1-3. Yesuusa hayqoy hara ay asa hayquwaappenne dummatanaadan oottidabati aybee?

 ISSI geeshsha asa I aybanne mooribeennaban pirddin, 2,000 gidiya layttappe kase Hosppuniyaa aginaa heeran barchchiyaa beꞌidi hayqqiis. Geella pirdda pirddidi meqettaa iitidi woriyoogan hegee koyro gidenna, qassi hegee wurssetta gidennaageekka azzanttiyaaba. Gidikkonne, he hayqoy hara ay asa hayquwaappenne dummatees.

² He bitaniyaa waayiyaanne barchchiyaa wurssetta saatiyan saluwan hanidabay hegee keehi gitaba gidiyoogaa qonccissiis. He wode seeta gallassa gidikkonne, saꞌay sohuwaara xumiis. Taarikiyaa xaafee issoy hegaa “awai xumiis” giidi yootiis. (Luqaasa 23:44, 45) Hegaappe simmin, bitanee hayqqanaappe guuttaa kasetidi, “Polettiis” giidi mule dogettennabaa yootiis. I hayqqidi maalaalissiyaabay polettanaadan oottiis. A yarshshoy asi siiqo bessanawu oottido aybippenne aadhdhees.—Yohaannisa 15:13; 19:30.

³ He bitanee Yesuus Kiristtoosa. I he meto gallassan Niisaana 14, 33 M.Ln, waayettidi hayqqidoogee asay loytti eriyooba. SHin issi keehi koshshiya tumaa daro asay akeekenna. Yesuusi waayettidaba gidikkonne, appe aaruwan waayettidaagee deꞌees. Siiquwaa bessanawu salo gufantton ooninne oottido aybippenne aadhdhiya yarshshuwaa he gallassi haray yarshshiis. Hegee aybee? Hegaa zaaroy aybippenne aadhdhiya Yihoowa siiquwaa erissiya loꞌꞌoba.

4. Yesuusi hara asappe dumma gidiyoogaa Rooma wotaaddaray waati akeekidee, qassi he wotaaddaray woygidee?

⁴ Yesuusa worissida Rooma wotaaddaratu mato halaqay  Yesuusi hayqqanaappe kase saꞌay xumidoogaaninne biittay wolqqappe qaaxxidoogan keehi garamettiis. I, “Tumu hagee Xoossaa Na7aa” yaagiis. (Maatiyoosa 27:54) Yesuusi hara asaappe dumma gidiyoogee qoncce. He wotaaddaray Ubbaappe Xoqqiya Xoossawu mexi issi Naꞌaa worissiis! He Naꞌay ba Aawaassi ay keena alꞌꞌoo?

5. Naꞌay saꞌaa yaanaappe kase saluwan ba Aawaara issippe ay keena wodiyaa deꞌidee?

⁵ Geeshsha Maxaafay Yesuusa “merettidabaa ubbaappe aadhdhiya baira Na7a” yaagees. (Qolasiyaasa 1:15) Ane hagaa qoppa: Yihoowa Naꞌay salo gufaynttoy merettanaappe kasekka deꞌees. Gido shin, Aawaynne Naꞌay issippe ay keena wodiyaa deꞌidonaa? Saynisiyaa eranchchati amaridaageeti salo gufanttoy 13 biiloone layttaa deꞌiis goosona. He wodee ay keenakko neeni qoppana danddayay? Eti giyoobay tuma gidiyaakkokka, he 13 biiloone layttay ubbay Yihoowa Naꞌay deꞌido wodiyaappe guutta! He ubba layttatun I ay oottidee?

6. (a) Yihoowa Naꞌay saꞌaa yaanaappe kase ay oottidee? (b) Yihoowaynne A Naꞌay ay keena siiqettiyoonaa?

⁶ Naꞌay ba Aawawu “waanna oosanchcha” gididi ufayttidi oottiis. (Leemiso 8:30) Geeshsha Maxaafay hagaadan gees: “Merettidabai ubbai [Naꞌay] bainnan aibinne merettibeenna.” (Yohaannisa 1:3) Hegaa gishshawu, hara ubbabay merettiyo wode Yihoowaynne A Naꞌay issippe oottidosona. He wode eti ay keena ufayttidonaashsha! Issi aawaynne naꞌay keehi siiqettiyoogee daroti maayettiyooba. Qassi ‘siiqoy ubbabaa issippe shiishshi qachchees.’ (Qolasiyaasa 3:14) He zawi baynna wodiyan eta siiqoy ay keena minnidaakko qoppana danddayiyay oonee? Xoossaa Yihoowaynne A Naꞌay siiqettiyo siiqoynne eta issippetettay laggetiyaabi baynnaagaa gidiyoogee qoncce.

