1, 2. Uuwanawa waKalunga owu thike peni, nOmbiimbeli otayi wu tsu omuthindo ngiini?

NATU tye ando ookuume mboka yi etha nale oye li pamwe tayo ontele okamutenya, taya li pamwe, taya yolo nokupopya iinima iiwanawa mbyoka ye wete. Po mpeya opu na omunepya ta tala epya lye nkene lya mena nokwiimemeha a panda sho e wete omvula ya zizimika nokonima oya tameke okunyaganya. Mpeya opu na omusamane nomukulukadhi ya nyanyukwa okumona okanona kawo taka mbandanga.

² Aantu mboka otaya nyanyukilwa oshinima sha faathana, kutya nee oye shi shi nenge kaye shi shi, shoka shi li uuwanawa waJehova Kalunga. Aantu momalongelokalunga olundji ohaya popi kutya “Kalunga omwanawa.” Ombiimbeli oya tsa omuthindo nawa uukwatya we tayi ti: “Uuwanawa woye owu thike peni!” (Episalomi 31:19) Ihe aantu aashona yowala kunena yu uvite ko lela oohapu ndhoka. Uuwanawa waJehova owa kwatela mo shike, nuukwatya we mboka owa guma ngiini kehe gumwe gwomutse?

3, 4. Uuwanawa oshike, nomolwashike tawu popiwa kutya owu li oshitopolwa sha simanenena shohole yaJehova?

³ Momalaka ogendji kunena oshitya ‘uuwanawa’ oshi na eityo lya mbwalangandja. Ihe paMbiimbeli hasho shi li ngawo. Otayi shi popi shi li uukwatya wa dhenga mbanda wopamikalo. Otatu vulu okutya kehe shimwe shoka Jehova ta ningi osha dhingolokwa kuuwanawa we. Omaukwatya ge agehe ngaashi, oonkondo, uuyuuki nuunongo we, omawanawa kaaku na we. Natango, uuwanawa owu li oshitopolwa sha simanenena shohole ye. Omolwashike mbela?

 ⁴ Uuwanawa owu na okuulikwa miilonga. Omuyapostoli Paulus okwe shi popi kutya uukwatya mboka owo wuhokitha momuntu wu vulithe uuyuuki. (Aaroma 5:7) Omuyuuki oha dhiginine iitegelelwa yompango, ihe omuntu omwaanawa oha ningi oshindji shi vulithe mpoka. Ohi iyile mo ye mwene nkene e na okukwathela yalwe. Ngaashi tatu ke shi mona, Jehova omuntu omwaanawa shili. Osha yela kutya uuwanawa we ohe wu ulike omolwohole ye kamana.

5-7. Omolwashike Jesus a li a tindi okwiithanwa “Muhongi omwaanawa,” nokwa li a koleke oshili ya simanenena yini?

⁵ Jehova ohu ulike wo uuwanawa we momukalo gwi ikalekelwa. Manga Jesus inaa sa, omulumentu gumwe okwa li e mu pula epulo ta longitha uutumbulilo “Muhongi omwaanawa.” Jesus okwe mu pula: “Omolwashike to ti ndje omwaanawa? Kaku na nando omuntu omwaanawa, oKalunga awike.” (Markus 10:17, 18) Epulo ndyoka otashi vulika li ku ipulithe kutya omolwashike Jesus a li a pukulula omulumentu ngoka? Mbela Jesus ka li shili ‘Omuhongi omwaanawa’?

⁶ Osha yela kutya omulumentu ngoka okwa li ta longitha edhinasimaneko “Muhongi omwaanawa” momukalo gwokambweenga. Omolweifupipiko lye, Jesus oku ukitha esimano kuHe gwomegulu ngoka e na uukwatya uuwanawa wa shiga ko. (Omayeletumbulo 11:2) Kakele kaashono, Jesus okwa li wo a koleke oshili ya simanenena kutya Jehova oye awike ta vulu okuutha kutya oshike naanaa oshiwanawa naashoka oshiwinayi. Adam naEva oya li ya hala okwiihogololela kuyo yene shoka oshiwanawa sho ya li komuti gwokutseya uuwanawa nuuwinayi. Mepingathano naashoka, Jesus okwa li i ifupipike nokuzimina kutya He oye owala ta vulu okuutha shoka shi li mondjila naashoka sha puka.

