1-3. Aiseā e mafai ai ona tatou mautinoa e faamaulalo Ieova?

 O LOO manaʻo se tamā e aʻoaʻo i lona alo laʻitiiti se lesona tāua lava. O lona faanaunauga ina ia pāʻia le loto o le tamaitiiti. O le ā le auala e tatau ona ia faafoeina ai? Pe tatau ea ona tū taufaamataʻu atu i luma o le tamaitiiti ma faaaogā ni upu sauā? Pe na i lo lea, e tatau ona punou ifo ina ia fesagaʻi lelei ma le tamaitiiti, ma talanoa atu i ai i se leo mālū, ma logoleleia? E mautinoa, o se auala filemu o le a filifili se tamā e atamai ma lotomaulalo e faafoe ai.

² O le ā le ituaiga o Tamā e iai Ieova—faamaualuga pe faamaulalo, e ʻinaʻinā pe agamalu? E silafia e Ieova mea uma lava, ua iā te ia foʻi le atamai uma. Ae po ua e mātauina ea, e lē faapea a poto ma atamai se tagata, ona faamaulalo ai lea o lenā tagata? E pei ona taʻua e le Tusi Paia, “e faafefete le ʻpoto.’” (1 Korinito 3:19; 8:1) Peitaʻi o Ieova, e ʻatamai lona finagalo,’ ae faamaulalo o ia. (Iopu 9:4) E lē o le uiga faapea e iai se mea e maulalo ifo ai o ia i lona tulaga po ua leai foʻi sona mamalu, peitaʻi e lē o iā te ia se lagona faamaualuga. Aiseā?

³ E paia Ieova. E lē o iā te ia la se uiga faamaualuga, le uiga lea e faaleagaina ai se tasi. (Mareko 7:20-22) E lē gata i lea, seʻi mātau upu na fai atu ai le perofeta o Ieremia iā Ieova: “O le a e manatuaina lava, ma e matuā punou mai ai i oʻu luga.” a (Auega 3:20, NWT) Seʻi faauta! Sa finagalo malie Ieova, o le Alii Pule Silisili Ese aoao, e “faanoʻunoʻu” ifo, pe faamaulalo mai i le tulaga sa  iai Ieremia ina ia mafai ona ia matuā uaʻi lelei atu i lenā tagata lē lelei atoatoa. (Salamo 113:7) Ioe, e faamaulalo Ieova. Ae o le ā e aofia ai i le faamaulalo faale-Atua? E faapefea ona fesootaʻi atu lea uiga i le atamai? Aiseā e tāua ai lenā faamaulalo iā i tatou?

4, 5. (a) O le ā le faamaulalo, e faapefea ona faaalia, ma aiseā e lē tatau ai ona fenumiaʻia lona uiga lea ma le lotovaivai po o le palaai? (e) Na faapefea ona faaalia e Ieova lona faamaulalo i ana feutagaʻiga ma Tavita, ma o le ā le tāua iā i tatou o le faamaulalo o Ieova?

⁴ O le faamaulalo o le lē iai lea o se manatu faamaualuga ma se agaga fiasili. Talu ai o se uiga o le loto, e mafai ai ona aliali mai le faamaulalo i uiga masani e pei o le agavaivai, le onosai, ma le magafagafa. (Kalatia 5:22, 23) Ae peitaʻi, e lē tatau lava ona faauiga sesē atu nei uiga faale-Atua, i le lotovaivai po o le palaai. E fesootaʻi lelei nei uiga ma le toʻasa amiotonu o Ieova, po o le faaaogāina o lona mana faaoosala. Peitaʻi ane, ona o lona faamaulalo ma le agamalu, ua faaalia mai ai e Ieova le tele o lona malosi po o lona mana, i le faatautaia i se tulaga atoatoa ona lelei o ana lava gaoioiga. (Isaia 42:14) E faapefea ona fesootaʻi atu le  faamaulalo i le atamai? Ua taʻua e se tusi e faatatau i le Tusi Paia e faapea: “Ua iʻu lava ina faamatalaina le uiga o le faamaulalo . . . i ni faaupuga e faauiga atu i se uiga e lē manatu faapito ma o le faavae autū lea o le atamai uma.” O le atamai moni la, e lē mafai ona faatino e aunoa ma le iai o le faamaulalo. Ua faapefea ona aogā iā i tatou le faamaulalo o Ieova?

