1, 2. Ndi tshifhio “tshiphiri tshikhethwa” tshine ra fanela u vha na dzangalelo khatsho, nahone ndi ngani?

ZWIPHIRI! Nga ṅwambo wa uri zwi a nyanyula, zwi a takadza nahone zwi a mangadza, vhathu a vha koni u zwi dzumba. Naho zwo ralo, Bivhili i ri: “Mudzimu u khoḓwa Ó dzumba mafhungo [“a tshiphiri,” NW].” (Mirero 25:2) Ee, samusi e Muvhusahoṱhe na Musiki, Yehova nga ho teaho u a dzumbela vhathu zwiṅwe zwiphiri u swika tshifhinga tshawe tsha u vha dzumbululela tshi tshi swika.

² Naho zwo ralo, hu na tshiphiri tshi nyanyulaho, tshi takadzaho tshe Yehova a tshi dzumbulula Ipfini ḽawe. Tshi vhidzwa ‘tshiphiri tshikhethwa tsha zwine [Mudzimu] a zwi funa.’ (Vha-Efesa 1:9, vhambedzani NW.) U guda nga hatsho a zwi nga ḓo sokou fusha dzangalelo ḽaṋu fhedzi ḽa u ṱoḓa u ḓivha. U ḓivha tshenetshi tshiphiri zwi nga ita uri ni tshidzwe nahone zwi nga ita uri ni pfesesenyana vhuṱali ha Yehova vhu sa elei.

3, 4. Vhuporofita ho ṅwalwaho kha Genesi 3:15 vhu ṋea fulufhelo nga nḓila-ḓe, nahone ndi tshifhio “tshiphiri tshikhethwa” tshine tsha katelwa kha zwenezwo?

³ Musi Adamu na Eva vha tshi tshinya, zwi nga vha zwo vhonala u nga ndivho ya Yehova ya u ita uri ḽifhasi ḽoṱhe ḽi vhe paradiso i dzulwaho nga vhathu vho fhelelaho yo thithiswa tshoṱhe. Fhedzi Mudzimu o mbo ḓi dzudzanya honoho vhuleme nga u ṱavhanya. O ri: “Nahone ndi vhea vhuswina vhukati ha iwe [ṋowa] na musadzi, vhukati ha mbeu yau na mbeu yawe; mbeu yawe i ḓo U pwasha ṱhóho, iwe wa ḓo i luma tshirethe.”—Genesi 3:15.

⁴ Enea o vha e maipfi a konḓaho u pfesesea. Onoyu musadzi o vha e nnyi? Ṋowa yo vha i nnyi? Ndi nnyi we a vha e “mbeu” ye ya vha i tshi ḓo pwasha ṱhoho ya ṋowa? Na Adamu na Eva vho vha vha sa zwi ḓivhi. Naho zwo ralo, maipfi a Mudzimu o  ṋea fulufhelo ṅwana muṅwe na muṅwe wa vhenevho vhavhingani vha sa fulufhedzei. Zwivhuya zwo vha zwi tshi ḓo kunda. Ndivho ya Yehova yo vha i tshi ḓo ḓadzea. Fhedzi nga nḓila-ḓe? Ee, tshenetsho tsho vha tshi tshiphiri! Bivhili i tshi vhidza “vhuṱali ha Mudzimu nga tshiphiri [“tshikhethwa,” NW], ho dzumbamaho.”—1 Vha-Korinta 2:7.

