1, 2. Anton “sulat” so inter ed sikatayo nen Jehova, tan akin?

KASIN natandaan mo so unor ya impakaawat moy sulat a nanlapud inad-arom a manaayam ed arawi? Daiset labat iran bengatla et mamaliket lan maong ed sikatayo a singa say impapuson sulat na pinabpabli tayo. Maliket tayon naamtaan so kipapasen to, saray eksperiensya to, tan saray plano to. Say ontan a pitatalosan so mamaapit ed saray inad-aro, anggano wala ira ed arawin pasen.

² Sirin, anto ni lalon makapaliket ed sikatayo nen say pakaawat na nisulat a mensahe a nanlapud inaro tayon Dios? Diad sakey a pantalos, si Jehova so angiter ed sikatayo na “sulat”​—say Salita to, say Biblia. Ditan et ibabaga to ed sikatayo so nipaakar ed sikato, no anto lay ginawa to, no antoray ginagala ton gawaen, tan dakel ni. Inter ed sikatayo nen Jehova so Salita to lapud labay ton onapit itayo ed sikato. Pinili na makabat-ed-amin a Dios tayo so sankaabigan a paraan a pakapitalosan ed sikatayo. Agnaparaan ed kakabatan so paraan na inkisulat na Biblia tan saray lugan na satan.

3. Diad anton dalan ya impasabi nen Jehova so Ganggan ed si Moises?

³ Nayarin panumamengan na arum, ‘Akin ya ag-angusar si Jehova na mas makapasagyat a paraan​—singa say boses a manlapud tawen—​pian mitalosan ed totoo?’ Diad tua, talagan walaray panaon ya akisalita si Jehova manlapud tawen panamegley na saray manangilaman ton anghel. Alimbawa, ontan so ginawa to sanen inter toy Ganggan ed Israel. (Galacia 3:19) Makapakebbiew so boses a manlalapud tawen​—kanian kinerew la na saray ataktakot ya Israelita ya agla mitotongtong si Jehova ed sikara ed ontan a paraan noagta mitalosan la panamegley nen Moises. (Exodo 20:18-20) Say Ganggan, a tugyopen na anggad 600 a totontonen, so insalitan impasabi ed si Moises a salita-por-salita.

4. Ipaliwawa no akin a say insalitan panangipasabi et aliwan napanmatalkan a paraan diad pangipasabi ed saray ganggan na Dios.

 ⁴ Balet, panon to no agla insulat a balot itan a Ganggan? Nanonotan ni kasi nen Moises so eksakton inkisalita na satan a detalyadon ganggan pian nagnap ton nipasabi ed interon nasyon? Komusta met ed onsaginonor iran kailalakan? Kasin mandepende labat ira ed insalitan pangipasabi? Satan so agnapanmatalkan a paraan na pangipasabi ed saray ganggan na Dios. Isipen pay nagawa no ipasam so sakey ya estorya ed nantataluntonan a totoo diad pangibaga ed satan ed unonan too insan manaalawatan ya ipasa ed sakey tan sakey anggad sampot. Say narengel na samay walad sampot et nayarin duma lan tuloy ed samay inmunan nibaga. Agniiyan ed ontan a kapeligroan iray salita ed Ganggan na Dios.

5, 6. Anto so imbilin nen Jehova ed si Moises a gawaen nipaakar ed saray salita To, tan akin a pankaabigan tayo so inkisulat na Salita nen Jehova?

⁵ Makabat a denesidi nen Jehova a nisulat iray salita to. Binilin toy Moises: “Isulat mo so sarayan salita; ta dia ed balikas na sarayan salita akigawaan ak na sakey a sipanan ed sika tan dia ed Israel.” (Exodo 34:27) Saman la ginmapo so inkisulat na Biblia, nen 1513 K.K.P. Diad tinmumbok a 1,610 a taon, “akisalita [si Jehova] dia ed nanduruma a pamaakaran tan dia ed nagsisananey a nengneng” ed manga 40 a managsulat a too ya angisulat ed Biblia. (Hebreos 1:1) Diad inlabas na saray taon, maalwar ya amawala iray masimoon a managsakal na susto iran kopya pian nipreserba so Kasulatan.​—Esdras 7:6; Salmo 45:1.

