1-3. (1) Eaha tei faateimaha ia Davida, eaha râ tei tamahanahana ia ˈna? (2) Eaha te tupu ia hara anaˈe tatou, eaha râ ta Iehova e haapapu mai ra?

 UA PAPAI Davida: “Te na nia ra hoi ta ˈu mau hapa i to ˈu upoo. Mai te hoê hopoia teimaha eita e haere ia ˈu ia amo. . . . Ua paruparu roa vau e ua perehu roa.” (Salamo 38:4, 8) Ua ite Davida mea teimaha ia faahapa anaˈe mai to tatou manaˈo haava. Ua noaa râ ia ˈna te tamahanahanaraa. Ua taa hoi ia ˈna e riri Iehova i te ino, eiaha râ te taata hara tei tatarahapa mau e tei taui i to ˈna haerea. Ua papu ia Davida ua ineine Iehova i te aroha hamani maitai i te feia tatarahapa, no reira o ˈna i parau ai: “Mea maitai hoi oe e Iehova, e ua ineine i te faaore i te hara.”​—Salamo 86:5.

² Ia hara tatou, e faahapa mai to tatou manaˈo haava e mea teimaha roa. Tera râ, na te reira e turai ia tatou ia faatitiaifaro i to tatou haerea. Te vahi fifi râ, eiaha tatou ia “horomii-roa-hia i te oto rahi” a manaˈo atu ai eita Iehova e faaore i ta tatou hara noa ˈtu ua tatarahapa mau tatou. Te hinaaro ra hoi Satani ia faaea tatou i te tavini ia Iehova e ia tiaturi tatou mea faufaa ore tatou.​—Korinetia 2, 2:5-11.

³ E haamanaˈo anaˈe e ere roa ˈtu tatou i te mea faufaa ore no Iehova! E Atua î i te here o Iehova, ua ineine o ˈna i te faaore i ta tatou hara. Na roto i ta ˈna Parau, te haapapu mai ra oia mai te peu e tatarahapa mau tatou, ua ineine oia i te faaore i ta tatou hara. (Maseli 28:13) Ia papu maitai ia tatou te reira, e hiˈopoa anaˈe no te aha Iehova  e faaore ai i ta tatou hara e mai te aha ta ˈna huru faaoreraa hara.

4. Eaha ta Iehova e haamanaˈo no nia ia tatou e mai te aha ïa to ˈna huru i nia ia tatou?

⁴ Ua ite Iehova i to tatou mau paruparu. Te na ô ra te Salamo 103:14: “Ua ite maitai hoi oia i to tatou hamaniraa, te haamanaˈo ra hoi oia e e repo tatou.” Ua taa ia ˈna no to tatou huru tia ore tatou e rave ai i te ino. Te haamanaˈo mai ra te reira e au Iehova i te hoê potera e o tatou te araea. (Ieremia 18:2-6) Ua ite Iehova e taata tia ore tatou, ma te hamani maitai, e haamanaˈo o ˈna mea paruparu tatou e e hiˈo atoa o ˈna i to tatou huru mai te peu e farii anei tatou i ta ˈna aratairaa.

5. Mea nafea te aposetolo Paulo i te faaiteraa mea puai mau te mana o te hara?

⁵ Ua ite Iehova te mana ra te hara i nia i te taata. Te faataa ra ta ˈna Parau e mana rahi to te hara e e aratai te reira i te pohe. Mai te faehau i raro aˈe i te faatereraa a to ratou raatira, ua parau te aposetolo Paulo “tei raro aˈe” tatou paatoa i “te hara.” (Roma 3:9) Te “mana” ra te hara i nia i te huitaata mai te hoê arii. (Roma 5:21) Tei “roto” ia tatou te hara e te faatîtî nei “te ture o te hara” ia tatou i roto i te mau mea atoa ta tatou e rave. (Roma 7:17, 20, 23, 25) Mea puai mau te mana o te hara!​—Roma 7:21, 24.

6, 7. (1) Eaha te manaˈo o Iehova i te feia aau tatarahapa mau? (2) Mea tano anei ia manaˈo e nehenehe noa tatou e rave i te ino no te mea e faaore iho â Iehova i ta tatou hara?

