1-3. (a) Ana Solomoni jwalosisye chamtuli lunda lwapajika pakumasya ngani jakanganilana mwanache? (b) Ana Yehofa akusala kuti chachitupa chichi, soni ana mpaka papagwe yiwusyo yapi?

GALIJI magambo gakusawusya. Achakongwe ŵaŵili ŵakanganilanaga mwanache. Achakongweŵa ŵatamaga nyumba jimo soni wosope ŵaŵeleche ŵanache ŵachilume pa masiku gakuŵandikana. Jumo mwa ŵanacheŵa jwawile. Kaneko nangolo jwa mwanacheju jwatandite kuŵecheta kuti mwanache jwakwe jwaliji jwaumijo. Paliji pali pangali mundu jwine jwapambali jwaŵayiwonaga yakutendekwayi. Makoti gamwanamwana galinjile kupikanila magamboga, nambo nganigakombola kulamula. Pambesi pakwe, magamboga gapite kwa Solomoni, mwenye jwa Aisalaeli. Ana jwalakwe akamanyilile yisyesyene yakwe ya nganiji?

² Panyuma pakuti apikanile kukangana kwa achakongweŵa, Solomoni jwaŵilasisye upanga. Mwakusimichisya, jwalakwe jwalamwile kuti mwanache jwaumijo amkatanye pakatikati, kuti achakongwewo agaŵane mbali jimo jimo. Ndaŵi jijojo, msyene mwanachejo jwamŵendile mwenye kuti kuli chenene mwanacheju ampeleche kwa jwamkongwe jwinejo. Nambo jwamkongwe jwinejo jwalimbichile kuŵecheta kuti mwanachejo amkatanye pakatikati. Sambano Solomoni jwamanyilile yisyesyene yakwe. Jwalakwe jwamanyililaga chinonyelo chakusakola nangolo pa mwanache jwakwe. Myoyo, jwakamulichisye masengo umanyilisi welewu pakumasya nganijo. Agambe ganichisya muŵapikanile mumtima msyene mwanacheju, Solomoni ali ampele mwanacheju ni kuŵecheta kuti, “Jweleju ni mamagwe msyesyene jwa mwanacheju.”—1 Ayimwene 3:16-27.

³ Lwelelu lwaliji lunda lwapajika, ngati myoyo? Ŵandu ali apikene yaŵatite Solomoni pakumasya nganijo, ŵasimonjile mnope ligongo “ŵayiweni kuti mwenyejo ŵaliji ni lunda, lwakuwuma kwa Mlungu.” Yisyene, lunda lwa Solomoni lwaliji mtuka  wakutyochela kwa Mlungu. Yehofa ŵampele ‘umanyilisi ni lunda lwejinji.’ (1 Ayimwene 3:12, 28) Nambi uli pakwamba m’weji? Ana mpaka tupochele lunda lwakutyochela kwa Mlungu? Elo. Mwakusalilidwa, Solomoni jwalembile kuti, “Ambuje ni ŵakusapeleka lunda.” (Misyungu 2:6) Yehofa akutusimichisya kuti ŵandu ŵakulusasosasosa lundalu mwakuwona mtima chachilupata. Lundalu lulikombola kukamulichisya masengo yawukuyimanyilila soni yawukuyipikanichisya. Ana lunda lwakutyochela kwinanilu mpaka tulupate chamtuli? Soni ana mpaka tulukamulichisye masengo chamtuli pa umi wetu?

4-7. Ana ni yindu mcheche yapi yatukusosekwa kutenda kuti tupate lunda?

⁴ Ana tukusosekwa kuŵa ŵakumanyilila yindu mnope kapena ŵalijiganye mnope kuti tupate lunda lwakutyochela kwa Mlungu? Iyayi. Yehofa ali jwakusachilila kutupa lunda lwakwe mwangasamala kandu ya umi wetu soni majiganyo getu. (1 Akolinto 1:26-29) Nambo tukusosekwa kutendapo kandu, ligongo Baibulo jikusatulimbikasya kuti ‘tupate lunda.’ (Misyungu 4:7) Ana mpaka tutende chamtuli yeleyi?

