1-3. (1) ?Trɔ nɔnnin kpa benin yɛ ɔ tili Davidi-ɔ? ?Yɛ ngue yɛ ɔ fɔnvɔli i-ɔ? (2) ?Kɛ e fɔn dan’n, trɔ benin yɛ ɔ kwla tin e su wie-ɔ? ?Yɛ Zoova i ndɛ benin yɛ ɔ gua e awlɛn su nzue-ɔ?

 JUE TOFUƐ Davidi klɛli i kɛ: “Min fɔnlɛ’m be tra min ti’n su, be ti kɛ trɔ nɔnnin wie sa, be yo nɔnnin dan ti’n, n kwlá suaman be. N wunman min wun fɛ kaan sa, m’an bubu mlɔnmlɔn.” (Jue Mun 38:4, 8) Davidi si kɛ sran kun i akunndan m’ɔ bu i fɔ kekle’n, ɔ ti kɛ trɔ nɔnnin kpa kun m’ɔ jin i ti su’n sa. Sanngɛ Davidi ɲannin fɔnvɔlɛ. Ɔ wunnin i wlɛ kɛ sa tɛ’n yɛ Zoova kpɔ i-ɔ, naan sɛ sran i sa tɛ’n yo i nsisɔ’n naan ɔ kaci i nzuɛn’n, Zoova kpɔmɛn i sɔ sran liɛ’n. Davidi lafi su kpa kɛ Zoova kwla yaci sran kɛ ngalɛ sa’n i wun sa cɛ i. I sɔ’n ti’n ɔ seli kɛ: “Zoova, […] a yaci sa cɛ.”—Jue Mun 86:5.

² E kusu kɛ e fɔn’n mɔ e akunndan’n bu e fɔ’n, sa tɛ nga e yoli’n kwla ti e kɛ trɔ nɔnnin kpa kun sa. Sɛ e wun yo e sɔ sakpa’n, ɔ ti kpa. Afin i sɔ’n kwla su e bo naan y’a kaci e sa. Sanngɛ sɛ e klun akunndan’n bu e fɔ lele tra su’n, i liɛ’n ɔ timan kpa kaan sa. Afin e kwla bu i kɛ kannzɛ maan e kaci e sa sɛ, Zoova su yaci cɛman e le. Asa ekun’n sɛ ‘e wla bo e wun tratra su’n,’ ɔ cɛman naan Satan w’a fɛ i sa w’a wla nun. Ɔ́ yó naan e bu i kɛ Zoova w’a dun mmua w’a bu e fɔ w’a wie, naan ɔ fataman kɛ e su i kun.—2 Korɛntifuɛ Mun 2:5-11.

³ ?Sanngɛ kɛ Zoova bu e fɔ sɔ-ɔ? Cɛcɛ. Zoova i sran klolɛ dan’n ti’n ɔ yaci sran i wun sa cɛ i. I Ndɛ’n  nun’n, ɔ se e kɛ sɛ sran kun yaci sa tɛ yolɛ sakpa’n, i kusu yáci i wun sa cɛ́ i. Ndɛ sɔ’n gua e awlɛn su nzue dan. (Ɲanndra Mun 28:13) ?Ngue ti yɛ Zoova yaci e wun sa cɛ e-ɔ? ?Yɛ wafa sɛ yɛ ɔ yaci e wun sa cɛ e-ɔ? Kosan nɲɔn sɔ’m be su tɛlɛ’n wá úka e naan y’a lafi su kpa kɛ Zoova kwla yaci e wun sa’n cɛ.

4. ?Ngue yɛ Zoova i wla fiman su-ɔ? ?Yɛ kɛ ɔ nin e nánti’n, ngue yɛ ɔ bu i akunndan-ɔn?

