1, 2. Ki “secreto sagrado” mester interesa nos, y pakico?

UN SECRETO ta algo cu ta fasina hende y lanta nan curiosidad. Pesei mes hopi bes hende tin problema pa warda un secreto. Di otro banda, Bijbel ta bisa: “Ta e gloria di Dios pa sconde un asunto.” (Proverbionan 25:2) Si, como Gobernante Soberano y Creador, Yehova tin derecho di tene algun cos scondi of secreto pa humanidad te dia yega e ora pa e revela nan.

² Sinembargo, Yehova a revela un secreto fasinante y masha interesante den su Palabra. E yama “e secreto sagrado di [Dios] su boluntad.” (Efesionan 1:9, NW) Ora bo haya sa ta kico e ta, bo ta logra hopi mas cu djis satisface bo curiosidad. Conocemento di e secreto aki por hiba na salbacion, y duna bo un idea di e sabiduria insondabel di Yehova.

3, 4. Ki speransa e profecia di Genesis 3:15 ta brinda, y ki misterio of “secreto sagrado” el a encera?

³ Ora Adam cu Eva a peca, por a parce cu Yehova su proposito pa e tera aki bira un paradijs habita pa hende perfecto a fracasa. Pero Dios a atende e problema mesora. E di: “Lo mi pone enemistad entre abo [e colebra] y e mohe, y entre bo simiña y su simiña; e lo herida bo cabes, y abo lo herida su hilchi di pia.”—Genesis 3:15.

⁴ E palabranan aki a zona manera un charada, un enigma. Ken e mohe aki tawata? Ken tawata e colebra? Ken tawata e “simiña” cu lo mester herida cabes di e colebra? No tawatin manera pa Adam cu Eva haya sa e contesta. Toch e  palabranan ei a brinda un speransa na e desendientenan fiel di e pareha infiel ei. Husticia lo a triunfa. Yehova su proposito lo a ser realisa. Pero con? Ha, esei si tawata un misterio! Bijbel ta yam’e “e sabiduria di Dios den un secreto sagrado, e sabiduria scondi.”—1 Corintionan 2:7, NW.

5. Ilustra pakico Yehova a revela su secreto progresivamente.

⁵ Cu tempo, e “Revelador di secreto”, Yehova, lo a revela detayenan importante relaciona cu desaroyo di e secreto aki. (Daniel 2:28, NW) Pero esei lo a tuma luga na un manera gradual y progresivo. Pa ilustra, pensa con un tata amoroso ta contesta su yiu chikito ora esaki puntr’e: “Papi, di unda mi a bin?” Un tata sabi lo duna su yiu chikito solamente e cantidad di informacion cu e mucha por compronde. Segun cu e mucha ta crece, e tata ta splic’e mas detaye. Mescos tambe, Yehova ta determina ki ora su pueblo ta cla pa ricibi revelacionnan di su boluntad y proposito.—Proverbionan 4:18; Daniel 12:4.

6. (a) Kico ta e proposito di un aliansa, of contract? (b) Pakico e echo cu Yehova a sera aliansa cu hende ta algo remarcabel?

⁶ Con Yehova a haci e revelacionnan ei? El a revela hopi detaye pa medio di aliansanan of contractnan. Probablemente bo a yega di firma un contract—podise pa cumpra un cas of pa haci un fiansa. Un contract asina ta duna un garantia legal cu lo bo cumpli cu e condicionnan. Pero pakico Yehova lo tawatin cu sera un combenio, of contract, cu hende? Su palabra so no ta suficiente garantia cu lo e cumpli cu su promesanan? Esei ta berdad, y toch, na hopi ocasion, Dios tawatin e bondad di respalda su palabra cu contractnan legal. E acuerdonan comprometedor aki ta duna nos como hende imperfecto un base asta mas solido ainda pa confia den e promesanan di Yehova.—Hebreonan 6:16-18.

7, 8. (a) Ki aliansa Yehova a sera cu Abraham, y ki claridad esei a trece encuanto e secreto sagrado? (b) Con Yehova a revela progresivamente e liña di desendencia cu mester a hiba na e Simiña priminti?

⁷ Mas cu dos mil aña despues cu hende a ser expulsa for di Paradijs, Yehova a priminti su fiel sirbido Abraham: “Lo mi multiplica bo desendientenan grandemente manera e streyanan di e shelonan . . . y den bo desendientenan tur e nacionnan di e tera lo ta bendiciona, pasobra bo a obedece mi bos.” (Genesis 22:17, 18) Esaki no tawata djis un promesa; Yehova a formul’e como un acuerdo of aliansa legal y a respald’e cu un huramento inkebrantabel. (Genesis 17:1, 2; Hebreonan 6:13-15) Esaki si ta algo remarcabel! De echo, e Soberano Señor a haci un compromiso legal pa bendiciona humanidad!

