1, 2. Edena “hunia hereva helagana” ita ura diba be namo, bona dahaka dainai?

 HEHUNI herevadia! Nega momo taunimanima ese hehuni herevadia idia hunia diba lasi, badina unai hereva ese edia lalona ia veria, idia hoalaia bona idia daradaralaia. To, Baibel ia gwau: “Dirava ese gau haida ia hunia be ena hairai totona.” (Aonega Herevadia 25:2) Oibe, Iehova be Siahu Ibounai Lohia Tauna bona Havaraia Tauna dainai, ia be mai ena maoro taunimanima amo gau haida ia hunia ela bona ena nega korikorina ai do ia hahedinaraia.

² To, Iehova ese ena Hereva lalonai hoa bada hehuni herevana ta ia hahedinaraia, unai ese iseda lalona ia veria. Baibel ese unai ia gwauraia Dirava ena “hunia hereva helagana.” (Efeso 1:9) Unai ita diba ese iseda ura gau haida dibaia karana dekenai ia habadaia. Unai hehuni herevana dibaia karana ese mauri dekenai oi ia hakaua lao bona Iehova ena aonega bada dekenai diba sisina ia henia.

3, 4. Edena dala ai Genese 3:15 dekenai ia noho peroveta herevana ese helaro ia henia, bona ia lalonai dahaka “hunia hereva helagana” ia noho?

³ Adamu bona Heva idia kara dika neganai, toana be Iehova ena ura tanobada be paradaiso ai ia lao bona goevadae taudia ese do idia noholaia, be ia guguru lasi. To karaharaga Dirava ese gau haida ia karaia unai hekwakwanai ia hamaoromaoroa totona. Ia gwau: “Lau ese oi bona hahine huanai inai heheni karana do lau havaraia bona emu natuna bona hahine ena natuna huanai danu. Ia ese emu kwarana do ia moia patapata bona oi ese iena aena geduna do oi haberoa.”​—Genese 3:15

⁴ Unai hereva ita lalo-pararalaia haraga be auka. Unai hahine be daika? Gaigai be daika? Gaigai ena kwarana do ia moia “natuna” be daika? Adamu bona Heva be unai idia diba lasi. To, Dirava ena hereva ese unai kamonai lasi tau bona hahine edia abidadama  natudia dekenai helaro ia henia. Kara maoromaoro do ia kwalimu. Iehova ena ura do ia guguru. To, edena dala ai? Unai be hehuni herevana! Baibel ia gwau “Dirava ena aonega be . . . hunia hereva helagana lalonai.”​—1 Korinto 2:7.

5. Haheitalai ta amo Iehova ese ena hehuni herevana be metairametaira ia hahedinaraia ena badina oi gwauraia.

⁵ Iehova be “hehuni gaudia ia hahedinaraia Diravana” dainai, gabeai unai hunia gauna ena anina bada herevadia do ia hahedinaraia. (Daniela 2:28) To metairametaira unai do ia karaia. Unai ita haheitalaia totona, lalokau tamana ta ena kara mani ita laloa, ia be edena bamona do ia haere bema ena natuna maragina ese ia nanadaia: “Tamagu, lau be edeseni amo lau mai?” Aonega tamana be natuna maragina ese ia lalo-pararalaia gaudia sibona ia gwauraia. Mero ia bada ia lao neganai, tamana ese ia dekenai gau ma haida ia gwauraia. Unai hegeregerena, Iehova ia abia hidi edena negai ena taunimanima be idia hegeregere iena ura dekenai diba ma haida do idia abia.​—Aonega Herevadia 4:18; Daniela 12:4.

6. (a) Dahaka dainai Dirava ese gwauhamata eiava gwaubou ia karaia? (b) Dahaka dainai Iehova be taunimanima ida gwaubou ia karaia be hoa gauna?

⁶ Iehova ese edena dala ai unai hereva ia hahedinaraia? Ia ese gwauhamata idauidau ia gaukaralaia unai hehuni herevana ia hahedinaraia totona. Reana nega ta ai oi be ma ta ida gwauhamata pepana ta umui sainia—reana ruma ta oi hoia, eiava moni oi abiatorehai eiava heniatorehai totona. Taravatu dainai unai gwauhamata pepana be mai ena siahu, bona unai gwauhamata lalonai umui lalo-tamona gaudia do umui badinaia. To, dahaka dainai Iehova ia ura taunimanima ida gwauhamata ia karaia? Oibe, ia hereva sibona be hegeregere ena gwauhamata ia hamomokania totona. Unai be momokani, to nega haida Dirava ese taravatu hegeregerena ai gwauhamata ia karaia ena hereva ia hagoadaia totona. Unai gwauhamata idauidau—idia makohia diba lasi gaudia—ese ita goevadae lasi taudia dekenai badina aukana ia henia, Iehova ena gwauhamata idauidau ita abidadama henia totona.​—Heberu 6:16-18.