⁵ Na pese atu le tupu o Tavita iā Ieova: “Ua e foaʻiina foʻi iā te aʻu le talita o le olataga mai iā te oe; ua faatumauina aʻu e lou aao taumatau; o lou agamalu ua faasilisiliina ai aʻu.” (Salamo 18:35) O lona uiga, na faanoʻunoʻu ifo Ieova ina ia mafai ai ona la feutagaʻi ma lenei tagata faatauvaa lē lelei atoatoa, ma puipuia ma faatumauina o ia mai lea aso i lea aso. Na iloa lelei e Tavita e na o le pau le auala e maua ai le faaolataga ma mulimuli ane maua foʻi se tulaga maualuga o se tupu, ona o le finagalo malie o Ieova e faamaualaloina o Ia i lenei auala. O ai se tasi o i tatou e ono maua se faamoemoe o le olataga pe ana fai e lē faamaulalo Ieova, ma finagalo malie e faamaualalo ifo o ia ina ia feutagaʻi ai ma i tatou i le avea o ia o se Tamā e agamalu ma alofa?

6, 7. (a) I le ā le uiga e faamaulalo ai Ieova? (e) O le ā le faiā a le agamalu ma le atamai, ma o ai ua faataatia maia le faaaʻoaʻoga sili i lenei itu?

⁶ O le faamaulalo o se uiga matagofie e tatau i tagata faatuatua ona latou fuaina mai. E fesootaʻi atu i le atamai. Mo se faaaʻoaʻoga, ua taʻua i le Faataoto 11:2 e faapea: “O i ai le poto i ē faamaulalo.” Peitaʻi, i le Tusi Paia, e lē taitai tutusa le faamaulalo o Ieova ma le lotomaulalo o tagata. Aiseā? E lē faapea o Ieova e lē lotomaulalo. O le lotomaulalo, e pei ona faaaogāina i le Tusi Paia mo tagata, o loo faauiga atu i le iloa lelei e se tasi o le mea e gata ai lona malosi. Peitaʻi, e lē gata mai le malosi o Lē Ona le Malosi Uma, seʻi vaganā ai tapulaa ua ia faataatia mo ia lava ona o lona lava amiotonu. (Mareko 10:27; Tito 1:2) E lē gata i lea, e leai se tasi e ao ona ia gauaʻi atu i ai ona o ia o Lē Silisili Ese. O lea, o lenā vala o le lotomaulalo e matuā lē faatatauina atu iā Ieova.

⁷ Peitaʻi, e faamaulalo Ieova i lona finagalo malie e feutagaʻi ma tagata. E agamalu foʻi o ia. Ua ia aʻoaʻoina ana auauna e faapea, o le agamalu o se uiga e matuā manaʻomia i le atamai moni. O  loo taʻua e lana Afioga faapea o le “agamalu o i ai le poto.” b (Iakopo 3:13) Seʻi manatu i le faaaʻoaʻoga a Ieova i lenei itu.

8-10. (a) Aiseā e mataʻina ai le faaalia mai e Ieova o lona finagalo malie ina ia faasafua mai ma faafofoga mai? (e) Ua faapefea ona feutagaʻi ma le faamaulalo Lē Ona le Malosi Uma i ana agelu?

⁸ O loo iai se faamaoniga faamāfanafanaloto o le faamaulalo o Ieova, i lona finagalo malie e faasafua mai tiute tauave ma faafogafoga mai. O se mea e matuā mataʻina lava lona faia o nei mea auā e lē manaʻomia e Ieova se fesoasoani po o ni fautuaga. (Isaia 40:13, 14; Roma 11:34, 35) E ui i lea, o loo faaali mai pea e le Tusi Paia le faamaulaloina e Ieova o ia i nei auala.