7. Yesuusi xammaqettiyo wode, Yihooway ba Naꞌaa xeelliyaagan bawu siyettiyaabaa waati qonccissidee?

⁷ Gidoppe attin, Aaway ba Naꞌay asa gididi yelettanaadan saꞌaa kiittiis. Yihooway hegaadan oottanawu siiqiyo ba Naꞌaara saluwan mata lagge gididi deꞌiyoogaa unddenna wodiyawu aggi bayana koshshiis. Yesuusi wottiyoobi baynna asa gididi dicciyo  wode Yihooway saluwaappe wudidi xeelliis. Yesuusi bawu layttay 30 heera gidiyo wode xammaqettiis. He wode Yihoowawu aybi siyettidaakko nuuni malana koshshenna. Aaway saluwaappe hagaadan giis: “Taani siiqiyo ta Na7ai, tana ufaissiyaagee hagaa.” (Maatiyoosa 3:17) Yesuusi hiraagan odettida ubbabaanne oottanaadan bawu imettida ubbabaa ammanettidi oottidoogaa beꞌiyo wode, A Aaway keehi ufayttennan waayi aggana!—Yohaannisa 5:36; 17:4.

8, 9. (a) Niisaana 14, 33 M.Ln, Yesuusa bolli aybi gakkidee, qassi saluwan deꞌiya A Aawawu aybi siyettidee? (b) Yihooway ba Naꞌay waayettidi hayqqanaadan oottidoy aybissee?

⁸ SHin, Niisaana 14, 33 M.Ln, Yihoowawu aybi siyettidee? Yihuday Yesuusa aatti immiyo wode, qammi asay A oyqqiyo wode, Yesuusa laggeti A aggidi biyo wodenne A wordduwan mootiyo wode, Yihoowawu aybi siyettidee? Asay A qilliicciyo wode, A bolli cuchchiyo wodenne A baqqiyo wode, Yihoowawu aybi siyettidee? Yesuusa lissuwan garafin A zokkoy xiirettiyo wode, A kushiyaanne tohuwaa mittaa bolli misimaariyan xishidi asay cayishin kaqqiyo wode, Yihoowawu aybi siyettidee? I siiqiyo Naꞌay keehi waayettidi akko waassiyo wode Aawawu aybi siyettidee? Mereta ubbawu doometta gidida I siiqiyo Naꞌay Yesuusi hayqqiyo wode Yihoowawu aybi siyettidee?—Maatiyoosa 26:14-16, 46, 47, 56, 59, 67; 27:38-44, 46; Yohaannisa 19:1.

⁹ Hegee nuuni qonccissana danddayiyooba gidenna. Yihooway ba Naꞌay hayqqido wode ay keena mishettidaakko nuuni qonccissana danddayokko. Yihooway hegee hananaadan oottidoogaa nuuni qonccissana danddayoos. Aaway bana michchiyaabaa ayssi oottidee? Yihooway Yohaannisa 3:16n maalaalissiyaabaa qonccissiis; hegee Geeshsha Maxaafan keehi koshshiyaaba gidiyo gishshawu guutta Wonggele geetettees. Xiqisee hagaadan gees: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.” Yaatiyo gishshawu, Yihooway siiqoy denttettin hegaadan oottiis.  Yihooway ba Naꞌay nu gishshawu waayettidi hayqqanaadan saꞌaa kiittiyoogan aybippenne aadhdhiya siiquwaa bessiis.

10. Asawu koshshiyaabay aybee, qassi “siiquwaa” giyo qaalaa birshshettay waanidee?

¹⁰ “Siiquwaa” giyo qaalaa birshshettay aybee? Siiqoy aybippenne aaruwan asawu koshshiyaaba gidiyoogee odettiis. Asay yelettoosappe hayqqana gakkanaassi siiqettana koyees, siiqiyo wode ufayttees, ubba qassi siiqoy xayikko asay shugo gideesinne hayqqees. SHin siiqoy qonccissanawu deexxiyaaba gidiyoogee garamissiyaaba. Asay siiquwaabaa darobaa haasayiyoogee qoncce. Siiquwaa xeelliyaagan yexettiya yeettawu, xaafettiya maxaafawunne danttuwawu zawi baawa. Ha odettida ubbaykka siiquwaa birshshettaa maara qonccissana danddayenna. He qaalaabay darobay odettikkonne hegaa likke birshshettaa akeekanawu keehi metiyaaba.