7, 8. (a) Iehova be Aberahamo ida dahaka gwauhamata ia karaia, unai ese hunia hereva helagana dekenai dahaka diba matamatana ia hahedinaraia? (b) Gwauhamata Natuna do ia vara besena be Iehova ese edena dala ai metairametaira ia hahedinaraia?

⁷ Iehova ese taunimanima be Paradaiso amo ia lulua bena lagani 2,000 bamona murinai, ena kamonai hesiai tauna Aberahamo dekenai ia gwau: “Emu bese do lau habadaia momokani guba ena hisiu . . . bamona . . . Emu natuna amo tanobada ena bese ibounai be hahenamo do idia abia, badina oi ese lau oi kamonai henia.” (Genese 22:17, 18) Unai be gwauhamata ta sibona lasi; Iehova ese taravatu hegeregerena ai gwauhamata ta ia karaia bona ia latanai gwauhamata herevana ma ta ia karaia. (Genese 17:1, 2; Heberu 6:13-15) Siahu Ibounai Diravana be taunimanima hanamoa totona gwauhamata ia karaia be hoa gauna!

⁸ Aberahamo gwauhamatana ese ia hahedinaraia, gwauhamata Natuna be taunimanima ta bamona do ia vara, badina ia be Aberahamo ena bese amo do ia mai. To ia be daika? Gabeai, Iehova ia hahedinaraia Aberahamo ena natudia memero amo Isako ena bese amo unai Natuna do ia vara. Isako ena natudia memero rua amo, Iakobo ia abia hidi. (Genese 21:12; 28:13, 14) Gabeai, Iakobo ese ena natudia 12 amo idia ta dekenai unai peroveta herevana ia gwauraia: “Kepata be Iuda amo do idia kokia lasi, lohia tauna ena itotohi danu be ia amo do idia kokia lasi ela bona Silo [eiava “Unai be Iena Gau,” futnout] ia mai, bona taunimanima ese ia do idia kamonai henia.” (Genese 49:10) Unai negai idia diba unai Natuna be king ai do ia lao, bona ia be Iuda besena amo ia mai tauna!

9, 10. (a) Iehova be Israela besena ida dahaka gwauhamata ia karaia, bona unai gwauhamata ese edena bamona idia ia naria? (b) Taravatu ese edena bamona ia hahedinaraia, taunimanima be mauri davalaia boubouna idia abia be namo?

⁹ Lagani 1513 B.C.E. ai, Iehova ese gau ta ia karaia, unai amo dala ia kehoa hehuni herevana dekenai gau ma haida ia hahedinaraia totona. Ia ese Aberahamo ena bese, Israela taudia ida gwauhamata ta ia karaia. Ena be hari Mose ena Taravatu gwauhamatana  ena siahu ia ore, to ia be mai anina bada Iehova ena ura, gwauhamata Natuna mailaia gaukarana dekenai. Edena dala ai? Dala toi mani ita itaia. Ginigunana be, Taravatu be magu goadana ta bamona. (Efeso 2:14) Iena kara maoromaoro taravatudia be magu ta bamona Iuda bona Idau Bese taudia ia hapararadia. Unai dala ai, Taravatu ese gwauhamata Natuna do ia havaraia besena ia naria. Unai naria karana dainai, Dirava ese ia makaia negana, Mesia be Iuda besena amo do ia vara negana ia ginidae neganai, unai Israela bese ia do noho.

¹⁰ Iharuana be, Taravatu ese ia hahedinaraia goevagoeva taunimanima ese mauri davalaia boubouna ta idia abia be namo. Taravatu goevadaena ese ia hahedinaraia, kara dika taudia idia hegeregere lasi taravatu idia badinaia goevagoeva totona. Taravatu ia noho “kara dika ia hahedinaraia totona, ela bona natuna ia ginidae, ia be unai gwauhamata ia abia tauna.” (Galatia 3:19) Animal bouboulaia karana amo, Taravatu ese nega kwadogina lalonai kara dika kokia dalana ia kehoa. To Paulo ena hereva bamona, “boromakau bona nanigosi edia rara ese kara dika idia kokia diba lasi” dainai, unai boubou ese Keriso ena mauri davalaia boubouna ia laulaulaia sibona. (Heberu 10:1-4) Unai dainai kamonai Iuda taudia dekenai, unai gwauhamata be “hakaua tauna ai ia lao, bona Keriso dekenai ita ia hakaua lao.”​—Galatia 3:24.

