1, 2. Yihooway laappuntta gallassawu halchchidobay aybee, qassi Xoossaa aadhdhida eratettaa yigganaadan oottiyaabay he gallassaa doomettan aybi merettidee?

USUPPUNTTA meretaa gallassi merettida ubbaappe aadhdhiya asay qoppennan iita kawushsha kawuyyiis. Yihooway asaa gujjin, ‘I medhdhido ubbabay daro loˈˈo’ yaagiis. (Doomettaabaa 1:31) SHin laappuntta gallassaa doomettan, Addaameenne Hewaana Seexaanaa kaallidi makkalidosona. Eti nagaranchcha gididosonanne bantta bolli hayquwaa ehiidosona.

² Hegee Yihooway laappuntta gallassawu halchchido halchchuwaa xubbiyaaba milatana danddayees. He gallassay, appe kasetiya usuppuntta gallassaadan shaˈan qoodettiya laytta gidanaadan qofettiis. He gallassay geeshsha gidiyoogaa Yihooway yootiis, qassi he gallassaa wurssettan kumetta saˈay gannate gidin wottiyoobi baynna asay an kumana. (Doomettaabaa 1:28; 2:3) SHin he qohiya makkalaappe simmin, hegee waani polettanee? Xoossay waatanee? Hegee Yihoowa aadhdhida eratettaa yigganaadan oottiya hara aybippenne aadhdhennan aggenna.

3, 4. (a) Yihooway Edenen denddida makkalaara gayttidaagan oottidobay A aadhdhida eratettaa qonccissiya maalaalissiyaaba gidiyoy aybissee? (b) Nuuni Yihoowa aadhdhida eratettaa xannaˈiyo wode, nu huuphiyaa ziqqi oottiyoogee ay hassayanaadan denttettana koshshii?

³ Sohuwaara, Yihooway Edenen makkalidaageetu bolli pirddiis, qassi eta gaasuwan doommida qohuwaa xayssanawu I halchchido maalaaliyaabawu xeeraa bessiis. (Doomettaabaa 3:15) Edeneppe doommidi asay deˈido shaˈan qoodettiya layttawunne sinttappekka daro wodiyawu goˈˈiyaabaa Yihooway adussi qoppidi halchchiis. Hegee Geeshsha Maxaafaa nabbabiya uri ba deˈo laytta ubban xannaˈananne wotti dentti qoppana danddayiyo, akeekanawu metennaba gidikkonne, keehi gitaba. Hegaa bollikka, Yihoowa halchchoy polettennan mule attenna. I iitatetta ubbaa, nagaraanne hayquwaa xayssana. Yihooway  ammanettidaageeta wottiyoobi baynna asa oottana. Hageeti ubbay laappuntta gallassay wuranaappe kase polettana; yaatiyo gishshawu, he ubbabay hanikkonne Yihooway saˈawunne asawu halchchido ba halchchuwaa likke ba keerido wodiyan polana!

⁴ He aadhdhida eratettay hoola gaanaadan oottiyoogee qoncce. Kiitettida PHawuloosi hagaadan giis: ‘Abeet, Xoossaa aadhdhida eratettay keehi ciimma!’ (Roome 11:33, NW) Nuuni Xoossaa aadhdhida eratettaa dumma dumma macarata xannaˈiyo wode, nu huuphiyaa ziqqi oottiyoogee Yihoowa gita aadhdhida eratettaappe erana danddayiyoobay keehi guutta gidiyoogaa akeekanaadan nuna denttettana koshshees. (Iyyooba 26:14) Koyruwan, ha maalaalissiya eeshshaa birshshettaa ane beˈoos.

5, 6. Eraynne aadhdhida eratettay aybin gayttiyoonaa, qassi Yihoowa eray ay keena daroo?