5. Fanyisani nḓila ine Yehova a dzumbulula ngayo tshiphiri tshawe nga zwiṱuku nga zwiṱuku.

⁵ Samusi Yehova e “Mudzumbululi wa zwo dzumbamaho,” o vha a tshi ḓo fheleledza o dzumbulula zwidodombedzwa zwo teaho malugana na u ḓadzea ha tshenetshi tshiphiri. (Daniele 2:28) Fhedzi o vha a tshi ḓo zwi dzumbulula nga zwiṱuku nga zwiṱuku. Ri tshi tou zwi fanyisa, ri nga humbula nga nḓila ine khotsi wa lufuno a nga aravha ngayo musi mutukana wawe a tshi vhudzisa uri: “Baba, nṋe ndi bva ngafhi?” Khotsi o ṱalifhaho u amba mafhungo o linganelaho ane mutukana wawe a ḓo a pfesesa. Musi onoyo mutukana a tshi aluwa, khotsi awe vha mu vhudza zwo engedzeaho. Nga nḓila i fanaho, Yehova u ḓivha tshifhinga tshine vhathu vhawe vha fanela u dzumbululelwa zwine a zwi funa na ndivho yawe.—Mirero 4:18; Daniele 12:4.

6. (a) Mulanga kana thendelano zwo vha zwi na ndivho ifhio? (b) Ndi ngani zwi tshi mangadza uri Yehova o vhofha milanga na vhathu?

⁶ Yehova o dzumbulula hani zwenezwo? O shumisa milanga ye ya tou tevhekana, kana thendelano u itela u dzumbulula zwo engedzeaho. Ni nga vha no no vhuya na vhofha mulanga—khamusi wa u renga nnḓu kana u hadzima tshelede. Yeneyo thendelano i na khwaṱhisedzo i re mulayoni ya uri ni ḓo ita zwe na tendelana khazwo. Fhedzi ndi ngani zwo ṱoḓea uri Yehova a vhofhe milanga i re mulayoni, kana thendelano na vhathu? Vhukuma, ipfi ḽawe ndi khwaṱhisedzo i fushaho ya mafulufhedziso awe. Yeneyo ndi ngoho, nahone zwifhinga zwinzhi, Mudzimu o tikedza nga vhulenda ipfi ḽawe nga thendelano dzi re mulayoni. Dzenedzi mbofho dza thendelano dzo khwaṱhiswaho dzi ṋea riṋe vhathu vha songo fhelelaho mutheo wo khwaṱhaho wa u vha na fulufhelo kha mafulufhedziso a Yehova.—Vha-Heberu 6:16-18.

7, 8. (a) Ndi mulanga ufhio we Yehova a u vhofha na Abrahamu, nahone wo dzumbulula mini nga tshiphiri tshikhethwa? (b) Yehova o dzumbulula hani nga zwiṱuku nga zwiṱuku lushaka lwa Mbeu yo fulufhedziswaho?

⁷ Miṅwaha i ṱoḓaho u vha zwigidi zwivhili muthu o no pandelwa Paradisoni, Yehova o vhudza Abrahamu mushumeli wawe a fulufhedzeaho a ri: “Ndi ḓo U fhaṱutshedza ngangoho, ndi ḓo andisa vhana vhau ngangoho vhunga ṋaledzi dza ṱaḓulu, . . . . Dzitshakha dzoṱhe ndi ḓo dzi fhaṱutshedza nga vhana vhau; zwi ḓo ralo nga u’ wa pfa ipfi ḽanga.” (Genesi 22:17, 18) Hezwi zwo vha zwi sa sokou vha fulufhedziso; Yehova o zwi ita nga mulanga u re mulayoni nahone a zwi tikedza nga muano wawe wo khwaṱhaho. (Genesi 17:1, 2; Vha-Heberu 6:13-15) Zwi swayea lungafhani uri Murena Muvhusahoṱhe o ita thendelano u itela u fhaṱutshedza vhathu!

⁸ Mulanga wa Abrahamu wo dzumbulula uri Mbeu yo fulufhedziswaho i ḓo vha i muthu, ngauri u ḓo vha muḓuhulu wa Abrahamu. Fhedzi onoyo muthu o vha a tshi ḓo vha e nnyi? Nga u ya ha tshifhinga, Yehova o dzumbulula uri kha vharwa vha Abrahamu, Isaka u ḓo vha makhulu wa yeneyo Mbeu. Kha vharwa vhavhili vha Isaka, ndi Yakobo o khethwaho. (Genesi 21:12; 28:13, 14) Nga murahu, Yakobo o vhudza muṅwe wa vharwa vhawe vha 12 maipfi a tevhelaho a vhuporofita: “Yuda ha nga dzhielwi thonga ya vhuhosi; na lubaḓa lwa vhuhosi lu re milenzheni yawe a lu nga ṱuswi; hu vhuye hu swike Muladzi [“Ane Ya vha Yawe”]. Onoyo dzitshakha dzi ḓo mu pfa.” (Genesi 49:10) Nga zwenezwo zwo vha zwi tshi ḓivhea uri Mbeu yo vha i tshi ḓo vha khosi, ine ya ḓo bva Yuda!

