1, 2. Uno “vyuma vyajila vyakusweka” muka vize vyatela kutwivwisa kuwaha, kaha mwomwo ika?

 NGE vatu vanatachikiza vyuma vyakusweka, kakavulu cheji kuvakaluhwilanga kuhola navyo. Oloze Mbimbiliya yahanjika ngwayo: “Kusweka vyuma chinapu ulemu waKalunga.” (Vishimo 25:2) Yehova hakupwa ikiye Muka-kuyula Wakulitulaho kaha nawa Tengi, eji kuswekelanga vatu vyuma vimwe palanga nomu nalukaheta lwola lwakuvisolola.

² Chipwe ngocho, kuli vyuma vimwe vyakusweka vyakutwivwisa kuwaha vize asolola Yehova muMazu enyi. Vavivuluka ngwavo “vyuma vyajila vyakusweka vyomu mwaya muchima [waKalunga].” (Wavaka-Efwesu 1:9) Kulinangula vyuma kana cheji kwivwisanga kuwaha. Oloze chuma chachilemu chikuma twatela kutachikijila vyuma vyajila shina, kutuyovola kushili nakukufwa. Kaha nawa natwivwishisanga chindende chindende mangana aYehova.

3, 4. Uno upolofweto wahali Kuputuka 3:15 wahana ngachilihi lutalililo kuvatu, kaha “vyuma vyajila vyakusweka” muka vyatwamamo?

³ Omu Alama naEve valingile shili, chasolokele nge chuma ajinyine Yehova chakusaka mavu kupwa palachise yavatu vakukupuka kacheshi kukatesamoko. Oloze Kalunga alongesele mwakukumishila ukalu kana hahaze vene. Ambile ngwenyi: “Nanguhaka kole mukachi kove napwevo, namukachi kamuka-tanga yove namuka-tanga yenyi. Ikiye mwakachika mutwe wove, kahove naukatota kukakukunya kenyi.”—Kuputuka 3:15.

 ⁴ Mazu kana alumbunwine ika? Uno ou pwevo ikiye iya? Kaha linoka ikiye iya? Uno “muka-tanga” uze mwakachika mutwe walinoka ikiye iya? Alama naEve kavejivileko. Chipwe ngocho, mazu aKalunga ahanyine lutalililo kuvatu vakushishika vaze navakasemuka kuli ava valunga napwevo vakuhona kushishika. Navakatachikiza ngwavo Yehova mwakafumisako vilinga vyakuhuka vyosena, nashili nakufwa, kaha vyuma ajinyine Kalunga navikatesamo. Uno navikatesamo ngachilihi? Evi vyapwile vyuma vyakusweka. Kaha Mbimbiliya yavuluka vyuma kana ngwayo, “mangana aKalunga avyuma vyajila vyakusweka.”—Wavaka-Kolinde 1, 2:7.

5. Mwomwo ika Yehova eji kusolwelanga vyuma vyakusweka chindende chindende. Hana chakutalilaho.

⁵ Yehova apwa “Muka-kusolola vyuma vyakusweka,” ngocho mukuhita chalwola aputukile kusolola vishina vyakupandama kuvyuma kanevi vyakusweka. (Ndanyele 2:28) Aputukile kulinga ngocho chindende chindende. Chakutalilaho, tushinganyeke hajila chisemi wazangi mwakumbulwilamo mwanenyi wamundende uze mwamuhulisa ngwenyi, “Tata, uno ngwafuma kulihi?” Chisemi wamangana mwalweza mwanenyi vyuma vyavindende kaha vize mwahasa kwivwishisa kweseka naunyike wenyi. Oloze omu mwakola, ou chisemi mwamulweza jino vyuma vyavivulu. Chochimwe nawa, Yehova eji kumonanga lwola lwamwaza lwakulweza vatu jenyi vyuma vize navahasa kwivwishisa kutalisa kuvyuma ajina.—Vishimo 4:18; Ndanyele 12:4.

6. (a) Uno lushiko, chipwe ngwetu chivwasano, vyazata mulimo muka? (b) Mwomwo ika Yehova eji kulikashilanga chivwasano, chipwe kulishika lushiko navatu?

