1, 2. (1) ?Kɛ bla ta kun ti i wa’n i kpanlɛ’n, ngue yɛ ɔ yo-ɔ? (2) ?Wan yɛ ɔ si aunnvɔɛ dan tra bla ta-ɔ?

 BA NƆNMAN kun su kpan kɔnguɛ afiɛn. Yɛ kpli, i nin’n kpitili-ɔ. Kɛ ɔ fin cɛn m’ɔ wuli ba’n, ɔ lafi-ɔ, ɔ yoman ye. Kɛ ba’n sún’n, sɛ ɲɔnflɛn yɛ i waan ɔ́ nɔ́n-o, annzɛ sɛ julɛ yɛ ɔ kunndɛ kɛ be ju i-o, annzɛ like uflɛ yɛ ɔ kunndɛ-o, bla ta’n wun i kwlaa sɔ’n i wlɛ. Maan ba’n sun sɛ sun sɛ, saan bla’n yó maan ɔ́ múɛn i nuan. Ɔ kwlá tranman lɛ niɛnmɛn i wa’n sa ngbɛn.

² Wafa nga niɛn kun si i ku sɛ nun ba’n i aunnvɔɛ’n, klɔ sran’m be si kɛ ɔ leman wunsu. Sanngɛ e Ɲanmiɛn Zoova i sran aunnvɔɛ silɛ liɛ’n tra ngalɛ’n lelele. Sɛ e fa e ɲin e sie i Zoova i nzuɛn sɔ’n su’n, i sɔ’n úka e naan y’a fa e wun y’a mɛntɛn i kpa. ?Yɛ ngue yɛ be flɛ i sran aunnvɔɛ silɛ’n niɔn? ?Wafa sɛ yɛ Ɲanmiɛn kle kɛ ɔ si aunnvɔɛ-ɔ? É wá kókó kosan sɔ’m be su yalɛ.

3. ?Ebre nun’n, ndɛ mma nga be fa kan aunnvɔɛ silɛ’n i ndɛ’n, i bo’n yɛle benin?

³ Biblu’n nun’n, sran aunnvɔɛ silɛ’n nin sran i wun sa yaci cɛlɛ’n, be kɔ likawlɛ tititi. Ebre nin Glɛki nun’n, ndɛ mma nga be fa kan aunnvɔɛ silɛ’n i ndɛ’n, be diman be yalɛ. Ebre nun’n, ndɛ mma sɔ’n kun yɛle rakamun. I bo’n yɛle  “aunnvɔɛ silɛ.” Fluwa kun yiyi nun kɛ, “kɛ e wun sran nga be leman wie’n annzɛ e awlɛn su sran nga be o afɛ nun’n, wafa nga be yo e annvɔ’n” yɛ be se kɛ rakamun Ebre nun’n niɔn. Ndɛ mma sɔ mɔ Zoova fa kɛn i sran aunnvɔɛ silɛ’n i ndɛ’n, be fa kan “aunnvɔɛ nga niɛn kun fa si i ku sɛ nun ba’n” i ndɛ wie. a—Ezipti Lɔ Tulɛ 33:19; Zeremin 33:26.

4, 5. ?Ngue ti yɛ wafa nga bla ta kun fa si i wa’n i aunnvɔɛ ju lɛ’n, i su yɛ Biblu’n nian kle e Zoova i sran aunnvɔɛ silɛ’n niɔn?

⁴ Wafa nga bla ta kun fa si i wa’n i aunnvɔɛ ju lɛ’n, i su yɛ Biblu’n nian kle e Zoova i sran aunnvɔɛ silɛ’n niɔn. Ezai 49:15 se kɛ: “?Bla kun i wla kwla fi i wa m’ɔ mɛn i wunflɛn’n, annzɛ ɔ su simɛn i klun ba’n i aunnvɔɛ [rakamun]? Kannzɛ bɔbɔ bla sɔ’m be wla fi be mma’m be su’n, sanngɛ min liɛ’n, min wla su fiman ɔ su le.” Sunnzun ase sɔ’n kle kɛ Zoova si i nvle’n i aunnvɔɛ dan. ?Wafa sɛ yɛ ɔ yo sɔ-ɔ?