⁵ Aadhdhida eratettay eraara issi mala gidenna. Komppiyutereti keehi daro eraa oyqqana danddayoosona, shin oonikka eta aadhdhida eranchcha gees giidi qoppana danddayokko. Gidikkonne, eraynne aadhdhida eratettay gaytotettay deˈiyoobata. (Leemiso 10:14) Leemisuwawu, neeni wolqqaama harggiyaa harggada xalettanawu neeyyo loˈˈo zore koshshiyaakko, xaliyaabaa guuttaa eriya woy mule erenna uraa zoriyaa oychchuutee? Mule oychchakka! Hegaa gishshawu, tumu aadhdhida eratettawu suure eraa koshshees.

⁶ Yihoowayyo zawi baynna eray deˈees. I ‘merinaa Kawuwaa’ gidiyo gishshawu, A xalaalay merinaappe merinawu deˈees. (1 Ximootiyoosa 1:17) Qassi zawi baynna he layttatun I ubbabaa erees. Geeshsha Maxaafay hagaadan gees: “Nuuni oottiyoobaa wochchiya Xoossaa sinttan ubbabaikka beettiyoogaappenne qoncciyan de7iyoogaappe attin, a aifiyan geemmiya mereti aibinne baawa.” (Ibraawe 4:13; Leemiso 15:3) Yihooway Medhdhidaagaa gidiyo gishshawu I medhdhidobaa loytti akeekees; qassi I asay oottiyoobaa ubbaa doomettaappekka beˈiis. I asa ubbaa wozanaa aynne ashshennan qorees. (1 Hanidabaa Odiya 28:9) Nuuni koyiyoobaa dooranaadan oottidi Yihooway nuna  medhdhido gishshawu, nuuni nu deˈuwan loˈˈobaa kuuyiyoogaa I beˈiyo wode ufayttees. I ‘woosaa siyiyaagaa’ gidiyo gishshawu, issi kutti zawi baynna woosaa siyees. (Mazamure 65:2) Qassi Yihoowa hassayay wottiyoobi baynnaagaa gidiyoogee qoncce.

7, 8. Yihooway akeekaanne aadhdhida eratettaa waatidi bessii?

⁷ Yihoowawu deˈiyay eraa xalla gidenna. I hanotati waanidi issoy issuwaara gayttiyaakkokka akeekees; qassi zawi baynnabaappe merettidabaa wurssi erees. I loˈˈobaa iitabaappe, keehi koshshiyaabaa pattennabaappe shaakkidi, yiggeesinne kuuyees. Hegaa bollikka, I qoncciyan beettiyaabaa xallaa gidennan, wozanaa loytti qorees. (1 Sameela 16:7) Hegaa gishshawu, Yihoowayyo eraappe keehi aadhdhiya akeekay deˈees. SHin aadhdhida eratettay he eeshshaappekka keehi xoqqa.

⁸ Aadhdhida eratetta giyoogee koyidobaa polanawu eraanne akeekaa oosuwan peeshshiyoogaa giyoogaa. “Aadhdhida eratettaa” geetettidi birshshettida amarida qaalatu sitta birshshettay Geeshsha Maxaafay koyro xaafettido doonan “koyidobaa poliyo oosuwaa” woy “oosuwan peˈiya aadhdhida eratettaa” giyoogaa. Yaatiyo gishshawu, Yihoowa aadhdhida eratettay qofa xalla gidenna. Hegee oosuwan peeshshin koyidobaa polanaadan oottiyaaba. Yihooway ba gita eraaninne ba ciimma akeekan muletoo keehi loˈˈobaa kuuyidi, nuuni qoppana danddayiyo aybippenne aadhdhiya ogiyan hegaa polees. Tumu aadhdhida eratettay hegaa! Yesuusi, “Aadhdhida eratettai ba oosuwan tuma gididi beettees” yaagidoogee tuma gidiyoogaa Yihooway bessees. (Maatiyoosa 11:19) Yihooway salo gufantton oottidobay A aadhdhida eratettaa loytti qonccissiyaaba.

9, 10. (a) Yihooway bessiyo aadhdhida eratettay ay malee, qassi hegaa I waati bessidee? (b) Yihoowa aadhdhida eratettaa seelee waati qonccissii?

