25-تاراۋ
‹قۇدايىمىزدىڭ مەيىرىمدى راقىمى›
1، 2. ا) بالاسى جىلاعاندا ادەتتە اناسى نە ىستەيدى؟ ٵ) قانداي سەزىم ٴتىپتى انانىڭ مەيىرىمىنەن دە كۇشتى؟
ٴتۇننىڭ ٴبىر ۋاعىندا بالا جىلايدى. سول-اق ەكەن، اناسىنىڭ ۇيقىسى شايداي اشىلادى. قازىر ول بالاسى تۋىلعانعا دەيىنگى ادەتى بويىنشا بەيقام ۇيىقتاي بەرمەيدى. ول بوبەگىنىڭ قاي كەزدە قالاي جىلايتىنىن دا بىلەدى. سوندىقتان تاماق سۇراپ جاتىر ما، باۋىرىنا باسقاندى قالاي ما، الدە باسقا ما بىردەن ايىرا الادى. بالاسى قانداي سەبەپپەن جىلاماسىن، انا سۇيىسپەنشىلىگى وعان كوڭىل ٴبولىپ، جاعدايىن جاساۋعا تالپىندىرادى.
2 انانىڭ ىشتەن شىققان شاراناسىنا دەگەن مەيىرىمى — ادام بالاسىنا ٴمالىم ەڭ اياۋلى سەزىمدەردىڭ ٴبىرى. الايدا بۇدان الدەقايدا كۇشتى سەزىم دە بار. بۇل — ەحوبا قۇدايدىڭ مەيىرىمدى راقىمى. وسى اسا تارتىمدى قاسيەتتى تەرەڭىرەك زەرتتەگەنىمىز ەحوباعا جاقىنداي تۇسۋگە كومەكتەسەدى. ولاي بولسا، وسى قاسيەتتىڭ ماعىناسىن جانە قۇدايدىڭ ونى قالاي تانىتاتىنىن قاراستىرايىق.
مەيىرىمدى راقىم دەگەن نە؟
3. ەۆرەي تىلىنەن «مەيىرىمدىلىك نە راقىمدىلىق تانىتۋ» نەمەسە «بىرەۋدىڭ قايعىسىن سەزىنۋ» دەپ اۋدارىلاتىن ٴسوزدىڭ ماعىناسى قانداي؟
3 كيەلى كىتاپتا ٴبىراز ەۆرەي جانە گرەك سوزدەرى، مىسالى ەۆرەي ٴتىلىنىڭ را·حام ەتىستىگى، مەيىرىمدى راقىم، نەمەسە مەيىرباندىق، دەگەن ويدى بەرەدى. ٴبىر انىقتامالىق ەڭبەكتە اتالمىش ەتىستىكتىڭ «وزىمىزگە جاقىن ادامنىڭ قاسىرەتىن نەمەسە دارمەنسىز كۇيدە ياكي كومەككە مۇقتاج ەكەنىن كورگەندە جانىڭ اۋىرىپ، مەيىرىمدى راقىمدىلىق تانىتۋدى» بىلدىرەتىنى تۇسىندىرىلگەن. ەحوبا وزىنە قاتىستى قولدانعان وسى ەۆرەي ٴسوزىنىڭ «قۇرساق» سوزىمەن بايلانىسى بار جانە «انا مەيىرىمدىلىگىن» بىلدىرەدى a (مىسىردان شىعۋ 33:19؛ ەرەميا 33:26).
