán sma nomo na krutuman”, èn dati na Yehovah. Dati meki a fiti taki Yakobus e aksi: „Suma na yu taki yu e krutu tra sma?” (Yakobus 4:12; Romesma 14:1-4) Boiti dati, dan den sondu firi fu wi e meki taki a makriki gi wi fu krutu wan afersi na wan fowtu fasi. Kande wi na sma di e krutu sani na fesi, di abi bigimemre, di e dyarusu, noso di e prakseri taki wi no e meki fowtu noiti. Den sani disi kan meki taki wi no e si tra libisma na wan yoisti fasi. Wi abi tra swakifasi tu, èn te wi e prakseri fu den sani disi, dan dati sa yepi wi fu no de esi fu suku fowtu na tra sma. Wi no man luku go na ini sma ati, neleki fa wi no man sabi finifini fa a libi fu wan sma de. Sobun, suma na wi fu go taki dati wan brada noso wan sisa fu wi abi takru prakseri, noso fu go krutu den muiti di den e du na ini a diniwroko fu Gado? A ben sa de moro bun efu wi ben sa du leki Yehovah fu di wi e luku den bun sani na ini wi brada nanga sisa, na presi fu luku den fowtu fu den nomo!

15. Sortu fasi fu taki èn sortu fasi fu libi nanga trawan, no fiti gi anbegiman fu Gado? Fu san ede dati de so?

¹⁵ Ma fa a de nanga sma na ini wi osofamiri dan? A sari fu si taki na oso kon tron wan presi pe sma e krutu makandra moro leki na iniwan tra presi, aladi na oso ben musu de a moro switi presi gi wi. Furu tron wi e yere fu masra, wefi, noso papa nanga  mama di grofu èn di e „krutu” den memre fu na osofamiri fu den doronomo, fu di den e tan kosi noso fon den. Ma krasi wortu, spotu, nanga sani di sma e du fu gi trawan skin-ati, no fiti anbegiman fu Gado (Efeisesma 4:29, 31; 5:33; 6:4). A rai di Yesus gi fu „no krutu sma moro” èn fu „no suku fowtu na sma moro” e fiti srefi te wi de na oso. Memre taki fu du san reti wani taki dati wi e libi nanga trawan leki fa Yehovah e libi nanga wi. Noiti a Gado fu wi no e du grofu noso ogri-ati sani nanga wi. Na presi fu dati, a „lobi sma trutru”, spesrutu den wan di lobi en (Yakobus 5:11). Dati na wan tumusi moi eksempre di wi kan waka na baka!

16, 17. (a) San Yehovah e fruwakti fu owruman? (b) San musu pasa te wan sondari no e sori berow trutru èn fu san ede?

¹⁶ Wi alamala abi a frantwortu fu du san reti, ma owruman  na ini a Kresten gemeente abi wan spesrutu frantwortu na ini a pisi tori disi. Luku a profeititori na ini Yesaya di e taki fu „granman”, noso owruman. Drape skrifi: „Luku! Wan kownu sa tiri na ini regtfardikifasi srefi; èn den granman sa tiri leki granman fu retidu srefi” (Yesaya 32:1). Iya, Yehovah e fruwakti taki owruman e du sani di reti te den e du sani gi trawan. Fa den kan du dati?

¹⁷ Den man disi di lepi na yeye fasi, sabi heri bun taki efu den wani taki a gemeente tan krin, dan den musu du san reti, noso san de regtfardiki. Son tron owruman abi fu krutu wan afersi te wan sma du wan seryusu sondu. Te den e du dati, dan den e memre taki den wani sori retidu na a srefi fasi leki fa Yehovah e sori dati. Sobun, den sa suku wan fasi fu sori sari-ati gi sma pe dati kan. Na a fasi dati den e suku fu yepi a sma di du a sondu, fu kisi berow. Ma san den musu du efu a sondari no e sori berow trutru, aladi a kisi yepi na so wan lobi-ati fasi? A Wortu fu Yehovah, di e sori wi san na trutru retidu e sori taki wan seryusu sani musu pasa: „Puru na ogriman na un mindri.” Dati wani taki, puru a sma na ini a gemeente (1 Korentesma 5:11-13; 2 Yohanes 9-11). Den owruman e sari te den musu du so wan sani, ma den sabi taki den musu du dati fu kibri den sma na ini a gemeente. Na so fasi den sma na ini a gemeente kan tan tyari densrefi na wan bun fasi èn a gemeente kan tan krin na yeye fasi. Toku den e howpu taki wan dei sa kon pe a sondari sa kisi ensrefi èn drai kon baka na a gemeente.​—Lukas 15:17, 18.

