1-3. (a) Kumbi ndi katundu muzitu nuyu yo Davidi wangunyamuwa, nanga ntchinthu wuli cho chingumuzikisa mtima? (b) Kumbi asani tabuda, tija nge kuti tanyamuwa katundu muzitu nuyu, nanga kumbi Yehova watitisimikiziyanji?

 MUNTHU munyaki yo wakulembaku buku la masalimo wangukamba kuti: “Maubudi ngangu ngathopoka kuluska mutu wangu. Ndipu ngajumpha msinkhu wangu nge katundu muzitu. Ndazilirika kweniso ndatekenyulika ukongwa.” (Salimo 38:4, 8) Davidi waziŵanga kuti asani titijimba mulandu ukongwa chifukwa cha ubudi wo tachita, vija nge kuti tanyamuwa katundu muzitu ukongwa. Kweni penga chinthu chinyaki cho chingumuzikisa mtima. Iyu wanguziŵa kuti chinanga kuti Yehova watinkha ubudi, kweni iyu watimutinkha cha munthu yo walapa ndi mtima wosi ndi kuleka nthowa zaki ziheni. Chifukwa chakuti Davidi wagomezganga kuti Yehova ngwakhumbisiska kugowoke ŵanthu wo alapa, iyu wangukamba kuti: “Yimwi Yehova, ndimwi . . . wakunozgeka kugowoka.”—Salimo 86:5.

² Asani nasi tachita ubudi, tingajimba mulandu ukongwa ndipu venivi vingayanana waka ndi kunyamuwa katundu muzitu. Chinanga kuti ve viyo, kujimba mulandu kwaviyo nkhwamampha. Tikamba viyo chifukwa kungatiwovya kuti tinozgi vo tanangisa. Kweni nyengu zinyaki, kujimba mulandu mwakujumphisa nkhwakofya ukongwa. Ndipu kujimba mulandu kwaviyo, kungatichitisa kwamba kuŵanaŵana kuti Yehova wangatigowoke cha chinanga tingalapa ndi mtima wosi. Asani tingaja ndi ‘chitima chikulu ukongwa,’ Satana wangasaniriyapu mwaŵi wakutichitiska kwamba kuŵanaŵana kuti Yehova watitiwona kuti te ambula kwenere kuti timuteŵete.—2 Akorinto 2:5-11.

³ Kumbi ndimu Yehova watitiwone kuti te ambula kwenere? Ndimu viliri cha! Tikamba viyo chifukwa, kugowoka ndi nthowa yimoza yo Yehova walongore chanju chaki chikulu. Kuziya mu Mazu ngaki, iyu watitisimikiziya kuti asani talapa kutuliya pasi pa mtima, ngwakunozgeka kutigowoke. (Nthanthi 28:13) Mwaviyo, kuti tileki  kukayikiya kuti Yehova wangatigowoke, tiyeni tikambiskani chifukwa cho iyu watitigowoke kweniso mo wachitiya venivi.

4. Kumbi ndi vinthu wuli vo Yehova wakumbuka vakukwaskana ndi mo tikupangikiya, ndipu venivi vikwaska wuli mo wachitiya nasi?

⁴ Yehova waziŵa kuti pe vinthu vinyaki vo tingafiska cha kuchita. Lemba la Salimo 103:14 likamba kuti: “Iyu waziŵa umampha mo tikupangikiya, wakumbuka kuti te fuvu.” Fundu yeniyi, yilongo kuti iyu waluwa cha kuti tikupangika kutuliya ku dongu kweniso kuti kanandi tinangisa chifukwa chakuti te akubuda. Mazu ngakuti iyu waziŵa “mo tikupangikiya” ngatitikumbusa vo Bayibolu likamba. Ilu liyeruzgiya Yehova ndi wakuwumba viŵiya, ndipu isi te nge dongu lakuwumbiya viŵiya. (Yeremiya 18:2-6) Wakuwumba Mura mwenuyu wachita nasi vinthu mwachanju ukongwa pakuŵanaŵaniya kuti te akubuda kweniso waŵanaŵaniya mo tichitiya asani watipasa ulongozgi.