⁷ Shimwe ishewe, Jesus okwa li e shi kutya Jehova oye onzo yiinima ayihe iiwanawa. Oye Omugandji ‘gwoshipewa kehe oshiwanawa nomagano kehe ga gwana ga pwa.’ (Jakob 1:17) Natu konakoneni kutya uuwanawa waJehova owi iwetikile ngiini mokugandja kwe nehalo ewanawa.

8. Ongiini Jehova ha ningile aantu ayehe uuwanawa?

⁸ Kehe gumwe ngoka a li ko nale nenge e li ko okwa mona uuwanawa muuwanawa waJehova. Episalomi 145:9 otali ti: ‘OMUWA oku na ombili naantu ayehe.’ Iiholelwa yimwe yini tayi ulike kutya oha ningile aantu uuwanawa? Ombiimbeli otayi ti: “Oye okwa kala hi iholola miilonga mbyoka he yi ningile aantu: ohe mú pe omvula tayi zi kegulu niilya pethimbo lyo opala, ohe mú pe iikulya noha nyanyudha oomwenyo dheni.” (Iilonga 14:17) Mbela iho kala wa tuntukwa ngele wa lya iikulya iiwanawa? Ando Jehova ka li i inyengithwa kuuwanawa we okushita evi nedhingoloko lyomeya noku tu pa “iilya pethimbo lyo opala,” ando ihatu mono iipalutha. Jehova iha ningile owala uuwanawa mboka ye mu hole, ihe ohe wu ningile aantu ayehe. Jesus okwa ti: “Etango lye ohe li pitithile  aawinayi naawanawa, nomvula ye ohe yi lokithile aayuuki naalunde.”—Mateus 5:45.

9. Eyapula otali ulike ngiini kutya Jehova omwaanawa?

⁹ Aantu oyendji oya dhina omagano gaJehova ngoka he tu pe aluhe momumvo aguhe nehalo ewanawa ngaashi epito lyetango, omvula nosho wo iiyimati pethimbo lyayo. Pashiholelwa, natu tale koshiyimati sheyapula. Miilongo moka mu na onkalo yombepo yuupokati omayapula oge shiwike apuhe. Omawanawa okutalwa, omatoye noge na omeya ogendji niitungithi mbyoka ya pumbiwa molutu. Mbela owe shi tseya ngaa kutya muuyuni omu na omaludhi gomayapula 7 500 ge na omaunene ga yoolokathana nomalwaala gi ili nogi ili?  Gamwe omatiligane, omashunga nagamwe omazizi. Gamwe oge thike pomandjembele muunene, gamwe opomalemune nagamwe oge na uunene wopokati. Onkenya yeyapula ohayi monika ya fa okanima okashonashona ngele wu yi na meke. Ihe ngele we yi kunu ohayi koko e tayi ningi omuti omwaanawa. (Ondjimbolela 2:3) Pethimbo lyokwenye, ohagu tula ko oonsheno dhihokitha okutala noposhikufuthinge kehe ohagu imi iiyimati. Uule womimvo 75 lwaampono, omuyapula ohagu imi iiyimati tayi vulu okuudha iipakete yomayapula yi na ookilograma 19.

10, 11. Iiyuvitithi otayi ulike ngiini kutya Kalunga omwaanawa?

¹⁰ Omolwuuwanawa we, Jehova okwe tu pa omalutu tagu ulike kutya ‘otwa shitwa nuunkulungu’ mboka hawu tu kwathele tu nyanyukilwe iilonga ye. (Episalomi 139:14) Dhiladhila natango kiinima mbyoka ya tumbulwa petameko lyontopolwa ndjika. Iinima yini tayi vulu okunyanyudha omuntu ngele te yi tala? Otashi vulika ho kala wa panda okutala oompanda dhokanona taki imemeha, omvula tayi loko, olwaala olutiligane nolushunga nomakwawo ga yoolokathana uuna etango tali ningine. Eho lyomuntu ohali vulu okutala omalwaala ga yoolokathana ge vulithe 300 000. Omakutsi getu ohagu uvu omawi gi ili nogi ili ngaashi ombepo tayi inyengitha omiti nosho wo okuyola kwokanona. Olye e tu shita nuukwatya wokumona nokuuva? Ombiimbeli otayi ti: “Okutsi hoka taku uvu ko neho ndyoka tali mono ko—ayihe iyali OMUWA oye e yi shiti.” (Omayeletumbulo 20:12) Ihe iilyo mbyoka iyali hayo owala tu na komalutu getu.

