27-تاراۋ
‹شىركىن، ونىڭ ىزگىلىگى قانداي!›
1، 2. قۇدايدىڭ ىزگىلىگىنىڭ اياسى قانشالىقتى كەڭ جانە كيەلى كىتاپتا وسى قاسيەت جونىندە نە ايتىلعان؟
تازا اۋادا داستارقان باسىنا جينالعان ەسكى دوستار ۇياسىنا ەڭكەيگەن كۇن شاپاعىنىڭ كەرەمەت كورىنىسىن تاماشالاپ، اڭگىمە-دۇكەن قۇرىپ، مارە-سارە بولىپ وتىر. جەردىڭ باسقا ٴبىر شەتىندە ەگىنشى ٶز تانابىنا كوز جىبەرىپ، ريزا بولىپ ەزۋ تارتتى، ويتكەنى كوكجيەكتە قويۋ قارا بۇلت ٷيىرىلىپ، قۋاڭشىلىقتان ابدەن شولىركەگەن ەگىستىككە جاۋىننىڭ العاشقى تامشىلارى ٴتۇسىپ جاتىر. ال ٴبىر ەرلى-زايىپتى بالالارىنىڭ ٴتاي-ٴتاي باسقان العاشقى قادامدارىن كورىپ، ٴماز-مەيرام.
2 وزدەرى بىلسە دە، بىلمەسە دە وسى كىسىلەردىڭ ٴبارى ەحوبا قۇدايدىڭ ىزگىلىگىنىڭ راقاتىن كورۋدە. كەيبىر ٴدىندار ادامدار «قۇداي ىزگى» دەگەن سوزدەردى ٴجيى ايتادى. كيەلى كىتاپ بۇل سوزدەردى اناعۇرلىم اسەرلى ەتىپ جەتكىزەدى: ‹شىركىن، ونىڭ ىزگىلىگى قانداي!› (زاكاريا 9:17) ٴبىراق بۇگىندە بۇل ٴسوزدىڭ ماعىناسىن تۇسىنەتىندەر كەمدە-كەم سياقتى. ەحوبا قۇدايدىڭ ىزگىلىگى نەدەن تۇرادى جانە ونىڭ وسى قاسيەتى ٴارقايسىمىزعا قالاي اسەر ەتەدى؟
قۇداي سۇيىسپەنشىلىگىنىڭ ەرەكشە قىرى
3، 4. ىزگىلىك دەگەن نە جانە نەگە ەحوبانىڭ ىزگىلىگى سۇيىسپەنشىلىگىنىڭ كەرەمەت كورىنىسى؟
3 كيەلى كىتاپتا ىزگىلىك ٴسوزى ونەگەلىلىك، جاقسىلىق ماعىناسىندا قولدانىلادى. ولاي بولسا، ەحوبا ىزگىلىككە تولى. ونىڭ كۇشىن، ادىلدىگى مەن دانالىعىن قوسا العاندا، بارلىق قاسيەتتەرىنەن ىزگىلىگى كورىنىپ تۇرادى. سويتسە دە ىزگىلىك — ەحوبانىڭ سۇيىسپەنشىلىگىنىڭ كورىنىسى. نەگە بۇلاي دەيمىز؟
4 ىزگىلىك — ارەكەتتەن كورىنەتىن قاسيەت. ەلشى پاۋىل بۇل قاسيەتتىڭ ادامدار ٷشىن ادىلدىكتەن دە تارتىمدى ەكەنىن كورسەتكەن (ريمدىكتەرگە 5:7). ٵدىل ادام زاڭنىڭ تالاپتارىن ادال ورىندايدى، ال ىزگى ادام ودان دا كوپ نارسە ىستەيدى. ول وزگەلەردىڭ يگىلىگىن ويلاپ، ٴبىرىنشى بولىپ ارەكەت ەتەدى. ٶزىمىز كورەتىندەي، ەحوبا تاپ وسى ماعىنادا ىزگى. مۇنداي ىزگىلىك ەحوبانىڭ شەكسىز سۇيىسپەنشىلىگىنىڭ كورىنىسى ەكەندىگىندە ٴسوز جوق.
