1, 2. Ano nga “sagrado nga tinago” an sadang makapainteres ha aton, ngan kay ano?

 MGA tinago! Tungod kay nakakaaghat ito hin interes, nakakadani, ngan nakakagupong, agsob nga nakukurian an mga tawo ha pagtipig hito nga tago. Kondi, an Biblia nasiring: “Kadungganan han Dios an pagsekreto han usa nga butang.” (Proberbios 25:2) Oo, sugad nga Soberano nga Magmarando ngan Maglalarang, husto nga gintitipigan ni Jehova an pipira nga mga butang nga sekreto tikang ha katawohan tubtob ha pag-abot han iya itinanda nga panahon ha pagpahayag hito.

² Kondi, may-ada nakakadani, makapainteres nga tinago nga iginpapahayag ni Jehova ha iya Pulong. Tinatawag ito nga ‘sagrado nga tinago han kaburut-on han Dios.’ (Efeso 1:9) An paghibaro mahitungod hito makakahimo hin dugang pa kay ha pagtagbaw han imo pagin mausisa. An kahibaro mahitungod hini nga tinago mahimo magtugway ha kaluwasan ngan makakaghatag ha imo hin pagsabot ha diri-matugkad nga kinaadman ni Jehova.

3, 4. Paonan-o an tagna nga iginrekord ha Genesis 3:15 naghatag hin paglaom, ngan ano nga misteryo, o “sagrado nga tinago,” an igin-upod hito?

³ Han nakasala hi Adan ngan Eva, bangin baga in napugngan an katuyoan ni Jehova ha pagkaada hin tunan-on nga paraiso nga inuukyan han hingpit nga mga tawo. Kondi gintagad dayon han Dios an problema. Hiya nagsiring: “Magbubutang ako hin away butnga nimo [an halas] ngan han babaye ngan butnga han imo tulin ngan han iya tulin.  Iya dudugmukon an imo ulo, ngan imo sasamaran an iya tikod.”—Genesis 3:15.

⁴ Nakakagupong, diri-matin-aw ini nga mga pulong. Hin-o ini nga babaye? Hin-o an halas? Hin-o an “tulin” nga magdudugmok han ulo han halas? Waray mahihimo hi Adan ngan Eva kondi an magtigo la. Kondi, an mga pulong han Dios naghatag hin paglaom para ha bisan hin-o nga matinumanon nga anak hiton diri-matinumanon nga mag-asawa. Magdadaog an katadongan. Matutuman an katuyoan ni Jehova. Kondi paonan-o? Ah, usa ito nga misteryo! Tinatawag ito han Biblia nga “kinaadman han Dios ha sagrado nga tinago, an nakatago nga kinaadman.”—1 Corinto 2:7.

5. Iilustrar kon kay ano nga iginpahayag ni Jehova an iya tinago ha hinayhinay nga paagi.

⁵ Sugad nga an “Parapahayag han mga sekreto,” ha kataposan igpapahayag ni Jehova an matin-aw nga mga detalye mahitungod han katumanan hini nga tinago. (Daniel 2:28) Kondi bubuhaton niya ito ha hinayhinay, sunodsunod nga paagi. Ha pag-ilustrar, bangin hunahunaon naton an paagi han pagbaton han mahigugmaon nga amay kon an iya gutiay nga anak nga lalaki nagpapakiana, “Tatay, paonan-o ako natawo?” An maaramon nga amay naghahatag la han impormasyon nga masasabtan hiton gutiay nga bata. Samtang nagtutubo an bata, dugang pa nga ginsusumatan hiya han amay. Ha pariho nga paagi, ginsisiguro ni Jehova kon san-o andam na an iya katawohan ha mga pagpahayag han iya kaburut-on ngan katuyoan.—Proberbios 4:18; Daniel 12:4.

6. (a) Ano an katuyoan han usa nga kasabotan, o kontrata? (b) Kay ano nga makatirigamnan nga maghihimo hi Jehova hin mga kasabotan ha mga tawo?

