1-3. (a) David okwa li u uvite a humbata omutenge omudhigu guni, noshike sha li she mu hekeleke? (b) Omutenge guni tashi vulika tu humbate ngele twa yono, ihe Jehova okwe tu shilipalekela shike?

DAVID okwa nyola a ti: “Otandi sile meyelu lyoondjo dhandje; odho omutenge omudhigu okuhumbata. Onda dhengwa, nda pwa po thilu.” (Episalomi 38:4, 8) David okwa li e shi kutya ohashi kala omutenge omudhigu ngele eiyuvo lyoye tali ku nyenyetele. Ihe okwa li a mono ehekeleko sho e li muupyakadhi. Okwe shi mono kutya nonando Jehova oku tonde aayoni, iha kala e ya tonde ngele oyi iyele lela ombedhi e taye etha oondjila dhawo dha puka. Molwaashoka David okwa li e shi kutya Jehova oha sile ohenda mboka tayi iyele ombedhi, okwa nyola a ti: ‘OMUWA oho tu dhimine po.’—Episalomi 86:5.

² Uuna twa yona ohatu kala wo twa dhengwa pevi molwaashoka eiyuvo lyetu ohali tu nyenyetele. Oshi li nawa okukala tu uvite ngaaka. Otashi ke tu inyengitha tu opaleke omapuko getu. Ihe osha nika oshiponga ngele eiyuvo lyetu ohali kala tali tu nyenyetele aluhe. Otashi vulika tu kale tatu ipe uusama kutya Jehova ite ke tu dhimina po nonando otwi iyele ombedhi. Ngele otwa ‘thindilwa pevi’ keyono lyetu, Satana ota vulu oku tu ningitha tu kale tu uvite kutya Jehova ine tu yalula noinatu gwana oku mu longela.—2 Aakorinto 2:5-11.

³ Mbela Jehova osho he tu tala ko ngawo? Hasho nando. Ohe tu dhimine po omolwohole ye onene. Okwe tu shilipaleka mOohapu dhe kutya ote tu dhimine po uuna tatu iyele ombedhi shili. (Omayeletumbulo 28:13) Opo twaaha kale tatu ipula kutya Jehova ite ke tu dhimina po natu konakoneni kutya omolwashike he tu dhimine po nohe shi ningi ngiini.

4. Jehova ohe tu tala ko ngiini, nosha nwetha mo ngiini omukalo moka hu ungaunga natse?

⁴ Jehova oku shi omangambeko getu. Episalomi 103:14 otali ti: “Okwa tseya kutya otwa shitwa nashike; oku shi shi kutya otse ontsi yevi.” Iha dhimbwa kutya tse ontsi yevi, ohatu ningi omapuko notu na omaunkundi. Uutumbulilo kutya “okwa tseya kutya otwa shitwa nashike,” otawu tu dhimbulukitha kutya Ombiimbeli otayi faathanitha Jehova nomuhongi gwiiyuma, notayi tu faathanitha neloya. * (Jeremia 18:2-6) E li Omuhongi gwiiyuma omunene ohu ungaunga natse nawa omolwokwaahagwanenena kwetu, noha tala nkene hatu inyenge kewiliko lye.

5. Embo lyAaroma otali yelitha ngiini oonkondo dhuulunde?

⁵ Jehova oku shi kutya uulunde owu na oonkondo. Oohapu dhe otadhi popi kutya uulunde ohawu eta eso. Mbela uulunde owu na oonkondo dhi thike peni? Omuyapostoli Paulus okwa yelitha mAaroma a ti: Otu li “kohi yoonkondo dhuulunde,” ngaashi aakwiita ye li kohi yondjayi yawo yiita (Aaroma 3:9); uulunde owa kala ‘nokupangela’ aantu ngaashi omukwaniilwa (Aaroma 5:21); owa “kala” mutse (Aaroma 7:17, 20); ihe “ompango” yawo otayi tsikile nokulonga mutse notayi kambadhala oku tu pangela aluhe. (Aaroma 7:23, 25) Uulunde kawu na tuu oonkondo okupangela onyama yetu!—Aaroma 7:21, 24.

6, 7. (a) Jehova oha tala ko ngiini mboka yi iyela ombedhi notaye mu indile e ya sile ohenda? (b) Nonando Kalunga omunahenda omolwashike kaatu na okuyonena owina?

