1-3. (a) Wanem hevi lod nao David hem karem, and hao nao heart bilong hem wea feel nogud hem kasem comfort? (b) Taem iumi sin, wanem hevi nao maet iumi karem, bat Jehovah promisim iumi wanem?

 DAVID sei long wanfala psalm: “Olketa rong bilong mi hem staka tumas nao for mi; olsem wanfala hevi lod olketa hevi tumas for mi karem. Mi no feelim eni samting nao and hem olsem mi pisis evribit.” (Psalm 38:4, 8) David savve hao wanfala guilty conscience hem hevi tumas. Bat hem kasem comfort for heart bilong hem wea feel nogud. Hem minim hao nomata Jehovah heitim sin, Hem no heitim man wea duim sin sapos datfala man hem barava repent and rejectim wei wea hem sin. David garem full trust long wei wea Jehovah willing for showimaot mercy long olketa wea repent taem hem sei: “Iu, O Jehovah, nao . . . redy for forgive.”​—Psalm 86:5.

² Taem iumi sin, iumi tu maet karem hevi from conscience hem feel nogud tumas. Kaen feeling olsem savve helpem iumi. Datwan savve muvim iumi for duim samting for stretem olketa rong bilong iumi. Nomata olsem, danger hem stap nogud datfala guilty feeling hem winim iumi. Heart bilong iumi wea judgem iumi long nogud wei maet ting Jehovah bae no forgivim iumi, nomata iumi barava repent. Sapos guilty feeling bilong iumi mekem iumi feel ‘wikdaon from iumi sorre tumas,’ Satan maet trae for mekem iumi givap, for tingse iumi iusles long eye bilong Jehovah, and no fit for servem hem.​—2 Corinthians 2:5-11.

³ Waswe, datwan nao tingting bilong Jehovah? Barava nomoa nao! Forgiveness hem wanfala part long bigfala love bilong Jehovah. Long Bible, hem promisim iumi dat sapos iumi showimaot trufala wei for repent wea kam from heart, hem willing for forgive. (Proverbs 28:13) From maet luk olsem forgiveness  bilong Jehovah hem hard tumas for iumi kasem, bae iumi lukluk long why and hao hem forgive.

4. Jehovah rememberim wanem samting abaotem iumi, and hao nao diswan affectim wei wea hem deal witim iumi?

⁴ Jehovah hem savve long olketa samting iumi no savve duim. Psalm 103:14 sei: “Hem savve gud hao hem wakem iumi, hem tingim hao iumi dust.” Hem no forgetim dat iumi kam from dust, and iumi garem wik point from iumi no perfect. Datfala toktok “hao hem wakem iumi” mekem iumi tingim wei wea Bible sei Jehovah hem olsem man for waka witim clay and iumi olsem olketa clay pot wea hem wakem. (Jeremiah 18:2-6) Datfala Nambawan Man for Waka Witim Clay hem changem wei for deal witim iumi fitim wei wea iumi wiki from sin and wei wea iumi followim or no followim instruction from hem.

5. Hao nao buk bilong Romans story abaotem strongfala paoa bilong sin?

⁵ Jehovah minim wei wea sin garem bigfala paoa. Word bilong hem story abaotem sin olsem wanfala strongfala paoa wea barava kasholem man. Hao strong nao paoa bilong sin? Long buk bilong Romans, aposol Paul explainim olsem: Iumi “evriwan sin [or anda long sin],” olsem olketa soldia wea anda long komanda (Romans 3:9); sin hem “rul olsem” king ovarem olketa man (Romans 5:21); hem “stap” insaed long iumi (Romans 7:17, 20); olketa “law” bilong hem go ahed for waka insaed long iumi, wea minim olketa trae for kontrolem gogo bilong iumi. (Romans 7: 23, 25) Sin garem barava strong paoa ovarem body bilong iumi wea no perfect!​—Romans 7: 21, 24.