⁵ ?Sɛ be se e kɛ bla ta kun i wla fili i wa’n su naan w’a mɛnmɛn i ɲɔnflɛn’n, é fá su? Ɔ ti kekle. Afin ba ng’ɔ te yo nɔnman’n ɔ kwlɛmɛn i wun keje. I ti yɛ ɔ fata kɛ i nin’n niɛn i lika dɔ kwlaa su-ɔ. Sanngɛ blɛ “kekle” nga nun’n, niɛn wie’m be “kloman be wiengu.” (2 Timote 3:1, 3) Zoova se kɛ: “Sanngɛ min liɛ’n, min wla su fiman ɔ su le.” Zoova su yaciman i sufuɛ’m be  aunnvɔɛ silɛ le. Wafa nga bla ta kun fa si i wa’n i aunnvɔɛ ju lɛ’n, ɔ timan like fi Zoova i sran aunnvɔɛ silɛ liɛ’n, i ɲrun. I sɔ’n ti’n, fluwa sifuɛ kun seli kɛ: ‘Biblu’n i bue nga laa be klɛli i Ebre nun’n i nun’n, Ezai 49:15 yɛ ɔ yi Zoova i sran klolɛ dan’n i nglo kpa-ɔ.’

6. ?Wafa sɛ yɛ sran kpanngban bu sran aunnvɔɛ silɛ’n niɔn? ?Yɛ ndɛ benin yɛ Zoova kan fa gua e awlɛn su nzue-ɔ?

⁶ ?Sɛ e si sran aunnvɔɛ’n, i sɔ’n kle kɛ e ti sran m’ɔ kwlá trɛmɛn i awlɛn ti-ɔ? Kɛ sran kpanngban bu i sɔ-ɔ. Zezi blɛ su’n, Rɔmun lɔ ngwlɛlɛ sifuɛ kun mɔ be flɛ i Senɛki’n kannin sɔ wie. Ɔ seli kɛ: “Be nga be ti flɔlɔ’n, be yɛ be si sran aunnvɔɛ-ɔ.” Senɛki ti like klefuɛ. Like ng’ɔ kle’n yɛle kɛ ɔ fataman kɛ like wie sa yo sran fɛ, annzɛ ɔ yo sran ya. I waan sɛ ɲrɛnnɛn’n tɔ sran wie su’n, ngwlɛlɛfuɛ’n kwla yo i ye. Sanngɛ nán maan sran sɔ’n yo i annvɔ kaan sa, naan sɛ ɔ si sran aunnvɔɛ’n, nn ɔ timan yasua sran. Like klelɛ kɛ ngalɛ sa’n wla sran’m be fanngan kɛ be bu be bɔbɔ be wun akunndan, naan nán be si sran aunnvɔɛ. Zoova timan sɔ kaan sa. I Ndɛ’n se kɛ ‘ɔ klo sran dan, ɔ si sran aunnvɔɛ.’ I sɔ’n gua e awlɛn su nzue. (Zaki 5:11) E ɲrun lɔ’n, é wá wún kɛ sran aunnvɔɛ silɛ’n ɔ ti nzuɛn cinnjin kpa kun, naan sɛ e si sran aunnvɔɛ’n, nán kɛ e kwlá traman e awlɛn ti-ɔ. Zoova yi nzuɛn sɔ’n i nglo kɛ siɛ kpa kun fa yo’n sa. Maan e fa e ɲin e sie i wafa ng’ɔ yo sɔ’n su.

7, 8. ?Afɛ benin yɛ Izraɛlifuɛ’m be wunnin i Ezipti lɔ-ɔ? ?Yɛ wafa sɛ yɛ Zoova sili be aunnvɔɛ-ɔ?