11, 12. (a) Siiquwaabaa nuuni darobaa awuppe tamaarana danddayiyoo, qassi aybissi? (b) Beni Giriiketto doonan aappun qommo siiqoy odettidee, qassi Giriikettuwan Xaafettida Geeshsha Maxaafan darotoo qonccida “siiqoy” awugee? (Tohossa qofaakka xeella.) (c) Agaappe aybee?

¹¹ SHin siiquwaa xeelliyaagan Geeshsha Maxaafay qoncce gididabaa tamaarissees. Vayns Ekspazitor Dikshineri of Niwu Testament Words giyo maxaafay hagaadan gees: “Siiqoy denttettin oottiyo ooso xallan siiquwaa erana danddayoos.” Yihooway oottidobata xeelliyaagan Geeshsha Maxaafan xaafettidabay I ba medhdhidobata siiqiyo siiquwaabaa nuna darobaa tamaarissees. Leemisuwawu, qommoora odettidaagaadan aybippenne aadhdhiya siiquwaa qonccissiyaabaa Yihooway oottidoogaappe aaruwan ha eeshshaa loytti qonccissana danddayiyaabi aybee? Kaalliya shemppotun, Yihooway siiquwaa oosuwan bessido hara daro leemisota beꞌana. Qassi, Geeshsha Maxaafay koyro xaafettido doonan “siiquwaa” qonccissanawu goꞌettido qaalata pilggiyoogan amaridabaa akeekana danddayoos. Beni Giriiketto doonan “siiquwaa” qonccissiya oyddu  qaalati deꞌoosona. a Hegeetuppe, Giriikettuwan Xaafettida Geeshsha Maxaafan darotoo qoncciday agaappe giyo siiquwaa. Geeshsha Maxaafaa qaalaa kochchay ha qaalay “siiquwaa nuuni qoppiyoogaappe aaruwan qonccissiya qaala” gidiyoogaa yootees. Aybissi?

¹² Agaappe Geeshsha Maxaafaa maarati denddo gidiyo siiquwaa qonccissees. Hegaa gishshawu, hegee hara uri oottidobaa woy haasayidobaa gaasuwan siyettiyaaba xalla gidenna. Hegee qoppidinne wudidi oottiyooba gidiyo gishshawu keehi aaho. Qassi, agaappe ba xallaa siiqennan bessiyo siiqo. Leemisuwawu, Yohaannisa 3:16 zaarettada beꞌa. Xoossay ba mexi issi Naꞌaa aattidi immana gakkanaassi keehi siiqido ‘saꞌay’ woy alamee aybee? He alamee wozettiya asaa. Hegee nagaranchcha gidida daro asaa xaaxi waaxees. Yihooway ammanettida Abrahaama siiqidoogaadan, asa ubbaa ba dabbodan siiqii? (Yaaqooba 2:23) CHii, siiqenna; shin Yihooway gitabaa yarshshanaadan oottiyaaba gidikkonne, I siiquwan ubba asawu loꞌꞌobaa oottiis. I ubba asay ba nagaraappe simmanaadaaninne ba ogiyaa laammanaadan koyees. (2 PHeexiroosa 3:9) Daroti hegaadan oottidosona. I hegeeta ba dabbodan xeellees.

13, 14. Agaappe darotoo wozanappe siiqettiyoogaa bessiyoogaa qonccissiyaabay aybee?

¹³ Gidikkonne, agaappe giyo siiquwaa xeelliyaagan amaridaageetuyyo bala qofay deꞌees. Hegee maaraa kaallidi siiqiyo siiqo giidi eti qoppoosona. Agaappe darotoo wozanappe siiqettiyoogaa bessiyaaba. Leemisuwawu, Yohaannisi “Aawai ba Na7aa siiqees” giidi xaafido wode agaappe giya qaalaa goꞌettiis. He siiqoy wozanappe siiqiyoogaa bessenna siiqoo? Yesuusi “Xoossai  ba Na7aa siiqees” giido wode filiyaa giyo qaalaa goꞌettidoogaa akeeka. (Yohaannisa 3:35; 5:20) Yihoowa siiqoy darotoo wozanappe siiqiyoogaa bessiyaaba. SHin A siiqoy coo siyettiyaabaa mule kaallenna. Hegee A aadhdhida eratettaanne A maarata ubbatoo kaallees.

¹⁴ Nuuni beꞌidoogaadan, Yihoowa eeshshati ubbay aybippenne aadhdhiyaageeta, wottiyoobi baynnaageetanne ufayssiyaageeta. SHin ubbaappe aaruwan ufayssiyaagee siiquwaa. Siiquwaadan nuuni Yihoowakko shiiqanaadan oottiyaabi aybinne baawa. Qassi siiqoy A waanna eeshsha gidiyoogee ufayssiyaaba. Hegaa nuuni waati eriyoo?