⁶ Ua ite maitai Iehova noa ˈtu to tatou hinaaro rahi e auraro ia ˈna, eita e noaa ia tatou ia na reira ma te tia roa. Ma te here, te haapapu mai ra o ˈna ia tatarahapa mau tatou, e faaore oia i ta tatou hara ma te aroha hamani  maitai. Te na ô ra te Salamo 51:17: “Te tusia ta te Atua e au, o te huru aau tatarahapa ïa. Eita oe e patoi i te hoê aau tatarahapa e te haehaa, e te Atua e.” Eita roa ˈtu Iehova e haafaufaa ore i “te hoê aau tatarahapa e te haehaa” tei teimaha no te hara ta ˈna i rave.

⁷ Mea tano anei ia manaˈo e nehenehe noa tatou e rave i te ino no te mea e faaore iho â Iehova i ta tatou hara? E ere roa ˈtu i te mea tano! Ia ravehia te ino, eita Iehova e tapo i to ˈna mata e eita roa ˈtu oia e aroha hamani maitai i te feia i rave i te hara ma te opua e o te ore e tatarahapa. (Hebera 10:26) Ia ite râ Iehova i te hoê aau tatarahapa, ua ineine oia i te faaore i te hara. I teie nei, e hiˈo anaˈe i te tahi mau parau faaohipahia i roto i te Bibilia no te faataa i te aroha hamani maitai o Iehova.

8. Ia faaore Iehova i ta tatou mau hara, eaha ïa ta ˈna e rave e eaha ta tatou i papu?

⁸ Ma te aau tatarahapa mau, ua parau Davida: “Faˈi atura vau i ta ˈu hara ia oe. Aita vau i huna i ta ˈu hapa. . . . E ua faaore oe i ta ˈu hapa, ta ˈu mau hara.” (Salamo 32:5) I roto i te reo Hebera, te auraa o te taˈo i hurihia i te parau “faaore,” o te tatararaa mai ïa i te teimaha o te hara no te faarue atu i te reira. Ua hopoi-ê-hia ïa te hara. Ua tatara mai Iehova i te teimaha o te hara e vai ra i roto ia Davida e ua hopoi ê atu i te reira. Ua mâmâ roa mai ïa o Davida. (Salamo 32:3) Ua papu roa ia tatou e na reira atoa Iehova no te feia e faatupu i te faaroo i te tusia taraehara o Iesu.​—Mataio 20:28.

9. I roto i te Salamo 103:12, no te aha i faahitihia ˈi te atea o te hitiraa mahana i te toparaa mahana?

⁹ Ua faaohipa Davida i te tahi atu parau no te faataa i ta Iehova huru faaoreraa hara: “Mai te atea o te hitiraa mahana i te toparaa mahana, mai te reira atoa oia ia faaatea  i ta tatou mau hara ia tatou nei.” (Salamo 103:12) Mea atea roa te hitia o te râ i te tooa o te râ! Ia au i te hoê aivanaa, i roto i tera irava, te hinaarohia ra e faahiti i “te vahi atea roa ˈˈe ta te taata e nehenehe e feruri.” Ua aratai te varua moˈa ia Davida ia papai, ia faaore Iehova i te hara, e hopoi ê oia i ta tatou hara i te vahi atea roa ˈˈe ta tatou e nehenehe e feruri.

10. Ua faaore anaˈe Iehova i ta tatou hara, no te aha mea faufaa ia faaea i te faahapa noa ia tatou?

¹⁰ Ua tamata aˈenei oe i te tumâ i te tafetafeta i nia i te hoê ahu uouo? Noa ˈtu ta oe mau tutavaraa, aita paha te tafetafeta i ore roa. A tapao na râ i ta Iehova huru faaoreraa hara: “Noa ˈtu mea uteute ta outou mau hara, e uouo roa ïa mai te hiona, noa ˈtu mea uteute mai te ahu uteute paˈo, e riro ïa mai te huruhuru mamoe ra te uouo.” (Isaia 1:18) O Iehova anaˈe te nehenehe e tumâ i te tafetafeta  o te hara. Ua faaore anaˈe Iehova i ta tatou mau hara, mea faufaa ia faaea i te faahapa noa ia tatou iho.