⁷ Wafa nga Zoova nin Izraɛli nvle’n be nantili’n, ɔ kle kɛ ɔ si sran aunnvɔɛ sakpasakpa. I nun mɔ Izraɛlifuɛ miliɔn ko ju wie be o Ezipti lɔ’n, Eziptifuɛ’m be kleli be ɲrɛnnɛn dan. ‘Junman kekle mɔ be mian be kɛ be di’n ti’n b’a wunman be wun fɛ. Be sili fa, be kpɛli bliki, yɛ be dili junman kwlaa nga kanga’m be di’n.’ (Ezipti Lɔ Tulɛ 1:11, 14) Kɛ Izraɛlifuɛ’m bé wún be ɲrun’n, be kpan flɛli Zoova. ?Wafa sɛ yɛ Ɲanmiɛn m’ɔ si aunnvɔɛ dan’n tɛli be su-ɔ?

⁸ Zoova tran-ɔn ɔ tranman. Ɔ seli kɛ: “N wunnin afɛ ng’ɔ o min sran’m be su Ezipti lɔ’n, yɛ kɛ bé mían be kɛ be di junman’n, kpanlɛ nga be kpan’n n ti. N si afɛ ng’ɔ o be su’n i kpa.” (Ezipti Lɔ Tulɛ 3:7) Kɛ Zoova wunnin be su afɛ’n, ɔ nin kpanlɛ mɔ be kpan flɛli i’n, ɔ kwlá tranman lɛ ɔ nianman be sa ngbɛn. Kɛ nga e fa wunnin i fluwa nga i ndɛ tre 24 nun’n sa’n, ɲrɛnnɛn ng’ɔ tɔ sran’m be su’n, ɔ yo Ɲanmiɛn Zoova i ya lele kpe nun. Zoova si aunnvɔɛ dan. Sanngɛ kɛ sran yo i annvɔ’n, ɔ tranman lɛ sa ngbɛn. Ɔ yo like kun fa ti i wun ɲanman nun. Ezai 63:9 se kɛ: “I sran klolɛ nin i aunnvɔɛ silɛ’n ti’n ɔ kpɔli be ti.” Zoova “yili i tinmin dan’n” i nglo naan w’a de Izraɛlifuɛ mun Eziptifuɛ’m be sa nun. (Mmla’n 4:34) I sin’n, ɔ yoli maan be ɲannin aliɛ dili.  Kpɛkun asiɛ ng’ɔ fa mannin be’n, ɔ ti fie diwlɛ lika klanman kpa.

9, 10. (1) ?Ngue ti yɛ kɛ Izraɛlifuɛ’m be kpan flɛli Zoova’n, ɔ deli be-ɔ? (2) ?Zɛfte blɛ su’n, sa benin nun yɛ Zoova deli Izraɛlifuɛ mun-ɔn? ?Ngue ti yɛ ɔ deli be-ɔ?

⁹ Aunnvɔɛ nga Zoova sili Izraɛlifuɛ mun’n, nɛ́n i ngba yɛ ɔ o lɛ-ɔ. Kɛ be juli lika nga Ɲanmiɛn waan ɔ́ fá mán be’n nun lɔ’n, be fali sa tɛ yolɛ’n cicili be ti. Yɛ be wunnin i su afɛ’n kusuman. Sanngɛ kɛ be buli akunndan mɔ be kpan flɛli Zoova’n, i liɛ ng’ɔ si i’n, yɛle be delɛ. ?Ngue ti-ɔ? “Aunnvɔɛ m’ɔ si i nvle’n nunfuɛ mun’n” ti-ɔ.—2 Be Ɲoliɛ 36:15; Jɔlɛ Difuɛ Mun 2:11-16.

