1, 2. Udat dɛn Gɔd in gudnɛs de bɛnifit? Aw di Baybul tɔk fayn fayn wan bɔt dis kwaliti?

WE DI san de go dɔŋ, sɔm pipul dɛn we dɔn bi padi fɔ lɔng tɛm de na do de it, laf, ɛn tɔk as dɛn de kɔle we di san de go dɔŋ. Na wan ɔdasay, wan fama de luk in fam ɛn smayl bikɔs ren dɔn dak ɛn i dɔn bigin fɔ fɔdɔm pan di tin dɛn we i plant. Wan ɔdasay bak, wan man ɛn in wɛf gladi fɔ si we dɛn pikin de waka fɔ di fɔs tɛm.

² Di gud we Jiova de du de bɛnifit ɔl dɛn pipul dɛn ya, ilɛksɛf dɛn no dat ɔ dɛn nɔ no dat. Bɔku tɛm, pipul dɛn we lɛk Gɔd biznɛs kin se “Gɔd gud.” Di Baybul tɔk bɔt dis kwaliti fayn fayn wan pas dat. I se: “I rili rili gud!” (Zɛkaraya 9:​17, NWT) Bɔt tide, i tan lɛk se na tu-tri pipul dɛn rili no wetin i min. Wetin Jiova Gɔd in gudnɛs rili min? Ɛn aw dis kwaliti we Gɔd gɛt de afɛkt wi ɔl?

3, 4. Wetin na gudnɛs? Wetin mek Jiova in gudnɛs na wan we aw i de sho lɔv?

³ Insay bɔku langwej dɛn tide, dɛn de yuz di wɔd “gudnɛs” pan ɔl we dɛn nɔ no wetin i min. Bɔt insay di Baybul i gɛt minin. Plɛnti tɛm, i kin min fɔ du wetin rayt. So, wi kin se gudnɛs de pan ɔltin we Jiova de du. Ɔl in kwaliti dɛn lɛk in pawa, in jɔstis, ɛn di sɛns we i gɛt rili gud. Bɔt di bɛst we fɔ ɛksplen gudnɛs na fɔ se na wan we aw Jiova de sho lɔv. Wetin mek?

⁴ Gudnɛs na kwaliti we de mek pɔsin du sɔntin fɔ ɔda pipul dɛn. Di apɔsul Pɔl bin sho se mɔtalman dɛn lɛk pɔsin we gud pas pɔsin we de du wetin rayt. (Romans  5:​7) Pɔsin we de du wetin rayt de obe di lɔ, bɔt pɔsin we gud de du pas dat. I nɔ de wet te dɛn tɛl am sɔntin bifo i du am, bɔt i de luk fɔ we dɛn we i go ɛp ɔda pipul dɛn. As wi go si, wi go gri se na da kayn we de Jiova gud. I klia se na di lɔv we Jiova gɛt mek i de du da kayn gud de.

5-7. Wetin mek Jizɔs nɔ bin gri fɔ lɛ dɛn kɔl am “Gud Ticha”? Us tru tin Jizɔs bin tɔk bɔt?

⁵ Nɔbɔdi nɔ tan lɛk Jiova we i kam pan gudnɛs. Jɔs bifo Jizɔs day, wan man kam to am fɔ aks am wan kwɛstyɔn, ɛn i kɔl am “Gud Ticha.” Jizɔs aks am se: “Wetin mek yu se a gud? Na Gɔd nɔmɔ gud.” (Mak 10:​17, 18) Yu go de wɔnda wetin mek Jizɔs tɔk dat. Wetin mek Jizɔs kɔrɛkt di man? Infakt, Jizɔs na bin “Gud Ticha,” nɔto so?

⁶ Di man bin kɔl Jizɔs “Gud Ticha” fɔ mek Jizɔs in ed big. Jizɔs bin sho se i ɔmbul bay we i mek di man no se na in Papa we de na ɛvin fɔ gɛt da kayn glori de, bikɔs na in gud pas ɔlman. (Prɔvabs 11:​2) Bɔt Jizɔs bin de tɔk bak bɔt sɔntin we na tru. Na Jiova nɔmɔ no wetin gud. Na in nɔmɔ gɛt di rayt fɔ sho wetin gud ɛn wetin bad. We Adam ɛn Iv bin mek trangayes ɛn it di frut frɔm di tik fɔ no wetin gud ɛn bad, dɛn bin de tray fɔ mek dɛnsɛf gɛt di rayt we Gɔd gɛt. Jizɔs nɔ bin tan lɛk dɛn, i bin ɔmbul ɛn i nɔ bin tray fɔ tek dis rayt we in Papa gɛt.

