‘Ọniọn̄ Abasi ke Edisana Ndịben̄kpọ’
Ibuot 19
‘Ọniọn̄ Abasi ke Edisana Ndịben̄kpọ’
1, 2. “Edisana ndịben̄kpọ” ewe ke nnyịn ikpenyene udọn̄ iban̄a, ndien ntak-a?
NDỊBEN̄KPỌ! Sia mmọ ẹsidemerede owo udọn̄, ẹduaide owo idem, ẹnyụn̄ ẹyan̄ade owo ifiọk, mme owo isikemeke ndidịp mmọ. Nte ededi, Bible ọdọhọ ete: “Ndidịp n̄kpọ edi ubọn̄ Abasi.” (Mme N̄ke 25:2) Ih, nte Akakan Andikara ye Andibot, Jehovah enyene unen ndidịp ubonowo ndusụk n̄kpọ tutu esịm nnennen ini esie ndiyarade mmọ.
2 Nte ededi, odu akama-nduaidem ye edemede-owo-udọn̄ ndịben̄kpọ oro Jehovah ayararede ke Ikọ esie. Ẹkot enye “edisana ndịben̄kpọ uduak” Abasi. (Ephesus 1:9, NW) Ndikpep mban̄a enye ekeme ndinam se ikande ediyụhọ ọkpọsọn̄ udọn̄ fo. Ndifiọk ndịben̄kpọ emi ekeme ndida n̄kesịm edinyan̄a onyụn̄ ekeme ndinọ fi ndusụk ifiọk aban̄ade ọniọn̄ Jehovah oro ayan̄ade owo ifiọk.
Ẹyarade Sụn̄sụn̄
3, 4. Didie ke ntịn̄nnịm ikọ oro ẹkewetde ke Genesis 3:15 ọnọ idotenyịn, ndien nso “edisana ndịben̄kpọ” ikesịne ke enye?
3 Ke ini Adam ye Eve ẹkenamde idiọkn̄kpọ, ekeme ndidi eketie nte ke uduak Jehovah ndinam mme mfọnmma owo ẹdụn̄ ke paradise isọn̄ ama okpu. Edi Abasi ama ọsọsọp anam n̄kpọ aban̄a n̄kpọntịbe emi. Enye ọkọdọhọ ete: “Nyonyụn̄ nsịn usua ke ufọt fo [urụkikọt] ye n̄wan, ye ke ufọt [mfri fo ye mfri, NW] esie: enye ayanuak fi ibuot, afo oyonyụn̄ anuak enye nditịn̄-ikpat.”—Genesis 3:15.
4 Mme ikọ emi ẹkedi ndịben̄kpọ oro ẹyan̄ade owo ifiọk. Anie ekedi n̄wan emi? Anie ekedi urụkikọt? Anie ekedi “mfri” oro edinuakde urụkikọt ibuot? Adam ye Eve ikọdiọn̄ọke. Nte ededi, Ikọ Abasi ama anam idotenyịn odu ọnọ nditọ ekededi oro ẹdinamde akpanikọ, oro ẹdimanade ẹnọ owo iba oro mîkanamke akpanikọ do. Edinen ido ayakan. Uduak Jehovah oyosu. Edi didie? Kamse, oro ekedi ndịben̄kpọ! Bible okot enye ‘ọniọn̄ Abasi ke edisana ndịben̄kpọ, kpa ọniọn̄ eke ekedịbede.’—1 Corinth 2:7, NW.