11. Eaha te auraa e faarue Iehova i ta tatou mau hara i muri mai i to ˈna tua?

¹¹ Ua fatata roa Hezekia i te pohe no te hoê maˈi. No to ˈna mauruuru ia Iehova i te faaoraraa mai ia ˈna, ua papai Hezekia i te hoê himene. Teie te tahi tuhaa: “Ua faarue oe i ta ˈu mau hara atoa i muri mai i to oe tua.” (Isaia 38:17) Te faataa ra Hezekia e faarue Iehova i te hara a te taata tatarahapa mau i muri mai i to ˈna tua ia ore oia ia manaˈo faahou i te reira. Ia au i te hoê titionare, e nehenehe atoa e parauhia: “Ua rave oe mai te mea ra aita vau i hara.” E ere anei i te mea mahanahana?

12. Mea nafea te peropheta Mika i te haapapuraa ia faaore Iehova i te hara, e tumâ roa oia i te reira?

¹² Ua haapapu te peropheta Mika e faaore Iehova i te hara a to ˈna nunaa tatarahapa mau ma te parau: “O vai te Atua mai ia oe . . . o te ore e haamanaˈo i te hapa a te toea o to ˈna nunaa? . . . E taora oe i ta ratou mau hara atoa i roto i te hohonuraa o te miti.” (Mika 7:18, 19) A feruri na i te auraa o taua mau parau ra. E nehenehe anei e tii faahou mai i te hoê mea taorahia i “roto i te hohonuraa o te miti”? Te faaite ra ïa te mau parau a Mika ia faaore Iehova i te hara, eita oia e faahiti faahou mai i te reira.

13. I roto i te reo Heleni, eaha te auraa ia faaore i te hara?

¹³ Area o Iesu, ua faahiti ïa i te parau o te tarahu no te faataa i ta Iehova huru faaoreraa hara. Ua faaitoito mai Iesu ia pure: “Faaore mai na i ta matou mau tarahu.” (Mataio 6:12) Ua faaau ïa Iesu i te hara i te tarahu. (Luka 11:4) Ua hara anaˈe tatou, e tarahu ta tatou ia Iehova ra. Ia au i te hoê titionare o te mau taˈo Bibilia, i roto i te reo Heleni, te auraa ia faaore i te hara, o “te oreraa ïa e titau i te aufauraa o te hoê tarahu.” Ia faaore Iehova i te hara,  te faaore ra ïa o ˈna i ta tatou tarahu ia ˈna ra. Eita roa o ˈna e titau mai ia aufau i te hoê tarahu ta ˈna i faaore. Mea mahanahana mau no te feia i tatarahapa mau i ta ratou hara!​—Salamo 32:1, 2.

14. Eaha te hohoˈa e puta mai ia parauhia e “tumâhia ta outou mau hara”?

¹⁴ Te faataa-atoa-hia ra ta Iehova huru faaoreraa hara i roto i te Ohipa 3:19 o te na ô ra: “No reira, a tatarahapa e a fariu mai ia tumâhia ta outou mau hara.” I roto i te reo Heleni, e nehenehe te taˈo “tumâhia” e huri-atoa-hia i te parau “nina-roa-hia, . . . faaorehia aore ra haamouhia.” Ia au i te tahi mau aivanaa, e puta mai te hohoˈa o te tumâraa i te hoê parau papaihia i te inita. I tahito ra, pinepine te inita i te hamanihia i te arahu, te tapau e te pape. Ia papaihia te tahi parau i taua inita ra, e taime â to te taata no te tumâ i te reira i te rimu faararihia i te pape. E faahohoˈaraa nehenehe roa tera no to Iehova aroha hamani maitai rahi. Ia faaore oia i ta tatou mau hara, mai te mea ra te rave ra oia i te rimu no te tumâ roa i te reira.