⁶ Paonan-o ginhimo ni Jehova an sugad nga mga pagpahayag? Ginamit niya an sunodsunod nga mga kasabotan, o mga kontrata, ha pagpahayag hin damu. Bangin ha usa o lain nga panahon, nagpirma ka hin usa nga kontrata —bangin ha pagpalit hin usa nga balay o pag-utang o pagpautang hin kwarta. An sugad nga kontrata naghatag hin legal nga garantiya nga tutumanon an mga kondisyon nga ginkauyonan. Kondi kay ano nga kinahanglan maghimo hi Jehova hin pormal nga mga kasabotan, o mga kontrata, ha mga tawo? Sigurado, an iya pulong igo na nga garantiya han iya mga saad. Totoo ito, kondi, ha damu nga okasyon, maloloy-on nga ginparig-on han Dios an iya pulong pinaagi han legal nga mga kontrata. Inin marig-on nga mga kasabotan naghahatag ha aton nga diri-hingpit nga mga tawo hin mas marig-on pa gud nga basihanan ha pagsarig ha mga saad ni Jehova.—Hebreo 6:16-18.

7, 8. (a) Ano nga kasabotan an ginhimo ni Jehova kan Abraham, nga nagpapasanag hin ano nga kahayag ha sagrado nga tinago? (b) Paonan-o hinayhinay nga iginpakilala ni Jehova an gintikangan han iginsaad nga tulin?

⁷ Sobra duha ka yukot ka tuig katapos paiwason an tawo ha Paraiso, hi Jehova nagsumat ha iya matinumanon nga surugoon nga hi Abraham: “Padadamuon ko gud an imo tulin sugad kadamu han mga bitoon ha langit . . . Ngan pinaagi han imo tulin an ngatanan nga nasud ha tuna makarawat hin bendisyon kay namati ka ha akon tingog.” (Genesis 22:17, 18) Labaw pa ito han usa nga saad; ginhimo ito ni Jehova ha porma han usa ka legal nga kasabotan ngan ginparig-on ito pinaagi han iya diri-napapakyas nga pagsumpa. (Genesis 17:1, 2; Hebreo 6:13-15) Makatirigamnan gud nga an Soberano nga Ginoo ha tinuod nakigkontrata ha pagbendisyon ha katawohan!

⁸ An kasabotan kan Abraham nagpahayag nga an iginsaad nga tulin maabot sugad nga tawo, kay magigin tulin hiya  ni Abraham. Kondi hin-o hiya? Inabot an panahon, iginpahayag ni Jehova nga ha mga anak ni Abraham, hi Isaac an magigin kaapoy-apoyan han tulin. Ha duha nga anak nga lalaki ni Isaac, hi Jacob an ginpili. (Genesis 21:12; 28:13, 14) Ha urhi, ginyakan ni Jacob inin matagnaon nga mga pulong ha usa han iya 12 nga anak nga kalalakin-an: “An setro diri mabulag kan Juda, diri liwat mabulag an baston han kumander tikang ha butnga han iya mga tiil, tubtob nga umabot hi Shilo [o, “Hiya nga Nagtatag-iya Hito,” footnote], ngan hiya an susugton han mga katawohan.” (Genesis 49:10) Salit hinbaroan nga an tulin magigin hadi, usa nga nagtikang kan Juda!

9, 10. (a) Ano nga kasabotan an ginhimo ni Jehova ha nasud han Israel, ngan ano nga panalipod an iginhatag hito nga kasabotan? (b) Paonan-o ipinakita han Balaud an panginahanglan han katawohan hin lukat?