5—7. نەگە يسا «ىزگى ۇستاز» دەپ اتالۋدان باس تارتتى جانە وسىلايشا ول قانداي ماڭىزدى شىندىقتى اشتى؟
5 ىزگىلىك تانىتۋدا ەحوباعا تەڭ كەلەتىن ەشكىم جوق. ولەرىنەن كوپ ۇزاماي يسانى ٴبىر كىسى «ىزگى ۇستاز» دەپ اتاپ، وعان سۇراق قويادى. سوندا ول: «مەنى نەگە ىزگى دەيسىڭ؟ قۇدايدان باسقا ەشكىم دە ىزگى ەمەس»،— دەيدى (مارقا 10:17، 18). يسانىڭ جاۋابى ساعان قىزىق كورىنۋى مۇمكىن. نەگە ول الگى كىسىنى تۇزەتتى؟ يسا، شىنىمەن دە، «ىزگى ۇستاز» ەمەس پە؟
6 الگى كىسى «ىزگى ۇستاز» دەگەن لاۋازىمدى جاعىمپازدانۋ ٷشىن قولدانعانى انىق. يسا قاراپايىمدىلىق تانىتىپ، تەڭدەسى جوق ىزگىلىك كوكتەگى اكەسىنە تيەسىلى ەكەنىن ايتقان (ناقىل سوزدەر 11:2). وسىلاي دەۋىمەن ول ماڭىزدى ٴبىر شىندىقتى دا اشقان: تەك ەحوبا عانا ىزگىلىكتىڭ نورمالارىن ورناتا الادى. تەك سونىڭ عانا نەنىڭ جاقسى، نەنىڭ جامان ەكەنىن شەشۋ قۇقى بار. ادام مەن حاۋا جامان مەن جاقسىنى تانىتاتىن جەمىستى جەۋلەرىمەن وسى قۇقىقتى وزدەرىنە يەمدەنۋگە تىرىسقان. ال يسا بولسا جاقسى مەن جاماندى ايىرۋ قۇقىن كىشىپەيىلدىلىكپەن اكەسىنە قالدىرعان.
7 وعان قوسا، يسا شىنىمەن ىزگى نارسەنىڭ ٴبارى ەحوبادان كەلەتىنىن بىلگەن. ەحوبا — «ىزگى سي مەن مۇلتىكسىز تارتۋ» اتاۋلىنىڭ قاينار كوزى (جاقىپ 1:17، تاۋرات). قالايشا ەحوبانىڭ جومارتتىعى ىزگىلىگىنىڭ دالەلى بولىپ تابىلاتىنىن كورەلىك.
ەحوبانىڭ كول-كوسىر ىزگىلىگىنىڭ دالەلدەرى
8. ەحوبا ادامزاتقا قالاي ىزگىلىك كورسەتىپ وتىر؟
8 دۇنيەدە تىرشىلىك ەتكەن ٵر ادام ەحوبانىڭ ىزگىلىگىنىڭ راقاتىن كورگەن. ٴزابۋر جىرشىسى: «ەحوبا بارلىعىنا دا ىزگى»،— دەگەن (ٴزابۋر 145:9، جد؛ [144:9]). كەيبىر دالەلدەردى قاراستىرىپ كورەيىك. كيەلى كىتاپتا مىناداي سوزدەر بار: «ٶزىنىڭ بار ەكەندىگىنە يگى ىستەرىمەن انىق كۋالىك كەلتىرۋىن توقتاتپادى: اسپاننان جاڭبىر جاۋدىرىپ، دەر كەزىندە ٶنىم بەرىپ، مول ازىق سيلاپ، جانىمىزدى قۋانىشقا تولتىرادى» (ەلشىلەردىڭ ىستەرى 14:17). كەرەمەت دايارلانعان استى ٸشىپ راقاتتانعان كەزىڭ بولعان با؟ ەحوبا ىزگى بولعاندىقتان عانا جەردى ۇنەمى اينالىمداعى تۇشى سۋى بار جانە بىزگە ازىق بولاتىن ‹ٶنىم بەرەتىندەي› ەتىپ جاراتتى عوي. ول وسىنداي ىزگىلىگىن ٶزىن سۇيەتىندەرگە عانا ەمەس، بارلىق ادامدارعا كورسەتىپ وتىر. يسا: «ول جاماندارعا دا، جاقسىلارعا دا كۇن ساۋلەسىن بىردەي ٴتۇسىرىپ، ادىلدەرگە دە، ادىلەتسىزدەرگە دە جاڭبىردى بىردەي جاۋعىزادى»،— دەگەن (ماتاي 5:45).