⁹ Seʻi manatu i se mea mataʻina na tupu i le olaga o Aperaamo. E toʻatolu ni tagata na asiasi atu iā Aperaamo, ma o se tasi o i latou nei sa taʻua e Aperaamo e faapea o “Ieova.” O le mea moni lava, o nei tagata asiasi o ni agelu, ae o se tasi o i latou sa sau i le suafa o Ieova ma avea ma ona sui. O lona uiga, ina ua tautala ma gaoioi lenā agelu, e tusa lava lenā o lea sa fetalai ma gaoioi Ieova. O inā na fetalai atu ai Ieova iā Aperaamo e faapea, sa Ia faafofoga i se “alaga mai Sotoma ma Komoro ua tele.” Na fetalai Ieova: “O le mea lea ou te alu ifo ai, ia iloa po ua faia lava e i latou e pei o le alaga ua oo mai ai iā te aʻu; afai foʻi ua leai, ou te iloa lava.” (Kenese 18:3, 20, 21) O le mea moni, e leʻi uiga le feʻau a Ieova faapea o le a “alu ifo” moni lava o ia. Peitaʻi sa ia toe aauina ifo foʻi agelu e fai mo ona sui. (Kenese 19:1) Aiseā? Pe sa lē mafai ea e Ieova o lē na te silafia mea uma, ona “iloa” e ia lava le tulaga moni o lenā vaipanoa? E mautinoa lava e na te silafia. Ae na i lo lea, sa faasafua mai ma le faamaulalo e Ieova i na agelu ni tiute tauave ina ia latou iloiloina le tulaga o mea, ma asiasi atu iā Lota ma lona aiga i Sotoma.

¹⁰ E faafofoga mai foʻi Ieova. Na iai se taimi na ia tāpā ai ana agelu i so latou manatu i ni auala eseese e faatoʻilaloina ai le tupu  amioleaga o Aapo. Sa lē manaʻomia fua e Ieova lenā fesoasoani. Peitaʻi, sa ia taliaina le manatu na faatū atu e se tasi agelu, ma faatonu ai loa le agelu na te faataunuuina lea fuafuaga. (1 Tupu 22:19-22) Pe lē o se faataʻitaʻiga ea lenā o le faamaulalo?

11, 12. Na faapefea ona iloa e Aperaamo le faamaulalo o Ieova?

¹¹ E oo lava foʻi i tagata lē lelei atoatoa, ua finagalo malie Ieova, e faafofoga mai i ai a o faaleo atu o latou popolega. Mo se faataʻitaʻiga, ina ua faatoʻā taʻu mai lava e Ieova iā Aperaamo Lona faanaunauga ina ia faaumatia Sotoma ma Komoro, sa matuā fenuminumiaʻi lenā tamā faatuatua i le feʻau. Na faapea atu Aperaamo: “Ia mamao lava iā te oe.” Ona ia toe faapea atu lea: “O lē na te faamasinoina le lalolagi uma, e lē faia ea e ia le faamasinoga tonu?” Sa ia talosaga atu pe faamata o le a faasao e Ieova aai pe afai e maua i ai ni tagata amiotonu se toʻa 50. Na faamautinoa mai e Ieova o le a Ia faasaoina. Peitaʻi, na toe talosaga foʻi Aperaamo, ma tuutuu ifo i lalo le aofaʻiga i le 45, sosoo ai ma le 40, ma faapena ai lava. E ui lava i faamautinoaga na faaali ifo e Ieova, ae sa maumauaʻi lava Aperaamo e toe talosaga atu pea seʻia oo lava ina paʻū ifo i lalo le aofaʻiga i le toʻasefulu. Atonu e leʻi matuā malamalama atoatoa Aperaamo i le telē o le alofa mutimutivale o Ieova. Po o le ā lava le pogai o talosaga a Aperaamo, ae sa onosai pea ma le faamaulalo Ieova e faafofoga atu i lana uō ma lana auauna a o faaleo atu ona popolega i lenei auala.—Kenese 18:23-33.

¹² E toʻafia ni tagata atamamai ma aʻoaʻoina lelei, o le a onosai e faalogologo atu faapena i se tagata e matuā itiiti lava sona iloa i mea? c Ae o le faamaulalo lenā o lo tatou Atua. A o faagasolo lenā fefaaaliaʻiga o manatu, sa oo ai foʻi ina matuā iloa lelei e Aperaamo, o Ieova “e telegese lona toʻasa.” (Esoto 34:6) Atonu sa ia iloa e leai sana aiā e fesiligia ai mea o loo faia e Lē Silisili Ese, o lea na ole faalua atu ai Aperaamo: “Aua neʻi toʻasa mai le Alii.” (Kenese 18:30, 32) E leʻi toʻasa Ieova. E mautinoa lava, o loo iā te ia le “agamalu o i ai le poto.”