⁷ Apat frɔm dat, Jizɔs bin no se na frɔm Jiova ɔl gud tin de kɔmɔt. Na in de gi “ɔl gud gift ɛn ɔl pafɛkt prɛzɛnt.” (Jems 1:​17) Lɛ wi si aw Jiova gud bay di we aw i fri-an.

8. Aw Jiova dɔn sho in gudnɛs to ɔlman?

⁸ Ɔlman we dɔn liv dɔn bɛnifit frɔm di gud we Jiova gud. Sam 145:​9 tɔk se: “PAPA GƆD [“Jiova,” NWT] gud  to ɔlman.” (Na wi mek am italiks.) Us ɛgzampul dɛn sho se Jiova gud to ɔlman? Di Baybul se: “I bin de sho udat i bi bay di gud tin dɛn we i de du. I de gi una ren we de kɔmɔt na ɛvin ɛn mek di tin dɛn we una kin plant bia bɔku bɔku wan we di tɛm rich; i de gi una it we de mek una satisfay ɛn mek una rili gladi.” (Akt 14:​17) Yu dɔn ɛva fil gud we yu de it fayn it? If Jiova nɔ bin sho se i gud bay we i mek dis wɔl we gɛt wata we de klin insɛf ɛn ‘mek plant dɛn bia bɔku bɔku wan we di tɛm rich,’ it nɔ bin fɔ de. Jiova nɔ de du dis gud jɔs to di wan dɛn we lɛk am, i de du am to ɔlman. Jizɔs bin se: “I de mek ren kam pan di pipul dɛn we de du wetin rayt ɛn di wan dɛn we nɔ de du wetin rayt.”—Matyu 5:​45.

9. Aw apul de sho se Jiova gud?

 ⁹ Bikɔs wi kin de gɛt san, ren, ɛn di tin dɛn we wi kin plant kin bia bɔku bɔku wan we di tɛm rich, plɛnti pipul dɛn nɔ kin tek Gɔd in gudnɛs mek ɛnitin. Fɔ ɛgzampul, tink bɔt apul. Dis frut kin gro na kɔntri dɛn we nɔ kol pasmak ɔ wam pasmak. Bɔt i fayn, i swit fɔ it, i gɛt bɔku wata we de mek pɔsin fil fayn, ɛn i gɛt tin dɛn we gud fɔ di bɔdi. Yu no se na di wɔl wi gɛt lɛk 7,500 difrɛn apul dɛn we gɛt kɔlɔ dɛn lɛk rɛd, gold, yɛlo, ɛn grin? Ɛn yu no se dɛn de bay sayz, frɔm lɛm to grepfrut sayz? If yu ol wan smɔl apul sid na yu an, i go luk lɛk i nɔ impɔtant.  Bɔt da smɔl sid de kin gro fɔ bi wan pan di tik dɛn we pipul dɛn rili lɛk. (Sɔlɔmɔn In Siŋ 2:​3) Arawnd Mach ɔ Epril, di apul tik kin gɛt fayn fayn flawa dɛn pan am; ɛn arawnd Sɛptɛmba ɔ Ɔktoba i kin bia frut. Ɛni ia, apul tik kin bia frut we kin ful-ɔp 20 katun dɛn, ɛn ɛni wan pan dɛn katun dɛn de kin we 19 kilogram! Ɛn apul tik kin bia frut fɔ lɛk 75 ia.

10, 11. Aw di si, yɛri, smɛl, fil, ɛn tes we wi de tes sho se Gɔd gud?

¹⁰ Bikɔs Jiova gud, i mek wi bɔdi “wɔndaful” we; i mek wi ebul fɔ si, yɛri, smɛl, fil, ɛn tes di tin dɛn we i mek ɛn ɛnjɔy dɛn. (Sam 139:​14) Tink bɔt wetin wi bin tɔk na di fɔs paregraf na dis chapta. Wetin dɛn pipul dɛn de bin si we mek dɛn gladi? We pikin de laf. We ren de fɔdɔm na fam. Di rɛd, gold, ɛn mov kɔlɔ we kin de na di skay we di san de go dɔŋ. Jiova mek mɔtalman yay fɔ si pas 300,000 difrɛn kɔlɔ dɛn! Wi yes de yɛri di difrɛn sawnd dɛn we pɔsin we wi lɛk de tɔk, di sawnd we tik dɛn de mek we briz de blo, ɛn we smɔl pikin de laf we i gladi pasmak. Wetin mek wi ebul fɔ ɛnjɔy fɔ si ɛn yɛri dɛn kayn tin dɛn ya? Di Baybul se: “PAPA GƆD [“Jiova,” NWT] mek yes fɔ yɛri ɛn yay fɔ si.” (Prɔvabs 20:​12) Bɔt dis na jɔs tu pan di tin dɛn we Jiova gi wi fɔ ɛnjɔy layf.