9, 10. (a) Ndi mulanga ufhio we Yehova a u vhofha na lushaka lwa Isiraele, nahone wonoyo mulanga wo ṋea tsireledzo ifhio? (b) Mulayo wo sumbedza hani uri vhathu vha ṱoḓa tshirengululi?

⁹ Nga 1513 B.C.E., Yehova o ita ndugiselelo ya uri tshiphiri tshikhethwa tshi bvele phanḓa tshi tshi dzumbululwa. O vhofha mulanga na vhaḓuhulu vha Abrahamu, lushaka lwa Isiraele. Naho zwino u si tsha shuma, wonoyu mulanga wa Mulayo wa Mushe wo  vha u tshipiḓa tsha ndeme tsha ndivho ya Yehova ya u ḓisa Mbeu yo fulufhedziswaho. Nga nḓila-ḓe? Ṱhogomelani nḓila tharu. Ya u thoma, Mulayo wo vha u tshi nga mutsheṱo wa u tsireledza. (Vha-Efesa 2:14) Ndaela dzawo dzavhuḓi dzo shuma sa tshithivheli vhukati ha Vhayuda na Vhannḓa. Nga zwenezwo Mulayo wo thusa u vhulunga mutevhe wa Mbeu yo fulufhedziswaho. Nga ṅwambo wa yeneyo tsireledzo, lwonolwo lushaka lwo vha lu tshi kha ḓi vha hone musi tshifhinga tsha Mudzimu tshi tshi swika tsha uri Messia a bebwe kha lushaka lwa Yuda.

¹⁰ Ya vhuvhili, Mulayo wo sumbedza nga vhuḓalo uri vhathu vha ṱoḓa tshirengululi. Samusi wo vha u Mulayo wo fhelelaho, wo bvukulula uri vhathu vha re na tshivhi vha nga si kone u farelela khawo nga vhuḓalo. Nga zwenezwo “wo sala u tshi vho vheiwa, u tshi vheiswa nga u dzia-u-pfuka ha vhathu, hu tshi pfi hu vhuye hu ḓe mbeu ya mbavhalelo.” (Vha-Galata 3:19) Nga zwiṱhavhelo zwa zwipuka, Mulayo wo vha u ndugiselelo ya tshifhinganyana ya u pfumelelwa zwivhi. Fhedzi samusi Paulo o ṅwala uri u “ṱusa zwivhi a zwi konadzei nga malofha a ṋamana na a dzimbokoṱo,” zwenezwi zwiṱhavhelo zwo vha zwi tshi fanyisela tshiṱhavhelo tsha Kristo tshi rengululaho. (Vha-Heberu 10:1-4) Nga zwenezwo kha Vhayuda vha fulufhedzeaho, wonoyo mulanga wo vha u ‘mudededzi a isaho ha Kristo.’—Vha-Galata 3:24.

11. Mulanga wa Mulayo wo ṋea Isiraele tshilavhelelwa tshifhio tshavhuḓi, fhedzi ndi ngani lwonolwo lushaka lwoṱhe nga u tou angaredza lwo xelelwa ngatsho?