‹ايەل قۇرساعىنان شىققان ۇلىن ۇمىتا الا ما؟›
4، 5. ەحوبانىڭ مەيىرىمدى راقىمىن ٴتۇسىندىرۋ ٷشىن كيەلى كىتاپتا انانىڭ بالاسىنا دەگەن سەزىمى تۋرالى نە ايتىلادى؟
4 ەحوبانىڭ مەيىرىمدى راقىمىن ٴتۇسىندىرۋ ٷشىن كيەلى كىتاپتا انانىڭ بالاسىنا دەگەن سەزىمى تۋرالى ايتىلادى. يشايا 49:15 تەن كەلەسى سوزدەردى وقيمىز: «ايەل ٶز ٴسابيىن ۇمىتا الا ما، قۇرساعىنان شىققان ۇلىن اياماي [را·حام] ما؟! اناسى ۇمىتىپ كەتكەن كۇندە دە مەن سەنى ەشقاشان ۇمىتپايمىن». جۇرەككە جىلى تيەتىن وسى سوزدەر ەحوبانىڭ ٶز حالقىنا دەگەن مەيىرىمىنىڭ قانشالىقتى تەرەڭ ەكەنىنە باسا نازار اۋدارادى. قالايشا؟
5 انانىڭ بالاسىن ەمىزۋدى نەمەسە وعان قاراۋدى ۇمىتىپ كەتۋى مۇمكىن دەۋ — ويعا قونبايتىن نارسە. جاڭا تۋعان بالا دارمەنسىز عوي، ول اناسىنىڭ كۇنى-ٴتۇنى قاراپ، اينالىپ-ٷيىرىلىپ وتىرعانىنا مۇقتاج. الايدا، وكىنىشكە وراي، بوبەگىن تاستاپ كەتەتىن انالار جونىندە، اسىرەسە قازىرگى باۋىرمالدىق جەتىسپەيتىن ‹قيىن-قىستاۋ كۇندەرى›، ٴجيى ەستيمىز (تىموتەگە 2-حات 3:1، 3). ٴبىراق ەحوبا: «مەن سەنى ەشقاشان ۇمىتپايمىن»،— دەيدى. ەحوبانىڭ ٶز قىزمەتشىلەرىنە دەگەن مەيىرىمدى راقىمى ەش سارقىلمايدى. ەحوبانىڭ مەيىرىمدى راقىمى ادام بالاسىنا ٴتان ەڭ زور سەزىم — انا مەيىرىمىنەن الدەقايدا كۇشتى. ولاي بولسا، ٴبىر تۇسىنىكتەمەشىنىڭ يشايا 49:15 كە قاتىستى: «بۇل ٴسوز — كونە وسيەتتە قۇدايدىڭ سۇيىسپەنشىلىك تانىتۋىنىڭ زور، ٴتىپتى ەڭ زور، كورىنىسى»،— دەگەنىنە تاڭعالماسا دا بولادى.
6. كوپتەگەن كەمەلسىز ادامداردىڭ مەيىرىمدى راقىمعا دەگەن كوزقاراسى قانداي، ٴبىراق ەحوبا ٴبىزدى نە نارسەگە سەندىرەدى؟
6 مەيىرىمدى راقىم السىزدىكتىڭ بەلگىسى مە؟ كوپتەگەن كەمەلسىز ادامدار سولاي دەپ قاراستىرادى. مىسالى، يسانىڭ زامانداسى ٵرى ريمدەگى ٴبىلىمدار ادامداردىڭ اراسىندا تانىمال بولعان ٴپالساپاشى سەنەكا اتالمىش قاسيەتتى «سانا السىزدىگى» دەپ ۇيرەتكەن. سەنەكا ٴستويسيزمدى — سەزىمنەن ادا تىنىشتىققا شاقىراتىن ٴپالساپانى — جاقتاۋشى بولعان. ونىڭ ايتۋىنشا، دانا ادام باسقالار قاسىرەت شەككەندە كومەكتەسە الادى، ٴبىراق ٶز بويىندا اياۋشىلىقتىڭ بولۋىنا جول بەرمەۋى ٴتيىس، ويتكەنى مۇنداي سەزىم ادامدى جان تىنىشتىعىنان ايىرادى. مۇنداي ٶزىمشىل كوزقاراستاعى ادامنىڭ ومىرىندە جۇرەكتەن شىققان مەيىرباندىققا ورىن قالمايدى. الايدا ەحوبا مۇلدەم ولاي ەتپەيدى! ول ٶز سوزىندە ‹جاناشىرلىعى مەن قايىرىمدىلىعىنىڭ زور› ەكەندىگىنە سەندىرەدى (جاقىپ 5:11). ٶزىمىز كورەتىندەي، مەيىرىمدى راقىم — السىزدىكتىڭ ەمەس، قايتا، كۇشتىڭ بەلگىسى ٵرى اسا قاجەتتى قاسيەت. ەحوبانىڭ سۇيىسپەنشىلىككە تولى اكە رەتىندە وسى قاسيەتتى قالاي تانىتاتىنىن كورەيىك.