9. الما اعاشىنان ەحوبانىڭ ىزگىلىگى قالاي كورىنەدى؟
9 كوپ ادام كۇن ساۋلەسىن، جاۋىن جانە مول ٶنىم الاتىن كەزەڭدەردى كادىمگى نارسەدەي قابىلدايدى، ويتكەنى ولار ۇنەمى قايتالانىپ وتىرادى. مىسال رەتىندە المانى الىپ كورەيىك. بۇل — كليماتى قوڭىرجاي ايماقتاردا كوپ وسەتىن اعاش. الما — ادەمى، ماۋەسى شىرىندى ٵرى ٴنارلى زاتتارعا تولى جەمىس اعاشى. دۇنيە ٴجۇزى بويىنشا الما اعاشىنىڭ قىزىل، سارى، جاسىل جانە التىن ٴتۇستى، ۇلكەندىگى ٸرى شيەدەي، ٴتىپتى گرەيپفرۋتتاي بولىپ كەلەتىن شامامەن 7500 ٴتۇرى بار ەكەنىن بىلگەنسىڭ بە؟ الما اعاشىنىڭ ٴدانى كىپ-كىشكەنتاي. ٴبىراق ودان ەڭ كەرەمەت اعاشتاردىڭ ٴبىرى ٶسىپ شىعادى (تاڭداۋلى اندەر 2:3). كوكتەم سايىن الما اعاشى تاڭعاجايىپ گۇل شوقتارىنا ورانىپ، ال كۇز سايىن جەمىس بەرەدى. 75 جىل بويى ورتاشا الما اعاشى جىلدا 19 كيلوگرامدىق 20 جاشىك جەمىس بەرىپ وتىرادى!
ەحوبا ‹اسپاننان جاڭبىر جاۋدىرىپ، دەر كەزىندە ٶنىم سيلايدى›
10، 11. قالاي سەزۋ مۇشەلەرى ەحوبانىڭ ىزگىلىگىن پاش ەتەدى؟
10 ىزگىلىككە تولى ەحوبا بىزگە ٶزىنىڭ جاراتقان نارسەلەرىنىڭ كەرەمەت ەكەنىن سەزىنىپ، ولاردان راقات تابا الاتىنداي ‹تاماشا جارالعان› ٴتان بەرگەن (ٴزابۋر 139:14 [138:14]). وسى تاراۋدىڭ باسىنداعى سوزدەردى ەسىڭە الشى. سونداي ساتتەردە كوزدى قۋانتاتىن نە؟ ٴماز-مەيرام بولعان بوبەكتىڭ بال-بۇل جايناعان نارتتاي بەتتەرى. تاناپقا سەبەلەپ جاۋعان نوسەر. باتىپ بارا جاتقان كۇن ساۋلەسىنىڭ قىزىل، سارى، كۇلگىن تۇستەرگە قۇبىلۋى. ادامنىڭ كوزى جۇزدەگەن مىڭ، بالكىم، ٴتىپتى ميلليونداعان ٴتۇستى اجىراتا الاتىنداي ەتىپ جاراتىلعان! ال ەستۋ قابىلەتىنىڭ ارقاسىندا ٴبىز سۇيىكتى ادامنىڭ داۋسىنىڭ، اعاش باسىن تەربەتكەن سامال جەلدىڭ، ىشەك-سىلەسى قاتقان بالا كۇلكىسىنىڭ وزگەرىسىن بىردەن بايقايمىز. نەگە كورۋ جانە ەستۋ قابىلەتى بىزگە قۋانىش اكەلەدى؟ كيەلى كىتاپتا بىلاي دەلىنگەن: «ەستيتىن قۇلاق پەن كورەتىن كوزدىڭ ەكەۋى دە جاراتقانى ٴتاڭىر يەنىڭ» (ناقىل سوزدەر 20:12). ٴبىراق بۇلار سەزىم مۇشەلەرىنىڭ ەكەۋى عانا.