⁴ Zoova si kɛ e kwlá yoman like ngba. Jue Mun 103:14 se kɛ: “Afin ɔ si like ng’ɔ fa yili e’n. Ɔ si kɛ e ti fa.” I wla fiman su le kɛ sran mɔ fa yɛ ɔ fa yili be’n, be ti fakafaka. Afin fɔ’n wo be nun. Biblu’n fa Zoova sunnzun sɛ ufuɛ kun, kpɛkun e liɛ’n ɔ fa e sunnzun ufa’n. Ɔ maan kɛ Biblu’n se kɛ Zoova si “like ng’ɔ fa yili e’n,” e wla kpɛn i sɔ liɛ’n su. (Zeremin 18:2-6) Zoova wun i wlɛ kɛ fɔ m’ɔ o e nun’n ti’n e leman wunmiɛn. Ɔ maan sɛ e fa ajalɛ kɛ é nánti i mmla’m be su’n annzɛ e nantiman su’n, i sɔ’n su yɛ ɔ jran naan ɔ nin e w’a nanti-ɔ.

5. ?Sa tɛ’n i su ndɛ benin yɛ Rɔmunfuɛ Mun fluwa’n kan-ɔn?

⁵ Zoova wun i wlɛ kɛ sa tɛ’n le ta dan e su. I Ndɛ’n kle kɛ sa tɛ’n ti kɛ like kun m’ɔ le wunmiɛn dan m’ɔ sie klɔ sran’m be kwlaa mɔ i agualiɛ su’n be wu’n sa. ?E kpɔci e wun-ɔn, ɔ yo ye? Akoto Pɔlu tɛ su Rɔmunfuɛ Mun fluwa’n nun kɛ: “Be ti sa tɛ yofuɛ.” Sa tɛ’n sie e kɛ sonja su kpɛn kun fa sie i sonja mun sa. (Rɔmunfuɛ Mun 3:9) Sa tɛ’n “sieli” klɔ sran mun kɛ famiɛn wie sa. (Rɔmunfuɛ Mun 5:21) Sa tɛ’n ‘wo’ e nun. (Rɔmunfuɛ Mun 7:17, 20) Sa tɛ’n ti kɛ “mmla kun” m’ɔ o e wunnɛn’n nun’n sa. Sɛ é kwlá sé’n, i  waan ɔ́ klé e like ng’ɔ fata kɛ e yo’n. (Rɔmunfuɛ Mun 7:23, 25) Nanwlɛ, sran mɔ fɔ o be nun’n, sa tɛ’n le ta dan be su.—Rɔmunfuɛ Mun 7:21, 24.

6, 7. (1) ?Sɛ sran kun i sa tɛ’n yo i nsisɔ’n, ngue yɛ Zoova yo-ɔ? (2) ?Ngue ti yɛ aunnvɔɛ mɔ Ɲanmiɛn si e ti’n, ɔ fataman kɛ e ɲinfu e yo sa tɛ-ɔ?

⁶ I kwlaa sɔ’n ti’n, Zoova si kɛ kannzɛ bɔbɔ é yó sɛ yó sɛ, e kwlá nantimɛn i mmla’m be su seiin e guɛmɛn i ti nin i bo. Ɔ se e kɛ sɛ e kan e wun ase naan e kaci e nzuɛn’n, naan e srɛ i kɛ ɔ yaci e wun sa’n cɛ e’n, ɔ́ yáci cɛ́ e sakpa. Jue Mun 51:17 se kɛ: “Be wla m’ɔ bo be wun’n, yɛ ɔ ti tɛ mɔ Ɲanmiɛn i klun jɔ su’n niɔn. Ee Ɲanmiɛn, sran nga i awlɛn w’a kpɔtɔ i klun’n, mɔ i akunndan w’a sanngan’n, a su yimɛn i blo.” Be nga sa tɛ dan mɔ be yoli’n ti’n, ‘be awlɛn w’a kpɔtɔ be klun’n, mɔ be akunndan w’a sanngan’n,’ Zoova su kacimɛn i sin siman be le.

