1, 2. (a) Beibi ia tai neganai, sinana be vaia dahaka ia karaia? (b) Daika ena hebogahisi be goada herea?

 HANUABOI huanai beibi ta ia tai. Karaharaga, sinana ia toreisi. Ena beibi ia vara murinai ia mahuta boio lasi, guna ia karaia bamona. Ia diba beibi ena tai rege idauidau. Unai dainai, ia diba bema ena beibi be rata ia ura, ia ura rosia, eiava gau ma ta ia ura. To herevana beibi ia tai ena badina be dahaka, sinana ese unai ia kamonaia. Sinana be unai ia karaia badina ena natuna ia hebogahisi henia.

² Sinana ese ena natuna maragina dekenai ia hahedinaraia hebogahisina, be taunimanima ese idia mamia hebogahisi goadana. To, iseda Dirava, Iehova ena hebogahisi be goada herea. Unai kara namo hereana dibaia karana ese Iehova kahirakahira dekenai ita ia veria lao. Namona be hebogahisi ena anina bona iseda Dirava ese ia hahedinaraia dalana ita itaia.

3. Heberu herevana “hebogahisi hahedinaraia” ena anina be dahaka?

³ Baibel lalonai, nega momo Heberu bona Greek hereva ra·chamʹ idia hahanaia neganai ena anina be “hebogahisi hahedinaraia.” Baibel diksenari ta ia gwau, inai hereva ra·chamʹ ena anina be “hebogahisi mamina goadana, bema ita lalokau henia taudia be idia hisihisi o iseda heduru do idia abia taudia ita itadia neganai, ita abia hemamina.” Inai Heberu hereva ra·chamʹ, be Iehova ena hemami ia herevalaia, unai hereva be “sinana ena bogana” ida ia hegeregere bona ita gwauraia diba “sinana ena hebogahisi karana.” a—Esodo 33:19; Ieremia 33:26.

4, 5. Baibel ese edena dala ai sinana ta ena hemami ena natuna totona ia gaukaralaia, Iehova ena hebogahisi karana ita dekenai ia hadibaia totona?

 ⁴ Baibel be sinana ese ena beibi dekenai ia hahedinaraia hemamina ia gaukaralaia Iehova ena hebogahisi ita dekenai, ia hadibaia totona. Isaia 49:15, ia gwau: “Sinana ese ena beibi ia laloaboio diba, a? Eiava ia havaraia natuna ia hebogahisi [ra·chamʹ] henia lasi, a? Ena be sinana ese natuna ia laloaboio diba, to lau ese oi lau laloaboio diba lasi.” Unai hereva ese Iehova ena hebogahisi hemamina goadana ena taunimanima dekenai ia hahedinaraia. Edena dala, ai?   

⁵ Do ia auka be sinana ese natuna ia ubua bona naria lasi, ani? Momokani, beibi maragina be sibona ia naria diba lasi; dina bona hanuaboi ai sinana ese ia naria be namo. To madi, hari inai “dina gabedia ai,” “famili lalonai lalokau do ia noho lasi” dainai ita kamonai sinana haida ese edia beibi idia rakatania. (2 Timoteo 3:1, 3) To, Iehova ia gwau: “Lau ese oi lau laloaboio diba lasi.” Iehova ese hanaihanai ena hesiai taudia ia hebogahisi henidia. Ena hemami be sinana ese ena natuna maragina dekenai ia hahedinaraia hebogahisina ia hereaia momokani. Unai dainai, Baibel ia diba namonamo tauna ta ese Isaia 49:15 ia herevalaia neganai, ia gwau: “Taravatu Gunana lalonai, inai siri ese Dirava ena lalokau bada karana ia hahedinaraia goevagoeva.”