11 ٴيىس سەزۋ قابىلەتى — ەحوبانىڭ ىزگىلىگىنىڭ تاعى ٴبىر دالەلى. زەرتتەۋلەرگە سۇيەنسەك، ادامنىڭ مۇرنى وتە كوپ — مىڭداعان يىستەن باستاپ 1 تريلليونعا دەيىن — ٴيىستى ايىرا الادى. بىرنەشەۋىن عانا ەسىڭە الىپ كورشى: ٶزىڭ جاقسى كورەتىن تاعامنىڭ ادەمى ٴيىسى، گۇلدەردىڭ جۇپار ٴيىسى، جەرگە تۇسكەن جاپىراقتاردىڭ حوش ٴيىسى، بولار-بولماس قانا سەزىلەتىن ٴتۇتىننىڭ جاعىمدى ٴيىسى. ال جاناسا سەزۋ قابىلەتى ٴجۇزىڭدى سيپاپ وتكەن مايدا جەلدى، سۇيىكتى ادامنىڭ نازىك قۇشاعىن، قولىڭداعى جەمىستىڭ ەش كەدىرسىز، تەپ-تەگىس ەكەنىن سەزىنۋىڭە مۇمكىندىك بەرەدى. ونى تىستەگەنىڭ سول-اق ەكەن، ٴدام سەزۋ قابىلەتى ىسكە قوسىلادى. ٴدام سەزۋ بادانالارىڭ جەمىستىڭ بىلىنەر-بىلىنبەس حيميالىق قوسپالارىن تۇيسىنە سالا، ٴدامنىڭ سان الۋان ٴتۇرىن سەزەسىڭ. ٴيا، ەحوبانى: ‹سەنەن قورقاتىندارعا ارناپ ٶزىڭ ساقتاپ جۇرگەن يگىلىكتەرىڭ قانداي كوپ ەدى!›— دەپ ماداقتاۋعا بارلىق نەگىز بار (ٴزابۋر 31:19 [30:20]). الايدا ەحوبا وزىنەن قورقاتىندارعا يگىلىكتەرىن قالاي «ساقتاپ» جۇرەدى؟
ماڭگىلىككە جەتكىزەتىن ىزگىلىكتەر
12. ەحوبا كورسەتىپ وتىرعان قانداي ىزگىلىك اناعۇرلىم ماڭىزدى جانە نەگە؟
12 يسا: «كيەلى جازبادا «ادام تەك نانمەن عانا ەمەس، قۇدايدىڭ اۋزىنان شىققان ٵربىر سوزىمەن ٶمىر سۇرەدى» دەپ جازىلعان عوي!»— دەگەن (ماتاي 4:4). ارينە، ەحوبانىڭ تاندىككە قاراعاندا رۋحاني جاعىنان كورسەتكەن ىزگىلىگى الدەقايدا ماڭىزدى، ويتكەنى ولار ماڭگىلىك ومىرگە جەتكىزەدى. وسى كىتاپتىڭ 8-تاراۋىندا قازىرگى سوڭعى كۇندەرى رۋحاني جۇماق ورناتۋ ٷشىن ەحوبانىڭ قالپىنا كەلتىرەتىن كۇشىن قولدانىپ جاتقانى ەسكەرىلگەن ەدى. رۋحاني جۇماقتىڭ باستى ەرەكشەلىگى — رۋحاني اس-سۋدىڭ مولدىعى.