⁶ Jehova oku shi kutya itatu ka vulika kuye thiluthilu molwaashoka inatu gwanenena kutya nduno otu kambadhale shi thike peni. Okwe tu shilipaleka pahole kutya ngele otatu mu indile nomutima aguhe ote tu sile ohenda note ke tu dhimina po. Episalomi 51:17 otali ti: “Kalunga, ombepo yi ishonopeka  oyo eyambo lyandje, omutima gwi itedhulula ito gu ekelehi.” Ite ke ekelahi nenge a pilamene omutima ngoka gwi ‘ishonopeka nogwi itedhulula’ omolwomayono ngoka gwa ninga.

⁷ Mbela sho Kalunga he tu dhimine po omolwokwaahagwanenena kwetu, otu na okukala hatu yonene owina? Aawe. Jehova iha wilikwa komaiyuvo gowala. Ohenda ye oya ngambekwa. Ita ka dhimina po mboka haya yonene owina nopwaahe na okwiiyela ombedhi. (Aahebeli 10:26) Ihe oha dhimine po mboka tayi iyele ombedhi shili. Ngashingeyi natu tale omautumbulilo gamwe ngoka Ombiimbeli ya longitha okuhokolola uukwatya we uukumithi wohole.

8. Jehova oha ningi shike noondjo dhetu ngele e tu dhimine po, notashi tu pe einekelo lyashike?

⁸ David ngoka a li iyele ombedhi okwa ti: ‘Onde ku hempululile oondjo dhandje; inandi holeka omayono gandje nowa dhimi po oondjo dhandje adhihe.’ (Episalomi 32:5) Uutumbulilo wOshihebeli wa tolokwa ‘okudhimina po’ otawu ti lelalela “okukutha po” nenge “okuhumbata po.” Movelise ndjika otawu ulike ‘kokukutha po oondjo nenge eyono.’ Onkee ano, Jehova okwa li a humbata po omayono nenge oondjo dhaDavid noku dhi ekelahi. Naashika osha li sha ningitha David a kale a pepelelwa. (Episalomi 32:3) Otatu vulu okukala neinekelo lya kola kutya Kalunga oha kutha po oondjo dhaamboka taya kongo edhiminopo omolweitaalo lyawo mekuliloyambo lyaJesus.—Mateus 20:28.

9. Jehova oha kaleke omayono getu kokule natse shi thike peni?

⁹ David okwa li a longitha omupopyo gwa mwenyopala u ulike nkene Jehova ha dhimine po a ti: ‘Ngaashi uuzilo wu li kokule nuuninginino, osho ta kaleke kokule oondjo dhetu.’ (Episalomi 103:12) Uuzilo owu li kokule nuuninginino shi thike peni? Osha yela kutya uuzilo owu lyaathane aluhe kokulekule nuuninginino, noombinga ndhoka mbali kadhi na siku dhi tsakanene. Omulongwantu gumwe okwa ti kutya uutumbulilo mbuka otawu ti “kokulekule ngaashi tashi vulika.” Oohapu  dhaDavid dha nwethwa mo otadhi tu lombwele kutya ngele Jehova te tu dhimine po oha kaleke omayono getu kokulekule natse ngaashi tashi vulika.

10. Omolwashike kaatu na okukala tu uvite kutya otu na ontongo yuulunde monkalamwenyo yetu ayihe ngele Jehova okwe tu dhimina po?

¹⁰ Mbela owa yelekela nale okukutha po ontongo konguwo ontokele? Otashi vulika yi tindile po nonando owu kambadhale ngaashi to vulu wu yi kuthe po. Tala sho Jehova ta hokolola nkene ha dhimine po ta ti: ‘Oondjo dheni nando nadhi kale dha tiligana mbyu, otadhi ka toka dha fa [olumi, NW]; nonando nadhi kale dha tiliganenena, otadhi yela dha fa omafufu omatokele goonzi.’ (Jesaja 1:18) ‘Uutiligane’ otawu ulike kolwaala olutiligane mbyu. Itatu vulu nando okukutha po kutse yene ontongo yuulunde wetu ndjoka ontiligane oku shi popya pathaneko. Ihe Jehova ota vulu okukutha po omayono ngoka omatiligane mbyu noku ga ninga omatokele ngaashi olumi nenge omafufu omatokele goonzi inaaga  fumikwa. Ano ngele Jehova te tu dhimine po omayono getu, inatu pumbwa okukala tu uvite kutya otwa humbata ontongo yuulunde mboka monkalamwenyo yetu ayihe.