ەحوبانىڭ يسرايل حالقىنا مەيىرىمدى راقىمىن كورسەتۋى
7، 8. يسرايلدىكتەر مىسىردا قالاي قاسىرەت شەكتى جانە بۇل ەحوباعا قالاي اسەر ەتتى؟
7 يسرايل حالقىمەن قارىم-قاتىناسىنان ەحوبانىڭ مەيىرىمدى راقىمى انىق كورىنەدى. ب. ز. ب. 16 شى عاسىردىڭ اياعىندا ميلليونداعان يسرايلدىكتەر ەجەلگى مىسىر ەلىندە قۇلدىقتا بولعان. ولار وندا قاتتى قىسىم كورگەن. مىسىرلىقتار ولارعا ساز-بالشىقتان يلەپ كىرپىش قۇيدىرىپ، ٵرتۇرلى اۋىر جۇمىسقا جەگىپ، ‹ومىرلەرىن اسا قيىنداتتى› (مىسىردان شىعۋ 1:11، 14). وسىنداي قاسىرەت شەككەن يسرايلدىكتەر ەحوبادان كومەك سۇراپ جالبارىنادى. مەيىرىمدى راقىمعا تولى قۇداي نە ىستەدى ەكەن؟
8 ەحوبانىڭ جۇرەگى ەلجىرەپ كەتتى. ول: «مەن حالقىمنىڭ مىسىرداعى مۇشكىل حالىنە نازار اۋدارىپ، ولاردىڭ ايداۋشىلارىنان ٴجابىر كورىپ، قينالا ايقايلاعاندارىنا قۇلاق سالىپ، شەككەن ازاپتارىن تۇگەل بىلەمىن»،— دەدى (مىسىردان شىعۋ 3:7). ەحوبا ٶز حالقىنىڭ قاسىرەتى مەن زارىنا جايباراقات قاراپ تۇرا المادى. 24-تاراۋدان كورگەنىمىزدەي، ەحوبا — جاناشىر قۇداي. ال جاناشىرلىق — وزگەنىڭ قاسىرەتىن تۇسىنە ٴبىلۋ قابىلەتى — مەيىرىمدى راقىممەن تىعىز بايلانىسى بار قاسيەت. ٴبىراق ەحوبا ٶز حالقىنىڭ مۇشكىل حالىن سەزىنىپ قانا قويعان جوق، سولاردىڭ يگىلىگى ٷشىن ارەكەت ەتۋگە ىقىلاس ٴبىلدىردى. يشايا 63:9 دا بىلاي دەلىنگەن: ‹ٴتاڭىرىمىز سۇيىسپەنشىلىگىمەن جانە مول قايىرىمدىلىعىمەن حالقىن قۇتقارىپ الدى›. ەحوبا قۇدىرەتتى قولىمەن يسرايلدىكتەردى مىسىردان الىپ شىقتى (زاڭدى قايتالاۋ 4:34). سوسىن، ولارعا كەرەمەت تۇردە اس بەردى جانە شۇرايلى جەرگە الىپ كىردى.
9، 10. ا) ۋادە ەتىلگەن جەردە ورنىعىپ العاننان كەيىن، نە سەبەپتى ەحوبا يسرايلدىكتەردى قايتا-قايتا جاۋلارىنان ازات ەتىپ وتىردى؟ ٵ) ەفتانىڭ زامانىندا ەحوبا يسرايلدىكتەردى قانداي ەزگىدەن بوساتتى جانە ونى بۇعان نە تالپىندىردى؟
9 مۇنىمەن ەحوبانىڭ مەيىرىمى سارقىلعان جوق. ۋادە ەتىلگەن جەردە ورنىعىپ العاننان كەيىن، يسرايلدىكتەر قايتا-قايتا كۇنا جاساپ، ناتيجەسىندە جاپا شەگەتىن. ٴبىراق ارتىنان ەستەرىن جيىپ، ەحوباعا جالبارىناتىن. ال ول قايتا-قايتا حالقىن قۇتقارىپ الىپ وتىراتىن. نە سەبەپتى؟ ويتكەنى ‹تاڭداپ العان حالقىنا جانى اشيتىن› (شەجىرەلەر 2-جازبا 36:15؛ بيلەر 2:11—16).
