1, 2. Veya veji kunganyalanga kukuwaha chaKalunga, kaha Mbimbiliya yahanjika ika hakuwaha chaYehova?

 ACHISHINGANYEKE vatu vanalikungulula muusepa wavo, kaha vali nakulya hamwe nakushimutwila nakuseha,nakulivwisa kuwaha kutala omu lili nakulauka likumbi. Kuchihela cheka nawa, njimi nawahilila hakutala muwande wenyi mwomwo namono mavwi avula kaha vula yinaputuka kunokela hajimbuto jenyi. Kweka nawa valunga napwevo vanawahilila hakumona mwanavo naputuka kutambuka.

² Vatu vosena ava vali nakulivwisa kuwaha vyuma kana mwomwo yakuwaha chaYehova Kalunga. Vaka-kwitava kakavulu veji kuhanjikanga ngwavo “Kalunga wamwaza.” Oloze Mbimbiliya yahanjika hakuwaha chaYehova ngwayo: “Omu chatohwa kuwaha chenyi.” (Zekaliya 9:17) Chasoloka nge vatu vavavulu makumbi ano kavatachikiza mwalumbunukila mazu kanako. Uno kuwaha chaYehova Kalunga chalumbununa ika, kaha tuvosena mutu himutu tunahase kunganyala ngachilihi kukuwaha chenyi?

3, 4. Uno kuwaha chalumbununa ika, kaha mwomwo ika natwambila ngwetu kuwaha chaYehova hijila eji kusolwelangamo zangi yenyi?

³ Mumalimi amavulu makumbi ano, lizu “kuwaha” kavalimona nge hilizu likwechi ulumbunwiso wauvuluko. Oloze nganomu valisolola muMbimbiliya, kuwaha hilizu  lyatwama naulumbunwiso wauvulu. Lizu kuwaha lyalumbununa vilinga vyamwaza, vyakukupuka. Shikaho tunahase kwamba ngwetu vyuma vyosena eji kulinganga Yehova vyapwa vyamwaza. Chikupu vene, vilinga vyenyi vyakufwana nge ngolo, nachiyulo, namangana, navilinga vyeka vyosena vyapwa vyamwaza. Chipwe ngocho, chuma chachilemu chikuma shina, kuwaha chaYehova chapwa hijila yize eji kusolwelangamo zangi yenyi. Mwomwo ika tunambila ngocho?

⁴ Kuwaha cheji kulingisanga mutu akafwe vakwavo. Kaposetolo Paulu asonekele ngwenyi, vatu vazanga chikuma kuwaha kuhambakana kwoloka. (Wavaka-Loma 5:7) Muka-kwoloka vanahase kumutachikijila hakukavangiza jishimbi jaKalunga, oloze mutu wamwaza vamutachikijila kuvyuma vyavivulu eji kulinganga. Eji kutondatondanga jijila jakukafwilamo vakwavo. Omu mukiko eji kulinganga Yehova, nganomu natulinangula. Chikupu vene, kuwaha chaYehova chafuma hazangi yenyi yayinene.

5-7. Mwomwo ika Yesu akanyinyine kumuvuluka ngwavo “Muka-kunangula Wamwaza,” kaha muchano muka waulemu anangwile?

⁵ Yehova apwa wamwaza mujila yakulipwila. Yesu ashindakanyine chishina kana omu apwile hano hamavu shimbu kanda afwenga, omu lunga umwe amuhulishile nakuhanjika ngwenyi “Ove Muka-Kunangula Wamwaza.” Yesu amukumbulwile ngwenyi: “Mwomwo ika unanguvulukila ngwove nguwamwaza? Naumwe wauchi apwa wamwaza, kuvanga umwe kaha, ivene Kalunga.” (Mako 10:17, 18) Unahase kulikomokela hajila Yesu akumbulwililemo. Yesu apwile vene muka-kunangula wamwaza, kaha mwomwo ika olwelele uze lunga?

⁶ Chasoloka nge, uze lunga apwile nakwalisa Yesu hakumuvuluka ngwenyi “Muka-kunangula Wamwaza.” Yesu ahanyine upahu wosena kuli Ise wamwilu, uze apwa  wamwaza mujila yakulitulaho. (Vishimo 11:2) Chipwe ngocho, Yesu apwile nawa nakunangula muchano waulemu. Yehova hakupwa Mwata Wakulitulaho, ikiye kaha atwama nalisesa lyakuhakako jishimbi jahanjika havyuma vyakwoloka navyevi vyakuhenga. Omu Alama naEve valikangile nakulya kumutondo wakutachikijilaho kuwaha nakupihya, vasolwele nge vasakile kulisakwila vavene vyuma vyakwoloka navyevi vyakuhenga. Yesu kalingile ngana mwavakikoko, oloze alinyishile nakuseza ngolo jakusakula mumavoko aIse.