⁶ Uno Yehova asolwele ngachilihi vyuma kana? Avisolwelenga kuhichila mujishiko jajivulu, chipwe ngwetu vivwasano. Pamo nayove mukuyoya chove walikasaho lyehi chivwasano namutu, pamo chakulanda zuvo, chipwe  kulevana, chipwe kulevanyisa jimbongo. Chivwasano kana chapwile hilushimbi lwakulifwelelesa nge vyuma munalikase namukavitesamo. Mwomwo ika Yehova alikashila chivwasano, chipwe kulishika lushiko navatu okunyi vyuma eji kuhanjikanga vyeji kutesangamo? Mwomwo asaka etu vatu vakuhona kukupuka chitwashiwile kufwelela ngwetu vyuma vyosena ashika mwakavitesamo. Ngocho nashikinga jishiko jajivulu mangana akundwize mazu eji kuhanjikanga.—WavaHepeleu 6:16-18.

7, 8. (a) Lushiko muka Yehova alishikile naApalahama, kaha lushiko kana lwasolwele chuma muka kutalisa kuvyuma vyajila vyakusweka? (b) Uno Yehova asolwele ngachilihi chindende chindende chisaka chize mwakasemukila muka-tanga uze vashikile?

⁷ Omu mwahichile myaka yakuzomboka 2,000 kufuma haze Alama naEve vavahangile muPalachise, Yehova alwezele ngamba yenyi wakushishika Apalahama ngwenyi: “[Nangukavulisa] vaka-tanga yove nge vatanganyika vamwilu . . . Kaha vaka-mafuchi ahamavu vosena navakavakisula kuhichila muli muka-tanga yove, mwomwo unevwilila mulizu lyami.” (Kuputuka 22:17, 18) Yehova azamishile vyuma alishikile naApalahama hakulikasa nenyi chivwasano chipwe ngwetu lushiko, kaha alishingile halushiko kana. (Kuputuka 17:1, 2; WavaHepeleu 6:13-15) Chapwile chuma chakulipwila chikuma Mwata Wakulitulaho kulikasa chivwasanao chakukakisula vatu.

⁸ Lushiko lwaApalahama lwasolwele nge muka-tanga walushiko mwakapwa mutu, mwomwo mwakafuma kuchisaka chaApalahama. Uno apwile mutu muka? Omu hahichile myaka, Yehova ahanjikile ngwenyi Isaka mwanaApalahama, ikiye mwakapwa kakuluka yamuka-tanga.  Kaha hali vana vaIsaka vavali, vasakwileho Yakova. (Kuputuka 21:12; 28:13, 14) Kutwala muze, Yakova ahanjikile mazu aupolofweto hali mwanenyi umwe havana venyi 12. Ambile ngwenyi: “Mbwechi yawangana kayeshi kukafuma kuli Yutako, kaha mbwechi yakapitau kayeshi kukafuma kumahinji enyiko, palanga nomu mwakeza Shilo [chipwe, “Uze Chapwa Chenyi,” kwinyikila chamwishi]. Kaha vatu navakamwononokanga ikiye.” (Kuputuka 49:10) Halwola kana hakiko vatachikijile jino ngwavo muka-tanga uze mwakapwa mwangana mwakafuma kuchisaka chaYuta.

9, 10. (a) Lushiko muka Yehova alishikile navaIsalele, kaha lwavakafwile ngachilihi? (b) Uno Jishimbi jasolwele ngachilihi ngwajo vatu vasakiwile ndando yakuvasokola?