⁷ ?Sanngɛ é nían kɛ fɔ’n wo e nun naan Ɲanmiɛn si e aunnvɔɛ ti’n, e ɲinfu é yó sa tɛ? Nán e yo sɔ kaan sa! Sran yo Zoova i annvɔ, sanngɛ i aunnvɔɛ silɛ’n le awɛ. Be nga be ɲinfu be yo sa tɛ’n mɔ be ayeliɛ’n yoman be nsisɔ kaan sa’n, Zoova su siman be aunnvɔɛ. (Ebre Mun 10:26) Sanngɛ sɛ sran kun i sa tɛ’n yo i nsisɔ’n, ɔ yaci cɛ i. Sran aunnvɔɛ silɛ’n ti Zoova i nzuɛn kun m’ɔ yo ɲɛnmɛn dan-ɔn. Maan e nian wafa nga Biblu’n kan Zoova i nzuɛn sɔ m’ɔ kle kɛ ɔ klo sran’n i ndɛ’n.

8. ?Sɛ é kwlá sé’n, kɛ Zoova yaci sran kun i wun sa cɛ i’n, ngue yɛ ɔ yo-ɔ? ?Yɛ ngue yɛ e kwla lafi su wie-ɔ?

⁸ Kɛ Davidi yoli sa tɛ’n m’ɔ kacili i sa’n, ɔ seli kɛ: “I agualiɛ su’n n dili min sa tɛ’n i nanwlɛ n kleli  wɔ. M’an fiaman min fɔnlɛ’n su. […] Kpɛkun a yacili min fɔnlɛ’n nin min sa tɛ mun cɛli min.” (Jue Mun 32:5) ?Ndɛ sɔ’n i bo’n yɛle benin? Yɛle kɛ sa tɛ nga Davidi yoli’n m’ɔ ti kɛ i ti su trɔ sa’n, Zoova sike jinnin, kpɛkun ɔ fa ko sieli i mmuammua kpa. Kɛ ɔ yoli sɔ’n Davidi i wla guali ase. (Jue Mun 32:3) E kusu e kwla lafi su kɛ, sɛ e jran e ti kpɔlɛ tɛ nga Zezi yili’n su e kpata Ɲanmiɛn’n, ɔ́ yáci e wun sa cɛ́ e weiin.—Matie 20:28.

9. ?Kɛ Zoova yaci e wun sa cɛ e’n, sɛ é kwlá sé’n, ɔ fa sa tɛ sɔ’n ko yi i ninfan?

⁹ Davidi kannin ndɛ kun ekun fa kleli kɛ Zoova yaci sran i wun sa cɛ i sakpa. I waan: “Ɔ yo maan e nin e sa tɛ mun e afiɛn’n ti nun kɛ wia afiliɛ’n nin wia atɔliɛ’n be afiɛn’n ti nun ju’n sa.” (Jue Mun 103:12) ?Be kwla sunnzun wia afiliɛ’n nin wia atɔliɛ’n be afiɛn’n? Be sunnzun-ɔn, ɔ yoman ye. Be nɲɔn’n be kwlá yiaman nun le. Fluwa sifuɛ dan kun liɛ’n i waan wia afiliɛ’n nin wia atɔliɛ’n “be afiɛn’n ti nun dan ti’n, sɛ e waan é bú akunndan lele naan é sí kan be afiɛn’n ti nun ju’n, fɛlɛ yɛ é fɛ́ ngbɛn-ɔn.” Ɔ maan ndɛ nga Ɲanmiɛn maan Davidi kannin’n kle e kɛ, kɛ Zoova yaci e wun sa cɛ e’n, sɛ é kwlá sé’n, ɔ fa e sa tɛ’n ko yi i mmuammua kpa.

10. ?Kɛ Zoova yaci e wun sa cɛ e’n, ngue ti yɛ ɔ fataman kɛ e bu i kɛ e sa tɛ sɔ’n kali e wun-ɔn?