⁵ Chandanda, tukusosekwa kumjogopa Mlungu. Lilemba lya Misyungu 9:10 likusati, “Ndandilo ja lunda [“chandanda chatukusosekwa kutenda kuti tupate lunda,” The New English Bible], ni kwajogopa Ambuje.” Kuti tupate lunda, tukusosekwa kumjogopa Mlungu. Ligongo chichi? Tukumbuchile kuti lunda lukusapwatikapo kombola kwetu kukamulichisya masengo chenene yatukumanyilila. Kumjogopa Mlungu nganikuŵa kwamba kumtindiŵalila mwawoga. Nambo kuli kumtindiŵalila mwawuchimbichimbi soni kumdalila. Wogawu uli wakamuchisya soni wakulimbikasya. Wogawu wukusatutendekasya kuti pa umi wetu tutendeje yindu mwakamulana ni chakulinga cha Mlungu soni matala gakwe. Pangalisoni litala line lya lunda lyampaka tukuye ligongo lyakuti malamusi ga Mlungu gakusayikasya yambone kwa ŵandu ŵakusagakuya.

⁶ Chaŵili, tukusosekwa kuŵa ŵakulinandiya. Mundu jwangalinandiya ngaŵa mkukola lunda lwa Mlungu. (Misyungu 11:2) Ligongo chichi yili myoyo? Naga tuli ŵakulinandiya, tuchiŵa ŵakusachilila  kwitichisya kuti ngatukusamanyilila yosope, soni kuti nganisyo syetu ngasikusaŵaga syakuŵajilwa ndaŵi syosope. Nambosoni tukusosekwa kumanyililaga mwakusayiwonela yindu Yehofa. Yehofa “akusiŵasisya ŵakulikwesya,” nambo akusaŵa jwakusangalala kwapa lunda ŵandu ŵamtima wakulinandiya.—Yakobo 4:6.

⁷ Chindu chatatu chachili chakusosekwa mnope. Chindu chakwe chili kulijiganya Maloŵe ga Mlungu. Lunda lwa Yehofa lukusawonechela m’Maloŵe gakwe. Kuti tupate lundalu, tukusosekwa kulusosasosa mwakulimbichila. (Misyungu 2:1-5) Chamcheche chili lipopelo. Naga mwakuwona mtima tukumŵenda Mlungu lunda, jwalakwe chachitupa mwakoloŵa magasa. (Yakobo 1:5) Mapopelo getu gakuŵenda msimu wakwe gachijanjidwa. Msimu wakwe mpaka utukamuchisye kupata chipanje chachili m’Maloŵe gakwe. Chipanjechi mpaka chitukamuchisye kumalana ni yakusawusya, kuŵambala ngosi soni kusagula yakutenda mwalunda.—Luka 11:13.

8. Ana yichiwonechela chamtuli kuti tukwete lunda lwa Mlungu?

⁸ Mpela mwatwayiwonele mu Mtwe 17, lunda lwa Yehofa luli lwakamuchisya. Myoyo, naga tukwete lunda lwa Mlungu, luchiwonechela mu yitendo yetu. Ndumetume Yakobo jwasasile ya yisogosi yalunda lwa Mlungu pajwalembile kuti, “Nambo lunda lyakutyochela kwinani pandanda luli lwakulenjela [“lweswela,” NWT] nipo soni luli lwamtendele, lwa kuŵeŵa [“lwakundilila,” NWT], lwakupikanichisya chenene. Lukwete chanasa soni yisogosi yakwe yambone yili yejinji. Lundalo luli lwangali lusagu kapena ulamba [“chinyengo,” NWT].” (Yakobo 3:17) Patukukambilana mbali jilijose ja lunda lwa Mlungu, mpaka tuliwusye kuti, ‘Ana lunda lwakutyochela kwinani lukukamula masengo pa umi wangu?’

9. Ana kuŵa ŵaswela kukusagopolela chichi, soni ligongo chichi yili yakuŵajilwa kuti ndamoji jili jandanda kujisala pa ndamo sya lunda lwakwinani?