15. Eaha ta Iehova e hinaaro ra ia papu ia tatou?

¹⁵ A feruri ai i ta tatou i hiˈopoa mai nei, te hinaaro mau ra Iehova ia papu ia tatou ua ineine o ˈna i te faaore i ta tatou mau hara ua tatarahapa mau anaˈe tatou i te reira. Eita ïa o ˈna e faahapa e e faautua mai no taua mau hara ra. Te vai ra te tahi atu mea ta te Bibilia e haapapu mai ra no nia i te aroha hamani maitai rahi o Iehova: Ia faaore oia i te hara, eita o ˈna e haamanaˈo faahou i te reira.

16, 17. Eaha te auraa ia parau te Atua “eita vau e haamanaˈo faahou i ta ratou hara”? A faataa.

¹⁶ Ua fafau Iehova no te feia e ô i roto i te faufaa apî: “E  faaore hoi au i ta ratou hape, e eita vau e haamanaˈo faahou i ta ratou hara.” (Ieremia 31:34) Te auraa anei eita ta Iehova e nehenehe e haamanaˈo faahou i ta ratou hara? E ere tera te auraa. Te faaite ra hoi te Bibilia i te mau hara ta Iehova i faaore mai ta Davida e e rave rahi atu â taata. (Samuela 2, 11:1-17; 12:13) Te auraa, te haamanaˈo ra Iehova i te hape ta ratou i rave. Ua haapapai o ˈna i to ratou parau, ta ratou hara, to ratou tatarahaparaa e to Iehova faaoreraa i ta ratou hara, ei maitai no tatou. (Roma 15:4) Eaha ïa te auraa ia parau te Bibilia eita Iehova e “haamanaˈo faahou” i te mau hara ta ˈna i faaore?

¹⁷ Ia au i te hoê titionare, te taˈo Hebera hurihia i te parau “haamanaˈo,” e ere noa ïa te oreraa e haamoˈe, o te  rave-atoa-raa râ i te tahi ohipa no tei tupu. Ia haamanaˈohia te hara, e ravehia te tahi ohipa, e faautuahia tei rave i te hara. (Hosea 9:9) Ma te parau “eita vau e haamanaˈo faahou i ta ratou hara,” te haapapu ra Iehova ia faaore o ˈna i te hara a te feia tatarahapa, eita o ˈna e faautua ia ratou. (Ezekiela 18:21, 22) Te auraa, eita oia e faahiti faahou mai te hara ta tatou i rave. E ere anei i te mea mahanahana ia ite ia faaore te Atua i te hara eita o ˈna e haamanaˈo faahou i te reira?

18. Ia faaore Iehova i te hara, te auraa anei e paruruhia te taata i tatarahapa i te faahopearaa o ta ˈna hara?

¹⁸ Ia faaore Iehova i te hara, te auraa anei e paruruhia te taata i tatarahapa i te faahopearaa o ta ˈna hara? Eita roa ˈtu. Eita tatou e nehenehe e ape i te mau fifi no te hara i ravehia. Ua papai Paulo: “Ta te taata hoi e ueue ra, o ta ˈna atoa ïa e ooti.” (Galatia 6:7) Ia roohia tatou i te fifi, e ere te auraa na Iehova e faatupu ra i te reira. Eiaha ïa te hoê Kerisetiano ia manaˈo: “O Iehova paha tera e faautua mai ra no te hara ta ˈu i rave!” (Iakobo 1:13) Eita atoa râ Iehova e paruru ia tatou i te mau faahopearaa atoa o ta tatou mau hara. Ei hiˈoraa, ia faataa na hoa faaipoipo, ia hapû te tahi ma te hinaaro-ore-hia, te maˈi purumu, te ereraa i to vetahi ê tiaturi e faatura. A haamanaˈo, noa ˈtu ua faaore Iehova i ta Davida hara e o Bate-seba e ia Uria, aita Iehova i paruru ia Davida i te mau faahopearaa peapea o ta ˈna mau hara.​—Samuela 2, 12:9-12.

19-21. (1) Mea nafea te taata i eiâhia e tei rave i te hara i te faufaaraahia i te ture i roto i te Levitiko 6:1-7? (2) Mai te peu ua haamauiui ta tatou mau hara ia vetahi ê, eaha te titauhia ia rave?