11. Taravatu gwauhamatana be Israela taudia dekenai dahaka helaro namona ia henia, to dahaka dainai unai bese taudia ibounai ese unai helaro idia abia lasi?

¹¹ Ihatoina be, unai gwauhamata ese Israela taudia dekenai vaira nega namona ia henia. Iehova ese idia ia hamaoroa bema unai gwauhamata idia badinaia, idia be “basileia ena hahelaga taudia bona bese helagana” ai do umui lao. (Esodo 19:5, 6) Guba basileiana ai hahelaga taudia ai do idia lao taudia ginigunadia, be Israela besena korikori amo do idia mai. To, Israela taudia ibounai ese Taravatu gwauhamatana idia badinaia lasi, Natuna Mesia idia dadaraia, bona edia guba helarona idia haboioa. Vadaeni, daidia be unai hahelaga taudia edia namba do idia hagugurua? Bona edena dala ai unai bese be gwauhamata Natuna ida do idia gaukara hebou? Dirava ese ena nega korikori ai, unai hehuni hereva haida do ia hahedinaraia.

12. Iehova be Davida ida dahaka gwauhamata ia karaia, bona Dirava ena hunia hereva helagana dekenai dahaka diba matamatana ia hedinarai?

¹² Lagani 1100 B.C.E. murinai, Iehova ese gwauhamata ma ta ia karaia neganai, unai hehuni herevana dekenai diba ma haida ia hahedinaraia. Abidadama tauna King Davida ia gwauhamata henia, ia gwau: “Lau ese emu natuna ta, emu natuna korikorina be king ai do lau halaoa, bona iena basileia do lau haginia goada momokani. . . . Lau ese ena basileia ena terona do lau haginia goada ela bona hanaihanai.” (2 Samuela 7:12, 13; Salamo 89:3) Dirava ia hahedinaraia inai gwauhamata Natuna be Davida ena bese amo do ia vara. To tanobada tauna ta be do ia lohia ela bona hanaihanai diba, a? (Salamo 89:20, 29, 34-36) Bona unai king ese taunimanima be kara dika bona mase amo do ia hamauria diba, a?

13, 14. (a) Salamo 110 ena hereva bamona, Iehova ese ena horoa King dekenai dahaka gwauhamata ia karaia? (b) Do ia vara Natuna dekenai, Iehova ena peroveta taudia ese dahaka hereva ma haida idia hahedinaraia?

¹³ Lauma helaga ena siahu amo Davida ia gwau: “‘Iehova be egu Lohiabada dekenai ia gwau: “Egu imana idiba kahanai oi helai Ela bona emu inai taudia be emu aena atoa gauna ai lau halaoa.” Iehova be gwauhamata ta ia karaia, bona ena lalona do ia haidaua lasi: “Oi be hahelaga tauna ela bona hanaihanai, Melekisedeka bamona!’” (Salamo 110:1, 4) Unai hereva amo Davida ese gwauhamata Natuna, eiava Mesia ia herevalaia. (Kara 2:35, 36) Unai King be Ierusalema ai do ia lohia lasi, to guba amo Iehova ena “imana idiba” kahana ai do ia lohia. Unai ese ia dekenai siahu ia henia Israela sibona lasi to tanobada ibounai do ia lohiaia totona. (Salamo 2:6-8) Unai siri ai gau ma haida ia hahedinaraia. Mani oi laloatao, Iehova be mai anina bada gwauhamatana ta ia karaia, ia gwau Mesia be “hahelaga tauna, ela bona hanaihanai Melekisedeka bamona!” Aberahamo ena nega ai, Melekisedeka be king bona hahelaga gaukara ia karaia hegeregerena, ia mai noho Natuna be Dirava ese ia abia hidi King bona Hahelaga gaukarana do ia karaia!​—Genese 14:17-20.

¹⁴ Idia hanaia laganidia lalonai, Iehova ese ena peroveta taudia ia gaukaralaia unai hehuni herevana dekenai hereva ma haida idia hahedinaraia totona. Hegeregere, Isaia ia gwau unai Natuna  be ena mauri do ia bouboulaia. (Isaia 53:3-12) Mika ese Mesia do ia vara gabuna ia perovetalaia. (Mika 5:2) Daniela ese Natuna do ia hedinarai bona mase negana korikorina ia perovetalaia danu.​—Daniela 9:24-27.