¹⁰ ?Amun a kunndɛ le kɛ amún yí fiɛn wie m’ɔ tɔli amun tralɛ’n nun’n? Wie liɛ bɔbɔ’n kannzɛ amún yó sɛ-o, fiɛn sɔ’n kwlá tuman tralɛ’n nun le. Sanngɛ amun nian wafa nga Zoova waan ɔ kwla yaci e sa tɛ’n cɛ e’n. I waan: “Sɛ amun sa tɛ’m be ti ɔkwlɛ bioun’n, bé fɛ́n fuai kɛ laglasi m’ɔ fin nglo lɔ  gua munkɛnmunkɛn’n sa. Kannzɛ be blo kɛ tannin ɔkwlɛ wie sa’n, bé fɛ́n fuai kɛ bua ndrɛ sa.” (Ezai 1:18) a Like “ɔkwlɛ’n” ɔ ti tannin wlalɛ ayre nga be tra tannin kpa’n, be nun kun. E bɔbɔ e kwlá yiman fɔ m’ɔ o e nun’n. Sanngɛ Zoova liɛ’n, kannzɛ bɔbɔ e sa tɛ’n ti kɛ like ɔkwlɛ bioun sa’n, ɔ kwla yo maan ɔ yo fitafita kɛ jese fɔkɔ sa, annzɛ kɛ bua ndrɛ sa. Ɔ maan kɛ Zoova yaci e wun sa cɛ e’n, nán maan srɛ kun e kun. Nán e bu i kɛ sa tɛ sɔ’n kali e wun.

11. ?Kɛ be se kɛ Zoova to e sa tɛ mun gua be i sin lɔ’n, i bo’n yɛle benin?

¹¹ Kɛ Ezekiasi tɔli tukpacɛ m’ɔ́ wá le wú’n, m’ɔ jasoli’n, ɔ toli jue fa lali Zoova i ase. Ɔ seli i kɛ: “A toli min sa tɛ’m be kwlaa guali ɔ sin lɔ.” (Ezai 38:17) Ɔ ti kɛ nn Zoova kuku e sa tɛ m’ɔ yaci cɛli e’n, kpɛkun ɔ to be yi be blo i sin lɔ sa. Ɔ maan ɔ wunman be kun, annzɛ ɔ boman be su diman jɔlɛ kun. Fluwa kun waan be kwla kaci ndɛ mma sɔ’n kɛ: ‘A yoli kɛ m’an yoman sa tɛ bɔbɔ sa.’ ?I sɔ’n ciciman e wla?

12. ?Wafa sɛ yɛ Mise kleli kɛ, kɛ Zoova ko yaci e wun sa ko cɛ e’n, nn w’a yaci w’a cɛ e mlɔnmlɔn-ɔn?

¹² Kɛ Zoova tali nda kɛ Izraɛlifuɛ’m be mɛn’n yó kpa kɛ laa’n sa’n, i nuan ijɔfuɛ Mise kannin ndɛ kun. I ndɛ sɔ’n kle kɛ ɔ lafili su kɛ Zoova yáci i nvle’n i wun sa cɛ́ i sakpa. Ɔ seli Ɲanmiɛn kɛ: “?Wan yɛ ɔ ti Ɲanmiɛn kɛ wɔ sa m’ɔ yaci i nvlefuɛ’m be onga’n i sa tɛ’n cɛ, m’ɔ blu i fɔnlɛ’n su’n niɔn? [...] Á wá tó be sa tɛ’m be kwlaa yí i jenvie’n i bo mmua kpa lɔ.” (Mise 7:18, 19) Wafa nga Izraɛlifuɛ’m  be wunnin ndɛ sɔ’n i wlɛ’n, maan e bu i sin e nian. ?Like nga be to yi i “jenvie’n i bo mmua kpa” lɔ’n, be kwla ko fɛ i ekun? Mise i ndɛ’n kle kɛ, kɛ Zoova ko yaci e wun sa ko cɛ e’n, nn w’a yaci w’a cɛ e mlɔnmlɔn.

13. ?Kɛ Zezi kan kɛ: ‘Yaci e kalɛ mun cɛ e’n,’ i bo’n yɛle benin?