¹⁰ Maan e nian sa ng’ɔ juli Zɛfte blɛ su’n. Kɛ Izraɛlifuɛ’m be tɔli amuin sɔlɛ nun’n, Zoova yacili be lɛ, ɔ maan Amɔnfuɛ’m be yoli be tɛtɛ lele afuɛ blu-nin-mɔcuɛ (18). Kpɛkun Izraɛlifuɛ’m be wa kacili be sa. Biblu’n yiyi nun kɛ: “Be guali be amuin’m be blo, yɛ be suli Zoova. Ɔ maan ɔ yaci Izraɛlifuɛ mun ɲrɛnnɛn sɔ’n nun-ɔn, ɔ yoman ye.” b (Jɔlɛ Difuɛ Mun 10:6-16) Kɛ Zoova i nvle’n nunfuɛ’m be kacili be nzuɛn’n, w’a yaciman be ɲrɛnnɛn’n nun. Ɲanmiɛn m’ɔ si aunnvɔɛ dan’n, ɔ tinnin Zɛfte naan ɔ́ dé Izraɛlifuɛ mun be kpɔfuɛ’m be sa nun.—Jɔlɛ Difuɛ Mun 11:30-33.

11. ?Sran aunnvɔɛ silɛ’n i su like benin yɛ Zoova nin Izraɛlifuɛ’m be nantilɛ’n, ɔ kle e-ɔ?

 ¹¹ ?Sran aunnvɔɛ silɛ’n i su like benin yɛ Zoova nin Izraɛlifuɛ’m be nantilɛ’n, ɔ kle e-ɔ? Like klikli ng’ɔ kle e’n yɛle kɛ, kɛ sran yo e annvɔ’n, nán maan e tran lɛ niɛn i sa ngbɛn. Maan e wla kpɛn bla ta m’ɔ si i wa’n i aunnvɔɛ’n i su. Kɛ ɔ ti ba’n i kpanlɛ’n, ɔ yo maan ba’n muɛn i nuan. Zoova kusu, kɛ i nvle’n nunfuɛ’m be sun flɛ i’n, ɔ bumɛn i su nun waka. Aunnvɔɛ m’ɔ si be’n ti’n, ɔ yo maan afɛ’n jaso be su. Like nɲɔn su’n yɛle kɛ, nán kɛ Zoova leman wunmiɛn ti yɛ ɔ si aunnvɔɛ-ɔ. Afin ɔ fa ajalɛ kekle mun naan w’a yo i nvle’n nunfuɛ’m be ye. Zoova si i nvle’n i aunnvɔɛ. ?Sanngɛ ɔ si i nvlefuɛ’m be tinuntinun be aunnvɔɛ?

12. ?Wafa sɛ yɛ Mmla’n kle kɛ Zoova si sran’m be tinuntinun be aunnvɔɛ-ɔ?

¹² Mmla nga Ɲanmiɛn fa mannin Izraɛli nvle’n, ɔ kle kɛ ɔ si sran’m be tinuntinun be aunnvɔɛ. Amun e kan yalɛfuɛ’m be ndɛ e nian. Zoova si kɛ sa wie ti’n, yalɛ kwla di Izraɛlifuɛ kun. I sɔ’n ti’n, Zoova seli Izraɛlifuɛ’m be kɛ: ‘Nán amun kete amun awlɛn. Nán amun se kɛ amun manman amun niaan m’ɔ o yalɛ nun’n, i like fi. Amun ti i wun ɲanman nun klun ufue su, nán maan ɔ yo mianlɛ su. Afin i sɔ’n ti yɛ Zoova m’ɔ ti amun Ɲanmiɛn’n wá yrá amun su like kwlaa nga amun yo’n ɔ nin ajalɛ kwlaa nga amun  fa’n be nun-ɔn.’ (Mmla’n 15:7, 10) Zoova seli be ekun kɛ, kɛ bé kpɛ́ like kɛ ble sa’n, nán maan be kpɛ i ngba. Sɛ bé ísa kusu naan be wla fili wie’n, ɔ fataman kɛ be sa be sin ko isɛ i ekun. Afin ɔ ti be nga be leman wie’n be liɛ. (Sanwun Yolɛ 23:22; Riti 2:2-7) Kɛ Izraɛli nvle’n nanti mmla sɔ’m be su’n, yalɛfuɛ’m be srɛman be nuan nun aliɛ. ?I sɔ’n kleman kɛ Zoova si sran aunnvɔɛ dan?

