1, 2. Ndi “vhurifhi” vhufhio he Yehova a ri ṅwalela hone, nahone ndi ngani?

NAA ni kha ḓi humbula uri no guma lini u ṱanganedza vhurifhi vhu bvaho kha muthu ane na mu funa, ane a dzula kule? Ndi zwithu zwi si gathi zwine zwa ri takadza vhukuma u fana na vhurifhi vhu bvaho mbiluni ho ṅwalwaho nga muthu ane ra mu funa. Ri a takalela u pfa nga ha mutakalo wawe, tshenzhelo dzawe, na zwe a dzudzanya u zwi ita. Vhudavhidzano ho raloho vhu sendedza vhathu vhane vha funana tsini-tsini, naho vhe kule na kule.

² Nga zwenezwo-ha, ndi mini tshine tsha nga ri ḓisela dakalo ḽihulwane u fhira u ṱanganedza mulaedza wo tou ṅwaliwaho u bvaho ha Mudzimu ane ra mu funa? Nga iṅwe nḓila, Yehova o ri ṅwalela “vhurifhi”—Ipfi ḽawe, Bivhili. Khayo u ri vhudza zwine a vha zwone, zwe a zwi ita, zwe a dzudzanya u zwi ita, na zwiṅwe zwinzhi. Yehova o ri ṋea Ipfi ḽawe nga ṅwambo wa uri u ṱoḓa ri tshi vha tsini nae. Mudzimu washu o ṱalifhaho vhukuma o khetha nḓila ya khwine-khwine ya u davhidzana na riṋe. Hu na vhuṱali vhu sa vhambedzwi na tshithu kha nḓila ye Bivhili ya ṅwalwa ngayo na kha zwine zwa vha khayo.

3. Yehova o fhirisela Mulayo kha Mushe nga nḓila-ḓe?

³ Vhaṅwe vha nga vhudzisa uri: ‘Ndi ngani Yehova a songo shumisa maitele a swayeaho—sa tsumbo, a songo amba e ṱaḓulu—u itela u davhidzana na vhathu?’ Zwi re zwone ndi uri nga zwiṅwe zwifhinga Yehova o amba e ṱaḓulu a tshi shumisa vharuṅwa. Sa tsumbo, o ita nga u ralo musi a tshi ṋea Vhaisiraele Mulayo. (Vha-Galata 3:19) Ipfi ḽi bvaho ṱaḓulu ḽo vha ḽi tshi ofhisa nga maanḓa lwe Vhaisiraele vho tshuwaho vha humbela Yehova uri a si ambe navho nga yeneyi nḓila, nṱhani hazwo a  ambe a tshi shumisa Mushe. (Ekisodo 20:18-20) Mulayo, we wa vha wo vhumbwa nga ndaela dza 600, wo fhiriselwa kha Mushe nga mulomo, ipfi nga ipfi.

4. Ṱalutshedzani uri ndi ngani u fhirisa ipfi nga u amba zwo vha zwi sa ḓo vha maitele a fulufhedzeaho a u shumisa milayo ya Mudzimu.

⁴ Naho zwo ralo, hu pfi mini arali wonoyo Mulayo wo vha u songo vhuya wa ṅwaliwa? Naa Mushe o vha a tshi ḓo kona u humbula kuṅwalele kwa zwenezwo zwidodombedzwa zwa mulayo na u vhudza lushaka lwoṱhe a sa khakhi? Hu pfi mini nga mirafho i ḓaho? Naa vho vha vha tshi tea u ḓitika tshoṱhe nga u tou vhudzwa? Eneo o vha a sa ḓo vha maitele a fulufhedzeaho a u shumisa milayo ya Mudzimu. Edzani u humbula zwine zwa nga itea arali na vhudza muduba mulapfu wa vhathu maṅwe mafhungo, wa u thoma a vhudza a re tsini nae nahone zwa tou ralo u swika vha tshi fhelela. Zwine zwa ḓo pfiwa nga muthu wa u fhedzisela kha muduba zwi vhonala uri zwi ḓo fhambana na zwa wa u thoma. Maipfi a Mulayo wa Mudzimu o vha e siho khomboni yo raloho.

5, 6. Yehova o laya Mushe uri a ite mini nga maipfi Awe, nahone ndi ngani i phaṱutshedzo kha riṋe u vha na Ipfi ḽa Yehova ḽo ṅwaliwaho?