10 ەفتانىڭ زامانىندا نە بولعانىن قاراستىرىپ كورەيىكشى. يسرايلدىكتەر جالعان تاڭىرلەرگە تابىنىپ كەتكەندىكتەن، ەحوبا ولاردىڭ 18 جىل بويى امموندىقتاردىڭ ەزگىسىندە بولۋىنا جول بەرەدى. اقىرىندا، ولار كۇنالارىنا وكىنەدى. كيەلى كىتاپتا بىلاي دەلىنگەن: «[يسرايلدىكتەر] بوتەن قۇدايلاردان بەزىنىپ، جاراتۋشى يەگە قۇلشىلىق ەتە باستادى. ونىڭ جانى ٴيسرايلدىڭ قاسىرەتىنە توزە المادى» (بيلەر 10:6—16). حالقى شىن جۇرەكتەن وكىنىش بىلدىرگەنى سول-اق ەكەن، ەحوبا ٵرى قاراي ولاردىڭ قاسىرەتىنە قاراپ تۇرا المادى. مەيىرىمدى راقىمعا تولى قۇداي ٶز حالقىن ەفتانىڭ قولىمەن جاۋلارىنان ازات ەتتى (بيلەر 11:30—33).
11. ەحوبانىڭ يسرايلدىكتەرگە قالاي قاراعانىنان مەيىرىمدى راقىم جونىندە نە نارسە بىلۋگە بولادى؟
11 ەحوبانىڭ يسرايلدىكتەرگە قالاي قاراعانىنان مەيىرىمدى راقىم جونىندە نە نارسە بىلۋگە بولادى؟ ەڭ الدىمەن، ٴبىز بۇل قاسيەتتىڭ وزگەنى ەسىركەۋ نەمەسە ونىڭ قاسىرەت شەگىپ جاتقانىن ٴتۇسىنىپ قويۋدى عانا بىلدىرمەيتىنىن كوردىك. بالاسى جىلاعاندا، انا مەيىرىمى ونى ارەكەتكە تالپىندىراتىنىن ەسىڭە الشى. تاپ سولاي ەحوبا دا قىزمەتشىلەرىنىڭ زارىن ەلەۋسىز قالدىرمايدى. قۇدايىمىزدىڭ مەيىرىمدى راقىمى ٶز حالقىنىڭ قاسىرەتىن جەڭىلدەتۋگە تالپىندىرادى. سونداي-اق مەيىرىمدى راقىم ەشقاشان السىزدىكتىڭ بەلگىسى بولمايتىنىن بىلدىك، ويتكەنى ەحوبانىڭ وسى ٴبىر اياۋلى سەزىمى حالقىنىڭ يگىلىگى ٷشىن تايسالماي ارەكەت ەتۋگە تالپىندىرىپ وتىرعان. الايدا ەحوبا وسى قاسيەتىن جەكە قىزمەتشىلەرىنە تانىتا ما؟
ەحوبانىڭ جەكە قىزمەتشىلەرىنە دەگەن مەيىرىمدى راقىمى
12. يسرايل حالقىنا بەرىلگەن تاۋرات زاڭىنان قۇدايدىڭ جەكە ادامدارعا دەگەن مەيىرى قالاي كورىنەدى؟
12 يسرايل حالقىنا بەرىلگەن تاۋرات زاڭىنان قۇدايدىڭ جەكە ادامدارعا دەگەن مەيىرى كورىنەدى. مىسالعا كەدەيلەرگە دەگەن قامقورلىقتى الايىق. ەحوبا كەز كەلگەن يسرايلدىكتىڭ كۇتپەگەن جەردەن جوقشىلىققا ۇشىراپ قالۋى مۇمكىن ەكەنىن بىلگەن. ونداي ادامدارعا دەگەن كوزقاراس قانداي بولۋ كەرەك ەدى؟ ەحوبا يسرايلدىكتەرگە مىنانى قاتاڭ بۇيىردى: ‹جۇرەگىڭە قاتالدىق سەزىمىن ەنگىزبە جانە كەدەي باۋىرىڭنىڭ الدىندا ساراڭدىق جاساما. وعان قارىز بەرگەن كەزدە ٶزىڭنىڭ جۇرەگىڭ قان جىلاپ سىزدامايتىن بولسىن، ويتكەنى وسى ٷشىن جاراتۋشى يە بارلىق ىستەرىڭنىڭ ٴساتتى جۇرۋىنە ارناپ ساعان باتا بەرەتىن بولادى› (زاڭدى قايتالاۋ 15:7، 10). ەحوبا يسرايلدىكتەرگە ەگىستىكتەرىندەگى استىقتى جيەگىنە دەيىن تۇگەل ورماۋدى جانە تۇسكەن ماساقتى تەرىپ الماۋدى دا بۇيىردى. ولار جوقشىلىققا ۇشىراعاندارعا قالۋى كەرەك-ٴتىن (لەۋىلىكتەر 23:22؛ رۋت 2:2—7). يسرايلدىكتەر كەدەيلەرگە قاتىستى وسى زاڭدى ورىنداعاندا، ەل اراسىندا مۇقتاجدىق كورگەندەر قول جايىپ تاماق سۇراۋعا ٴماجبۇر بولمايتىن. بۇل ەحوبانىڭ مەيىرىمدى راقىمىنىڭ كورىنىسى ەمەس پە؟
13، 14. ا) قالاي ٴداۋىتتىڭ سوزدەرى ەحوبانىڭ جەكە ٴارقايسىمىزعا قامقورلىق ەتەتىنىنە سەندىرەدى؟ ٵ) ەحوبانىڭ ‹جۇرەگى شەرلى› نەمەسە ‹رۋحى كۇيرەگەندەرگە› جاقىن ەكەنىن قانداي مىسالمەن تۇسىندىرۋگە بولادى؟
13 بۇگىندە دە سۇيىسپەنشىلىككە تولى قۇدايىمىز جەكە ٴارقايسىمىزعا قامقورلىق ەتەدى. ەحوبا باسىمىزعا تۇسكەن كەز كەلگەن قاسىرەتتى بىلەتىنىنە سەنىمدى بولا الامىز. ٴداۋىت: «جاراتۋشىنىڭ جانارى قۇدايشىلدارعا قارايدى، جانە دە ونىڭ قۇلاعى — سولاردىڭ زارىن تىڭدايدى. جاراتۋشى جۇرەكتەرى شەرلى [پەندەلەرگە] جاقىن جۇرەدى جانە رۋحى كۇيرەگەندەردى قۇتقارادى»،— دەپ جىرلاعان (ٴزابۋر 34:15، 18 [33:16، 19]). وسى تارماقتاردا ايتىلعان ادامدار جونىندە ٴبىر تۇسىندىرمەشى: «بۇل ادامداردىڭ جۇرەكتەرى شەرلى، رۋحتارى كۇيرەگەن بولۋىنىڭ سەبەبى — كۇنا جاساپ قويىپ، وزدەرىن سيلاۋدان قالىپ، تابالايتىندىقتان. ولار وزدەرىن تۇككە تۇرعىسىز ساناپ، وزدەرىنە دەگەن سەنىمدىلىكتەن ايىرىلادى»،— دەپ ەسكەردى. مۇنداي ادامدار ەحوبانى الىستا دەپ جانە وزدەرىن ونىڭ قامقورلىعىنا تۇرمايتىن، تىم ماڭىزسىز سەزىنۋى مۇمكىن. ٴبىراق شىندىعىندا ولاي ەمەس. ٴداۋىتتىڭ سوزدەرى ‹وزدەرىن تۇككە تۇرعىسىز سانايتىنداردى› ەحوبانىڭ تاستامايتىنىنا سەندىرەدى. مەيىرىمدى راقىمعا تولى قۇدايىمىز اسىرەسە وسىنداي ساتتەردە ونىڭ قامقورلىعىنا اسا مۇقتاج ەكەنىمىزدى بىلەدى، ٵرى بىزگە جاقىن بولادى.
