1-3. (a) Nengo kungba wa ayeke lani na ndogo ti wasungo psaume David? Tongana nyen bê ti lo so ayeke na vundu awara dengo bê? (b) Tongana e sala siokpari, ye nyen alingbi ti ne na ndo e? Me Jéhovah adë bê ti e na ndo ye wa?

WASUNGO psaume David atene: “Sioye ti mbi ahon ndo ti mbi awe; a ne tongana kungba so ahon ndo ti mbi. Ngangu ti mbi awe, tele ti mbi amboko mingi.” (Psaume 38:4, 8). David ahinga lani tongana nyen mbeni ye ti sioni so zo asala alingbi ti ne na ndo ti lo. Me bê ti lo so agi lo awara dengo bê, teti lo hinga so, atâa so Jéhovah ake siokpari, lo ke zo ti siokpari pëpe tongana lo gbian biani bê ti lo na lo zia sioni lege ti lo. Na ziango bê kue na dutingo ndulu ti Jéhovah ti sala be-nzoni na azo so agbian bê ti ala, David atene: “Seigneur, . . . Mo ye [wala, mo yeke ndulu] ti pardone.”—Psaume 86:5.

² Tongana e sala siokpari, yingo-ti-hinga ti e so ayeke na vundu alingbi ti ne nga na ndo ti e ngangu. Bibe ti vundu so ayeke nzoni mingi, teti alingbi ti pusu e ti sala aye so a hunda ti leke na sioni so e sala. Me, sioni ni ayeke so e lingbi ti bâ so tënë ayeke na li ti e ahon ndo ni. Bê ti e so afâ ngbanga na li ti e alingbi peut-être ti gue na e ti tene so Jéhovah ayeke pardone ande e lâ oko pëpe, atâa e gbian bê ti e tongana nyen. Tongana e zia si sioni ti e “ahon ndo” ti e, Satan alingbi ti sala si e zia lege ni, na ti tene so Jéhovah ayeke bâ e na nene ni pëpe, nga so e kpa zo ti sala na lo pëpe.—2 aCorinthien 2:5-11.

³ A yeke tongaso si Jéhovah ayeke bâ na e? Oko pëpe! Pardon ayeke mbeni mbage ti kota ndoye ti Jéhovah. Na yâ Tënë ti lo, lo dë bê ti e so tongana e fa tâ gbiango bê, lo yeke ndulu ti pardone e (aProverbe 28:13). Ti tene e tene pëpe so  Jéhovah alingbi ti pardone e lâ oko pëpe, zia e bâ ngbanga ti nyen nga tongana nyen lo yeke pardone zo.

4. Na ndo tele ti e, Jéhovah ayeke dabe ti lo na ye wa? Ye so andu salango ye ti lo na mbage ti e tongana nyen?

⁴ Jéhovah ahinga akatikati ti e. Psaume 103:14 atene: “Lo hinga tele ti e, Lo dabe Lo na lege so e yeke pupu-sese.” Lo girisa pëpe so a leke e na pupu-sese, wala so e yeke na awokongo, ngbanga ti so e yeke mbilimbili-kue pëpe. Tënë lo hinga “tele ti e” adabe e so Bible ahaka Jéhovah na mbeni zo ti lekengo ta, nga e na ata ti sese so zo ni aleke (Jérémie 18:2-6). * Kota Zo ti lekengo ta ayeke sala ye na e alingbi na wokongo ti e nga na salango ye ti e na gbele fango lege ti lo, wala e yeda wala e yeda na ni pëpe.

