1, 2. Nĩ “hitho” ĩrĩkũ ya Ngai ĩbatiĩ gũtũgucĩrĩria, na nĩkĩ?

 HITHO nĩ igucagĩrĩria andũ kwenda gũcimenya na ndũkoragwo ũrĩ ũndũ mũhũthũ gũkira nacio. O na kũrĩ ũguo, Bibilia yugaga ũũ: “Riri wa Ngai nĩ kũiga ũndũ ũrĩ hitho.” (Thimo 25:2) Arĩ we Mwathani Ũrĩa Mũnene na Mũũmbi, Jehova arĩ na kĩhooto gĩa kũiga maũndũ mamwe marĩ hitho nginya ihinda rĩrĩa rĩagĩrĩire rĩa kũmaguũria rĩkinye.

² No nĩ harĩ hitho ĩmwe ya magegania Jehova aguũrĩtie thĩinĩ wa Kiugo gĩake. Ĩtagwo “hitho ĩrĩa theru ĩgiĩ wendi [wa Ngai].” (Aefeso 1:9) Kwĩruta ũhoro ũmĩgiĩ nĩ ũndũ wa gũcanjamũra. Kũmenya hitho ĩyo no gũtũteithie gũkaahonoka na gũtũteithie kuona atĩ Jehova nĩ akoragwo na ũũgĩ mũingĩ.

3, 4. Ũrathi ũrĩa ũrĩ thĩinĩ wa Kĩambĩrĩria 3:15 waheanire mwĩhoko na njĩra ĩrĩkũ, na nĩ “hitho” ĩrĩkũ yarĩ thĩinĩ waguo?

³ Rĩrĩa Adamu na Hawa meehirie, nĩ kũngĩonekire ta muoroto wa Jehova wa gũtũma thĩ ĩtuĩke paradiso ĩrĩ na andũ akinyanĩru waharagana. No hĩndĩ o ĩyo, Ngai akĩoya ikinya rĩa kũrũnga maũndũ. Ooigire ũũ: “Nĩ ngũtũma kũgĩe ũthũ gatagatĩ-inĩ gaku [nyoka] na mũtumia na gatagatĩ-inĩ ka mbeũ yaku na mbeũ yake. Nĩ ĩgaakũhehenja mũtwe, nawe nĩ ũkaamĩguraria ndiira ya kũgũrũ.”—Kĩambĩrĩria 3:15.

⁴ Ciugo icio itiarĩ hũthũ gũtaũkĩrũo nĩcio. Hihi mũtumia ũcio aarĩ ũ? Ĩ nayo nyoka yarĩ ũ? Nayo “mbeũ” ĩrĩa ĩngĩkaahehenja nyoka mũtwe yarĩ ũ? Ũndũ ũrĩa Adamu na Hawa mangĩekire no gwĩcirĩria. O na kũrĩ ũguo, ciugo icio cia Ngai nĩ ciaheanire mwĩhoko kũrĩ njiarũa ciao iria ingĩgakorũo irĩ njĩhokeku. Ũthingu nĩ ũngĩkaahootana, na muoroto wa Jehova ũhinge. No ũngĩkaahinga atĩa? Ũndũ ũcio warĩ kĩriga. Bibilia  ĩwĩtaga “ũũgĩ wa Ngai ũrĩa ũrĩ hitho-inĩ theru, ũũgĩ ũrĩa mũhithe.”—1 Akorintho 2:7.

5. Heana ngerekano ya kuonania gĩtũmi kĩa Jehova kũguũria hitho yake o kahora.

⁵ Arĩ we “Mũguũria wa hitho,” Jehova nĩ angĩaguũririe maũndũ maingĩ megiĩ ũrĩa ũndũ ũcio ũngĩahingire. (Danieli 2:28) No angĩekire ũguo o kahora, ikinya gwa ikinya. Kwa ngerekano, no twĩcirie ũrĩa mũciari wĩ wendo angĩcokeria kahĩĩ gake kanini kangĩmũũria atĩrĩ, “Baba, ndoimire kũ?” Mũciari mũũgĩ aheaga mũrũwe ũhoro ũrĩa tu angĩhota gũtaũkĩrũo nĩguo. No o ũrĩa kahĩĩ kau karathiĩ gagĩkũraga, agakahe ũhoro makĩria. Na njĩra o ta ĩyo, Jehova nĩ athuuraga ihinda rĩrĩa rĩagĩrĩire rĩa kũguũrĩria andũ ake wendi wake na muoroto wake.—Thimo 4:18; Danieli 12:4.