⁹ Mu 1513 B.C.E., Yehova awahishile jila yakusolwelamo cheka vyuma vyajila vyakusweka. Alishikile lushiko navaIsalele vaze vapwile vakuchisaka chaApalahama. Lushiko lwaJishimbi jaMose lwazachile mulimo waulemu muvyuma ajina Yehova vyakutalisa kuli muka-tanga walushiko, numba tuhu makumbi ano kalweshi nakuzatako. Mujila muka? Achitale hajijila jitatu. Jila yatete shina, Jishimbi japwile nge mbango yakuvakinga. (Wavaka-Efwesu 2:14) Jishimbi kana japwile nge mbango yize yahandunwine vaYuleya kuli Vaka-mafuchi eka. Ngocho eji Jishimbi jakingile chisaka chize mwasemukilile muka-tanga uze vashikile. Echi chalingishile muyachi wavaIsalele utwaleho lika kupwako kuheta nakulwola atongwele Kalunga, omu Meshiya asemukilile mumuyachi waYuta.

¹⁰ Jila yamuchivali shina, Jishimbi jasolwele hatoma nge vatu vasakiwile ndando yakuvasokola. Eji Jishimbi jamwenemwene jasolwele hatoma nge vatu vakuhona kukupuka kaveshi kuhasa kujikavangiza kanawako. Ngocho echi chalingishile “kuzombwojoka jishimbi chisoloke hatoma  palanga nomu [ejile] muka-tanga ukwechi lushiko vashikile.” (Wavaka-Ngalesha 3:19) Vimuna vakuvatula vaze vaIsalele vahanyinenga kavahashile kufwika hajishili javo josenako. Ngana muze asonekele Paulu ngwenyi, “manyinga avangombe vavakuji nawawa avapembe kaweshi kuhasa kufumisa jishiliko,” ngocho ava vimuna vakuvatula vapwile kaha muvwimbimbi wandando yakusokola yaKulishitu. (WavaHepeleu 10:1-4) Shikaho, kuli vaYuleya vakushishika, lushiko kana lwapwile ‘muka-kuvalama wakuvatwala kuli Kulishitu.’—Wavaka-Ngalesha 3:24.

11. Uno lushiko lwamuJishimbi lwahanyine vaIsalele lutalililo muka lwamwenemwene, oloze chuma muka chalingishile muyachi kana ujimbalise lutalililo lwavo?

¹¹ Jila yamuchitatu shina, lushiko kana lwahanyine vaIsalele lutalililo lwamwenemwene. Yehova avalwezele ngwenyi, nge navakononoka lushiko kana, kaha navakapwa ‘wangana wavapilishitu, kaha nawa muyachi wajila.’ (Kulovoka 19:5, 6) Mukuhita chalwola, vatu vatete vaze asakwile Yehova kupwa vapilishitu muwangana wamwilu vapwile vakufuma kuli vaIsalele vachisemwa. Oloze muyachi wavaIsalele walikangile kulushiko lwamuJishimbi, nakukana muka-tanga wauMeshiya, ngocho vajimbalishile lutalililo lwavo. Jino veya asakwile Yehova vapwenga muwangana wavapilishitu? Kaha vatu kana navakalinunga ngachilihi namuka-tanga walushiko? Vishina kanevi vyakutalisa kuvyuma vyajila vyakusweka vavisolwele halwola atongwele Kalunga.

12. Yehova ashikile Ndavichi lushiko muka, kaha lwasolwele cheka vishina muka kutalisa kuvyuma vyajila vyakusweka vyaKalunga?

¹² Mulikulukaji lyamyaka lyakusokesa 11 B.C.E., Yehova asolwele cheka vishina vikwavo vyakutalisa kuvyuma vyajila vyakusweka hakutunga lushiko lukwavo. Ashikile Mwangana wakushishika Ndavichi ngwenyi:  “Nangukatongola muka-tanga yove, . . . mangana akakuswane. Kaha nangukazamisa wangana wenyi. . . . Nangukazamisa nawa litanda lyawangana wenyi haya myaka yosena.” (Samwele 2, 7:12, 13; Samu 89:3) Mazu kana asolwele nge muka-tanga walushiko mwakafuma muchisaka chaNdavichi. Uno mutu nahase kuyula haya myaka tahi? (Samu 89:20, 29, 34-36) Uno muka-kuyula wamutu nahase kusokola vatu kushili nakukufwa tahi?

13, 14. (a) Kweseka naSamu 110, Yehova ashikile ika kuli Mwangana uze awavisa? (b) Vishina vyeka muka vasolwele vapolofweto jaYehova kutalisa kuli muka-tanga walushiko?