5. Tongana nyen buku ti aRomain afa ngangu ti siokpari?

⁵ Jéhovah ahinga ngangu so siokpari alingbi ti duti na ni. Tënë ti lo afa siokpari tongana mbeni kota ngangu so agbu zo na yâ tïtî lo, so kuâ ayeke na yâ ni. Tïtî lo ni ayeke ngangu tongana nyen? Na yâ buku ti aRomain, bazengele Paul afa nda ni tongaso: E yeke na “gbe ti siokpari”, tongana ti so aturugu ayeke na gbe ti mokonzi ti ala (aRomain 3:9); siokpari “akomande” na ndo zo tongana mbeni gbia (aRomain 5:21); lo ‘duti’ na yâ e (aRomain 7:17, 20); “ndia” ti lo ayeke sala lakue kua na yâ e, ti fa lege na salango ye ti e (aRomain 7:23, 25). So tâ kota ngangu si siokpari ayeke na ni na ndo mitele ti e so ayeke mbilimbili-kue pëpe!—aRomain 7:21, 24.

6, 7. (a) Tongana nyen Jéhovah ayeke bâ azo so ayeke gi be-nzoni ti lo na bê so ayeke na vundu? (b) Ngbanga ti nyen a lingbi e sala ye ti bê ti e pëpe na be-nzoni ti Nzapa?

⁶ Tongaso, Jéhovah ahinga so e lingbi ti mä yanga ti lo na yâ ye kue pëpe, atâa nzara ti e ti sala ni ayeke tongana nyen. Na ndoye, lo dë bê ti e so tongana e gi be-nzoni ti lo na bê  so ayeke na vundu, lo yeke pardone e. Psaume 51:17 atene: “Sacrifice so Nzapa aye ayeke yingo so awoko. O Nzapa, bê so afâ awe na ayeke na vundu, Mo ke pëpe.” Jéhovah ayeke ke lâ oko pëpe “bê so afâ awe na [so] ayeke na vundu” ndali ti sioni so zo asala.

⁷ Me tënë so aye ti tene so e lingbi ti sala ye ti bê ti e na be-nzoni ti Nzapa, na mungo dutingo ti e ti zo so ayeke mbilimbili-kue pëpe ti sala na siokpari? Oko pëpe! Asenge tënë ti bê ti Jéhovah ayeke sala ngangu na ndo lo pëpe. Be-nzoni ti lo ayeke na katikati ni. Ala so bê ti ala amu kue na asala siokpari na mbana si agbian bê ti ala pëpe, Jéhovah ayeke pardone ala oko pëpe (aHébreu 10:26). Me tongana lo bâ mbeni bê so ayeke na vundu, lo yeke ndulu ti pardone ni. Fadeso, zia e bâ ambeni tënë so Bible amû ti fa na pendere lengo ti ndoye ti Jéhovah so.

8. Tongana Jéhovah apardone siokpari ti e, lo yeke sala nyen biani? Ye so amû na e beku wa?

⁸ David so agbian bê ti lo atene: ‘Mbi fa siokpari ti mbi na Mo, na mbi honde sioni ti mbi pëpe. Na Mo pardone ngbanga ti siokpari ti mbi.’ (Psaume 32:5). Tënë “pardone” akiri peko ti mbeni tënë na yanga ti Hébreu so aye mbilimbili ti tene “ti yô” wala “ti gue na ni”. Na yâ versê so, a ye ti tene ti mû “siokpari, kengo ndia” na ti gue na ni. Tongaso, Jéhovah ayô siokpari ti David, na lo gue na ni yongoro. Ye so ayapu biani David ndali ti asioni so ane na ndo lo (Psaume 32:3). E nga kue e lingbi ti zia bê ti e kue na Nzapa so ayeke mû asiokpari ti azo ague na ni yongoro, tongana ala gi ti wara pardon ti lo na dutingo na mabe na yâ sandaga ti kota ngele ti Jésus.—Matthieu 20:28.

