1, 2. “Mukanda” muka atusonekela Yehova, kaha mwomwo ika?

 KUTALA uli nakwanuka likumbi watambwile mukanda kufuma kuli mutu wazanga uze atwama kwakusuku tahi? Kutambula mukanda wakufuma kuli mutu twazanga cheji kutwivwisanga kuwaha. Tweji kuwahililanga hakwivwa omwo nayoyela, navyuma ali nakulinga, navize najinyi kukalinga. Echi cheji kulingisanga vatu valipandame, numba tuhu umwe atwama kwakusuku namukwavo.

² Tweji kwivwanga kuwaha chikumanyi hakutambula mukanda wakufuma kuli Kalunga ketu uze twazanga. Eyo, Yehova hakutuhana Mazu enyi Mbimbiliya, chinafwane kwijiva nge natusonekela “mukanda.” Mumukanda kana mukiko atulweza omwo apwa, navyuma alinga, navize ajina kukalinga kulutwe, navyeka. Yehova atuhana Mazu enyi mwomwo asaka tupandame kuli ikiye. Kalunga ketu wamangana chikuma asakwile jila yamwenemwene yakuhanjikilamo nayetu. Jila vasonekelamo Mbimbiliya navyuma vyatwamamo, vyasolola mangana akulipwila.

3. Mujila muka Yehova ahanyinyinemo Jishimbi kuli Mose?

³ Vatu vamwe vanahase kuhulisa ngwavo, ‘Mwomwo ika Yehova azenekelele kuhanjika navatu namazu akufuma mwilu chipwe jila yeka yakukomwesa chikuma?’ Shimbu jimwe Yehova ahanjikilenga navatu nalizu lyakufuma mwilu kuhichila muli vangelo. Chakutalilaho, alingile ngocho hakuhana Jishimbi kuli vaIsalele. (Wavaka-Ngalesha 3:19) Lizu lyafumine mwilu lyevwishile vaIsalele  woma, kaha vahanjikile ngwavo Yehova kanda akahanjika cheka navakiko mujila kanako shina ahanjikenga navo kuhichila muli Mose. (Kulovoka 20:18-20) Mose vamuhanyine Jishimbi kafwe 600, jakufuma mukanwa kaKalunga.

4. Uno nge jishimbi jaKalunga japwile jakulyambulila kaha hakanwa kachi ponde muka yafuminemo? Lumbununa.

⁴ Uno nge Jishimbi kana kavajisonekeleko kachi vyuma vyapwa ngachilihi? Kutala kachi Mose ahashile kujanuka josena munona munona nakujambulula kuli vaIsalele vosena chakuhona kuhengesaho numba lumwe tahi? Kaha visemunwino vyakavangijileho, kachi vyatachikijile ngachilihi jishimbi kana? Kutala kachi visemunwino kana vyapwilenga nakwivwilila kaha kumazu akuvalweza hakanwa tahi? Jila kana kachi kayapwile jila yamwaza yakulwezelamo vatu jishimbi jaKalungako. Achihumikize vyuma navisoloka nge nausaka kwambulula mujimbu umwe kuvatu vanemana mumukana, kaha naulwezako uze ali kulutwe mangana ambulileko mukwavo namuhate, swi nakuli uze ali kusongo. Kakavulu mujimbu mwevwa uze ali kusongo naulihandununa nauze evwanga uze wakulivanga. Oloze omu keshi mukiko chapwile kuJishimbi jaKalungako.

5, 6. Uno Yehova alwezele Mose alinge ika omu amuhanyine Mazu enyi, kaha mwomwo ika chapwila chamwaza kuli etu kupwa naMazu aYehova akusoneka?

⁵ Yehova hamangana enyi asakwile mazu enyi apwenga akusoneka. Alwezele Mose ngwenyi: “Soneka mazu awa, mwomwo nguli nakulishika lushiko nayove navaIsalele kweseka namazu awa.” (Kulovoka 34:27) Aha hakiko jino haputukilile mulimo wakusoneka Mbimbiliya, mu 1513 B.C.E. Kaha hamyaka 1,610 yakavangijileho, Yehova “[ahanjikilenga] . . . halwola lwakulisezaseza namujijila jeka najeka” kuli vaka-kusoneka kafwe 40 vaze vasonekele Mbimbiliya. (WavaHepeleu 1:1) Mutando vene yize,  kwapwilenga nawa vaka-kunungulula mazu vaze vanungulwilenga kanawa Visoneka.—Ezela 7:6; Samu 45:1.