11. Omeityo lini Jehova hu umbile oondjo dhetu konima ye?

¹¹ Hesekiel okwa li a lombwele Jehova meimbilo lyolupandu tali inyengitha omutima ndyoka a toto po konima sho a hupithwa komukithi omudhipagi a ti: ‘Oondjo dhandje adhihe ongoye we dhi umbile konima yoye.’ (Jesaja 38:17) Mpaka Jehova ota popiwa ta kutha po oondjo dhaangoka i iyela ombedhi noku dhi umbila konima Ye kokulekule hoka itaa vulu oku dhi mona we. Embo limwe lyomauyelele olya ti kutya edhiladhilo ndyoka otali vulu okupopiwa ngeyi: “Owa ningitha [omayono gandje]” ga kale ga fa inaaga ningwa.” Oohapu ndhoka itadhi hekeleke tuu!

12. Ongiini omupolofeti Mika u ulika kutya ngele Jehova te tu dhimine po, oha kuthilile po omayono getu?

¹² Sho omupolofeti Mika a li a hunganeke shi na ko nasha netungululo, okwa li a popi tu ulike kutya okwa tompwa kutya Jehova ota ka dhimina po oshigwana she shi iyela ombedhi, sho a ti: ‘Kaku na Kalunga kalwe e ku fa, ta dhimi po omayono gaantu ye mboka ya hupu po e to gu umbile kondandelo yefuta.’ (Mika 7:18, 19) Dhiladhila kutya oohapu ndhoka odha li tadhi ti shike kaantu mboka ya li ko pethimbo lyOmbiimbeli. Mbela opwa li ngaa pu na ompito yokugalula oshinima shoka shu umbilwa “kondandelo yefuta”? Oohapu dhaMika otadhi ulike kutya ngele Jehova e tu dhimine po oha kuthilile po omayono getu.

13. Uutumbulilo “dhima po oondjo dhetu” otawu ti ngiini?

¹³ Opo Jesus u ulike nkene Jehova he tu dhimine po, okwa longitha omautumbulilo ngoka taga yelekanitha omuyoni nomuntu ngoka a lya oongunga, omanga Jehova ta yelekanithwa naangoka a lilwa oongunga. Jesus okwe tu ladhipika tu kale hatu galikana tatu ti: ‘Dhima po oondjo dhetu.’ (Mateus 6:12) Okwa li a yelekanitha oondjo noongunga. (Lukas 11:4) Ngele otwa yono, ohatu ningi aanangunga kuJehova. Shi na ko nasha neityo lyoshityalonga shOshigreka shoka sha tolokwa  “dhima po,” embo limwe lyomauyelele otali ti: “Okweetha okupula oongunga komuntu ngoka e dhi ku lila.” Ngele Jehova e tu dhimine po, iha kala we a hala tu futile po oondjo ndhoka e tu dhimina po. Itashi hekeleke tuu mboka yi iyela ombedhi okuuva kutya Jehova ite ke ya futitha oondjo ndhoka e ya dhimina po!—Episalomi 32:1, 2.

14. Uutumbulilo ‘dhima po oondjo dhetu’ otawu gandja ethano lini?

¹⁴ Iilonga 3:19 otayi popi natango nkene Jehova ha dhimine po tayi ti: ‘Onkee ano itedhululeni, ne mu galukile kuKalunga, opo a dhime po oondjo dheni.’ Uutumbulilo ‘dhima po’ otawu toloka oshityalonga shOshigreka shoka tashi vulu okutolokwa “okutheta po . . . nenge okuhanagula po.” Aalongwantu yamwe otaya ti kutya uutumbulilo mboka otawu faathanithwa nokudhima po shoka sha nyolwa komuntu gulwe. Ongiini shika sha li tashi vulika? Ohinga ndjoka ya li hayi longithwa unene pethimbo lyonale oya li ya longwa muusila womaka, wa vundakanithwa mumwe nonka nomeya. Nziya konima ngele omuntu a nyola nohinga ndjoka okwa li ha vulu okututika efulafula nokudhima po shoka a nyola. Shoka otashi thaneke nawa ohenda yaJehova. Ngele ta dhimi po oondjo dhetu osha fa owala ta kutha efulafula noku dhi dhima po.