⁹ ‘Chandanda luli lweswela.’ Kuŵa ŵaswela kukusagopolela kuŵa ŵachasa soni ŵangasakasidwa, ngaŵa kusape nambo atamose mkati mwakwe. Baibulo jikusakamulanya lunda ni mtima. Nambo lunda lwakwinani ngaŵa mkwinjila mumtima wesakale ni  yakumbila soni yakulinga yakusakala. (Misyungu 2:10; Mateyu 15:19, 20) Nambope, naga mtima wetu uli weswela, yayikugopolela yampaka tuyikombole ŵandu ŵangali umlamawe,, ‘tuchiyileka yangalumbana ni kutenda yambone.’ (Salimo 37:27; Misyungu 3:7) Ni ligongo lyakwe yili yakuŵajilwa kuti chindu chandanda kuchisala pa lilembali, chili chakuti lunda luli lweswela. Mwambone, naga nganituŵa ŵaswela mundamo soni mwausimu, ana mpaka tulosye chamtuli ndamo sya lunda lwakwinani sinesyo?

10, 11. (a) Ligongo chichi tukusosekwa kuŵa ŵamtendele? (b) Patuyiweni kuti tumkuŵesye jwakulambila mjetu, ana mpaka tulosye chamtuli kuti tuli ŵamtendele?

¹⁰ “Nipo soni luli lwamtendele.” Lunda lwakwinani lukusatukamuchisya kuti tuŵeje ŵamtendele, wawuli chisogosi cha msimu wa Mlungu. (Agalatiya 5:22) Tukusalingalinga kuti tukasokonasya “mtendele” wawukusakamulanya ŵandu ŵa Yehofa. (Aefeso 4:3) Tukusalingalingasoni kuwuchisya mtendele naga usokonechele. Ligongo chichi yeleyi yili yakusosekwa? Baibulo jikusati, “Mpikangananeje ni kuŵa pa mtendele. Pelepo Mlungu jwachinonyelo ni jwa mtendele tachitama namwe.” (2 Akolinto 13:11) Myoyo, patukulingalinga kuŵa ŵamtendele, Mlungu jwamtendele chachiŵa ni m’we. Mwatukusatendela yindu ni ŵakulambila amchejetu yikusakwayasoni unasi wetu ni Yehofa. Ana mpaka tulosye chamtuli kuti tuli ŵamtendele? Kwende tulole chisyasyo achi.

¹¹ Ana tukusosekwa kutenda chichi patuyiweni kuti tumkuŵesye jwakulambila mjetu? Yesu jwatite, “Ni ligongo lyakwe pakupelaka mtuka wenu kwa Mlungu pa malo gakupelechela mbopesi, nipo ndaŵi jijojo mkukumbuchila kuti mkwete magongo ni mjenu, mleche mtuka wenuwo pa malo gakupelechela mbopesi papopo, nipo mjawule mkatande kaje kwilana ni mlongo mjenujo. Kaneko ni mjawule mkapeleche mtuka wenu ula kwa Mlungu.” (Mateyu 5:23, 24) Mpaka tukamulichisye masengo chiwundochi mwakutanda m’wejo kwawula kwa mlongo mjetujo. Ni chakulinga chamtuli? Ni chakulinga chakuti ‘tukajilane’ najo. Kuti yeleyi yikomboleche, m’malo mwakukana, tukusosekwa kwitichitisya kuti mjetujo nganijo jikumpweteka mumtima. Naga tukumjawulila ni chakulinga chakuti tukajilane, tuchikombola kumasya ungapikangana uliwose wampaka upagwe. Tuchipepesyana soni tuchikululuchilana.  Naga tukutanda m’we kutendapo kandu, tuchilosya kuti tukulongoleledwa ni lunda lwa Mlungu.

12, 13. (a) Ana maloŵe gakuti ‘kundilila,’ gagali pa Yakobo 3:17, gakusagopolela chichi? (b) Ana mpaka tulosye chamtuli kuti tuli ŵakundilila?

¹² ‘Lwakundilila.’ Ana kukundilila kukusagopela chichi? Mwakamulana ni yakusaŵecheta ŵalijiganye ya Baibulo ŵane, liloŵe lyachigiliki chandanda lyalili pa Yakobo 3:17 lyakuti ‘lwakundilila,’ lili lyakusawusya kuligopolela. Ŵakugopolela ŵane, pa liloŵeli, ŵakamulichisye masengo maloŵe gakuti, “lwakufasa,” “lwakuwusimana mtima,” soni “lwakwaganichisya ŵane.” Nambo maloŵe ga Chigiliki gelega, ngopolelo jakwe jili “kwitichisya.” Ana mpaka tulosye chamtuli kuti ndamo ja lunda lwakutyochela kwinani jeleji jikukamula masengo mwetuwe?