6. Goevadae lasi taudia momo ese edena bamona hebogahisi karana idia laloa, to Iehova be ita dekenai dahaka ia hadibaia?

⁶ Hebogahisi be manoka ena toana ta, a? Goevadae lasi taudia momo be unai bamona lalohadai idia abia. Hegeregere, Iesu ena negai ia noho Roma aonega tauna Seneca, ena hadibaia herevana be, “hebogahisi be manoka ena toana.” Seneca be Stoa taudia (Stoicism) edia lalohadai ia durua tauna, idia gwau ta ese ia abia lalomaino be hemami ta ia havaraia lasi. Seneca ia gwau, aonega tauna be metau idia davaria taudia ia durua diba, to ia hebogahisi henidia lasi,  badina unai bamona kara ese ena lalomaino do ia hadikaia. Unai bamona lalohadai ia abia tauna dekenai hebogahisi be lasi. To Iehova be unai bamona lasi! Iehova be ena Hereva lalonai ita ia hadibaia, ia be “hebogahisi bada Diravana.” (Iamesi 5:11) Do ita itaia, hebogahisi be manoka toana ta lasi, to goada bona mai anina bada karana. Mani Iehova ese lalokau Tama ta bamona unai kara ia hahedinaraia dalana ita itaia.

7, 8. Idaunegai Aigupito dekenai, Israela taudia be edena dala ai hisihisi idia abia, bona edia hisihisi amo Iehova ese edena dala ai idia ia durua?

⁷ Iehova ese Israela besena ia kara henia dalana amo ena hebogahisi karana ita itaia diba. Iosepa ia mase murinai, Israela taudia milioni be Aigupito dekenai igui hesiai gaukarana idia karaia, unuseniai idia dagedage henidia bada. Aigupito taudia ese ‘Israela taudia edia mauri idia ha-aukaia, badina idia dekenai gaukara metauna idia henia. Idia dekenai oda idia henia raro amo sement bona biriki idia karaia totona.’ (Esodo 1:11, 14) Edia hisihisi lalonai Israela taudia be Iehova ena heduru totona idia noinoi. Hebogahisi Diravana be dahaka ia karaia?   

⁸ Unai ese Iehova ena kudouna ia hamarerea. Ia gwau: “Momokani, lau ese egu taunimanima edia hisihisi Aigupito ai lau itaia bona edia taitai lau kamonai vadaeni, badina edia biaguna dikadia ese idia doria idia gaukara totona bona idia mamia hisihisi lau diba.” (Esodo 3:7) Iehova ese edia hisihisi ia itaia bona edia noinoi ia kamonai neganai, edia hisihisi ia mamia. Inai buka ena Karoa 24 dekenai ita itaia bamona, Iehova be ma haida edia hemami ia laloa Diravana. Bona unai kara, ma haida edia hisihisi mamia karana unai, be hebogahisi karana bamona. Iehova be ena bese  taudia edia hisihisi ia mamia sibona lasi, to idia ia durua totona kara ta ia karaia. Isaia 63:9 ia gwau: “Iena lalokau bona hebogahisi dainai idia ia hoia lou.” Mai “siahu bada” ida Iehova ese Israela taudia be Aigupito amo ia hamauria. (Deuteronomi 4:34) Unai murinai, hoa dalana ai aniani ia henidia bona ia gwauhamatalaia tanona dekenai ia hakaudia lao.

9, 10. (a) Israela taudia be Gwauhamata Tanona dekenai idia vareai murinai, dahaka dainai Iehova ese idia ia hamauria loulou? (b) Iepeta ena nega lalonai, Iehova ese Israela taudia be dahaka hisihisi amo ia hamauria, bona dahaka dainai unai bamona ia karaia?

⁹ Iehova ena hebogahisi be unuseniai ia doko lasi. Israela taudia be Gwauhamata Tanona dekenai idia noho neganai, nega momo kamonai karana idia hahedinaraia lasi, bona unai dainai hisihisi idia abia. To idia helalo-kerehai bona Iehova idia noinoi henia. Bona idia ia hamauria loulou. Dahaka dainai? “Badina ia be ena taunimanima . . . totona ia hebogahisi.”​—2 Sivarai 36:15; Hahemaoro Taudia 2:11-16.