5. Nam an̄wan̄a ntak emi Jehovah ayararede ndịben̄kpọ esie sụn̄sụn̄.
5 Nte “Abasi emi ayararede ndịbe n̄kpọ,” Jehovah ama ayarade mme akpan ntọt ẹban̄ade edisu ndịben̄kpọ emi nte ini akakade. (Daniel 2:28) Edi enye akanam ntre sụn̄sụn̄, ke adiana ke adiana. Ke ndinam an̄wan̄a, nnyịn imekeme ndikere mban̄a usụn̄ oro ima ima ete esinamde n̄kpọ ke ini ekpri eyeneren esie obụpde, “Papa, m̀mọ̀n̄ ke ami n̄koto ndimana?” Ete oro enyenede ọniọn̄ edinọ sụk ntọt oro edin̄wan̄ade ekpri eyen oro. Nte eyen oro ọkọride okpon, ete esie ọnọ enye mme ntọt efen efen. Ke ukem usụn̄ oro, Jehovah ebiere ini emi odotde ndiyarade uduak esie nnọ ikọt esie.—Mme N̄ke 4:18; Daniel 12:4.
6. (a) Nso idi uduak ediomi? (b) Ntak emi Jehovah ndidụk ediomi ye mme owo edide n̄wọrọnda n̄kpọ?
6 Didie ke Jehovah akanam mme utọ ediyarade oro? Enye ama ada udịm udịm ediomi ayarade ekese mmọ. Eyedi akanam afo omodụk ediomi kiet m̀mê eken—edide ndidep ufọk m̀mê ndibọ ebuọt. Utọ ediomi oro ama ọnọ ubiọn̄ oro ekemde ye ibet nte ke ẹyenam se ẹkediomide. Edi ntak emi Jehovah okpodụkde ediomi ke ata ata usụn̄ ye mme owo? Ke akpanikọ, ikọ esie ekem nte nsọn̄ọ ọnọ mme un̄wọn̄ọ esie. Oro edi akpanikọ, ndien kpa ye oro, ke ediwak idaha, Abasi ke ima esida mme ediomi oro ẹkemde ye ibet ọsọn̄ọ ikọ esie. Mme ediomi emi ẹsan̄ade ye nsọn̄ọ mi ẹnọ nnyịn emi idide mme anana-mfọnmma owo ata ọkpọsọn̄ ntak ndinyene mbuọtidem ke mme un̄wọn̄ọ Jehovah.—Mme Hebrew 6:16-18.
Ediomi ye Abraham
7, 8. (a) Nso ediomi ke Jehovah akanam ye Abraham, esịnde nso un̄wana ke edisana ndịben̄kpọ? (b) Didie ke Jehovah akaka iso ndiwụt akpan udịm ubon emi Mfri oro ekenyenede ndito?
7 Ke se ibede isua tọsịn iba tọn̄ọ nte ẹkebịn owo ẹsion̄o ke Paradise, Jehovah ama ọdọhọ anam-akpanikọ asan̄autom esie Abraham ete: “Nyonyụn̄ nnam ubon fo ẹwak eti-eti nte ntantaọfiọn̄ enyọn̄, . . . kpukpru mme idụt ke ererimbot ẹyenyụn̄ ẹkụt mfọn eke otode ke ubon fo, koro afo ama okokop uyo mi.” (Genesis 22:17, 18) Emi ama okpon akan akan̄a; Jehovah akanam enye ke ido ediomi oro ekemde ye ibet onyụn̄ ada un̄wọn̄ọ oro n̄kpọ mîkemeke ndibiat mfep ọsọn̄ọ enye. (Genesis 17:1, 2; Mme Hebrew 6:13-15) Edi n̄wọrọnda n̄kpọ didie ntem nte ke Ọbọn̄ Andikara ama enen̄ede odiomi ndidiọn̄ ubonowo!
8 Ediomi oro ẹkenamde ye Abraham ama ayarade nte ke Mfri oro ẹken̄wọn̄ọde edidi owo, koro enye ekenyene ndidi eyen Abraham. Edi anie ke enye edidi? Nte ini akakade, Jehovah ama ayarade nte ke Isaac edidi ete-ekpụk Mfri oro ke otu nditọ Abraham. Ẹma ẹmek Jacob ke otu nditọ iba oro Isaac okobonde. (Genesis 21:12; 28:13, 14) Ke ukperedem, Jacob ama etịn̄ ntịn̄nnịm ikọ emi aban̄a kiet ke otu nditọ esie 12 ete: “Mmọnyọ idikpọn̄ke Judah, eto ọbọn̄ idinyụn̄ ikpọn̄ke n̄kpatian̄-ukot esie, tutu Shiloh [“Enye Emi N̄kpọ Enyenede”] edi; mme idụt ẹyenyụn̄ ẹkop ẹnọ enye.” (Genesis 49:10) Ẹma ẹfiọk adan̄aoro nte ke Mfri oro ekenyene ndidi edidem, emi editode ubon Judah!