13. O le ā le uiga o le upu “fetuutuunaʻi” e pei ona faaaogā ai i le Tusi Paia, ma aiseā ua fetaui tonu ai ona faamatalaina Ieova i lenei upu?

¹³ O loo faaalia mai foʻi le faamaulalo o Ieova i se isi uiga matagofie—e fetuutuunaʻi. E faanoanoa ona ua lē o maua lenei uiga i tagata lē lelei atoatoa. E lē gata e malie Ieova e faafofoga mai i ana foafoaga atamamai, ae finagalo malie foʻi o ia e lolo mai pe afai e lē o feteenaʻi ma mataupu silisili amiotonu. O le upu “fetuutuunaʻi” e pei ona faaaogā i le Tusi Paia, o lona uiga lava e faasino i le “lolo atu.” O lenei foʻi uiga o se faailoga matilatila o le atamai tauatua. I le Iakopo 3:17 o loo faapea mai: “O le poto mai lugā e . . . agamalu” pe e “fetuutuunaʻi.” O le ā e uiga i ai le fetuutuunaʻi o Ieova o lē e iai le atamai uma? I le uiga e faapea, e fetālaʻi lona finagalo. Ia manatua foʻi, ua tatou iloa mai i lona suafa e faapea e gaoioi Ieova e tusa ma tulaga manaʻomia ina ia faataunuuina ai lona finagalo. (Esoto 3:14) Pe lē o faaalia ai ea i inā se uiga o le fetālaʻi ma le fetuutuunaʻi?

14, 15. O le ā le mea ua taʻu mai iā i tatou e le vaaiga lea na iloa e Esekielu i le kariota faalelagi a Ieova, e faatatau i le vaega faalelagi o le faalapotopotoga a Ieova, ma ua faapefea ona ese mai faalapotopotoga a le lalolagi?

¹⁴ E iai se fuaitau mataʻina i le Tusi Paia e fesoasoani mai ina ia malamalama ai i le uiga fetalāʻi o Ieova. Na faailoa atu iā Esekielu se vaaiga e faatatau i le vaega faalelagi o le faalapotopotoga a Ieova, lea e faia aʻe i foafoaga agaga. Sa ia vaaia ai se kariota ma ni ona vaega matuā ofoofogia lava, o le “mea taavale” a Ieova lava ia, o loo Ia faatonutonuina i taimi uma. E sili ona mataʻina le auala sa fegaoioiaʻi ai. O mea taavavale e uigaese le tetelē, e taʻi fā o latou itu ma na iai mata i itu uma ina ia mafai ai ona latou iloa atu mea uma, ma mafai ona suia faafuaseʻi le itulagi e agaʻi atu i ai, e aunoa ma se tau taofi pe tau liliu. Ma e leʻi alu tau mālua foʻi lenei kariota, e pei o se taavale na fausia e se tagata. Na mafai ona gaoioi i se televave e pei o le emo o le uila, e mafai foʻi ona liliu faafuaseʻi e aunoa ma se faafitauli! (Esekielu 1:1, 14-28) Ioe, o le faalapotopotoga a Ieova le Pule Silisili Ese, lea o loo ia faatonutonuina, e matuā fetuutuunaʻi ina ia feagai ma so o se tulaga ma manaʻoga fesuisuiaʻi e tulaʻi mai.