¹¹ Di smɛl we wi ebul fɔ smɛl sɔntin na wan ɔda we we de sho se Jiova gud. Mɔtalman nos ebul fɔ smɛl lɛk 10,000 difrɛn sɛnt dɛn. Tink bɔt sɔm pan dɛn: we dɛn de kuk it we yu lɛk, flawa dɛn, lif dɛn we dɔn fɔdɔm, ɛn smok we de kɔmɔt pan faya. Ɛn di fil we yu ebul fɔ fil sɔntin kin mek yu fil di briz na yu fes, we pɔsin we yu lɛk de ɔg yu, ɛn di smut we frut dɛn smut. We yu bɛt sɔntin, yu de ebul fɔ no in tes. Yu tɔŋ de mek yu ebul fɔ tes di difrɛn flevɔ dɛn we de insay di it. So, wi gɛt bɔku rizin dɛn fɔ tɔk bɔt Jiova se: “Nɔto kɔmɔn gud tin yu  dɔn kip fɔ udat gɛt fred fɔ yu we de wɔship yu.” (Sam 31:​19) Bɔt aw Jiova dɔn “kip” gud tin dɛn fɔ di wan dɛn we de fred am?

12. Pan di gud tin dɛn we Jiova de gi wi, uswan rili impɔtant? Wetin mek?

¹² Jizɔs bin se: “Dɛn rayt se: ‘Nɔto it nɔmɔ go mek mɔtalman kɔntinyu fɔ liv, bɔt na we i du ɔl wetin Jiova se.’” (Matyu 4:​4) Fɔ tru, di tin dɛn we Jiova de gi wi fɔ lan bɔt am bɛtɛ pas di gud tin dɛn we i de gi wi we wi de si, bikɔs dɛn go mek wi gɛt layf we go de sote go. Insay Chapta 8 na dis buk, wi bin lan se insay dis las dez, Jiova de yuz in pawa fɔ mek sɔntin lɛk aw i bin de fɔ lɛ wi ɛnjɔy di pis we i de gi. Wan men tin we wi de ɛnjɔy na di bɔku bɔku tin dɛn we i de gi wi fɔ lan bɔt am.

13, 14. (a) Wetin di prɔfɛt Izikɛl bin si na di vishɔn? Wetin di vishɔn min fɔ wi tide? (b) Us gud tin dɛn Jiova de gi in fetful savant dɛn fɔ lɛ dɛn gɛt layf?

¹³ Di prɔfɛt Izikɛl bin si wan vishɔn bɔt wan tɛmpul we dɛn mek bak ɛn we wɔndaful. Wata bin de kɔmɔt na dis tɛmpul, ɛn as di wata de rɔndɔŋ na so i de big ɛn dip sote i tɔn big big riva. Ɛnisay we di riva go, blɛsin de go de. Tik dɛn we na it ɛn mɛrɛsin bin de gro de fayn fayn wan na di ɛj pat na di riva. Ɛn di riva ivin mek tin dɛn gɛt layf na di Dɛd Si we gɛt bɔku bɔku sɔl! (Izikɛl 47:​1-12) Bɔt wetin ɔl dis min?

¹⁴ Di tɛmpul we Izikɛl si insay di vishɔn min di arenjment we Jiova go mek fɔ lɛ in pipul dɛn wɔship am bak di rayt we. Jɔs lɛk da riva we Izikɛl si pan vishɔn, di gud tin dɛn we Gɔd go gi in pipul dɛn fɔ lɛ dɛn gɛt layf go rili bɔku. Frɔm we Jiova in pipul dɛn dɔn bigin fɔ wɔship am bak di rayt we insay 1919, i dɔn blɛs dɛn  wit gud tin dɛn we go mek dɛn gɛt layf. Aw? Na bay we i de mek dɛn gɛt Baybul, buk, ɛn magazin dɛn, mitin dɛn, ɛn kɔnvɛnshɔn dɛn fɔ ɛp bɔku bɔku pipul dɛn fɔ no di trut. Ɛn dat dɔn mek Jiova tich in pipul dɛn fɔ no bɔt di gud tin we pas ɔl we i dɔn du fɔ mek dɛn go gɛt layf, dat na di prayz we i mek Krays pe fɔ fri bɔku pipul dɛn. Dis dɔn mek am pɔsibul fɔ lɛ ɔl di wan dɛn we rili lɛk Jiova ɛn fred am klin na in yay ɛn gɛt di op fɔ de sote go. * Frɔm we dis las dez bigin, Jiova in pipul dɛn dɔn de gɛt bɔku tin dɛn fɔ lan bɔt am, bɔt pipul dɛn na di wɔl nɔ gɛt dat.—Ayzaya 65:​13.