14 مىناداي مىسالدى قاراستىرىپ كورەيىك: قۇراما شتاتتاردا ٴبىر انا كرۋپتىڭ اسقىنعان تۇرىمەن اۋىرعان ەكى جاسار بالاسىن جەدەلدەتىپ اۋرۋحاناعا اكەلەدى. بالاقايدى قاراپ بولعان سوڭ، دارىگەرلەر ونى تۇندە اۋرۋحانادا قالدىرۋ كەرەكتىگىن ايتادى. ال اناسى شە، سول ٴتۇندى قايدا وتكىزدى؟ ول بالاسىنىڭ قاسىندا ٴتۇنى بويى ورىندىقتا وتىرىپ شىقتى! بالاسى قاتتى اۋىرىپ جاتىر، سوندىقتان ول قاسىندا بولۋعا ٴتيىس قوي. ال سۇيىسپەنشىلىككە تولى كوكتەگى اكەمىزدىڭ سەزىمى بۇدان دا زور ەمەس پە!؟ ويتكەنى ول ٴبىزدى وزىنە ۇقساس ەتىپ جاراتقان (جاراتىلىس 1:26). كوڭىلىمىزگە مەدەۋ بولاتىن ٴزابۋر 34:18 [33:19] داعى سوزدەردەن ‹جۇرەگىمىز شەرلى› نەمەسە ‹رۋحىمىز كۇيرەگەن› كەزدەردە ەحوبا ٴسۇيۋشى اكە ىسپەتتى بىزگە «جاقىن ٴجۇرىپ»، مەيىرىن توگىپ، كومەك كورسەتۋگە دايىن ەكەنىن كوردىك.
15. قالاي ەحوبا جەكە ٴارقايسىمىزعا كومەكتەسەدى؟
15 قالاي ەحوبا جەكە ٴارقايسىمىزعا كومەكتەسەدى؟ بۇل مىندەتتى تۇردە ٴبىزدىڭ قاسىرەتىمىزدىڭ تۇبىنە بالتا شابىلادى دەگەندى بىلدىرمەيدى. وزىنە جالبارىنعاندارعا كومەكتەسۋگە ارنالعان ەحوبانىڭ كوپتەگەن شارالارى بار. ونىڭ ٴسوزى كيەلى كىتاپتا دۇرىس قادام جاساۋعا كومەكتەسەتىن ٴتيىمدى كەڭەستەر جازىلعان. ال قاۋىمدا ەحوبانىڭ قىزمەتشىلەرىنە قامقورلىق ەتۋدە ونىڭ مەيىرباندىلىعىن كورسەتۋگە تىرىساتىن رۋحاني تولىسقان باقىلاۋشىلار بار (جاقىپ 5:14، 15). دۇعالاردى تىڭدايتىن قۇدايىمىز وزىنەن سۇراعاندارعا كيەلى رۋحىن بەرەدى (ٴزابۋر 65:2 [64:3]؛ لۇقا 11:13). سول رۋح قۇداي پاتشالىعى ورناپ، قاسىرەت اتاۋلىنى قۇرتاتىن ۋاقىت كەلگەنشە، قيىنشىلىقتارعا توتەپ بەرە الۋىمىز ٷشىن ‹شەكسىز زور قۇدىرەت› بەرەدى (قورىنتتىقتارعا 2-حات 4:7). بەرىپ وتىرعان وسىنداي شارالارى ٷشىن ەحوباعا ريزا بولۋىمىز كەرەك ەمەس پە؟ سونداي-اق مۇنىڭ بارلىعى ونىڭ مەيىرىمدى راقىمىنىڭ كورىنىسى ەكەنىن ۇمىتپالىق.