⁶ Talagan pinapalar itayo nen Jehova diad impitalosan to ed sikatayo panamegley na nisulat. Kasin akaawat ka la na sulat a pinabpablim​—nayarin lapud ta aligliwa kan maong ed satan—​kanian insinop mo tan ulit-uliten mon babasaen itan? Kanian ontan met no nipaakar ed “sulat” ed sikatayo nen Jehova. Lapud impaisulat nen Jehova iray salita to, sarag tayon basaen iratan a regular tan dalepdepen so ibabaga na saratan. (Salmo 1:2) Makagamor itayo na ‘ligliwa ed saray Sulsulat’ kapagno kaukolan tayo itan.​—Roma 15:4.

7. Panon ya apatnagan so kakabatan nen Jehova diad impangusar to ed managsulat a totoo?

⁷ Impatnag nen Jehova so kakabatan to diad impangusar to’d totoo a mangisulat ed Salita to. Konsideraen pa iya: No inusar nen Jehova iray anghel a mangisulat ed Biblia, kasin makapasagyat met itan? Tua, nayarian komon na saray anghel ya ilitrato si Jehova manlapud atagey a punto de bista ra, nibalikas da komon so mismon debosyon da ed sikato, tan nayarian da komon ya iter so salaysay ed matoor a totoon lingkor na Dios. Balet sarag tayo kasin natalosan so panmoria na ayadyarin espiritu iran pinalsa, a say pikakabat, eksperiensya, tan pakayari ra et atagtagey a tuloy nen say sikatayo?​—Hebreos 2:6, 7.

8. Diad anton dalan a naabuloyan iray managsulat na Biblia ya usaren iray mismon abilidad na nonot da? (Nengnengen met so paimano’d leksab.)

⁸ Diad impangusar to ed managsulat a totoo, dugarugan intarya nen Jehova so kaukolan tayo​—sakey a rekord ya “impuyan na Dios” ingen nansiansia unong ed panmoria na too. (2 Timoteo 3:16) Panon ton agawaan iya? Diad dakel a kipapasen, mapatnag ya inabuloyan to iray managsulat ya usaren iray mismon abilidad na nonot da diad pamili na “saray makapaliket a salita tan mangisulat ed susto iran salita na katuaan.” (Eclesiastes 12:10, 11) Ipapaliwawa na saya so nanduruman estilo na Biblia; ipapatnag na sulsulat so binalegan tan personalidad na saray indibidual a managsulat. * Balet, sarayan lalaki so ‘nansalita a nanlapu ed Dios diad impanenyeg ed sikara na espiritu santo.’ (2 Pedro 1:21) Kanian, say peteg a nansumpalan et “salita na Dios.”​—1 Tesalonica 2:13.

9, 10. Akin a lalon makapaligsa tan makapasagyat so Biblia diad impangusar ed managsulat a totoo?

⁹ Agaylan makapaligsa tan makapasagyat so Biblia lapud impangusar ed managsulat a totoo. Saratan ya angisulat ed Biblia  et totoon walaan met na liknaan a singa sikatayo. Lapud ag-ira ayadyari et nidunget ira ed saray subok tan desdes a mipara ed sikatayon mismo. Diad pigaran kipapasen, pinuyanan ira na espiritu nen Jehova pian isulat iray dilin liknaan tan pipupuligesgesan da. (2 Corinto 12:7-10) Kanian insulat da iray salita diad impanukoy ed inkasikara, salsalita ya anggapoy anghel a makapangibesngaw.

¹⁰ Alaen pan alimbawa si Arin David na Israel. Kayari impakagawa toy pigaran seryoson kasalanan, kinumpos nen David so sakey a salmo a ditan et impapuso ton kinerew so panamerdona na Dios. Insulat to: “Linisan moak ed kasalanan ko. Ta amtak so saray impakasumpak, tan say kasalanan ko wala a naynay ed arapan ko. Nia, nipaway ak ed kasulitan, tan dia ed kasalanan innginew ak nen inak. Agmo ak ibantak ed arawi ed arap mo; tan agmo ekalen ed siak so masanto ya espiritum. Saray bagbagat ed Dios saray maralit ya espiritu; say sakey a puso a maralit tan mansisibkel, agmo la balbalawen, O Dios.” (Salmo 51:2, 3, 5, 11, 17) Agmo ta nalikna so pirmin ermen na managsulat? Likud ed ag-ayadyarin too, wala ta ni makapangibalikas na ontan ya impapuson liknaan?