¹¹ Ya vhuraru, wonoyo mulayo wo ṋea lushaka lwa Isiraele tshilavhelelwa tshavhuḓi. Yehova o vha vhudza uri arali vha fulufhedzea kha wonoyo mulanga, vha ḓo vha ‘muvhuso wa vho-tshifhé, lushaka lukhethwa.’ (Ekisodo 19:5, 6) Kha Isiraele wa ṋama ho fheleledza ho bva miraḓo ya u thoma ya vhotshifhe vha muvhuso wa ṱaḓulu. Naho zwo ralo, Vhaisiraele vhoṱhe nga u tou angaredza vho shandukela Mulayo wa mulanga, vha landula Mbeu ya Vhumessia, nahone vha xelelwa nga tshenetsho tshilavhelelwa. Nga zwenezwo, ndi vhafhio vhe vha vha vha tshi ḓo engedza tshivhalo tsha muvhuso wa vhotshifhe? Nahone lwonolwo lushaka lwo fhaṱutshedzwaho lwo vha lu tshi ḓo ṱangana hani na Mbeu yo fulufhedziswaho? Eneo masia a tshiphiri tshikhethwa o vha a tshi ḓo dzumbululwa nga tshifhinga tsho vhewaho nga Mudzimu.

12. Ndi mulanga ufhio we Yehova a u vhofha na Davida, nahone tshiphiri tshikhethwa tsha Mudzimu tsho pfesesea nga nḓila-ḓe?

¹² Kha ḓana ḽa vhu-11 ḽa miṅwaha B.C.E., Yehova o dovha a ita uri tshiphiri tshikhethwa tshi pfesesee musi a tshi vhofha muṅwe mulanga. O fulufhedzisa Khosi Davida a fulufhedzeaho uri: “Ndi tshi ḓo vusa wa mbeu yau, . . . ane nda ḓo khwaṱhisa vhuhosi hawe. . . . ane khuluṋoni ya vhuhosi hawe nda ḓo i khwaṱhisa ya vha ya lini na lini.” (2 Samuele 7:12, 13; Psalme ya 89:3) Zwino ho vha ho khethiwa nnḓu ya Davida uri khayo hu bve lushaka lwa Mbeu yo fulufhedziswaho. Fhedzi naa muthu zwawe a nga vhusa “lini na lini”? (Psalme ya 89:20, 29, 34-36) Nahone naa yeneyo khosi ya muthu wa ṋama i nga tshidza vhathu kha tshivhi na lufu?

13, 14. (a) U ya nga Psalme ya 110, Yehova o fulufhedzisa mini Khosi yawe yo ḓodzwaho? (b) Ndi zwifhio zwiṅwe zwe zwa dzumbululwa nga vhaporofita vha Yehova malugana na u ḓa ha Mbeu?

¹³ Davida o hevhedzwa uri a ṅwale zwi tevhelaho: “U amba ha Yehova a tshi redza Murena wanga: Dzula thungo ya tshanḓa tsha u ḽa tshanga, ndi vhuye ndi ite maswina au vhukando ha milenzhe yau. Yehova o ana (nahone ha nga ḓisoli), ha nga dovhi a vhilaela; U Tshifhé wa lini na lini nga mulayo wa Melkitsedeke.” (Psalme ya 110:1, 4) Maipfi a Davida a shuma nga ho livhaho kha Mbeu yo fulufhedziswaho kana Messia. (Mishumo 2:35, 36) Yeneyi Khosi a i nga vhusi i Yerusalema, fhedzi i ḓo vha i ṱaḓulu kha “tshanḓa tsha u ḽa” tsha Yehova. Zwenezwo a zwi nga ḓo mu ṋea maanḓa kha shango ḽa Isiraele fhedzi, fhedzi zwi ḓo ita uri a vhuse ḽifhasi ḽoṱhe. (Psalme ya 2:6-8) Hafha ho dzumbululwa na zwiṅwe zwithu zwo engedzeaho. Ṱhogomelani uri Yehova o ana nga ho khwaṱhaho uri Messia u ḓo vha “tshifhe . . . nga mulayo wa Melkitsedeke.” U fana na Melkitsedeke, we a vha e khosi na tshifhe muhulu misini ya Abrahamu, Mbeu ine ya ḓo ḓa i ḓo vhewa nga Mudzimu nga ho livhaho uri i vhe Khosi na Tshifhe!—Genesi 14:17-20.