⁶ Chikupu vene Yehova atuzakama hakuhanjika nayetu kuhichila mumazu akusoneka. Kutala watambulaho lyehi mukanda wamwaza, pamo wakukuvendejeka, uze watulikile nakuutanganga kuswakumwe tahi? Omu mukiko wapwa “[na]mukanda” uze atusonekela Yehova. Hakuwana nge Yehova atuhana mazu akusoneka, tweji kuwatanganga lwola lwosena nakuwashinganyekanga. (Samu 1:2) Kaha tunahase kuwana “kuvendejeka chamuVisoneka” hosena oho nachisakiwila.—Wavaka-Loma 15:4.

7. Uno Yehova asolola ngachilihi mangana hakuzachisa vatu vasoneke Mazu enyi?

⁷ Yehova asolwele mangana enyi hakuzachisa vatu vasoneke Mazu enyi. Achishinganyeke hachumechi: Nge Yehova azachishile vangelo vasoneke Mbimbiliya, kutala kachi yeji kuhetanga vatu kumichima tahi? Kuhanjika muchano, vangelo kachi vamulumbunwine Yehova mujila yakujiminyina yize vamutachikijilamo, nakusolola omwo valihana kuli ikiye namichima yavo yosena, nakusoneka mijimbu yavangamba jaKalunga vakushishika vahano hamavu. Uno kachi twahasa kwivwishisa kulumbununa chavava vatu vakushipilitu vakukupuka, vaze vakwechi chinyingi, nauhashi, nangolo jakutuhambakana yetu tahi?—WavaHepeleu 2:6, 7.

8. Uno Yehova etavishile vaka-kusoneka Mbimbiliya valinge ika? (Tala nawa kwinyikila chamwishi.)

⁸ Hakuwana nge Yehova azachishile vatu vasoneke Mbimbiliya, mukanda uze ‘vahwima kuli Kalunga,’ ngocho vyuma vyatwamamo vyeji kuhetanga kumichima yetu.  (WaChimoteu 2, 3:16) Uno vyuma muka alingile numba chipwenga ngocho? Chasoloka nge, kakavulu etavishile vatu vazachise uhashi wavo wakushinganyeka hakusakula “mazu amwaza nakusoneka mazu akwoloka amuchano.” (Muka-kwambulula 12:10, 11) Echi chikiko chalingisa Mbimbiliya vayisoneke mujijila jakulisezaseza, kaha jila vasonekelamo mukanda himukanda yasolola omwo apwile mutu uze ausonekele nachiyoyelo chenyi. a Chipwe ngocho, malunga kana “vahanjikile vyakuli Kalunga omu vavatwaminyinyine nashipilitu yajila.” (WaPetulu 2, 1:21) Shikaho Mbimbiliya yapwa chikupu “himazu aKalunga.”—Wavaka-Tesolonyika 1, 2:13.

9, 10. Mwomwo ika Mbimbiliya yeji kuhetelanga kumichima yetu?

⁹ Mbimbiliya yeji kutuhetanga kumichima mwomwo vayisonekele kuli vatu. Vaze vayisonekele vevwilenga nganomu tweji kwivwanga nayetu. Hakuwana nge kavapwile vakukupukako, ngocho vamwenenga vyeseko naukalu uze tweji kumonanga nayetu. Shimbu jimwe, shipilitu yaYehova yavalingishilenga vasoneke omwo vevwilenga, nakusoneka nawa ukalu vamwenenga. (Wavaka-Kolinde 2, 12:7-10) Shikaho vazachishilenga mazu avo hakusoneka omwo vevwilenga, vize vangelo kachi kavahashile kulingako.

¹⁰ Chakutalilaho, tushimutwile hali Ndavichi Mwangana waIsalele. Omu alingile shili yayinene, asonekele mwaso uze wasolwele vyuma vyapwile mumuchima wenyi, nakulomba Kalunga amukonekele. Asonekele ngwenyi: “Ngutomese kushili yami. Mwomwo ngunatachikiza kanawa  vilinga vyami vyakuzombwojoka jishimbi, kaha shili yami yili kumeso ami lwola lwosena. Tala! Ngwasemukile nakuhenga chami, kaha mama apwile muka-shili omu angwimichile. Kanda naunguhanga kumeso oveko. Kanda naungutambula shipilitu yove yajilako. Muchima wakuhomba unapu nge chimuna wakuvatula uze weji kwivwilanga kuwaha. Ove Kalunga, kaweshi kukana muchima wakuhokoka, wakuchikikako.” (Samu 51:2, 3, 5, 11, 17) Mazu kana asolola nge Ndavichi ahombele chikuma. Vatu vakuhona kukupuka vakiko kaha vanahase kusoneka mazu kana awa.