13، 14. ا) ەزەكيەل پايعامبار قانداي ايان الدى جانە ونىڭ ٴبىزدىڭ كۇنىمىزگە قاتىستى ماعىناسى قانداي؟ ٵ) ەحوبا ادال قىزمەتشىلەرىنە ٶمىر بەرەتىن قانداي رۋحاني سيلار بەرىپ وتىر؟
13 كيەلى كىتاپتا قايتا قالپىنا كەلتىرۋ تۋرالى كەرەمەت پايعامبارلىق بار. ول ەزەكيەل كىتابىندا ساۋلەتتى عيباداتحانانى قالپىنا كەلتىرۋگە قاتىستى اياندا سۋرەتتەلەدى. سول عيباداتحانادان سۋ اعىپ جاتادى دا، بارعان سايىن ەنى دە، تەرەڭدىگى دە ۇلكەيە تۇسەدى. ول اينالاسىنداعىلاردىڭ بارىنە زور باتالار اكەلەدى. ال جاعاسىندا شيپالى جەمىس بەرەتىن، جايقالعان اعاشتار وسەدى. ول ٴتىپتى تۇزدى، تىرشىلىكتەن جۇرداي ٶلى تەڭىزگە دە تىرشىلىك بەرەدى! (ەزەكيەل 47:1—12) ٴبىراق مۇنىڭ ٴبارى نەنى بىلدىرەدى؟
14 ەزەكيەل كورگەن بۇل ايان ەحوبا تازا عيباداتتى قايتا قالپىنا كەلتىرەتىنىن ٴبىلدىردى. ەندى ول قايتادان قۇدايدىڭ ٵدىل نورمالارىنا ساي كەلمەك ەدى. ايانداعى وزەن ىسپەتتى قۇدايدىڭ ٶمىر بەرەتىن سيى مولايعان ۇستىنە مولايا تۇسپەك ەدى. 1919-جىلى تازا عيبادات قالپىنا كەلتىرىلگەننەن بەرى، ەحوبا ٶز حالقىنا ٶمىر بەرەتىن باتاسىن توگۋدە. قالايشا؟ كيەلى كىتاپ پەن وعان نەگىزدەلگەن ادەبيەتتەر جانە كەزدەسۋلەر مەن كونگرەستەر — وسىلاردىڭ ٴبارى ميلليونداعان ادامداردىڭ شىندىققا كەلۋىنە كومەكتەسۋدە. سولار ارقىلى ادامداردىڭ ەحوبانىڭ بەرگەن ەڭ زور سيى — ٶزىن سۇيەتىندەر مەن قاستەرلەيتىندەرگە ماڭگىلىك ومىرگە دەگەن ٷمىت، سونداي-اق ٶزىنىڭ الدىندا تازا بولۋعا مۇمكىندىك بەرەتىن ٴماسىحتىڭ تولەم قۇرباندىعى — تۋرالى ٴبىلىم الۋعا مۇمكىندىكتەرى بار a. سوندىقتان دا قازىرگى سوڭعى كۇندەرى وسى دۇنيەدەگى ادامدار رۋحاني اشتىقتان جاپا شەگىپ جۇرگەندە، ەحوبانىڭ حالقى قۋانىشپەن رۋحاني اس-سۋدى تويىنا ٸشىپ-جەۋدە (يشايا 65:13).
15. ٴماسىح مىڭ جىل پاتشالىق ەتكەندە، قالاي ەحوبا ادال ادامدارعا ىزگىلىگىن توگەدى؟
15 ٴبىراق قازىرگى زامان جويىلعان سوڭ، ەزەكيەل كورگەن سۋدىڭ اعىسى توقتاپ قالمايدى. كەرىسىنشە، ٴماسىحتىڭ مىڭجىلدىق پاتشالىعىنىڭ كەزىندە ونىڭ سۋى بۇرىنعىدان دا مولايا تۇسەدى. سول كەزدە ەحوبا پاتشالىق ارقىلى يسانىڭ قۇرباندىعىنىڭ كۇشىن تولىقتاي قولدانىپ، ادامزاتتى بىرتە-بىرتە كەمەلدىلىككە جەتكىزەدى. سوندا ەحوبانىڭ ىزگىلىگىنە قالايشا قۋانامىز دەسەڭشى!