¹¹ Okuuva omazimba nako oku li euliko lyuuwanawa waJehova. Eyulu lyomuntu ohali vulu okuyolola omazimba ga yoolokathana ge li 10 000. Gamwe gomugo ongaashi: ezimba lyiikulya ya telekekeka, lyoongala, omafo gomiti ga lokelwa pevi nosho wo ezimba lyolwithi. Ohatu vulu wo okuuva noshipa, ngaashi okuuva ombepo ontalala sho tayi tu dhenge moshipala, okuuva nawa sho to papatelwa kukuume koye nokuuva omuthenu gwoshiyimati ngele to shi thengathenga.  Ngele to li sha, oho kala wu uvite omulyo gwasho. Ngele to li oshiyimati oho uvu omulyo gwasho omwaanawa noonkondo. Otu na omatompelo ogendji okwiitaala kutya Jehova omwaanawa. Episalomi 31:19 otali ti: “Uuwanawa woye owu thike peni! Owe wu pungulila mbo haa ku simaneke.” Jehova oha ‘pungulile’ ngiini uuwanawa mboka haye mu tila?

12. Omasiloshimpwiyu ga simanenena geni Jehova he tu pe, nomolwashike tatu tile kutya oga simanenena?

¹² Jesus okwa ti: “Okwa nyolwa: ‘Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.’” (Mateus 4:4) Omasiloshimpwiyu gopalutu ngoka Jehova he te pe oge vulike kokule kwaangoka gopambepo molwaashoka otaga vulu oku tu etela uuwanawa tawu kalele notage tu petha omwenyo gwaaluhe. MOntopolwa 8 yembo ndika otwi ilonga mo kutya Jehova okwa longitha oonkondo dhe dhokushitulula momasiku ngaka gahugunina e etithe po oparadisa yopambepo. Oshinima oshiwana moparadisa ndjoka osho iikulya oyindji yopambepo mbyoka he tu pe.

13, 14. (a) Omupolofeti Hesekiel okwa li a mono shike memoniko, notali gwanithwa ngiini kunena? (b) Omasiloshimpwiyu gopambepo geni Jehova ha pe aapiya ye aadhiginini?

¹³ Omupolofeti Hesekiel okwa li a pewa emoniko li na ko nasha netungululo enene lyotempeli noshinge shayo. Okwa li a mono omeya taga kunguluka taga zi motempeli ngoka ga ningi “omulonga” omunene. Kehe mpoka tagu kungulukile otagu ende tagu gandja omayambeko. Kominkulo dhago oku na omiti dha ziza nawa hadhi gandja iiyimati nomafo gadho ogokwaaludha. Ogwa li gwa mwenyopaleka nokuli Efuta lya sa ndyoka lya li lyu udha omongwa. (Hesekiel 47:1-12) Iinima ayihe mbyoka otayi thaneke shike?

¹⁴ Emoniko ndyoka olya li tali ulike kutya Jehova ota ka tungulula elongelokalunga lya yogoka ndyoka tali thanekwa kotempeli yomemoniko lyaHesekiel. Ngaashi omulonga gwomemoniko, Kalunga okwa kala ta gandja koshigwana she  omasiloshimpwiyu ngoka ge ende tagi indjipala notage ke shi petha omwenyo gwaaluhe. Jehova okwa kala nokuyambeka oshigwana she nomasiloshimpwiyu ngoka, okuza sho elongelokalunga lya yogoka lya tungululwa mo 1919. Ngiini mbela? Okwa kala ta pe aapiya ye ooshili dha simanenena okupitila mOmbiimbeli, miileshomwa ya kankamena kOmbiimbeli, okupitila mokugongala nomiigongi. Okupitila miinima mbyoka Jehova okwa longo oshigwana she kombinga yekuliloyambo lyaKristus lya simanenena ndyoka hali shi ningi tashi wapa opo tu kale neiyuvo lya yela koshipala shaJehova notu kale tu na etegameno lyomwenyo gwaaluhe ngoka gu uvanekelwa ayehe mboka ye Mu hole shili nohaye mu tila. * Nonando momasiku gahugunina muka tu li ngashingeyi, aantu muuyuni otaya si ondjala pambepo, oshigwana shaJehova oshi na iikulya yopambepo ya gwana.—Jesaja 65:13.