13, 14. (1) ?Wafa sɛ yɛ Davidi kleli kɛ e tinuntinun e ndɛ lo Zoova-ɔ? (2) ?Kɛ be se kɛ Zoova mantan be nga “be awlɛn w’a kpɔtɔ be klun’n,” sa benin yɛ ɔ kwla uka e naan y’a wun i wlɛ-ɔ?

¹³ Andɛ kusu’n, e kwlaa e ndɛ lo Ɲanmiɛn m’ɔ ti sran klofuɛ’n. Afɛ kwlaa ng’ɔ o e tinuntinun e su’n, ɔ wun i wlɛ weiin. Davidi m’ɔ ti jue tofuɛ’n seli kɛ: “Zoova fɛ i ɲin sie i sran kpa’m be su. Yɛ kɛ be kpan flɛ i kɛ ɔ uka be’n, ɔ sie i su tie. Zoova mantan be nga be awlɛn w’a kpɔtɔ be klun’n, ɔ de be nga be akunndan’n w’a sanngan’n.” (Jue Mun 34:15, 18) Bian kun m’ɔ yiyi Biblu’n i nun ndɛ’n nun’n se kɛ: “Be nga be akunndan’n w’a sanngan’n ɔ nin be nga be awlɛn w’a kpɔtɔ be klun’n, fɔnlɛ mɔ be fɔnnin’n ti’n, be buman be wun sran kun. Be lafiman be wun su kun.” I sɔ sran liɛ’m be bu i kɛ be nin Zoova be afiɛn’n ti nun dan, naan be timan like fi ti’n, Zoova kwlá nianman be lika. Sanngɛ ɔ timan su kaan sa. Davidi i ndɛ’n gua e awlɛn su nzue dan. Afin ɔ se e kɛ Zoova su kacimɛn i sin siman be nga be “buman be wun sran kun’n.” E  Ɲanmiɛn’n si kɛ i sɔ blɛ liɛ’n nun yɛ e mian aunnvɔɛ silɛ’n i wun dan, naan ɔ fata kɛ e nin i e afiɛn’n mantan-ɔn.

¹⁴ Sa kun juli Etazinin lɔ. Bla kun i wa’n m’ɔ le afuɛ nɲɔn’n, ɔ wa tɔli tukpacɛ dan kpa. Ɔ lo wunmiɛn-ɔn, ɔ jraman. Kɛ dɔɔtrɔ’m be niɛnnin i’n, be seli bla’n kɛ bé lá ba’n lɔ lele nglɛmun ?Yɛ ninfan yɛ bla’n kali kɔnguɛ sɔ’n nun-ɔn? Kɛ be lali ba’n lɛ’n, lɛ yɛ ɔ trannin bia kun su lele aliɛ’n fa cɛnnin i-ɔ. I wa kan’n kwlaman nun, ɔ maan i wun lɛ yɛ ɔ fata kɛ ɔ tran-ɔn. ?Like nga e Si m’ɔ o nglo lɔ’n, m’ɔ ti sran klofuɛ’n kwla yo’n, ɔ traman ngalɛ’n? Be kɛnmɛn i lele, afin ɔ yili e kɛ i bɔbɔ sa. (Bo Bolɛ 1:26) Jue Mun 34:18 se e kɛ, kɛ e ‘akunndan’n sanngan’n’ annzɛ e ‘awlɛn kpɔtɔ e klun’n,’ Zoova fɛ i wun mantan e. Ɔ si e aunnvɔɛ, yɛ ɔ kunndɛ kɛ ɔ́ úka e, kɛ siɛ kpa kun fa yo’n sa.

15. ?Ngue yɛ Zoova yo fa uka e e tinuntinun-ɔn?