15. Aw fetful mɔtalman dɛn go bɛnifit frɔm Jiova in gudnɛs insay Krays in Wan Tawzin Ia Rul?

¹⁵ Bɔt di riva we Izikɛl bin si na in vishɔn nɔ go stɔp fɔ rɔn we dis wɔl dɔn. Bifo dat, di riva go kɔntinyu fɔ rɔn mɔ ɛn mɔ insay Krays in Wan Tawzin Ia Rul. Dɔn Jiova go yuz Jizɔs in sakrifays fɔ mek fetful mɔtalman dɛn pafɛkt smɔl smɔl. Ɛn na di Kiŋdɔm we di Mɛsaya go rul i go yuz fɔ du dis. Wi go rili gladi fɔ Jiova in gudnɛs!

16. Aw di Baybul mek wi no se Jiova kin sho in ɔda fayn fayn kwaliti dɛn we i de du gud? Wetin na sɔm pan dɛn kwaliti dɛn ya?

¹⁶ Jiova in gudnɛs nɔ jɔs min se i fri-an. Gɔd bin tɛl Mozis se: “A go mek ɔl mi gudnɛs de bifo yu, ɛn a go kɔl mi nem ‘PAPA GƆD’ [“Jiova,” NWT] fɔ lɛ yu yɛri.” Afta dat di Baybul se: “Jiova pas bifo am ɛn bigin tɔk se: ‘Jiova, Jiova, mi na Gɔd we de sho masi ɛn sɔri-at, a nɔ de vɛks kwik, mi lɔv nɔ de dɔn, ɛn a de tɔk tru ɔltɛm.’”  (Ɛksodɔs 33:​19; 34:​6, NWT) Jiova kin sho in ɔda fayn fayn kwaliti dɛn we i de du gud.

17. Wetin sho se Jiova de tek tɛm we i de trit pipul dɛn?

¹⁷ Dis vas de tɛl wi aw Jiova de trit pipul dɛn. Jiova nɔto pɔsin we ash, we nɔ gɛt filin fɔ pipul dɛn, ɔ we de yuz in pawa fɔ trit pipul dɛn bad lɛk aw bɔku pipul dɛn we gɛt pawa kin du. Bifo dat, i de tek tɛm du tin ɛn i gud. Fɔ ɛgzampul, Jiova bin tɛl Ebram se: “Duya, es yu ed ɔp usay yu de ɛn luk to di nɔt, sawt, ist, ɛn wɛst.” (Jɛnɛsis 13:​14, NWT) Bɔku Baybul dɛn nɔ gɛt di wɔd “duya.” Bɔt masta sabi bukman dɛn we stɔdi di Baybul notis se di wɔd dɛn we de na di orijinal Ibru gɛt wɔd we sho se wetin Gɔd tɔk nɔto kɔmand, bɔt Gɔd tɔk am di we we sho rɛspɛkt. Ɔda ɛgzampul dɛn de we tan lɛk dis. (Jɛnɛsis 31:​12 NWT; Izikɛl 8:​5, NWT) Jɔs imajin, di Masta we De Rul Ɔlman de se “duya” to ɔdinari mɔtalman! Insay dis wɔl we pipul dɛn ash, dɛn de du tin aw dɛn want, ɛn dɛn de mek rudnɛs, yu nɔ tink se wi fɔ gladi we wi Gɔd Jiova de tek tɛm we i de trit pipul dɛn?

18. Wetin mek di Baybul se Jiova “de tɔk tru ɔltɛm”? Us kɔnfidɛns dis gi wi?

¹⁸ Da sem vas tɔk se Jiova “de tɔk tru ɔltɛm.” Bɔku pipul dɛn na di wɔl nɔ de tɔk tru. Bɔt di Baybul mɛmba wi se: “PAPA GƆD nɔto mɔtalman we de lay.” (Di Nɔmba Dɛm 23:​19) Infakt, Taytɔs 1:​2 se “Gɔd . . . nɔ de lay.” I so gud dat, i nɔ go ɛva lay. So wi kin rili abop pan Jiova in prɔmis dɛn; ɛnitin we i tɔk, i go mɔs du am. Di Baybul ivin se Jiova na “Gɔd we de tɔk tru.” (Sam 31:​5, NWT) Na tru se Jiova nɔ de lay, bɔt nɔto dat nɔmɔ, i de mek wi no bɔku tin dɛn we na tru. Jiova nɔto pɔsin we nɔ de mek pipul dɛn no in biznɛs, ɔ we de kip tin to  insɛf, bifo dat, i de tɛl in fetful savant dɛn bɔku tin. * I de tich dɛn aw fɔ liv dɛn layf akɔdin to di tru tin dɛn we i de sho dɛn so dat dɛn go “kɔntinyu fɔ de na di trut.” (3 Jɔn 3) Aw Jiova in gudnɛs fɔ afɛkt wi?