9. Jéhovah ayeke zia siokpari ti e yongoro na e tongana nyen?

⁹ David asala nga kusala na mbeni pendere tënë nde ti fa na pardon ti Jéhovah: ‘Legeoko tongana est [tö] ayeke yongoro na ouest [do], tongaso, Lo lungula kengo-ndia ti e, na Lo zia  yongoro.’ (Psaume 103:12). Tö ayo na do tongana nyen? Na lege so, tö ayo tâ mingi na do; ambage use so alingbi ti tingbi tele lâ oko pëpe. Mbeni wandara afa so tënë so aye ti tene “ayo mingi mingi ahon ti so e lingbi ti bi bê dä”. Atënë ti David so lo sû na gbe ti yingo so aye ti tene na e so tongana Jéhovah apardone zo, lo yeke mû siokpari ni lo gue na ni yongoro ahon ti so e lingbi ti bi bê dä.

10. Tongana Jéhovah apardone siokpari ti e, ngbanga ti nyen a yeke nzoni e tene pëpe so vuko ye so siokpari azia angbâ na yâ fini ti e biaku biaku?

¹⁰ Mo tara ti zi mbeni vuko ye so angbâ na ndo ti mbeni bongo awe? Peut-être mo tara kue ti zi ni, me gbä. Bâ tongana nyen Jéhovah afa ngangu ti lo ti pardone zo: ‘Kamême siokpari ti i ayeke tongana bengba ye, fade a vulu tongana neige; kamême siokpari ti i ayeke tongana bengba ye so avuko, fade a vulu tongana kuä [ti tele] ti ngasangbaga.’ (Ésaïe 1:18). * E  lingbi lâ oko pëpe na ngangu ti e mveni ti zi vuko ye so siokpari azia. Me Jéhovah alingbi ti mû siokpari so ayeke tongana bengba ye so avuko mingi, ti sala si avulu tongana neige wala tongana vulu kuä ti tele ti taba. Tongana Jéhovah apardone siokpari ti e, a lingbi e tene pëpe so mara ti vuko ye so siokpari azia so angbâ na yâ fini ti e biaku biaku.

11. So Jéhovah ayeke bi siokpari ti e na peko, aye ti tene nyen?

¹¹ Na yâ mbeni pendere bia ti singila so Ézéchias ahe na peko ti so lo sigigi na yâ mbeni sioni kobela, lo tene na Jéhovah: ‘Mo bi siokpari ti mbi kue na peko ti Mo.’ (Ésaïe 38:17). Ge, mo bâ mo tene Jéhovah amû asiokpari ti mbeni zo so agbian bê ti lo, Lo bi ni na peko ti Lo, sân ti tene Lo bâ ni wala Lo gi ti dabe ti Lo na ni. Mbeni buku atene a lingbi ti fa nda ti tënë so tongaso: ‘Mo sala ye mo bâ mo tene [mbi sala siokpari] lâ oko pëpe.’ Tënë so adë bê pëpe?

12. Tongana nyen prophète Michée afa so tongana Jéhovah apardone siokpari ti e, lo zi ni biaku biaku?

¹² Na yâ mbeni zendo ti kiri ti leke ye, prophète Michée afa tâ beku ti lo so Jéhovah ayeke pardone azo ti lo so agbian bê ti ala, lo tene: ‘Mbeni nzapa so alingbi na Mo ayeke na ndo wa? Mo so Mo diko tënë ti kengo-ndia na li ti tanga ti azo ti héritier ti Mo pëpe. Fade Mo bi siokpari kue ti ala na yâ kota ngu ti ingo so alï mingi.’ (Michée 7:18, 19). Bâ ye so tënë so aye lani ti tene na ala so aduti na fini na angoi so a sû na Bible. Tongana a bi mbeni ye na “yâ kota ngu ti ingo so alï mingi”, zo alingbi ti kiri ti wara ni? Atënë ti Michée ni aye ti fa so tongana Jéhovah apardone e, lo zi siokpari ti e biaku biaku.