⁹ Han 1513 B.C.E., ginhikay ni Jehova an pag-andam han dugang nga mga pagpahayag mahitungod han sagrado nga tinago. Naghimo hiya hin kasabotan ha mga tulin ni Abraham, an nasud han Israel. Bisan kon diri na iginpapatuman yana, inin Mosaiko nga Balaud nga kasabotan importante nga bahin han katuyoan ni Jehova ha pagdara han iginsaad nga tulin. Paonan-o? Tagda an tulo nga paagi. Siyahan, an Balaud pariho han nagpapanalipod nga pader. (Efeso 2:14) An matadong nga mga surundon hito nagin ulang butnga han mga Judio ngan mga Hentil. Salit an Balaud nakabulig ha pagtipig han katulinan nga pagtitikangan han iginsaad nga tulin. Tungod han sugad nga panalipod, an nasud han Israel naeksister pa gihapon han inabot an itinanda nga panahon han Dios para ha Mesias nga matawo ha tribo ni Juda.

¹⁰ Ikaduha, ipinakita gud han Balaud an panginahanglan han katawohan hin lukat. Tungod kay hingpit nga Balaud,  nagbuhayhag ito han kawaray mahihimo han makasasala nga mga tawo ha bug-os nga pagsunod hito. Salit nag-alagad ito “basi maipahayag an mga pagtalapas, tubtob nga umabot an tulin nga makarawat han saad.” (Galacia 3:19) Pinaagi han mga halad nga hayop, an Balaud naghatag hin temporaryo nga pagtubos para han mga sala. Kondi, tungod kay, sugad han iginsurat ni Pablo, “diri nakakakuha han mga sala an dugo han mga baka nga lalakí ngan han mga kanding,” ini nga mga halad nagpadagaw la han halad lukat han Kristo. (Hebreo 10:1-4) Salit, para han matinumanon nga mga Judio, ito nga kasabotan nagin “parabantay . . . nga naggigiya ngadto ha Kristo.”—Galacia 3:24.

11. Ano nga mahimayaon nga paglaom an iginhatag han Balaud nga kasabotan ha Israel, kondi kay ano nga nawad-an iton nga nasud ha kabug-osan?

¹¹ Ikatulo, iton nga kasabotan naghatag ha nasud han Israel hin mahimayaon nga paglaom. Ginsumatan hira ni Jehova nga kon magigin matinumanon hira ha kasabotan, hira magigin “usa nga ginhadian han mga saserdote ngan usa nga baraan nga nasud.” (Exodo 19:5, 6) An unudnon nga Israel ha kataposan naghatag han siyahan nga mga membro han langitnon nga ginhadian han mga saserdote. Kondi, ha kabug-osan, an Israel nagrebelde kontra han Balaud nga kasabotan, nagsalikway han Mesianiko nga tulin, ngan nawad-an hiton nga paglaom. Hin-o, kon sugad, an magkukompleto han ginhadian han mga saserdote? Ngan paonan-o iton binendisyonan nga nasud magigin may kalabotan ha iginsaad nga tulin? Iton nga mga bahin han sagrado nga tinago igpapahayag ha itinanda nga panahon han Dios.

12. Ano nga kasabotan an ginhimo ni Jehova kan David, ngan ano nga kahayag an ginpasanag hito ha sagrado nga tinago han Dios?

¹² Han ika-11 ka siglo B.C.E., hi Jehova nagpasanag hin  dugang nga kahayag ha sagrado nga tinago han ginhimo niya an lain nga kasabotan. Hiya nagsaad ha matinumanon nga hi Hadi David: “Ibabangon ko an imo tulin nga masunod ha imo, . . . ngan ig-iestablisar ko hin marig-on an iya ginhadian. . . . Ig-iestablisar ko hin marig-on an trono han iya ginhadian ha kadayonan.” (2 Samuel 7:12, 13; Salmo 89:3) Yana iginpatin-aw nga an katulinan han iginsaad nga tulin magtitikang ha balay ni David. Kondi an ordinaryo ba nga tawo makakagmando ha kadayonan? (Salmo 89:20, 29, 34-36) Ngan maluluwas ba han sugad tawhanon nga hadi an katawohan tikang ha sala ngan kamatayon?