15, 16. (a) Edena dala ai Iehova ena Natuna be “hahine ta amo ia vara”? (b) Iesu be ena tanobada tama sina amo dahaka ia abia, bona edena negai ia be gwauhamata Natuna ai ia lao?

¹⁵ Unai peroveta herevadia do idia guguru dalana be ta ia diba lasi ela bona Natuna ia hedinarai. Galatia 4:4 ia gwau: “Nega korikori ia ginidae neganai, Dirava ese ena Natuna ia siaia, ia be hahine ta amo ia vara.” Lagani 2 B.C.E. ai, aneru ta ese Iuda rami-hebou kekenina Maria, ia hamaoroa: “Kamonai! Oi be do oi rogorogo bona natuna mero ta do oi havaraia bona iena ladana do oi hatoa Iesu. Ia be hairai bada do ia abia bona do idia gwauraia Ataiai Momokani Diravana ena Natuna, bona Iehova Dirava ese ia dekenai ena tamana Davida ena terona do ia henia, . . . Lauma helaga be oi latanai do ia diho, bona Ataiai Momokani Diravana ena siahu ese oi do ia koua. Bona unai dainai, ia vara natuna be do idia gwauraia helaga, Dirava ena Natuna.”​—Luka 1:31, 32, 35.

¹⁶ Gabeai, Iehova ese ena Natuna ena mauri be guba amo ia kokia bona Maria ena bogana lalonai ia atoa, unai dala amo ia be hahine ta amo ia vara. Maria be goevadae lasi hahinena ta. To, Iesu be ia amo kara dika ia abia lasi, badina ia be “Dirava ena Natuna.” Danu, Iesu ena tama sina be Davida ena bese amo idia vara dainai, taravatu hegeregerena Iesu be mai ena maoro Davida ena tubuna ta ai ia lao. (Kara 13:22, 23) Lagani 29 C.E. ai, Iesu be bapatiso ia abia neganai, Iehova ese lauma helaga amo ia horoa bona ia gwau: “Inai be egu Natuna, egu lalokau.” (Mataio 3:16, 17) Natuna ia ginidae unai! (Galatia 3:16) Unai hehuni herevana dekenai hereva ma haida ia hahedinaraia negana ia ginidae.​—2 Timoteo 1:10.

17. Genese 3:15 ena anina be edena bamona ia hedinarai?

¹⁷ Iesu ena hesiai gaukara lalonai, ia hahedinaraia Genese 3:15 ese ia gwauraia gaigaina be Satani, bona gaigai ena natudia be Satani ena murinai idia raka taudia. (Mataio 23:33; Ioane 8:44) Gabeai  ia hedinarai, unai taudia ibounai be do idia mase ore momokani. (Apokalupo 20:1-3, 10, 15) Bona hahine be “ataiai Ierusalema,” eiava Dirava ena adavana—unai be Iehova ena guba oreana, ia lalonai lauma taudia idia noho. a—Galatia 4:26; Apokalupo 12:1-6.

18. “Gwaubou matamatana” ena gaukara be dahaka?

¹⁸ Iesu ia do mase lasi hanuaboina ai, unai hehuni herevana dekenai hoa gauna ia hahedinaraia, ia ese ena kamonai hahediba taudia dekenai “gwaubou matamatana” ia gwauraia. (Luka 22:20) Mose ena Taravatu gwauhamatana bamona, inai gwauhamata matamatana ese “basileia ena hahelaga taudia” do ia havaraia. (Esodo 19:6; 1 Petero 2:9) To, unai gwaubou be tanobada besena ta totona ia karaia lasi, to lauma besena, unai be“Dirava ena Israela” totona, idia be Keriso ena murinai idia raka kamonai horoa taudia. (Galatia 6:16) Unai gwaubou matamatana lalonai idia noho taudia be Iesu ida do idia gaukara hebou, tanobada taudia idia durua totona!

19. (a) Dahaka dainai gwaubou matamatana ese “basileia ena hahelaga taudia” haginia gaukarana dekenai ia kwalimu? (b) Dahaka dainai Baibel ese horoa Keristani taudia ia gwauraidia Dirava ese ia “havaraia tauna matamatana” bona hida be Keriso ida guba ai do idia lohia?