¹⁰ Mani Iepeta ena nega lalonai ia vara gauna ita laloa. Israela taudia be dirava koikoidia idia tomadiho henia dainai, Amono taudia ese lagani 18 lalonai idia dagedage henidia bona Iehova ese unai ia koua lasi. Gabeai, Israela taudia idia helalo-kerehai. Baibel ia gwau: “Edia huana amo idau diravadia idia kokia bona Iehova idia hesiai henia, unai dainai ia ura edia hisihisi amo idia ia hamauria.” (Hahemaoro Taudia 10:6-16) Iena taunimanima idia helalo-kerehai momokani neganai, Iehova ia ura lasi edia hisihisi ia itaia noho. Unai dainai hebogahisi Diravana ese Iepeta ia hasiahua Israela taudia be edia inai taudia edia imana amo do ia hamauria.​—Hahemaoro Taudia 11:30-33.   

11. Iehova ese Israela taudia ia kara henia dalana amo ena hebogahisi karana dekenai dahaka ita dibaia?

¹¹ Iehova ese Israela taudia ia kara henia dalana amo ena hebogahisi karana dekenai dahaka ita dibaia? Gau ta be  inai, Iena hebogahisi karana be taunimanima idia davaria noho hisihisina ia dibaia karana ta sibona lasi. Sinana ta ena haheitalai mani ita laloa lou, ia be hebogahisi dainai beibi ena tai ia kamonai neganai kara ta ia karaia. Unai hegeregerena, Iehova be ena taunimanima edia taitai ia kamonai henia. Hebogahisi dainai Ia ese Israela taudia be edia hisihisi amo ia hamauria. Ma danu, Iehova ese idia ia kara henia dalana amo ita diba, hebogahisi be manoka ena toana ta lasi, to hebogahisi ese Iehova ia veria ena taunimanima totona kara ta ia karaia. To orea ta sibona bamona Iehova ese ena hesiai taudia dekenai hebogahisi ia hahedinaraia, a?

12. Edena dala ai Taravatu ese ia hahedinaraia Iehova ese taunimanima ia hebogahisi henia?

¹² Dirava ese Israela taudia dekenai ia henia Taravatuna ese ia hahedinaraia, taunimanima ta ta ia hebogahisi henia. Hegeregere, ogogami taudia ia lalodia karana mani oi laloa. Iehova ia diba ia vara kava gauna ta dainai Israela tauna ia ogogami diba. Ogogami taudia be edena bamona idia kara henia be namo? Iehova ese Israela taudia ia hereva henia goada, ia gwau: “Namo lasi emui lalona umui ha-aukaia eiava emui imana umui koua, namona be ia dekenai hariharibada karana umui hahedinaraia, bona mai lalohisihisi ida umui henia lasi, badina unai amo Iehova emui Dirava ese emui kara bona gaukara ibounai do ia hanamoa.” (Deuteronomi 15:7, 10) Danu, Iehova ese Israela taudia ia hamaorodia namo lasi edia uma ena oredia eiava idia rakatania gaudia idia gogoa. Unai aniani oredia be ogogami taudia totona. (Levitiko 23:22; Ruta 2:2-7) Unai taravatu ogogami taudia totona be Israela taudia ese idia badinaia neganai, ogogami Israela taudia be aniani totona idia noinoi lasi. Unai ese Iehova ena hebogahisi karana ia hahedinaraia goevagoeva, ani?

13, 14. (a) Edena dala ai Davida ena hereva ese ia hahedinaraia, Iehova be ita ta ta ia laloa bada? (b) Edena ekspiriens amo oi hahedinaraia diba, Iehova be “lalometau” eiava “daradoko taudia” kahirakahira ia noho?