¹³ Lilemba lya Afilipi 4:5 likusati, “Kulitimalika [“kundilila,” NWT] kwenu kuwonecheje pameso pa ŵandu wosope.” Baibulo jine jikusati, “Mkoleje mbili jakuti mli jwakundilila.” (The New  Testament in Modern English, by J. B. Phillips) Alole kuti pelepa ngani nganijiŵa mwatukusaliwonela achimsyewe. Nambo ngani jili mwakusatuwonela ŵane kapena kuti mwakusatumanyililila ŵane. Mundu jwakundilila ngakusakakamila pa malamusi, kapena kusaka kuti ŵandu atendeje yindu mwakukamulana ni mwakusachila jwalakwejo. Mmalo mwakwe akusaŵa jwakoseka kwapikanila ŵane, soni naga yili yakuŵajilwa, akusaŵa jwakundilila nganisyo syawo. Pakutenda yindu ni ŵane, jwalakwe akusaŵasoni jwakuwusimana mtima ngaŵa jwawukali. Atamose kuti yeleyi yili yakusosekwa mnope kwa Mklistu jwalijose, nambo yili yakusosekwa mnopemnope kwa achakulungwa ŵa mumpingo. Ŵandu akusanonyela kuŵa ni ni mundu jwakuwusimana mtima.Ndamoji mpaka jikamamuchisye kuti achakulungwa ŵa mumpingo akaŵaga ŵakusawusya kwayichila. (1 Atesalonika 2:7, 8) Mpaka tutende chenene kuliwusya kuti, ‘Ana ngusamanyika ni mbili jakuti ngusinaganichisya ŵane, ndili jwakundilila soni jwakuwusimana mtima?’

14. Ana mpaka tulosye chamtuli kuti tuli ‘ŵakoseka kupikanila’?

¹⁴ “Lwakupikanichisya chenene.” Maloŵe ga Chigiliki gaŵagagopolele kuti “lwakupikanichisya chenene” pangalisoni pane pagakusasimanikwa m’Malemba Gachigiliki Gachiklistu, akaŵe papapa basi. Mwakamulana ni yajwaŵechete mundu jwine, maloŵega “ŵakusagakamulichisya masengo kaŵilikaŵili ali asilikali.” Gakusagopolela “kujigalika mwangasawusya” soni “kupikanila ugwe pangawukusaka.” Mundu jwakusalongoleledwa ni lunda lwakutyochela kwinani akusapikanila mwangasawusya yagakusaŵacheta Malemba. Jwalakwe jwangamanyika kuŵa mundu jwakusakana kupikanila yakuŵecheta ya ŵane naga yikutindana ni yakwe. Mmalo mwakwe, jwalakwe akusachenga mwachitema papatile umboni wakuwoneka chenene wa m’Malemba wakulosya kuti akutenda kapena asagwile yindu yakulemwecheka. Ana ŵandu akusiŵamanyilila wawojo kuti ali mundu jwamti myiyi?

15. Ana chanasa ni chichi, soni ligongo chichi yili yakuŵajilwa kuti “chanasa” soni “yisogosi . . . yambone” akuyisalila pampepe pa Yakobo 3:17?

¹⁵ “Lukwete chanasa soni yisogosi yakwe yambone yili  yejinji.” * Chanasa jili mbali jakusosekwa mnope ja lunda lwakutyochela kwinani., Yeleyi yili myoyo, ligongo lundalu akulusala kuti “lukwete chanasa.” Tukuyiwona kuti “chanasa” soni “yisogosi . . . yambone” akuyikolanga pampepe. Yeleyi yili yakuŵajilwa ligongo Baibulo kaŵilikaŵili jikusasala kuti chanasa chili kutenda yindu yakulosya kwaganichisya ŵane. Kapena kuti chanasa chikusamtendekasya mundu kumtendela mjakwe yindu yambone yejinji. Buku jine jikusasala kuti chanasa chili “kupikana kupweteka mumtima, jwine pasimene ni yakusawusya soni ni kulingalinga kutendapo kandu.” Myoyo, mundu jwakwete lunda lwa Mlungu ngakusaŵa jwangakunguluchika, jwangasa kapena jwangagamba kuŵa mundu jwakumanyilila mnope yindu. Mmalo mwakwe, akusaŵa jwakunguluchika, akusakwayidwa mumtima ni ya ŵane soni mwachitema akusamanyilila yayikwatendechela ŵane. Ana mpaka tulosye chamtuli kuti tuli ŵagumbale ni chanasa?