ەحوبانىڭ ىزگىلىگىنىڭ باسقا دا قىرلارى
16. ەحوبانىڭ ىزگىلىگى باسقا دا كەرەمەت قاسيەتتەردەن تۇراتىنى كيەلى كىتاپتان قالاي كورىنەدى جانە ولاردىڭ كەيبىرى قانداي؟
16 ەحوبانىڭ ىزگىلىگىنە جومارتتىقتان كوپ نارسە كىرەدى. قۇداي مۇساعا: «مەن سەنىڭ الدىڭنان بۇكىل يگىلىگىمدى وتە شىعاتىن ەتىپ، قاسىڭدا «جاراتقان يە» دەگەن ەسىمىمدى اتاپ شاقىرامىن»،— دەدى. سوسىن، جازبادا بىلاي دەلىنگەن: ‹[ەحوبا] مۇسانىڭ الدىنان ٶتىپ بارا جاتىپ:— جاراتقان يە! جاراتقان يە! راقىمدى دا قايىرىمدى قۇداي! قاھارلانۋعا اسىقپايدى، تاباندى سۇيىسپەنشىلىگى مەن سەنىمدىلىگى اعىل-تەگىل مول،— دەپ داۋىستادى› (مىسىردان شىعۋ 33:19؛ 34:6، سىلتەمەنى قارا). كورىپ وتىرعانىمىزداي، ەحوبانىڭ ىزگىلىگى باسقا دا كەرەمەت قاسيەتتەردەن تۇرادى. سولاردىڭ ەكەۋىن عانا قاراستىرىپ كورەيىكشى.
17. قايىرىمدىلىق دەگەن نە جانە قالاي ەحوبا جۇمىر باستى پەندەلەرىنە قايىرىمدىلىق تانىتادى؟
17 «قايىرىمدىلىق». بۇل قاسيەت «جاناشىر» دەپ تە اۋدارىلادى. ودان ەحوبانىڭ ٶز جاراتىلىستارىنا قالاي قارايتىنى تۋرالى كوپ نارسە بىلەمىز. ادەتتە وزگەلەرگە بيلىگى جۇرەتىن ادام ٴجيى دورەكى، سۋىق نەمەسە قاتال بولىپ كەلەدى، ٴبىراق ەحوبا ونداي ەمەس، قايتا، جۇمساق ٵرى مەيىربان. مىسالى، ونىڭ ىبىرامعا نە دەگەنىنە كوڭىل اۋدارشى: «اينالاڭا كوز تاستاپ، تۇرعان جەرىڭنەن باستاپ سولتۇستىك پەن وڭتۇستىككە، شىعىس پەن باتىسقا قارا» (جاراتىلىس 13:14). كيەلى كىتاپ سوزدەرىن زەرتتەيتىن عالىمدار كونە ەۆرەي تىلىندە بۇل سويلەمدە بۇيرىق رايدى سىپايى تىلەككە اينالدىراتىن جۇرناق قولدانىلعانىن اتاپ وتكەن. كيەلى كىتاپتا باسقا دا وسىنداي مىسالدار بار (جاراتىلىس 31:12، جد؛ ەزەكيەل 8:5، جد). ويلاپ كورشى، الەمنىڭ ٵمىرشىسى جۇمىر باستى پەندەگە ٶتىنىش جاساعان! مىنا دۇنيەدە ادامداردىڭ يناباتتىلىق اتاۋلىدان جۇرداي، دورەكى ەكەنىنە قاراماستان، قۇدايىمىز ەحوبانىڭ سونشا قايىرىمدى ەكەندىگى جانىمىزعا جۇبانىش بەرەدى ەمەس پە؟
18. قاي ماعىنادا ەحوبانىڭ «سەنىمدىلىگى اعىل-تەگىل مول» جانە نەگە بۇل سوزدەر ٴبىزدى نىعايتادى؟