Ediomi ye Israel
9, 10. (a) Nso ediomi ke Jehovah akanam ye idụt Israel, ndien nso ukpeme ke ediomi oro ọkọnọ? (b) Didie ke Ibet oro okowụt ke ubonowo oyom ufak?
9 Ke isua 1513 M.E.N., Jehovah ama anam ndutịm oro ekebererede usụn̄ ndinyene mme uyarade efen efen mban̄a edisana ndịben̄kpọ emi. Enye ama odụk ediomi ye nditọ Abraham, kpa idụt Israel. Okposụkedi ediomi oro mînyeneke odudu aba idahaemi, Ibet ediomi Moses emi ekedi akpan ubak uduak Jehovah oro edidade Mfri oro ẹken̄wọn̄ọde idi. Didie ke edi ntre? Kere ban̄a usụn̄ ita. Akpa, Ibet oro eketie nte ibibene ukpeme. (Ephesus 2:14) Ndinen edumbet esie ẹketie nte ibibene ke ufọt mme Jew ye Gentile. Ntem Ibet oro ama an̄wam ndimụm udịm ubon Mfri un̄wọn̄ọ oro n̄kama. Ọkọn̄ọde akamba akamba ke utọ ukpeme oro, idụt oro ama aka iso odu tutu esịm edikem ini Abasi Messiah ndimana ndụk esien Judah.
10 Ọyọhọ iba, Ibet oro ama enen̄ede owụt nte ke ubonowo oyom ufak. Nte mfọnmma Ibet, enye ama owụt nte anamidiọk ubonowo mîkemeke ndinịm enye ọyọhọ ọyọhọ. Ntem enye ama anam “ndudue owụt idem, tutu [mfri, NW] oro ẹken̄wọn̄ọde un̄wọn̄ọ ẹnọ Enye edidi.” (Galatia 3:19) Ebede ke mme uwa unam, Ibet oro ama ọnọ usio-isop idiọkn̄kpọ ke ibio ini. Edi, nte Paul ekewetde, sia “iyịp enan̄ ye ebot [mîkemeke-keme] ndimen mme idiọk-n̄kpọ mfep,” mme uwa emi n̄kukụre ẹkeda ẹban̄a uwa ufak Christ. (Mme Hebrew 10:1-4) Do, ye mme anam-akpanikọ Jew, ediomi emi ama akabade etie nte ‘andikpeme, emi adade mmọ ọsọk Christ.’—Galatia 3:24.
11. Nso nyayama idotenyịn ke Ibet ediomi ọkọnọ Israel, edi ntak emi idụt oro ke ofụri ofụri akatabade enye?
11 Ọyọhọ ita, ediomi oro ama ọnọ idụt Israel nyayama idotenyịn. Jehovah ama ọdọhọ mmọ ete ke edieke mmọ ẹdinamde akpanikọ ke ediomi oro, mmọ ẹyekabade ẹdi “obio oku, ye . . . edisana idụt.” (Exodus 19:5, 6) Ke akpatre, Israel eke obụk ama osion̄o akpa mme andibuana ke obio oku eke heaven edi. Nte ededi, Israel ke ofụri ofụri ẹma ẹsọn̄ ibuot ye Ibet ediomi oro, ẹsịn Mfri Messiah oro, ẹnyụn̄ ẹtaba idotenyịn oro. Mmanie, ndien, ke ẹdida ẹyọhọ obio oku emi? Ndien didie ke idụt oro edidiọn̄de mi edinyene ebuana ye Mfri oro ẹken̄wọn̄ọde? Ẹma ẹyarade mme ikpehe edisana ndịben̄kpọ emi ke edikem ini Abasi.