5. Kumbi buku la Aroma lititiwovya wuli kuziŵa nthazi ya ubudi?

⁵ Yehova waziŵa kuti ubudi ngwanthazi ukongwa. Mazu ngaki ngakamba kuti ubudi utitiko mwanthazi ukongwa ndipu utitichitiska kuti tifwengi. Kumbi tiziŵa wuli kuti ubudi ngwanthazi ukongwa? Mu buku la Aroma, wakutumika Paulo wangukonkhoska kuti: ‘Tosi tilamulika ndi ubudi’ nge mo mura wa gulu la asilikali walamuliya asilikali wo watiŵalongozga. (Aroma 3:9); ubudi ‘ulamuliya’ ŵanthu nge fumu (Aroma 5:21); ‘uja nasi’ (Aroma 7:17, 20) ndipuso “dangu” la ubudi lilutirizga kugwira ntchitu mumaliŵavu ngidu nyengu zosi, ndipu utitichitiska kuti tichitengi vakukhumba vaki. (Aroma 7:23, 25) Venivi vilongore limu kuti ubudi we ndi nthazi ukongwa ku ŵanthu ambula kufikapu.—Aroma 7:21, 24.

6, 7. (a) Kumbi Yehova watiŵawona wuli ŵanthu wo alapa ndi kumupempha kuti waŵagowoke? (b) Ntchifukwa wuli tikhumbika cha kuchitiyanga dala maubudi, tichiŵanaŵana kuti Chiuta watichitiyengi lisungu?

⁶ Yehova waziŵa kuti chinanga tingayesesa wuli, tingafiska cha kumuvwiya kwambula kunangisapu chechosi. Mwachanju, iyu watitisimikiziya kuti asani talapa mwakutuliya pasi pamtima ndipu tamupempha kuti watichitiyi lisungu, iyu watigowokiyengi. Lemba la Salimo 51:17 likamba kuti: “Mzimu wakusweka ndizu sembi zo zikondwesa Chiuta. Pakuti yimwi Chiuta muwukanengi cha mtima  wakusweka kweniso wakutekenyeka.” Yehova watimukana cha munthu mweniyo ‘mtima waki wasweka’ chifukwa chakujimba mulandu pa vo wanangisa.

⁷ Kumbi venivi ving’anamuwa kuti tichitiyengi dala maubudi, tichiŵanaŵana kuti Chiuta watichitiyengi lisungu? Awa! Yehova wachita mwakutole ŵaka mo wavwiya mumtima mwaki cha. Lisungu laki le ndi mphaka. Iyu wagowoke cha munthu weyosi yo wachitiya dala maubudi kwambula kulapa ndi kuleka nthowa zaki ziheni. (Aheberi 10:26) Kweni asani wawona kuti munthu ngwakulapa, iyu watimugowoke ndi mtima wosi. Sonu, tiyeni tikambiskani mazu nganyaki ngo ngagwiriskikiya ntchitu mu Bayibolu pakukonkhoska mo Yehova walongore chanju chaki munthowa yapade yeniyi.

8. Kumbi Yehova wachita wuli asani watigowoke maubudi ngidu, nanga venivi vititisimikiziyanji?

⁸ Davidi wati walapa maubudi ngaki, wangukamba mazu ngakuti: “Pakumaliya paki, ndingukusumuliyani ubudi wangu. Ndingubisa cha vo ndingunanga. . . . Ndipu yimwi mungundigowoke maubudi ngangu.” (Salimo 32:5) Mazu ngakuti “mungundigowoke” ngakufwatulika kutuliya ku mazu Ngachiheberi ngo ngang’anamuwa “kunyamuliya muchanya” pamwenga “kupinga.” Pa lemba ili ngakugwiriskikiya ntchitu pakukamba za kutuzgapu “ubudi” pamwenga “chinthu chiheni.” Mwaviyo, tingakamba kuti Yehova wangunyamuliya muchanya maubudi ngaku Davidi ndi kungatuzgapu pamwenga kuti kungataya kutali. Tikayika cha kuti venivi vingumuwovya Davidi kuti waleki kujimba mlandu ukongwa. (Salimo 32:3) Nasi tingagomezga ndi mtima wosi kuti Chiuta wangatuzgapu ndi kutaya kutali maubudi ngidu asani titimupempha kuti watigowoke mwakugwiriskiya ntchitu sembi yaku Yesu.—Mateyu 20:28.