⁸ E aliansa di Abraham a revela cu e Simiña priminti lo a nace como hende, ya cu lo e tawata un desendiente di Abraham. Pero ken lo e tawata? Cu tempo Yehova a duna di conoce cu di e yiunan di Abraham, Isaak lo a bira un antepasado di e Simiña. Di e dos yiunan di Isaak, Yehova a scohe Yacob. (Genesis 21:12; 28:13, 14) Mas despues, Yakob a expresa e palabranan profetico aki relaciona cu un di su 12 yiunan: “E scepter lo no kita for di Huda, ni e bara di gobernado for di meimei di su pia, te ora Silo [“Esun na Ken E Ta Pertenece”] bini, y nacionnan lo obedec’e.” (Genesis 49:10) E ora ei a bira conoci cu e Simiña lo a bira un rei, uno cu lo a bin di Huda!

9, 10. (a) Ki aliansa Yehova a sera cu e nacion di Israel, y ki proteccion e aliansa ei a duna? (b) Con e Lei a demostra cu humanidad tawatin mester di un rescate?

⁹ Na 1513 prome cu nos era, Yehova a haci un areglo cu a prepara e esena pa mas revelacion tocante e secreto sagrado. El a sera un aliansa cu e desendientenan di Abraham, e nacion di Israel. Aunke e aliansa di e Lei di Moises no ta na vigor mas aworaki, e tawata un parti esencial di Yehova su proposito  pa produci e Simiña priminti. Con asina? Laga nos analisa tres manera. Di prome, e Lei tawata manera un muraya di proteccion. (Efesionan 2:14) Su stipulacionnan husto a sirbi como un barera entre Hudiu y pagano. Pues e Lei a yuda conserva e liña di desendencia cu a hiba na e Simiña priminti. Ta principalmente debi na e proteccion ei cu e nacion tawata existi ainda ora a yega e tempo cu Dios a fiha pa e Mesias nace den e tribu di Huda.

¹⁰ Na di dos luga, e Lei a duna prueba palpabel cu humanidad tawatin mester di un rescate. Como cu e Lei tawata perfecto, el a mustra bon cla cu hende pecaminoso no ta capas pa cumpli cu ne completamente. Pues e Lei a bin “pa haci hende su desobediencia na Dios evidente, . . . te ora esun ‘desendiente’ pa kende e promesa tawata destina, a bini.” (Galationan 3:19, BPK) Pa medio di sacrificio di animal, e Lei a duna hende un manera temporal pa haya pordon di pica. Pero ya cu, manera Pablo a skirbi, “ta imposibel pa e sanger di toro y cabrito kita pica”, e sacrificionan aki tawata solamente un sombra di e sacrificio di rescate di Cristo. (Hebreonan 10:1-4) Pa e Hudiunan cu a keda fiel, e aliansa ei a bira anto un “tutor pa guia [nan] na Cristo.”—Galationan 3:24.

11. Ki perspectiva glorioso e aliansa di Lei a ofrece Israel, pero pakico e nacion ei como tal a perde esei?

¹¹ Na di tres luga, e aliansa ei a ofrece e nacion di Israel un perspectiva glorioso. Yehova a bisa nan cu si nan a keda fiel na e aliansa, nan lo a bira “un reino di sacerdotenan y un nacion santo.” (Exodo 19:5, 6) Cu tempo, Israel literal en berdad a produci e prome miembronan di un reino celestial di sacerdote. Sinembargo, como nacion, Israel a rebela contra e aliansa di Lei, nan a rechasa e Simiña Mesianico y a perde e perspectiva ei. Ken anto lo a completa e reino di sacerdote? Y ki relacion e nacion bendiciona ei lo tawatin cu e Simiña priminti? Dios lo a revela e aspectonan ei di e secreto sagrado na su debido tempo.

12. Ki aliansa Yehova a sera cu David, y ki claridad esei a trece encuanto e secreto sagrado di Dios?

¹² Den siglo 11 prome cu nos era, Yehova a trece mas claridad encuanto e secreto sagrado ora el a sera un otro aliansa. El a priminti e fiel Rei David: “Lo mi lanta bo desendiente despues di bo, . . . y lo mi establece su reino. . . . Lo mi establece e trono di su reino pa semper.” (2 Samuel 7:12, 13; Salmo 89:3) Cu esei Yehova a mustra mas spesificamente awor cu e Simiña priminti lo mester a bin for di e cas di David. Pero un hende comun y coriente lo por goberna “pa semper”? (Salmo 89:20, 29, 34-36) Y un rei humano asina lo por rescata humanidad for di pica y morto?