Ediomi Obio Ubọn̄ David
12. Nso ediomi ke Jehovah akanam ye David, ndien nso un̄wana ke emi ekesịn ke edisana ndịben̄kpọ Abasi?
12 Ke ọyọhọ isua ikie 11 M.E.N., Jehovah ama afiak esịn un̄wana ke edisana ndịben̄kpọ emi ke ini enye akanamde ediomi efen. Enye ama ọn̄wọn̄ọ ọnọ anam-akpanikọ Edidem David ete: “Nyanam ubon fo . . . etiene fi adaha ada, nnyụn̄ nnam ubọn̄ esie ọsọn̄ ada. . . . Nyonyụn̄ nnam ebekpo ubọn̄ esie ọsọn̄ ada ke nsinsi.” (2 Samuel 7:12, 13; Psalm 89:3) Idahaemi ẹma ẹsịk udịm ubon emi Mfri oro ẹken̄wọn̄ọde editode ẹdisịm ufọk David. Edi nte ikpîkpu owo ekeme ndikara “ke nsinsi”? (Psalm 89:20, 29, 34-36) Ndien nte utọ edidem emi edide owo do ekpekeme ndifak ubonowo nsio ke idiọkn̄kpọ ye n̄kpa?
13, 14. (a) Nte ekemde ye Psalm 110, nso ke Jehovah ọn̄wọn̄ọ ọnọ Edidem emi enye eyetde aran? (b) Ewe n̄kpọ efen efen ẹban̄ade Mfri oro ekedide ke ẹkeyarade ebe ke mme prọfet Jehovah?
13 Ke idak ndausụn̄ odudu spirit, David ama ewet ete: “Jehovah ọdọhọ ye Ọbọn̄ mi, ete, ‘Tie mi ke ubọk nnasia, tutu nda mme asua fo nnịm fi ke udoriukot.’ Jehovah ọmọn̄wọn̄ọ, idinyụn̄ ituaha n̄kpọfiọk, Afo edi nsinsi oku, nte utọ Melchizedek asan̄ade.” (Psalm 110:1, 4) Mme ikọ David ẹkeban̄a Mfri oro ẹken̄wọn̄ọde, m̀mê Messiah nnennen nnennen. (Utom 2:35, 36) Edidem emi iditiehe ke Jerusalem, edi editie ke heaven ke “ubọk nnasia” Jehovah. Oro ayanam enye enyene odudu ndikara ofụri isọn̄, idịghe idụt Israel kpọt. (Psalm 2:6-8) Ẹma ẹyarade mme n̄kpọ efen efen mi. Tịm fiọk nte ke Jehovah ama ọn̄wọn̄ọ nte ke Messiah edidi “oku, nte utọ Melchizedek asan̄ade.” Kpa nte Melchizedek, emi ekedide edidem ye oku ke eyo Abraham, Abasi ke idemesie ama emek Mfri oro ekedide ndinam utom nte Edidem ye Oku!—Genesis 14:17-20.
14 Ke ediwak isua oro ẹkebede, Jehovah ama ada mme prọfet esie ọnọ mme uyarade efen efen aban̄a edisana ndịben̄kpọ esie. Ke uwụtn̄kpọ, Isaiah ama ayarade nte ke Mfri oro edikpa n̄kpa uwa. (Isaiah 53:3-12) Micah ama ebem iso etịn̄ ebiet oro Messiah edimanade. (Micah 5:2) Daniel ama akam etịn̄ ntịn̄nnịm ikọ aban̄a ata nnennen ini emi Mfri oro ediwụtde idem ye ini emi enye edikpade.—Daniel 9:24-27.
Ẹyarade Edisana Ndịben̄kpọ!
15, 16. (a) Didie ke “n̄wan” ekediman Eyen Jehovah? (b) Nso ke Jesus ọkọbọ oto ete ye eka esie eke owo, ndien ini ewe ke enye ọkọwọrọ edi nte Mfri un̄wọn̄ọ?