15. Yihoowa eeshsha gidida siiquwaabaa Geeshsha Maxaafay yootiyoobay aybee, qassi he yootiyoobay aybin dummatii? (Tohossa qofaakka xeella.)

¹⁵ Geeshsha Maxaafay Yihoowawu waanna eeshsha gidida harata xeelliyaagan mule yootennabaa siiquwaa xeelliyaagan yootees. Geeshsha Maxaafay Xoossay wolqqa woy Xoossay suure pirdda woy qassi Xoossay aadhdhida eratetta geenna. Ayyo he eeshshati deꞌoosona, I he eeshshatuyyo pultto, qassi he heezzu eeshshatuura gayttidaagan aara laggetiyaabi baawa. SHin oyddantto eeshshaabaa hagaadan gees: “Xoossai siiqo.” b (1 Yohaannisa 4:8) Hegee woygiyoogee?

16-18. (a) Geeshsha Maxaafay “Xoossai siiqo” giyoy aybissee? (b) Yihoowa eeshsha gidida siiquwawu, saꞌaa meretatu giddoppe asay haniya loꞌꞌo leemiso gidiyoy aybissee?

¹⁶ “Xoossai siiqo” giyoogee Xoossay siiquwaara lagge giyoogaa gidenna. Nuuni he qofaa yuushshidi “siiqoy Xoossaa”  gaana danddayokko. Beettenna eeshshaappe Yihooway keehi aadhdhees. Awu siiquwaappe hara keehi daro eeshshati deꞌoosona. Gidikkonne, siiqoy Yihooway oottiyo ubbaban qonccees. He xiqisiyaa xeelliyaagan issi xuufee hagaadan gees: “Siiqoy Xoossaa dummayidi erissiya waanna eeshsha.” Nuuni hegaa xaaxi waaxidi hagaadan gaana danddayoos: Yihoowa wolqqay I aybanne oottanaadan danddayissees. A suure pirddaynne A aadhdhida eratettay oottiyooban A kaalettoosona. SHin Yihoowa siiqoy I issibaa oottanaadan denttettees. Qassi hara ba eeshshata I goꞌettiyo wode A siiqoy ubbatoo qonccees.

¹⁷ Siiquwaa xeelliyaagan Yihooway ooppenne aadhdhiya leemiso gidiyoogaa Geeshsha Maxaafay yootees. Yaatiyo gishshawu, agaappe giyo siiquwaabaa nuuni tamaaranawu koyikko, Yihoowabaa tamaarana bessees. Asay ha loꞌꞌo eeshshaa bessiyoogaa nuuni beꞌana danddayoos. SHin eti he eeshshaa bessiyoy aybissee? Yihooway meretaa medhdhiyo wode, ba Naꞌawu hagaadan giis: “Asa nu leemisuwan nuna milatissidi ane medhdhoos.” (Doomettaabaa 1:26) Saꞌaa meretatu giddon, siiqananne saluwan deꞌiya bantta Aawaa milatana danddayiyay asa xalla. Yihooway ba waanna eeshshata qonccissanawu dumma dumma meretata goꞌettidoogaa hassaya. Gidikkonne, Yihooway ba waanna eeshshaa siiquwaa qonccissanawu saꞌaa meretatu ubbaappe aadhdhiya asaa goꞌettiis.—Hizqqeela 1:10.

¹⁸ Nuuni nu xallaa siiqennaagaa bessiya ogiyan, maaraa kaallidi siiqiyo wode Yihoowa waanna eeshshaa bessoos. Kiitettida Yohaannisi hagaadan giis: “Xoossai koiro nuna siiqido gishshau, nuuni a siiqoos.” (1 Yohaannisa 4:19) SHin nuna koyro Yihooway siiqidoy ayba ogetuunee?

19. Yihooway meretaa medhdhiyo wode siiqoy keehi maaddiis gaana danddayiyoy aybissee?

¹⁹ Siiqoy oorattaba gidenna. SHin Yihooway medhdhiyoogaa doommanaadan denttettidabay aybee? I boorasiyo gishshataassanne aara deꞌiya ura koshshido gishshataassa gidenna.  Yihoowawu hara uri kunttana danddayiyo paccidabi aybinne baawa. Gidikkonne, I immido imotaa nashshiya kiitanchchatinne asay deꞌuwan ufayttanaadan oottanawu oosuwan qoncciya eeshsha gidida siiqoy A denttettiis. “Xoossai medhdhidobau koiroi” A mexi issi Naꞌaa. (Ajjuutaa 3:14) Hegaappe simmin, kiitanchchatinne hara ubbabay deꞌuwan deꞌanaadan oottanawu Yihooway Waanna Oosanchcha gidida he Naꞌaa goꞌettiis. (Iyyooba 38:4, 7; Qolasiyaasa 1:16) Laꞌatettaynne akeekay deꞌiyo wolqqaama gidida ha ayyaana meretati issoy issuwaa siiqana, ubba qassi Xoossaa Yihoowa siiqana danddayoosona. (2 Qoronttoosa 3:17) Yihooway koyro eta siiqido gishshawu, eti A siiqoosona.