⁹ Keehi maaddiya loˈˈiyaabaa medhdhiya gooba hiillanchchaa oosuwan maalaaletta eray? Hegee maalaaliya aadhdhida eratetta. (Kessaabaa 31:1-3) Hegaa mala aadhdhida eratettawu pulttoynne ooppenne aadhdhida eranchchay Yihoowa. Kawuwaa  Daawiti Yihoowabaa hagaadan giis: “Neeni tana maalaalissiya oorattabaa oottada medhdhido gishshau, taani nena galatais. Ne oosoti maalaalissiyaageeta! Taani qassi hegaa wurssada erais.” (Mazamure 139:14) Nuuni asaa bollaabaa loytti eriyo wode, Yihoowa aadhdhida eratettan keehi maalaalettoos.

¹⁰ Leemisuwawu, ne deˈoy issi seeliyaappe doommiis; ne aawaa zerettay ne aayee phuuphulliyaa seeliyaara gayttiyo wode shahaaray attiis. Sohuwaara, he seelee shaahettiyoogaa doommiis. Neeni 100 triliyoone gidiya seeletuppe merettadasa. Eti ayfiyan beettokkona. Issi gaashe ayfiyaa wottiyo sohuwan 10,000 gidiya erettida seeleti deˈoosona. SHin hegeeti ubbay akeekanawu metiyaagaa keena muttumurettidaba. Issi seelee asi medhdhido ay maashineppe woy ay paabirkkaappekka aaruwan muttumurettidaba. Issi seelee, geliyoonne kiyiyo naagettiya penggeti, issisaappe harasaa efiyaabay, issoy issuwaara haasayiyoobay, wolqqaa pulttoti, paabirkkati, moorettidabaa oliyoonne zaaretti goˈettiyo ogee, qohiyaabaappe bana teqqiyo ogeenne ayyo gidduwan niyukilesiyan kawotetta malabay deˈiyo direttida katama mala gidiyoogaa saynttistteti yootoosona. Hegaa bollikka, issi seelee amarida saate giddon ba mala hara seeliyaa medhdhana danddayees!

11, 12. (a) Biron aayee uluwan tilettida shahaara giddon seeleti shaahettanaadan oottiyaabay aybee, qassi hegee Mazamure 139:16⁠ra waani maayettii? (b) Nuuni “maalaalissiya” ogiyan merettidoogaa asaa guuggee waati bessii?

¹¹ Ubba seeleti issi mala gidennaagee qoncce. Biron aayee uluwan tilettida shahaara giddon seeleti aggennan shaahettidi keehi dumma dummabaa oottoosona. Amaridaageeti nerbbe seeleta gidoosona, harati qassi meqettaa, dibbaa, suuttaa, woy ayfiyaa seeleta. He dummatetta ubbay seeliyaa giddon maxaafan xaafettidaba mala. * Daawiti ayyaanay denttettin Yihoowabaa hagaadan giis: “Yelettibeenna ta bollaa ne aifee be7iis. . . . Ubbati ne mazggafan xaafettidosona.”—Mazamure 139:16.

¹² Bollaa kifiletuppe amaridaageeti keehi muttumurettidaageeta. Leemisuwawu, asaa guuggiyaa ane qoppa. Amarida asati  salo gufantton guuggiyaagaadan keehi muttumurettidabi baawa goosona. Guuggiyan 100 biiloone gidiya nerbbe seeleti deˈoosona, hegee nuuni deˈiyo gaalakisiyan deˈiya xoolinttetu qoodaa keena. He seeleti ubbay shaˈan qoodettiya ogiyan hara seeletuura gayttoosona. Asaa guuggee alamiyan deˈiya laybireeriyan deˈiyaaba ubbaa oyqqana danddayiyoogaanne I oyqqiyoobaa likkana danddayettennaagaa saynttistteti yootoosona. “Maalaalissiya” ogiyan merettida guuggiyaa daro layttawu saynttistteti xannaˈidi I waati oottiyaakko mule akeekana danddayennaagaa yootoosona.