¹⁹ E haamauiui atoa paha ta tatou mau hara ia vetahi ê.  E rave anaˈe, ei hiˈoraa, i te aamu i roto i te Levitiko pene 6. Te faahiti ra te ture a Mose i te tupuraa o te tahi taata tei eiâ aore ra tei taviriraa i to ˈna taata tupu. Aita oia i faˈi i ta ˈna hara e ua tae roa i te horeo ma te haavare. Aita e haapapuraa a te tahi ite, eita ïa tei hara e faautuahia. I muri aˈe râ, e hauti te manaˈo haava o tei rave i te hara e faaite atura oia i ta ˈna i rave. Ia faaorehia ta ˈna hara e te Atua, e tia ia ˈna ia rave e toru ohipa: E faahoˈi i ta ˈna i rave, e horoa hoê tuhaa i nia e pae o te hoo o taua mau mea ra e e horoa i te hoê mamoe oni ei tusia no te hapa. I muri iho, te na ô ra te ture: “E pûpû te tahuˈa i te tusia faahau no ˈna i mua ia Iehova e e faaorehia te mau mea atoa ta ˈna i rave.”​—Levitiko 6:1-7.

²⁰ Ua haapapu taua ture ra i te aroha hamani maitai o te Atua. E maitaihia te taata i eiâhia, e faahoˈihia hoi ta ˈna faufaa e e topa atoa to ˈna hau no te mea ua faˈi tei hara i ta ˈna i rave. E faufaa-atoa-hia tei tatarahapa i ta ˈna hara, ua nehenehe to ˈna manaˈo haava e turai ia ˈna ia faˈi e ia faatitiaifaro i te ohipa i tupu. Ahani aita oia i na reira, eita te Atua e faaore i ta ˈna hara.

²¹ Noa ˈtu e aita tatou i raro aˈe i te ture a Mose, e tauturu te reira ia taa i to Iehova manaˈo, no nia iho â râ i to ˈna hinaaro e faaore i te hara. (Kolosa 2:13, 14) Mai te peu ua haamauiui ta tatou mau hara ia vetahi ê, e oaoa te Atua ia rave tatou i tei maraa ia tatou no te faatitiaifaro i te fifi. (Mataio 5:23, 24) E titauhia ia faˈi i ta tatou hara, ia tatarahapa e ia ani i te taata i mauiui ia faaore mai i ta tatou hara. I muri mai, na nia i te tusia o Iesu, e nehenehe tatou e ani ia Iehova ia faaore mai i ta tatou hara. Ma te na reira, e fanaˈo tatou i te manaˈo haava mâ.​—Hebera 10:21, 22.

22. Ia faaore Iehova i te hara, eaha ta ˈna e rave atoa?

²² Ei Metua î i te here, e faaore Iehova i te hara, e aˈo  atoa râ o ˈna. (Maseli 3:11, 12) Noa ˈtu ua faaorehia ta ˈna hara, e titauhia paha i te hoê Kerisetiano ia vaiiho i ta ˈna hopoia matahiapo, tavini tauturu aore ra pionie. Parau mau mea mauiui, e ere râ te auraa aita Iehova i faaore i ta ˈna hara. E haamanaˈo anaˈe e aˈo Iehova i te feia ta ˈna e here. E maitaihia tatou ia farii i te aˈo a Iehova.​—Hebera 12:5-11.

23. No te aha eiaha roa ˈtu tatou e manaˈo eita Iehova e aroha hamani maitai ia tatou e no te aha e titauhia ia pee tatou i to Iehova hiˈoraa?

²³ Mea mahanahana mau ia ite ua ineine to tatou Atua i “te faaore i te hara”! Noa ˈtu te mau hape ta tatou i rave, eiaha roa ˈtu tatou e manaˈo eita Iehova e aroha hamani maitai ia tatou. Eaha ta tatou tuhaa? E tatarahapa mau ïa i ta tatou hara, e rave i te mau taahiraa no te faatupu i te hau e o vetahi ê e e ani ia Iehova ia faaore mai i te reira na nia i te tusia o Iesu. (Ioane 1, 1:9) Hau atu â, e pee anaˈe i te hiˈoraa o Iehova ma te faaore atoa i ta vetahi ê hapa. Noa ˈtu aita ta ˈna e hara, e faaore noa mai Iehova i ta tatou hara, eiaha atoa anei ïa tatou e na reira?