13. Tënë ti Jésus “Pardone kuda ti e” aye ti tene nyen?

¹³ Jésus amû tapande ti songo so ayeke na popo ti zo so amû kuda na wa ti kuda ni ti fa na pardon ti Jéhovah. Lo wa e ti sambela: ‘Pardone kuda ti e.’ (Matthieu 6:12). Tongaso, Jésus ahaka siokpari na kuda (Luc 11:4). Tongana e sala siokpari, “kuda” ti Jéhovah ayeke na li ti e. Na ndo nda ti tënë na yanga  ti Grec so a kiri pekoni na “pardone”, mbeni bakari atene: “Ti zia lege ti mbeni kuda na hundango ni mbeni pëpe.” So ti tene, tongana Jéhovah apardone e, lo zi kuda so a lingbi fade ti duti na li ti e. Tongaso, azo ti siokpari so agbian bê ti ala alingbi ti wara dengo bê na yâ tënë so, teti Jéhovah ayeke hunda ande lâ oko pëpe kuda so lo mingo ni awe!—Psaume 32:1, 2.

14. Tënë “alingbi mbo siokpari ti i” aga na tënë ti nyen na yâ li ti mo?

¹⁴ A kiri a fa pardon ti Jéhovah na Kusala 3:19 so atene: ‘Tongaso i changé bê ti i, i changé lege ti i, si Nzapa alingbi mbo siokpari ti i.’ Tënë “mbo” akiri peko ti mbeni tënë na yanga ti Grec so aye ti tene ‘ti zi wala ti buba’. Ti ambeni wandara, ye so aye ti sala tënë ti mbongo mbeni mbeti so asû na maboko. Tongana nyen? Giriri, a yeke mû ngu ti keke nga na mbeni vuko ye a bungbi ni na senge ngu ti sala na mbeni ye so amû lege ti sû na mbeti. Kete na peko ti so a sala mbeti na ni awe, zo alingbi ti mû chiffon so ngu ayeke dä kete ti mbo na mbeti ni. So tâ pendere tapande ti fa na be-nzoni ti Jéhovah! Tongana lo pardone siokpari ti e, a yeke mo bâ mo tene lo mû chiffon si lo mbo na ni kue.

15. Jéhovah aye si e hinga nyen na ndo lo?

¹⁵ Tongana e gbu li ti e na ndo atapande nde nde so, a yeke polele so Jéhovah aye si e hinga so lo ye biani ti pardone e tongana e gbian bê ti e kue. Ni la pëpe? A lingbi e sala mbito pëpe so fade mbeni lâ lo yeke fâ ande ngbanga na li ti e ndali ti asiokpari so. E yeke bâ ni na lege ti mbeni ye nde so Bible afa na ndo kota ti be-nzoni ti Jéhovah: Tongana lo pardone, lo yeke girisa ni.

16, 17. Tongana Bible atene so Jéhovah agirisa siokpari ti e, a ye ti tene nyen? Mo kiri tënë tongaso ngbanga ti nyen?

¹⁶ Ti ala so ayeke na yâ fini mbele, Jéhovah amû zendo so: “Fade Mbi pardone sioye ti ala, na Mbi dabe Mbi na siokpari ti ala mbeni pëpe.” (Jérémie 31:34). So ti tene tongana  Jéhovah apardone siokpari, a lingbi ti kiri na li ti lo mbeni pëpe? Oko pëpe. Bible afa na e siokpari ti azo mingi, nga ti David, so Jéhovah apardone ni (2 Samuel 11:1-17; 12:13). Jéhovah angbâ lakue ti hinga asiokpari ti ala. A bata tondo ti asiokpari ti ala, ti gbiango bê ti ala, nga na ti pardon so Nzapa amû, ndali ti nzoni ti e (aRomain 15:4). Me, so Bible atene Jéhovah “adabe” lo pëpe na siokpari ti azo so lo pardone ala, a ye ti tene nyen?