13, 14. (a) Meretan “aadhdhida eranchcha” gidiyoogaa qaacotinne hara meretati waati bessiyoonaa, qassi nuuni eta medhdhidaagaabaa hegaappe ay tamaariyoo? (b) SHararootiyaa keettaa mala meretati “aadhdhida eratettan” merettidosona gaana danddayiyoy aybissee?

¹³ SHin, merettidaban Yihoowa aadhdhida eratettay qonccido leemisotuppe asay issuwaa xalaala. Mazamure 104:24y hagaadan gees: “Abeet GODAU, ne oosoi ai keena daroo! Ne aadhdhida eratettan neeni eta ubbaa medhdhadasa; sa7ai neeni medhdhidoban kumiis.” Nu yuushuwan deˈiya merettida ubbabay Yihoowa aadhdhida eratettaa qonccissees. Leemisuwawu, qaacoy meretan “aadhdhida eranchcha.” (Leemiso 30:24) Qaacoti keehi maalaalissiya ogiyan darajjayettidosona. Issi issi qaacoti guutta meretata mehedan heemmidinne naagidi miyoobaa etappe demmoosona. Hara qaacoti morssati kattaadan diccanaadan oottiyoogan goshshanchchatu mala. Hara daro meretati bantta meretan maalaaliyaabaa oottanaadan merettidosona. Udunxxee paalliyo wode keehi zammaana horoophphillee oottana danddayennabaa oottees. Kafoti issisaappe keehi haahosaa baanawu, leemisuwawu, xoolintteta woy bantta giddon deˈiya kartta malabaa goˈettoosona. Deˈuwan deˈiyaabatubaa xannaˈiyaageeti ha meretati merettido keehi muttumurettida hanotaa xannaˈiyoogan daro layttaa wurssoosona. Ha meretata medhdhida Xoossay keehi aadhdhida eranchcha gidiyoogee qoncce!

¹⁴ Merettidaban qonccida Yihoowa aadhdhida eratettaappe saynisiyaa eranchchati darobaa tamaaridosona. Meretan deˈiyaabati giigido hanotaa kaallidi issibaa medhdhiyo bayomimetiks geetettiya hiillaa eray deˈees. Leemisuwawu, neeni shararootiyaa  keettay loˈˈiyoogaa maalaalettaydda beˈennan waaya aggana. SHin issi manddisee hegee giigido maalaaliya hanotaa qoppees. SHararootee daddiyo shalo malabay hegaa keena birata shubuwaappe keehi mino, ubba qassi xiitee kanttenna maayuwaa daddiyo shaluwaappekka mino. Ay keena minoo? Wolwoluwan moliyaa oyqqiyaageeti goˈettiyo gitiyaa keena shararootiyaa keettaa qoppa. He keettay asaa caaniya horoophphillee paalliyaagaa teqqana danddayees! Ee, Yihooway hegaa mala ubbabaa “aadhdhida eratettan” medhdhiis.

15, 16. (a) Xoolintteti kumido saloy Yihoowa aadhdhida eratettaa waati qonccissii? (b) Yihooway zawi baynna kiitanchchata azaziyo maatay A aadhdhida eratettaa waati qonccissii?

¹⁵ Yihooway salo gufantton oottidobati A aadhdhida eratettaa bessoosona. Nuuni SHemppo 5n amaridabaa xannaˈido xoolintteti saluwan maaran mankkan deˈoosona. Yihooway ba aadhdhida eratettan kessido, “saloti aqiyo higgiyaa” gaasuwan saluwaa xoolintteta gaalakisetun, gaalakiseta kilasttere geetettiya citan, kilasttereta qassi superkilastter geetettiya citan keehi maalaalissiya ogiyan maaran wottiis. (Iyyooba 38:33) Yihooway saluwan deˈiya meretata ‘olanchchatu’ mala giidoogee garamissiyaaba gidenna! (Isiyaasa 40:26) Gidoppe attin, Yihoowa aadhdhida eratettaa loytti qonccissiya olanchchatu mala harabatikka deˈoosona.