¹³ Ndavichi vamuhwiminyinyine asoneke mazu ano ngwenyi: “Yehova ambile kuli Mwata wami ngwenyi: ‘Twamanga kulivoko lyami lyachilyo palanga nomu nangukahaka vaka-kole jove kupwa chitwamo chakulyata mahinji ove.’ Yehova nalishingi lushingo, kaha keshi kukalumuna vishinganyeka vyenyiko. Nalishingi ngwenyi: ‘Ove ukapilishitu haya myaka yosena wakufwana nge Mekizeteke.’” (Samu 110:1, 4) Mazu aNdavichi atalikishile kuli muka-tanga walushiko, chipwe ngwetu Meshiya. (Vilinga 2:35, 36) Ou Mwangana keshi kukayulilanga muYelusalemako, oloze mwakayulilanga mwilu ‘kulivoko lyachilyo’ lyaYehova. Echi nachikamulingisa akapwe nawata hamavu hosena, keshi halifuchi lyaIsalele kahako. (Samu 2:6-8) Mazu kana asolwele nawa chishina chikwavo. Anuka nawa ngwove, Yehova alishingile ngwenyi Meshiya mwakapwa “kapilishitu . . . wakufwana nge Mekizeteke.” Ou muka-tanga navakamusakula kuli Kalunga akapwe Mwangana kaha nawa Kapilishitu, ngana muze apwile Mekizeteke uze apwile mwangana kaha nawa kapilishitu mumakumbi aApalahama.—Kuputuka 14:17-20.

¹⁴ Hamyaka yayivulu, Yehova nazachisanga vapolofweto hakusolola vyuma vyajila vyakusweka. Chakutalilaho, Isaya asolwele ngwenyi ou muka-tanga mwakahana kuyoya  chenyi kupwa wana wachimuna wakuvatula. (Isaya 53:3-12) Mika ahanjikilile chimweza chihela chize mwakasemukila Meshiya. (Mika 5:2) Kaha Ndanyele apolofwetele vyalwola mwakasoloka muka-tanga nalwola luze mwakafwa.—Ndanyele 9:24-27.

15, 16. (a) Uno MwanaYehova “asemukile [ngachilihi] kuli pwevo”? (b) Vyuma muka aswanyine Yesu kuli visemi jenyi vavatu, kaha lwola muka asolokele ou muka-tanga walushiko?

¹⁵ Vatu kavatachikijile mujila navikatesamo vyuma vapolofweteleko, palanga nomu asolokele muka-tanga. Mukanda Wavaka-Ngalesha 4:4 ngwawo: “Omu lwalingile lwola lunatemo lyehi, Kalunga atumine Mwanenyi uze asemukile kuli pwevo.” Mumwaka wa 2 B.C.E., kangelo alwezele kaYuleya wapwevo Maliya, uze apwile kanda alisavaleho nalunga ngwenyi: “Nawimita lijimo, kaha naukasema mwana walunga, ukamuluka lijina ngwove, Yesu. Ou mwana mwakapwanga wamulemu, kaha navakamuvulukanga ngwavo, Mwana wayou Wakulitulaho Chikuma. Yehova Kalunga mwakamuhana litanda lyakakuluka yenyi Ndavichi. . . . Shipilitu yajila nayiza hali ove, kaha ngolo jayou Wakulitulaho Chikuma najitwama hali ove. Shikaho ou mwakasemuka navakamuvuluka ngwavo, wajila, MwanaKalunga.”—Luka 1:31, 32, 35.