6. (a) Muoroto wa kũgĩa na kĩrĩkanĩro kana kwandĩkanĩra ũndũ nĩ ũrĩkũ? (b) Jehova aathondekire irĩkanĩro na andũ nĩkĩ?

⁶ Jehova aaguũririe maũndũ macio atĩa? Aahũthĩrire irĩkanĩro irũmanĩrĩire. No kũhoteke mwanandĩkanĩra ũndũ na mũndũ kana mũkagĩa na kĩrĩkanĩro, ta hihi gĩa kũgũra mũgũnda, kana gũkomba na gũkombanĩra mbeca. Gwĩka ũguo gwekĩrire ũndũ ũcio hinya kĩĩwatho na gũkĩonania atĩ ũndũ ũrĩa mwandĩkanĩra no mũhaka ũhingio. No Jehova aabataraga gũthondeka kĩrĩkanĩro na andũ nĩkĩ? Jehova angĩranĩra ũndũ, hatarĩ nganja no nginya ũhinge. No o na kũrĩ ũguo, maita maigana ũna Ngai nĩ ekĩrĩte uuge wake hinya akĩhũthĩra irĩkanĩro. Irĩkanĩro icio itangĩgarũrĩka nĩ iheaga andũ matarĩ akinyanĩru mũthingi mũrũmu wa gwĩtĩkia atĩ no nginya Jehova akaahingia ciĩranĩro ciake.—Ahibirania 6:16-18.

7, 8. (a) Nĩ kĩrĩkanĩro kĩrĩkũ Jehova aathondekire na Iburahimu, na kĩaguũririe ũndũ ũrĩkũ wĩgiĩ hitho ya Ngai? (b) Jehova oonanirie atĩa ikinya gwa ikinya rũciaro rũrĩa Mbeũ ĩngĩkoimana naruo?

⁷ Makĩria ma mĩaka ngiri igĩrĩ thutha wa andũ kũingatwo  Paradiso, Jehova eerire Iburahimu ndungata yake njĩhokeku ũũ: “Hatarĩ nganja nĩ ngaaingĩhia mbeũ yaku o ta njata cia igũrũ . . . Na kũgerera harĩ mbeũ yaku ndũrĩrĩ ciothe cia thĩ nĩ ikeegwatĩra kĩrathimo tondũ wee nĩ ũthikĩrĩirie mũgambo wakwa.” (Kĩambĩrĩria 22:17, 18) Kĩu gĩtiarĩ o kĩĩranĩro tu; Jehova aakĩgwetire na njĩra ya kĩrĩkanĩro na agĩgĩĩkĩra hinya na mwĩhĩtwa wake. (Kĩambĩrĩria 17:1, 2; Ahibirania 6:13-15) Na githĩ ũcio ti ũndũ wa mwanya mũno kuona atĩ Mwathani Ũrĩa Mũnene nĩ aathondekire kĩrĩkanĩro gĩa kĩĩwatho kĩa atĩ nĩ akaarathima andũ!

⁸ Kĩrĩkanĩro gĩake kũrĩ Iburahimu kĩaguũririe atĩ Mbeũ ĩrĩa yeranĩirũo ĩngĩgakorũo ĩrĩ mũndũ, tondũ angĩkoimana na rũciaro rwa Iburahimu. No hihi angĩgaakorũo arĩ ũ? Thutha wa ihinda, Jehova nĩ aaguũririe atĩ gatagatĩ-inĩ ka ariũ a Iburahimu, Isaaka nĩwe ũngĩkoimĩria Mbeũ ĩyo kũgerera rũciaro rwake. Na harĩ ariũ a Isaaka, Jakubu nĩwe wathuurirũo. (Kĩambĩrĩria 21:12; 28:13, 14) Thutha-inĩ, Jakubu nĩ aagwetire ciugo ici cia ũrathi igũrũ rĩgiĩ mũriũ wake ũmwe harĩ arĩa 12: “Mũthĩgi ndũkehera harĩ Juda, o na kana rũthanju rwa wathani rwehere gatagatĩ ka magũrũ make, o nginya rĩrĩa Shilo [kana, “Ũrĩa Mwene Guo,” kohoro ka magũrũ-inĩ] agooka, na nĩwe ũgaathĩkagĩrũo nĩ ikundi cia andũ.” (Kĩambĩrĩria 49:10) Gũkinyĩria hau gũkĩmenyeka atĩ Mbeũ ĩyo ĩngĩgaakorũo ĩrĩ mũthamaki, kuuma mũhĩrĩga-inĩ wa Juda!