16. ەحوبانىڭ مەيىرباندىلىعىنىڭ ەڭ كەرەمەت كورىنىسى قانداي جانە ونىڭ جەكە بىزگە قانداي قاتىسى بار؟
16 ارينە، ەحوبانىڭ مەيىرباندىلىعىنىڭ ەڭ كەرەمەت كورىنىسى — وزىنە ەرەكشە اياۋلى بولعان ۇلىن ٴبىز ٷشىن قۇرباندىققا بەرۋى. بۇل — ەحوبانىڭ تاراپىنان جاسالعان سۇيىسپەنشىلىككە تولى ارەكەت، ٵرى سول قۇرباندىق ٴبىزدىڭ قۇتقارىلۋىمىزعا جول اشتى. ەسىڭدە بولسىن، يسانىڭ قۇرباندىعى جەكە ٴارقايسىمىز ٷشىن بەرىلدى. سوندىقتان دا شومىلدىرۋ ٴراسىمىن جاساۋشى جاقيانىڭ اكەسى زاكاريا ورىندى تۇردە سول سيدىڭ قۇدايىمىز ەحوبانىڭ ‹مەيىرىمدى راقىمىنىڭ› كەرەمەت كورىنىسى بولاتىنىن الدىن الا ايتقان (لۇقا 1:78).
ەحوبانىڭ مەيىرىمدى راقىم تانىتپايتىن كەزدەرى
17—19. ا) ەحوبانىڭ مەيىرىنىڭ شەگى بار ەكەنى كيەلى كىتاپتان قالاي كورىنەدى؟ ٵ) نەلىكتەن ەحوبانىڭ مەيىرىمدى راقىمى شەگىنە جەتتى؟
17 ەحوبانىڭ مەيىرىمى شەكسىز بە؟ جوق. ويتكەنى كيەلى كىتاپتا ٶزىنىڭ ٵدىل نورمالارىنا قارسى ارەكەت ەتەتىن ادامدارعا قاتىستى ەحوبانىڭ مەيىرىم تانىتۋدان باس تارتۋعا قۇقى بار ەكەنى انىق كورسەتىلەدى (ەۆرەيلەرگە 10:28). ونىڭ نەگە بۇلاي ەتەتىنىن ٴتۇسىنۋ ٷشىن، تاعى دا يسرايل حالقىمەن بولعان جاعدايدى قاراستىرىپ كورەيىك.
18 ەحوبا يسرايلدىكتەردى جاۋلارىنان قايتا-قايتا ازات ەتىپ وتىرعانىمەن، اقىرىندا مەيىرىمدى راقىمى شەگىنە جەتەدى. سول توڭ مويىن حالىق مۇسىندەرگە تابىنىپ، ٴتىپتى قۇدايلارىنىڭ جەكسۇرىن مۇسىندەرىن ەحوبانىڭ عيباداتحاناسىنا دا اكەلەدى! (ەزەكيەل 5:11؛ 8:17، 18) كيەلى كىتاپتا بىلاي دەلىنگەن: «ولار قۇدايدىڭ حابارشىلارىن مازاق قىلىپ، سوزدەرىنە كۇلىپ، پايعامبارلارىن كەلەمەجدەي بەردى. اقىر سوڭىندا جاراتقان يە ٶز حالقىنا ابدەن قاھارلاندى. ولاردى ەندى ساۋىقتىرۋدىڭ ەشبىر شاراسى قالمادى» (شەجىرەلەر 2-جازبا 36:16، سىلتەمەنى قارا). يسرايلدىكتەر شەكتەن شىعىپ كەتتى، ولارعا مەيىرىم تانىتۋعا لايىقتى ەش نەگىز قالمادى. ولار ەحوبانى ٵدىل اشۋ شاقىرۋعا ٴماجبۇر ەتتى. مۇنىڭ ناتيجەسى قانداي بولدى؟