18 «سەنىمدىلىگى اعىل-تەگىل مول». وتىرىك پەن الاياقتىق قازىرگى دۇنيەدە كادىمگى نارسە بولىپ كەتكەن. ٴبىراق كيەلى كىتاپتا: «وتىرىك ايتاتىنداي، قۇداي پەندە ەمەس»،— دەگەن سوزدەر بار (رۋلاردى ساناۋ 23:19). ال تيتكە 1:2 دە قۇدايدىڭ جالعان سويلەي المايتىنى ايتىلعان. ەحوبانىڭ ىزگىلىگى سونشا — ونىڭ بويىندا وتىرىككە ورىن جوق. سوندىقتان ونىڭ ۋادەلەرىنە تولىعىمەن سەنىم ارتۋعا بولادى. ونىڭ ٴسوزى ارقاشان جۇزەگە اسادى. ەحوبا ٴتىپتى ‹اقيقاتتىڭ قۇدايى› دەپ اتالادى (ٴزابۋر 31:5 [30:6]). ول وتىرىك ايتۋدان اۋلاق ٴجۇرىپ قانا قويمايدى، سونداي-اق وزگەلەرگە شىندىقتى مولىنان اشادى. ەحوبا وزگەگە اشىلا بەرمەيتىن تۇيىق ەمەس، قايتا، ادال قىزمەتشىلەرىنە دانالىعىن كول-كوسىر ەتىپ جومارتتىقپەن بەرەدى b. قىزمەتشىلەرى ‹شىندىق جولىمەن جۇرە› الۋلارى ٷشىن ەحوبا ٶزى اشىپ وتىرعان شىندىقتى قالاي ومىردە قولدانۋعا بولاتىنىن دا ۇيرەتىپ وتىر (جوحاننىڭ 3-حاتى 3). الايدا ەحوبانىڭ ىزگىلىگى جەكە بىزگە قالاي اسەر ەتۋ كەرەك؟
«ولار ەحوبانىڭ ىزگىلىگىن كورىپ، شات-شادىمان بولادى»
19، 20. ا) شايتان حاۋانى ەحوبانىڭ ىزگىلىگىنە دەگەن سەنىمدىلىگىنەن قالاي ايىردى جانە مۇنىڭ ناتيجەسى قانداي بولدى؟ ٵ) ەحوبانىڭ ىزگىلىگى بىزگە قالاي اسەر ەتۋ كەرەك جانە نەگە؟
19 شايتان ەدەم باعىندا حاۋانى ازعىرۋدى ەحوبانىڭ ىزگىلىگىنە دەگەن سەنىمىنەن قۋلىقپەن ايىرۋدان باستايدى. ەحوبا ادام اتاعا: «ساعان باقتاعى كۇللى اعاشتاردىڭ جەمىستەرىن جەۋگە بولادى»،— دەگەن ەدى. ەحوبا باققا كورىك بەرىپ تۇرعان مىڭ سان اعاشتاردىڭ ىشىندەگى بىرەۋىنىڭ عانا جەمىسىن جەۋگە تيىم سالعان. سوعان قاراماستان شايتاننىڭ حاۋاعا قالاي سۇراق قويعانىنا كوڭىل قويشى: «قۇداي سەندەرگە باقتاعى ەشبىر اعاشتىڭ جەمىسىن جەمەڭدەر دەپ شىنىمەن ايتتى ما؟» (جاراتىلىس 2:9، 16؛ 3:1) شايتان حاۋادان قانداي دا ٴبىر جاقسى نارسە جاسىرىن قالدى دەگەن ويعا مەڭزەپ، ەحوبانىڭ سوزدەرىن بۇرمالاپ جەتكىزدى. وكىنىشكە وراي، ونىڭ وتىرىگى ورگە باستى. حاۋا قولىنداعى بار يگىلىكتى قۇدايدان السا دا، ونىڭ ىزگىلىگىنە كۇماندانا باستادى، بۇگىندە سونشا كوپ ايەلدەر مەن ەركەكتەر دە سويتۋدە.
20 وسى كۇماننىڭ قانداي زور قايعى-قاسىرەت اكەلگەنى ٴمالىم. ولاي بولسا، ەرەميا 31:12 دە (جد) جازىلعان سوزدەردى جۇرەگىمىزدە ساقتالىق: «ولار مىندەتتى تۇردە ەحوبانىڭ ىزگىلىگىن كورىپ، شات-شادىمان بولادى». ەحوبانىڭ ىزگىلىگىنە قۋانىپ، شات-شادىمان بولۋىمىز كەرەكتىگىندە ٴسوز جوق. ىزگىلىككە تولى قۇدايىمىزدىڭ پەيىلىنە ەشقاشان كۇماندانۋدىڭ قاجەتى جوق. ٶزىن سۇيەتىندەرگە تەك جاقسىلىق تىلەيتىن ەحوباعا تولىعىمەن سەنىم ارتۋىمىزعا بولادى.