 ¹³ Hari danu, iseda lalokau Diravana ese ita ta ta ia laloa bada. Ita abia dae momokani diba, ia ese ita mamia hisihisi ibounai ia diba. Salamo torea tauna Davida, ia gwau: “Iehova ena matana be kara maoromaoro taudia ia itaia, Bona iena taiana be heduru totona idia noinoi taudia ia kamonai henia. Iehova be lalometau taudia kahirakahira ia noho. Ia ese daradoko taudia ia hamauria noho.” (Salamo 34:15, 18) Baibel herevalaia tauna ta ese unai siri ia herevalaia, ia gwau: “Idia lalometau bona idia lalomanoka, badina edia kara dika dainai idia manau momokani, bona idia sibodia idia matauraia lasi; sibodia edia matana ai idia be anina lasi bona idia laloa kara namodia do idia karaia diba lasi.” Unai bamona taudia idia laloa Iehova be daudau herea bona idia be anina lasi dainai Dirava ese idia ia laloa lasi. To unai be momokani lasi. Davida ena hereva ese ita ia hagoadaia, “sibodia edia matana ai idia be anina lasi” taudia be Iehova ese ia rakatanidia lasi. Iseda hebogahisi Diravana ia diba, unai bamona negadiai ena heduru ita abia be gau badana, bona ia be ita kahirakahira ia noho.   

¹⁴ Ekspiriens ta mani oi laloa. United States ai, sinana ta ese ena mauri lagani rua natuna mero be hospital dekenai ia abia lao haraga, badina huahua dikana ia abia. Doketa taudia ese natuna idia sekea murinai, sinana idia hamaoroa natuna be hospital dekenai hanuaboi tamona do ia mahuta. Unai hanuaboi ai sinana be edeseniai ia mahuta? Sea dekenai, ena natuna ena bedi badinai ia mahuta! Ena mero maragina ia gorere bona sinana ia ura ia kahirakahira ia noho. Momokani, ita diba iseda guba Tamana lalokauna ese unai do ia hereaia momokani! Badina ita be ia sibona ena toana hegeregerena ia karaia. (Genese 1:26) Salamo 34:18 ena hereva namodia ese ita ia hadibaia ita “lalometau” eiava ita “daradoko” neganai, Iehova be lalokau  Tamana ta bamona ita “kahirakahira ia noho”—ita ia hebogahisi henia bona ia noho hegaegae ita ia durua totona.

15. Iehova be edena dala ai ita ta ta ia durua?

¹⁵ Vadaeni, Iehova be edena dala ai ita ta ta ia durua? Ita mamia hisihisi ena badina ia kokia lasi. To Iehova be dala idauidau ia hegaegaelaia idia noinoi taudia ia durua totona. Iena Hereva, Baibel, ena sisiba namodia ese ita ia durua diba. Iehova ese kongrigeisen ai elda taudia ia henia, bona idia gaukara goada edia tadikaka idia durua, unai amo Dirava ena hebogahisi idia hahedinaraia. (Iamesi 5:14, 15) Ia be “guriguri kamonai Diravana” dainai “lauma helaga be idia noinoi taudia dekenai do ia henia.” (Salamo 65:2; Luka 11:13) Unai lauma helaga ese ita dekenai “taunimanima edia siahu ia hereaia gauna” ia henia, unai amo ita haheauka ela bona Dirava ena Basileia ese metau idia havaraia gaudia ibounai ia kokia. (2 Korinto 4:7) Unai ibounai dainai ita moale, ani? Ita laloaboio lasi, unai gaudia ese Iehova ena hebogahisi bada idia hahedinaraia.

16. Iehova ena hebogahisi ia hahedinaraia karana badana be dahaka, bona edena dala ai ia be mai anina ita ta ta dekenai?

¹⁶ Momokani, Iehova ena hebogahisi ia hahedinaraia karana badana be, ita totona iena lalokau Natuna ena mauri davana be boubou gauna bamona ia hegaegaelaia. Unai be Iehova ena lalokau kara hereadaena, bona unai ese dala ia kehoa ita mauri diba. Laloatao, unai mauri davana be ita taunimanima ta ta totona. Badina namona dainai, Ioane Bapatiso ena tamana, Sekaraia ia peroveta, unai harihari gauna ese “Dirava ena hebogahisi bada karana” ia habadaia.​—Luka 1:78.

17-19. (a) Baibel ese edena dala ai ia hahedinaraia, Iehova ena hebogahisi be mai ena hetoana? (b) Dahaka ia vara bena Iehova ese ena taunimanima ia hebogahisi henia lasi?