11. Mwomwo ika Yehova ahakililile mijimbu yayivulu yavatu muMbimbiliya?

¹¹ Kuli chuma chikwavo chalingisa Mbimbiliya yihete kumichima yetu. Yahanjika chikuma hamijimbu yavatu. Vatu vamwe vazachililenga Kalunga, kaha veka kavamuzachililengako. MuMbimbiliya mwatwama mijimbu yasolola vyuma vahichilemo naukalu vamwenenga navyuma vyavalingishilenga vawahilile. Tweji kuwanangamo nawa vyuma vasakwilenga kulinga navyuma vyafuminengamo. Chikupu vene, mijimbu kaneyi vayisonekelele “kutunangula etu.” (Wavaka-Loma 15:4) Yehova azachisa mijimbu kana mangana atunangule nakutuheta kumichima. Achitale havyakutalilaho vino.

12. Uno mijimbu yamuMbimbiliya yavatu vaze kavapwile vakushishikako yeji kutukafwanga ngachilihi?

¹² Mbimbiliya yavuluka mijimbu yavatu vaze kavapwile vakushishikako, navaze vapwile vakuhuka, navyuma vyavasolokelele. Mijimbu kana yeji kutukafwanga tutachikize kanawa omwo vyapihile vilinga vyavo. Chakutalilaho, Mbimbiliya yatulweza ngwayo katwatela kusolola masepa  jetuko. Shikaho nge natutanga mujimbu waYuta uze asolwele Yesu kuli vaka-kole, kaha natutachikiza kanawa ovyo chapwila chachipi kulinga ngocho. (Mateu 26:14-16, 46-50; 27:3-10) Mijimbu yakufwana ngana yeji kutuhetanga chikuma kumuchima, nakutukafwa tutachikize vilinga vyavipi vize tuli navyo namwakuvihonesela.

13. Uno Mbimbiliya yatukafwa ngachilihi twivwishise omwo vyapwa vilinga vyamwaza?

¹³ Mbimbiliya yavuluka nawa vangamba jaKalunga vakushishika vavavulu. Tweji kutanganga vyakulihana chavo nakushishika chavo. Vatu kana vapwile navilinga vize twatela kulondezeza mangana tupandame kuli Kalunga. Chakutalilaho chavilinga kana shina lufwelelo. Mbimbiliya yalumbununa omwo lwapwa lufwelelo nomwo lunahase kutukafwa twivwise Kalunga kuwaha. (WavaHepeleu 11:1, 6) Yasolola nawa omwo vatu kana vasolwele lufwelelo. Achishinganyeke halufwelelo asolwele Apalahama omu vamulwezele alumbe mwanenyi Isaka. (Kuputuka, kapetulu 22; WavaHepeleu 11:17-19) Mijimbu yangana yeji kusololanga hatoma omwo lwapwa “lufwelelo” ngocho cheji kupwanga chachashi kuyivwishisa. Shikaho, Yehova asolola mangana enyi hakutukolezeza tupwenga navilinga vyamwaza, nakutuhana nawa vyakutalilaho vyavatu vapwile navilinga kana.

14, 15. Vyuma muka yahanjika Mbimbiliya hali pwevo uze ejile kutembele, kaha mujimbu kana watunangula ika hali Yehova?

¹⁴ Kakavulu mijimbu yavatu vasoneka muMbimbiliya navyuma vyavasolokelelenga yeji kutunangulanga omwo apwa Yehova. Achitale hamujimbu wapwevo uze Yesu amwene mutembele. Yesu atwamine kwakamwihi navikasha vyamawana, kaha amwene vatu vaze vahakilengamo mawana. Amwene vaka-luheto vavavulu vaze vahakilemo “jimbongo jakufuma kujimbongo javo jajivulu.” Oloze ikiye ashishikile chikuma hali tuliwe umwe wakuhutwa.  Ou pwevo ahakilemo “tujimbongo twachichele tuvali twandando yayindende chikuma.” b Jimbongo kana jikiko kaha apwile najo. Yesu uze amwenenga vyuma mujila yakukupuka ngana muze avimona Yehova, ambile ngwenyi: “Ou tuliwe muka-kuhutwa nahakemo jimbongo jajivulu kuhambakana vosena vaze vali nakuhaka jimbongo muvikasha vyamawana.” Mazu kana asolola nge Yehova amwene ngwenyi, uze tuliwe ahakilemo wana wakuhambakana wavakwavo vosena.—Mako 12:41-44; Luka 21:1-4; Yowano 8:28.