15 Nte mme ntịn̄nnịm ikọ emi ẹdisude okosụk edi ndịben̄kpọ tutu Mfri oro enen̄ede owụt idem. Galatia 4:4 ọdọhọ ete: “Edi ke adan̄aemi ekemde uyọhọ ini, Abasi osio Eyen Esie ọdọn̄—n̄wan aman Enye.” Ke isua 2 M.E.N., angel ama asian eyen Jew emi mîkọfiọkke erenowo emi ekekerede Mary ete: “Ndien sese, afo oyoyomo, onyụn̄ aman eyeneren, onyụn̄ osio Enye enyịn̄ Jesus. Enye oyokpon, oyonyụn̄ ekere Eyen Andikon̄-n̄kan; Jehovah Abasi oyonyụn̄ ọnọ Enye ebekpo ete Esie David . . . Edisana Spirit oyodoro fi ke idem, odudu Andikon̄-n̄kan oyonyụn̄ ofụk fi: mmọdo se idimanade eyekere Edisana, Eyen Abasi.”—Luke 1:31, 32, 35.
16 Ke ukperedem, Jehovah ama osio uwem Eyen esie ke heaven edisịn ke idịbi Mary, man n̄wan aman enye. Mary ekedi anana-mfọnmma an̄wan. Edi, Jesus ikọbọhọ unana-mfọnmma ito enye, sia enye ekedide “Eyen Abasi.” Ke ukem ini oro, nte mme andito ubon David, ete ye eka Jesus ẹma ẹnam enye enyene unen eke ubon ye eke ibet ndidi adiakpa David. (Utom 13:22, 23) Ke Jesus ama akana baptism ke isua 29 E.N., Jehovah ama eyet enye aran ke edisana spirit onyụn̄ ọdọhọ ete: “Emi edi edima Eyen Mi.” (Matthew 3:16, 17) Ke akpatre, Mfri oro ama edisịm! (Galatia 3:16) Ini ama edikem ndiyarade ekese n̄kpọ mban̄a edisana ndịben̄kpọ emi.—2 Timothy 1:10.
17. Didie ke ẹkesịn un̄wana ke se Genesis 3:15 ọwọrọde?
17 Ke ini utom ukwọrọikọ esie, Jesus ama ayarade enye emi edide urụkikọt oro ẹtịn̄de ẹban̄a ke Genesis 3:15 nte Satan ye mfri urụkikọt oro nte mme anditiene Satan. (Matthew 23:33; John 8:44) Ke akpatre, ẹma ẹyarade nte ẹdisọhide kpukpru mmọ ifep ke nsinsi. (Ediyarade 20:1-3, 10, 15) Ẹma ẹnyụn̄ ẹyarade n̄wan oro nte “Jerusalem emi odude ke enyọn̄,” kpa esop Jehovah eke heaven oro etiede nte n̄wan. a—Galatia 4:26; Ediyarade 12:1-6.
Obufa Ediomi
18. Nso idi uduak “obufa ediomi”?
18 Eyedi ata n̄wọrọnda uyarade oro akanam ẹnọde ekedi ke okoneyo oro ekebemde n̄kpa Jesus iso ke ini enye eketịn̄de aban̄a “Obufa Ediomi” ọnọ mme anam-akpanikọ mbet esie. (Luke 22:20) Ukem nte andikebem enye iso, kpa Ibet ediomi Moses, obufa ediomi emi ekenyene ndisio “obio oku” ndi. (Exodus 19:6; 1 Peter 2:9) Nte ededi, ediomi emi idisioho idụt eke obụk idi, edi edisio idụt eke spirit, kpa “Israel Abasi,” oro esịnede sụk mme anam-akpanikọ mme anditiene Christ. (Galatia 6:16) Mbon oro ẹsịnede ke obufa ediomi emi ẹyediana ye Jesus ke ndidiọn̄ ekpụk ubonowo!