⁷ Yesu atachikijile nawa ngwenyi kuli Yehova kukiko kwafuma vyuma vyamwaza vyosena. Ikiye Muka-kuhana “mawana amwaza osena namawana akukupuka osena.” (WaYakova 1:17) Tukekese jino omu kuwaha chaYehova tunahase kuchimwena hamuchima wenyi wakuhana.

8. Yehova asolola ngachilihi kuwaha chenyi kuvatu vosena?

⁸ Mutu himutu anganyalaho lyehi kukuwaha chaYehova. Mukanda waSamu 145:9 wamba ngwawo: “Yehova apwa wamwaza kuvyuma vyakuyoya vyosena.” Mujijila muka asolwelamo kuwaha chenyi kuli vatu vosena? Mbimbiliya ngwayo: “Ikiye ahanyine unjiho hakulinga mwamwaza, hakumihana vula kufuma mwilu, najingonde jakwima mihako, nakumihana vyakulya nakusuulwisa michima yenu.” (Vilinga 14:17) Kutala weji  kulivwisanga kuwaha kulya chamwaza tahi? Tweji kulivwisanga kuwaha kulya chamwaza mwomwo Yehova atengele ano mavu mujila yamwaza. Ngocho tweji kupwanga navyakulya vyakulisala mwomwo yakulitungulula chameya “najingonde jakwima mihako.” Yehova asolola echi kuwaha chenyi kuvatu vosena keshi kuli vaze vamuzanga kahako. Yesu ambile ngwenyi: “Eji kututwisanga likumbi lyenyi hali vaka-kuhuka nahali vatu vamwaza, nakunokesa vula hali vaka-kwoloka nahali vaka-kuhenga.”—Mateu 5:45.

9. Uno muhako vavuluka ngwavo apo wasolola ngachilihi kuwaha chaYehova?

⁹ Vatu vavavulu veji kulelesanga musana, navula, najingonde jakwima mihako, mwomwo kavamona kulema chavyoko. Chakutalilaho, achishinganyeke hamuhako uyema vavuluka ngwavo apo. Ou muhako walisala chikuma mumafuchi amavulu. Muhako kanou wapwa wamwaza chiyovo, uyema, kaha ukwechi meya amavulu navyuma vyeka vyakukafwa mujimba. Tachikiza ngwove ou muhako watwama mumiyachi yakuheta kafwe ku 7,500 mukaye kosena, kaha nawa watwama muulombo wauvulu. Umwe watwama muulombo uchila, nawaulu, nawausungwa, nawamafwo amatamba, kaha nawa umwe waundende ukwavo waunene. Nge unakwate kamukoswa kawo, unahase kukamona nge kamokomoko, oloze hakukatumba nakasoka nakupwa mutondo waunene uze navazanga chikuma. (Mwaso waSolomone 2:3) Ou mutondo weji kufukulanga kuchivatuko chavula, kaha kuheta mungonde yachishika hinawima mihako. Mutondo kana weji kutwamanga kafwe myaka 75 kaha mwaka himwaka weji kwimanga mihako vanahase kulonga muvizuma 20, vyakulema jikilongalamu 19 hachizuma.

10, 11. Uno uhashi uze vatuhana wasolola ngachilihi kuwaha chaKalunga?

 ¹⁰ Mwomwo yakuwaha chenyi, Yehova atuhana mujimba uze atenga “mwakukomwesa,” nauhashi wakutukafwa tumone vilinga vyenyi nakuvivwila kuwaha. (Samu 139:14) Achishinganyeke havyakutalilaho vize twavulukanga kumaputukilo akapetulu uno. Nge kuwapwile kachi vyuma muka vyakwivwishile kuwaha hakuvimona? Pamo kumwetula chamwana, chipwe pamo kunoka chavula. Nyi pamo kuwaha chaulombo walikumbi lize lili nakulauka. Liso lyamutu valitenga nauhashi wakumona miyachi yaulombo wauvulu chikuma. Kaha nawa uhashi wakwivwa vyuma weji kutulingisanga twivwenga lizu lyamutu twazanga, chipwe kuhuhwa chapeho, chipwe kwivwa omu mwaseha kemba. Mwomwo ika tweji kuvwilanga kuwaha hakumona nakuvivwa vyuma kanevi? Mbimbiliya yamba ngwayo: “Yehova ikiye atengele matwitwi akwivwila nameso akutalila.” (Vishimo 20:12) Oloze tunashimutwila kaha hauhashi uvali.