9. Kumbi Yehova wanyamuliya wuli kutali maubudi ngidu?

⁹ Davidi wangugwiriskiya so ntchitu mazu nganyaki nganthazi pakukonkhoska kuti Yehova wagowoke. Iyu wangukamba kuti: “Nge mo ulili utali wa pakati pa ko kutuliya lumwi ndi ko liselere, ndimu so waŵikiya kutali maubudi ngidu ndi isi.” (Salimo 103:12) Lumwi lituliya kuvuma ndipu liselere kuzambwi. Kumbi kuvuma ndi kuzambwi nkhwakutalikiyana wuli? Nyengu zosi kuzambwi kutalikiyana ukongwa ndi kuvuma ndipu vigaŵa viŵi venivi vazamukunapu cha. Kaswiri munyaki wangukamba kuti mazu  ngenanga ngang’anamuwa kuti vigaŵa viŵi venivi “ve kutali ndi kutali ukongwa ndipu kutalikiyana kwaki nkhwakuti tingakuyeruzgiya so cha.” Mazu ngo Davidi wangukambirika kulemba ngatitisambiza kuti asani Yehova wagowoka, wanyamuwa maubudi ngidu ndi kungataya kutali ukongwa.

10. Asani Yehova watigowoke maubudi ngidu, ntchifukwa wuli tikhumbika cha kujiwona kuti te akubikiliya kwa umoyu widu wosi ndi ubudi?

¹⁰ Kumbi mukuyesapu kuchapa chakuvwala chituŵa cho chabikiliya? Panyaki munguyesesa kuchapa kuti chitowi kweni chikukutondani mbwenu. Kweni wonani vo Yehova wachita pa nkhani yakugowoke. Bayibolu likamba kuti: “Chinanga maubudi nginu ngangaŵa ngayera, ngajengi ngatuŵa ukongwa, chinanga ngangatchesama nge salu yiyera, ngajengi ngatuŵa nge weya utuŵa.” (Yesaya 1:18)  a Tingafiska cha pakutija kutuzgapu ubudi wo tingakamba kuti ukuchitiska kuti tije akubikiliya. Kweni Yehova wangatuzgiyapu  limu kubikiliya kosi kwenuku. Asani Yehova watigowoke maubudi ngidu, tikhumbika so cha kujiwona kuti te akubikiliya kwa umoyu widu wosi ndi ubudi wo iyu watigowoke.

11. Kumbi Yehova waponya kumsana kwaki maubudi ngidu munthowa wuli?

¹¹ Hezekiya wati wachizgika matenda ngo ngatingi ngamuchitisengi kuti wafwi, wangulemba sumu yakukondwesa ukondwa. Iyu wangukambiya Yehova kuti: “Mwaponya kumsana kwinu maubudi ngangu ngosi.” (Yesaya 38:17) Lemba ili lilongo kuti Yehova wato maubudi nga munthu yo walapa ndi kungaponya kumsana kwaki ko wangangawona so cha pamwenga kungaŵanaŵaniya. Mwakukoliyana ndi vo buku linyaki likamba, tingakamba so kuti fundu ya pa lemba ili yikamba kuti: “Mwachitisa kuti [maubudi ngangu] ngaje nge kuti nganguleka kuchitika.” Kumbi venivi vakuchiska cha?

12. Kumbi mchimi Mika wangulongo wuli kuti asani Yehova watigowoke, wataya kutali maubudi ngidu ndipu watingaŵanaŵaniya so cha?

¹² Pakukamba za layizgu laku Chiuta lakuweziyapu so vinthu, mchimi Mika wangulongo kuti wagomezganga kuti Yehova wazamugowoke ŵanthu ŵaki wo alapa. Iyu wangukamba kuti: “Ndi Chiuta nuyu yo wayanana ndi yimwi,yo wagowoke . . . mphulupulu za akujaku a chihara chaki? . . . Maubudi ngawu ngosi mwazakungaponya mundimba ya nyanja.” (Mika 7:18, 19) Aŵanaŵaniyani vo mazu yanga ngang’anamuwanga kwa ateŵeti aku Yehova a mu nyengu yo. Kumbi vatingi vichitikengi kuzuwuwa chinthu chakuti chabira kali “mundimba ya nyanja”? Mwaviyo, vo Mika wangukamba vilongo kuti asani Yehova wagowoka wakumbukaku so cha pamwenga kuviŵanaŵaniya vo tingunangisa.