¹⁶ Kutwala muze, Yehova anungulwile kuyoya chaMwanenyi kufuma mwilu nakuchihaka mujimo lyaMaliya, mangana akasemuke kuli pwevo. Maliya apwile mutu wakuhona kukupuka. Oloze Yesu kaswanyine shili yanayeko, mwomwo apwile “MwanaKalunga.” Hakuwana nawa nge visemi jenyi vavatu vapwile vakuchisaka chaNdavichi, ngocho atelemo kupwa swana yaNdavichi kweseka nachisemwa kaha nawa najishimbi. (Vilinga 13:22, 23) Yehova awavishile Yesu nashipilitu yajila omu  vamumbapachishile mu 29 C.E., kaha ambile ngwenyi: “Ou ikiye Mwanami, ou ngwazanga.” (Mateu 3:16, 17) Aha hakiko jino asolokelele ou muka-tanga. (Wavaka-Ngalesha 3:16) Elu lwapwile hilwola lwakusolola vishina vyavivulu kutalisa kuvyuma vyajila vyakusweka.—WaChimoteu 2, 1:10.

17. Vyuma muka vasolwele kutalisa kuvyuma vavuluka hali Kuputuka 3:15?

¹⁷ Omu Yesu azachilenga mulimo wenyi, asolwele hatoma uze linoka vavuluka hali Kuputuka 3:15 kupwa Satana, kaha muka-tanga yalinoka kupwa vaka-kukavangiza Satana. (Mateu 23:33; Yowano 8:44) Kutwala muze, chasolokele hatoma omwo navakavachika vosena haya myaka. (Kusoloka 20:1-3, 10, 15) Kaha uze pwevo nawa vamulumbunwine ngwavo ikiye “Yelusalema yamwilu,” chipwe ngwetu pwevo lyaKalunga, yize yapwa chihanda chaliuka lyaYehova chamwilu, chize chapwa chavatu vakushipilitu. a—Wavaka-Ngalesha 4:26; Kusoloka 12:1-6.

18. Mwomwo ika vahakililileko “lushiko lwaluhya”?

¹⁸ Yesu pamo asolwele vishina vyakulipwila chikuma kutalisa kuvyuma vyajila vyakusweka haufuku wamakumishilo wakuyoya chenyi, omu ashikile tumbaji twenyi vakushishika “lushiko lwaluhya.” (Luka 22:20) Lushiko lwaluhya lwatelele kuneha “wangana wavapilishitu,” ngana mwalushiko lwakulivanga lwaJishimbi vahanyine Mose. (Kulovoka 19:6; WaPetulu 1, 2:9) Lushiko  kana kalwapwile lwamuyachi wachisemwako, oloze lwapwile lwamuyachi wakushipilitu, wavaka-kukavangiza Kulishitu vakushishika vakuwavisa, vaze vapwa “Isalele yaKalunga.” (Wavaka-Ngalesha 6:16) Ava vatu vamulushiko lwaluhya navakazachila hamwe naYesu mumulimo wakukafwa vatu.

19. (a) Mwomwo ika lushiko lwaluhya lwahashila kuneha “wangana wavapilishitu”? (b) Mwomwo ika vaka-Kulishitu vawavisa vavavulukila ngwavo “kutenga chachihya,” kaha vapwa vangahi?

¹⁹ Mwomwo ika lushiko lwaluhya lwahashila kuneha “wangana wavapilishitu” uze naukakisula vatu? Mwomwo kalwamona tumbaji twaKulishitu kupwa vaka-shiliko, oloze lwasokolola jila yakuvakonekela shili yavo kuhichila muwana waKulishitu. (Yelemiya 31:31-34) Yehova avamona kupwa vatu vakwoloka vakuhona shili, kaha avetavila kupwa mutanga yenyi yamwilu nakuvawavisa nawa nashipilitu yajila. (Wavaka-Loma 8:15-17; Wavaka-Kolinde 2, 1:21) Ngocho ‘vasemuka cheka mangana vapwenga nalutalililo lwalutonyi luze vavalamina mwilu.’ (WaPetulu 1, 1:3, 4) Hakuwana nge vatu vavatengele vayoyelenga hano hamavu, ngocho ava vaka-Kulishitu vawavisa vavavuluka ngwavo “kutenga chachihya.” (Wavaka-Kolinde 2, 5:17) Mbimbiliya yasolola ngwayo vatu 144,000 navakapwa mwilu nakuyula vatu hano hamavu.—Kusoloka 5:9, 10; 14:1-4.