6, 7. (a) Hao nao Jehovah ting long olketa wea ask for kasem mercy bilong hem witim heart wea repent? (b) Why nao iumi shud no just expectim mercy bilong God?

⁶ So, Jehovah savve iumi no fit for obey long perfect wei, nomata iumi laek tumas for obeyim hem olsem. Long loving wei hem promisim iumi dat taem iumi askem hem for showimaot mercy witim heart wea repent, bae hem forgivim iumi.  Psalm 51:17 sei: “Olketa sakrifaes wea mekem God hapi hem kam from man wea sorre tumas and wea heart bilong hem brek and pisis, O God, iu bae no rejectim.” Jehovah bae nating rejectim wanfala heart wea “brek and pisis” bikos long wei wea guilty feeling mekem iumi hevi.

⁷ Waswe, diswan minim iumi shud just expectim mercy bilong God and iusim wei wea iumi sin olsem wanfala excuse for duim rong samting? Nomoa nao! Jehovah no letem feeling nomoa for leadim hem. Mercy bilong hem garem spialaen. Hem bae no forgivim olketa wea go ahed strong for min for duim sin, and no showimaot wei for repent. (Hebrews 10:26) Long narasaed, taem hem lukim heart wea repent, hem redy for forgive. Distaem bae iumi lukluk long kliafala toktok wea Bible iusim for story abaotem disfala nambawan part bilong love bilong Jehovah.

8. Hem olsem Jehovah duim wanem samting taem hem forgivim olketa sin bilong iumi, and diswan mekem iumi sure long wanem samting?

⁸ Taem hem repent David sei: “Gogo mi talemaot sin bilong mi long iu, and mi no haedem rong bilong mi. . . . And iu nao forgivim olketa rong bilong sin bilong mi.” (Psalm 32:5) Datfala word “forgivim” hem kam from wanfala Hebrew word wea really minim “liftimap” or “karem.” Long hia hem minim for tekem awe “wei for guilty, sin, rong.” So hem olsem Jehovah liftimap olketa sin bilong David and karem olketa go. For sure diswan daonem olketa guilty feeling wea David hem karem. (Psalm 32:3) Iumi tu savve garem full trust long God for karem go olketa sin bilong olketa wea askem forgiveness bilong hem long faondeson bilong faith wea olketa garem long ransom sakrifaes bilong Jesus.​—Matthew 20:28.

9. Hao farawe nao Jehovah putim olketa sin bilong iumi?

⁹ David iusim nara klia toktok for story abaotem forgiveness bilong Jehovah: “Olsem wei wea sunrise hem farawe from sunset, olsem tu Hem putim olketa sin bilong iumi farawe from iumi.” (Psalm 103:12) Sun hem rise long east and hem set long  west. East hem hao farawe from west? Evritaem east hem opposite long west; tufala point hia no savve meet. Wanfala savveman sei disfala toktok minim “farawe evribit.” Toktok bilong David showim long iumi dat taem Jehovah forgive, hem putim olketa sin bilong iumi farawe evribit from iumi.

10. Taem Jehovah forgivim olketa sin bilong iumi, why nao iumi shud no ting iumi kasem mark bilong olketa sin olsem for full laef bilong iumi?

¹⁰ Waswe, enitaem iu trae for aotem wanfala mark from kaleko wea laet kala? Maet nomata iu traem best bilong iu, datfala mark hem stap. Lukim hao Jehovah storyim wei bilong hem for forgive: “Nomata olketa sin bilong iufala hem olsem braet red kala, olketa bae kamap white olsem snow. Nomata olketa barava red olsem dark red kaleko, olketa bae kamap white olsem wool.” (Isaiah 1:18) Disfala braet “red” kala wea Isaiah storyim, hem wanfala kala wea no savve aot. Datfala dark red kala olketa savve iusim for dyem kaleko. (Nahum 2:3) No eniting wea iumiseleva duim savve aotem mark bilong sin. Bat Jehovah savve mekem olketa sin wea olsem braet red kala and  dark red kala kamap white olsem snow or wool wea olketa no dyem. Taem Jehovah forgivim olketa sin bilong iumi, iumi mas no tingse iumi kasem mark bilong olketa sin hia for full laef bilong iumi.