¹⁷ Tënë na yanga ti Hébreu so a kiri pekoni na “Mbi dabe Mbi” ahunda pëpe gi ti dabe na ye so asi giriri. Mbeni buku (Theological Wordbook of the Old Testament) atene so a ndu nga “salango tâ ye so a hunda ti sala.” Tongaso, ti “dabe” na mbeni siokpari ahunda ti sala mbeni ye na tele ti azo ti siokpari  ni (Osée 9:9). Me tongana Nzapa atene “Mbi dabe Mbi na siokpari ti ala mbeni pëpe”, lo ye ti tene so tongana lo pardone azo ti siokpari so agbian bê ti ala, lo yeke sala ande pëpe mbeni ye na tele ti ala ndali ti asiokpari so (Ézéchiel 18:21, 22). Tongaso, Jéhovah ayeke pardone zo na lege so lo yeke kiri pëpe na ndo siokpari ti zo ni ti bi lakue tënë na li ti lo wala ti se lo. Ti hinga so Nzapa ti e ayeke pardone siokpari na lo yeke girisa ni ayeke ye ti dengo bê pëpe?

18. Ngbanga ti nyen mungo pardon aye ti tene pëpe so zo so agbian bê ti lo ayeke wara pëpe sioni na peko ti tambela ti lo ni?

¹⁸ So Jéhovah ayeke ndulu ti pardone aye ti tene so zo so agbian bê ti lo ayeke wara sioni na peko ti tambela ti lo ni pëpe? Oko pëpe. E lingbi ti sala siokpari pëpe sân ti tene sioni awara e. Paul asû na mbeti: “Ye so zo alu, fade lo fâ lengo ni nga.” (aGalate 6:7). Ni la, e lingbi ti ko lengo ti ambeni ye so e sala. A ye ti tene pëpe so tongana Jéhovah amû pardon awe, lo yeke sala si sioni atï na ndo e. Tongana akpale alondo, a yeke nzoni mbeni Chrétien atene pëpe so peut-être Jéhovah si ayeke se ni ndali ti asiokpari so ni sala ândö (Jacques 1:13). Na mbeni mbage nde, Jéhovah ayeke zi e pëpe na yâ aye kue so alingbi ti si ndali ti sioni so e sala. Fango yâ ti mariage, ngo so zo aye fade ni pëpe, kobela ti koli na wali, nengo tele mbeni pëpe, aye so kue alingbi ti duti aye ti peko ti siokpari so aga na vundu na so zo alingbi ti kpe ni pëpe. Dabe mo so même na peko ti so Jéhovah apardone David ndali ti siokpari so lo sala na Bath-Shéba nga na tele ti Urie, Lo zi lo pëpe na gbe ti aye ti vundu so aga na pekoni.—2 Samuel 12:9-12.

19-21. (a) Tongana nyen ndia so ayeke na Lévitique 6:1-7 aga na ye ti nzoni na zo ti nzi ni nga na zo so lo nzi lo? (b) Tongana siokpari ti e asala sioni na ambeni zo, Jéhovah ayeke duti na ngia tongana e sala ye wa?

¹⁹ Siokpari ti e alingbi ti ga na ambeni ye nde, mbilimbili  tongana a sala sioni na mbeni zo. Bâ, na tapande, tondo so ayeke na Lévitique chapitre 6. Na yâ chapitre so, Ndia ti Moïse abâ lege ti mbeni ye so asi, so mbeni zo ti Israël asala kota siokpari na mungo mbeni ye ti mba ti lo na lege ti mayele wala ti nzi. Zo ti nzi ni abele tënë ni, lo gue même lo deba yanga ti lo na wataka. Tënë ti yanga ti lo ague nde na ti zo so abi tënë na li ti lo so. Me, na pekoni, tongana yingo-ti-hinga ti zo ti nzi ni agi lo, lo gue lo fa siokpari ti lo na gigi. Me ti wara pardon ti Nzapa, a lingbi lo sala aye ota: lo kiri na mveni ye so lo mû, lo futa amende ti ye so lo nzi (tongana ngele ti ye ni ayeke pata 10 000, a lingbi lo futa pata 2 000), nga lo mû mbeni koli-taba na sandaga ti wara pardon. Na pekoni, ndia ni atene: “Sacrificateur asala songo teti lo na gbele L’Eternel, na fade A pardone lo.”—Lévitique 6:1-7.