13. Kumbi mazu ngo Yesu wangukamba ngakuti “mutigowoke vo tinangisa” ngang’anamuwanji?

¹³ Pakukhumba kutiwovya kuvwisa vo Yehova wachita asani watigowoke, Yesu wangukonkhoska chakuyeruzgiyapu cha vo vichitika pakati pa munthu yo wabwerekesa vinthu ndi yo wabwereka. Iyu wangutichiska kuti tipempherengi kuti: “Mutigowoke vo tinangisa.” (Mateyu 6:12) Mazu nga chineneru chakwambiriya ngo angungagwiriskiya ntchitu pakufwatuliya mazu ngakuti “vo tinangisa” ngang’anamuwanga ngongoli. Mwaviyo, Yesu wanguyeruzgiya ubudi ndi ngongoli. (Luka 11:4) Venivi vilongo kuti asani tabuda tija nge kuti te ndi “ngongoli” kwaku Yehova. Pakukonkhoska vo mazu Ngachigiriki  ngo akungafwatuliya kuti “mutigowoke” ngang’anamuwa, buku linyaki likamba kuti ngang’anamuwa “kugowoke munthu ngongoli, kuleka kumufumbapu pamwenga kumukumbusa kweniso kumukambiya kuti wangaziwezanga so cha.” Mwaviyo asani Yehova wagowoka vija nge kuti watitikambiya kuti tingawezanga so cha ngongoli yo te nayu kwaku iyu. Venivi vakupembuzga ukongwa ku munthu yo walapa ndi mtima wosi. Mwaviyo, Yehova wazakutikumbusapu so cha ngongoli yo watigowoke!—Salimo 32:1, 2.

14. Kumbi mazu ngakuti “maubudi nginu ngasisitiki” ngatitiwovya wuli kuvwisa vo Yehova wachita asani watigowoke?

¹⁴ Pakukamba va kugowoka ko Yehova wagowoke, lemba la Machitidu 3:19 likamba kuti: “Mwaviyo, lapani ndi kung’anamuka kuti maubudi nginu ngasisitiki.” Mazu ngakumaliya palemba ili ngakufwatulikiya kutuliya ku mazu Ngachigiriki ngo ngangang’anamuwa “kupuputa  . . pamwenga kutuzgapu.” Mwakukoliyana ndi vo akaswiri anyaki akamba, mazu ngenanga ngangakamba vakukwaskana ndi kufufuta vo munthu walemba. Kumbi venivi vachitikanga wuli? Inki yo kali agwiriskiyanga ntchitu yapangikanga ndi vinthu nge, maka, mamphiza ngavimiti kweniso maji. Munthu asani wamaliza kulemba ndi inki wafufutanga vo walemba mwakugwiriskiya ntchitu kasalu kakuzumbwa. Venivi vititiwovya kuvwisa lisungu lo Yehova we nalu. Asani watigowoke maubudi ngidu vija nge kuti wato kasalu kakuzumbwa ndi kufufuta.

15. Kumbi ndi vinthu wuli vo Yehova wakhumba kuti tiziŵengi vakukwaskana ndi iyu?

¹⁵ Asani tingaŵanaŵaniya vakuyeruzgiyapu venivi, tingavwisa kuti Yehova wakhumbisiska nadi kutigowoke maubudi asani talapa ndi mtima wosi. Mwaviyo, tikhumbika cha kuchita mantha kuti kunthazi iyu wazakutilanga chifukwa cha ubudi wo iyu wakutigowoke. Venivi vilongoleka mu fundu yinyaki yo Bayibolu likamba vakukwaskana ndi lisungu laku Yehova kuti: Asani wagowoka, waluwaku.

16, 17. Kumbi Bayibolu ling’anamuwanji asani likamba kuti Yehova watingakumbuka so cha maubudi ngidu, nanga ntchifukwa wuli mwamuka viyo?

¹⁶ Pakukamba va ŵanthu wo ŵe mu phanganu lifya, Yehova wangulayizga kuti: “Ndazakuŵagowoke mphulupulu zawu ndipu ndazamukumbuka so cha ubudi wawu.” (Yeremiya 31:34) Kumbi fundu yeniyi ying’anamuwa kuti asani Yehova wagowoka wangakumbuka  so cha ubudi wo munthu wanguchita? Awa. Bayibolu lititikambiya va ŵanthu anandi wo anguchita maubudi ngo Yehova wanguŵagowoke, kusazgiyapu Davidi. (2 Samuyeli 11:1-17; 12:13) Venivi vilongo kuti Yehova waziŵa mbwenu maubudi ngo ŵanthu wo anguchita. Ndipu maubudi ngo ŵanthu ŵenaŵa anguchita, kulapa kwawu kweniso mo Yehova wanguŵagowoke vikulembeka mu Bayibolu kuti vitiwovyi. (Aroma 15:4) Sonu kumbi Bayibolu ling’anamuwanji asani likamba kuti Yehova ‘wakumbuka’ so cha maubudi nga ŵanthu wo waŵagowoke?