¹³ Kɛ ɔ ko yo naan y’a wun i wlɛ kɛ Zoova yaci sran’m be wun sa cɛ be’n, Zezi fali sunnzun ase kun. Ɔ fali Zoova sunnzunnin sran kun mɔ i kalɛ o e su’n. Zezi seli kɛ, kɛ é srɛ́ Ɲanmiɛn’n, maan e se i kɛ: “Yaci e kalɛ mun cɛ e.” (Matie 6:12, ja ngua lɔ ndɛ’n) Zezi fali sa tɛ’n sunnzunnin kalɛ m’ɔ o sran su’n. (Liki 11:4, ja ngua lɔ ndɛ’n) Kɛ e yo sa tɛ’n, ɔ ti kɛ Ɲanmiɛn i “kalɛ” w’a tran e su sa. Fluwa kun kannin Glɛki nun ndɛ mma nga be kacili i Wawle’n nun kɛ ‘yaci’n’ i ndɛ. Ɔ seli kɛ: “Ndɛ mma sɔ’n i  bo’n yɛle kɛ ɔ yaci kalɛ’n nun mlɔnmlɔn, annzɛ ɔ laman kalɛ kun, annzɛ ɔ nunnun kalɛ’n.” I sɔ’n kle kɛ, kɛ Zoova ko yaci e sa tɛ’n ko cɛ e’n, ɔ ti kɛ nn w’a nunnun i sa. Ɔ boman su diman jɔlɛ kun. Ndɛ sɔ’n kwla gua be nga be sa tɛ’n yo be nsisɔ’n mɔ be kaci be sa’n, be awlɛn su nzue. Zoova su laman be kalɛ kun mlɔnmlɔn. Afin w’a nunnun be sa tɛ’n i osu’n mlɔnmlɔnmlɔn.—Jue Mun 32:1, 2.

14. ?Ngue yɛ e kwla fa wafa nga Zoova ‘yaci e sa tɛ’n cɛ e’n,’ e sunnzun i-ɔ?

¹⁴ Sa Nga Be Yoli’n 3:19 kan wafa nga Zoova yaci sran i sa tɛ’n cɛ i’n, i ndɛ. Ɔ se kɛ: “Maan amun kaci amun akunndan’n, kpɛkun amun kaci amun sa. I liɛ’n, bé yáci amun sa tɛ’m bé cɛ́ amun.” Glɛki nun’n, ndɛ mma nga be kacili i Wawle nun kɛ ‘bé yáci bé cɛ́’n,’ i bo’n yɛle kɛ sa tɛ nga e yoli’n, bé “núnnún i mlɔnmlɔn.” Fluwa sifuɛ wie’m be fɛ i sɔ liɛ’n fa sunnzunnin fluwa nga be klɛ’n, mɔ i sin be nunnun i’n. ?Wafa sɛ yɛ ɔ kwla yo sɔ-ɔ? Lalafuɛ nun Izraɛli lɔ’n, be sanngan ayre ble nin nzue yɛ be fa klɛ be fluwa mun-ɔn. Kɛ sran kun wie like klɛ’n, naan i osu nin-a cɛman ngboko’n, ɔ kwla fa mlan nunnun i. I sɔ kunngba’n yɛ Zoova m’ɔ ti aunnvɔɛ sifuɛ’n, ɔ yo-ɔ. Kɛ ɔ yaci e sa tɛ’n cɛ e’n, ɔ ti kɛ w’a fa mlan w’a nunnun i mlɔnmlɔn sa.

15. ?Ngue yɛ Zoova kunndɛ kɛ e fa sie e ti nun-ɔn?

¹⁵ Kɛ e bu sunnzun ase kwlaa ngalɛ’m be akunndan’n, e wun i wlɛ weiin kɛ Zoova kunndɛ kɛ e fa ndɛ kun e sie e ti nun. Yɛle kɛ sɛ e wla e nzuɛn tɛ’n i ase’n, ɔ́ yáci e wun sa cɛ́ e sakpa. Ɔ maan srɛ kunman e kɛ cɛn wie lele’n, Zoova wá jrán sa tɛ nga e yoli’n su ɔ́ bú e fɔ ekun. Zoova i sran aunnvɔɛ silɛ’n  i su like kun ekun o lɛ mɔ Biblu’n yi i nglo-ɔ. Yɛle kɛ, kɛ Zoova ko yaci sa kun ko cɛ’n, i wla fi sa sɔ’n su.

16, 17. ?Kɛ Biblu’n se kɛ Zoova i wla fi e sa tɛ’n, i bo’n yɛle benin? ?Yɛ ngue ti yɛ e se sɔ-ɔ?