⁵ Yehova o khetha nga vhuṱali uri maipfi awe a ṅwalwe. O laya Mushe a ri: “Ṅwala milayo hei; ngauri milayo hei ndi yone ye nda vhofha ngayo’ mulanga na iwe na Vha-Isiraele.” (Ekisodo 34:27) Ngauralo nga 1513 B.C.E., ha thoma ḽifhinga ḽa u ṅwala Bivhili. Miṅwahani ya 1 610 yo tevhelaho, Yehova “o amba kha zwiitea zwinzhi na nga nḓila nnzhi” na vhaṅwali vha ṱoḓaho u vha 40 vhe vha ṅwala Bivhili. (Vha-Heberu 1:1, NW) Nga tshenetsho tshifhinga, vhaṅwalululi vho ḓikumedzaho vho ita nga vhuronwane u itela u bveledza kopi dzo teaho u itela u vhulunga Maṅwalo.—Esera 7:6; Psalme ya 45:1.

⁶ I ngoho, Yehova o ri fhaṱutshedza nga u amba na riṋe nga u ri ṅwalela. Naa no no vhuya na ṱanganedza vhurifhi he na vhu funa vhukuma—khamusi nga ṅwambo wa uri ho ni ṱuṱuwedza—lwe na vhu vhulunga u itela u vhu vhala lunzhi-lunzhi? Zwo  tou ralo na kha “vhurifhi” he Yehova a ri ṅwalela hone. Nga ṅwambo wa uri Yehova o ita uri maipfi awe a ṅwalwe, ri a kona u a vhala misi yoṱhe na u elekanya nga zwine a amba zwone. (Psalme ya 1:2) Ri nga “fhembeledzwa nga maṅwalo,” tshifhinga tshoṱhe musi ri tshi zwi ṱoḓa.—Vha-Roma 15:4.

7. Vhuṱali ha Yehova vhu vhonala hani kha u shumisa vhaṅwali vha vhathu?

⁷ Yehova o sumbedza vhuṱali hawe nga u shumisa vhathu u ṅwala Ipfi ḽawe. Ṱhogomelani hezwi: Arali Yehova a shumise vharuṅwa u ṅwala Bivhili, naa yo vha i tshi ḓo ri kwama nga nḓila ine ya ri kwama ngayo? Vhukuma, vharuṅwa vho vha vha tshi ḓo vha vho ṱalusa Yehova u ya nga mavhonele avho a nṱha, vha sumbedza u ḓikumedza havho khae, nahone vha ṅwala mafhungo a vhashumeli vha Mudzimu vha vhathu vha fulufhedzeaho. Naa zwa vhukuma ro vha ri tshi ḓo kona u pfesesa mavhonele a zwivhumbiwa zwa muya zwo fhelelaho, zwine nḓivho, tshenzhelo, na maanḓa azwo zwa vha zwihulwane kha zwashu?—Vha-Heberu 2:6, 7.

8. Vhaṅwali vha Bivhili vho tendelwa u shumisa mihumbulo yavho nga nḓila-ḓe? (Sedzani na ṱhaluso i re magumoni a siaṱari.)

⁸ Nga u shumisa vhaṅwali vha vhathu, Yehova o ri ṋea zwine ra zwi shaya—rekhodo ye ya ‘hevhedzwa nga Mudzimu’ fhedzi ine ya kwama vhathu. (2 Timotheo 3:16) Zwenezwi o zwi kona hani? Zwi vhonala uri kha zwiimo zwinzhi o tendela vhaṅwali uri vha shumise mihumbulo yavho musi vha tshi khetha “kuambele ku takadzaho na u ṅwala mafhungo-ngoho nga u a tevhekanya.” (Muhuweleli 12:10, 11) Ndi ngazwo hu na u fhamba-fhambana ha kuṅwalele kwa Bivhili; maṅwalwa a sumbedza vhubvo na vhumuthu ha vhaṅwali. * Naho zwo ralo, vhenevha vhanna ‘vho amba, vhó hwaliwa nga Muya mukhethwa.’  (2 Petro 1:21) Nga zwenezwo, ya fheleledza i “fhungo ḽa Mudzimu” ngangoho.—1 Vha-Thesalonika 2:13.

9, 10. Ndi ngani u shumiswa ha vhaṅwali vha vhathu ho ita uri Bivhili i kwame maḓipfele nahone i kunge?