20, 21. Addaameenne Hewaana Yihooway eta siiqiyoogaa bessiyaabaa ay beꞌidonaa, shin eti waatibookkonaa?

²⁰ Yaatiyo gishshawu, asaa hanotaykka hegaa mala. Koyroppe doommidi Addaamenne Hewaani yuushuwan siiquwaa bessiyaabay kumi uttiis. Eti deꞌiyo Edene Gannatiyaa ubbasaa xeelliyo wode, Aaway eta siiqiyoogaa qonccissiyaabaa beꞌana danddayoosona. Geeshsha Maxaafay yootiyoobaa akeeka: “GODAI Xoossai awai mokkiyoosaa baggaara Edene giyoosan gannatiyaa kase tokkiis; yan ba medhdhido bitaniyaa wottiis.” (Doomettaabaa 2:8) Keehi loꞌꞌiya ataakiltte sohuwaa beꞌay eray? Nena keehi ufayssidabay aybee? Mittaa hayttaa giddoora kanttidi yiya pooꞌoy? Daro qommo meray deꞌiyo keehi loꞌꞌiya ciishshatee? Goggiya shaafaa cenggurssaa, kafoti yexxiyoogaanne guutta meretati gawwattiyoogaa siyiyoogee? Mittati, mittaa ayfetinne ciishshati sawiyoogaa xeelliyaagan shin? Ayba gidinkka, Edene gannatiyaara geeddarssana danddayiyo ataakiltte sohoy ha wodiyan baawa. Aybissi?

²¹ He ataakiltte sohuwaa giigissiday Yihoowa! Hegee odana danddayiyoogaappe aaruwan loꞌꞌennan waayi aggana. Yan deꞌiya mitta ubbay xeellanawu loꞌꞌiyaagaa woy malꞌꞌiya ayfiya ayfiyaagaa. He ataakiltte sohuwan daro shaafati deꞌoosona, I aahonne dumma dumma mehee doꞌay kumidoogaa. Addaamessinne Hewaanissi ufayssiya oosuwaanne loꞌꞌo laggetettaa  gujjin, eti deꞌuwan ufayttanawu koshshiya ubbabay deꞌees. Koyro eta Yihooway siiqido gishshawu, etikka A siiqana koshshiis. SHin, eti siiqibookkona. Eti saluwan deꞌiya bantta Aawawu siiquwan azazettiyoogaa aggidi, bantta xallaa siiqidi A bolli makkalidosona.—Doomettaabaa, shemppo 2.

22. Edenen denddida makkalaara gayttidaagan Yihooway oottidobay A aggenna siiquwaa waati bessii?

²² Hegee Yihoowa keehi azzanttennan waayi aggana! SHin he makkalay I hanqqettanaadan oottidee? CHii oottibeenna! “Aggenna a siiqoi merinaagaa.” (Mazamure 136:1) Hegaa gishshawu, Addaamenne Hewaani zerettatu giddon suure wozanay deꞌiyoogeeta wozanawu siiquwan issibaa giigissanawu I sohuwaara halchchiis. Nuuni beꞌidoogaadan, Aaway gitabaa yarshshanaadan oottida, I siiqiyo Naꞌaa wozuwaa yarshshoy he giigissidobatuppe issuwaa.—1 Yohaannisa 4:10.

23. Yihooway “ufayttiya Xoossaa” geetettiyoy aybissee, qassi kaalliya shemppuwan beꞌana keehi koshshiya oyshay aybee?

²³ Ee, Yihooway koyroppe doommidi asaa kasetidi siiqiis. Daro ogetun, ‘nuna koyro Xoossay siiqiis.’ Siiqoy issippetettaynne ufayssay deꞌanaadan oottiyo gishshawu, Yihooway “ufayttiya Xoossaa” geetettidoogee garamissiyaaba gidenna. (1 Ximootiyoosa 1:11, NW) SHin oychchana koshshiya issi oyshay deꞌees. Yihooway nuna issuwaa issuwaa tumuppe siiqii? Ha oyshaa zaaruwaa kaalliya shemppuwan beꞌana.