19. (a) Ntak emi obufa ediomi okụtde unen ndisio “obio oku” ndi? (b) Ntak emi ẹkotde mme Christian oro ẹyetde aran ‘obufa edibotn̄kpọ,’ ndien owo ifan̄ ẹdinam utom ye Christ ke heaven?
19 Edi ntak emi obufa ediomi okụtde unen ke ndisio “obio oku” oro edidiọn̄de ubonowo ndi? Koro utu ke enye ndibiom mme mbet Christ ikpe nte mme anamidiọk, enye ebeberede usụn̄ ọnọ edifen mme ndudue mmọ ebe ke uwa esie. (Jeremiah 31:31-34) Ke ndondo oro mmọ ẹnyenede edinen idaha ye Jehovah, enye ada mmọ esịn ke ubon esie eke heaven onyụn̄ ada edisana spirit eyet mmọ aran. (Rome 8:15-17; 2 Corinth 1:21) Ntem ẹfiak ‘ẹbon mmọ obufa ẹda ẹsịn ke odu-uwem idori-enyịn ke heaven.’ (1 Peter 1:3-5) Sia utọ n̄kokon̄ idaha oro edide ata obufa n̄kpọ ọnọ mme owo, ẹkot mme Christian oro ẹyetde aran ke spirit ‘obufa edibotn̄kpọ.’ (2 Corinth 5:17) Bible ayarade nte ke ama ekem owo 144,000 ẹyetiene ẹtie ke heaven ẹkara ubonowo oro ẹfakde.—Ediyarade 5:9, 10; 14:1-4.
20. (a) Nso uyarade ke ẹkenọ ẹban̄a edisana ndịben̄kpọ ke isua 36 E.N.? (b) Mmanie ẹdibọ edidiọn̄ oro ẹken̄wọn̄ọde ẹnọ Abraham?
20 Ke adianade ye Jesus, mbon oro ẹyetde aran mi ẹkabade ẹdi ‘mfri Abraham.’ b (Galatia 3:29) Akpa mbon oro ẹkemekde ẹkedi mme Jew eke obụk. Edi ke isua 36 E.N., ẹma ẹyarade ikpehe edisana ndịben̄kpọ efen: Mme Gentile, m̀mê mbon oro mîdịghe mme Jew, ẹyetiene ẹnyene idotenyịn eke heaven. (Rome 9:6-8; 11:25, 26; Ephesus 3:5, 6) Ndi mme Christian oro ẹyetde aran kpọt ẹdibọ mme edidiọn̄ oro ẹken̄wọn̄ọde ẹnọ Abraham? Baba, koro uwa Jesus enyene ufọn ọnọ ofụri ererimbot. (1 John 2:2) Nte ini akakade, Jehovah ama ayarade nte ke “akwa otu owo” eke baba owo kiet mîkemeke ndibat ẹyebọhọ utịt editịm n̄kpọ Satan emi. (Ediyarade 7:9, 14) Ẹyenam udịm udịm owo efen efen ẹset ye idotenyịn edidu uwem ke nsinsi ke Paradise!—Luke 23:43; John 5:28, 29; Ediyarade 20:11-15; 21:3, 4.
Ọniọn̄ Abasi ye Edisana Ndịben̄kpọ
21, 22. Ke mme usụn̄ ewe ke edisana ndịben̄kpọ Jehovah owụt ọniọn̄ Esie?
21 Edisana ndịben̄kpọ edi edinam oro owụtde “uwak-uwak ọniọn̄ Abasi” ke usụn̄ oro akpade owo idem. (Ephesus 3:8-10) Nso ọniọn̄ ke Jehovah enyene ntem ke ndikọtọn̄ọ ndịben̄kpọ emi, nnyụn̄ nyarade enye sụn̄sụn̄! Enye ke ọniọn̄ ama ekere aban̄a mme mmeme owo, ọnọde mmọ ifet ndiwụt ata ata se isịnede mmọ ke esịt.—Psalm 103:14.