¹⁵ Kutala kacheshi chuma chachilemu chikuma hakuvulukaho kaha ou tuliwe nakumusoneka muMbimbiliya havatu vosena vaze vejile kutembele likumbi lizeko tahi? Mujimbu kana wasolola nge Yehova apwa Kalunga muka-kusakwilila. Eji kwitavilanga mawana tweji kuhananga namuchima wetu wosena, numba apwa amandende hakuwesekesa kuli aze avakwetu. Eyi hijila yamwenemwene yize Yehova atunangwilamo chishina kanechi chachilemu.

16, 17. Uno tweji kumonanga ngachilihi mangana aYehova muvyuma vize kavasoneka muMazu enyiko?

¹⁶ Hakusoneka mukanda kuli mutu wazanga, kaweshi kusonekamo mijimbu yosenako. Naukekesa kanawa umone vyuma nausonekamo. Chochimwe nawa, Yehova akekesele kanawa nakumona vatu navyuma vize atela kusoneka muMazu enyi. Oloze Mbimbiliya kayalumbununa vishina  vyosena mumijimbu kaneyiko. (Yowano 21:25) Chakutalilaho, Mbimbiliya hakuvuluka vyakusopesa chaKalunga, kayalumbununa munona munona omwo nachikapwako. Yehova asolola mangana enyi kuhichila muvyuma vize kavasoneka muMazu enyiko. Mwomwo ika tunambila ngocho?

¹⁷ Mbimbiliya vayisoneka mujila yize nayitukafwa tutachikize vili mumichima yetu. Mukanda WavaHepeleu 4:12 ngwawo: “Mazu aKalunga [chipwe, mujimbu waKalunga] apwa amatonyi, kaha atwama nangolo, avambuka kuhambakana poko yamukwale yauvela kuvali, kaha eji kutuvasananga nakuhandununa mwono nashipilitu, . . . kaha anahase kumona omu vinayi vishinganyeka nakujina chamumuchima.” Mujimbu wamuMbimbiliya weji kutuvasananga nakutuheta kumuchima, nakusolola hatoma vishinganyeka vyetu novyo tunakulingila vyuma vimwe. Vaze vasaka kutanga Mbimbiliya mangana vayiwanyine katenga, kakavulu veji kupihililanga kachi nge mujimbu vali nakutanga kaweshi navyuma vyavivulu vize vali nakusakako. Vatu kana vanahase kuhuhwasana numba nge Yehova atwama nazangi, namangana nachiyulo.

18, 19. (a) Mwomwo ika katwatela kupihililako kachi nge mujimbu tuli nakutanga kaweshi navyuma vyavivulu vize tuli nakusakako? (b) Uno twatela kulinga ika hakusaka twivwishise Mazu aKalunga, kahechi chasolola ngachilihi mangana aYehova akujiminyina?

¹⁸ Kachi nge natulinangula Mbimbiliya namuchima wamwaza, kaha katweshi kupihililako nge mujimbu tuli nakutanga kaweshi navyuma vyavivulu vize tuli nakusakako. Mwomwo ika? Chakutalilaho, nge tuli natuvihanda vihanda twamuvwimbimbi, pamo katweshi kuhasa kutachikiza kanawa muvwimbimbi uveneko. Oloze hakusaka tutachikize kanawa omwo uli nakusoloka muvwimbimbi wosena, kuvanga tuwanyise hamwe tuvihanda twatuvulu twamuvwimbimbi kana. Chochimwe nawa, nge tuli nakulinangula  Mbimbiliya, tweji kulinangulanga chindende chindende omwo apwa Yehova Kalunga nakumona jino kanawa vyuma vyosena. Numba tuhu hakavanga natuhona kwivwishisa mijimbu yimwe chipwe kuhona kumona omwo yapandama kuvilinga vyaKalunga, oloze vyuma vize tunalinangulako lyehi muMbimbiliya navitukafwa tutachikize ngwetu Yehova apwa hiKalunga wazangi, kaha nawa wachiyulo.

¹⁹ Hakusaka twivwishise Mazu aKalunga, twatela kuwatanga nakulinangulawo namuchima wamwaza. Echi chasolola nge Yehova atwama namangana. Vatu vamangana veji kusonekanga mikanda yize veji kwivwishisanga kaha kuli “vaka-mangana navaze vananguka.” Oloze ava vatu kaveshi kuhasa kusoneka mukanda uze navevwishisa kuli vatu vali namichima yamwazako. Kalunga ketu wamangana ikiye kaha nahase kulinga ngocho.—Mateu 11:25.

20. Mwomwo ika natwambila ngwetu Yehova ikiye kaha nahase kutulweza jila yamwaza yakuyoyelamo, kaha Mbimbiliya yatwama navyuma muka vize vinahase kutukafwa?