11. Anton klase na tua-ed-bilay iran panangilitrato so nilaktip ed Biblia ya “onkana ed kibanga’tayo”?

¹¹ Wala ni sananey a bengatlan mamapagmaliw a makapasagyat so Biblia. Kaslakan, libro itan a nipaakar ed totoo​—tudtuan totoo a manlilingkor ed Dios tan agmanlilingkor ed sikato. Nabasa tayo iray eksperiensya, kairapan, tan gayaga ra. Naamtaan tayo so nansumpalan na saray pinili ra ed bilay. Nilaktip iratan a salaysay pian “onkana ed kibanga’tayo.” (Roma 15:4) Panamegley na sarayan tua-ed-bilay a panangilitrato, manbabangat si Jehova ed paraan a manenyeg ed puso tayo. Konsideraen so pigaran alimbawa.

12. Diad anton dalan a makatulong ed sikatayo iray salaysay na Biblia nipaakar ed agmatoor a totoo?

¹² Ibabaga ed sikatayo na Biblia so nipaakar ed agmatoor, marelmeng ni ingen, a totoo tan no anto so asagmak da. Diad  sarayan salaysay, apatnagan iray makapuy a kalidad da, kanian mainomay tayo iratan a natebek. Singa bilang, anton ganggan sumpad ag-inkamatoor so mas mapuersa ni nen say mabilay ya alimbawa na sayan kalidad ed si Judas diad impangitapat to ed si Jesus? (Mateo 26:14-16; Mateo 26:46-50; Mateo 27:3-10) Lalon epektibon onsepsep ed puso tayo so oniaran salaysay, ya ontulong ed sikatayon talosan tan ipulisay iray mabanday ya ugali.

13. Diad anton dalan a tutulongan itayo na Biblia pian natebek iray maabig a kalidad?

¹³ Deneskribe met na Biblia so dakel iran matoor a lingkor na Dios. Nabasa tayo so nipaakar ed debosyon tan katooran da. Naimano tayoray mabilay ya alimbawa nipaakar ed kalidad a kaukolan tayon bayuboan pian onapit itayo ed Dios. Alaen tayo pan alimbawa so pananisia. Inukeran na Biblia so pananisia tan ibabaga to ed sikatayo no panon kaimportante itan no labay tayon paliketen so Dios. (Hebreos 11:1, 6) Balet lugan met na Biblia iray mabitar ya alimbawa na pangagamil na pananisia. Isipen pay nipaakar ed pananisian impatnag nen Abraham sanen asubok a mangibagat ed si Isaac. (Genesis, kapitulo 22; Hebreos 11:17-19) Diad panamegley na saratan a salaysay, say salitan “pananisia” so mangipapasabi na kaaruman a kabaliksan tan mas mainomay a natebek. Agaylan makabat ta sikatayo so aglabat bibilinen nen Jehova a bayuboan iray maabig a kalidad noagta angitarya met na tua-ed-bilay iran alimbawa!

14, 15. Anto so ibabaga na Biblia ed sikatayo nipaakar ed sakey a bii a linma ed templo, tan antoy naaralan tayo nipaakar ed si Jehova ed sayan salaysay?

¹⁴ Saray peteg-ed-bilay a salaysay a naromog ed Biblia so mabetbet a mangibabangat ed sikatayo na bengatlan nipaakar ed personalidad nen Jehova. Konsideraen so abasa tayo nipaakar ed sakey a biin naimatonan nen Jesus diad templo. Leleg a manyudyurong ed abay na saray kaban na kayamanan, naiimatonan nen Jesus so pangipepelag na totoo ed saray kontribusyon da. Dakel so mayaman a linma ed templo, ya angiter “ed nasusulokan da.” Balet inteen nen Jesus so imano to ed samay pobri a balo. Say langkap to et “duaran blankas, a katiponan to so sakey  a marabilis.” * Kalkalamor la iman a kuarta to. Si Jesus, a nagnap ya angipatnag ed panmoria nen Jehova ed saray pamaakaran so angikuan: “Sayan duka a bii a balo angipelag na dakdakel nen saray amin a manpepelag ed panangisimpenan na kayamanan.” Unong ed saratan a balikas, dakel ni so impelag to nen say amin ya impelag na arum anggan pantitiponen ni.​—Marcos 12:41-44; Lucas 21:1-4 Juan 8:28.