9, 10. (a) Jehova aathondekire kĩrĩkanĩro kĩrĩkũ hamwe na rũrĩrĩ rwa Isiraeli, na kĩrĩkanĩro kĩu kĩarĩ na ũgitĩri ũrĩkũ? (b) Watho woonanirie atĩa atĩ andũ nĩ maabataraga ũkũũri?

⁹ Mwaka-inĩ wa 1513 M.M.M., Jehova nĩ aabangire ũndũ ũngĩ ũrĩa ũngĩaguũririe hitho yake makĩria. Nĩ aathondekire kĩrĩkanĩro hamwe na rũciaro rwa Iburahimu, nĩruo rũrĩrĩ rwa Isiraeli. O na gũtuĩka ũmũthĩ gĩtirũmagĩrĩrũo, kĩrĩkanĩro kĩa Watho wa Musa kĩarĩ kĩa bata harĩ kũhingia muoroto wa Jehova wa kũrehe Mbeũ ĩyo. Na njĩra ĩrĩkũ? Wĩcirie ũhoro wa njĩra ici ithatũ. Ya mbere, Watho wahaanaga ta rũthingo rwa kũmagitĩra.  (Aefeso 2:14) Ithimi ciaguo cia ũthingu ciahaanaga ta rũthingo rwa kũgayũkania Ayahudi na andũ a Ndũrĩrĩ. Na njĩra ĩyo Watho ũcio nĩ wagitĩrire rũrĩrĩ rwa Isiraeli rũrĩa mbeũ ĩrĩa yeranĩirũo ĩngĩoimanire naruo, na kwoguo rũrĩrĩ rũu rwarĩ o kuo nginya ihinda rĩrĩa Ngai aaigĩte rĩgĩkinya rĩa gũciarũo kwa Mesia mũhĩrĩga-inĩ wa Juda.

¹⁰ Ya kerĩ, Watho nĩ woonanirie wega biũ atĩ andũ nĩ maabataraga ũkũũri. Tondũ warĩ Watho mũkinyanĩru, nĩ woonanirie atĩ andũ matarĩ akinyanĩru matingĩahotire kũũrũmĩrĩra biũ. Kwoguo nĩ watũmaga “mahĩtia mamenyeke, o nginya rĩrĩa mbeũ ĩrĩa yerĩirũo kĩĩranĩro kĩu ĩngĩgaakinya.” (Agalatia 3:19) Kũgerera magongona ma nyamũ, Watho nĩ watũmaga mehia mahumbĩrũo ihinda-inĩ rĩu. No tondũ “thakame ya ndegwa na ya mbũri ndĩngĩhota kweheria mehia,” magongona macio maarũgamagĩrĩra igongona rĩa Kristo rĩa ũkũũri. (Ahibirania 10:1-4) Kwoguo, harĩ Ayahudi arĩa maarĩ ehokeku, kĩrĩkanĩro kĩu kĩarĩ ‘mũreri wa kũmatongoria kũrĩ Kristo.’—Agalatia 3:24.

11. Kĩrĩkanĩro kĩa Watho kĩaheire Aisiraeli kĩĩrĩgĩrĩro kĩrĩkũ kĩa mwanya, na moorirũo nĩ kĩĩrĩgĩrĩro kĩu nĩkĩ?

¹¹ Ya gatatũ, kĩrĩkanĩro kĩu nĩ gĩatũmire Aisiraeli makorũo na kĩĩrĩgĩrĩro kĩa mwanya. Jehova aameerire atĩ mangĩathĩkĩire kĩrĩkanĩro kĩu, mangĩatuĩkire “ũthamaki wa athĩnjĩri-Ngai na [matuĩke] rũrĩrĩ rwamũre.” (Thama 19:5, 6) Mũthia-inĩ, Aisiraeli nĩo maarutire andũ a mbere a gũtungata marĩ athĩnjĩri-Ngai na athamaki kũũrĩa igũrũ. No marĩ ta rũrĩrĩ, Aisiraeli nĩ maaregire gwathĩkĩra kĩrĩkanĩro kĩu kĩa Watho, makĩrega Mesia, na nĩ ũndũ ũcio makĩũrũo nĩ kĩĩrĩgĩrĩro kĩu. Gũkĩrĩ ũguo-rĩ, nĩ a mangĩkaiyũria gĩkundi kĩu kĩa athĩnjĩri-Ngai na athamaki? Na rũrĩrĩ rũu rũngĩgakorũo rũhutanĩtie atĩa na Mbeũ ĩrĩa yeranĩirũo? Maũndũ macio megiĩ hitho ya Ngai nĩ mangĩkaguũrio ihinda-inĩ rĩake rĩrĩa rĩagĩrĩire.