15. Jehova okwa hala tu tseye shike kombinga ye?

¹⁵ Sho tatu dhiladhila komathaneko agehe ngoka, mbela inashi tu yelela kutya Jehova okwa hala tu tseye kutya okwi ilongekidha okudhima po omayono getu, shampa owala twi iyele ombedhi shili? Inatu pumbwa okukala twa tila kutya ote ke tu galulila omayono getu monakuyiwa. Ombiimbeli otayi popi natango oshinima shilwe kombinga yohenda onene yaJehova tayi ti: Ngele e tu dhimine po oondjo dhetu, ohe dhi dhimbwa.

16, 17. Ombiimbeli oya hala okutya ngiini sho tayi ti kutya Jehova oha dhimbwa omayono getu, nomolwashike to tile ngawo?

¹⁶ Jehova oku uvanekela mboka ye li mehangano epe a ti:  “Otandi dhimi po omayono gawo, nuulunde wawo itandi wu dhimbulukwa we.” (Jeremia 31:34) Ihe mbela shika otashi ti kutya ngele e tu dhimine po omayono getu, iha vulu we okuga dhimbulukwa? Aawe. Ombiimbeli otayi tu lombwele omayono goohandimwe oyendji mboka Jehova a dhimina po, mwa kwatelwa David. (2 Samuel 11:1-17; 12:13) Osha yela kutya Jehova omapuko gawo okuga shi natango. Omahokolo ge na ko nasha nomayono gawo, okwiiyela ombedhi kwawo nokudhimimwa po kwawo kuKalunga okwa nyolwa omolwuuwanawa wetu. (Aaroma 15:4) Ihe mbela Ombiimbeli oya hala okutya ngiini sho tayi ti kutya Jehova iha “dhimbulukwa we” omayono gaamboka a dhimina po?

 ¹⁷ Oshityalonga shOshihebeli sha tolokwa “itandi u dhimbulukwa we” otashi ti oshindji kaashi shi owala okudhimbulukwa iinima ya pita. O-Theological Wordbook of the Old Testament oya ti kutya oshityalonga shoka osha kwatela mo wo “eityo lya gwedhwa po lyokukatuka onkatu yu uka.” Onkee ano, ‘okudhimbulukwa’ omayono osha kwatela mo okukatukila aayoni oonkatu. (Hosea 9:9) Ihe sho Kalunga a ti kutya ‘uulunde wawo itandi wu dhimbulukwa we,’ ote tu shilipaleke kutya ngele a dhimine po mboka yi iyela ombedhi, ite ke ya geela we monakuyiwa omolweyono ndyoka. (Hesekiel 18:21, 22) Jehova oha dhimbwa meityo lyokutya ihe tu pangula iikando niikando nenge e tu geele ishewe omolwalyo. Mbela itashi hekeleke okutseya kutya Kalunga ketu ohe tu dhimine po omayono nokuga dhimbwa?

18. Omolwashike okudhiminwa po kuJehova itaashi ti kutya omuyoni okwa gamenwa kiilanduliko ayihe?

¹⁸ Mbela sho Jehova ha dhimine po osha hala kutya aayoni itaya ka adhika kiilanduliko yasha omolwomayono gawo? Aawe. Ngele otwa yono natu kale twa tegelela iilanduliko. Paulus okwa nyola a ti: “Shono omuntu te shi kunu, osho wo ta ka teya.” (Aagalati 6:7) Otashi vulika tu mone iilanduli omolwoonkatu dhetu. Ihe shika itashi ti kutya Jehova oye te tu etele omaupyakadhi ngoka. Omukriste ke na okukala e uvite kutya ‘Kalunga oye te mu makele omolwomayono gonale’ ngele e li muudhigu. (Jakob 1:13) Ihe nando ongaaka, Jehova ihe tu gamene kiilanduliko ayihe omolwomayono getu. Otatu vulu okwaadhika kiilanduliko yiyemateka, ngaashi okuteya ondjokana, etegelelo inaali halika, okukwatwa komikithi ndhoka hadhi taandele pamilalo, okwaainekelwa nokwaasimanekwa kuyamwe. Dhimbulukwa kutya nonando Jehova okwa li a dhimine po David sho a yono naBatseba naasho a dhipagitha Urija, David okwa li a mono iilanduli konima yethimbo.—2 Samuel 12:9-12.

19-21. (a) Ompango ndjoka yi li muLevitikus 6:1-7 oya li ye etele ngiini uuwanawa nakuyona nosho wo omuyoni? (b) Ngele otwa yona nokweehameka yalwe, Jehova ota ka kala a nyanyukwa uuna tatu katuka onkatu yini?