¹⁶ Zoova tali be ng’ɔ nin be trali aenguɛ uflɛ’n be nda kɛ: “Ń yáci sa nga be yoli’n ń cɛ́ be. Yɛ min wla su kpɛnman be sa tɛtɛ’m be su kun.” (Zeremin 31:34) ?Sanngɛ i sɔ’n kle kɛ, kɛ Zoova ko yaci sa kun ko cɛ’n, i wla kwlá kpɛnman sa sɔ’n su kun mlɔnmlɔn? Nɛ́n i sɔ kaan sa-ɔ. Afin Zoova yacili sran kpanngban be sa tɛ mun cɛli be. Davidi o be nun wie. Sanngɛ Biblu’n wa kannin be sa tɛ sɔ’m be ndɛ ekun. (2 Samiɛli 11:1-17; 12:13) Zoova te si kɛ be yoli sa tɛ. E kpa yolɛ ti’n, sa tɛ nga be yoli’n ɔ nin be nzuɛn mɔ be kacili’n, ɔ nin be sa tɛ mɔ Ɲanmiɛn yaci cɛli be’n, be klɛli i kwlaa sieli i Biblu’n nun. (Rɔmunfuɛ Mun 15:4) ?Ɔ maan kɛ Biblu’n se kɛ Zoova i ‘wla su kpɛnman be sa tɛtɛ’m be su kun’n’ i bo’n yɛle benin?

¹⁷ Ebre nun ndɛ mma nga be kacili i Wawle nun kɛ ‘i wla su kpɛnman su kun’n,’ ɔ kleman kɛ Ɲanmiɛn i wla kwlá kpɛnman su kun. Fluwa kun m’ɔ yiyi Biblu’n i bue nga laa be klɛli i Ebre nun’n i nun’n, ɔ se kɛ ndɛ mma sɔ’n, “i bo’n i wie yɛle kɛ ajalɛ ng’ɔ nin i fata’n i falɛ.” Ɔ maan sɛ sa tɛ yofuɛ’m be wun yɛ ɔ fa ajalɛ’n, i lɛ nun’n, ɔ ‘tu be fɔ.’ (Oze 9:9) Sɛ kusu be nga be kaci be nzuɛn’n be wun yɛ Ɲanmiɛn fa ajalɛ’n, i “wla su kpɛnman be sa tɛtɛ’m be su kun.” I sɔ’n kle kɛ, kɛ ɔ yaci be sa tɛ’n cɛ be’n, ɔ  su jranman sa tɛ sɔ’n su ekun diman be jɔlɛ cɛn wie lele. (Ezekiɛli 18:21, 22) I sɔ’n kle e kɛ, kɛ be se kɛ Zoova i wla fi e sa tɛ’n su’n, yɛle kɛ ɔ su jranman su buman e fɔ kun naan se kɛ ɲrɛnnɛn yɛ ɔ́ klé e-ɔ. Nanwlɛ, kɛ e si kɛ Ɲanmiɛn yaci sran’m be wun sa cɛ be sakpasakpa’n, naan i wla fi su bɔbɔ’n, i sɔ’n gua e awlɛn su nzue dan.

18. ?Kɛ be se kɛ Zoova yaci sa cɛ’n ti’n, sa tɛ yofuɛ’n su isɛmɛn i sa tɛ’n i bo nzuɛn’n?