¹¹ Uhashi wakuhumbika hiunjiho ukwavo wasolola kuwaha chaYehova. Mutu nahase kuhumbika mavumba amavulu chikuma. Achishinganyeke havyuma vino: livumba lyavyakulya wasaka vanakuteleka, nalyajitemo, nalyamafwo aumu analukumuka, nalyawishi unakufwinda. Kaha nawa uhashi wakukwata vyuma weji kukulingisanga wivwenga kapeho kanakukwate pekepeke kumeso, nakwivwa kuwaha kulipakata mukasamba namutu wazanga, nakwivwa kuwaha nge unakwate muhako wauvwovu. Kwatwama nawa uhashi wakumakila uze weji kutulingisanga twivwenga kuyema muhako kanou. Nawivwa jino mukanwa yekeyeke mwomwo yamusoji wamuhako kana. Chikupu vene, tukwechi vyuma vyavivulu vyatela kutulingisa tuhanjike kuli Yehova ngwetu:  “Kuwaha chove omwo chavula! Unachilamina vaze vakwivwa woma.” (Samu 31:19) Uno Yehova nalamina ngachilihi kuwaha chenyi vaze vamwivwa woma?

12. Vyuma muka vyavilemu chikuma vize atuhana Yehova, kaha mwomwo ika?

¹² Yesu ambile ngwenyi: “Vasoneka ngwavo: ‘Mutu keshi kuyoyela hambolo kahako, oloze nahamazu akufuma mukanwa kaYehova osena.’” (Mateu 4:4) Chikupu vene, vyuma vyakushipilitu atulongesela Yehova navitukafwa mwamunene kuhambakana vyuma vyakumujimba, mwomwo vyuma vyakushipilitu navitulingisa tukayoye haya myaka. MuKapetulu 8 wauno mukanda, twalinangwile nge Yehova nazachisa ngolo jenyi jakukindulwisa vyuma mumakumbi ano akukuminyina mangana anehe palachise yakushipilitu. Chuma chachilemu chatwama mupalachise kana shina kulya chakushipilitu chakulisala.

13, 14. (a) Vyuma muka amwene kapolofweto Ezekele muchakumwenesa, kaha chakumwenesa kana chalumbununa ika kuli etu makumbi ano? (b) Vyuma muka vyakushipilitu vize Yehova eji kuhananga vangamba jenyi vakushishika vize navivakafwa vakayoye haya myaka?

¹³ Kapolofweto Ezekele, muupolofweto umwe wamuMbimbiliya uze wahanjika havyakukindulwisa vyuma, vamumwenesele tembele yakuwahisa kanawa yize vatohwesele. Kuze kutembele kwafumine kalwiji uze ayilenga nakutohwelako lika nakukunaminako lika. Kaha kuze ayilenga, anehelenga vyuma vyamwaza. Kuchikulo chauze kalwiji kwasokele mitondo yeminenga mihako, kaha mafwo ayo apwilenga akukisa vatu. Kalwiji kana atomesele meya amungwa amuKalungalwiji waKufwa, kaha mwapwile jino vaishi vavavulu. (Ezekele 47:1-12) Uno vyuma kana vyatalishile mulihi?

 ¹⁴ Echi chakumwenesa chatembele chalumbunwine nge Yehova mwakakindulwisa kulemesa chamuchano. Kaha vatu navakamulemesanga jino mujila yize etavila. Kalunga mwakahana vatu jenyi vyuma vyamwaza vyavivulu vize navikavakafwa vakayoye haya myaka, ngana mwakalwiji uze vamwenesele Ezekele. Kufuma vene mu 1919 omu vakindulwishile kulemesa chamuchano, Yehova nahanenga vatu jenyi vyuma vize navikavakafwa vakayoye haya myaka. Uno vyuma muka vene ovyo? Vyuma vyakufwana nge jiMbimbiliya, namikanda yahanjika haMbimbiliya, nakukunguluka chachikungulwilo, nachechi changalila, vinakafwe vatu vavavulu vatachikize muchano waulemu, chikumanyi muchano wakuvuluka ndando yakusokola yaKulishitu. Hakuwana nge Yesu atufwililile, ngocho vatu vosena vaze vazanga Yehova nakumuvumbika navapwanga nachivezu chamwaza nakupwa nalutalililo lwakukayoya haya myaka. a Numba tuhu mumakumbi ano akukuminyina vatu mukaye vali nazala yakushipilitu, oloze vatu jaYehova vali nakulivwisa kuwaha kulya chakushipilitu.—Isaya 65:13.