11. Long wanem wei nao Jehovah torowem olketa sin bilong iumi bihaen long hem?

¹¹ Long wanfala singsing for sei thankiu wea Hezekiah raetem bihaen Jehovah sevem hem from wanfala nogud sik, hem sei long Jehovah: “Iu torowem evri sin bilong mi long [bihaen] baksaed bilong iu.” (Isaiah 38:17) Long hia hem storyim Jehovah olsem hem tekem olketa sin bilong man wea repent and hem torowem olketa bihaen long Hem and from datwan Hem no savve lukim or tingim olketa moa. Wanfala buk sei maet diswan hem minim: “Iu mekem [olketa sin bilong mi] olsem olketa nating happen.” Waswe, datwan hem comfortim iumi?

12. Hao nao toktok wea profet Micah talem showimaot taem Jehovah forgive, Hem aotem olketa sin bilong iumi for olowe?

¹² Long wanfala promis for fren moa witim pipol bilong hem wea repent, profet Micah talemaot hao hem biliv Jehovah bae forgivim olketa wea repent: “Waswe, eni God hem olsem iu, wea . . . no tingim rong bilong smol sekson wea hem onam? . . . Iu bae torowem evri sin bilong mifala go daon long deep sea.” (Micah 7:18, 19) Tingim wanem datwan minim for olketa long taem bilong Bible. Waswe, eni chance stap for kasem bak samting wea olketa torowem “insaed deep sea”? So, toktok bilong Micah showimaot taem Jehovah forgive, hem aotem olketa sin bilong iumi for olowe.

13. Wanem nao mining bilong toktok bilong Jesus for “forgivim olketa kaon bilong mifala”?

¹³ Jesus iusim tokpiksa abaotem samting wea happen midolwan long man wea givim kaon and man wea garem kaon for showimaot forgiveness bilong Jehovah. Jesus encouragem iumi for prea olsem: “Forgivim olketa kaon bilong mifala.” (Matthew 6:12) So, Jesus sei olketa sin olketa olsem kaon. (Luke 11:4) Taem iumi sin, iumi garem “kaon” long Jehovah. Wanfala buk sei mining bilong Greek word wea olketa transleitim “forgive” hem nao: “For let go, givim go, wanfala kaon  long wei for no demandim datwan.” Hem olsem, taem Jehovah forgive, hem rabemaot datfala kaon wea hem fit for raetem long account bilong iumi. So olketa sinner wea repent fit for kasem comfort. Jehovah bae nating demandim iumi for peim wanfala kaon wea hem rabemaot finis!​—Psalm 32:1, 2.

14. Datfala toktok “rabemaot sin bilong iufala” hem mekem man piksarem wanem samting?

¹⁴ Acts 3:19 storyim forgiveness bilong Jehovah long narafala wei: “So, iufala mas repent, and tan raon mekem hem [rabemaot] sin bilong iufala.” Datwan hem kam from wanfala Greek word wea savve minim “wipem aot, . . . or distroem.” Samfala savveman sei samting wea man piksarem long mind taem hem herem diswan nao hem wei for rabemaot handraeting. Hao nao diswan savve happen? Long bifor, olketa savve mixim carbon, gum and wata for kamap ink. Bihaen man iusim kaen ink olsem, hem savve tekem wanfala wet kaleko and rabemaot datfala raeting. Datwan hem nambawan piksa bilong mercy wea Jehovah showimaot. Taem hem forgivim olketa sin bilong iumi, hem olsem hem tekem wanfala kaleko and rabemaot olketa sin bilong iumi.