20. (a) Chishina muka chakutalisa kuvyuma vyajila vyakusweka vasolwele mu 36 C.E.? (b) Veya navakanganyala kuvyuma vashikile Apalahama?

²⁰ Yesu navaze vawavisa vakiko vapwa “vaka-tanga yaApalahama.” b (Wavaka-Ngalesha 3:29) VaYuleya vachisemwa vakiko vapwile vatete kusakula. Oloze mu 36 C.E.,  chishina chikwavo chavyuma vyajila vyakusweka vachisolwele. Vaka-mafuchi eka, chipwe ngwetu vaze kavapwile vaYuleyako, navakiko vaputukile kupwa nalutalililo lwakuya mwilu. (Wavaka-Loma 9:6-8; 11:25, 26; Wavaka-Efwesu 3:5, 6) Uno vaka-Kulishitu vawavisa vakiko kaha navakalivwisa kuwaha vyuma vashikile Apalahama tahi? Nduma, mwomwo wana waYesu naukanganyalisa kaye kosena. (WaYowano 1, 2:2) Kutwala muze nawa, Yehova ahanjikile ngwenyi “liyongomena lyalinene” lyakuhona kulava nalikayovoka omu nakakanonga kano kaye kaSatana. (Kusoloka 7:9, 14) Mayevuyevu avatu navakavasangula nakukatwama muPalachise haya myaka.—Luka 23:43; Yowano 5:28, 29; Kusoloka 20:11-15; 21:3, 4.

21, 22. Uno vyuma vyajila vyakusweka vyaYehova vyasolola ngachilihi mangana enyi?

²¹ Vyuma vyajila vyakusweka vyasolola “mangana aKalunga akuya mweka namweka,” mujila yakukomwesa. (Wavaka-Efwesu 3:8-10) Yehova asolwele mangana amwenemwene omu ahanjikile vyuma vyajila vyakusweka, nakuvisolwela vatu chindende chindende. Atachikijile hakumina chinyingi chavatu, nakuvasolwela vyuma chindende chindende mangana vasolole ngwavo vamufwelela.—Samu 103:14.

²² Yehova asolwele nawa mangana enyi amwenemwene hakusakula Yesu kupwa Mwangana. Ou MwanaYehova apwa wakushishika chikuma kuhambakana vangelo vosena navatu. Yesu hakuyoya mwamutu hano hamavu, amwene ukalu wauvulu. Shikaho atachikiza kanawa ukalu vali nakumona vatu. (WavaHepeleu 5:7-9) Nyi ngachilihi vatu vaze navakayula hamwe naYesu? Hamakulukaji amyaka, Yehova nawavisanga malunga namapwevo vakumiyachi  yosena, nakumalimi osena nakuvisemwa vyosena. Kaha vatu vamwe havatu kana vomikile muukalu ngana uze tuli nakumona. (Wavaka-Efwesu 4:22-24) Natukawahilila chikuma kukatuyula kuli vapilishitu vakeke vaze navakapwa nawa vamyangana.

23. Kutokwa muka vatwama nacho vaka-Kulishitu kutalisa kuvyuma vyajila vyakusweka vyaYehova?

²³ Kaposetolo Paulu asonekele ngwenyi: “Vyuma vyajila vyakusweka vize vaswekele kufuma kututwamino twamyaka yinahichi kunyima nakuvisemunwino vinahichi kunyima . . . vanavisolola kuli vatu jenyi vajila.” (Wavaka-Kolose 1:26) Chikupu vene, vaka-kujila vawavisa kuli Yehova vanevwishisa chikuma vyuma vyajila vyakusweka, kaha chinyingi kana vanachilweze vatu vavavulu. Ocho kutokwa kana tuli nacho tuvosena enu vayaya! Yehova natulingisa tutachikize “vyuma vyajila vyakusweka vyomu mwaya muchima wenyi.” (Wavaka-Efwesu 1:9) Nayetu twatela kwazana navakwetu chinyingi kanechi chavyuma vyakusweka, nakuvakafwa navakiko vamone omwo ajiminyina mangana aYehova Kalunga.