15. Uno muChiyulo chaKulishitu chaMyaka 1,000, kuwaha chaYehova nachikanganyalisa ngachilihi vatu vakushishika chindende chindende?

¹⁵ Uze kalwiji amwene Ezekele muchakumwenesa mwakapwako lika nahanyima yakukuma chakatwamino kamyaka yino. Mwakatohwelako lika chikuma muChiyulo chaKulishitu chaMyaka 1,000. Yehova jino mwakazachisa ndando yakusokola yaYesu kuhichila muWangana wauMeshiya mangana akakafwe vatu vakushishika  vakapwe vakukupuka chindende chindende. Halwola kana natukawahilila chikuma omu natukanganyala kukuwaha chaYehova.

16. Uno Mbimbiliya yasolola ngachilihi nge kuwaha chaYehova chamulingisa apwenga navilinga vikwavo, kaha vilinga vimwe muka vene ovyo?

¹⁶ Yehova kasolola kuwaha chenyi kuhichila mukuhana kahako. Alwezele Mose ngwenyi: “Nangukakulingisa ukamone kuwaha chami, kaha nawa nangukavilika lijina lyami lyaYehova kuli ove.” Ou mujimbu wamba nawa ngwawo: “Yehova ahichilenga kumeso aMose nakuvilika ngwenyi: ‘Yehova, Yehova, Kalunga wakeke nakukokweza, wakushipwokela kukwata utenu, wazangi yakwilila, wamuchano.’” (Kulovoka 33:19; 34:6, kwinyikila chamwishi) Kuwaha chaYehova chamulingisa apwenga navilinga vikwavo vyamwaza vyavivulu. Tushimutwileko kaha havilinga vivali.

17. Uno kukokweza chapwa chika, kaha Yehova nachisololanga ngachilihi kuvatu vakuhona kukupuka?

¹⁷ “Kukokweza.” Lizu lyakwamba ngwavo “kukokweza” valyalumuna nawa ngwavo “kutetela.” Kaha lizu kana lyatukafwa tutachikize vyuma vyavivulu kutalisa kujila Yehova eji kuzakaminangamo vatu. Yehova kapwa ngana mwavatu vakwechi ngolo jakuyula vaze veji kutenukanga nakuyanjisa vakwavoko, oloze ikiye apwa wamuvwovu kaha nawa walikoji. Chakutalilaho, Yehova alwezele Apalama ngwenyi: “Andula meso ove, oho vene uli, utale kunote, nakusulo, nakumututuko, nakumulauko.” (Kuputuka 13:14) Vatu valinangula chikuma vyaMbimbiliya vamba ngwavo, mulilimi lyakulivanga lyachiHepeleu, vazachishile lizu lize lyasolola nge hanjikiso kana yapwile yakulembelela keshi yakuhana lushimbiko.  Achishinganyeke kulinyisa chaMwata wakulitulaho mwilu nahamavu hakulembelela vatu. Twasuuluka chikuma hakutachikiza nge Yehova Kalunga ketu eji kuhanjikanga nayetu nakukokweza, hakuwana nge tuli mukaye kaze kazala navatu vahanjikiso yautenu, nakasautu.

18. Mujila muka Yehova apwila “wamuchano,” kaha mwomwo ika mazu kana apwila akutufwelelesa?

¹⁸ “Wamuchano.” Vatu mukaye vamona kwonga kupwa nge hikulya chavo. Oloze Mbimbiliya yeji kutwanukisanga ngwayo: “Kalunga kapwa nge mutuko numba ongenga.” (Kulava 23:19) Hali WaChituse 1:2 nawa ngwavo, ‘Kalunga kongako.’ Chapwa ngocho mwomwo yakuwaha chenyi. Shikaho vyuma ashika Yehova vyapwa vyamuchano, kaha mazu enyi eji kutesangamo lwola lwosena. Yehova vamuvuluka ngwavo, “Kalunga wamuchano.” (Samu 31:5) Kaswekela vangamba jenyi vakushishika muchano wenyiko, oloze eji kuvasolwelanga hatoma mangana enyi amavulu. b Eji kuvanangulanga mwakutwamina mumuchano kana mangana vatwaleho “kutambuka lika mumuchano.” (WaYowano 3, 3) Uno kuwaha chaYehova nachitunganyalisa ngachilihi tuvosena mutu himutu?