¹⁵ Agta makabkabaliksan a diad amin a totoon linma ed templo ed saman ya agew et sayan balo so nipabitar tan abitla ed Biblia? Diad panamegley na sayan alimbawa et ibabangat itayo nen Jehova a sikatoy maapresyan Dios. Maliket ton awaten iray interon-puso a langkap tayo, anggaman melag iratan no ipareng ed sarag na arum ya iter. Seguradon kabat nen Jehova so sankaabigan a dalan pian ibangat ed sikatayo iyan makapaligsay-puson katuaan!

16, 17. Panon a napatnagan so kakabatan nen Jehova anggan ed saray walan inekal to ed Salita to?

¹⁶ Sano sulaten mo so pinablim et walay limitasyon na nisulat mo. Kanian uusaren moy pakatebek mo diad pamili no antoy isulat mo. Ontan met, pinili nen Jehova iray pigaran indibidual tan agawgawa a nasalambit ed Salita to. Balet diad sarayan mabitar a salaysay, agnaynay ya indatak na Biblia so amin a detalye. (Juan 21:25) Alimbawa, sano ibabaga na Biblia so nipaakar ed panangukom na Dios, say nitaryan impormasyon so nayarin agmangebat ed kada tepet tayo. Napatnagan ni ingen so kakabatan nen Jehova anggan ed saray walan inekal to ed Salita to. Panon?

¹⁷ Say paraan na inkisulat na Biblia so onkanan mansuri ed no anto so walad puso tayo. Ibabaga na Hebreos 4:12: “Say salita [odino, mensahe] na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan  ontalos ya angga ed pansianan na kamarerwa tan espiritu . . . tan masiglat a mangibiig ed saray nonot tan saray getma na puso.” Ontanek so mensahe na Biblia, a mangipatnag ed tuan kaisipan tan motibo tayo. Saramay manbabasa ed satan a walaan na makritikon puso so mabetbet a nagapol ed saray salaysay ya andian na magenap ya impormasyon a parad kapenek da. Suppiaten da ni ingen no kasin tuan maaro, makabat, tan maptek si Jehova.

18, 19. (a) Akin ya agtayo mapaga no walay salaysay ed Biblia a mamalesa na pigaran tepet a ditan et agtayon tampol naromog iray ebat? (b) Anto so kaukolan ta pian natalosan so Salitay Dios, tan panon a saya so paneknek na matalonggaring a kakabatan nen Jehova?

¹⁸ Diad pidumaan, sano impapuso tayon aralen a maong so Biblia, naaralan tayo so nipaakar ed si Jehova unong ed pangipaparungtal ed sikato na konteksto na interon Biblia. Kanian, agtayo mapaga no walay salaysay a mamapalesa na pigaran tepet a ditan et agtayon tampol naromog iray ebat. Diad pangiyilustra: “Sano tutuopen so baleg a puzzle, nayarin agtayon tampol nanengneng so partikular a piraso odino agtayo naimano no panon ya ituop so sakey a piraso. Ingen, nayarin akatuop tayo la na magenap a piraso pian nanengneng so itsura na interon retrato. Mipadpara, sano aaralen tayoy Biblia et kalkalna tayon naaralan no anton klase na Dios si Jehova, diad ontan et napatnagan so pihon retrato. Anggaman agtayo natalosan ed primero so sakey a salaysay odino natalosan no panon itan ya ontukoy ed personalidad na Dios, magenagenap lay nibangat ed sikatayo na panaaral tayoy Biblia nipaakar ed si Jehova pian natalosan tayo a sikatoy ag-onsaew a maaro, andiay lalabien, tan matunong a Dios.

¹⁹ Sirin, pian natalosan a maong so Salitay Dios, nepeg tayon basaen tan aralen itan tekep na masimoon a puso tan lukas a kanonotan. Agta satan so pakapatnagan na matalonggaring a kakabatan nen Jehova? Say intelihentin totoo so makapangisulat na saray libro a say makatebek lambengat et “saray makabat tan matudio.” Balet say pangisulat ed sakey a libro a say makatalos lambengat et saramay walaay maptek impanpuson motibasyon​—mankakaukolan itan na kakabatan na Dios!​—Mateo 11:25.

20. Akin a si Jehova labat so makapangibaga ed sikatayo na sankaabigan a dalan ed pambilay, tan anto so lugan na Biblia a makatulong ed sikatayo?