19, 20. (a) Aw Setan bin tray fɔ mek Iv dawt se Jiova gud? Wetin bin apin we i du dat? (b) We wi mɛmba se Jiova gud, aw dat fɔ afɛkt wi? Wetin mek?

¹⁹ We Setan bin de tɛmt Iv na di gadin na Idɛn, i mek Iv bigin dawt if Jiova gud. Jiova bin dɔn tɛl Adam se: “Yu kin it di frut dɛn pan ɛni tik na di fam [gadin].” Pan ɔl di bɔku bɔku tik dɛn we bin de na di gadin, na wangren wan Jiova bin se mɔtalman nɔ fɔ it pan. Bɔt luk di fɔs kwɛstyɔn we Setan aks Iv. I se: “Fɔ tru tru, PAPA GƆD tɛl una se, una nɔ fɔ it di frut dɛn pan ɔl di tik dɛn na di fam [gadin]?” (Jɛnɛsis 2:​9, 16; 3:​1) Setan twis Jiova in wɔd so dat Iv go tink se Jiova de kip gud tin frɔm dɛn. I sɔri fɔ no se Setan in tatiks wok. Iv bigin fɔ dawt if Gɔd gud pan ɔl we na Gɔd dɔn gi am ɔl wetin i gɛt, jɔs lɛk ɔda man ɛn uman dɛn we kam afta am.

²⁰ Wi no di kayn pwɛlat ɛn sɔfa we di dawt we Iv bin gɛt briŋ kam pan wi. So lɛ wi tink bɔt di wɔd dɛn we de na Jɛrimaya 31:​12, we se: “Dɛn go gladi fɔseka di gud tin dɛn we PAPA GƆD [“Jiova,” NWT] de du.” Wi nɔ fɔ ɛva dawt wetin mek Gɔd du sɔntin, bikɔs na Gɔd we rili gud. Wi fɔ rili abop pan am bikɔs na gud tin nɔmɔ i want fɔ di wan dɛn we lɛk am.

21, 22. (a) Wetin na sɔm tin dɛn we yu go du fɔ sho se yu gladi fɔ Jiova in gudnɛs? (b) Us kwaliti wi go tɔk bɔt na di nɛks chapta ɛn aw i difrɛn frɔm gudnɛs?

 ²¹ Apat frɔm dat, ɛnitɛm we wi gɛt chans fɔ tɛl ɔda pipul dɛn bɔt aw Gɔd gud, wi kin rili gladi. Sam 145:​7 tɔk se Jiova in pipul dɛn “go gladi fɔ we [i] gud.” Wi de bɛnifit frɔm Jiova in gudnɛs ɛvride. Yu nɔ tink se i go fayn fɔ mek yu tɛl Jiova tɛnki fɔ in gudnɛs ɛvride, ɛn ivin tɛl am tɛnki fɔ sɔm patikyula gud tin dɛn we i de du? We wi tink bɔt Jiova in gudnɛs, tɛl am tɛnki ɛvride, ɛn tɛl ɔda pipul dɛn bɔt am, dat go ɛp wi fɔ falamakata wi gud Gɔd. Ɛn as wi de luk fɔ we dɛn fɔ du gud lɛk Jiova, wi go kam nia am mɔ ɛn mɔ. We apɔsul Jɔn bin dɔn ol, i bin rayt: “Di wan we a rili lɛk, nɔ falamakata wetin bad, bɔt falamakata wetin gud. Di wan we de du gud kɔmɔt frɔm Gɔd.”—3 Jɔn 11.

²² Jiova in gudnɛs gɛt sɔntin fɔ du wit in ɔda kwaliti dɛn. Fɔ ɛgzampul, Gɔd in “lɔv nɔ de dɔn” ɔ nɔ de chenj. (Ɛksodɔs 34:​6) Dis kwaliti difrɛn frɔm in gudnɛs bikɔs na to in fetful savant dɛn nɔmɔ i de sho dis kwaliti. Insay di nɛks chapta, wi go lan aw i de du dat.