22 Jehovah ama owụt n̄ko anana-mbiet ọniọn̄ ke enye ndimek Jesus nte Edidem. Ẹkeme ndibuọt idem ye Eyen Jehovah ẹkan edibotn̄kpọ efen ekededi ke ekondo. Ke ini okodude uwem nte owo oro enyenede obụk ye iyịp, Jesus ama osobo ediwak orụk afanikọn̄. Enye enen̄ede ọdiọn̄ọ mme mfịna owo. (Mme Hebrew 5:7-9) Ndien nso kaban̄a mme nsan̄a andikara ye Jesus? Ke ediwak isua ikie oro ẹbede, ẹyet iren ye iban—oro ẹmekde ẹto kpukpru orụk, usem, ye idaha—aran. Idụhe mfịna ndomokiet oro mme owo ke otu mmọ mîkosoboke inyụn̄ ikan. (Ephesus 4:22-24) Ndidu ke idak ukara mme okop mbọm ndidem ye oku emi edidi n̄kpọ idatesịt!
23. Nso ọsọn̄urua ifet ke mme Christian ẹnyene ke ebuana ye ndịben̄kpọ Jehovah?
23 Apostle Paul ekewet ete: “Ndịbe-n̄kpọ eke ekedịbede toto ke editọn̄ọ eyo ye emana . . . Abasi ama ayarade enye ọnọ nti ikọt Esie.” (Colossae 1:26) Ke akpanikọ, ndisana ikọt Jehovah oro ẹyetde aran ẹdifiọk ekese ẹban̄a edisana ndịben̄kpọ ẹnyụn̄ ẹbuana utọ ifiọk oro ye ediwak miliọn owo. Nso ifet ke kpukpru nnyịn inyene ntem! Jehovah anam nnyịn “ifiọk n̄kpọ eke ekedịbede ke esịt Esie.” (Ephesus 1:9) Ẹyak nnyịn ibuana utịbe utịbe ndịben̄kpọ emi ye mbon en̄wen, in̄wamde mmọ n̄ko ndidụn̄ọde ọniọn̄ Jehovah Abasi oro ayan̄ade owo ifiọk!
[Mme Ikọ idakisọn̄]
a Ẹma ẹda Jesus ẹyarade “edisana ndịben̄kpọ uten̄e Abasi.” (1 Timothy 3:16, NW) Ekedi ndịben̄kpọ ke anyanini m̀mê owo ekededi ekeme ndimụm mfọnmma nsọn̄ọnda ke Jehovah n̄kama. Jesus ama ọnọ ibọrọ. Enye ama omụm nsọn̄ọnda akama ke kpukpru idomo oro Satan okodomode enye.—Matthew 4:1-11; 27:26-50.
b Jesus n̄ko ama anam ‘ediomi Obio Ubọn̄’ ye otu emi. (Luke 22:29, 30) Ke nditịm ntịn̄, Jesus okodụk ediomi ye “ekpri otu erọn̄” emi aban̄a mmọ ndikara ye enye ke heaven nte udiana ikpehe mfri Abraham.—Luke 12:32.
Mme Mbụme Nditie N̄kere
John 16:7-12 Didie ke Jesus ekekpebe usụn̄ oro Ete esie adade ayarade akpanikọ sụn̄sụn̄?
1 Corinth 2:6-16 Ntak emi edisana ndịben̄kpọ Jehovah mîn̄wan̄ake ediwak owo, ndien didie ke nnyịn ikeme ndifiọk mme ndịben̄kpọ emi?
Ephesus 3:10 Nso ọsọn̄urua ifet ke mme Christian ẹnyene mfịn ke ebuana ye edisana ndịben̄kpọ Abasi?
Mme Hebrew 11:8-10 Didie ke edisana ndịben̄kpọ emi okomụm mbuọtidem mbon eset akama, idem okposụkedi enye mîketịmke in̄wan̄a mmọ ọyọhọ ọyọhọ?
[Mme Mbụme Ukpepn̄kpọ]
[Ndise ke page 190]
“Nyonyụn̄ nnam ubon fo ẹwak eti-eti nte ntantaọfiọn̄ enyọn̄”