²⁰ Yehova atulweza jila yamwaza yakuyoyelamo kuhichila muMazu enyi. Hakupwa ikiye Tengi yetu, atachikiza kanawa vyuma twasaka kuhambakana omu twavitachikiza etu vavene. Vatu vosena vasaka kuvazanga, nakupwa vakuwahilila, nakupwa natanga yakuwahilila namasepa vamwenemwene. Vyuma kanevi vafwila vatu kavyalumukileko kufuma vene halwola vasonekele Mbimbiliya. Mbimbiliya yikwechi “mangana amwenemwene” aze anahase kutukafwa tuyoye kanawa. (Vishimo 2:7) Kapetulu wamakumishilo muchihanda hichihanda chamukanda uno ali nakusolola mwakukavangijila punga yamangana yamuMbimbiliya. Oloze oholyapwa tushimutwile hachakutalilaho chimwe.

21-23. Punga muka yamangana yinahase kutukafwa tuhone kulama koko chipwe kupwa namatoto?

 ²¹ Uno watachikiza ngwove vaka-kulama koko veji kulikokelanga ukalu tahi? Nge natulama koko, kaha natumona ukalu chikuma mukuyoya chetu. Katweshi kuhasa kushinganyeka havyuma vyekako, kaha nawa katweshi kutwama mukuunda nakupwa vakuwahililako. Vaka-sayasi vahanjika ngwavo, mutu nahase kuviza musongo wamuchima namisongo yeka yayinene, kachi nge mwatwalaho lika kupwa namatoto. Oloze shimbu kanda vaka-sayasi vatachikize chuma kana, Mbimbiliya yahanjikilile chimweza ngwayo: “Mbila utenu, seza matoto.” (Samu 37:8) Uno tunahase kulinga ngachilihi ngocho?

²² Mazu aKalunga atuhana punga yamangana ngwawo: “Kunangakana chamutu cheji kuunjisanga matoto enyi, kaha chinawahe kuli ikiye kuliula vaka-kuzombwojoka jishimbi.” (Vishimo 19:11) Kunangakana chapwa uhashi wakukekesa vyuma vyakujiminyina, nakumona vishina vize kavyeshi hatomako. Kunangakana cheji kutukafwanga tutachikize kanawa vyuma, nakwijiva nawa ovyo vinalingisa mukwetu ahanjike chipwe kulinga vyuma mujila kana. Kaha nge natufwila kwijiva vishinganyeka vyavakwetu vyamwaza, nomwo vevwanga navyuma vyavalingisanga, kaha katweshi kuvajinda chipwe kuvalamina kokoko.

²³ Mbimbiliya yatulweza nawa punga yikwavo ngwayo: “Itavilenunga lika tutenga twavakwenu, nakulikonekelanga navakwenu namuchima wakusuuluka.” (Wavaka-Kolose 3:13) Mazu akwamba ngwavo, “itavilenunga lika tutenga twavakwenu” asolola nge twatela kutalililanga vakwetu chikoki, nakuliula tutenga twavo tuze natutwivwisa kupihya. Nge natulinganga ngocho, kaha chinahase kutukafwa tuhonenga kulama koko. Kaha ‘kulikonekela’ chalumbununa nge twatela kumbila matoto. Kalunga ketu  wamangana atachikiza ngwenyi twatela kukonekelanga vakwetu nge chinatemo kulinga ngocho. Echi nachikafwa vakwetu nakukafwa nawa yetu twivwenga kumuchima hwo. (Luka 17:3, 4) Chikupu vene, mangana atwama muMazu aKalunga apwa amwenemwene.

24. Vyuma muka navifumamo nge natuyoyanga kweseka namwaya mangana aKalunga?

²⁴ Yehova asaka kushimutwila nayetu mwomwo atuzanga. Ngocho awahishileko jila yamwaza yakushimutwilamo nayetu, hakutuhana “mukanda” uze vasonekele kuvatu vaze atwaminyinyine nashipilitu yajila. Shikaho mangana aYehova atwama mumukanda kanou, kaha “atamo chikupu kuwafwelela.” (Samu 93:5) Omu natuyoyanga kweseka namwaya mangana kana nakuwalwezanga vakwetu, natupandama kuli Kalunga ketu wamangana chikuma. Mukapetulu nakavangizaho, natushimutwila chuma chikwavo chakukomwesa chize chasolola mangana aYehova. Chuma kana shina uhashi wakuhanjikila chimweza vyuma navikasoloka kulutwe nakutesamo vyuma ajina.