 ¹⁵ E faigatā i tagata ona faataʻitaʻi atu i lenā uiga fetuutuunaʻi lelei atoatoa. Peitaʻi, ua masani ona tele ina iai i tagata ma a latou faalapotopotoga se uiga o le pulepuletutū na i lo le fetuutuunaʻi, e tele ina loto maaa na i lo le fia lolo atu. Seʻi fai se faataʻitaʻiga: Atonu o se mea e matuā ofoofogia se vaa laʻuuta telē po o se nofoaafi laʻuuta, ona o lona telē ma le malosi. Ae pe mafai e se tasi o na mea ona tatalia ni suiga faafuaseʻi e tulaʻi mai? Afai e faafuaseʻi ona paʻū ane se mea ma faalava tonu i le auala o loo alu ai se nofoaafi laʻuuta, e mautinoa lava e lē mafai ona toe liliu. E lē faigofie foʻi ona taofi faafuaseʻi na mea. Atonu e tai atoa se maila (se lua kilomita) o tau taofi se nofoaafi telē o loo mamafa sana uta o avatu! E faapena foʻi i se vaa laʻuuta telē, atonu e oo atu i le lima maila (8 kilomita) o tau taofi pe a oo ina tapē le afi. E tusa lava pe toe taumafai e faasolomuli i tua, ae atonu e oo lava i le lua maila (3 kilomita) o alu pea i luma le vaa laʻuuta! E faapena foʻi i faalapotopotoga faaletagata na o loo tele ina faagaoioia i ni faiga pulepuletutū ma le lē fetuutuunaʻi. Ona o lagona faamaualuga, e masani ai ona mumusu tagata e toe fetuunaʻi atu i ni manaʻoga ma ni tulaga ua suia. O uiga pulepuletutū na, ua gau ai pisinisi tetele ma ua oo ai foʻi ina malepelepe ai faigāmalo. (Faataoto 16:18) Maʻeu so tatou fiafia ona e lē taitai faapena Ieova po o lana faalapotopotoga!

16. Na faapefea ona faaalia e Ieova lona fetuutuunaʻi i le feagai ai ma Lota a o leʻi faaoo mai le faaumatiaga iā Sotoma ma Komoro?

¹⁶ Seʻi toe manatu foʻi i le faaumatiaga o Sotoma ma Komoro. Na matuā manino lava faatonuga na aumai iā Lota ma lona aiga e le agelu a Ieova: “Ia sola lava i le mauga.” Peitaʻi, e leʻi ano tele i ai Lota. Na ia ʻaiʻoi atu: “Le Alii e, aua lava.” I lona manatu faapea o le a oti o ia pe a sola i atumauga, na augani atu ai Lota pe mafai ona sosola o ia ma lona aiga i se aai na latalata ane, e igoa o Soara. Ae manatua, o le aai lenā o lea sa fuafua Ieova e faaumatia. E lē gata i lea, sa leai se faavae lelei o le fefe o Lota. E mautinoa lava, e mafai e Ieova ona faasaoina le ola o Lota a o iai i atumauga! E ui i lea, na lolo mai Ieova i olega a Lota. Na taʻu ane e le agelu iā Lota: “Faauta, ua ou talia foʻi lou manaʻo i lenā mea,  ou te lē faaumatia lenā aai ua e fai mai ai.” (Kenese 19:17-22) Pe e lē faaalia ai ea i lenā mea le fetuutuunaʻi o Ieova?

17, 18. Na faapefea ona faaalia e Ieova lona uiga fetālaʻi e ala i ana feutagaʻiga ma tagata Nineva?

¹⁷ E talia mai foʻi e Ieova le salamō moni, e ala i lona faatino o le alofa mutimutivale ma le mea tonu. Seʻi manatu i le mea na tupu ina ua aauina atu le perofeta o Iona i le nuu amioleaga ma le sauā o Nineva. A o savali atu Iona i le auala o Nineva, e manino lava ma faigofie le feʻau faagaeeina na ia folafola atu: Ua toe 40 aso ona faaumatia lea o le aai malosi. Peitaʻi, na faafuaseʻi ona suia tulaga o mea. Na toe salamō tagata o Nineva!—Iona, mataupu 3.

¹⁸ E aogā le faatusatusa o gaoioiga a Ieova i mea na faia e Iona i lenei tulaga. I lenei mea na tupu, sa toe fetuunaʻi ai Ieova ma gaoioi mai o Sē Faamagalo i agasala na i lo le avea o se “toa.” d (Esoto 15:3) Peitaʻi o Iona, e leʻi fia fetuutuunaʻi ma na matuā leai sona alofa mutimutivale. Na i lo lona faaalia o le uiga fetālaʻi o Ieova, na ia tali atu e tai pei o le nofoaafi po o le vaa laʻuuta lea na muaʻi taʻua. Sa ia folafola atu le malaia, sa ia manaʻo foʻi ina ia faataunuu pea le malaia! Peitaʻi, na onosai Ieova e ala i lona aʻoaʻo mai i lana perofeta lē onosai, se lesona mataʻina tele i le fetuutuunaʻi ma le alofa mutimutivale.—Iona, mataupu 4.