¹⁶ Nuuni SHemppo 4n beˈidoogaadan, xeetu miilooniyan qoodettiya olanchcha ayyaana meretata Xoossay azaziyo gishshawu, ayyo ‘olanchchatu Xoossaa Yihoowa’ giyo bonchcho sunttay deˈees. Hegee Yihoowa wolqqaa qonccissees. SHin A aadhdhida eratettaa hegee waati qonccissii? Yihoowaynne Yesuusi oottiyoogaa mule aggi erennaagaa qoppa. (Yohaannisa 5:17) Yaatiyo gishshawu, Ubbaappe Xoqqiya Xoossawu haggaaziya kiitanchchatikka hegaadan ubbatoo oottoosona giidi qoppiyoogee  bessiyaaba. Qassi eti aadhdhida eratettaaninne wolqqan asaappe keehi aadhdhiyoogaa hassaya. (Ibraawe 1:7; 2:7) Gidikkonne, Yihooway he kiitanchchati ubbay “i giyoobaa” poliyoonne ‘A sheniyaa oottiyo’ ufayssiya oosuwaa biilooniyan qoodettiya layttawu ufayssan oottiiddi deˈanaadan oottiis. (Mazamure 103:20, 21) Xoossay keehi maalaaliya aadhdhida eratettan kiitanchchata haariyoogee qoncce!

17, 18. Geeshsha Maxaafay Yihoowa ‘xalaalay aadhdhida eranchcha’ gidiyoogaa yootiyoy aybissee, qassi A aadhdhida eratettay nuuni maalaalettanaadan oottana koshshiyoy aybissee?

¹⁷ Ha naqaashata qoppiyo wode, Yihoowa aadhdhida eratettay aybippenne aadhdhiyoogaa Geeshsha Maxaafay yootiyoogee maalaaliyaaba gidenna. Leemisuwawu, Yihoowa ‘xalaalay aadhdhida eranchcha’ gidiyoogaa Geeshsha Maxaafay yootees. (Roome 16:27) Polo aadhdhida eratettay deˈiyoy Yihoowa xalaalaassa. I tumu aadhdhida eratetta ubbawu pultto. (Leemiso 2:6) Yihooway medhdhido mereta ubbappe Yesuusi aadhdhida eranchcha gidikkonne, I ba aadhdhida eratettan zemppennan aggidi bana ba Aaway azazidobaa yootidoogee hegaassa.—Yohaannisa 12:48-50.

¹⁸ Kiitettida PHawuloosi Yihoowa aadhdhida eratettay keehi dummatiyoogaa waati qonccissidaakko akeeka: “Abeet, Xoossaa duretettay, aadhdhida eratettaynne eray keehi ciimma! A pirddaynne I oottidobay nu akeekaappe keehi darees!” (Roome 11:33, NW) PHawuloosi xiqisiyaa doomettan, “Abeet” giya qaalaa goˈettiyoogan Yihoowa aadhdhida eratettaa keehi nashshiyoogaa bessiis. “Ciimma” geetettida Giriiketto qaalay “xahaa” giyo qaalaarakka gayttidaba. Yaatiyo gishshawu, PHawuloosi yootidobay Yihoowa aadhdhida eratettaa loytti qonccissees. Nuuni Yihoowa aadhdhida eratettan wotti denttidi qoppiyo wode, zawi baynna, wurssettay erettenna ollaa xeelliyoogaa keena keehi ciimmanne ubba nuuni akeekanawu danddayenna keehi aaho milatana danddayees. Hegaa nuuni loytti qonccissiyoogee atto shin aybanne yootana danddayokko. (Mazamure 92:5) Hegee nuuni nuna ziqqi oottanaadan denttettennee?

19, 20. (a) Argganttay Xoossaa aadhdhida eratettawu loˈˈo leemiso gidiyoy aybissee? (b) Yihooway sinttanaabaa akeekana danddayiyoogaa waati bessidee?