 ¹⁹ Omayono getu otaga vulu oku tu etela iilanduliko ya gwedhwa po ngele yamwe oye ehamekwa kwaashoka twa ninga. Pashiholelwa, tala ehokololo ndyoka li li muLevitikus ontopolwa 6. Ompango yaMoses montopolwa moka otayi popi omuntu ngoka a yona sha kwata miiti mokuyuga Omuisraeli omukwawo nomoku mu kengelela, ihe ote shi ikala thiluthilu tashi vulika ta gana nokuli. Ngele kapu na uunzapo washa aantu mboka otashi vulika ya kale taya tsu oompata. Ihe konima yethimbo, omuyoni eiyuvo lye otali mu nyenyetele e ta zimine ondjo ye. Opo Kalunga e mu dhimine po oku na okuninga iinima itatu: okushunitha shoka a yuga mukwawo, okufuta ngoka a ninga nayi ofuto yoopelesenda 20 yaashoka a kutha po nokuyamba onzi ondumentu yi li eyonondjambo. Ompango otayi ti ishewe: “Omuyambi ota yamba omolweyono lyomuntu ngoka, oye nota dhiminwa po.”—Levitikus 6:1-7.

²⁰ Ompango ndjoka oya li esiloshimpwiyu lyaKalunga lyopahole. Nakuyonenwa okwa li ha mono uuwanawa molwaashoka oha galulilwa iinima ye nokwa li ha kala a pepelelwa shili ngele omuyoni a zimine eyono ndyoka a ninga. Pethimbo opo tuu mpoka ngoka a zimine epuko lye omolweiyuvo lye ndyoka tali mu nyenyetele nokuninga omalunduluko, oha mono wo uuwanawa omolwompango ndjoka. Ngele okwa tindi okwiiyela ombedhi, Kalunga ite ke mu dhimina po.

²¹ Nonando katu li kohi yOmpango yaMoses, otayi tu kwathele tu mone nkene Kalunga ha dhiladhila nonkene ha dhimine po. (Aakolossa 2:13, 14) Ngele otwa yematitha yamwe, Kalunga ota ka kala a nyanyukwa ngele tatu ningi shoka tatu vulu tu pongolole po uupyakadhi. (Mateus 5:23, 24) Shika otashi vulika shi kale sha kwatela mo okuzimina kutya otu na ondjo, tu itaale epuko lyetu nokugandja ombili kungoka twa yona kuye. Otatu vulu okupula Jehova e tu dhimine po omolwekuliloyambo lyaJesus, nokungawo otatu ka kala tu na eiyuvo  lya yela kutya Kalunga oha dhimine po.—Aahebeli 10:21, 22.

22. Egeeloputudho lyaJehova ohashi vulika li kale lya kwatela mo shike?

²² Ngaashi omuvali kehe omunahole, Jehova otashi vulika e tu dhimine po, ihe ohe tu pe egeeloputudho lye eleka. (Omayeletumbulo 3:11, 12) Omukriste ngoka i iyela ombedhi otashi vulika a kuthwe uukuluntugongalo, uuyakuligongalo nenge uukokolindjila. Otashi vulika shi mu ehameke sho ta kanitha uuthembahenda mboka uule wethimbo. Ihe egeeloputudho ndyoka itali ti kutya Jehova ine mu dhimina po. Otu na okudhimbulukwa kutya egeeloputudho okuza kuJehova oli li euliko kutya oku tu hole. Ngele tatu li taamba ko noku li tula miilonga otatu ka mona uuwanawa.—Aahebeli 12:5-11.

23. Omolwashike kaatu na okudhiladhila nando kutya Jehova ite ke tu dhimina po, nomolwashike tu na okudhimina po ngaashi ye?

²³ Itashi hekeleke tuu okutseya kutya Kalunga ketu oha “dhimine po”! Nonando otwa ninga omapuko, inatu dhiladhila nando kutya Jehova ite ke tu dhimina po. Otatu vulu okukala neinekelo lya kola kutya Jehova ote ke tu dhimina po ngele otwi iyele ombedhi shili, nokukatuka onkatu tu pukulule omapuko getu e tatu galikana tu dhiminwe po omolwombinzi yaJesus ndjoka ya tika. (1 Johannes 1:9) Natu kale hatu dhimine po yalwe ngaashi Jehova he tu dhimine po. Ngele Jehova ngoka ihaa yono kutse ohe tu dhimine po, mbela katu na okuninga oonkambadhala okudhimina po yalwe?