¹⁸ ?Kɛ be se kɛ Zoova yaci sa cɛ’n ti’n, sa tɛ yofuɛ’n  su isɛmɛn i sa tɛ’n i bo nzuɛn’n? Ɔ lemɛn i yowlɛ, saan ɔ́ ísɛ i bo nzuɛn’n wie. Pɔlu klɛli kɛ: “Like nga sran kun lua’n yɛ ɔ́ tí-ɔ.” (Galasifuɛ Mun 6:7) Sanngɛ nán e bu i kɛ, kɛ Zoova yaci sa tɛ’n ko cɛ’n, kpɛkun i kunngba’n yɛ ɔ fa ɲrɛnnɛn yi sa tɛ yofuɛ’n su-ɔ. Kɛ ɲrɛnnɛn tɔ Klisifuɛ kun su’n, nán maan ɔ bu i kɛ ‘atrɛkpa’n sa tɛ ng’ɔ yoli i laa ti’n, Zoova su kle i ɲrɛnnɛn.’ (Zaki 1:13) Asa kusu’n, Zoova su kpaloman i sa tɛ’n i bo nzuɛn’n. Sa tɛ’m be bo nzuɛn’n i wie yɛle bla nin bian be wun yralɛ’n, ɔ nin kuɛ falɛ ngbɛnngbɛn’n, ɔ nin tukpaciɛ wie kɛ loliɛ annzɛ babazru nin Sida’n sa. Sa tɛ yofuɛ’n yo i wun wanzo, sran’m be lafimɛn i su kun. Nán maan e wla fi sa ng’ɔ ɲannin Davidi’n i su. Kɛ ɔ kunndɛli Iri i yi Bati-Seba m’ɔ kunnin bian’n ukali su’n, ɲrɛnnɛn nga be tɔli i su kasiɛn’n, Zoova w’a kpaloman be.—2 Samiɛli 12:9-12.

19-21. (1) ?Kɛ sran kun yo i wiengu tɛ’n, wafa sɛ yɛ mmla ng’ɔ o Sanwun Yolɛ 6:1-7 nun’n, ɔ yo be sran nɲɔn’n be ye-ɔ? (2) ?Sɛ e loli e wiengu ngasi’n, é yó sɛ naan Zoova i klun w’a jɔ e wun?

¹⁹ Sɛ sran wie yɛ e yoli i tɛ’n, sa tɛ sɔ’n i bo nzuɛn wie ekun be o lɛ. Maan e fa sa kun m’ɔ o Sanwun Yolɛ fluwa’n i ndɛ tre 6 nun’n, e fa yiyi nun. Moizi Mmla’n kan sran m’ɔ kwla kpɛ i wiengu gblɛ, annzɛ ɔ kwla wuɛ i like, annzɛ ɔ kwla di i lufle’n i ndɛ. I klikli’n nun’n, sran sɔ’n dimɛn i nanwlɛ kpɛkun ɔ blu su ta ato nda. Ɔ ti kɛ i ndɛ’n nin sran ng’ɔ fɛli i like liɛ’n be sansan be wun sa. Sanngɛ kɛ ɔ́ cɛ́ kɔ́’n, i akunndan m’ɔ bu i fɔ’n ti’n ɔ tran-ɔn, ɔ tranman kun. Ɔ maan ɔ wa dili sa tɛ ng’ɔ yoli’n i nanwlɛ siɛn’n. Sɛ sran sɔ’n kunndɛ kɛ Ɲanmiɛn yaci i sa tɛ’n cɛ i’n, ɔ fata kɛ ɔ fa ajalɛ nsan. I klikli’n yɛle kɛ  ɔ́ yí like kwlakwla ng’ɔ fali’n mán. I nɲɔn su’n, ɔ́ fá like sú i bo. Sɛ kotokun kun yɛ ɔ fali’n, ɔ́ fá pɔnun mɔcuɛ sú i bo. Kpɛkun i nsan su’n, ɔ́ fá bua nene kun yí tɛ. Moizi Mmla’n se kɛ: ‘Ɲanmiɛn ɲrun jranfuɛ’n kɔ́ Zoova ɲrun ɔ́ kó kpɛ́tɛ i ti, yɛ bé yáci cɛ́ i.’—Sanwun Yolɛ 6:1-7.

²⁰ Mmla sɔ’n kle kɛ Ɲanmiɛn si aunnvɔɛ. Ɔ yo sran nga be fɛli i like’n i ye. Afin kɛ sran’n di nanwlɛ kle i’n, m’ɔ yi like’n ko sie i osu’n, i klun tɔ nun fɔun. Asa kusu’n, sran nga i akunndan’n bu i fɔ’n ɔ ɲan mmla sɔ’n i su ye wie. Afin ɔ wa dili nanwlɛ, kpɛkun ɔ yili sran’n i like’n sieli i osu. Sɛ w’a yoman sɔ’n, Ɲanmiɛn kusu su yacimɛn i sa tɛ’n cɛmɛn i.