¹⁵ ?Ngue yɛ Zoova yo fa uka e e tinuntinun-ɔn? Nán cɛn ngba yɛ ɔ́ yó naan e su afɛ’n wie-ɔ. Sanngɛ kɛ ɔ ko yo naan w’a uka be nga be sun flɛ i’n ti’n, ɔ fali ajalɛ kpanngban wie mun. Biblu’n m’ɔ ti i Ndɛ’n, ɔ man e afɔtuɛ nga be kwla yo e ye dan’n. Asɔnun’n nun’n, ɔ mannin asɔnun kpɛnngbɛn mun naan be si i sufuɛ’m be aunnvɔɛ, kɛ i bɔbɔ fa yo’n sa. (Zaki 5:14, 15) Asa ekun’n, ɔ fɛ ‘i wawɛ’n man be nga be srɛ i’n.’ Afin ɔ “tie srɛlɛ” nga e srɛ i’n. (Jue Mun 65:2;  Liki 11:13) Dɔ nga su’n, Ɲanmiɛn wawɛ’n kwla man e ‘wunmiɛn ng’ɔ tra klɔ sran liɛ’n’ naan y’a jran kekle lele naan Ɲanmiɛn Sielɛ’n w’a yi e su afɛ’n mlɔnmlɔnmlɔn. (2 Korɛntifuɛ Mun 4:7) Aunnvɔɛ mɔ Zoova si e dan’n ti yɛ ɔ fali ajalɛ sɔ mun-ɔn. ?I sɔ’n ti’n ɔ fataman kɛ e lɛ i ase?

16. ?Like kpa bɔbɔ ng’ɔ kle kɛ Zoova si sran aunnvɔɛ dan’n yɛle benin? ?Yɛ wan ti yɛ ɔ fali ajalɛ sɔ’n niɔn?

¹⁶ Like kpa bɔbɔ ng’ɔ kle kɛ Zoova si sran aunnvɔɛ dan’n yɛle i awlɛn su ba’n m’ɔ fa kpɔli e ti’n. Nanwlɛ, Zoova klo e dan. Ɔ yili e ti tɛ naan cɛn wie lele’n e fite nun. Nán e wla fi su kɛ e kwlaa e tinuntinun ti yɛ ɔ yili tɛ sɔ’n niɔn. Zan Batɛmun yofuɛ’n i si Zakari kannin tɛ sɔ mɔ Ɲanmiɛn wá yí’n i ndɛ. Ɔ seli kɛ “Ɲanmiɛn si aunnvɔɛ dan” ti yɛ ɔ fali ajalɛ sɔ’n niɔn.—Liki 1:78.

17-19. (1) ?Wafa sɛ yɛ Biblu’n kle kɛ Zoova i sran aunnvɔɛ silɛ’n le awɛ-ɔ? (2) ?Ngue yɛ Izraɛlifuɛ’m be yoli mɔ Zoova w’a siman be aunnvɔɛ kun-ɔn?

¹⁷ Nán e bu i kɛ Zoova i sran aunnvɔɛ silɛ’n leman awɛ. Biblu’n kle e weiin kɛ, kɛ sran wie’m be kaci be sin be si Zoova’n, i kusu yaci be aunnvɔɛ silɛ. (Ebre Mun 10:28) Sɛ e waan é sí sa nga ti yɛ ɔ yo sɔ’n, maan e wla kpɛn Izraɛli nvle’n su.

¹⁸ Kɛ Izraɛlifuɛ’m be kpɔfuɛ’m bé klé be ɲrɛnnɛn’n, Zoova deli be kpɛ sunman. Sanngɛ Zoova wa yacili be aunnvɔɛ silɛ. ?Ngue ti-ɔ?  Izraɛlifuɛ’m be sɔli amuin lele be fa wluli Zoova i sua’n nun. (Ezekiɛli 5:11; 8:17, 18) Asa ekun’n “be fali Ɲanmiɛn Kpli i sran’m be yiyili be ɲin su sa trilili, be yoli i ndɛ’n i finfin, yɛ be srili i nuan ijɔfuɛ mun. Be yoli sɔ lele Zoova wa fali i nvle’n nunfuɛ’m be wun ya dan. Be yoli sɔ lele b’a kwlá yoman juejue kun.” (2 Be Ɲoliɛ 36:16) Izraɛlifuɛ’m be yoli sa tɛ dan ngboko. Be fɔkɔli Zoova i awlɛn’n dan. Ɔ maan ɔ wunman like kun m’ɔ kwla jran su naan w’a si be aunnvɔɛ-ɔ. ?Yɛ i bo’n guali sɛ?