⁹ U shumiswa ha vhaṅwali vha vhathu zwi ita uri Bivhili i kwame maḓipfele nahone i kunge nga hu swayeaho. Vhaṅwali vhayo vho vha vhe vhathu vha re na maḓipfele u fana na riṋe. Vho vha vha songo fhelela, vho sedzana na milingo na mitsiko i fanaho na yashu. Nga zwiṅwe zwifhinga, muya wa Yehova wo vha hevhedza uri vha ṅwale nga ha maḓipfele na vhuleme havho. (2 Vha-Korinta 12:7-10) Ngauralo vho ṅwala maipfi nga ha vhone vhaṋe, maipfi ane na muruṅwa a nga si a ambe.

¹⁰ Sa tsumbo, ṱhogomelani Khosi Davida wa Isiraele. Musi o no ita zwivhi zwihulwane, Davida o ṅwala psalme he khayo a bula maḓipfele awe, a humbela uri Mudzimu a mu hangwele. O ṅwala uri: “U nṱanzwe ndi bve vhuvhi hanga, U bvise vhutshinyi hanga kha nṋe. Ngauri zwivhi zwanga ndi khou zwi ḓivha, vhutshinyi hanga a vhu ṱuwi phanḓa ha maṱo anga. Ngauri ndo bebiwa ndi wa zwivhi, na mme-anga o nṱanganedza zwivhini. U songo mpandela maṱoni au, U songo ṱusa muya mukhethwa wau kha nṋe. Tshi-ṱhavhelwa-Mudzimu ndi muya wo ṱhavhiwaho; mbilu yo ṱhavhiwaho, yo paḓukanaho Iwe Mudzimu a U nga i nyadzi.” (Psalme ya 51:2, 3, 5, 11, 17) Naa ni a kona u pfa vhuṱungu ha onoyu muṅwali? Ndi muthu a songo fhelelaho fhedzi ane a nga sumbedza maḓipfele o raloho a bvaho mbiluni?

11. Ndi tsumbo dza mufuda-ḓe dza vhukuma dzo ṅwalwaho Bivhilini u itela “u ri funza”?

¹¹ Hu na tshiṅwe tshithu tshine tsha ita uri Bivhili i kunge. Kanzhi ndi bugu i ambaho nga ha vhathu—vhathu vha vhukuma—vhe vha shumela Mudzimu na vhe vha si mu shumele. Ri vhala nga ha tshenzhelo dzavho, vhuleme havho, na madakalo avho. Ri a vhona mvelelo dza zwe vha zwi khetha vhutshiloni. Eneo mafhungo o ṅwalwa u itela “u ri funza.” (Vha-Roma 15:4) Nga u shumisa dzenedzi tsumbo dza vhukuma, Yehova u funza  nga nḓila dzine dza kwama mbilu dzashu. Ṱhogomelani dziṅwe tsumbo.

12. Mafhungo a Bivhili nga ha vhathu vha sa fulufhedzei a ri thusa nga nḓila-ḓe?

¹² Bivhili i amba nga ha vhathu vha sa fulufhedzei, vhavhi na zwe zwa itea khavho. Kha enea mafhungo, ri vhala nga ha nyito dzavho dzi sumbedzaho pfaneleo dzi si dzavhuḓi, zwenezwo zwi ita uri ri pfesese. Sa tsumbo, naa hu na tsumbo khulwane ya u sa fulufhedzea ine ya fhira ya Yudasi musi a tshi ita tshimbevha tsha u fheṱa Yesu? (Mateo 26:14-16, 46-50; 27:3-10) Mafhungo a ngaho sa enea a kwama mbilu dzashu nga hu bvelelaho vhukuma, a ri thusa u vhona na u landula pfaneleo dzi si dzavhuḓi.