¹⁷ Oi laloa Iehova ena hebogahisi be hetoana lasi, a? Baibel ese ia hahedinaraia goevagoeva, Iehova be mai  ena maoro ena dala maoromaoro idia badinaia lasi taudia dekenai hebogahisi do ia hahedinaraia lasi. (Heberu 10:28) Unai bamona ia karaia ena badina ita diba totona, mani Israela besena ena haheitalai ita itaia.   

¹⁸ Ena be Iehova ese Israela taudia be edia inai taudia amo ia hamauridia loulou, to idia dekenai ena hebogahisi ia hahedinaraia hanaihanai lasi. Unai gwau-edeede taudia ese kaivakuku idia tomadiho henia, bona Iehova ena dubu lalonai edia kaivakuku idia abidia vareai danu! (Esekiela 5:11; 8:17, 18) Ma danu, Baibel ia gwau: “Idia ese Dirava momokanina ena gwaukau taudia idia kirikirilaia noho, bona ena hereva idia abia dae lasi bona ena peroveta taudia idia hevasehalaia ela bona hanamoa dalana be lasi. Bena Iehova ena badu be ena taunimanima latanai ia diho.” (2 Sivarai 36:16) Israela taudia idia kara dika bada herea dainai, idia dekenai hebogahisi hahedinaraia dalana be lasi, bona idia ese Iehova idia habadua. Dahaka ia vara?   

¹⁹ Iehova be ena taunimanima do ia hebogahisi henidia noho diba lasi. Ia gwau: “Idia ta do lau hebogahisi henia lasi eiava idia dainai do lau lalohisihisi lasi, bona idia lau hadikaia totona gau ta ese lau do ia koua lasi.” (Ieremia 13:14) Unai dainai, Ierusalema bona ena dubu idia hadikaia, bona Israela taudia be igui hesiai taudia bamona Babulonia dekenai idia abia lao. Madi, ia be dika momokani bema kara dika taudia be idia gwau-edeede karana dainai, Iehova ia ura lasi idia ia hebogahisi henia!​—Lalohisihisi Ane 2:21.

20, 21. (a) Inai tanobada dekenai Dirava ena hebogahisi ia ore neganai, dahaka do ia vara? (b) Karoa gabena ai, Iehova ena hebogahisi karana ta do ita herevalaia, unai be dahaka?

²⁰ Hari be edena bamona? Iehova ena kara be idau lasi. Hebogahisi dainai, ena Witnes taudia ia haganidia tanobada ibounai dekenai “Basileia ena sivarai namona” idia harorolaia totona. (Mataio 24:14) Kudou maoro taudia idia  kamonai neganai, Iehova ese idia ia durua Basileia ena sivarai idia lalopararalaia totona. (Kara 16:14) To unai gaukara be do ia doko. Bema Iehova ese inai tanobada dikana, bona ia lalonai idia vara hisihisi idauidau ia kokia lasi, unai be hebogahisi karana lasi. Dirava ena hebogahisi ia ore neganai, ia ese inai tanobada dikana do ia hahemaoro henia. Danu ena hebogahisi karana be iena “ladana helagana” ia hanamoa bona ia idia lalokau henia hesiai taudia do ia hamauria. (Esekiela 36:20-23) Iehova be kara dika do ia haorea bona kara maoromaoro tanobadana do ia mailaia. Kara dika taudia ia herevalaia neganai, Iehova ia gwau: “Egu matana ese idia do ia hebogahisi henia lasi, bona idia dekenai hebogahisi do lau hahedinaraia lasi. Edia kara hegeregerena davana be idia dekenai do lau mailaia.”​—Esekiela 9:10.

²¹ Ela bona unai nega ia ginidae, Iehova be taunimanima ia hebogahisi henidia noho, dika bada do idia davaria taudia danu. Mai momokani ida idia helalo-kerehai kara dika taudia, be Iehova ena hebogahisi karana—ena gwauatao karana—amo namo idia abia diba. Karoa gabena ai, Baibel lalonai Iehova ena gwauatao karana idia hahedinaraia laulau hereva namodia, do ita herevalaia.