13, 14. (a) Sumala ha Salmo 110, ano an iginsaad ni Jehova ha iya dinihogan nga Hadi? (b) Ano an dugang nga mga kapahayagan mahitungod han tiarabot nga tulin nga iginpahayag pinaagi han mga propeta ni Jehova?

¹³ Pinaagi han baraan nga espiritu, hi David nagsurat: “Hi Jehova nagsiring ha akon Ginoo: ‘Lingkod ha akon too tubtob nga ibutang ko an imo mga kaaway sugad nga tungtongan han imo mga tiil.’ Hi Jehova nanumpa, ngan diri hiya magbabag-o han iya hunahuna: ‘Usa ka nga saserdote ha kadayonan ha paagi nga pariho han kan Melkizedek!’” (Salmo 110:1, 4) An mga pulong ni David direkta nga nagtutudlok ha iginsaad nga tulin, o Mesias. (Buhat 2:35, 36) Ini nga Hadi magmamando, diri tikang ha Jerusalem, kondi tikang ha langit ha “too” ni Jehova. Maghahatag ito ha iya hin awtoridad diri la ha nasud han Israel kondi ha bug-os nga tuna. (Salmo 2:6-8) Usa pa nga butang an iginpahayag dinhi. Tigamni nga hi Jehova nagyakan hin seryoso nga pagsumpa nga an Mesias magigin “saserdote . . . ha paagi nga pariho han kan Melkizedek.” Pariho kan Melkizedek, nga nag-alagad sugad nga hadi-saserdote ha panahon ni Abraham, an maabot nga tulin direkta nga pipilion han Dios basi mag-alagad sugad nga Hadi ngan Saserdote!—Genesis 14:17-20.

 ¹⁴ Ha naglabay nga mga tuig, ginamit ni Jehova an iya mga propeta ha dugang nga pagpahayag mahitungod han iya sagrado nga tinago. Hi Isaias, pananglitan, nagpahayag nga an tulin mamamatay sugad nga halad. (Isaias 53:3-12) Hi Micas nagtagna han lugar diin matatawo an Mesias. (Micas 5:2) Igintagna pa ngani ni Daniel an eksakto nga panahon han pag-abot ngan kamatay han tulin.—Daniel 9:24-27.

15, 16. (a) Paonan-o an Anak ni Jehova “igin-anak han usa nga babaye”? (b) Ano an napanunod ni Jesus tikang ha iya tawhanon nga mga ginikanan, ngan kakan-o hiya inabot sugad nga an iginsaad nga tulin?

¹⁵ Kon paonan-o matutuman ini nga mga tagna nagpabilin nga misteryo tubtob nga inabot an tulin. An Galacia 4:4 nasiring: “Pag-abot han kataposan han panahon, ginsugo han Dios an iya Anak, nga igin-anak han usa nga babaye.” Han tuig 2 B.C.E., usa nga anghel an nagsiring ha Judio nga birhen nga hi Maria: “Kitaa! magbuburod ka ngan mag-aanak hin lalaki, ngan ngangaranan mo hiya hin Jesus. Magigin harangdon hiya ngan tatawagon nga Anak han Gihitaasi, ngan ihahatag ha iya ni Jehova nga Dios an trono ni David nga iya amay . . . An baraan nga espiritu makada ha imo, ngan an gahum han Gihitaasi maglalambong ha imo. Ngan tungod hito, an bata nga matatawo tatawagon nga baraan, Anak han Dios.”—Lucas 1:31, 32, 35.

¹⁶ Ha urhi, iginbalhin ni Jehova an kinabuhi han iya Anak tikang ha langit ngadto ha taguangkan ni Maria, salit igin-anak hiya han usa nga babaye. Hi Maria diri-hingpit nga babaye. Kondi, hi Jesus waray makapanunod han iya pagkadiri-hingpit, kay hiya an “Anak han Dios.” Ha pariho nga panahon, an tawhanon nga mga ginikanan ni Jesus, sugad nga mga tulin ni David, naghatag ha Iya han kinaiya ngan legal nga mga katungod han usa nga manurunod ni David. (Buhat 13:22, 23) Ha bawtismo ni Jesus han 29 C.E.,  gindihogan hiya ni Jehova han baraan nga espiritu ngan nagsiring: “Ini an akon Anak nga hinigugma.” (Mateo 3:16, 17) Ha kataposan, inabot an tulin! (Galacia 3:16) Ito an panahon han pagpahayag hin dugang pa mahitungod han sagrado nga tinago.—2 Timoteo 1:10.