¹⁹ Zoova yacili i nvle’n nunfuɛ’m be aunnvɔɛ silɛ. Ɔ seli weiin kɛ: “N su siman be aunnvɔɛ, n su kokoman be, yɛ be su yoman min annvɔ. Like fi su tanndanman min ɲrun naan m’an nunnunman be.” (Zeremin 13:14) Sakpasakpa, be bubuli Zerizalɛmun klɔ’n nin Ɲanmiɛn sua’n. Yɛ be trali Izraɛlifuɛ’m be lomuɛn ɔli Babilɔnin lɔ. Kɛ sran’m be yo ɲin kekle Ɲanmiɛn su lele m’ɔ yaci be aunnvɔɛ silɛ’n, i bo’n gua tɛ kpa man be. ?Amun wunmɛn i sɔ?—Ngwlɛ Yilɛ 2:21.

20, 21. (1) ?Kɛ Zoova yaci mɛn tɛ nga i aunnvɔɛ silɛ cɛ’n, ngue yɛ ɔ́ yó-ɔ? (2) ?Ngue yɛ é wá wún i ndɛ tre ng’ɔ́ bá lɛ’n nun-ɔn?

²⁰ ?Yɛ andɛ li? Zoova w’a kaciman. Aunnvɔɛ m’ɔ si sran ti’n, ɔ sunmɛnnin i Lalofuɛ mun kɛ be bo “Ɲanmiɛn Sielɛ’n i jasin fɛ’n” asiɛ wunmuan’n su. (Matie 24:14) Be nga be awlɛn ti kpa mɔ be kunndɛ kɛ bé sí Zoova’n, ɔ uka be lele be wun Ɲanmiɛn Sielɛ’n i jasin fɛ’n i wlɛ kpa. (Sa  Nga Be Yoli’n 16:14) Sanngɛ e su diman junman sɔ’n sa trilili. Zoova su siman mɛn tɛ kain nga mɔ ɲrɛnnɛn w’a yi i piɛ’n, i aunnvɔɛ lele. Kɛ ɔ yaci mɛn’n i aunnvɔɛ silɛ’n cɛ’n, ɔ́ núnnún i sekeseke. Cɛn sɔ nun’n, i bɔbɔ i ‘dunman m’ɔ ti sanwun’n’ ɔ nin i sufuɛ’m be ti yɛ ɔ́ sí aunnvɔɛ-ɔ. (Ezekiɛli 36:20-23) Zoova wá núnnún klunwifuɛ mun. Kpɛkun ɔ́ táka mɛn uflɛ kun. Be nga be yo sa kpa’n be yɛ bé trán nun-ɔn. Kɛ Zoova nian sa tɛ yofuɛ mun’n, ɔ se kɛ: “N su siman be aunnvɔɛ, yɛ be su yoman min annvɔ. Ń má yó maan bé wún atin nga be fali su’n i su afɛ’n.”—Ezekiɛli 9:10.

²¹ Zoova sili sran’m be aunnvɔɛ lele w’a fa ju andɛ. Be nga ɔ su wa nunnun be bɔbɔ’n, ɔ te si be aunnvɔɛ. Be nga be yaci sa tɛ yolɛ’n, Zoova kwla yaci be wun sa’n cɛ be. Ndɛ tre ng’ɔ́ bá lɛ nun’n, é wá wún Biblu’n nun sunnzun ase wie mɔ be kle kɛ Zoova yaci sran wun sa cɛ i weiin’n.