²⁰ Diad Salita to, ibabaga ed sikatayo nen Jehova so sankaabigan a dalan ed pambilay. Bilang Manamalsa tayo, mas kabkabat to iray pankaukolan tayo nen say sikatayon mismo. Tan saray manunan pankaukolan na too​—laktip lay pilalek pian naaro, pian manliket, tan pian napaaligwas iray siglaotan—​so pareho nin siansia. Lugan na Biblia so daakan a “praktikal a kakabatan” a makatulong ed sikatayon manbilay a makabaliksan. (Uliran 2:7, NW) Lugan na balang seksyon ed sayan libro so sakey a kapitulo a mangipanengneng ed no panon tayon niyaplika so makabat a simbawa na Biblia, balet konsideraen tayo labat dia so sakey ya alimbawa.

21-23. Anton makabat a simbawa so makatulong ed sikatayon napaliisan so pamukok ed sanok tan sakit na linawa?

²¹ Kasin naimano yo la a say paniimbel tan paneem-em na sakit na linawa na totoo et mabetbet a manresulta ed kapasakitan dan dili? Say panimbel so makapabelat ed bilay. Sano em-eman tayo itan, sigpot lan nigalet ditan so nonot tayo, a maneral ed kareenan tayo, tan mangekal na gayaga tayo. Ipapanengneng na impanaral ed siensia a say pamukok ed sanok et lalon mangirisga ed pakawalaan tayoy sakit na puso tan dakel nin seryoso iran sakit. Abayag la antis na saratan ya impanaral, makabat lan inkuan na Biblia: “Tundaan mo so petang na ulo, tan ikaindan mo so sanok.” (Salmo 37:8) Balet panon tayon nagawaan itan?

²² Iyoopresi na Salitay Dios iyan makabat a simbawa: “Say kalakal [“aralem a pakatebek,” NW] na too manggawa ed sikato so matantan a manpasnok, et gayaga to so pamalabas na pakalukso.” (Uliran 19:11) Say aralem a pakatebek et kabaliksan toy abilidad ya onnengneng ed walad dalem, inengneng ed labas na mapatnag la. Papawalaen na aralem a pakatebek so pakatalos, ta makatulong itan ed sikatayo pian narandan no akin ya akapansalita odino kinmiwas na ontan so sakey a too. Ontulong ed sikatayo so panggunaet a talosan iray puron motibo, liknaan, tan saray sirkumstansya to pian naekal iray negatibon kanonotan tan liknaan ed sikato.

 ²³ Lugan na Biblia iyan kaaruman a simbawa: “Mantultuloy a mantetepelan so sakey tan sakey tan sigpot a manpeperdonaan so balang sakey.” (Colosas 3:13, NW) Ipapaimano na balikas a “mantultuloy a mantetepelan so sakey tan sakey” a magmaliw a maanos ed arum, a palabasen iray makapasyodot iran ugali. Makatulong ed sikatayo so ontan a panag-anos pian agla manimbel. Ipapasabi na ‘pamerdona’ so ideyan palabasen lay panem-em. Amta na makabat a Dios tayo a kaukolan tayon perdonaen so arum sano walay maabig a basiyan a panggawa ed satan. Aliwa labat lan pakagunggonaan da iya noagta para met ed dilin kareenan na nonot tan puso tayo. (Lucas 17:3, 4) Agaylan kakabatan so naromog ed Salitay Dios!

24. Antoray pansumpalan sano itunos tayoy bilay tayo ed kakabatan na Dios?

²⁴ Lapud apakiwas ed daakan ya aro to, kaliktan nen Jehova so mitalosan ed sikatayo. Pinili toy sankaabigan a posiblin paraan​—sakey a “sulat” ya impaisulat to’d saray totoo diad panangiwanwan na masanton espiritu. Bilang resulta, naromog ditan so mismon kakabatan nen Jehova. “Napanmatalkan a maong” iyan kakabatan. (Salmo 93:5, NW) Diad pangitunos tayo’d kabibilay tayo ed satan tan diad panginabang tayo ed satan ed arum, napaapit itayo ed makabat ed amin a Dios tayo. Diad ontumbok a kapitulo, singbaten tayo so sakey nin matalonggaring ya alimbawa na matudion kakabatan nen Jehova: say abilidad ton mangipasakbay ed arapen tan sumpalen so gagala to.