¹⁴ Miṅwahani yo fhiraho, Yehova o shumisa vhaporofita vhawe uri vha dzumbulule tshiṅwe tshiphiri tshawe tshikhethwa. Sa tsumbo, Yesaya o dzumbulula uri yeneyo Mbeu i ḓo fa lufu lwa tshiṱhavhelo. (Yesaya 53:3-12) Mixa o dzula o amba nga ha fhethu hune Messia a ḓo bebwa hone. (Mixa 5:1) Na Daniele o porofita  tshikhathi tsho livhaho tsha u bvelela na u fa ha yeneyo Mbeu.—Daniele 9:24-27.

15, 16. (a) Murwa wa Yehova o “bebwa nga musadzi” nga nḓila-ḓe? (b) Ndi mini zwe Yesu a zwi mamela kha vhabebi vhawe vha ṋama, nahone o bvelela lini sa Mbeu yo fulufhedziswaho?

¹⁵ Nḓila ine honovhu vhuporofita ha ḓo ḓadzea ngayo yo dzula i tshiphiri u swika Mbeu i tshi bvelela. Vha-Galata 4:4 i ri: “Ha ri musi tshifhinga tshó no khunyelela, Mudzimu a ruma Murwa wawe, we a bebwa nga musadzi.” Nga ṅwaha wa 2 B.C.E., muruṅwa o vhudza musidzana wa Muyuda ane a pfi Maria uri: “Vhona, U ḓo vha muthu wa thovhela, wa beba murwa, ané wa ḓo mu ira dzina ḽa u ri Yesu; Ngauri u ḓo vha muhulwane, u ḓo pfi Murwa wa Wa-Ṱaḓulu-ṱaḓulu; huno Murena Mudzimu u ḓo mu ṋea khuluṋoni ya Davida, khotsi-awe. . . . Muya mukhethwa u ḓo ḓa kha iwe; maanḓa a Wa-Ṱaḓulu-ṱaḓulu a ḓo vha murunzi wau; ndi zwiné Mukhethwa ane a ḓo bebiwa nga iwe a ḓo pfi Murwa wa Mudzimu ngazwo’.”—Luka 1:31, 32, 35.

¹⁶ Nga murahu, Yehova o fhirisela vhutshilo ha Murwa wawe u bva ṱaḓulu mbumbeloni ya Maria, uri a kone u bebwa nga musadzi. Maria o vha e musadzi a songo fhelelaho. Naho zwo ralo, Yesu ho ngo mamela u sa fhelela khae, nga uri o vha e “Murwa wa Mudzimu.” Naho zwo ralo, nga ṅwambo wa uri vhabebi vha Yesu vha ṋama vho vha vhe vhaḓuhulu vha Davida, O bebwa e na ndugelo i re mulayoni ya u vha muḽaifa wa Davida. (Mishumo 13:22, 23) Musi Yesu a tshi lovhedzwa nga 29 C.E., Yehova o mu ḓodza nga muyamukhethwa nahone a ri: “Ndi ene Murwa-mufunwa wanga uyu, ané nda mu takalela.” (Mateo 3:16, 17) Mafheleloni Mbeu ya bvelela! (Vha-Galata 3:16) Tsho vha tshi tshifhinga tsha u dzumbulula zwinzhi nga ha tshiphiri tshikhethwa.—2 Timotheo 1:10.

17. Zwo ḓa hani uri hu pfeseswe zwo ṅwalwaho kha Genesi 3:15?

¹⁷ Tshifhingani tsha vhuḓinḓa hawe, Yesu o ṱalutshedza uri ṋowa i re kha Genesi 3:15 ndi Sathane nahone mbeu ya ṋowa ndi vhatevheli vha Sathane. (Mateo 23:33; Yohane 8:44) Nga murahu, ha dzumbululwa nḓila ine dzenedzo mbeu dzoṱhe dza ḓo lozwiwa ngayo tshoṱhe. (Ndzumbululo 20:1-3, 10, 15) Nahone ha  ṱalutshedzwa uri musadzi ndi “Yerusalema ha ṱaḓulu,” ndangulo ya Yehova ya ṱaḓulu i ngaho mufumakadzi ya zwivhumbiwa zwa muya. *—Vha-Galata 4:26; Ndzumbululo 12:1-6.