19 بۇدان بىلاي ەحوبا ولارعا مەيىرىمدى راقىم تانىتا المادى. «ولاردى ايامايمىن جانە كەشىرمەيمىن، ٴتىپتى قۇرتىپ جىبەرۋدەن دە تايىنبايمىن»،— دەدى ول (ەرەميا 13:14). سوندىقتان يەرۋساليم مەن ونىڭ عيباداتحاناسى كۇيرەتىلىپ، ال يسرايلدىكتەر بابىلعا قۇلدىققا ايدالدى. كۇناكار ادامداردىڭ سونشا قىڭىر بولىپ، ٴتىپتى قۇدايدىڭ مەيىرىمدى راقىمىن سارقىلۋعا جەتكىزگەنى قانداي وكىنىشتى! (ەرەميانىڭ زارى 2:21)
20، 21. ا) بۇگىندە قۇدايدىڭ مەيىرىمدى راقىمى شەگىنە جەتكەندە نە بولادى؟ ٵ) كەلەسى تاراۋدا ەحوبانىڭ مەيىرىمدى راقىممەن بەرگەن قانداي سيى جونىندە اڭگىمەلەنەدى؟
20 بۇگىنگى كۇن جونىندە نە دەۋگە بولادى؟ ەحوبا وزگەرگەن جوق. ول مەيىرىمدى راقىمىنا بولا كۋاگەرلەرىنە پاتشالىق تۋرالى ىزگى حاباردى بۇكىل جەر جۇزىندە ۋاعىزداۋدى تاپسىردى (ماتاي 24:14). ەگەر تازا نيەتتى ادامدار قۇلاق اسسا، ەحوبا ولاردىڭ پاتشالىق تۋرالى حاباردى تۇسىنۋلەرىنە كومەكتەسەدى (ەلشىلەردىڭ ىستەرى 16:14). ٴبىراق بۇل حابار ماڭگى ۋاعىزدالا بەرمەيدى. ەحوبانىڭ وسى زۇلىم دۇنيەنىڭ جويىلماي، قايعى-قاسىرەتتىڭ ماڭگىگە سوزىلا بەرۋىنە جول بەرۋى مەيىرىمدىلىككە جاتپاس ەدى. قۇدايدىڭ مەيىرىمىنىڭ شەگى جەتكەندە، وسى دۇنيەگە شىعارعان ۇكىمىن جۇزەگە اسىرادى. ٴتىپتى سول كەزدىڭ وزىندە «قاسيەتتى ەسىمىن» جانە ادال قىزمەتشىلەرىن اياعاندىقتان، مەيىرىمدى راقىمىنا ساي ارەكەت ەتەدى (ەزەكيەل 36:20—23). ەحوبا جەر بەتىن زۇلىمدىقتان تازارتىپ، ٵدىل ادامداردى جاڭا دۇنيەگە كىرگىزەدى. ال زۇلىمدارعا قاتىستى ول بىلاي دەيدى: «كوزدەرىم ايامايدى، راقىمشىلىق تا جاسامايمىن. جۇرگەن جولدارىن مىندەتتى تۇردە باستارىنا كەلتىرەمىن» (ەزەكيەل 9:10، جد).
21 سول ۋاقىت كەلگەنشە، ەحوبا ادامدارعا، ٴتىپتى جويىلۋعا لايىقتىلارعا دا مەيىرىمدى راقىمىن كورسەتىپ وتىر. ال شىن جۇرەكتەن كۇنالارىنا وكىنەتىندەر ونىڭ مەيىرىمدىلىگىنىڭ ەڭ زور كورىنىستەرىنىڭ ٴبىرى — كەشىرىمگە يە بولا الادى. كەلەسى تاراۋدا ٴبىز ەحوبانىڭ قانشالىقتى تولىق كەشىرەتىنىن كورسەتەتىن كوركەم بەينەلەردى قاراستىرامىز.
a ٴبىر ەسكەرەتىن جايت، ٴزابۋر 103:13 [102:13] تە ەۆرەي ٴتىلىنىڭ را·حام ەتىستىگى اكەلىك مەيىرىمگە قاتىستى قولدانىلعان.