13, 14. (a) Segun Salmo 110, ki promesa Yehova a haci na su Rei ungi? (b) Kico Yehova a revela mas despues pa medio di su profetanan relaciona cu e benidero Simiña?

¹³ David a skirbi bou di inspiracion: “SEÑOR ta bisa mi Señor: ‘Sinta na mi man drechi, te ora mi haci bo enemigonan un banki pa bo pianan.’ SEÑOR a hura, y lo no repenti: ‘Bo ta un sacerdote pa semper, segun e ordo di Melkisedek.’” (Salmo 110:1, 4) E palabranan di David a referi directamente na e Mesias, of Simiña priminti. (Echonan 2:35, 36) E Rei aki lo a goberna, no for di Herusalem, sino for di shelo na e “man drechi” di Yehova. Esei lo a dun’e autoridad no solamente riba Israel sino riba henter tera. (Salmo 2:6-8) E pasashi aki a revela algo mas. Ripara cu Yehova a pronuncia un huramento solem cu e Mesias lo mester tawata “un sacerdote . . . segun e ordo di Melkisedek.” Mescos cu Melkisedek, kende a sirbi como rei y sacerdote den tempo di Abraham, Dios lo a nombra e benidero Simiña directamente pa sirbi como Rei y Sacerdote!—Genesis 14:17-20.

¹⁴ Den transcurso di añanan, Yehova a uza su profetanan pa revela mas detaye di su secreto sagrado. Por ehempel, Isaias a duna di conoce cu e Simiña lo a entrega su bida como un sacrificio. (Isaias 53:3-12) Mikeas a predeci unda e Mesias lo  a nace. (Mikeas 5:2) Daniel a asta profetisa e tempo exacto cu e Simiña lo a presenta y muri.—Daniel 9:24-27.

15, 16. (a) Con e Yiu di Yehova a bin ‘nace di un mohe’? (b) Kico Hesus a hereda for di su mayornan humano, y na ki tempo el a yega como e Simiña priminti?

¹⁵ Con e profecianan aki lo a cumpli a keda un misterio te dia e Simiña mes a presenta. Galationan 4:4 ta bisa: “Ora cu e plenitud di e tempo a yega, Dios a manda su Yiu, naci di un mohe.” Na aña 2 prome cu nos era, un angel a anuncia na un birgen Hudiu cu yama Maria: “Mira, lo bo consebi den bo matris y duna lus na un yiu homber, y lo bo yam’e Hesus. E lo ta grandi y lo wordo yama Yiu di e Haltisimo; y Señor Dios lo dun’e e trono di su tata David . . . Spirito santo lo bin riba bo, y e poder di e Haltisimo lo sombra bo; y pa e motibo ei esun santo cu tin cu nace lo wordo yama e Yiu di Dios.”—Lucas 1:31, 32, 35.

¹⁶ Despues, Yehova a transferi e bida di su Yiu for di shelo pa e matris di Maria. Di e manera aki, el a nace di un mohe. Apesar cu Maria tawata un mohe imperfecto, Hesus no a hereda imperfeccion for di dje, pasobra e tawata “Yiu di Dios.” Na mes momento, como cu Hesus su mayornan humano tawata desendiente di David, pa via di nan el a haya e derecho natural y legal como heredero di David. (Echonan 13:22, 23) Na Hesus su bautismo na aña 29 di nos era, Yehova a ungie cu spirito santo y a bisa: “Esaki ta mi Yiu stima.” (Mateo 3:16, 17) Porfin e Simiña a yega! (Galationan 3:16) Tawata tempo pa revela mas tocante e secreto sagrado.—2 Timoteo 1:10.

17. Con Yehova a revela mas tocante e nificacion di Genesis 3:15?

¹⁷ Durante su ministerio, Hesus a identifica e colebra di Genesis 3:15 como Satanas, y su simiña como siguido di Satanas. (Mateo 23:33; Huan 8:44) Mas despues, Yehova a revela con tur esakinan lo wordo aplasta pa semper. (Revelacion 20:1-3, 10, 15) Y e mohe a ser identifica como “e Herusalem  djariba”, e esposa simbolico di Yehova, esta, su organisacion celestial di criaturanan spiritual. *—Galationan 4:26; Revelacion 12:1-6.

18. Kico ta e proposito di “e aliansa nobo”?

¹⁸ Kisas e revelacion mas dramatico a bin riba e anochi prome cu Hesus su morto ora el a papia cu su fiel disipelnan di “e aliansa nobo.” (Lucas 22:20) Mescos cu su predecesor, e aliansa di e Lei di Moises, e aliansa nobo aki mester a produci “un reino di sacerdotenan.” (Exodo 19:6; 1 Pedro 2:9) Sinembargo, e aliansa aki lo a forma, no un nacion literal, sino un nacion spiritual, “e Israel di Dios”, cu lo consisti unicamente di Cristo su fiel siguidonan ungi. (Galationan 6:16) Hunto cu Hesus, e participantenan aki den e aliansa nobo lo bendiciona e rasa humano!