19. (a) Aiseā e mafai ai ona tatou mautinoa e magafagafa Ieova i mea o loo ia faatalitalia mai iā i tatou? (e) Ua faaalia faapefea e le Faataoto 19:17, o Ieova o ia o se Matai e ʻagalelei ma magafagafa,’ ma e matuā faamaulalo foʻi?

¹⁹ O le manatu faaiʻu, e magafagafa pe fetuutuunaʻi Ieova i mea o loo ia faatalitalia mai iā i tatou. Na faapea mai le tupu o Tavita: “Ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:14) E sili atu ona malamalama mai Ieova i o tatou vaivaiga ma o tatou tulaga lē lelei atoatoa na i lo o i tatou lava. E lē taitai ona ia faatalitalia i tatou e faia ni mea e  sili atu na i lo o mea tatou te mafaia. O loo faia e le Tusi Paia se faaeseesega i le va o matai faaletagata o ē “agalelei ma e agamalu [“magafagafa,” NWT]” ma i latou o ē “amio paaa.” (1 Peteru 2:18) O lē fea Matai e iai Ieova? Seʻi mātau le faamatalaga a le Faataoto 19:17: “O lē ua alofa i le tagata mativa, na te avatua ana mea iā Ieova.” E manino lava, e na o se matai lelei ma fetuutuunaʻi o le a ia mātaulia gaoioiga agalelei uma o loo faatino mo ē matitiva. E lē gata i lea, ua taʻu mai ai i lenei mau, e peiseaʻī o loo manatu Lē na Foafoaina le lagi ma le lalolagi e faapea, e tatau ona ia toe tauia tagata, o ē o loo faatinoina na galuega o le alofa mutimutivale! O le faamaulalo lenei e sili ona tāua.

20. O le ā le faamautinoaga o loo iai faapea e faafofoga mai Ieova i a tatou tatalo ma tali mai i ai?

²⁰ O loo faapena foʻi ona agamalu ma fetuutuunaʻi mai Ieova i ana feutagaʻiga ma ana auauna i aso nei. Pe a tatou tatalo atu i le faatuatua, o loo faafofoga mai o ia. E tusa lava pe e na te lē o aauina mai ni ana avefeʻau o agelu o talanoa mai iā i tatou, ae lē tatau ai ona tatou manatu ua lē o tali mai o ia i a tatou tatalo. Manatua, ina ua ʻaiʻoi atu ai Paulo i ona uso talitonu ia latou “tatalo” mo le faasaʻolotoina o ia mai le falepuipui, sa ia toe faapea atu ai: “Ina ia vave ona toe tuuina atu ai o aʻu iā te outou.” (Eperu 13:18, 19) O a tatou tatalo la e ono uunaʻia moni ai lava Ieova e faia se mea na semanū e na te lē faia!—Iakopo 5:16.

21. O le ā e lē tatau ona tatou manatu i ai e uiga i le faamaulalo o Ieova, ae o le ā e tatau ona tatou talisapaia e uiga iā te ia?

 ²¹ O le mea moni, e lē avea nei faaaliga mai o le faamaulalo o Ieova—lona agamalu, lona finagalo malie e faafofoga mai, lona onosai, lona fetuutuunaʻi—e uiga ai faapea o le a suia e Ieova ana mataupu silisili amiotonu. Atonu e manatu taʻitaʻi lotu e faapea, o loo latou magafagafa pe a latou faamalieina loto o a latou lafumamoe e ala i le faamāmāina o tulafono tau amioga tatau a Ieova. (2 Timoteo 4:3) Peitaʻi, e matuā lē fesootaʻi atu i le uiga fetālaʻi o le Atua le masani faaletagata o le lē faia o le mea tonu ina ia faafaigofie se mea. E paia Ieova; o le a lē taitai ona ia faaleagaina ana tulafono amiotonu. (Levitiko 11:44) O lea, seʻi o tatou tausisia le uiga fetuutuunaʻi o Ieova auā e moni lava lea—o se faamaoniga o lona faamaulalo. Pe lē faagaeetia ea oe i lou mafaufau atu, o Ieova le Atua, o Lē silisili ona atamai i le lagi ma le lalolagi, ae o lea foʻi o loo sili ona mataʻina lona faamaulalo? Maʻeu se fiafiaga o le faalatalata atu i lenei Atua e sili ona maualuga ae agamalu, e onosai ma fetuutuunaʻi!