13. Bivhili i ri thusa hani u pfesesa pfaneleo dzavhuḓi?

¹³ Bivhili i dovha ya amba nga vhashumeli vhanzhi vha Mudzimu vha fulufhedzeaho. Ri vhala nga ha u ḓikumedza na u fulufhedzea havho. Ri vhona tsumbo dza vhukuma dza pfaneleo dzine ra fanela u dzi ṱahulela u itela u sendela tsini na Mudzimu. Sa tsumbo, ṱhogomelani lutendo. Bivhili i ṱalusa lutendo na u ri vhudza nḓila ine lwa vha lwa ndeme ngayo arali ri tshi ṱoḓa u takadza Mudzimu. (Vha-Heberu 11:1, 6) Fhedzi Bivhili i dovha ya vha na tsumbo dza vhathu vhe vha sumbedza lutendo. Humbulani nga ha lutendo lwe Abrahamu a lu sumbedza musi a tshi ṱoḓa u ita Isaka tshiṱhavhelo. (Genesi, ndima ya 22; Vha-Heberu 11:17-19) Nga eneo mafhungo, ipfi ḽine ḽa ri “lutendo” ḽi amba zwo engedzeaho nahone ḽi a pfesesea nga hu leluwaho. Yehova u na vhuṱali vhuhulwane vhukuma ngauri u ri ṱuṱuwedzela u ṱahulela pfaneleo dzavhuḓi nahone a dovha a ri ṋea tsumbo dza vhukuma!

14, 15. Bivhili i ri vhudza mini nga ha muṅwe mufumakadzi we a ḓa thembeleni, nahone ri guda mini nga ha Yehova kha enea mafhungo?

¹⁴ Mafhungo a vhukuma ane a wanala Bivhilini kanzhi a ri funza uri Yehova ndi muthu wa mufuda-ḓe. Ṱhogomelani zwine ra zwi vhala nga ha mufumakadzi we Yesu a mu vhona thembeleni. Musi o dzula tsini na mbulungelo ya mali, Yesu o vha o lavhelesa musi vhathu vha tshi khou longa miṋeelo yavho. Vhapfumi vhanzhi vho ḓa, vha “ṱusa kha zwo ḓalaho.” Fhedzi Yesu o lavhelesa tshilikadzi i ḓiṱukufhadzaho. Muṋeelo wayo wo vha  u “zwikwati zwivhili zwiné vhuvhili hazwo zwa ita peni nthihi.” * Yo vha i tsheledenyana ya u fhedza ye a vha e nayo. Yesu, we a sumbedza nga ho fhelelaho mavhonele a Yehova kha eneo mafhungo, o ri: “Iyi tshilikadzi ya mutshinyali afha mbulungeloni yo longa zwi fhiraho zwe vhoṱhe vha longa.” U ya nga eneo maipfi, o longa zwi fhiraho zwa vhoṱhe zwo ṱangana.—Marko 12:41-44; Luka 21:1-4; Yohane 8:28.

¹⁵ Naa a zwi mangadzi uri kha vhathu vhoṱhe vho ḓaho thembeleni ḽeneḽo ḓuvha, ho khethiwa yeneyi tshilikadzi nahone ya ambiwa Bivhilini? Nga u shumisa yeneyi tsumbo, Yehova u ri funza uri ndi Mudzimu a livhuwaho. U takalela u ṱanganedza zwifhiwa zwashu zwi bvaho mbiluni, hu sa londwi nḓila ine zwa vha ngayo musi zwi tshi vhambedzwa na zwine vhaṅwe vha kona u zwi ṋea. Yeneyi yo vha i nḓila ya khwine-khwine ine Yehova a nga ri funza ngayo enea mafhungo-ngoho a takadzaho!

16, 17. Vhuṱali ha Yehova vhu vhonala hani na kha zwithu zwe a si zwi ṅwale Ipfini ḽawe?

¹⁶ Musi ni tshi ṅwalela muthu ane na mu funa vhurifhi, a ni ṅwali mafhungo oṱhe. Ni khetha nga vhuṱali zwine na nga zwi ṅwala. Nga hu fanaho, Yehova o khetha u bula vhaṅwe vhathu na zwiitea Ipfini ḽawe. Fhedzi kha enea mafhungo, kanzhi Bivhili a i ṅwali zwidodombedzwa zwoṱhe. (Yohane 21:25) Sa tsumbo, musi Bivhili i tshi amba nga khaṱulo ya Mudzimu, mafhungo a re hone a nga si fhindule mbudziso dzashu dzoṱhe. Vhuṱali ha Yehova vhu vhonala na kha zwithu zwe a si zwi ṅwale Ipfini ḽawe. Nga nḓila-ḓe?