17. Paonan-o ginpasanag an kahayag ha kahulogan han Genesis 3:15?

¹⁷ Durante han iya ministeryo, iginpakilala ni Jesus an halas han Genesis 3:15 nga amo hi Satanas ngan an tulin han halas amo an mga sumurunod ni Satanas. (Mateo 23:33; Juan 8:44) Ha urhi, iginpahayag kon paonan-o ini ngatanan bubungkagon ha kadayonan. (Pahayag 20:1-3, 10, 15) Ngan an babaye iginpakilala nga amo “an Jerusalem ha igbaw,” o asawa han Dios—an langitnon nga bahin han organisasyon ni Jehova, nga ginkukompwesto han espiritu nga mga linarang. a—Galacia 4:26; Pahayag 12:1-6.

18. Ano an katuyoan han “bag-o nga kasabotan”?

¹⁸ Bangin an pinakamakatirigamnan nga kapahayagan ha ngatanan nahitabo ha gab-i antes mamatay hi Jesus han ginsumatan niya an iya matinumanon nga mga disipulo mahitungod han “bag-o nga kasabotan.” (Lucas 22:20) Pariho han nahiuna hito, an kasabotan han Mosaiko nga Balaud, inin bag-o nga kasabotan maghahatag han “usa nga ginhadian han mga saserdote.” (Exodo 19:6; 1 Pedro 2:9) Kondi, ini nga kasabotan magtutukod, diri han unudnon nga nasud, kondi han espirituwal, an “Israel han Dios,” nga ginkukompuwesto la han matinumanon nga dinihogan  nga mga sumurunod han Kristo. (Galacia 6:16) Ini nga mga kaapi han bag-o nga kasabotan makakaupod ni Jesus ha pagbendisyon ha katawohan!

19. (a) Kay ano nga an bag-o nga kasabotan naglampos ha paghatag hin “usa nga ginhadian han mga saserdote”? (b) Kay ano nga an dinihogan nga mga Kristiano tinatawag nga ‘bag-o nga linarang,’ ngan pira an mag-aalagad ha mga langit upod han Kristo?

¹⁹ Kondi kay ano nga an bag-o nga kasabotan naglalampos ha paghatag hin “usa nga ginhadian han mga saserdote” ha pagbendisyon ha katawohan? Tungod kay imbes nga hukman an mga disipulo han Kristo sugad nga magpakasasala, nagtatagana ito han kapasayloan han ira mga sala pinaagi han iya halad. (Jeremias 31:31-34) Ha panahon nga nakakarawat nira an matadong nga kahimtang ha atubangan ni Jehova, iya kinakarawat hira ngadto ha iya langitnon nga pamilya ngan gindidihogan hira han baraan nga espiritu. (Roma 8:15-17; 2 Corinto 1:21) Salit naieksperyensyahan nira nga ‘ig-anak utro ngadto ha buhi nga paglaom nga iginreserba ha langit.’ (1 Pedro 1:3, 4) Tungod kay an sugad hitaas nga kahimtang bug-os nga bag-o ha mga tawo, an igin-anak-ha-espiritu nga dinihogan nga mga Kristiano tinatawag nga ‘bag-o nga linarang.’ (2 Corinto 5:17) An Biblia nagpapahayag nga 144,000 an ha kataposan makakaupod ha pagmando tikang ha langit ha tinubos nga katawohan.—Pahayag 5:9, 10; 14:1-4.