¹⁷ Mazu Ngachiheberi ngo akungafwatuliya kuti “ndazamukumbuka so cha” ngasazgiyapu vinandi kuluska waka kukumbuka vakali. Buku linyaki likamba kuti mazu ngenanga ngasazgapu “kuchitapu kanthu pa vinthu vo vachitika.” (Theological Wordbook of the Old Testament) Mwaviyo, ‘kukumbuka’ maubudi kusazgapu kulanga munthu yo wachita ubudi. (Hoseya 9:9) Kweni asani Chiuta wakamba  kuti “ndazamukumbuka so cha maubudi ngawu” watitisimikiziya kuti asani wagowoke ŵanthu wo alapa, wazakuŵalanga so cha chifukwa cha maubudi ngawu. (Ezekiyeli 18:21, 22) Mwaviyo Yehova watingakumbuka so cha maubudi ngidu munthowa yakuti watingaŵanaŵaniya so cha ndi chilatu chakuti watimbengi mulandu pamwenga kuzitilanga. Kumbi vakuchiska cha kuziŵa kuti Chiuta widu asani wagowoka waluwaku?

18. Ntchifukwa wuli tingakamba kuti kugowokereka kung’anamuwa cha kuti munthu yo walekengi kukumana ndi masuzgu chifukwa cha ubudi wo wakuchita?

¹⁸ Kumbi asani Yehova wagowoke munthu yo walapa, ving’anamuwa kuti munthu yo wakumanengi so cha ndi masuzgu chifukwa cha ubudi wo wakuchita? Awa ndimu viliri cha. Tingakhazanga cha kuti asani tabuda, tilekengi kukumana ndi masuzgu. Paulo wangulemba kuti: “Chechosi cho munthu wamija, ndichu so wazamuvuna.” (Agalatiya 6:7) Venivi vilongo kuti tingakumana mbwenu ndi masuzgu chifukwa cha vo tikuchita. Kweni ving’anamuwa cha kuti Yehova ndiyu wachitisengi kuti tikumani ndi masuzgu pavuli pakuti watigowoke. Asani Mkhristu wakumana ndi masuzgu pa umoyu waki, watenere cha kuŵanaŵana kuti, ‘Panyaki Yehova ndiyu watindilanga chifukwa cha ubudi wangu.’ (Yakobe 1:13) Mumalu mwaki, tikumbukengi kuti Yehova watitivikiliya cha ku masuzgu ngosi ngo tingakumana nangu chifukwa vinthu viheni vo tikuchita. Mwakuyeruzgiyapu, kumala kwa nthengwa, kuto nthumbu, matenda ngakupasirana pakugonana, ŵanthu kuleka kukutumbika pamwenga kukupasa ulemu, vosi venivi ndivu vingachitika chifukwa cha ubudi wo munthu wangachita ndipu wangavigwentha cha. Kumbukani kuti chinanga kuti Yehova wangugowoke Davidi wati wachita ubudi ndi Batiseba kweniso kuchitiska kuti Uriya wabayiki, iyu wangumuvikiliya cha kuti waleki kukumana ndi masuzgu chifukwa cha maubudi ngaki.—2 Samuyeli 12:9-12.

19-21. (a) Kumbi dangu la pa Levitiko 6:1-7 lawovyanga wuli munthu yo wananga kweniso yo amunangiya? (b) Asani maubudi ngidu ngachitiska kuti ŵanthu anyaki akumani ndi masuzgu, kumbi Yehova wakondwa asani tachitanji?

¹⁹ Pe vinyaki so vo vingachitika chifukwa cha maubudi ngidu, ukongwa asani vo tachita vakwaska so ŵanthu anyaki. Mwakuyeruzgiyapu, ŵanaŵaniyani nkhani yo yikambika mubuku la Levitiko  chaputala 6. Dangu laku Mozesi likonkhoska vo vakhumbikanga kuchitika asani munthu munyaki waba pamwenga kuphanga katundu wa Myisirayeli munyaki. Kweniso asani wamuchitiya vachinyengu, pavuli paki wakana mpaka kuchita kulapizga kuti ndiyu cha wachita. Nkhani yaviyo iyi yaŵangavi kaboni weyosi ndipu munthu yo wananga walondiyanga chilangu chechosi cha. Kweni asani njuŵi yayamba kumusuzga, wachisumuwanga ubudi waki. Mwaviyo, kuti Chiuta wamugowoke, iyu wakhumbikanga kuchita vinthu vitatu ivi: Kuweza vo wanguba, kupereka ndalama yakupepese mweneku wa katundu yakukwana vigaŵa 20 pa vigaŵa 100 wa vo wanguba kweniso kupereka mbereri yinthulumi kuti yije sembi ya mulandu. Pavuli paki Dangu lakambanga kuti: “Wasembi wabenekeriyengi ubudi wa munthu yo pa masu paku Yehova, ndipu Chiuta wamugowokiyengi.”—Levitiko 6:1-7.