16, 17. (a) Kupwatika pakumnonyela Mlungu, ana chachikusatutendekasya kuti tulalichileje ngani syambone chili chichi, soni ligongo chichi? (b) Ana ni matala gapi gampaka tulosye kuti tukwete chanasa?

¹⁶ Litala lyakusosekwa mnope lili kwasalila ŵane ngani syimbone sya Uchimwene wa Mlungu. Ana chichi chachikusatutendekasya kuti tukamuleje masengoga? Chandanda chili chinonyelo chetu pa Mlungu. Nambosoni tukusakamula masengoga ligongo lyakwatendela ŵane chanasa. (Mateyu 22:37-39) Ŵandu ŵajinji masiku agano ali “ŵakudandawula” soni “ŵakusoŵa chikamuchisyo mpela ngondolo syangali mkuchinga.” (Mateyu 9:36) Achimlongola ŵa dini syaunami ngakusiŵakosya jemanjaji soni ŵatendekasisye kuŵa ŵangalola mwausimu. Yakuyichisya yakwe, ŵanduŵa ŵangamanyilila chikamuchisyo cha lunda chachikusasimanikwa m’Maloŵe ga Mllungu. Kapena ŵangamanyilila upile wawuchiyika pachilambo chapasi ligongo lya Uchimwene wa Mlungu. Patukuganichisya yakusosechela yausimu ya ŵandu ŵatusyungulile, chanasa chetu chikusatulimbikasya kutenda yiliyose yampaka tukombole kuti twasalile yakwamba chakulinga cha Yehofa.

¹⁷ Ana ni matala gane gapi gampaka tulosye kuti tukwete chanasa? Tukumbuchile ngani jakuwanichisya jaŵajisasile Yesu  jakwamba Msamaliya. Jwalakweju jwamsimene mundu ali mungulugulu msewu ali aputidwe ni ŵachiswamba. Ligongo lya “chanasa,” Msamaliyaju jwataŵile maŵanga ga jwakuwulalajo ni kumsamalila. (Luka 10:29-37) Yeleyi yikulosya kuti chanasa chikusapwatikapo kwakamuchisya ŵakusosekwa chikamuchisyo. Baibulo jikusatusalila kuti “kwende twatendeleje ŵandu ŵane wosope yindu yambone, mnopemnope ŵakulupilila achimjetu.” (Agalatiya 6:10) Kwende tulole matala gane gampaka tutendele yeleyi. Jwakulupilila mjetu jwali jwachikulile mpaka asosekwe kumkamuchisya kuti ajawule kumisongano soni awuje. Mundu jwamasije jwa mumpingo mwetu mpaka asosechele kumlinganyichisya nyumba jakwe. (Yakobo 1:27) Mundu jwakulaga nganisyo mpaka asosekwe “maloŵe gambone” pakusaka kumlimbikasya. (Misyungu 12:25) Patukulosya chanasa m’matala gelega, tukusalosya kuti lunda lwakutyochela kwinani lukukamula masengo pa umi wetu.

18. Naga tukusalongoleledwa ni lunda lwakutyochela kwinani, ana tukusosekwa kuleka ndamo japi m’mitima jetu, soni ligongo chichi?

¹⁸ “Lwangali lusagu.” Lunda lwa Mlungu lukusatukamuchisya kuŵambala kuwutendela mtundu wine lusagu ni kuwunonyelaga mtundu wetu. Naga tukulongoleledwa ni lunda lwelelu, tuchikombola kutyosya ndamo ja lusaguji m’mitima jetu. (Yakobo 2:9) Ngatukusitwatendela ŵane yambone ligongo lyakuti ali ŵamlijiganye mnope, ŵakusichila kapena ligongo lyakuti akwete udindo kumpingo. Nambosoni ngatukusitwanyosya ŵakulambila achimjetu ligongo lyakuti ali ŵakulaga. Naga Yehofa akusaŵalosya jemanjaji chinonyelo chakwe, jemanjajisoni akusasosekwa chinonyelo chetu.