¹⁹ To dahaka dainai gwaubou matamatana be taunimanima do idia hanamoa “basileia ena hahelaga taudia” haginia gaukarana dekenai ia kwalimu? Badina ena be Keriso ena hahediba taudia be mai edia kara dika, to gwauhamata matamatana ese idia ia gwauraia dika lasi, iena boubou amo dala ia kehoa edia kara dika ia gwauatao totona. (Ieremia 31:31-34) Iehova vairanai idia goeva neganai, ena guba besena lalonai ia abidia vareai bona ena lauma helaga amo ia horodia. (Roma 8:15-17; 2 Korinto 1:21) Unai dala amo “mauri noho helarona ia henia . . . guba dekenai ia noho hegaegae” gauna do idia abia. (1 Petero 1:3, 4) Tanobada taudia dekenai unai dagi bada be gau matamatana dainai, lauma  helaga ese ia horoa Keristani taudia be Baibel ese ia gwauraidia Dirava ese ia “havaraia tauna matamatana.” (2 Korinto 5:17) Baibel ese ia hahedinaraia, 144,000 taudia be Iesu ida guba amo ia ese ia hoia lou taudia do idia lohiaia.​—Apokalupo 5:9, 10; 14:1-4.

20. (a) Lagani 36 C.E. ai, dahaka hehuni hereva helagana ma ta ia hedinarai? (b) Dirava ese Aberahamo dekenai ia gwauhamatalaia hahenamodia be daidia ese do idia moalelaia?

²⁰ Horoa taudia be Iesu ida “Aberahamo ena natudia” ai idia lao. b (Galatia 3:29) Ia abia hidi taudia ginigunadia be Iuda besena taudia. To lagani 36 C.E. ai, hehuni herevana ena kahana ma ta ia hedinarai: Idau Bese taudia, eiava Iuda lasi taudia, be guba helarona do idia abia danu. (Roma 9:6-8; 11:25, 26; Efeso 3:5, 6) Dirava ese Aberahamo dekenai ia gwauhamatalaia hahenamodia be horoa Keristani taudia sibodia ese do idia moalelaia, a? Lasi, badina Iesu ena boubou ese tanobada taudia ibounai ia durua. (1 Ioane 2:2) Gabeai Iehova ese ia hahedinaraia, duahia diba lasi “hutuma bada” taudia be Satani ena tanobada dikana ena dokona amo do idia roho mauri. (Apokalupo 7:9, 14) Taunimanima momo herea be do idia toreisi lou bona Paradaiso dekenai do idia noho ela bona hanaihanai!​—Luka 23:43; Ioane 5:28, 29; Apokalupo 20:11-15; 21:3, 4.

21, 22. Edena dala idauidau ai Iehova ena hehuni hereva helagana ese ena aonega ia hahedinaraia?

²¹ Unai hehuni hereva helagana be “Dirava ese dala idauidau ai ia hahedinaraia aonega.” (Efeso 3:8-10) Iehova ese unai hehuni herevana ia karaia bena metairametaira ia hahedinaraia, unai be aonega bada karana! Mai aonega ida taunimanima edia diba ena hetoana ia laloa, nega ia henia edia kudouna ena ura korikori idia hedinarai totona.​—Salamo 103:14.

²² Iehova ese Iesu be King totona ia abia hidi neganai danu, aonega bada ia hahedinaraia. Guba bona tanobada ai idia noho  taudia ibounai amo, Iehova ena Natuna ita abidadama henia bada. Iesu be tanobada tauna ta bamona ia noho neganai, hahetoho idauidau momo ia davaria. Taunimanima edia hekwakwanai ibounai ia diba. (Heberu 5:7-9) Bona Iesu ida do idia lohia taudia be edena bamona? Lagani handred momo lalonai, tatau bona hahine—bese, gado, bona mauri daladia idauidau taudia—be Iehova ese ia horoa. Hekwakwanai iboudiai be idia ta ta ese idia davaria bona idia haheaukalaia vadaeni. (Efeso 4:22-24) Unai hebogahisi king bona hahelaga taudia edia lohia henunai do ita noho be moale gauna!

23. Iehova ena hehuni hereva helagana dainai Keristani taudia be dahaka hahenamo idia abia?

²³ Aposetolo Paulo ia gwau: “Nega oromana gunana bona uru gunadia dekenai unai hunia hereva helagana be idia hedinarai lasi. To hari iena helaga taudia dekenai unai ia hahedinaraia.” (Kolose 1:26) Oibe, Iehova ena helaga horoa taudia be unai hehuni herevana ena gau momo idia lalo-pararalaia vadaeni, bona unai diba be taunimanima milioni momo dekenai idia herevalaia. Unai be hahenamo ta ita ibounai dekenai! Iehova ese ita dekenai “hunia hereva helagana be ita dekenai ia hahedinaraia.” (Efeso 1:9) Namona be unai hehuni herevana namo hereana be ma haida dekenai ita gwauraia, idia ita durua Iehova Dirava ena aonega bada hereana idia itaia totona!