²⁰ Ndia so ayeke lani mbeni ye so Nzapa aleke na nzobe. Zo so awara sioni ni abâ nzoni dä, teti a kiri na ye ti lo na lo, nga bê ti lo adë tongana lo bâ so zo ti nzi ni ayeda na siokpari ti lo na nda ni. Na oko ngoi ni, ndia ni aga na ye ti nzoni na zo so yingo-ti-hinga ti lo apusu lo na nda ni ti yeda na sioni ti lo na ti leke ni. Biani, tongana lo ke ti sala tongaso, Nzapa ayeke pardone lo oko pëpe.

²¹ Atâa so e yeke na gbe ti Ndia ti Moïse pëpe, Ndia so amû lege na e ti hinga bibe ti Jéhovah na ndo tënë ti pardon (aColossien 2:13, 14). Tongana siokpari ti e asala sioni na ambeni zo, Nzapa ayeke duti na ngia tongana e sala ye kue so ayeke na ngangu ti e ti leke ni (Matthieu 5:23, 24). A lingbi ti hunda na e ti fa siokpari ti e na gigi, ti yeda na ni, na ti hunda pardon na zo ni. Na pekoni si e lingbi ti turne lê ti e na mbage ti Jéhovah na lege ti sandaga ti Jésus na ti wara dengo bê so Nzapa apardone e awe.—aHébreu 10:21, 22.

22. Ye nyen alingbi ti gue oko na pardon ti Jéhovah?

²² Tongana mbeni babâ ti ndoye, Jéhovah alingbi ti pardone  e na ti se e na oko ngoi ni (aProverbe 3:11, 12). Peut-être mbeni Chrétien so agbian bê ti lo alingbi ti girisa kungba ti lo ti ancien, ti serviteur ti mungo maboko, wala ti wafango tënë ti ngoi kue. Bê ti lo alingbi ti so na girisango teti mbeni ngoi ye so ayeke lani na ngele ngangu na lê ti lo. Me, mara ti sengo ndo tongaso aye ti tene pëpe so Jéhovah ake ti pardone lo. A lingbi e dabe ti e so sengo ndo ti Jéhovah ayeke fä ti ndoye ti lo teti e. Tongana e yeda na ni na e sala ye alingbi na ni, e yeke bâ ande nzoni dä.—aHébreu 12:5-11.

23. Ngbanga ti nyen a lingbi e tene lâ oko pëpe so e lingbi na be-nzoni ti Jéhovah pëpe, na ngbanga ti nyen a lingbi e pardone azo tongana ti so lo yeke pardone na zo?

²³ So tâ ye ti dengo bê ti hinga so Nzapa ti e ‘ayeke ndulu ti pardone’! Atâa asioni so e lingbi ti sala, a lingbi e tene lâ oko pëpe so e lingbi na be-nzoni ti Jéhovah pëpe. Tongana e gbian bê ti e biani, e sala aye so a hunda ti leke na sioni ni, na e sambela na bê ti e kue ti wara pardon ti Jéhovah na lege ti mênë so Jésus atuku, e lingbi ti duti na beku so Jéhovah ayeke pardone e (1 Jean 1:9). Tongaso, zia na yâ salango ye ti e na popo ti e, e pardone mba tongana ti so Jéhovah ayeke pardone na azo. Teti, tongana Jéhovah, so asala siokpari lâ oko pëpe, ayeke pardone e na ndoye, e so e yeke awasiokpari, a lingbi e sala kue ti pardone amba ti e pëpe?