15. Jehovah wantem iumi for savve long wanem samting abaotem hem?

¹⁵ Taem iumi tingim olketa tokpiksa hia, waswe, hem klia hao Jehovah wantem iumi for savve hem really redy for forgivim olketa sin bilong iumi sapos hem luksavve iumi really repent? Iumi no need for fraet nogud hem bae iusim olketa sin hia for judgem iumi long future. Nara samting wea Bible showimaot saed long bigfala mercy bilong Jehovah hem disfala point: Taem hem forgive, hem forget.

16, 17. Taem Bible sei Jehovah forgetim olketa sin bilong iumi, wanem nao hem minim, and why nao iu ansa olsem?

¹⁶ Jehovah talem disfala promis for olketa wea insaed long niu covenant: “Mi bae forgivim rong samting wea olketa duim, and mi bae no tingim moa sin bilong olketa.” (Jeremiah 31:34) Waswe, diswan minim taem Jehovah forgive hem kanduit for rememberim moa olketa sin? Nomoa. Bible storyim olketa sin  bilong planti pipol wea Jehovah forgivim, olsem David. (2 Samuel 11:1-17; 12:13) Jehovah hem savve yet long olketa rong wea olketa duim. Record bilong olketa sin bilong olketa, and tu wei wea olketa repent and kasem forgiveness stap yet for helpem iumi. (Romans 15:4) So, wanem nao Bible minim taem hem sei Jehovah no “tingim” olketa sin bilong pipol wea hem forgivim?

¹⁷ Hebrew word wea olketa transleitim “Mi bae tingim moa” hem minim moa samting winim wei for tingim nomoa samting wea happen bifor. Datfala Theological Wordbook of the Old Testament hem sei hem minim tu “wei for tek akson wea fitim.” So long disfala wei, for “tingim moa” sin hem minim for tek akson againstim olketa wea duim rong samting. (Hosea 9:9) Bat taem God sei “mi bae no tingim moa sin bilong olketa,”  hem comfortim iumi dat taem hem forgivim olketa sinner wea repent, hem bae no iusim olketa sin hia for duim samting againstim olketa. (Ezekiel 18:21, 22) So, Jehovah forgetim olketa sin bilong iumi long wei wea hem bae no tingim moa olketa for accusim or panisim iumi evritaem for datwan. Waswe, iumi kasem comfort for savve dat God bilong iumi forgive and forget?

18. Why nao forgiveness hem no minim dat man wea repent bae no kasem eni nogud samting from datfala rong wea hem duim?

¹⁸ Waswe, wei wea Jehovah redy for forgive hem minim dat wanfala sinner wea repent hem no kasem eni nogud samting from rong samting wea hem duim? Nomoa. Iumi no savve duim samting wea rong and no kasem nogud samting. Paul hem raet olsem: “Eni samting [man] hem plantim, datwan nao bae hem harvestim.” (Galatians 6:7) Maet iumi mas feisim samfala samting wea kamaot from wanem iumi duim. Diswan no minim dat bihaen Jehovah forgivim iumi hem mekem trabol for kasem iumi. Taem trabol kamap, wanfala Christian shud no ting, ‘Maet Jehovah hem panisim mi for olketa sin wea mi duim bifor.’ (James 1:13) Long narasaed, Jehovah no blokem iumi from evriting wea kamaot from rong samting wea iumi duim. Divorce, babule nating, sik wea kamaot from dirty fasin, wei for lusim trust or respect​—evri samting hia maet sorre samting wea iumi kanduit missim wea kamaot from sin. Tingim hao bihaen hem forgivim David for olketa sin bilong hem saed long Bath-sheba and Uriah, Jehovah no protectim David from olketa nogud samting wea kamaot bihaen from datwan.​—2 Samuel 12:9-12.

19-21. (a) Hao nao Law wea stap long Leviticus 6:1-7 hem helpem man wea duim rong samting and datwan wea hem spoelem? (b) Sapos rong samting iumi duim hem spoelem nara pipol, Jehovah hem hapi taem iumi duim wanem samting?