18. Ndivho ya “mulanga muswa” ndi ifhio?

¹⁸ Khamusi u dzumbululwa hu swayeaho u fhira hoṱhe ho vha hone vhusikuni ha musi Yesu a sa athu fa, musi a tshi vhudza vhafunziwa vhawe vha fulufhedzeaho nga ha “mulanga muswa.” (Luka 22:20) U fana na wa u thoma, mulanga wa Mulayo wa Mushe, wonoyu mulanga muswa wo vha u tshi ḓo bveledza ‘muvhuso wa vhotshifhe.’ (Ekisodo 19:6; 1 Petro 2:9) Naho zwo ralo, wonoyu mulanga wo vha u sa ḓo thoma lushaka lwa ṋama, fhedzi wo vha u tshi ḓo thoma lushaka lwa muya, lwa “Isiraele wa Mudzimu,” lwo vhumbwaho nga ho khetheaho nga vhatevheli vha fulufhedzeaho vha Kristo vho ḓodzwaho. (Vha-Galata 6:16) Zwenezwi zwigwada zwi re kha mulanga muswa zwi ḓo ṱanganela na Yesu kha u fhaṱutshedza murafho wa vhathu!

19. (a) Ndi ngani mulanga muswa wo kona u bveledza ‘muvhuso wa vhotshifhe’? (b) Ndi ngani Vhakriste vho ḓodzwaho vha tshi vhidzwa “tshivhumbwa tshiswa,” nahone ndi vhangana vhane vha ḓo shuma ṱaḓulu na Kristo?

¹⁹ Fhedzi ndi ngani mulanga muswa wo kona u bveledza ‘muvhuso wa vhotshifhe’ u itela u fhaṱutshedza vhathu? Nṱhani ha u sasaladza vhafunziwa vha Kristo zwa ita uri vha nge ndi vhaitazwivhi, wo ita uri zwi konadzee uri vha hangwelwe zwivhi zwavho nga tshiṱhavhelo tshawe. (Yeremia 31:31-34) Musi vha tshi vha na vhuimo havhuḓi phanḓa ha Yehova, u vha ṱanganedza muṱani wawe wa ṱaḓulu nahone a vha ḓodza nga muyamukhethwa. (Vha-Roma 8:15-17; 2 Vha-Korinta 1:21) Nga zwenezwo vha ‘bebwa hafhu, uri vha vhe na fulufhelo ḽi tshilaho ḽo vhewaho ṱaḓulu.’ (1 Petro 1:3, 4) Samusi honoho vhuimo ha nṱha vhu vhuswa tshoṱhe  kha vhathu, Vhakriste vho ḓodzwaho nga muya vha vhidzwa “tshivhumbwa tshiswa.” (2 Vha-Korinta 5:17) Bivhili i dzumbulula uri vha 144 000 mafheleloni vha ḓo ṱanganela kha u vhusa vhathu vho rengululwaho, vhe ṱaḓulu.—Ndzumbululo 5:9, 10; 14:1-4.

20. (a) Ndi u dzumbululwa hufhio malugana na tshiphiri tshikhethwa he ha itwa nga 36 C.E.? (b) Ndi vhafhio vhane vha ḓo ḓiphina nga phaṱutshedzo dzo fulufhedziswaho Abrahamu?