¹⁷ Nḓila ye Bivhili ya ṅwalwa ngayo i thusa u ṱolisisa zwine zwa vha mbiluni dzashu. Vha-Heberu 4:12 i ri: “Ngauri ipfi [kana, mulaedza] ḽa Mudzimu ndi tshithu tshi tshilaho, tshi shumaho;  u tshea ḽi fhira banga na̗ u ṱuṱulwa hani thungo dzoṱhe. Ḽi a phulekanya, ḽa swika huné ḽa fhandakanya mbilu na muya, . . . ndi muṱalukanyi wa zwiné mbilu ya fhima ya elekanya zwone.” Mulaedza wa Bivhili u phula nga ho dzikaho, u dzumbulula mahumbulele na zwiṱuṱuwedzi zwashu zwa vhukuma. Vhane vha u vhala nga iṱo ḽa u sasaladza kanzhi vha a khukhulisea nga mafhungo ane a sa vhe na zwidodombedzwa zwo linganaho zwine zwa vha fusha. Vhenevho vhathu vha nga timatima arali vhukuma Yehova e wa lufuno, e na vhuṱali, na u luga.

18, 19. (a) Ndi ngani ri songo fanela u dinalea arali maṅwe mafhungo a Bivhili a tshi takusa mbudziso dzine ri nga si wane phindulo dzadzo nga u ṱavhanya? (b) Ndi mini zwine zwa ṱoḓea u itela u pfesesa Ipfi ḽa Mudzimu, nahone zwenezwi zwi sumbedza hani vhuṱali ha Yehova?

¹⁸ Zwo fhambanaho na zwenezwo, musi ri tshi guda Bivhili nga vhuronwane nga u ḓiimisela, ri guda nga ha nḓila ine Bivhili yoṱhe ya ṱalutshedza ngayo Yehova. Nga zwenezwo, a ri dinalei arali maṅwe mafhungo a tshi takusa dziṅwe mbudziso dzine ri nga si wane phindulo dzadzo nga u ṱavhanya. Sa tsumbo: Musi ri tshi ṱumanya zwipiḓa zwa phazili khulwane, ri nga kha ḓi sa vhona uri tshiṅwe tshipiḓa tshi dzhena ngafhi. Naho zwo ralo, ri nga vha ro vha ro kuvhanganya zwipiḓa zwo linganaho u itela u vhona nḓila ine tshifanyiso tsha ḓo vha ngayo musi tsho fhelela. Zwi ngaho zwenezwo, musi ri tshi guda Bivhili, nga zwiṱuku nga zwiṱuku ri guda nga ha uri Yehova Mudzimu ndi wa mufuda-ḓe, nahone ra kona u pfesesa na maṅwe mafhungo. Naho mathomoni ra sa pfesesa maṅwe mafhungo kana u vhona nḓila ine a fanela ngayo vhumuthu ha Mudzimu, u guda hashu Bivhili ho no ri funza zwithu zwinzhi nga ha Yehova u itela uri ri kone u vhona uri ndi Mudzimu wa lufuno nahone o luga.

¹⁹ Nga zwenezwo-ha, u itela u pfesesa Ipfi ḽa Mudzimu, ri fanela u ḽi vhala na u ḽi guda nga u ḓiimisela nahone ri tshi ṱoḓa u pfesesa. Naa zwenezwi a si musumbedzo wa vhuṱali vhuhulwane ha Yehova? Vhathu vho ṱalifhaho vha nga ṅwala bugu dzine dza nga pfeseswa nga “vha vhuṱali na vho thanyaho” fhedzi. Fhedzi u itela u ṅwala bugu ine ya nga pfeseswa fhedzi nga vhane vha vha na zwiṱuṱuwedzi zwavhuḓi—zwi ṱoḓa vhuṱali ha Mudzimu!—Mateo 11:25.

20. Ndi ngani e Yehova e eṱhe ane a nga ri vhudza nḓila ya khwine ya u tshila, nahone Bivhili i na mini zwine zwa nga ri thusa?

²⁰ Ipfini ḽawe, Yehova u ri vhudza nḓila ya khwine ya u tshila. Samusi e Musiki washu, u ḓivha zwishaiwa zwashu khwine u ri fhira. Nahone zwishaiwa zwa vhathu zwa mutheo—u katela u tama u funiwa, u takala, na u ita uri vhukonani hawe na vhaṅwe vhu vhe vhu bvelelaho—a zwi athu shanduka. Bivhili yo ḓala “vhuṱali vhu shumaho” vhune ha nga ri thusa u tshila vhutshilo vhu re na ndivho. (Mirero 2:7, NW) Tshipiḓa tshiṅwe na tshiṅwe tsha yeneyi bugu i thusaho u guda tshi na ndima i sumbedzaho nḓila ine ra nga shumisa ngayo nyeletshedzo ya Bivhili ya vhuṱali, fhedzi kha ri ṱhogomele tsumbo nthihi henefha.