12. Jehova aathondekire kĩrĩkanĩro kĩrĩkũ na Daudi, na kĩaguũririe ũndũ ũrĩkũ wĩgiĩ hitho ya Ngai?

¹² Karine-inĩ ya 11 M.M.M., Jehova nĩ aaheanire ũtheri makĩria  wĩgiĩ hitho yake rĩrĩa aathondekire kĩrĩkanĩro kĩngĩ. Eerire Mũthamaki Daudi ũũ: “Nĩ ngaarahũra mbeũ yaku ĩrĩa ĩgooka thutha waku, . . . na nĩ ngaahanda ũthamaki wake ũrũme biũ. . . . Nĩ ngaahanda gĩtĩ kĩa ũnene kĩa ũthamaki wake kĩrũme tene na tene.” (2 Samueli 7:12, 13; Thaburi 89:3) Gũkinyĩria hau, mbeũ ĩrĩa yeranĩirũo ĩkĩmenyeka atĩ ĩngĩkoimana na nyũmba ya Daudi. No hihi nĩ kũrĩ mũndũ ũngĩahotire gwathana tene na tene? (Thaburi 89:20, 29, 34-36) Na hihi mũndũ ta ũcio nĩ angĩahotire kũhonokia andũ kuuma kũrĩ mehia na gĩkuũ?

13, 14. (a) Kũringana na Thaburi 110, nĩ kĩĩranĩro kĩrĩkũ Jehova aaheire Mũthamaki wake mũitĩrĩrie maguta? (b) Nĩ maũndũ marĩkũ mangĩ Jehova aaguũririe megiĩ mbeũ ĩrĩa yeranĩirũo kũgerera anabii?

¹³ Daudi aandĩkire ũũ atongoretio nĩ roho: “Jehova nĩ eerire Mwathani wakwa atĩrĩ: ‘Ikara thĩ guoko-inĩ gwakwa kwa ũrĩo nginya rĩrĩa ngaatũma thũ ciaku ituĩke gaturũa ka magũrũ maku.’ Jehova nĩ ehĩtĩte mwĩhĩtwa, na ndangĩcenjia meciria, oigĩte: ‘Wee ũrĩ mũthĩnjĩri-Ngai tene na tene o ta ũrĩa Melikisedeki aatariĩ!’” (Thaburi 110:1, 4) Ciugo cia Daudi ciaragia ĩmwe kwa ĩmwe igũrũ rĩgiĩ mbeũ ĩrĩa yeranĩirũo, nĩyo Mesia. (Atũmwo 2:35, 36) Mũthamaki ũcio angĩgaathana kuuma igũrũ arĩ ‘guoko-inĩ kwa ũrĩo’ kwa Jehova, no ti kuuma Jerusalemu. Nĩ ũndũ ũcio, angĩgaakorũo agĩathana ituri ciothe cia thĩ, no to bũrũri wa Isiraeli wiki. (Thaburi 2:6-8) Ciugo icio nĩ ciaguũririe ũndũ ũngĩ. Ta rora wone atĩ Jehova eehĩtire akiuga atĩ Mesia angĩgaatuĩka “mũthĩnjĩri-Ngai . . . o ta ũrĩa Melikisedeki aatariĩ.” O ta Melikisedeki, ũrĩa watungataga arĩ mũthĩnjĩri-Ngai na mũthamaki matukũ-inĩ ma Iburahimu, mbeũ ĩyo yeranĩirũo ĩngĩkamũrũo nĩ Ngai ĩtuĩke Mũthamaki na Mũthĩnjĩri-Ngai!—Kĩambĩrĩria 14:17-20.