21، 22. ا) ەحوبانىڭ ىزگىلىگىنە دەگەن لەبىزىمىزدى قالاي بىلدىرۋىمىزگە بولادى؟ ٵ) كەلەسى تاراۋدا قانداي قاسيەت تالقىلانادى جانە ونىڭ ىزگىلىكتەن قانداي ايىرماشىلىعى بار؟
21 وعان قوسا، قۇدايدىڭ ىزگىلىگى تۋرالى وزگەلەرگە ايتۋعا مۇمكىندىك تۋسا، قۋانامىز. ەحوبانىڭ حالقى جونىندە ٴزابۋر 145:7 دە (جد) بىلاي دەلىنگەن: «سەنىڭ مول ىزگىلىگىڭ تۋرالى ايتقاندا، ولاردىڭ كوڭىلدەرى تاسيتىن بولادى». تىرشىلىك ەتكەن ٵر كۇنى ەحوبانىڭ ىزگىلىگىن كورۋدەمىز. ولاي بولسا، ٵر كۇنى مۇمكىندىگىنشە ەحوبانىڭ ناقتى ٴبىر ىزگىلىگىن اتاپ، ريزاشىلىعىمىزدى ٴبىلدىرۋدى نەگە ادەت ەتپەسكە؟ وسى قاسيەت جونىندە ويلاپ، ەحوباعا سول ٷشىن كۇندەلىكتى ريزاشىلىق ٴبىلدىرىپ جانە ول تۋرالى وزگەلەرگە ايتقانىمىز ىزگى قۇدايىمىزعا ەلىكتەۋگە كومەكتەسەدى. سونداي-اق ەحوباعا ەلىكتەپ، ىزگىلىك ىستەۋدىڭ جولىن ىزدەر بولساق، وعان جاقىنداي تۇسەمىز. ەگدە تارتقان ەلشى جوحان: «سۇيىكتى باۋىرىم، جاماندىققا ەلىكتەمەي، جاقسىلىققا ەلىكتە! جاقسىلىق ىستەيتىن ادام قۇدايدىكى»،— دەپ جازعان (جوحاننىڭ 3-حاتى 11).
22 ەحوبانىڭ ىزگىلىگىنىڭ باسقا قاسيەتتەرمەن دە بايلانىسى بار. مىسالى، قۇدايدىڭ «سۇيىسپەنشىلىككە تولى مەيىرىمدىلىگى»، نەمەسە اينىماس سۇيىسپەنشىلىگى، مول (مىسىردان شىعۋ 34:6، جد). بۇل قاسيەتتىڭ ىزگىلىك سياقتى قولدانۋ اياسى كەڭ ەمەس، ويتكەنى ەحوبا ونى، ەڭ الدىمەن، ٶزىنىڭ ادال قىزمەتشىلەرىنە تانىتادى. كەلەسى تاراۋدا ەحوبانىڭ وسى قاسيەتتى قالاي تانىتاتىنىن كورەمىز.
a تولەم قۇرباندىعى — ەحوبانىڭ ىزگىلىگىنىڭ ەڭ زور كورىنىسى. ميلليونداعان رۋحاني جاراتىلىستارىنىڭ اراسىنان ٴبىز ٷشىن جانىن قيۋعا ەحوبا ٶزىنىڭ جالعىز سۇيىكتى ۇلىن تاڭداپ العان.
b كيەلى كىتاپتا شىندىق لايىقتى تۇردە نۇرعا تەڭەلەدى. ٴزابۋر جىرشىسى: «ٶزىڭنىڭ نۇرىڭ مەن شىندىعىڭدى جولداي گور»،— دەپ جىرلاعان (ٴزابۋر 43:3، جد؛ [42:3]). ەحوبا وزىنەن ٴتالىم الۋعا دايار ادامدارعا رۋحاني نۇرىن كول-كوسىر ەتىپ توگەدى (قورىنتتىقتارعا 2-حات 4:6؛ جوحاننىڭ 1-حاتى 1:5).