¹⁹ Maet samfala samting moa kamaot from olketa rong wea iumi duim, especially sapos akson bilong iumi mekem nara pipol feel nogud. Olsem example, tingim samting wea stap long  Leviticus chapter 6. Long hia Law Bilong Moses hem deal witim wanfala man wea duim bigfala rong for tekem samting from narawan thru long wei for steal, laea, or raverave fasin. Then man hia wea sin denyim dat hem guilty, and no fraet for talem laea promis tu for sei hem tok tru. So diswan kamap olsem toktok bilong wanfala man againstim toktok bilong nara man. Bat bihaen, conscience bilong datwan wea duim rong samting hem feel nogud so hem konfesim sin bilong hem. For kasem forgiveness bilong God, hem mas duim thrifala samting moa: givim bak samting wea hem tekem, peim wanfala fine long datwan wea hem spoelem wea mas 20 percent bilong olketa samting wea hem stealim, and offerim wanfala man sheep olsem guilt offering. Then law hem sei: “Priest bae offerim [sakrifaes] front long Jehovah and man hia bae kasem forgiveness.”​—Leviticus 6:1-7.

²⁰ Disfala law hem arrangement bilong God for showimaot mercy. Hem helpem datwan wea safa for kasem bak samting wea lus and bae hem feel gud tumas taem man wea duim rong talemaot sin bilong hem. Long semtaem, law hem helpem datwan wea gogo conscience bilong hem muvim hem for talemaot wei wea hem guilty and stretem rong bilong hem. Tru nao, sapos hem no want for duim datwan, God bae no forgivim hem.

²¹ Nomata iumi no stap anda long Law Bilong Moses, datfala Law showim iumi samting abaotem tingting bilong Jehovah saed long forgiveness. (Colossians 2:13, 14) Sapos rong samting wea iumi duim hem mekem nara pipol feel nogud, God hem hapi taem iumi duim samting for stretem datfala rong. (Matthew 5:23, 24) Insaed diswan maet hem wei for agree iumi duim rong, for sei iumi guilty, and sei sorre tu long man wea iumi spoelem. Then iumi savve askem Jehovah long faondeson bilong sakrifaes bilong Jesus for forgivim iumi and feel sure dat God hem duim datwan.​—Hebrews 10:21, 22.

22. Wanem nao maet join witim forgiveness bilong Jehovah?

²² Olsem eni loving dadi, Jehovah maet showimaot forgiveness wea join witim discipline tu. (Proverbs 3:11, 12) Christian  wea repent maet need for lusim privilege bilong hem for serve olsem wanfala elder, ministerial servant, or man for talemaot gud nius full-taem. Maet hem feel sorre tumas bikos hem bae mas lusim olketa privilege wea spesol long hem. Nomata olsem, kaen discipline olsem no minim Jehovah hem holem bak forgiveness. Iumi mas remember dat discipline from Jehovah hem pruvim love bilong hem for iumi. Wei for acceptim and followim datwan bae barava helpem iumi.​—Hebrews 12:5-11.

23. Why nao iumi shud nating sei mercy bilong Jehovah no fitim iumi, and why nao iumi shud followim wei bilong hem for forgive?

²³ Hem helpem iumi for strong moa taem iumi savve hao God bilong iumi hem “redy for forgive”! Nomata iumi mekem olketa mistek, iumi mas nating ting Jehovah kanduit showimaot mercy long iumi. Sapos iumi really repent, duim samting for stretem datfala rong, and prea strong for forgiveness long faondeson bilong blood wea Jesus kapsaetem, iumi savve sure evribit Jehovah bae forgivim iumi. (1 John 1:9) Iumi shud followim wei bilong hem for forgive taem iumi deal witim each other. Tru nao, from Jehovah, wea nating sin, savve forgivim iumi long loving wei, waswe, fitim iumi wea sin for duim best bilong iumi for forgivim narawan?