19. (a) Pakico e aliansa nobo ta logra produci “un reino di sacerdotenan”? (b) Pakico cristiannan ungi ta ser yama “un creacion nobo”, y cuanto lo sirbi den shelo hunto cu Cristo?

¹⁹ Pero dicon e aliansa nobo ta logra produci “un reino di sacerdotenan” cu lo bendiciona humanidad? Pasobra en bes di condena disipel di Cristo como pecado, e ta haci posibel pa nan haya pordon di nan picanan pa medio di Hesus su sacrificio. (Yeremias 31:31-34) Unabes nan ricibi un posicion husto dilanti Yehova, e ta adopta nan den su famia celestial y ungi nan cu spirito santo. (Romanonan 8:15-17; 2 Corintionan 1:21) Den e forma ei nan ta “nace di nobo den un speransa bibo . . . reserva den shelo.” (1 Pedro 1:3, 4) Como cu nan condicion eleva ta algo completamente nobo pa hende, cristiannan ungi cu spirito ta ser yama “un creacion nobo.”  (2 Corintionan 5:17, BPK) Bijbel ta revela cu den transcurso di tempo nan lo a alcansa un total di 144.000 persona cu lo reina for di shelo riba humanidad rescata.—Revelacion 5:9, 10; 14:1-4.

20. (a) Kico a ser revela na aña 36 di nos era relaciona cu e secreto sagrado? (b) Ken lo disfruta di e bendicionnan priminti na Abraham?

²⁰ Hunto cu Hesus, e personanan ungi aki ta bira “desendiente di Abraham.” * (Galationan 3:29) E prome scohinan tawata Hudiu literal. Pero na aña 36 di nos era, un otro aspecto di e secreto sagrado a keda revela; paganonan, of hende cu no tawata Hudiu, tambe lo a haya e speransa celestial. (Romanonan 9:6-8; 11:25, 26; Efesionan 3:5, 6) Pero ta cristiannan ungi so lo haya e bendicionnan priminti na Abraham? No, pasobra e sacrificio di Cristo ta beneficia mundo completo. (1 Huan 2:2) Poco tempo despues Yehova a revela cu un “multitud grandi” incontabel di hende lo sobrevivi e fin di Satanas su sistema di cosnan. (Revelacion 7:9, 14) Y masha hopi hende mas lo ser resusita cu e posibilidad di biba pa semper den Paradijs!—Lucas 23:43; Huan 5:28, 29; Revelacion 20:11-15; 21:3, 4.

21, 22. Den ki maneranan e secreto sagrado di Yehova ta manifesta su sabiduria?

²¹ E secreto sagrado ta un manifestacion asombroso di e “sabiduria di Dios cu ta mustra su mes den hopi diferente forma.” (Efesionan 3:8-10, BPK) Yehova en berdad a demostra cu e ta un Dios di gran sabiduria ora el a formula e secreto aki pa despues revel’e gradualmente. Den su sabiduria el a tene cuenta cu e limitacionnan di hende y a laga nan manifesta e berdadero condicion di nan curason.—Salmo 103:14.

 ²² Tambe Yehova a demostra un sabiduria incomparabel ora el a scohe Hesus como Rei. Yehova su Yiu ta e criatura mas confiabel den universo. Tempo el a biba como hende den carni y weso, el a pasa den hopi tipo di contratiempo. E ta compronde problema humano completamente. (Hebreonan 5:7-9) Y kico di Hesus su cogobernantenan? Durante siglonan, tanto hende homber como mohe—di tur rasa, idioma y antecedente—a ser ungi. No tin ningun problema cu un of mas di e unginan aki no a enfrenta y vence. (Efesionan 4:22-24) Lo ta un placer pa biba bou di e gobernacion di e rei- y sacerdotenan misericordioso aki!

23. Ki privilegio cristiannan tin en conexion cu e secreto sagrado di Yehova?

²³ Apostel Pablo a skirbi: “E secreto sagrado cu tawata scondi for di e sistema di cosnan di pasado y for di e generacionnan di pasado . . . a ser saca na cla pa su santonan.” (Colosensenan 1:26, NW) Si, e unginan santo di Yehova a compronde hopi cos tocante e secreto sagrado, y nan a comparti e conocemento ei cu miyones di persona. Ki un privilegio nos tur tin! Yehova a laga nos conoce “e secreto sagrado di su boluntad.” (Efesionan 1:9, NW) Laga nos comparti e secreto maraviyoso aki cu otro hende pa yuda nan tambe haya un idea di e sabiduria insondabel di Yehova Dios!