¹⁴ Ihinda-inĩ rĩa mĩaka mĩingĩ, Jehova nĩ aahũthĩrire anabii ake gũthiĩ aguũrĩtie hitho yake makĩria. Kwa ngerekano, Isaia nĩ aaguũririe atĩ mbeũ ĩyo nĩ ĩngĩkaaruta muoyo wayo ũrĩ igongona. (Isaia 53:3-12) Mika nake nĩ aarathĩte kũrĩa Mesia angĩgaaciarĩrũo. (Mika 5:2) Nake Danieli nĩ aarathire ihinda rĩrĩa Mesia angĩkoneka na rĩrĩa angĩgakua.—Danieli 9:24-27.

15, 16. (a) Gwathiire atĩa Mũrũ wa Jehova ‘agĩciarũo nĩ mũtumiaʼ? (b) Jesu aagaire kĩĩ kuuma kũrĩ aciari ake, na aatuĩkire mbeũ ĩrĩa yeranĩirũo rĩ?

¹⁵ Ũhoro wĩgiĩ ũrĩa morathi macio mangĩahingire watũũrĩte ũrĩ kĩriga nginya hĩndĩ ĩrĩa mbeũ ĩyo yokire. Agalatia 4:4 yugaga ũũ: “Rĩrĩa mũthia wa ihinda rĩrĩa rĩatuĩtwo wakinyire, Ngai nĩ aatũmire Mũrũwe, ũrĩa waciarirũo nĩ mũtumia.” Mwaka-inĩ wa 2 M.M.M., mũraika nĩ ooimĩrĩire mũirĩtu gathirange wetagwo Mariamu akĩmwĩra ũũ: “Atĩrĩrĩ, nĩ ũkũgĩa nda na ũciare mwana wa kahĩĩ, na ũkaamwĩta Jesu. Ũcio agaakorũo arĩ mũnene na ageetwo Mũrũ wa Ũrĩa ũrĩ Igũrũ Mũno, na Jehova Ngai nĩ akaamũhe gĩtĩ kĩa ũnene gĩa ithe Daudi . . . Roho mũtheru nĩ ũgũka igũrũ rĩaku, na hinya wa Ũrĩa ũrĩ Igũrũ Mũno nĩ ũgũkũhumbĩra. Na nĩ ũndũ ũcio ũrĩa ũgaaciarũo ageetwo mũtheru, Mũrũ wa Ngai.”—Luka 1:31, 32, 35.

¹⁶ Thutha-inĩ, Jehova nĩ aathamirie muoyo wa Mũrũwe kuuma igũrũ nginya thĩinĩ wa nda ya Mariamu, kwoguo agĩciarũo nĩ mũtumia. Mariamu aarĩ mũirĩtu ũtaarĩ mũkinyanĩru. O na kũrĩ ũguo, Jesu ndaagaire kwaga gũkinyanĩra kuuma kũrĩ nyina, tondũ aarĩ “Mũrũ wa Ngai.” No ningĩ, tondũ aciari a Jesu maarĩ a rũciaro rwa Daudi, nĩ maatũmire Jesu agĩe kĩhooto gĩa gũtuĩka mũgai wa Daudi. (Atũmwo 13:22, 23) Rĩrĩa Jesu aabatithirio mwaka-inĩ wa 29 M.M., Jehova nĩ aamũitĩrĩirie maguta kũgerera roho mũtheru na akiuga ũũ: “Ũyũ nĩ Mũrũ wakwa, ũrĩa nyendete.” (Mathayo 3:16, 17) Hĩndĩ ĩyo nĩ rĩo mbeũ ĩrĩa yeranĩirũo yakinyire! (Agalatia 3:16) Na ihinda rĩgĩkinya rĩa kũguũria ũhoro makĩria wĩgiĩ hitho ya Ngai.—2 Timotheo 1:10.

17. Nĩ ũndũ ũrĩkũ waguũririo wĩgiĩ arĩa magwetetwo thĩinĩ wa Kĩambĩrĩria 3:15?

¹⁷ Ũtungata-inĩ wake, Jesu nĩ oonanirie wega atĩ nyoka ĩrĩa ĩgwetetwo thĩinĩ wa Kĩambĩrĩria 3:15 nĩ Shaitani, nayo mbeũ yayo nĩ arũmĩrĩri a Shaitani. (Mathayo 23:33; Johana 8:44) Thutha-inĩ, nĩ kwaguũririo ũrĩa Shaitani na arũmĩrĩri ake mangĩkaniinwo kaimana. (Kũguũrĩrio 20:1-3, 10, 15)  Na gũkĩonanio atĩ mũtumia ũrĩa ũgwetetwo, nĩ “Jerusalemu ya igũrũ,” na nĩyo gĩcunjĩ kĩa igũrũ gĩa ithondeka rĩa Jehova gĩa ciũmbe cia kĩĩroho. a—Agalatia 4:26; Kũguũrĩrio 12:1-6.