21-23. Ndi nyeletshedzo ifhio ya vhuṱali ine ya nga ri thusa u iledza u fara muthu nga mbilu?

²¹ Naa no no vhuya na zwi ṱhogomela uri vhathu vhane vha fara vhaṅwe nga mbilu kanzhi vha fheleledza vho ḓivhaisa? U fara muthu nga mbilu ndi muhwalo u lemelaho vhutshiloni. Musi ri tshi hu ṱahulela, hu ita uri ri dzule ri tshi khou ḽa mbilu, ri sa vhe na mulalo, nahone hu fhedza dakalo ḽashu. Pfunzo dza saintsi dzi amba uri u sinyuwa hu nga engedza khombo ya vhulwadze ha mbilu na maṅwe malwadze manzhi a sa fholi. Kale hu sa athu itwa dzenedzo pfunzo dza saintsi, Bivhili yo amba nga vhuṱali uri: “U songo sinyuwa, dzima mbiti.” (Psalme ya 37:8) Fhedzi zwenezwo ri nga zwi ita nga nḓila-ḓe?

²² Ipfi ḽa Mudzimu ḽi ṋea heyi nyeletshedzo: “Wa [“luvhonela,” NW] ha ṱavhanyi u sinyuwa; u naka nga u sa lifhedza.” (Mirero 19:11) Luvhonela ndi vhukoni ha u vhona zwo dzumbamaho, u vhona zwine zwa sa leluwe u zwi vhona. Luvhonela lu bveledza u pfesesa, nga uri lu nga ri thusa u vhona uri ndi ngani muṅwe muthu o amba kana o ita zwithu nga yeneyo nḓila. U lingedza u pfesesa zwiṱuṱuwedzi zwawe zwa vhukuma, maḓipfele, na zwiimo zwawe zwi nga ri thusa u fhelisa mihumbulo na maḓipfele a si avhuḓi khae.

²³ Bivhili i na heyi nyeletshedzo: “Ni nge no takulanaho, ni khathutshelane [“hangwelane,” NW] arali muṅwe e na tshiné a  sola muṅwe.” (Vha-Kolosa 3:13) Maipfi ane a ri “ni nge no takulanaho” a amba uri ri songo fhelelana mbilu, ri konḓelele mikhwa ine ya nga vha i tshi ri dina. U konḓelelana honoho hu nga ri thusa u iledza u vha na luvhengelambiluni nga ṅwambo wa zwithu zwiṱuku. U “hangwelana” zwi na muhumbulo wa u sa sinyuwa. Mudzimu washu wa vhuṱali u a ḓivha uri ri fanela u hangwela vhaṅwe musi hu na zwiitisi zwi pfalaho zwa u ita nga u ralo. Hezwi a zwi nga ḓo vhuyedza vhone fhedzi, fhedzi zwi ḓo dovha zwa ri ṋea mulalo wa muhumbulo na wa mbilu. (Luka 17:3, 4) Ndi vhuṱali havhuḓi lungafhani vhu wanalaho Ipfini ḽa Mudzimu!

24. Hu itea musi ri tshi ita uri vhutshilo hashu vhu tendelane na vhuṱali ha Mudzimu?

²⁴ Yehova o amba na riṋe nge a sudzuluswa nga lufuno lwawe luhulwane. O khetha nḓila ya khwine-khwine—“vhurifhi” ho ṅwalwaho nga vhaṅwali vha vhathu vha tshi livhiswa nga muyamukhethwa. Nga ṅwambo wa zwenezwo, vhuṱali ha Yehova vhu wanala khaho. Honovhu vhuṱali vhu a “fulufhedzea zwinzhi.” (Psalme ya 93:5) Musi ri tshi ita uri vhutshilo hashu vhu tendelane naho na musi ri tshi vhudza vhaṅwe, nga lwa nzulele ri sendela tsini na Mudzimu washu o ṱalifhaho vhukuma. Kha ndima i tevhelaho, ri ḓo haseledza iṅwe tsumbo ya Yehova i swayeaho ya vhuṱali ha u vhona zwithu zwi tshee kule: vhukoni hawe ha u dzula o amba nga ha vhumatshelo na u ḓadzisa ndivho yawe.