²¹ Kannzɛ e diman Moizi Mmla’n su kun’n, sanngɛ mmla sɔ’n uka e maan e si Zoova i klun akunndan’n. Like nga e ko yo naan w’a yaci e sa tɛ’n w’a cɛ e’n, e wun i wlɛ. (Kolɔsufuɛ Mun 2:13, 14) Kɛ e lo e wiengu ngasi mɔ e kplin e ɲin e siesie e afiɛn’n, i sɔ’n jɔ Ɲanmiɛn klun. (Matie 5:23, 24) Like ng’ɔ fata kɛ e yo’n, i wie yɛle kɛ e di e sa tɛ’n i nanwlɛ, yɛ e kpata e wiengu. Kpɛkun maan e jran e ti kpɔlɛ tɛ nga Zezi yili’n su e srɛ Zoova. Sɛ e yo sɔ’n, é wún i wlɛ kɛ Ɲanmiɛn yacili e sa tɛ’n cɛli e sakpa.—Ebre Mun 10:21, 22.

22. ?Kɛ Zoova yaci sran kun i sa tɛ’n cɛ i’n, ngue yɛ ɔ yo sran sɔ’n wie-ɔ?

²² Zoova ti kɛ siɛ kpa kun m’ɔ klo i mma mun’n sa. Kɛ ɔ yaci sran i wun sa cɛ i’n, ɔ tu i fɔ wie. (Ɲanndra Mun 3:11, 12) Klisifuɛ ng’ɔ yoli sa tɛ m’ɔ kacili i sa’n, sɛ ɔ ti asɔnun kpɛnngbɛn-o, annzɛ asɔnunfuɛ’m be ukafuɛ-o, annzɛ atin bofuɛ-o, wie liɛ’n, ɔ  yaci junman sɔ’n i dilɛ. Junman cinnjin sɔ m’ɔ́ yáci i dilɛ blɛ sɔ’n nun’n, ɔ kwla yo i ya. Sanngɛ nán kɛ Zoova w’a yacimɛn i sa tɛ’n w’a cɛmɛn i ti yɛ be tuli i fɔ-ɔ. Nán e wla fi su kɛ klolɛ mɔ Zoova klo e’n, i ti yɛ ɔ tu e fɔ-ɔ. Sɛ e kplin fɔ ng’ɔ tu e’n su naan e nian su e nanti’n, é ɲán su ye dan.—Ebre Mun 12:5-11.

23. ?Ngue ti yɛ ɔ fataman kɛ e se e wun kɛ, e liɛ’n, Zoova su siman e aunnvɔɛ le-ɔ? ?Yɛ ngue ti yɛ ɔ fata kɛ e yaci e wiengu’m be sa tɛ’n cɛ be kɛ Zoova fa yo’n sa-ɔ?

²³ Kɛ e si kɛ e Ɲanmiɛn’n ‘yaci sa cɛ’n,’ i sɔ’n fɔnvɔ e dan. Kannzɛ sa nga e yoli’n ɔ ti tɛ sɛ’n, sanngɛ nán maan e se e wun kɛ, e liɛ’n, Zoova su siman e aunnvɔɛ le. Sɛ sakpasakpa naan sa tɛ nga e yoli’n, ɔ yo e nsisɔ naan e fa ajalɛ ng’ɔ ti su’n, naan e jran e ti kpɔlɛ tɛ mɔ Zezi yili’n su e srɛ Zoova’n, e kwla lafi su kpa kɛ ɔ́ yáci cɛ́ e weiin. (1 Zan 1:9) Asa kusu’n, maan e nian Zoova i sran aunnvɔɛ silɛ’n su e yo sɔ wie. ?Afin sɛ Zoova bɔbɔ m’ɔ fɔnman le’n, ɔ yaci e wun sa cɛ e’n, ɔ fataman kɛ e mɔ e fɔn’n, e yaci e wiengu’m be sa tɛ’n cɛ be wie?