18. Muoroto wa “kĩrĩkanĩro kĩrĩa kĩerũ” nĩ ũrĩkũ?

¹⁸ No kũhoteke hitho ĩrĩa theru yaguũririo wega makĩria ũtukũ wa mũthia Jesu atanoragwo, rĩrĩa eerire arutwo ake ũhoro wa “kĩrĩkanĩro kĩrĩa kĩerũ.” (Luka 22:20) O ta kĩrĩkanĩro kĩrĩa kĩa Watho wa Musa, kĩrĩkanĩro gĩkĩ kĩerũ nĩ kĩngĩgaatũma kũgĩe na “ũthamaki wa athĩnjĩri-Ngai.” (Thama 19:6; 1 Petero 2:9) O na kũrĩ ũguo, kĩrĩkanĩro kĩu kĩngĩgaakorũo kĩrĩ kĩa rũrĩrĩ rwa kĩĩroho, “Isiraeli a Ngai,” na nĩo arũmĩrĩri ehokeku a Kristo arĩa aitĩrĩrie maguta, no ti andũ a rũrĩrĩ rwa Isiraeli. (Agalatia 6:16) Arĩa marĩ kĩrĩkanĩro-inĩ kĩu mangĩkanyitanĩra na Jesu kũrehera andũ irathimo.

19. (a) Nĩ kĩĩ gĩtũmaga kĩrĩkanĩro kĩrĩa kĩerũ kĩhote gũtũma kũgĩe na “ũthamaki wa athĩnjĩri-Ngai”? (b) Akristiano arĩa aitĩrĩrie maguta metĩtwo “kĩũmbe kĩerũ” nĩkĩ, na nĩ aigana magaathana hamwe na Kristo kũrĩa igũrũ?

¹⁹ Nĩ kĩĩ gĩtũmaga kĩrĩkanĩro kĩu kĩhote gũtũma kũgĩe na “ũthamaki wa athĩnjĩri-Ngai” ũrĩa ũkaarehera andũ irathimo? Nĩ tondũ gĩtituagĩra arũmĩrĩri a Kristo atĩ o nĩ ehia, no gĩtũmaga mahote kuoherũo mehia mao kũgerera igongona rĩrĩa aarutire. (Jeremia 31:31-34) Thutha wa Jehova kũmatua athingu maitho-inĩ make, atũmaga matuĩke gĩcunjĩ kĩa famĩlĩ yake ya igũrũ, na akamaitĩrĩria maguta kũgerera roho wake. (Aroma 8:15-17; 2 Akorintho 1:21) Na njĩra ĩyo, ‘maciaragwo rĩngĩ nĩguo magĩe na kĩĩrĩgĩrĩro kĩrĩ muoyo kĩrĩa maigĩirũo kũrĩa igũrũ.’ (1 Petero 1:3, 4) Akristiano acio aitĩrĩrie maguta metĩtwo  “kĩũmbe kĩerũ,” tondũ andũ moombĩtwo matũũrage gũkũ thĩ. (2 Akorintho 5:17) Bibilia nĩ ĩguũragia atĩ andũ 144,000 nĩ magaathana hamwe na Jesu kũũrĩa igũrũ.—Kũguũrĩrio 5:9, 10; 14:1-4.

20. (a) Nĩ ũndũ ũrĩkũ wĩgiĩ hitho ya Ngai waguũririo mwaka-inĩ wa 36 M.M.? (b) Nĩa magaakenera irathimo iria cierĩirũo Iburahimu?