²⁰ Yesu na vhenevha vhaḓodzwa, vha vha “mbeu ya Abrahamu.” * (Vha-Galata 3:29) Vhe vha thoma u khethiwa vho vha vhe Vhayuda vha ṋama. Fhedzi nga 36 C.E., ḽiṅwe sia ḽa tshiphiri tshikhethwa ḽo dzumbululwa: Vhannḓa, kana vha si Vhayuda, na vhone vha ḓo ṱanganela kha fulufhelo ḽa ṱaḓulu. (Vha-Roma 9:6-8; 11:25, 26; Vha-Efesa 3:5, 6) Naa ndi Vhakriste vho ḓodzwaho fhedzi vhane vha ḓo ḓiphina nga phaṱutshedzo dzo fulufhedziswaho Abrahamu? Hai, nga uri tshiṱhavhelo tsha Yesu tshi vhuyedza shango ḽoṱhe. (1 Yohane 2:2) Nga u ya ha tshifhinga, Yehova o dzumbulula uri vha “gogo ḽihulu” ḽi sa vhalei vha ḓo ponyoka vhufhelo ha maitele a zwithu a Sathane. (Ndzumbululo 7:9, 14) Mavhuthu manzhi a ḓo vuswa e na tshilavhelelwa tsha u tshila tshoṱhe Paradisoni!—Luka 23:43; Yohane 5:28, 29; Ndzumbululo 20:11-15; 21:3, 4.

21, 22. Tshiphiri tshikhethwa tsha Yehova tsho sumbedza vhuṱali hawe nga nḓila-ḓe?

²¹ Tshiphiri tshikhethwa ndi musumbedzo u swayeaho wa uri “vhuṱali ha Mudzimu ha mivhala minzhisa ndi vhunzani.” (Vha-Efesa 3:8-10) Nahone ndi vhuṱali havhuḓi lungafhani he Yehova a vhu sumbedza musi a tshi tandulula tshenetshi tshiphiri, na musi a tshi tshi dzumbulula nga zwiṱuku nga zwiṱuku! O ṱhogomela nga vhuṱali vhushayanungo ha vhathu, a vha litsha vha tshi sumbedza vhuimo havho ha vhukuma ha mbilu.—Psalme ya 103:14.

²² Yehova o dovha a sumbedza vhuṱali hawe vhu sa vhambedzwi  na tshithu musi a tshi khetha Yesu sa Khosi. Murwa wa Yehova u a fulufhedzea nga maanḓa u fhira tshivhumbwa naho tshi tshifhio tshi re fhethu hoṱhe. Musi a tshi khou tshila sa muthu wa ṋama na malofha, Yesu o sedzana na vhuleme ha mifuda minzhi. U pfesesa nga vhuḓalo vhuleme ha vhathu. (Vha-Heberu 5:7-9) Hu pfi mini nga vhane vha ḓo vhusa na Yesu? Miṅwahani ya maḓana, vhanna na vhafumakadzi—vho khethwaho kha matsinde, nyambo na vhubvo hoṱhe—vho ḓodzwa. Zwi re zwone ndi uri a hu na vhuleme vhu sa athu tshenzhelwa kana u kundwa nga vhenevho vhathu. (Vha-Efesa 4:22-24) U tshila nga fhasi ha vhuvhusi ha enea mahosi na vhotshifhe zwi ḓo vha zwi takadzaho!

23. Ndi ndugelo ifhio ine Vhakriste vha vha nayo malugana na tshiphiri tshikhethwa tsha Yehova?

²³ Muapostola Paulo o ṅwala uri: “Tshiphiri [“tshikhethwa,” NW] tshe tsha vha tsho dzumbiwa tsha kale na kale na kha dzitshakha na dzitshakha, . . . tshi vhonala kha vhakhethwa vhawe.” (Vha-Kolosa 1:26) Ee, vhakhethwa vha Yehova vho ḓodzwaho vho pfesesa zwinzhi nga ha tshiphiri tshikhethwa, nahone vho vhudza vhaṅwe vha dzimilioni yeneyo nḓivho. Ndi ndugelo yavhuḓi lungafhani ine roṱhe ra vha nayo! Yehova o “ḓivhadza tshiphiri [“tshikhethwa,” NW] tsha zwe a funa zwi tshi vha hone.” (Vha-Efesa 1:9) Kha ri vhudze vhaṅwe tshenetshi tshiphiri tshi mangadzaho, ri vha thuse uri na vhone vha vhone vhuṱali ha Yehova Mudzimu vhuhulwane!