15. Uuwanawa wuni Jehova ta ka ningila aantu aadhiginini pethimbo lyEpangelo lyaKristus lyOmimvo Eyuvi?

¹⁵ Omulonga ngoka otagu ka tsikila nokukunguluka ngele uuyuni mbuka wa hulu po. Otagu ka kunguluka nokuli unene noonkondo pethimbo lyEpangelo lyaKristus lyOmimvo Eyuvi. Okupitila mUukwaniilwa wopaMesiasa Jehova ota ka longitha pakuudha ongushu yekuliloyambo lyaJesus opo a thikithe aantu aadhiginini kashona nakashona megwaneneno. Itatu ka nyanyukilwa tuu uuwanawa waJehova pethimbo ndyoka!

16. Ombiimbeli otayi ulike ngiini kutya uuwanawa waJehova owa kwatela mo omaukwatya galwe, nagamwe gomugo ogeni?

¹⁶ Uuwanawa waJehova inawu kwatela mo owala uukwatya we wokugandja nehalo ewanawa. Okwa lombwele Moses a ti: “Otandi ka pititha eadhimo lyandje koshipala shoye  nokutumbula edhina lyandje.” Lwanima, Ombiimbeli oya ti: “OMUWA okwa piti koshipala she ti igidha ta ti: ‘Ongame OMUWA, ongame Kalunga omunamutimahenda, omunalukeno nomutalanteni, ihandi geye mbala nondu udha esilohenda [noshili, NW].’” (Eksodus 33:19; 34:6) Uuwanawa waJehova owa kwatela mo iinima oyindji iiwanawa. Natu tale iyali yomuyo.

17. Jehova ohu ungaunga ngiini naantu inaaya gwanenena, noshike hashi mu inyengitha e shi ninge?

¹⁷ ‘Omunalukeno.’ Uukwatya mbuka owo hawu ningitha Jehova u ungaunge naantu nesimaneko nomomukalo omwaanawa. Oku na ombili nolukeno. Ina fa aantu mboka ye na oonkondopangelo hayu ungaunga nonyanya nayakwawo, kaaye na ondjaalela noihaya kala ye na ko nasha nayo. Pashiholelwa, okwa lombwele Abram a ti: “Lengalenga koombinga adhihe okuza mpoka wu li.” (Genesis 13:14) Aalongwantu yOmbiimbeli oye shi ndhindhilika kutya mOshihebeli shonale oohapu ndhoka odha li dha nyolwa momukalo ngoka tagu ulike kutya Kalunga okwa li ti indile nesimaneko a ningilwe oshinima shoka ta pula. Opu na wo oompito dhilwe mpoka omukalo ngoka gwa longithwa mOmanyolo. (Genesis 31:12; Hesekiel 8:5) Dhiladhila owala Omunamapangeloagehe ta pula nesimaneko a ningilwe sha kaantu. Aantu muuyuni oye na onyanya noihaya yawala. Mbela itashi hekeleke tuu okukala tu shi kutya Jehova ohu ungaunga naantu nolukeno nomomukalo omwaanawa omolwohenda ye?

18. Omeityo lini Jehova ‘u udha oshili,’ nomolwashike oohapu ndhoka tadhi tu hekeleke?

¹⁸ ‘Oku udha oshili.’ Aantu muuyuni kunena ihaya popi oshili. Ihe Ombiimbeli otayi tu dhimbulukitha tayi ti: “Kalunga hamuntu a popye iifundja.” (Numeri 23:19) Titus 1:2 ota ti: ‘Kalunga iha fundju.’ Uuwanawa we itawu mu pitike e shi ninge. Onkee ano, omauvaneko ge oge shi okwiinekelwa lela, noohapu dhe ohadhi gwanithwa aluhe. Ota popiwa nokuli e li ‘Kalunga omunashili.’ (Deuteronomium 32:4) Kakele owala  kokwaaha popya iifundja, ohe tu longo ooshili odhindji. Iha ngungunine nenge a holeke uuyelele woshili, ihe oha nongeke aapiya ye aadhiginini noku ya pa uunongo oundji. * Okwe ya longo nokuli nkene ye na okukala moshili “noku yi dhiginina.” (3 Johannes 3) Uuwanawa waJehova owu na oku tu inyengitha tu ninge shike pauhandimwe?