19, 20. (a) Ana maloŵe gachigiliki gakuti “chinyengo” gatandilile papi? (b) Ana mpaka tulosye chamtuli kuti ‘tukusitwanonyela aklistu achijetu ni mtima wetu wosope,’ soni ligongo chichi kutenda yeleyi kuli kwakusosekwa?

¹⁹ ‘Lwangali . . . chinyengo’ Maloŵe gachigiliki gakuti “chinyengo”, mpaka gagopelele “ya mundu jwaŵatesile nawo seŵelo.” Kalakala, ŵakutenda maseŵelo Ŵachigiliki soni Ŵachiloma, pakutenda maseŵelo ŵawalaga yakuwala yayinyago. Myoyo, maloŵe  ga Chigiliki gakuti chinyengo ŵagakamulichisyaga masengo pakutenda yindu yagamba kuwanichisya kapena pakusaka kwalambusya ŵane. Mbali ja lunda lwa Mlunguji, jikusosekwa kutukwaya ngaŵaga mwatukusatendela yindu ni ŵakulambila achimjetupe nambosoni mwatukusiŵawonela ŵane.

²⁰ Ndumetume Petulo jwamanyilile kuti ‘patukupikanila yayili yakuwona yisyesyene’ yakuyichisya yakwe ‘tukusitwanonyela Aklistu achijetu ni mtima wetu wosope.’ (1 Petulo 1:22) Yisyene, ngatukusosekwa kwanonyela Aklistu achijetu pakusaka kulilosya. Ngatukusosekwasoni kuwala chinyago kapena kutenda yindu yakulosya kwalambusya ŵane. Chinonyelo chetu chiŵeje chisyesyene soni chakutyochela pasi pa mtima. Naga tukutenda myoyo, ŵakulupilila achimjetu chachitudalila soni chachimanyilila kuti mwelemu ni mwatuŵelele. Kutenda yindu mwakuwona mtima kweleku kukusatendekasya kuti Aklistu atameje mwagopoka nambosoni yikusakamuchisya kuti ŵandu mumpingo adalilaneje.

21, 22. (a) Ana Solomoni jwalepele chamtuli kusunga lunda? (b) Ana mpaka tulusunje chamtuli lunda, soni kuchitukamuchisya chamtuli naga tukulusunga?

²¹ Lunda lwa Mlungu luli mtuka wakutyochela kwa Yehofa, wawukusosekwa kuti tuwusunjeje. Solomoni jwatite, ‘Mwanangu, mlusunje lunda lusyesyene nambosoni ndamo jenu jakupakombola ganisya chenenepe.’ (Misyungu 3:21) Yakutesya chanasa yili yakuti Solomoni jwalepele kutenda yeleyi. Pandaŵi jiŵampikanilaga Mlungu, jwalakwe jwaliji jwalunda. Nambo pambesi pakwe, achiŵamkwakwe ŵamitundu jine ŵamtendekasisye kuleka kumlambila Yehofa. (1 Ayimwene 11:1-8) Yayamtendechele Solomoniyi chili chasyasyo chakuti lunda mpaka luŵe lwangali masengo naga ngatukulukamulichisya masengo chenene.

²² Ana mpaka tulusunje chamtuli lunda lusyesyene? Ngaŵa kuti tugambeje kuŵalanga mwakutamilichika Baibulo ni mabuku gagakusalondesya ya m’Baibulo gatukusapedwa ni “kapolo jwakulupichika ni jwalunda.” Nambo tukusosekwa kukamulichisyaga masengo yatukusaŵalangayo. (Mateyu 24:45, NWT) Tukwete magongo gakupikanika gakukamulichisya masengo lunda lwa Mlungu. Tukusakola umi wambone. Yikusatutendekasya kuti ‘tukapochele umi wawuli usyesyene,’ watuchiwupata m’chilambo chasambano cha Mlungu. (1 Timoteo 6:19) Soni chakusosekwa mnope, patukupata lunda lwakutyochela kwinani yikusatutendekasya kumŵandichila Yehofa Mlungu jwali msyene lunda.