18. San owruman e hori na prakseri te den e gebroiki Bijbel fu gi trawan rai?

¹⁸ Te owruman e suku fu du san reti te den e du sani gi trawan, dan dati wani taki tu dati den e gi rai nanga yepi fu Bijbel te dati de fanowdu. A no de fu taki dati owruman no e go suku fowtu na sma. Den no e piri-ai gi sma gi ala pikinpikin sani tu. Ma wan brada noso sisa kan „meki wan fowtu bifo a sabi” dati srefi. Owruman di wani sori retidu leki fa Gado e sori dati, e hori na prakseri taki den no kan handri na wan ogri-ati fasi nanga sma, noso na wan fasi di e sori taki den no abi firi gi sma.  Ma „na wan safri-ati fasi” den sa pruberi fu „tyari a sma kon na tapu a reti pasi baka” (Galasiasma 6:1). Dati meki owruman no sa kosi wan sma di meki wan fowtu, noso taki grofu nanga a sma dati. Na presi fu dati, a de so taki rai di gi na wan lobi-ati fasi e gi deki-ati na a sma di e kisi a rai dati. Son leisi owruman musu gi trawan piri-ai na wan fasi di e sori krin san kan de a bakapisi fu a fowtu fasi fa den e tyari densrefi. Ma srefi na den okasi dati den owruman e hori na prakseri taki wan brada noso sisa di meki wan fowtu na wan skapu fu na ipi fu Yehovah (Lukas 15:7). * Te wan sma di meki wan fowtu man si krin taki wan owruman e gi en rai noso piri-ai fu di a lobi en trutru, dan dati kan meki a kon moro makriki gi so wan sma fu kon baka tapu a reti pasi.

19. Sortu bosroiti owruman musu teki son leisi? San musu yepi den fu teki den yoisti bosroiti?

¹⁹ Furu tron owruman musu teki bosroiti di abi krakti tapu a libi fu tra brada nanga sisa. Leki eksempre, tapu spesrutu momenti na ini a yari owruman e kon makandra fu luku efu tra brada de na ini a gemeente di doro den markitiki fu tron owruman noso dinari ini a diniwroko. Den owruman sabi o prenspari a de fu no teki sma sei. Den e meki den markitiki fu Gado tiri den te den o teki den sortu bosroiti dati; den no sa frutrow nomo tapu a fasi fa densrefi e firi. Na a fasi dati den no e ’krutu sma fosi den sabi a fini fu wan tori èn te den e du sani, den no musu sori taki den lobi a wan sma moro a trawan’.​—1 Timoteyus 5:21.

20, 21. (a) Sortu sma owruman e suku fu de? Fu san ede? (b) San owruman kan du fu yepi „den sili di brokosaka”?

²⁰ Owruman e sori a retidu fu Gado na difrenti tra fasi tu.  Baka di Yesaya taki dati owruman ben o dini „fu retidu srefi”, dan a e taki moro fara: „Ibriwan [fu den] musu buweisi fu de leki wan kibripresi gi a winti èn wan kibripresi gi a sibibusi, leki watra di e lon na ini wan kondre sondro watra, leki a kowrupe fu wan bigi klepston di tanapu leti-opo na ini wan kondre di drei” (Yesaya 32:2). Dati meki owruman e du muiti fu de sma di e trowstu den brada nanga sisa fu den, èn di e gi den kowru-ati.

²¹ Na ini a ten disi, furu sma abi deki-ati fanowdu fu di someni problema de di kan meki sma lasi-ati. San unu leki owruman kan du fu yepi „den sili di brokosaka”? (1 Tesalonikasma 5:14) Arki den na wan fasi di e sori taki yu e suku fu frustan fa den e firi (Yakobus 1:19). Kande den abi wan sma fanowdu di den kan frutrow, wan sma nanga suma den kan taki fu den „furu broko-ede” di den abi (Odo 12:25). Sori den taki den de  fanowdu trutru, taki sma e warderi den, èn taki sma lobi den. Iya, meki den si taki dati na a fasi fa Yehovah, nanga den brada nanga sisa fu den e prakseri (1 Petrus 1:22; 5:6, 7). Boiti dati, yu kan begi makandra nanga den, èn yu kan begi gi den tu na tra okasi. Te den e yere fa wan owruman e begi gi den komoto fu en ati, dan dati kan trowstu den trutru (Yakobus 5:14, 15). A Gado fu retidu sa memre den lobi-ati muiti di yu e du fu yepi den wan di e firi brokosaka.

22. Na sortu fasi wi kan sori a srefi retidu leki Yehovah? San o de a bakapisi?

²² Fu tru, wi e kon moro krosibei na Yehovah te wi e sori a retidu fu en! Te wi e hori wisrefi na den reti markitiki fu en, te wi e fruteri tra sma a bun nyunsu di kan meki den kisi libi, èn te wi e du muiti fu si den bun sani fu trawan na presi fu luku den fowtu fu den nomo, dan wi e sori a srefi retidu leki di fu Gado. Owruman, te unu e kibri a gemeente so taki a tan krin, te unu e gi bun rai nanga yepi fu Bijbel, te unu e teki bosroiti sondro fu teki sma sei, èn te unu e gi deki-ati na den wan di lasi-ati, dan unu e sori a retidu fu Gado. A no de fu taki dati a e gi Yehovah bigi prisiri te a e luku komoto fu hemel fu si fa en pipel e wroko tranga fu „du san reti”, aladi den e waka nanga a Gado fu den!