²⁰ Marĩ hamwe na Jesu, Akristiano acio aitĩrĩrie maguta matuĩkaga “mbeũ ya Iburahimu.” b (Agalatia 3:29) Andũ a mbere gũthuurũo maarĩ Ayahudi. No mwaka-inĩ wa 36 M.M., nĩ kwaguũririo ũndũ ũngĩ wĩgiĩ hitho ya Ngai: Andũ a ndũrĩrĩ, nĩo arĩa matarĩ Ayahudi, o nao nĩ mangĩkagĩa na kĩĩrĩgĩrĩro gĩa gũthiĩ igũrũ. (Aroma 9:6-8; 11:25, 26; Aefeso 3:5, 6) Hihi Akristiano aitĩrĩrie maguta no o tu mangĩgakenera irathimo iria cierĩirũo Iburahimu? Aca, tondũ igongona rĩa Jesu rĩgunaga kĩrĩndĩ gĩa thĩ gĩothe. (1 Johana 2:2) Thutha wa ihinda, Jehova nĩ aaguũririe atĩ andũ “kĩrĩndĩ kĩnene” nĩ mangĩkahonoka rĩrĩa mũtabarĩre ũyũ wa Shaitani ũkaaniinwo. (Kũguũrĩrio 7:9, 14) Andũ angĩ aingĩ nĩ mangĩkariũkio marĩ na kĩĩrĩgĩrĩro gĩa gũgatũũra Paradiso tene na tene!—Luka 23:43; Johana 5:28, 29; Kũguũrĩrio 20:11-15; 21:3, 4.

21, 22. Ũũgĩ wa Jehova ũguũrĩtio nĩ hitho yake na njĩra ĩrĩkũ?

²¹ Hitho ya Ngai nĩ yonanagia na njĩra nene “ũũgĩ wa Ngai ũrĩa wonanagio na njĩra nyingĩ itiganĩte.” (Aefeso 3:8-10) Githĩ Jehova ndakĩonanĩtie ũũgĩ mũnene harĩ ũrĩa aabangire hitho ĩyo, na ũrĩa aacokire akĩmĩguũria ikinya gwa ikinya! Aahũthĩrire ũũgĩ kũmenya na kũhe andũ maũndũ marĩa mangĩahotire gũtaũkĩrũo nĩmo, akĩmarekaga monanie kĩrĩa kĩrĩ ngoro-inĩ ciao.—Thaburi 103:14.

²² Jehova ningĩ nĩ oonanirie ũũgĩ mũnene rĩrĩa aathuurire  Jesu atuĩke Mũthamaki. Mũriũ wa Jehova nĩ wa kwĩhokeka gũkĩra kĩũmbe kĩngĩ o gĩothe igũrũ na thĩ. Jesu nĩ aacemanirie na magerio na moritũ maingĩ rĩrĩa aatũũraga gũkũ thĩ arĩ mũndũ. Nĩ ataũkagĩrũo wega nĩ mathĩna marĩa andũ mageragĩra. (Ahibirania 5:7-9) Ĩ nao arĩa magaathamaka hamwe nake? Ihinda-inĩ rĩa mĩaka mĩingĩ, athuri na atumia mathuurĩtwo kuuma ndũrĩrĩ-inĩ ciothe, thiomi, na mĩrerere ĩtiganĩte, nĩ maitĩrĩirio maguta. Amwe ao manacemania na moritũ o ta marĩa tũcemanagia namo na makĩmatooria. (Aefeso 4:22-24) Na githĩ gĩtigakorũo kĩrĩ gĩkeno kĩnene gwathwo nĩ athamaki na athĩnjĩri-Ngai acio marĩ tha!

23. Nĩ gĩtĩo kĩrĩkũ Akristiano maheetwo kĩgiĩ hitho ya Jehova?

²³ Mũtũmwo Paulo aandĩkire ũũ: “Hitho ĩrĩa theru yahithĩtwo kuuma hĩndĩ ya mĩtabarĩre ya maũndũ ĩrĩa mĩhĩtũku na kuuma hĩndĩ ya njiarũa iria hĩtũku . . . nĩ ĩguũrĩirio arĩa ake aamũre.” (Akolosai 1:26) Hatarĩ nganja, arĩa aitĩrĩrie maguta a Jehova nĩ mataũkĩirũo nĩ maũndũ maingĩ megiĩ hitho ya Ngai, na makamenyithia andũ milioni nyingĩ ũhoro wayo. Na githĩ kĩu ti gĩtĩo kĩnene tũheetwo! Jehova nĩ ‘atũmenyithĩtie hitho ĩrĩa theru ĩgiĩ wendi wake.’ (Aefeso 1:9) Reke o na ithuĩ tũmenyithagie arĩa angĩ hitho ĩyo ya magegania, na njĩra ĩyo tũmateithie kũgĩa na ũmenyo wĩgiĩ ũũgĩ mũingĩ wa Jehova Ngai!