19, 20. (a) Satana okwa li e shi ende ngiini opo Eva a kale a limbililwa uuwanawa waJehova, noshe eta iizemo yini? (b) Uuwanawa waJehova owu na oku tu nwetha mo ngiini, nomolwashike?

¹⁹ Sho Satana a hongolola Eva moshikunino shaEden, okwe mu ningitha a kale a limbililwa uuwanawa waJehova. Jehova okwa lombwele Adam a ti: “Lya komuti kehe meyana.” Mokati komiti omayovi ndhoka dha li moshikunino, omuti owala gumwe a li e yi indika. Ihe tala nkene Satana a li a pula Eva tango, sho a ti: “Kalunga okwe mú lombwele shili, mwaa lye komiti adhihe dhomeyana?” (Genesis 2:9, 16; 3:1) Satana okwa li a pilike oohapu dhaJehova opo a dhiladhilithe Eva kutya Jehova okwe yi imba uuwanawa wontumba. Ondunge yaSatana oya li ya pondola. Eva okwa li a tameke okukala a limbililwa uuwanawa waKalunga ngoka a li e mu pa kehe shimwe. Aalumentu naakiintu yamwe mboka ya ka landula ko nayo osho ya ningi.

²⁰ Otu shi kutya onkantu ndjoka Eva a katuka oye tu etele oluhodhi nokumona iihuna okundji kunena. Natu kale metsokumwe noohapu dhaJeremia 31:12 ndhoka tadhi ti: “Otaa nyanyukilwa uuwanawa wandje.” Uuwanawa waJehova otawu tu nyanyudha shili. Inatu pumbwa tu kale twa limbililwa omainyengotompelo ge molwaashoka ye omwaanawa. Otatu vulu okukala twe mu inekela thiluthilu, molwaashoka mboka ye mu hole okwe ya halela uuwanawa.

21, 22. (a) Omomikalo dhini wa hala okuulika olupandu lwoye omolwuuwanawa waJehova? (b) Uukwatya wuni tatu ka kundathana montopolwa tayi landula, nowa yooloka ko ngiini kuuwanawa?

 ²¹ Ohatu kala twa nyanyukwa uuna twa mona ompito okulombwela yalwe kombinga yuuwanawa waKalunga. Episalomi 145:7 otali popi oshigwana shaJehova tali ti: “Otaa ka tanga uuwanawa woye owindji.” Ohatu mono uuwanawa we esiku kehe momukalo gwontumba nogwongandi. Omolwashike itoo kala ho pandula Jehova esiku kehe kondandalunde omolwuuwanawa mboka he ku ningile? Okukala hatu dhiladhila kuuwanawa we noku wu lombwela yalwe esiku kehe noku mu pandula, otashi ke tu kwathela tu holele Kalunga ketu omwaanawa. Sho tatu ningi oonkambadhala dhokulonga uuwanawa ngaashi ye, otatu ka hedha popepi naye. Omuyapostoli omunamimvo Johannes okwa nyola a ti: “Kuume kandje omuholike ino, holela shoka oshiwinayi, ihe holela shoka oshiwanawa. Oshoka shaa ngoka ha longo uuwanawa, oye ogwaKalunga.”—3 Johannes 11.

²² Uuwanawa waJehova owa pambathana wo nuukwatya we wulwe. Pashiholelwa, Kalunga ‘oku udha esilohenda’ nenge ohole yi na uudhiginini. (Eksodus 34:6) Esilohenda lye oli ikalekelwa inali fa uuwanwa we molwaashoka ohe li ulukile unene tuu aapiya ye aadhiginini. Otatu ki ilonga nkene he shi ningi montopolwa tayi landula.