20. (a) Ano an iginpahayag may kalabotan ha sagrado nga tinago han 36 C.E.? (b) Hin-o an magpapahimulos han mga bendisyon nga iginsaad kan Abraham?

²⁰ Kaupod ni Jesus, ini nga mga dinihogan magigin ‘tulin ni Abraham.’ b (Galacia 3:29) An siyahan nga ginpili amo  an unudnon nga mga Judio. Kondi han 36 C.E., iginpahayag an usa pa nga bahin han sagrado nga tinago: an mga Hentil, o mga diri-Judio, makakaangbit liwat ha langitnon nga paglaom. (Roma 9:6-8; 11:25, 26; Efeso 3:5, 6) Dinihogan nga mga Kristiano la ba an magpapahimulos han mga bendisyon nga iginsaad kan Abraham? Diri, tungod kay an halad ni Jesus pahihimulosan han bug-os nga kalibotan. (1 Juan 2:2) Inabot an panahon, iginpahayag ni Jehova nga an diri-maihap nga “daku nga grupo” maluluwas ha kataposan han sistema han mga butang ni Satanas. (Pahayag 7:9, 14) Damu pa an babanhawon nga may-ada paglaom nga mabuhi ha waray kataposan ha Paraiso!—Lucas 23:43; Juan 5:28, 29; Pahayag 20:11-15; 21:3, 4.

21, 22. Ha ano nga mga paagi ipinapakita han sagrado nga tinago ni Jehova an iya kinaadman?

²¹ An sagrado nga tinago usa ka urusahon nga pagpakita han “damu gud kalain nga kinaadman han Dios.” (Efeso 3:8-10) Pagkadaku nga kinaadman an ipinakita ni Jehova ha paghimo hini nga tinago, ngan katapos ha hinayhinay nga pagpahayag hito! Maaramon nga gintagad niya an mga limitasyon han mga tawo, tinutugotan hira nga ipakita an totoo nga kahimtang han ira kasingkasing.—Salmo 103:14.

²² Ipinakita liwat ni Jehova an diri-matupngan nga kinaadman ha iya pagpili kan Jesus sugad nga Hadi. Mas masasarigan an Anak ni Jehova kay ha bisan hin-o nga iba nga linarang ha uniberso. Ha pagkinabuhi sugad nga tawo nga may unod ngan dugo, naeksperyensyahan ni Jesus an damu nga klase hin kakurian. Bug-os nga nasasabtan niya an mga problema han tawo. (Hebreo 5:7-9) Ngan kumusta man an mga igkasi-magmarando ni Jesus? Ha naglabay  nga mga siglo, an kalalakin-an ngan kababayin-an—nga ginpili tikang ha ngatanan nga mga rasa, mga yinaknan, ngan mga gintikangan—gindihogan. Ngatanan nga problema inatubang ngan nalamposan hini nga mga indibiduwal. (Efeso 4:22-24) An pagkinabuhi ilarom han pagmando hinin maloloy-on nga mga hadi-saserdote magigin makalilipay!

23. Ano an pribilehiyo han mga Kristiano may kalabotan han sagrado nga tinago ni Jehova?

²³ Hi apostol Pablo nagsurat: ‘An sagrado nga tinago nga waray isumat ha naglabay nga mga sistema han mga butang ngan ha naglabay nga mga henerasyon iginpahayag na ha iya mga baraan.’ (Colosas 1:26) Oo, damu an hinsasabtan han dinihogan nga mga baraan ni Jehova mahitungod han sagrado nga tinago, ngan ira iginsusumat an sugad nga kahibaro ha minilyon nga mga tawo. Daku gud an pribilehiyo naton ngatanan! Hi Jehova ‘nagpahibaro ha aton han sagrado nga tinago han iya kaburut-on.’ (Efeso 1:9) Aton isumat inin urusahon nga tinago ha iba, binubuligan hira liwat nga magkita ngadto ha diri-matugkad nga kinaadman ni Jehova nga Dios!