19, 20. (a) Kafuta muka azachishile Satana hakusaka kutangisa Eve ahone kufwelela kuwaha chaYehova, kaha vyuma muka vyafuminemo? (b) Uno kuwaha chaYehova nachitunganyalisa ngachilihi, kaha mwomwo ika?

¹⁹ Omu Satana esekele Eve mumilemba yaEtene, afwililile  kumutangisa, mangana ahone kufwelela mukuwaha chaYehova. Yehova alwezele Alama ngwenyi: “Kumitondo yoseneyi yili mumilemba unahase kulyangako tuhu.” Yehova amukanyishile kulya kumutondo umwe kaha, oloze amwitavishile kulya kumitondo yeka yayivulu yamumilemba. Achitale omwo Satana ahulishililemo Eve. Ambile ngwenyi: “Uno Kalunga nambe chikupu ngwenyi kamwatela kulya kumitondo yoseneyi yili mumilembako nyi?” (Kuputuka 2:9, 16; 3:1) Satana alumwine mazu aYehova nakulingisa Eve ashinganyeke ngwenyi Yehova pamo avaswekelelele vyuma vyamwaza. Chaluvinda, kafuta kenyi kazachile. Eve aputukile kukakasana kuwaha chaKalunga uze amuhanyine vyuma vyosena apwile navyo, ngana mwamalunga namapwevo vapwileko hanyima yenyi.

²⁰ Twatachikiza ngwetu vatu vosena vali nakuyanda mwomwo Eve navatu veka vakakasanyine kuwaha chaYehova. Shikaho, tutale havyuma natulinangula kumazu ahali Yelemiya 31:12, akwamba ngwavo: “Navakawahilila havyuma vyamwaza mwakavalingila Yehova.” Chikupu vene, twatela kuwahilila navyuma mwakatulingila Yehova. Katwatela kukakasana vishinganyeka vyaKalunga ketu uze azala nakuwahako. Twatela kumufwelela muvyuma vyosena, mwomwo eji kuhananga vyuma vyamwaza kuli vaze vamuzanga.

21, 22. (a) Vyuma muka vimwe nausaka kulinga mwomwo yakuwaha chaYehova? (b) Natushimutwila hachuma muka mukapetulu nakavangizaho, kaha chuma kana chalihandununa ngachilihi nakuwaha chaYehova?

²¹ Tweji kwivwanga nawa kuwaha chikuma nge natushimutwilanga navakwetu vyakuwaha chaKalunga. Mukanda waSamu 145:7 wahanjika havatu jaYehova ngwawo: “Navahanjikanga omu navanuka kuwaha chove chachinene.” Hakumbi hakumbi, tweji kunganyalanga kukuwaha chaYehova mujijila jajivulu. Fwilanga kusakwililanga  Yehova hakuwaha chenyi hakumbi hakumbi, nakuvulukako vyuma vimwe vinakwivwisa kuwaha. Nge natushinganyekanga hakuwaha chaYehova, nakumusakwililanga hakumbi hakumbi hachuma kana, nakulwezako vakwetu vyakuwaha chenyi, kaha nachitukafwa tulondezeze Kalunga ketu wamwaza. Omu natufwilanga kuwana jijila jakulingilamo vyuma vyamwaza kuli vakwetu, ngana muze eji kulinganga Yehova, kaha natupandama chikuma kuli ikiye. Kaposetolo Yowano uze apwile kashinakaji asonekele ngwenyi: “Ove ngwazanga, kanda naulondezezanga vyuma vyavipiko, oloze londezezanga vyuma vyamwaza. Ou eji kulinganga mwamwaza napu wakuli Kalunga.”—WaYowano 3, 11.

²² Kuwaha chaYehova nawa chapandama kuvilinga vyenyi vikwavo. Chakutalilaho, Kalunga “wazangi yakwilila.” (Kulovoka 34:6) Zangi yaYehova yakwilila yalihandununa nakuwaha chenyi, mwomwo eji kuyisolwelanga kaha vangamba jenyi vakushishika. Mukapetulu nakavangizaho natulinangula omwo eji kulingilangamo ngocho.