 ¹⁹ Sinttappe hananabaa erana danddayiyay Yihoowa xalla gidiyo gishshawu, A ‘xalaalay aadhdhida eranchcha’ giyoogee bessiyaaba. Haahosan deˈiyaabaa xeelliya argganttaa Xoossaa aadhdhida eratettawu leemisodan Yihooway goˈettiyoogaa hassaya. He argganttay 5 kilo giraame deexxees, shin A ayfeti gastta asa ayfetuppe gitatoosona. Argganttay xeetan qoodettiya meetiriyaa, geella daro kilo meetiriyaa xoqqiya sohuwaappe ba oyqqiyo guuttabaa maalaaliya hanotan beˈana danddayees! Yihoowaykka argganttabaa issi wode hagaadan giis: “A aifee, haahuwaappe demmees.” (Iyyooba 39:29) Hegaadan, Yihooway sinttanaabaa, hegeekka ‘haaho’ woykko adussa wodiyaabaa akeekana danddayees!

²⁰ Hegee tuma gidiyoogaa bessiya darobay Geeshsha Maxaafan deˈees. An xeetan qoodettiya hiraagati, woy kasetidi xaafettida taariketi deˈoosona. Olay kaalettanabay, wolqqaama kawotettati denddanaageenne kunddanaagee, haray atto olaa gadaawati olawu goˈettana hiillaykka, issi issitoo xeetan qoodettiya layttaappe kasetidi Geeshsha Maxaafan odettiis.—Isiyaasa 44:25–45:4; Daaneela 8:2-8, 20-22.

21, 22. (a) Yihooway neeni ne deˈuwan oottanabaa kasetidi erees giyoogee bessiyaaba gidennay aybissee? Leemisuwaa yoota. (b) Yihoowa aadhdhida eratettay siiqoy woy qareti baynnaagaa gidennaagaa nuuni waati eriyoo?

 ²¹ Gidoppe attin, hegaa giyoogee neeni ne deˈuwan oottanabaa Xoossay kasetidi erees giyoogee? Qaaday kasetidi kuuyettiis giidi tamaarissiyaageeti ee giidi zaaroosona. SHin, he qofay Yihooway I koyiyoogaadan sinttanaabaa erana danddayenna giyooba gidiyo gishshawu, hegee A aadhdhida eratettaa xaasayiyooba gidees. Leemisuwawu, neeni oogaappenne aaruwan loytta yexxana danddayikko, awudenne yexxana bessees giyoogee? Hegaadan qoppiyoogee eeyyatetta! Hegaadan, Yihoowawu sinttanaabaa kasetidi eriyo abbee deˈikkonne, I ubba wode hegaa goˈettenna. Yaatiyoogee, Yihooway nuuppe mule wotti ekkenna, koyidobaa dooriyo alˈˈo imotaa maara goˈettennaadan oottana danddayees.—Zaarettido Wogaa 30:19, 20.

²² Hegaappekka keehi iitabay, qaaday kasetidi kuuyettiis giyo qofay Yihoowa aadhdhida eratettan siiqoy woy qareti baynnaagaa bessiyaaba gidiyoogaa. SHin hegee tuma gidennaagee qoncce! Geeshsha Maxaafay Yihooway “ba wozanan aadhdhida eranchcha” gidiyoogaa tamaarissees. (Iyyooba 9:4) Assi diddiqiya wozanay baynnaba gidikkonne, Geeshsha Maxaafay issibaa oottanawu denttettiyaabaaranne siiquwaa mala siyettiyaabaara gayttida oonatettaa qonccissanawu darotoo wozanaa goˈettees. Hegaa gishshawu, Yihooway ba hara eeshshatuugaadan, siiqoy denttettin aadhdhida eratettaa bessees.—1 Yohaannisa 4:8.

23. Yihoowa aadhdhida eratettay keehi xoqqa gidiyoogee ay oottanaadan nuna denttettana koshshii?

²³ Yihoowa aadhdhida eratettay ammanettana bessiyaaba gidiyoogee tuma. Hegee nu aadhdhida eratettaappe keehi xoqqa gidiyo gishshawu, Xoossaa Qaalay nuna hagaadan siiquwan zorees: “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana.” (Leemiso 3:5, 6) Ubbabaa eriya nu Xoossaakko kaseegaappe aaruwan shiiqanawu Yihoowa aadhdhida eratettaa ane haˈˈi loytti pilggoos.