²⁰ Dangu lenili lalongonga kuti Chiuta ngwalisungu. Lawovyanga munthu yo wabikiya katundu kuti amuweze katundu waki, kweniso wakondwanga asani munthu yo wanguba wazomereza kunanga kwaki. Lawovyanga so munthu yo wananga, mweniyo njuŵi yaki yamusuzganga, kuti wazomerezi kunanga kwaki ndi kunozga vo wangunangisa. Mwaviyo, kukana kuchita vosi venivi ndikuti Chiuta watingi wamugowokiyengi cha.

²¹ Chinanga kuti pasonu panu titende Dangu laku Mozesi cha, kweni Dangu lenili lititiwovya kuziŵa maŵanaŵanu ngaku Yehova pankhani yakugowoka. (Akolose 2:13, 14) Asani ŵanthu anyaki akumana ndi masuzgu chifukwa cha maubudi ngidu, Chiuta wakondwa asani tachita vosi vo tingafiska kuti tinozgi vo tikunangisa. (Mateyu 5:23, 24) Venivi vingasazgapu kuzomera kuti tikubuda, kuzomereza kuti tikunagisa, kweniso kumupepesa munthu yo tikumunangiya. Asani tachita venivi, tingapempha Yehova kuti watigowoke mwakugwiriskiya ntchitu sembi yaku Yesu ndipu pakumaliya paki tingaja ndi njuŵi yamampha pakuziŵa kuti iyu watigowoke nadi.—Aheberi 10:21, 22.

22. Chinanga kuti watigowoke, kumbi ntchinthu wuli so chinyaki cho Yehova wangachita kuti watiwovyi?

²² Mwakuyanana ndi mpapi weyosi wachanju, asani Yehova watigowoke wangatipaska so chilangu. (Nthanthi 3:11, 12) Mwakuyeruzgiyapu, chinanga kuti Mkhristu wangulapa ubudi wo wakuchita, kweni wangaŵavi so mwaŵi wakuteŵete nge mura, mteŵeti wakovya  pamwenga mpayiniya wa nyengu zosi. Vingamuŵaŵa mumtima kuti wachitengi so cha uteŵeti weniwo wawuyanjanga. Kweni chilangu chenichi ching’anamuwa cha kuti Yehova wakuleka kumugowoke. Tikumbukengi kuti asani Yehova watipasa chilangu, mbukaboni wakuti watitiyanja. Mwaviyo, kuzomereza kulonde chilangu asani tabuda ndi kusintha kungatiwovya kuti vinthu vitiyende umampha.—Aheberi 12:5-11.

23. Ntchifukwa wuli tikhumbika cha kuŵanaŵana kuti Yehova wangatondeka kutichitiya lisungu, nanga ntchifukwa wuli tikhumbika kuyezga Yehova pa nkhani yakugowoke?

²³ Vakuchiska ukongwa kuziŵa kuti Chiuta widu ‘ngwakunozgeka kugowoka.’ Chinanga tinganangisa wuli, titenere cha kuŵanaŵana kuti Yehova wangatondeka kutichitiya lisungu. Asani talapa ndi mtima wosi, kuchita vosi vo tingafiska kuti tinozgi vo tanangisa ndipuso kupemphera kwaku Yehova mwakutuliya pasi pamtima kuti watigowoke mwakugwiriskiya ntchitu sembi yaku Yesu, tingakayikiyanga cha kuti iyu watigowokiyengi nadi. (1 Yohane 1:9) Nasi tikhumbika kuyezga Yehova pa nkhani yakugowoke anyidu. Asani Yehova mweniyo wabuda cha ndiyu watitigowoke mwachanju, kumbi isi taŵanthu akubuda titenere cha kuyesesa kugowoke anyidu?